“No Nɔŋŋ Ekɛwieɔ Lolo, Tsɛ Egbo”

HABEL kwɛ etoo kuu ni miiye nii kpoo yɛ gɔji lɛ anɔ lɛ. Kɛkɛ ni ekolɛ ekwɛ nii kɛteke etoi lɛ kɛtee he ko shɔŋŋ akɛ ebaana lalilɛi ŋmɛoo ko lo. Ele akɛ lalilɛi klante ko ni foɔ ehe yɛ jɛmɛ, ekpaaa ehe foo, ni etsĩ gbɛ ni yaa Eden abɔɔ lɛ mli lɛ naa. Be ko ni ho lɛ, jɛmɛ efɔlɔi yɔɔ, shi amrɔ nɛɛ ni Habel kwɛɔ jɛmɛ nɛɛ, efɔlɔi lɛ jio, bii lɛ jio, amɛteŋ mɔ ko nyɛɛɛ jɛmɛ amɛya. Feemɔ Habel he mfoniri okwɛ; naa lɛ ni edamɔ shi ni ewo ehiɛ nɔ eeshwie eyiŋ yɛ e-Bɔlɔ lɛ he, ni shwane kɔɔyɔɔ ŋmaii ko miitswa eyitsɔi kɛmiiya kɛmiiba. Ani abaanyɛ atsa gbɛ ni ebakã adesa kɛ Nyɔŋmɔ teŋ lɛ? No pɛ ji nɔ ni kã Habel tsui nɔ.

Habel kɛ bo miiwie ŋmɛnɛ. Ani oonu egbee? Ekolɛ obaakɛɛ akɛ enɛ nyɛŋ aba lɛ nakai kɔkɔɔkɔ. Nɔ hewɔ ji akɛ, Adam bi ni ji enyɔ nɔ nɛɛ gbo jeeŋmɔ nɛ. Ewui tsɔ sũ aafee afii 6000 sɔŋŋ nɛ. Biblia lɛ haa wɔleɔ yɛ gbohii lɛ ahe akɛ: “Amɛleee nɔ ko nɔ ko.” (Jajelɔ 9:5, 10) Kɛfata he lɛ, aŋmako Habel naa wiemɔ kome flo po yɛ Biblia lɛ mli. No hewɔ lɛ te ebalɛ tɛŋŋ ni ewieɔ etsɔɔ wɔ lɛ?

Akɛ mumɔ tsirɛ bɔfo Paulo ni ewie Habel he akɛ: “No nɔŋŋ ekɛwieɔ lolo, tsɛ egbo.” (Hebribii 11:4) Mɛni nɔ Habel tsɔɔ ekɛ wɔ wieɔ? Kɛtsɔ hemɔkɛyeli nɔ. Habel ji adesai ateŋ mɔ klɛŋklɛŋ ni ná sũ ni nɔ bɛ nɛɛ. Ejie hemɔkɛyeli kpo jogbaŋŋ aahu ákɛ enɔkwɛmɔnɔ nɛɛ hiɛ kã lolo, ni eji shishitoonɔ ni sa jogbaŋŋ ni wɔbaanyɛ wɔkase ŋmɛnɛ. Kɛ́ wɔkase nii kɛjɛ ehemɔkɛyeli lɛ mli, ni wɔfee wɔnii taakɛ efee lɛ, belɛ no tsɔɔ akɛ Habel nifeemɔ lɛ kɛ wɔ miiwie diɛŋtsɛ yɛ gbɛ ni mɔɔ shi nɔ.

Eyɛ mli akɛ awieee Habel he babaoo yɛ Biblia lɛ mli, shi mɛni wɔbaanyɛ wɔkase yɛ lɛ, kɛ ehemɔkɛyeli lɛ he? Ha wɔkwɛ.

Beni abɔ klɛŋklɛŋ adesai enyɔ lɛ sɛɛ etsɛɛɛ kɛkɛ ni afɔ Habel. Yesu wie Habel he sɛɛ mli akɛ ehi shi “kɛjɛ jeŋ shishitoo mli.” (Luka 11:50, 51) Ekã shi faŋŋ akɛ no mli lɛ jeŋ ni Yesu wieɔ he lɛ kɔɔ adesai ni yɔɔ hiɛnɔkamɔ akɛ abaakpɔ̃ amɛ kɛjɛ esha mli lɛ ahe. Eyɛ mli akɛ Habel ji adesa ni ji ejwɛ nɔ ni ba shihilɛ mli, shi etamɔ nɔ ni lɛ ji mɔ klɛŋklɛŋ ni Nyɔŋmɔ na akɛ abaanyɛ akpɔ̃.a Eyɛ faŋŋ akɛ mɛi ateŋ ni Habel da yɛ lɛ eyanáaa enɔ hewalɛ kpakpa.

Eyɛ mli akɛ no mli lɛ adesai aje lɛ je shishi etsɛko moŋ, shi eba lɛ akɛ amɛkɛ shihilɛ ni yɔɔ mɔbɔ akpe. Ŋwanejee ko bɛ he akɛ no mli lɛ Habel fɔlɔi, Adam kɛ Hawa ahe yɛ fɛo pam ni amɛyɛ gbɔmɔtsoŋ hewalɛ jogbaŋŋ. Shi amɛtɔ̃ tɔ̃mɔ kple, ni amɛle nakai. Be ko ni eho lɛ amɛye emuu, ni amɛle akɛ amɛbaahi shi kɛya naanɔ. Kɛkɛ ni amɛtse Yehowa Nyɔŋmɔ hiɛ atua, ni ashwie amɛ kɛjɛ amɛ-Paradeiso shĩa ni yɔɔ Eden abɔɔ lɛ mli lɛ mli. Akɛni amɛkɛ nibii ni amɛ diɛŋtsɛ amɛsumɔɔ lɛ ye klɛŋklɛŋ gbɛhe—amɛshwiei po ahiamɔnii—hewɔ lɛ, emuuyeli kɛ naanɔ wala ŋmɛɛ amɛ.—1 Mose 2:15–3:24.

Beni atswa Adam kɛ Hawa naneshishi tu kɛje abɔɔ lɛ mli lɛ, amɛyanáaa shihilɛ lɛ mlɛo yɛ abɔɔ lɛ sɛɛ. Kɛlɛ, beni amɛfɔ amɛ-klɛŋklɛŋ bi lɛ amɛwo lɛ Kain, loo “Nɔ ko ni Afee,” ni Hawa kɛɛ akɛ: “Miná binuu yɛ Yehowa yelikɛbuamɔ naa.” Nɔ ni Hawa wie nɛɛ tsɔɔ akɛ ekolɛ, sane ni Yehowa wie yɛ abɔɔ lɛ mli lɛ yɛ ejwɛŋmɔ mli; no ji akɛ yoo ko baawo shwiei loo ebaaná “seshi” ní baakpãtã mɔ fɔŋ ni laka Adam kɛ Hawa ni eha amɛgba afã lɛ hiɛ. (1 Mose 3:15; 4:1) Ani Hawa yasusu akɛ lɛ ji yoo ni atsĩ etã yɛ gbalɛ lɛ mli lɛ ni ákɛ Kain ji shiwoo “seshi” lɛ?

Kɛ́ nakai eyasusu lɛ, no lɛ eelaka ehe. Kɛfata he lɛ, kɛ́ Hawa kɛ Adam dũ nakai susumɔ lɛ amɛwo Kain mli beni edaa lɛ, no lɛ amɛbɔ Kain ní lɛ hu eyeee emuu lɛ ablo waa diɛŋtsɛ. Fee sɛɛ lɛ, Hawa fɔ binuu ni ji enyɔ nɔ, shi wɔnaaa nɔ ko ni tsɔɔ ákɛ akɛ miishɛɛ wie efɔmɔ lɛ he taakɛ afee yɛ Kain fɔmɔ lɛ he lɛ. Amɛwo lɛ gbɛ́i akɛ Habel, ni eshishi ji “Kɔɔyɔɔ,” loo “Yaka nɔ.” (1 Mose 4:2) Ani nakai gbɛ́i ni amɛkɛwo lɛ lɛ tsɔɔ akɛ amɛkpaaa nɔ ko kpakpa ko gbɛ yɛ Habel dɛŋ, oookɛɛ amɛyɛ hiɛnɔkamɔ kwraa yɛ Kain mli fe Habel? Nakai ni jio, jeee nakai ni jio, amɛ pɛ amɛle.

Bɔ fɛɛ bɔ ni sane lɛ ji lɛ, fɔlɔi ni yɔɔ ŋmɛnɛ lɛ baanyɛ akase nibii babaoo kɛjɛ klɛŋklɛŋ fɔlɔi nɛɛ adɛŋ. Ani obaatsɔ owiemɔi kɛ onifeemɔi anɔ odũ henɔwomɔ, pɛsɛmkunya, kɛ sui gbohii krokomɛi owo obii lɛ amli? Aloo obaatsɔɔ obii lɛ koni amɛsumɔ Yehowa Nyɔŋmɔ ní amɛbɔ mɔdɛŋ amɛkɛ lɛ abɔ naanyo? Dɔlɛ sane ji akɛ klɛŋklɛŋ fɔlɔi lɛ eyanyɛɛɛ amɛsɔ̃ nɛɛ he nii amɛtsu. Kɛlɛ, no mli lɛ, hiɛnɔkamɔ yɛ kɛha amɛshwiei lɛ.

Eeenyɛ eba akɛ beni oblahii enyɔ nɛɛ daa lɛ, Adam tsɔse amɛ koni amɛle nitsumɔ ni ehe baahia ni amɛtsu kɛkwɛ weku lɛ. Kain kɔ okwaayeli; Habel kɔ tookwɛmɔ.

Kɛlɛ, Habel fee nɔ ko ni he hiaa kwraa fe nakai. Beni be shwieɔ mli lɛ, Habel hemɔkɛyeli lɛ mli bawa—su kpakpa ní sɛɛ mli lɛ Paulo wie he lɛ. Bo lɛ susumɔ he okwɛ. Adesa ko bɛ ni Habel baakwɛ enɔkwɛmɔnɔ lɛ nɔ. Belɛ, te eba lɛ tɛŋŋ ni hemɔkɛyeli ni eyɔɔ yɛ Yehowa Nyɔŋmɔ mli lɛ mli bawa lɛ? Ha wɔsusu nibii etɛ komɛi ni ekolɛ enyɛ eye ebua Habel ni ehemɔkɛyeli lɛ mli bawa lɛ he.

Yehowa adebɔɔ nii.

Eji anɔkwale akɛ Yehowa elomɔ shikpɔŋ lɛ, ni eha ewoɔ ŋmei kɛ aŋlɛŋlɛ, enɛ haaa okwaayeli afee mlɛo. Kɛlɛ, shikpɔŋ lɛ ba nii bɔni Habel weku náa eko kɛkwɛɔ amɛhe. Ni alomɔɔɔ kooloi lɛ, ní filikilɔi kɛ loi fata he lɛ; ni alomɔɔɔ gɔji, kpaakpoi, fai, kɛ ŋshɔi lɛ; nakai nɔŋŋ hu alomɔɔɔ atatui, oblɔtu, hulu, nyɔɔŋtsere, kɛ ŋulamii lɛ. He fɛɛ he kwraa ni Habel kwɛɔ lɛ, enaa odaseyelii ni tsɔɔ akɛ Yehowa Nyɔŋmɔ, mɔ ni bɔ nibii fɛɛ lɛ yɛ suɔmɔ ni nɔ bɛ, kɛ nilee, ni emli hi hu. (Romabii 1:20) Beni ejwɛŋ nibii ni Nyɔŋmɔ ebɔ kɛ Nyɔŋmɔ sui lɛ anɔ lɛ, ehemɔkɛyeli lɛ mli bawa waa diɛŋtsɛ.

Ekã shi faŋŋ akɛ Habel hé be kɛsusu Yehowa Nyɔŋmɔ he. Feemɔ Habel he mfoniri okwɛ, naa lɛ ni eekwɛ etooku lɛ. Tookwɛlɔ nitsumɔ biɔ nyiɛmɔ babaoo. Ekpalaa kooloi ni he jɔ nɛɛ kɛkɔɔ gɔji, kɛtsɔɔ jɔɔi amli, kɛfoɔ fai—fɛɛ lɛ ekɛmiitao jwɛi fɔ, nubui ni hi fe fɛɛ, kɛ hejɔɔmɔ hei kpakpai kɛha toi lɛ. Nyɔŋmɔ adebɔɔ nibii lɛ fɛɛ ateŋ lɛ, etamɔ nɔ ni gwaŋtɛŋ ji kooloo ni yelikɛbuamɔ he hiaa amɛ waa, oookɛɛ aje gbɛ afee amɛ koni gbɔmɔ akpala amɛ loo etsɔɔ amɛ gbɛ ni ebu amɛ he. Ani Habel na akɛ lɛ hu Mɔ ko ni le nii kwraa fe adesa, ni eyɔɔ hewalɛ hu fe adesa lɛ gbɛtsɔɔmɔ, hebuu kɛ yelikɛbuamɔ he miihia lɛ? Ŋwanejee ko bɛ he akɛ etsĩ nibii tamɔ nakai atã yɛ esɔlemɔ mli, ni no ha ehemɔkɛyeli lɛ tee nɔ emli wa.

Yehowa shiwoi.

Ekolɛ, Adam kɛ Hawa gba nibii ni ba ni ha ashwie amɛ kɛjɛ Eden abɔɔ lɛ mli lɛ amɛtsɔɔ amɛbi hii lɛ. No hewɔ lɛ, Habel ná nibii babaoo ni ebaajwɛŋ nɔ.

Yehowa wie akɛ abaalomɔ shikpɔŋ lɛ. Ekã shi faŋŋ akɛ Habel na ŋmei kɛ aŋlɛŋlɛ lɛ akɛ eji nakai wiemɔi lɛ amlibaa. Yehowa gba hu akɛ, Hawa baaná hejaramɔ yɛ hɔŋɔɔ kɛ bifɔmɔ mli. Ŋwanejee ko bɛ he akɛ beni afɔɔ Habel nyɛmimɛi lɛ, eyɔse akɛ nakai wiemɔi lɛ hu eba mli anɔkwale. Yehowa tsɔ hiɛ ena akɛ Hawa baanu he akɛ esa akɛ ewu lɛ asumɔ lɛ ni esusu ehe, ni Hawa baafee enɛ kɛteke nɔ , ni Adam hu baaye eŋa lɛ nɔ. Habel na mɔbɔ sane nɛɛ mlibaa yɛ enyɛ kɛ etsɛ teŋ. Fɛɛ mli lɛ, Habel na akɛ abaanyɛ akɛ he afɔ̃ Yehowa wiemɔ lɛ nɔ kwraa kɛmɔ shi. No hewɔ lɛ, Habel ná yiŋtoi kpakpai ni ebaanyɛ edamɔ nɔ ekɛ ehe afɔ̃ Nyɔŋmɔ shiwoo ni kɔɔ “seshi” ni baajaje nibii ni tɔ̃tɔ̃ yɛ Eden abɔɔ lɛ mli lɛ he lɛ nɔ.—1 Mose 3:15-19.

Yehowa tsuji.

Adesai ni hi shi yɛ Habel beaŋ lɛ eyafeee hemɔkɛyeli he nɔkwɛmɔnɔ kpakpa ni Habel baanyɛ akase, kɛlɛ, jeee adesai pɛ ji mɛi ni no mli lɛ Nyɔŋmɔ ebɔ ni Habel baanyɛ akase amɛhemɔkɛyeli lɛ. Beni atswa Adam kɛ Hawa naneshishi tu kɛshi abɔɔ lɛ mli lɛ, Yehowa kwɛ koni amɛ jio amɛbii lɛ jio, mɔ ko kwraa akanyɛ ebote nakai shikpɔŋ nɔ Paradeiso lɛ mli. Yehowa ŋɔ lalilɛi klante ni tsɔmɔɔ ehe kɛ kerubim hu, ni ji bɔfoi ni hiɛ gbɛhei ni kwɔlɔ eto trom lɛ naa.—1 Mose 3:24.

Feemɔ Habel ni eekwɛ kerubim nɛɛ beni eji gbekɛ lɛ he mfoniri okwɛ. Akɛni amɛjie amɛhe kpo akɛ gbɔmɛi hewɔ lɛ, Habel baanyɛ ana akɛ amɛji mɛi ni he wala. Ni nakai “klante” ni yaa nɔ etsoɔ, ni yaa nɔ etsɔmɔɔ ehe lɛ hu haa mɔ naa kpɛɔ ehe naakpa. Beni Habel daa lɛ, ani be ko shɛ ní ena akɛ kerubim nɛɛ anitsumɔ eje amɛtsine, ni amɛshi amɛgbɛhe lɛ? Dabida. Beni gbii lɛ hoɔ kɛboteɔ afii lɛ amli, ni afii lɛ hu kuɔ bɔɔ he lɛ, nakai bɔɔnii hewalɔi ni nyɛɔ amɛsusuɔ nii ahe, ni amɛkpɛɔ amɛyiŋ lɛ shiii nitsumɔ ni akɛwo amɛdɛŋ lɛ kɔkɔɔkɔ. Enɛ ha Habel ná le akɛ, Yehowa Nyɔŋmɔ yɛ tsuji ni feɔ jalɛ nii ni yeɔ lɛ anɔkwa. Habel na anɔkwa ni ayeɔ Yehowa kɛ toiboo ni afeɔ ahaa lɛ lɛ yɛ kerubim nɛɛ ahe, nɔ ko ni enaaa yɛ eweku lɛ mli. Ekã shi faŋŋ akɛ bɔfoi nɛɛ anɔkwɛmɔnɔ lɛ waje ehemɔkɛyeli.

Kɛ́ Habel jwɛŋ nibii fɛɛ ni Yehowa etsɔ edebɔɔ nii, eshiwoi kɛ etsuji anɔkwɛmɔnii lɛ anɔ ejie shi etsɔɔ lɛ lɛ anɔ lɛ, enaa akɛ no yaa nɔ ewajeɔ ehemɔkɛyeli lɛ. Ani enɛ etsɔɔɔ faŋŋ akɛ wɔbaanyɛ wɔkase nibii babaoo kɛjɛ enɔkwɛmɔnɔ lɛ mli? Oblahii kɛ oblayei titri amii baashɛ amɛhe waa akɛ amɛaale akɛ amɛbaanyɛ amɛná anɔkwa hemɔkɛyeli yɛ Yehowa Nyɔŋmɔ mli, ekɔɔɔ he eko nɔ ni amɛweku mli bii lɛ feɔ. Akɛni adebɔɔ nibii ni yɔɔ naakpɛɛ babaoo ebɔle wɔ, ni wɔyɔɔ Biblia muu lɛ fɛɛ, kɛ adesai babaoo hu ni amɛjie hemɔkɛyeli diɛŋtsɛ kpo lɛ hewɔ lɛ, wɔyɛ nibii babaoo ŋmɛnɛ ni wɔbaanyɛ wɔdamɔ nɔ wɔtswa wɔhemɔkɛyeli lɛ wɔma shi.

Beni Habel hemɔkɛyeli yɛ Yehowa mli lɛ yaa nɔ edaa lɛ, etao gbɛ nɔ ni ebaatsɔ ejie nakai hemɔkɛyeli lɛ kpo yɛ enifeemɔ mli. Kɛlɛ, mɛni po adesa ni bɛ nɔ ko mli lɛ baanyɛ aŋɔha jeŋ muu fɛɛ Bɔlɔ lɛ? Ekã shi faŋŋ akɛ adesai adɛŋ nikeenii loo yelikɛbuamɔ ko he ehiaaa Nyɔŋmɔ. Beni be shwie mli lɛ, Habel bayɔse anɔkwale ko ni nɔ bɛ kwraa: No kɛkɛ ji, kɛ́ ekɛ enii ni eyɔɔ lɛ amli nɔ ni fe fɛɛ ke Yehowa lɛ—ni ekɛ jwɛŋmɔ ni ja jogbaŋŋ fee nakai lɛ—eŋwɛi Tsɛ ni yɔɔ suɔmɔ lɛ hiɛ baasɔ waa.

No hewɔ lɛ, Habel kpɛ mli akɛ ekɛ etooi lɛ eko baake Yehowa. Ehala tooi lɛ ateŋ nɔ ni hi fe fɛɛ, ni ji kromɔ bii lɛ ekomɛi kɛha afɔleshãa lɛ; ni beni eshãa afɔle lɛ, ekɛ tooi lɛ fãi ni esusuɔ akɛ nomɛi sa jogbaŋŋ lɛ shã afɔle lɛ. Nakai beaŋ nɔŋŋ lɛ, Kain hu tao akɛ ená Nyɔŋmɔ dɛŋ jɔɔmɔ kɛ ehiɛ duromɔ, no hewɔ lɛ, lɛ hu esaa eŋmɔshi nibii lɛ ekomɛi kɛha afɔleshãa. Shi, jwɛŋmɔ ni ehiɛ yɛ afɔleshãa lɛ he lɛ tamɔɔɔ Habel nɔ lɛ. Srɔtofeemɔ lɛ baje kpo faŋŋ beni nyɛmimɛi nɛɛ kɛ amɛfɔleshãai lɛ haa lɛ.

Eeenyɛ efee akɛ Adam bihii enyɔ lɛ fɛɛ kɛ afɔleshãa latɛ kɛ la tsu nii beni amɛshãa afɔle lɛ, ekolɛ yɛ kerubim, ni no beaŋ lɛ amɛ pɛ amɛji Yehowa najiaŋdaamɔlɔi yɛ shikpɔŋ lɛ nɔ lɛ, ahiɛ. Yehowa ha ana esusumɔ yɛ afɔleshãai nɛɛ ahe. Wɔkaneɔ akɛ: “Yehowa hiɛ sɔ Habel kɛ efɔle lɛ.” (1 Mose 4:4) Amaniɛbɔɔ lɛ etsɔɔɔ gbɛ nɔ ni Nyɔŋmɔ tsɔ ejie ehiɛsɔɔ lɛ kpo. Shi, mɛni hewɔ ehiɛ sɔ Habel lɛ?

Ani afɔleshãa lɛ diɛŋtsɛ hewɔ? Habel kɛ kooloo ni hiɛ kã ni wala yɔɔ emli ha, ni efɔse ela ni ji ewala diɛŋtsɛ lɛ eshwie. Ani Habel yɔse bɔni afɔleshãa ni tamɔ nɛkɛ lɛ he hiaa waa ha lɛ? Afii ohai abɔ komɛi yɛ Habel gbele sɛɛ lɛ, Nyɔŋmɔ ha akɛ toobi ni kpa ko bɛ ehe lɛ afɔleshãa lɛ damɔ shi kɛha afɔle ni Lɛ diɛŋtsɛ e-Bi ni kpa ko bɛ ehe, ni ji “Nyɔŋmɔ toobi” ni efeko efɔŋ ko lɛ la ni abaafɔse ashwie lɛ. (Yohane 1:29; 2 Mose 12:5-7) Kɛlɛ, Habel leee bɔni Yehowa kɛ afɔleshãai tsu nii sɛɛ mli lɛ he nɔ ko loo enuuu shishi.

Nɔ ni wɔle pɛ kɛkɛ ji enɛ: Habel kɛ nii ni eyɔɔ lɛ amli nɔ ni hi fe fɛɛ lɛ ha. Jeee afɔle lɛ pɛ kɛkɛ Yehowa hiɛ sɔ, shi ehiɛ sɔ Habel diɛŋtsɛ hu. Suɔmɔ ni Habel yɔɔ kɛha Yehowa kɛ hemɔkɛyeli diɛŋtsɛ ni eyɔɔ yɛ emli lɛ tsirɛ lɛ ni efee nakai.

Kain nɔ lɛ bɛ lɛ nakai. Yehowa hiɛ esɔɔɔ ‘Kain kɛ efɔle lɛ.’ (1 Mose 4:5) Jeee akɛ Kain afɔle lɛ esaaa; Mla ni Nyɔŋmɔ wo yɛ sɛɛ mli lɛ bi koni akɛ ŋmɔshi nibii ashã afɔle. (3 Mose 6:14, 15) Shi Biblia lɛ wie Kain he akɛ, “lɛ diɛŋtsɛ enitsumɔi lɛ efɔji ni.”(1 Yohane 3:12) Taakɛ eji yɛ mɛi babaoo agbɛfaŋ ŋmɛnɛ lɛ, Kain susu akɛ na ni abaana yɛ kpo nɔ gbɛ akɛ etuu ehe eha Nyɔŋmɔ lɛ kɛkɛ fa. Enifeemɔ ha ana faŋŋ akɛ ebɛ hemɔkɛyeli diɛŋtsɛ kɛ suɔmɔ kɛha Yehowa.

Beni Kain na akɛ Yehowa hiɛ esɔɔɔ lɛ lɛ, ani ebɔ mɔdɛŋ akɛ ebaakase Habel nɔkwɛmɔnɔ lɛ? Kɔkɔɔkɔ. Kain mli wo la naakpa ewo enyɛmi lɛ. Yehowa na nɔ ni yaa nɔ yɛ Kain tsui mli lɛ, ni ejɛ tsuishitoo mli ekɛ Kain susu nii ahe. Yehowa bɔ Kain kɔkɔ akɛ gbɛ ni ekɔ lɛ baaha efee esha ni yɔɔ hiɛdɔɔ, ni Eha ele nɔ ni esa akɛ efee koni ‘ehiɛ aba nyam,’ kɛ́ Kain baabo toi kɛkɛ ni etsake gbɛ ni ekɔ lɛ. —1 Mose 4:6, 7.

Kain booo Nyɔŋmɔ kɔkɔbɔɔ lɛ toi. No najiaŋ lɛ, efɔ̃ enyɛmi fioo ni heɔ lɛ eheɔ lɛ nine koni amɛyashara shi yɛ ŋa lɛ nɔ. Beni amɛyɔɔ ŋa lɛ nɔ lɛ, Kain te shi wo enyɛmi Habel ni egbe lɛ. (1 Mose 4:8) Yɛ gbɛ ko nɔ lɛ, Habel bafee mɔ klɛŋklɛŋ ni gbo yiwaa gbele yɛ Nyɔŋmɔ jamɔ hewɔ, lɛ ji klɛŋklɛŋ la odasefonyo. Tsɛ egbo moŋ, shi ehe saji lɛ gboko.

Yɛ mfonirifeemɔ gbɛ nɔ lɛ, Habel la lɛ bolɔ kɛtsɛ Yehowa Nyɔŋmɔ kɛha oweletɔɔ, loo jalɛsaneyeli. Ni Nyɔŋmɔ kwɛ ni atsu jalɛsaneyeli he nii, no ji agbala Kain, yitsoŋwalɔ lɛ toi yɛ yiwalɛ nii ni efee lɛ hewɔ. (1 Mose 4:9-12) Nɔ ni fe fɛɛ lɛ, Habel hemɔkɛyeli he sane ni aŋma afɔ̃ shi lɛ kɛ wɔ wieɔ ŋmɛnɛ. Afii abɔ ni ekɛ hi shi—aaafee afii 100 lɛ yɛ kuku tsɔ kɛha adesai ni hi shi yɛ nakai beaŋ lɛ, shi Habel kɛ afii nɛɛ tsu nii jogbaŋŋ kɛsa Nyɔŋmɔ hiɛ. Egbo be mli ni eyɔɔ hekɛnɔfɔ̃ɔ akɛ eŋwɛi Tsɛ, ni ji Yehowa lɛ sumɔɔ esane ni ekpɛlɛɔ enɔ. (Hebribii 11:4) Belɛ, wɔbaanyɛ wɔná hekɛnɔfɔ̃ɔ akɛ, eyɛ Yehowa kaimɔ ni bɛ naagbee lɛ mli kɛmiimɛ koni atee lɛ shi kɛba shikpɔŋ nɔ paradeiso lɛ mli. (Yohane 5:28, 29) Ani okɛ lɛ baakpe yɛ jɛmɛ? Obaanyɛ okɛ lɛ akpe kɛji otswa ofai shi akɛ obaabo Habel toi beni ewieɔ lɛ, koni okase ehemɔkɛyeli ni nɔ bɛ lɛ.