Yitso 17
Taomɔ Shweshweeshwe Shihilɛ yɛ Nyɔŋmɔ Webii Ateŋ
1, 2. Yɛ mɛɛ gbɛ nɔ shihilɛ ni adesai yɔɔ mli lɛ tamɔ he ni gbɔmɛi yɔɔ ni ahum etswa yɛ jɛmɛ?
SUSUMƆ akɛ ahum ko ni naa wa etswa yɛ he ni oyɔɔ lɛ. Oshia lɛ hiɛ ekpata, ni onibii fɛɛ elaaje. Ewa akɛ aaana niyenii. Efee tamɔ nɔ ni hiɛnɔkamɔ bɛ shihilɛ lɛ mli. Kɛkɛ ni trukaa akɛ nibii ni akɛduroɔ mɛi ba. Akɛ niyenii kɛ hehaa nii babaoo ebaha. Ama shia hee aha bo. Ŋwanejee ko bɛ he akɛ obaada gbɔmɔ ni to gbɛjianɔ ni tamɔ nɛkɛ lɛ shi.
2 Nɔ ko ni tamɔ nakai miiya nɔ ŋmɛnɛ. Taakɛ nakai ahum lɛ ji lɛ, Adam kɛ Hawa atuatsemɔ lɛ kɛ naagba babaoo baha adesa weku lɛ. Adesai Paradeiso shia lɛ laaje. Kɛjɛ nakai be lɛ nɔ kɛbaa nɛɛ, adesa nɔyelii nyɛɛɛ abu gbɔmɛi ahe kɛjɛ tawuu, efɔŋ feemɔ, kɛ jalɛsane ni ayeee he. Nyɔŋmɔjamɔ eshi gbɔmɛi babaoo ni mumɔŋ niyenii kpakpa he hɔmɔ miiye amɛ. Shi kɛ aaawie yɛ mumɔŋ lɛ, Yehowa Nyɔŋmɔ kɛ niyenii, hehaa nii, kɛ wɔɔhe miiha bianɛ. Mɛɛ gbɛ nɔ etsɔɔ efeɔ nakai?
“TSULƆ ANƆKWAFO KƐ NILELƆ”
3. Mɛɛ gbɛ nɔ Yehowa tsɔɔ ekɛ nibii ni eto he gbɛjianɔ lɛ haa adesai, ni mɛɛ nɔkwɛmɔ nii tsɔɔ enɛ?
3 Atsɔɔ gbɛjianɔ ko ni ato nɔ akɛ nibii yaduroɔ, ni Yehowa eto mumɔŋ nibii ahe gbɛjianɔ nakai nɔŋŋ kɛha ewebii. Akɛ nɔkwɛmɔ nɔ lɛ, Israelbii lɛ bafee “Yehowa asafo” aaafee afii 1,500 sɔŋŋ. Mɛi ni yɔɔ amɛteŋ ji mɛi ni sɔmɔ akɛ gbɛ ni Nyɔŋmɔ tsɔɔ nɔ etsɔɔ e-Mla lɛ. (1 Kronika 28:8; 2 Kronika 17:7-9) Yehowa to Kristofoi agbɛjianɔtoo lɛ shishi yɛ Ŋ.B. klɛŋklɛŋ afii oha lɛ mli. Ato asafoi, ni amɛtsu nii yɛ nɔyeli kuu ni bɔfoi lɛ kɛ onukpai lɛ feɔ lɛ agbɛtsɔɔmɔ shishi. (Bɔfoi lɛ Asaji 15:22-31) Nakai nɔŋŋ hu ŋmɛnɛ, Yehowa tsɔɔ kuu ko ni ato amɛ gbɛjianɔ lɛ nɔ ekɛ ewebii yeɔ. Te wɔfeɔ tɛŋŋ wɔleɔ enɛ?
4. “Tsulɔ anɔkwafo kɛ nilelɔ” lɛ etsɔɔ akɛ eji namɔ yɛ ŋmɛnɛŋmɛnɛ bei nɛɛ amli, ni mɛɛ gbɛ nɔ atsɔɔ akɛ nibii ni Nyɔŋmɔ eto he gbɛjianɔ yɛ mumɔŋ lɛ haa?
4 Yesu kɛɛ akɛ beni eba Maŋtsɛyeli hewalɛ mli lɛ, abaana ni “tsulɔ anɔkwafo kɛ nilelɔ” lɛ kɛ “ŋmaa” miiha E-sɛɛnyiɛlɔi lɛ “yɛ be ni sa nɔ.” (Mateo 24:45-47) Namɔ nɛkɛ “tsulɔ” nɛɛ baji beni akɛ Yesu ta sɛi nɔ yɛ ŋwɛi akɛ Maŋtsɛ yɛ 1914 lɛ? Eka shi faŋŋ akɛ, jeee Kristendom osɔfoi lɛ ni. Ejaakɛ nɔ ni amɛfeɔ titri ji lakamɔ wiemɔi ni fiɔ amɛ diɛŋtsɛ amɛ maji lɛ amli nɔyelii lɛ asɛɛ ni amɛkɛlɛɔ amɛ asafoŋbii lɛ yɛ Jeŋ Ta I be lɛ mli. Shi no mli lɛ anɔkwa Kristofoi akuu ko ni akɛ Nyɔŋmɔ mumɔ krɔŋkrɔŋ lɛ efɔ amɛ mu ni amɛji mɛi ni Yesu tsɛ amɛ akɛ “asafo kuu bibioo” lɛ fã lɛ kɛ mumɔŋ niyenii kpakpa ni eba yɛ ebe naa pɛpɛɛpɛ miiha. (Luka 12:32) Nɛkɛ Kristofoi ni afɔ amɛ mu nɛɛ shiɛ Nyɔŋmɔ Maŋtsɛyeli lɛ moŋ fe gbɔmɔ nɔyelii. Nɔ ni ejɛ enɛ mli eba yɛ afii abɔ lɛ amli ji “tooi krokomɛi” akpekpei abɔ ni sumɔɔ jalɛ nifeemɔ ni kɛ amɛhe ebabɔ “tsulɔ” ni afɔ amɛ mu lɛ ahe kɛmiidi anɔkwa jamɔ sɛɛ. (Yohane 10:16) Nyɔŋmɔ kɛ “tsulɔ anɔkwafo” lɛ kɛ ŋmɛnɛŋmɛnɛ beaŋ Nɔyeli Kuu lɛ tsuɔ nii ni ekɛkudɔɔ ewebii ni ato amɛ gbɛjianɔ lɛ koni amɛkɛ mumɔŋ niyenii, hehaa nii, kɛ wɔɔhe aha mɛi fɛɛ ni sumɔɔ ni amɛnine ashɛ gbɛjianɔtoi nɛɛ anɔ lɛ.
“ŊMAA YƐ BE NI SA NƆ”
5. Mɛɛ mumɔŋ shihilɛ yɔɔ je lɛŋ ŋmɛnɛ, shi mɛni Yehowa feɔ yɛ enɛ he?
5 Yesu kɛɛ: “Shi jeee aboloo kɛkɛ haa gbɔmɔ yi naa wala; shi moŋ wiemɔ fɛɛ wiemɔ ni jɛɔ [Yehowa] daaŋ lɛ.” (Mateo 4:4) Shi nɔ ni yɔɔ mɔbɔ ji akɛ, gbɔmɛi ateŋ mɛi ni fa booo Nyɔŋmɔ wiemɔi atoi. Taakɛ Yehowa gbalɔ Amos gba fɔ shi lɛ, nii ni “jeee aboloo hɔmɔ loo nu kumai ni, shi Yehowa wiemɔi lɛ atoiboo nɔ̃ ni” lɛ yɛ. (Amos 8:11) Mumɔŋ hɔmɔ miiye mɛi ni sumɔɔ Nyɔŋmɔjamɔ waa lɛ po. Ni kɛlɛ, Yehowa suɔmɔnaa nii ji akɛ “ehere gbɔmɛi fɛɛ yiwala, koni amɛshɛ anɔkwale lɛ lee mli.” (1 Timoteo 2:3, 4) No hewɔ lɛ, ekɛ mumɔŋ niyenii babaoo miiha. Shi nɛgbɛ abaanyɛ aná yɛ?
6. Yehowa elɛ ewebii yɛ mumɔŋ yɛ blema bei lɛ amli yɛ mɛɛ gbɛ nɔ?
6 Yehowa kɛ mumɔŋ niyenii eha ewebii akɛ kuu yɛ yinɔsane be fɛɛ mli. (Yesaia 65:13) Akɛ nɔkwɛmɔ nɔ lɛ, Israel osɔfoi lɛ bua hii, yei, kɛ gbekɛbii anaa akɛ kuu koni atsɔɔ amɛ Nyɔŋmɔ Mla. (5 Mose 31:9, 12) Klɛŋklɛŋ afii oha lɛ mli Kristofoi lɛ to asafoi ahe gbɛjianɔ ni amɛfee kpeei kɛha mɛi fɛɛ atsɔsemɔ kɛ hewalɛwoo yɛ nɔyeli kuu lɛ gbɛtsɔɔmɔ shishi. (Romabii 16:5; Filemon 1, 2) Yehowa Odasefoi nyiɛɔ nɔkwɛmɔ nɔ nɛɛ sɛɛ. Akɛ miishɛɛ miifɔ bo nine koni oba amɛkpeei fɛɛ.
7. Kristofoi akpeei ni aaaya daa lɛ kɔɔ nilee kɛ hemɔkɛyeli he yɛ mɛɛ gbɛ nɔ?
7 Shi ekolɛ, okase babaoo momo yɛ Biblia lɛ ni okaseɔ yɛ teemɔŋ lɛ mli. Ekolɛ mɔ ko eye ebua bo. (Bɔfoi lɛ Asaji 8:30-35) Shi abaanyɛ akɛ ohemɔkɛyeli lɛ ato tso ni atɛo ni baanyɛ agbi ni egbo kɛji akɛ akwɛɛɛ nɔ jogbaŋŋ lɛ he. No hewɔ lɛ, esa akɛ onine ashɛ mumɔŋ niyenii kpakpa ni lɛɔ gbɔmɔtso lɛ nɔ. (1 Timoteo 4:6) Kristofoi akpeei kɛ tsɔsemɔ he gbɛjianɔtoo ni akɛhaa nɔtonɔto, ni afee ni ewaje bo yɛ mumɔŋ, koni eye ebua bo ni oya nɔ oda yɛ hemɔkɛyeli mli, yɛ be mli ni onilee yɛ Nyɔŋmɔ he lɛ yaa hiɛ lɛ haa.—Kolosebii 1:9, 10.
8. Mɛni hewɔ awoɔ wɔ hewalɛ ni wɔya Yehowa Odasefoi akpeei ashishi?
8 Kpeei tsuɔ yiŋtoo kroko ni he hiaa he nii. Paulo ŋma akɛ: “Nyɛhaa wɔsusua wɔhe koni wɔkanya wɔhe kɛwo suɔmɔ kɛ nitsumɔi kpakpai amli, ni wɔkakwa wɔhe naabuamɔ.” (Hebribii 10:24, 25, NW) Hela wiemɔ ni atsɔɔ shishi akɛ “kanya” lɛ hu shishinumɔ baanyɛ afee “ajɔ naa.” Biblia mli abɛ ko kɛɛ akɛ: “Dade jɔɔ dade naa. Nakai gbɔmɔ jɔɔ gbɔmɔ kroko hiɛ.” (Abɛi 27:17, NW) Wɔ fɛɛ ‘wɔhiɛ ni aaajɔ naa’ be fɛɛ be lɛ he miihia. Daa gbi mli nɔnyɛɛi ni jɛ je lɛŋ baanyɛ aha wɔ hemɔkɛyeli aba shi. Kɛ wɔtee Kristofoi akpeei lɛ, wɔwoɔ wɔhe hewalɛ. (Romabii 1:11, 12) Asafo lɛ mli bii diɔ bɔfo Paulo ŋaawoo akɛ “nyɛyaa nɔ nyɛshɛjeshɛjea nyɛhe mii ni nyɛtswaa nyɛhe nyɛmaa shi” lɛ sɛɛ, ni nibii ni tamɔ nɛkɛ jɔɔ wɔ hemɔkɛyeli naa. (1 Tesalonikabii 5:11, NW) Kristofoi akpeei ashishi ni wɔɔya daa lɛ hu tsɔɔ akɛ wɔsumɔɔ Nyɔŋmɔ ni ehaa wɔnaa hegbɛ wɔkɛjieɔ eyi.—Lala 35:18.
“NYƐWOA SUƆMƆ”
9. Yehowa eto okadi yɛ suɔmɔ kpojiemɔ mli yɛ mɛɛ gbɛ nɔ?
9 Paulo ŋma akɛ: “Nyɛwoa suɔmɔ ni ji emuuyeli kpãa lɛ.” (Kolosebii 3:14) Yehowa eduro wɔ kɛ hehaa nii ni tamɔ nɛkɛ. Yɛ mɛɛ gbɛ nɔ? Kristofoi baanyɛ ajie suɔmɔ kpo ejaakɛ eji Yehowa mumɔ krɔŋkrɔŋ lɛ yibii ni Nyɔŋmɔ kɛha lɛ ateŋ ekome. (Galatabii 5:22, 23) Yehowa diɛŋtsɛ ejie suɔmɔ ni fe fɛɛ kpo kɛtsɔ e-Bi koome lɛ ni etsu lɛ koni wɔna naanɔ wala lɛ nɔ. (Yohane 3:16) Nɛkɛ suɔmɔ kpojiemɔ ni fe fɛɛ nɛɛ kɛ nɔkwɛmɔ nɔ ha wɔ yɛ nɛkɛ su nɛɛ kpojiemɔ mli. Bɔfo Yohane ŋma akɛ: “Kɛ Nyɔŋmɔ sumɔ wɔ nɛkɛ lɛ, esa akɛ wɔ hu wɔsumɔsumɔɔ wɔhe.”—1 Yohane 4:11.
10. Te wɔɔfee tɛŋŋ wɔna “nyɛmimɛi anaanyobɔɔ muu lɛ fɛɛ” he sɛɛ?
10 Kpeei ni oooya yɛ Maŋtsɛyeli Asa lɛ nɔ lɛ baaha ona hegbɛ ni fe fɛɛ ni ojie suɔmɔ kpo otsɔɔ. Jɛmɛ obaana gbɔmɛi sɔrɔtoi babaoo yɛ. Ŋwanejee ko bɛ he akɛ obaanu he akɛ ona amɛteŋ mɛi pii ahe miishɛɛ amrɔ nɔŋŋ. Shi, gbɔmɛi asui yɛ sɔrɔto yɛ mɛi ni sɔmɔɔ Yehowa lɛ ateŋ po. Ekolɛ, tsutsu lɛ, oku ohiɛ oshwie gbɔmɛi ni nyaaa nibii kɛ sui komɛi ni onyaa he lɛ ahe lɛ anɔ. Shi, esa akɛ Kristofoi “ana suɔmɔ aha nyɛmimɛi anaanyobɔɔ muu lɛ fɛɛ.” (1 Petro 2:17, NW) No hewɔ lɛ, ha efee oti ni ma ohiɛ akɛ ooole mɛi ni yɔɔ Maŋtsɛyeli Asa lɛ nɔ lɛ daa—aŋkroaŋkroi po ni afii ni amɛye, amɛsu kɛ baŋ, amɛ hewolo nɔ su, loo woloŋlee yɔɔ sɔrɔto yɛ onɔ̃ he lɛ. Eba akɛ ooona akɛ amɛteŋ mɔ fɛɛ mɔ yɛ su ko ni hi fe fɛɛ ni asumɔɔ waa.
11. Mɛni hewɔ esaaa akɛ gbɔmɛi asui sɔrɔtoi ni yɔɔ Yehowa webii ateŋ lɛ gbaa onaa lɛ?
11 Esaaa akɛ bɔ ni gbɔmɛi asu kɛ baŋi sɔrɔtoi yɔɔ yɛ asafo lɛ mli lɛ gbaa onaa. Akɛ nɔkwɛmɔ nɔ lɛ, ŋɔɔ lɛ akɛ tsɔnei sɔrɔtoi babaoo miifa gbɛ yɛ omasɛi, yɛ gbɛ lɛ nɔ. Jeee fɛɛ woɔ foi pɛpɛɛpɛ, ni jeee fɛɛ hu yɔɔ shihilɛ kome too lɛ nɔŋŋ mli. Ekomɛi efa gbɛ shitoi babaoo, shi taakɛ oji lɛ, kpaako ekrokomɛi eje shishi. Shi yɛ nɛkɛ sɔrɔto-feemɔi nɛɛ fɛɛ sɛɛ lɛ, amɛ fɛɛ amɛmiifa gbɛ kɛmiitsɔ nakai gbɛ lɛ nɔ. Nakai ji bɔ ni aŋkroaŋkroi ni yɔɔ asafo lɛ mli lɛ tamɔ. Jeee amɛ fɛɛ amɛnaa Kristofoi asui yɛ oyaiyeli kome too lɛ nɔŋŋ mli. Kɛfata he lɛ, jeee amɛ fɛɛ amɛyɔɔ gbɔmɔtsoŋ loo henumɔŋ shihilɛ kome mli. Mɛi komɛi esɔmɔ Yehowa afii pii; kpaako mɛi krokomɛi eje shishi. Ni kɛlɛ amɛ fɛɛ amɛnyiɛ gbɛ ni kɛ mɔ yaa naanɔ wala mli lɛ nɔ, ‘amɛ fɛɛ amɛyitsoŋ kɛ jwɛŋmɔ efee ekome.’ (1 Korintobii 1:10) No hewɔ lɛ, taomɔ nibii ni woɔ mɔ hewalɛ lɛ moŋ fe gbɔjɔmɔi ni yɔɔ mɛi ni yɔɔ asafo lɛ mli lɛ ahe lɛ. Nakai feemɔ baaha otsui anya, ejaakɛ obaayoo akɛ Nyɔŋmɔ yɛ nɛkɛ gbɔmɛi nɛɛ ateŋ lɛlɛŋ. Ni yɛ anɔkwale mli lɛ biɛ ji he ni obaasumɔ ni ohi.—1 Korintobii 14:25.
12, 13. (a) Kɛ mɔ ko ni yɔɔ asafo lɛ mli lɛ tɔ̃ onɔ lɛ, mɛni obaanyɛ ofee? (b) Mɛni hewɔ esaaa akɛ okɛ mlifu toɔ lɛ?
12 Akɛni adesai fɛɛ yeee emuu hewɔ lɛ, yɛ bei komɛi amli lɛ mɔ ko ni yɔɔ asafo lɛ mli baakɛɛ loo efee nɔ ko ni baagba onaa. (Romabii 3:23) Kaselɔ Yakobo ŋma yɛ anɔkwayeli mli akɛ: “Wɔ fɛɛ wɔtɔ̃ɔ babaoo; kɛ mɔ ko tɔ̃ɔɔ yɛ wiemɔ mli lɛ, lɛ lɛ nuu ni hi kɛwula shi ji lɛ.” (Yakobo 3:2) Te obaafee onii oha tɛŋŋ kɛ mɔ ko tɔ̃ onɔ? Biblia mli abɛ ko kɛɔ akɛ: “Gbɔmɔ ni yɔɔ jwɛŋmɔ lɛ, emli fuuu mra, ni ehiɛ ni ekuɔ efɔɔ nɔtɔmɔ nɔ lɛ, ehiɛnyam ni.” (Abɛi 19:11) Jwɛŋmɔ ni aaaná lɛ tsɔɔ akɛ ooona nii kɛteke hiɛaŋhiɛaŋ shihilɛ, onu nibii ni hɔlɔ shishi ni ha gbɔmɔ lɛ wie loo efee nii yɛ gbɛ pɔtɛɛ ko nɔ lɛ shishi. Wɔteŋ mɛi pii kɛ jwɛŋmɔ tsuɔ nii ni wɔkɛjieɔ wɔnaa yɛ wɔ tɔmɔi ahe. Mɛni hewɔ okɛtsuuu nii ni okɛnu mɛi krokomɛi ashishi ni okɛhà emuu ni amɛyeee lɛ anɔ?—Mateo 7:1-5; Kolosebii 3:13.
13 Kaaha ohiɛ miikpa nɔ akɛ esa akɛ wɔkɛ sane ake mɛi krokomɛi kɛ́ wɔ diɛŋtsɛ lɛ wɔnine aaashɛ Yehowa dɛŋ eshaifaa nɔ. (Mateo 6:9, 12, 14, 15) Kɛ wɔkɛ anɔkwale lɛ nyiɛɔ lɛ, wɔkɛ mɛi krokomɛi baaye yɛ suɔmɔ mli. (1 Yohane 1:6, 7; 3:14-16; 4:20, 21) No hewɔ lɛ, kɛ naagba ko baka bo kɛ mɔ aŋkro ko ni yɔɔ asafo lɛ mli lɛ teŋ lɛ, wuu oshi mlifu kɛ hetsɛ̃ ni okɛaato. Kɛ owo suɔmɔ lɛ, no lɛ obaabɔ mɔdɛŋ ni osaa sane lɛ, ni oshashaoŋ shi akɛ oookpa fai kɛji akɛ bo ji mɔ ni tɔ̃.—Mateo 5:23, 24; 18:15-17.
14. Mɛɛ sui nɛkɛ esa akɛ wɔwo?
14 Esa akɛ sui krokomɛi ni kɔɔ suɔmɔ he afata wɔ mumɔŋ hehaa nii lɛ ahe. Paulo ŋma akɛ: “Nyɛwoa musuŋtsɔlɛ, mlihilɛ, heshibaa jwɛŋmɔ, mlijɔlɛ, tsuishitoo.” Nɛkɛ sui nɛɛ, ni suɔmɔ ebɔle fɛɛ he lɛ ji “gbɔmɔ hee” ni Nyɔŋmɔ gbeyeishemɔ yɔɔ mli lɛ fã. (Kolosebii 3:10, 12) Ani obaabɔ mɔdɛŋ ni okɛ nii ni tamɔ nɛkɛ aha ohe yɛ nɛkɛ gbɛ nɔ? Titri lɛ kɛ okɛ nyɛmimɛi asuɔmɔ ha ohe lɛ, no dani obaaná Yesu kaselɔi lɛ akadimɔ nii lɛ eko, ejaakɛ ekɛɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.”—Yohane 13:35.
HE NI YƆƆ SHWESHWEESHWE
15. Asafo lɛ tamɔ yibaamɔ he yɛ mɛɛ gbɛ nɔ?
15 Asafo lɛ hu sɔmɔɔ akɛ yibaamɔ hé, hebuu abobaa hé ni obaanyɛ onu he akɛ oyɛ shweshweeshwe yɛ jɛmɛ. Jɛmɛ obaana gbɔmɛi ni ja yɛ amɛtsuiŋ ni miibɔ mɔdɛŋ ni amɛfee nɔ ni ja yɛ Nyɔŋmɔ hiɛ lɛ yɛ. Amɛteŋ mɛi pii ejie nakai nifeemɔi kɛ sui gbohii ni oobɔ mɔdɛŋ ni oye nɔ kunim lɛ amɛshwie. (Tito 3:3) Amɛbaanyɛ amɛye amɛbua bo, ejaakɛ akɛɛ wɔ akɛ “nyɛjatsui lɛ nyɛkpeekpeea nyɛhe nyɛterea.” (Galatabii 6:2) Bɔ ni eji lɛ, gbɛ ni kɛ mɔ yaa naanɔ wala mli lɛ sɛɛdii bafeɔ bo diɛŋtsɛ ogbɛnaa nii. (Galatabii 6:5; Filipibii 2:12) Ni kɛlɛ, Yehowa kɛ Kristofoi asafo lɛ eha akɛ yelikɛbuamɔ kɛ sɛɛfimɔ nɔ̃ kpele ni yɔɔ naakpɛɛ. Bɔ fɛɛ bɔ ni onaagbai lɛ haoɔ bo ha lɛ, oyɛ jɛɛhe ko ni yɔɔ naakpɛɛ—asafo ko ni suɔmɔ yɔɔ mli ni baadamɔ omasɛi yɛ piŋmɔ loo fimɔ bei amli.—Okɛto Luka 10:29-37; Bɔfoi lɛ Asaji 20:35 he.
16. Mɛɛ yelikɛbuamɔ asafoŋ onukpai lɛ kɛhaa?
16 Mɛi ni fata mɛi ni baaba abafi osɛɛ lɛ ahe ji “gbɔmɛi ateŋ nikee nii”—asafoŋ onukpai ni ahala amɛ, loo nɔkwɛlɔi, ni jɛɔ amɛsuɔmɔ kɛ ekãafeemɔ mli amɛkwɛɔ tooi lɛ. (Efesobii 4:8, 11, 12, NW; Bɔfoi lɛ Asaji 20:28; 1 Petro 5:2, 3) Yesaia gba yɛ amɛhe akɛ: “Mɔ fɛɛ mɔ aaatsɔ tamɔ abobaa he yɛ kɔɔyɔɔ naa kɛ teemɔ he yɛ nugbɔnɛmɔ naa, tamɔ faai yɛ ŋa kpataa nɔ loo tɛsaa kpele ko ni haa hɔɔŋ yɛ shikpɔŋ gbiŋ nɔ.”—Yesaia 32:2.
17. (a) Mɛɛ yelikɛbuamɔ nɛkɛ Yesu sumɔɔ ni ekɛha titri? (b) Mɛɛ gbɛjianɔ Nyɔŋmɔ wo shi akɛ ebaato kɛha ewebii?
17 Beni Yesu yɔɔ shikpɔŋ nɔ lɛ, no mli lɛ suɔmɔ nɔkwɛmɔ ni aaajɛ jamɔ mli hiɛnyiɛlɔi lɛ adɛŋ aba lɛ eko kwraa bɛ. Shihilɛ ni gbɔmɛi lɛ yɔɔ mli lɛ sa ehe waa, ni eesumɔ ni eye ebua amɛ yɛ mumɔŋ titri. Amɛnii fee Yesu mɔbɔ ejaakɛ “etɔ amɛ ni amɛfee yuuyaa tamɔ tooi ni bɛ kwɛlɔ.” (Mateo 9:36) Kwɛ bɔ ni enɛ tsɔɔ ŋmɛnɛŋmɛnɛ shihilɛ mli ni mɛi ni ŋmɛɔ amɛtsui shi yɛ naagbai ni kumɔɔ mɔ tsui ni mɔ ko bɛ ni amɛaatsɔ amɛhe kɛaaya eŋɔɔ kɛha mumɔŋ yelikɛbuamɔ kɛ miishɛjemɔ lɛ yɔɔ mli lɛ mli jogbaŋŋ ehaa! Shi Yehowa webii yɛ mumɔŋ yelikɛbuamɔ, ejaakɛ ewo shi akɛ: “Maŋɔ tookwɛlɔi mato amɛnɔ, ni amɛlɛ amɛ, ni amɛsheŋ gbeyei, ni amɛtsui hu efaŋ dɔŋŋ, ni amɛteŋ eko eko eshwɛŋ!”—Yeremia 23:4.
18. Mɛni hewɔ esa akɛ wɔya onukpa ko ŋɔɔ kɛ mumɔŋ yelikɛbuamɔ he miihia wɔ lɛ?
18 Esa akɛ ole onukpai ni ahala amɛ ni yɔɔ asafo lɛ mli lɛ. Amɛyɛ niiashikpamɔ babaoo yɛ Nyɔŋmɔ nilee lɛ kɛ nitsumɔ mli, ejaakɛ ana hesaai kɛha nɔkwɛlɔi taakɛ eyɔɔ Biblia lɛ mli lɛ yɛ amɛhe. (1 Timoteo 3:1-7; Tito 1:5-9) Kaashashao shi akɛ oooya amɛteŋ mɔ kome ŋɔɔ, kɛ mumɔŋ yelikɛbuamɔ he miihia bo koni oye jeŋba loo su ko ni kɛ Nyɔŋmɔ taomɔ nii kpaaa gbee lɛ nɔ kunim lɛ. Obaana akɛ onukpai lɛ nyiɛɔ Paulo ŋaawoo nɛɛ sɛɛ: “Nyɛshɛjea mɛi ni tsui fãa lɛ amii; nyɛherea mɛi ni feɔ gbedee lɛ; nyɛtoa nyɛtsui shi nyɛhaa mɛi fɛɛ.”—1 Tesalonikabii 2:7, 8; 5:14.
OKƐ YEHOWA WEBII ANÁ SHWESHWEESHWE SHIHILƐ MLI ŊƆƆMƆ
19. Mɛɛ jɔɔmɔi Yehowa kɛha mɛi ni taoɔ shweshweeshwe shihilɛ yɛ egbɛjianɔtoo lɛ mli lɛ?
19 Eyɛ mli akɛ shihilɛ ni yeee emuu mli wɔyɔɔ bianɛ moŋ, shi Yehowa kɛ mumɔŋ niyenii, hehaa nii, kɛ wɔɔhe haa wɔ. Shi kɛlɛ, esa akɛ wɔmɛ Nyɔŋmɔ shiwoo jeŋ hee lɛ bɔni afee ni wɔnine ashɛ heloonaa Paradeiso diɛŋtsɛ mli sɛɛnamɔi anɔ. Shi mɛi ni ji Yehowa gbɛjianɔtoo lɛ fã lɛ miiná mumɔŋ paradeiso shihilɛ ni yɔɔ shweshweeshwe mli ŋɔɔmɔ bianɛ. Ezekiel gba yɛ amɛhe akɛ: “Amɛaahi shi shweshweeshwe, ni mɔ ko mɔ ko woŋ amɛhe gbeyei.”—Ezekiel 34:28; Lala 4:9.
20. Mɛɛ gbɛ nɔ Yehowa baatsɔ ato nɔ fɛɛ nɔ ni wɔkɛaasha afɔle yɛ ejamɔ hewɔ lɛ najiaŋ?
20 Kwɛ bɔ ni wɔbaanyɛ wɔda shi wɔha akɛ Yehowa jɛɔ suɔmɔ mli etoɔ mumɔŋ nibii ahe gbɛjianɔ kɛtsɔɔ e-Wiemɔ kɛ gbɛjianɔtoo lɛ nɔ! Tsi obɛŋkɛ Nyɔŋmɔ webii ahe. Kaashashao shi yɛ nɔ ni onanemɛi loo wekumɛi baasusu yɛ ohe yɛ Nyɔŋmɔ he nilee ni ona hewɔ lɛ he gbeyeishemɔ mli. Mɛi komɛi ekpɛlɛŋ nɔ akɛ okɛ Yehowa Odasefoi miibɔ ni oyaa kpeei yɛ Maŋtsɛyeli Asa lɛ nɔ. Shi Nyɔŋmɔ baato nɔ fɛɛ nɔ ni okɛaasha afɔle yɛ ejamɔ hewɔ lɛ najiaŋ kɛteke nɔ aha bo. (Maleaki 3:10) Agbɛnɛ hu, Yesu kɛɛ: “Mɔ ko bɛ ni eshi shia loo nyɛmimɛi hii loo nyɛmimɛi yei loo tsɛ loo nyɛ loo ŋa loo bii loo abɔɔi yɛ mi kɛ sanekpakpa lɛ hewɔ, ní enaŋ shiai kɛ nyɛmimɛi hii kɛ nyɛmimɛi yei kɛ nyɛmɛi kɛ bii kɛ abɔɔi toi oha yɛ benɛ be nɛɛ mli beebe, kɛ yiwalɛ hu, ni jeŋ ni baaba lɛŋ hu eeena naanɔ wala.” (Marko 10:29, 30) Hɛɛ, bɔ fɛɛ bɔ ni nɔ ni oshi yɛ osɛɛ lɛ kɛ nɔ ni esa akɛ oŋmɛ otsui shi yɛ mli lɛ fa ha lɛ, obaanyɛ oná naanyobɔɔ kpakpa kɛ mumɔŋ shweshweeshwe shihilɛ yɛ Nyɔŋmɔ webii ateŋ.
KAA ONILEE OKWƐ
Namɔ ji “tsulɔ anɔkwafo kɛ nilelɔ” lɛ?
Mɛɛ gbɛjianɔ Yehowa eto koni ekɛlɛ wɔ yɛ mumɔŋ?
Mɛɛ gbɛ mɛi ni yɔɔ Kristofoi asafo lɛ mli lɛ aaatsɔ nɔ aye abua wɔ?
[Baafa muu mfoniri ni yɔɔ baafa 165]