Na Hemɔkɛyeli Ni Damɔ Anɔkwale Nɔ
“Kɛ hemɔkɛyeli bɛ lɛ, anyɛŋ Nyɔŋmɔ hiɛ asa; ejaakɛ mɔ ni baa Nyɔŋmɔ ŋɔɔ lɛ, ja ehe eye akɛ eyɛ, ni eji mɛi ni taoɔ esɛɛ gbɛ lɛ anyɔmɔwolɔ bu.”—HEBRIBII 11:6.
1, 2. Mɛɛ gbɛ nɔ atsɔ aka Adam hemɔkɛyeli akwɛ yɛ, ni mɛni jɛ mli ba?
HEMƆKƐYELI biɔ babaoo fe ni aaahe aye akɛ Nyɔŋmɔ yɛ. Ŋwanejee ko bɛ klɛŋklɛŋ gbɔmɔ Adam yiŋ, yɛ shihilɛ mli ni Yehowa Nyɔŋmɔ yɔɔ lɛ he. Eka shi faŋŋ akɛ Nyɔŋmɔ kɛ Adam wie kɛtsɔ E-Bi ni ji Wiemɔ lɛ nɔ. (Yohane 1:1-3; Kolosebii 1:15-17) Ni kɛlɛ, Adam laaje naanɔ wala hegbɛ lɛ ejaakɛ ebooo Yehowa toi ni enaaa emli hemɔkɛyeli.
2 Etamɔ nɔ ni oshara ba Adam wɔsɛɛ miishɛɛ lɛ he, beni eŋa, Hawa, booo Yehowa toi lɛ. Ákɛ yoo nɛɛ aaaje edɛŋ lɛ he susumɔ lɛ ka klɛŋklɛŋ gbɔmɔ lɛ hemɔkɛyeli! Ani Nyɔŋmɔ aaana tsabaa ko aha nɛkɛ naagba nɛɛ yɛ gbɛ ni aaaha Adam aya nɔ ana miishɛɛ ni ahi aha lɛ lɛ nɔ? Akɛni Adam kɛ ehe yabɔ Hawa he yɛ tɔmɔ lɛ mli hewɔ lɛ, etsɔɔ akɛ esusuuu he nakai. Ebɔ mɔdɛŋ ni etao tsabaa eha naagba lɛ yɛ lɛ diɛŋtsɛ egbɛ nɔ, fe ni ekɛ hiɛdɔɔ aaatao ŋwɛi gbɛtsɔɔmɔ. Akɛni Adam etsɔɔɔ hemɔkɛyeli yɛ Yehowa mli hewɔ lɛ, ekɛ gbele ba lɛ diɛŋtsɛ enɔ kɛ eshwiei hu fɛɛ nɔ.—Romabii 5:12.
Mɛni Ji Hemɔkɛyeli?
3. Yɛ mɛɛ gbɛ nɔ bɔ ni Biblia lɛ tsɔɔ hemɔkɛyeli mli ehaa lɛ yɔɔ sɔrɔto yɛ bɔ ni wiemɔi ashishitsɔɔmɔ wolo ko tsɔɔ shishi lɛ?
3 Wiemɔi komekomei ashishitsɔɔmɔ wolo ko tsɔɔ hemɔkɛyeli mli akɛ “he ni aheɔ nɔ ko ayeɔ shiŋŋ, tsɛbelɛ abɛ ehe odaseyeli ko.” Shi Biblia lɛ maa nɔ ni tamɔɔɔ nakai nɔ mi, ni tsɔɔ akɛ efiii susumɔ ni tamɔ nɛkɛ sɛɛ. Hemɔkɛyeli damɔ anɔkwa saji anɔ, edamɔ nibii ni yɔɔ diɛŋtsɛ lɛ anɔ, edamɔ anɔkwale nɔ. Ŋmalɛi lɛ kɛɔ akɛ: “Hemɔkɛyeli ji nii ni mɛi ahiɛ ka nɔ lɛ agbɛkpamɔ nɔmimaa, nii nɔ yɔɔ diɛŋtsɛ lɛ ahe odaseyeli yɛ faŋŋ, tsɛ anaaa.” (Hebribii 11:1, New World Translation) Gbɔmɔ ni yɔɔ hemɔkɛyeli lɛ yɛ nɔmimaa akɛ nɔ fɛɛ nɔ ni Nyɔŋmɔ ewo shi yɛ he lɛ tamɔ nɔ ni eba mli momo po. Bɔ ni nibii ni anaaa ni yɔɔ diɛŋtsɛ lɛ he odaseyeli lɛ mli wa waa ha hewɔ lɛ, akɛɔ akɛ hemɔkɛyeli tamɔ nakai odaseyeli lɛ nɔŋŋ.
4. Wolo ko fiɔ bɔ ni Biblia lɛ tsɔɔ hemɔkɛyeli mli ehaa lɛ sɛɛ yɛ mɛɛ gbɛ nɔ?
4 Afɔɔ Hebri feemɔ-wiemɔ ni tsɔɔ saji amli, ʼa·manʹ lɛ shishi tsɔɔmɔ yɛ bei komɛi amli akɛ “hemɔkɛyeli” yɛ New World Translation lɛ mli. Taakɛ Theological Wordbook of the Old Testament lɛ tsɔɔ lɛ, “nɔ ni hɔ eshishifa lɛ shishinumɔ mli diɛŋtsɛ ji nɔ ni baaba diɛŋtsɛ lɛ he susumɔ . . . ni tamɔɔɔ bɔ ni asusuɔ hemɔkɛyeli he akɛ nɔ ko ni baanyɛ aba, kɛ hiɛnɔkamɔ akɛ eeefee anɔkwale, shi nɔmimaa bɛ he.” Wolo ni awieɔ he lɛ nɔŋŋ kɛɔ akɛ: “Akɛ wiemɔ ni ana, ni ji ʼāmēn loo ‘lɛlɛŋ’ lɛ yawo Kpaŋmɔ Hee lɛ mli yɛ wiemɔ ni ji amēn ni ji Ŋleshi wiemɔ ‘amen’ lɛ mli. Yesu kɛ nakai wiemɔ lɛ tsu nii shii abɔ (Mat. 5:18, 26 kɛ hei krokomɛi) koni ekɛma anɔkwale ni sane ko ji lɛ nɔ mi.” Wiemɔ ni atsɔɔ shishi akɛ “hemɔkɛyeli” yɛ Kristofoi a-Hela Ŋmalɛi lɛ amli lɛ hu tsɔɔ he ni aheɔ nɔ ko ni damɔ anɔkwa sane loo anɔkwale nɔ shiŋŋ lɛ ayeɔ.
5. Yɛ mɛɛ gbɛ nɔ akɛ Hela wiemɔ ni atsɔɔ shishi akɛ “gbɛkpamɔ nɔmimaa” yɛ Hebribii 11:1 (NW) lɛ tsu nii yɛ blema nitsumɔ woji amli, ni mɛni ji nɔ ni enɛ tsɔɔ kɛha Kristofoi?
5 Akɛ Hela wiemɔ (hy·poʹsta·sis) ni atsɔɔ shishi akɛ “gbɛkpamɔ nɔmimaa” yɛ Hebribii 11:1 lɛ tsu nii babaoo yɛ blema nitsumɔi ahe woji ni aŋmala yɛ papyrus woji anɔ lɛ mli koni akɛma nɔ ko ni baatsɔ mɔ ko nɔ yɛ wɔsɛɛ be mli lɛ nɔ mi. Woloŋlelɔi, Moulton kɛ Milligan susuɔ akɛ atsɔɔ shishi nɛkɛ: “Hemɔkɛyeli ji nibii ni hiɛ ka nɔ lɛ amla naa hegbɛ ni aŋmala ni asɔo naa.” (Vocabulary of the Greek Testament) Eka shi faŋŋ akɛ kɛji akɛ mɔ ko hiɛ gboshinii ko he mla naa hegbɛ akɛ nɔtsɛ lɛ, ebaanyɛ ena “gbɛkpamɔ nɔmimaa” akɛ gbi ko baaba ni ehiɛnɔkamɔ akɛ enine aaashɛ nɔ lɛ baaba mli.
6. Mɛni Hela wiemɔ ni atsɔɔ shishi akɛ “nii ni yɔɔ diɛŋtsɛ lɛ ahe odaseyeli yɛ faŋŋ” mli yɛ Hebribii 11:1 (NW) lɛ tsɔɔ?
6 Hela wiemɔ ni atsɔɔ shishi akɛ “nii ni yɔɔ diɛŋtsɛ lɛ ahe odaseyeli yɛ faŋŋ” (eʹleg·khos) yɛ Hebribii 11:1 lɛ hiɛ jwɛŋmɔ ni tsɔɔ odaseyeli ni akɛmiiha koni akɛtsɔɔ nɔ ko, titri lɛ nɔ ko ni tamɔɔɔ bɔ ni sane lɛ ji. Odaseyeli ni ji anɔkwale ni ma shi shiŋŋ lɛ haa nɔ ni ho tsutsu ni ayooo lɛ feɔ faŋŋ, ni ekuɔ nɔ ni batamɔ akɛ nakai eji lɛ naa. No hewɔ lɛ yɛ Hebri kɛ Hela Ŋmalɛi lɛ fɛɛ mli lɛ, hemɔkɛyeli jeee “he ni aheɔ nɔ ko ayeɔ shiŋŋ tsɛbelɛ abɛ ehe odaseyeli ko.” Nɔ ni tamɔɔɔ nakai lɛ, hemɔkɛyeli damɔ anɔkwale nɔ.
Edamɔ Shishijee Anɔkwalei Anɔ
7. Te Paulo kɛ David tsɔɔ bɔ ni mɛi ni kpooɔ shihilɛ mli ni Nyɔŋmɔ yɔɔ lɛ ji diɛŋtsɛ lɛ mli tɛŋŋ?
7 Bɔfo Paulo jaje shishijee anɔkwale ko beni eŋma akɛ Bɔlɔ lɛ “he nii ni anaaa ni ji enaanɔ hewalɛ kɛ Nyɔŋmɔyeli lɛ fɛɛ lɛ, kɛjɛ jeŋbɔɔ mli beebe lɛ atsɔɔ enii ni efee lɛ nɔ ayɔseɔ ni anaa faŋŋ, no hewɔ lɛ [mɛi ni teɔ shi woɔ anɔkwale lɛ] amɛbɛ naajiemɔ ko.” (Romabii 1:20) Hɛɛ, “ŋwɛi gbaa Mawu anunyam lɛ,” ni “shikpɔŋ lɛ nɔ eyi tɔ kɛ [e]nibɔɔ nii lɛ.” (Lala 19:2; 104:24) Shi kɛji akɛ mɔ ko sumɔɔɔ ni esusu odaseyeli nɛɛ he hu? Lalatsɛ David kɛɛ: “Mɔfɔŋ woɔ egugɔ nɔ [“akɛni ekuɛŋ ti hewɔ lɛ,” The New English Bible] ekɛɔ: ‘Ebiŋ shi!’ Eyiŋ fɛɛ lɛ: ‘Nyɔŋmɔ ko bɛ!’” (Lala 10:4; 14:1) Hemɔkɛyeli damɔ shishijee anɔkwale akɛ Nyɔŋmɔ yɛ shihilɛ mli lɛ nɔ, yɛ gbɛ ko nɔ.
8. Mɛi ni jieɔ hemɔkɛyeli kpo lɛ nyɛɔ amɛnaa mɛɛ nɔmimaa kɛ sɛɛyoomɔ?
8 Jeee akɛ Yehowa yɛ shihilɛ loo wala mli kɛkɛ; shi anyɛɔ akɛ he fɔɔ enɔ hu, ni wɔbaanyɛ wɔkɛ wɔhe afɔ eshiwoi anɔ. Ekɛɛ akɛ: “Lɛlɛŋ, bɔ ni misusu lɛ, nakai ebaaba mli, ni bɔ ni mito miyiŋ lɛ, nakai ebaama shi.” (Yesaia 14:24; 46:9, 10) Enɛɛmɛi jeee wiemɔi ni shishinumɔ bɛ mli. Odaseyelii ni ma shi shiŋŋ yɛ akɛ gbalɛi ohai abɔ ni aŋmala yɛ Nyɔŋmɔ Wiemɔ lɛ mli lɛ eba mli. Yɛ shishinumɔ nɛɛ hewɔ lɛ, mɛi ni jieɔ hemɔkɛyeli kpo lɛ hu nyɛɔ amɛyɔseɔ Biblia mli gbalɛi krokomɛi fɛɛ ni miina amɛmlibaa lɛ. (Efesobii 1:18) Akɛ nɔkwɛmɔ nɔ lɛ, amɛmiina “okadi” ni tsɔɔ ba ni Yesu eba lɛ, ni Maŋtsɛyeli ni ato ama shi lɛ he shiɛmɔ ni yaa hiɛ kɛ foi lɛ hu fata he lɛ mlibaa, kɛ agbɛnɛ anɔkwa jamɔ mlilɛɛmɔ ni agba afɔ shi lɛ hu. (Mateo 24:3-14; Yesaia 2:2-4; 60:8, 22) Amɛle akɛ etsɛŋ ni jeŋmaji lɛ baabolɔ akɛ “Toiŋjɔlɛ kɛ shweshweeshwe shihilɛ!” ni akɛ yɛ no sɛɛ lɛ etsɛŋ ni Nyɔŋmɔ “baafite mɛi ni fiteɔ shikpɔŋ lɛ.” (1 Tesalonikabii 5:3; Kpojiemɔ 11:18) Mɛɛ jɔɔmɔ enɛ ji nɛkɛ akɛ aaana hemɔkɛyeli ni damɔ gbalɛ mli anɔkwalei anɔ!
Mumɔ Krɔŋkrɔŋ lɛ Yibii
9. Mɛni ji tsakpaa ni ka hemɔkɛyeli kɛ mumɔ krɔŋkrɔŋ teŋ lɛ?
9 Anaa anɔkwale ni hemɔkɛyeli damɔ nɔ lɛ yɛ Biblia lɛ ni jɛ Nyɔŋmɔ mumɔ krɔŋkrɔŋ lɛ nitsumɔ mli lɛ mli. (2 Samuel 23:2; Zakaria 7:12; Marko 12:36) Yɛ sane naatsɔɔmɔ ni ja naa lɛ, belɛ hemɔkɛyeli nyɛŋ ahi shi ni mumɔ krɔŋkrɔŋ lɛ nifeemɔ fataaa he. No hewɔ ni Paulo nyɛ eŋma akɛ: “Mumɔ lɛ yibii ji . . . hemɔkɛyeli” lɛ. (Galatabii 5:22) Shi mɛi pii kpoɔ ŋwɛi anɔkwale lɛ, ni amɛkɛ heloo naa akɔnɔi kɛ jwɛŋmɔi ni haa Nyɔŋmɔ mumɔ lɛ yeɔ awerɛho woɔ amɛshihilɛ he muji. Enɛ hewɔ lɛ, “jeee mɛi fɛɛ yɔɔ hemɔkɛyeli,” ejaakɛ amɛbɛ nɔ ni amɛaadamɔ nɔ amɛna enɛ.—2 Tesalonikabii 3:2; Galatabii 5:16-21; Efesobii 4:30.
10. Mɛɛ gbɛ nɔ mra mli Yehowa tsuji komɛi tsɔɔ yɛ akɛ amɛjieɔ hemɔkɛyeli kpo?
10 Shi Adam seshibii lɛ ateŋ aŋkroaŋkroi komɛi ejie hemɔkɛyeli kpo. Hebribii yitso 11 lɛ tsiɔ Habel, Henok, Noa, Abraham, Sara, Isak, Yakob, Yosef, Mose, Rahab, Gideon, Barak, Samson, Yefta, David kɛ Samuel kɛ Yehowa tsuji babaoo ni atsiii amɛgbɛi ata, shi “aye amɛhe odase kpakpa yɛ hemɔkɛyeli lɛ hewɔ” lɛ agbɛi ata. Kadimɔ nɔ ni atsɔ “hemɔkɛyeli” nɔ atsu lɛ. “Hemɔkɛyeli” Habel kɛsha afɔle . . . eha Nyɔŋmɔ,” ni Noa hu “kɛsaa adeka.” Hemɔkɛyeli Abraham “kɛbo Nyɔŋmɔ toi, ni eyiŋ etee he ni baatsɔ enɔyeli nɔ lɛ.” Hemɔkɛyeli Mose “kɛje Mizraim.”—Hebribii 11:4, 7, 8, 27, 29, 39.
11. Mɛni Bɔfoi lɛ Asaji 5:32 tsɔɔ yɛ gbɔmɛi ni boɔ Nyɔŋmɔ toi lɛ ahe?
11 Eka shi faŋŋ akɛ nakai Yehowa tsuji lɛ fɛɛ fee babaoo fe ni amɛaahe shihilɛ mli ni Nyɔŋmɔ yɔɔ lɛ amɛye kɛkɛ. Akɛni amɛjie hemɔkɛyeli kpo hewɔ lɛ, amɛkɛ amɛhiɛ fɔ enɔ akɛ Mɔ ni ji “mɛi ni taoɔ esɛɛ gbɛ lɛ anyɔmɔwolɔ hu.” (Hebribii 11:6) Amɛfee nɔ ni Nyɔŋmɔ mumɔ lɛ kudɔ amɛ ni amɛfee, amɛkɛ anɔkwale lɛ he anɔkwa nilee ni yɔɔ nakai be lɛ mli lɛ tsu nii, eyɛ mli akɛ efaaa. Kwɛ bɔ ni esoro amɛ yɛ Adam he! Ekɛ hemɔkɛyeli ni damɔ anɔkwale nɔ loo nɔ ni kɛ mumɔ krɔŋkrɔŋ lɛ gbɛtsɔɔmɔ kpaa gbee lɛ tsuuu nii. Nyɔŋmɔ kɛ emumɔ lɛ haa mɛi ni boɔ lɛ toi lɛ pɛ.—Bɔfoi lɛ Asaji 5:32.
12. (a) Habel na hemɔkɛyeli yɛ mɛni mli, ni mɛɛ gbɛ nɔ etsɔ ejie enɛ kpo yɛ? (b) Yɛ amɛhemɔkɛyeli lɛ fɛɛ sɛɛ lɛ, mɛni Yehowa odasefoi ni tsɔ Kristofoi abe lɛ hiɛ lɛ anine shɛɛɛ nɔ?
12 Habel ni sheɔ Nyɔŋmɔ gbeyei, ni tamɔɔɔ etsɛ Adam lɛ, yɛ hemɔkɛyeli. Eka shi faŋŋ akɛ ekase klɛŋklɛŋ gbalɛ ni ajaje akɛ: “Ni [mi, Yehowa Nyɔŋmɔ] mikɛ nyɛɛ aaaŋmɛ okɛ yoo lɛ teŋ, kɛ oseshi kɛ eseshi teŋ; eeetswa oyitso nɔ, ni bo hu oootswa enanetsitsi nɔ” lɛ kɛjɛ efɔlɔi lɛ adɛŋ. (1 Mose 3:15) No hewɔ lɛ Nyɔŋmɔ wo shi akɛ ebaakpata efɔŋfeemɔ hiɛ ni eto jalɛ ema shi ekoŋŋ. Bɔ ni aaafee ni shiwoo nɛɛ aaaba mli lɛ, Habel leee. Shi ehemɔkɛyeli akɛ Nyɔŋmɔ ji mɛi ni kɛ hiɛdɔɔ taoɔ E-sɛɛgbɛ lɛ a-Nyɔmɔwolɔ lɛ mli wa bɔ ni sa ni aaatsirɛ lɛ koni esha afɔle. Eka shi faŋŋ akɛ esusu gbalɛ lɛ he babaoo ni ehe eye akɛ la ni aaafɔse ashwie shi he baahia koni eha shiwoo lɛ aba mli ni ewo adesai anɔ kɛya emuuyeli mli. No hewɔ lɛ kooloo ni Habel kɛsha afɔle lɛ sa. Shi yɛ amɛhemɔkɛyeli lɛ fɛɛ sɛɛ lɛ, Habel kɛ Yehowa tsuji krokomɛi ni tsɔ Kristofoi abe lɛ hiɛ lɛ, “amɛnine shɛɛɛ shiwoo nii lɛ anɔ.”—Hebribii 11:39.
Hemɔkɛyeli ni Aaaha Eye Emuu
13. (a) Mɛni Abraham kɛ David kase yɛ shiwoo lɛ he? (b) Mɛni hewɔ abaanyɛ akɛɛ akɛ “anɔkwale lɛ, Yesu Kristo kɛba” lɛ?
13 Nyɔŋmɔ jie anɔkwalei krokomɛi ni kɔɔ bɔ ni shiwoo ni kɔɔ ‘yoo lɛ seshi’ lɛ he lɛ baaba mli aha lɛ kpo efata he yɛ be kɛ bei amli yɛ afi ohai abɔ lɛ amli. Akɛɛ Abraham akɛ: “Ni oseshi lɛ mli aaajɛ ajɔɔ shikpɔŋ lɛ nɔ jeŋmaji fɛɛ.” (1 Mose 22:18) Sɛɛ mli lɛ, akɛɛ Maŋtsɛ David akɛ shiwoo Seshi lɛ baaba kɛtsɔ emaŋtsɛmɛi awekukpaa lɛ nɔ. Yɛ afi 29 Ŋ.B. lɛ, Seshi lɛ bapue akɛ Yesu Kristo. (Lala 89:4, 5; Mateo 1:1; 3:16, 17) Akɛ mɔ ni tamɔɔɔ Adam ni bɛ hemɔkeyeli lɛ, “naagbee Adam lɛ,” Yesu Kristo, ji mɔ ni ekaaa yɛ hemɔkɛyeli ni ajieɔ lɛ kpo lɛ mli. (1 Korintobii 15:45) Ehi shi akɛ mɔ ni etuu ewala eha Yehowa sɔɔmɔ ni eha gbalɛi pii ni kɔɔ Mesia lɛ he lɛ ba mli. Yesu kɛ enɛ ha anɔkwale ni kɔɔ shiwoo Seshi lɛ he lɛ mli fee faŋŋ, ni eha nibii ni Mose Mla lɛ fee he mfoniri lɛ fee nibii ni yɔɔ diɛŋtsɛ. (Kolosebii 2:16, 17) No hewɔ lɛ abaanyɛ akɛɛ akɛ “anɔkwale lɛ, Yesu Kristo kɛba.”—Yohane 1:17.
14. Yɛ mɛɛ gbɛ nɔ Paulo tsɔɔ Galatabii lɛ akɛ hemɔkɛyeli mli elɛɛ agbɛnɛ?
14 Amrɔ nɛɛ ni anɔkwale lɛ etsɔ Yesu Kristo nɔ kɛba nɛɛ, agbele shishitoo ni akɛ hemɔkɛyeli ni ayɔɔ yɛ “shiwoo” lɛ mli lɛ aaadamɔ nɔ lɛ mli. Aha hemɔkɛyeli ema shi shiŋŋ, ni aha emli elɛɛ. Paulo wie enɛ he etsɔɔ nanemɛi Kristofoi ni afɔ amɛ mu lɛ akɛ: “Shi moŋ ŋmalɛ lɛ eŋɔ nibii fɛɛ eto esha shishi, koni atsɔ Yesu Kristo nɔ hemɔkɛyeli nɔ akɛ shiwoo lɛ aha mɛi ni heɔ yeɔ lɛ. Shi dani hemɔkɛyeli lɛ ba lɛ, akɛ wɔ eto mla shishi, ni aŋa wɔyi ato hemɔkɛyeli ni abaajie kpo lɛ. No hewɔ lɛ mla lɛ etsɔ wɔtsɔselɔ kɛmiiya Kristo nɔ, koni hemɔkɛyeli mli abu wɔ bem yɛ. Shi ni hemɔkɛyeli ba nɛɛ, wɔbɛ tsɔselɔ lɛ shishi dɔŋŋ. Ejaakɛ nyɛ fɛɛ lɛ Nyɔŋmɔ bii ji nyɛ yɛ Kristo Yesu mli kɛtsɔ hemɔkɛyeli lɛ nɔ.”—Galatabii 3:22-26.
15. Mɛɛ gbɛ pɛ nɔ aaatsɔ aha hemɔkɛyeli aye emuu yɛ?
15 Israelbii lɛ na hemɔkɛyeli yɛ bɔ ni Nyɔŋmɔ tsɔ Mla kpaŋmɔ lɛ nɔ ekɛ amɛ ye lɛ mli. Shi agbɛnɛ ehe miihia ni aha hemɔkɛyeli nɛɛ afa. Yɛ mɛɛ gbɛ nɔ? Kɛtsɔ hemɔkɛyeli ni aaana yɛ Yesu ni akɛ mumɔ efɔ lɛ mu lɛ ni ato Mla lɛ he gbɛjianɔ ni enyiɛ amɛhiɛ kɛya eŋɔɔ lɛ nɔ. Nɛkɛ gbɛ nɔ pɛ aaatsɔ ni aha hemɔkɛyeli ni tsɔ Kristofoi abe lɛ hiɛ lɛ aye emuu. Kwɛ bɔ ni ehe hiaa ha akɛ nakai mra be mli Kristofoi lɛ ‘aaakwɛ Yesu Kristo, Mɔ Ni Haa amɛhemɔkɛyeli Yeɔ Emuu kɛ Najiaŋdamɔlɔ Nukpa lɛ’! (Hebribii 12:2) Yɛ anɔkwale mli lɛ, ehe miihia ni Kristofoi fɛɛ afee nakai.
16. Mɛɛ gbɛ nɔ mumɔ krɔŋkrɔŋ ba yɛ gbɛ ni fa babaoo nɔ, ni mɛni hewɔ?
16 Yɛ ŋwɛi anɔkwale lɛ he nilee ni etee hiɛ lɛ kɛ nɔ ni ejɛ mli eba ni ji hemɔkɛyeli ni eye emuu lɛ hewɔ lɛ, ani mumɔ krɔŋkrɔŋ lɛ hu baaba mli yɛ gbɛ ni fa babaoo nɔ? Hɛɛ. Yɛ Pentekoste, afi 33 Ŋ.B. lɛ, afɔse Nyɔŋmɔ mumɔ lɛ, ni ji shiwoo yelikɛbualɔ ni Yesu wie he lɛ ashwie ekaselɔi lɛ anɔ. (Yohane 14:26; Bɔfoi lɛ Asaji 2:1-4) Mumɔ krɔŋkrɔŋ lɛ kɛ amɛ tsu nii yɛ gbɛ ni yɔɔ ehee kwraa nɔ akɛ Kristo nyɛmimɛi ni afɔ amɛ mu. Awaje amɛhemɔkɛyeli, ni ji mumɔ krɔŋkrɔŋ lɛ yibii lɛ eko lɛ. Enɛ wula amɛ kɛha kaselɔ-feemɔ nitsumɔ kpeteŋkpele ni ka amɛhiɛ lɛ.—Mateo 28:19, 20.
17. (a) Anɔkwale ba ni hemɔkeyeli hu ye emuu kɛjɛ 1914 yɛ mɛɛ gbɛ nɔ? (b) Mɛɛ mumɔ krɔŋkrɔŋ lɛ nifeemɔ kɛjɛ 1919 he edaseyeli wɔyɔɔ?
17 Hemɔkɛyeli ba, beni Yesu kɛ ehe ha akɛ Maŋtsɛ ni Ahala Lɛ nɔ ni fe afi 1,900 ni eho nɛ lɛ. Shi akɛni amrɔ nɛɛ eji Maŋtsɛ ni yeɔ nɔ yɛ ŋwɛi hewɔ lɛ, wɔhemɔkɛyeli nɔdaamɔ nɔ—anɔkwale ni ajie lɛ kpo lɛ—eda babaoo, ni eha wɔhemɔkɛyeli lɛ eye emuu. Nakai nɔŋŋ hu awo mumɔ krɔŋkrɔŋ lɛ nitsumɔ mli hewalɛ. Ana enɛ he odaseyeli yɛ faŋŋ mli yɛ 1919, beni mumɔ krɔŋkrɔŋ kanya Nyɔŋmɔ tsuji ni amɛjɔɔ amɛhe nɔ lɛ kɛjɛ shihilɛ ni tamɔ nii ni akpa tsumɔ mli lɛ. (Ezekiel 37:1-14; Kpojiemɔ 11:7-12) Kɛkɛ ni ato mumɔŋ paradeiso ni yɛ afii nyɔŋmai abɔ ni nyiɛ sɛɛ ba lɛ amli lɛ ebaje kpo faŋŋ kɛ anunyam babaoo afi fɛɛ afi lɛ shishi. Ani Nyɔŋmɔ mumɔ krɔŋkrɔŋ lɛ nitsumɔ he odaseyeli ko yɛ ni fe enɛ?
Mɛni Hewɔ Esa Akɛ Wɔpɛi Wɔhemɔkɛyeli Mli?
18. Israel saralɔi aŋkroaŋkroi lɛ ahemɔkɛyeli yɛ sɔrɔto yɛ mɛɛ gbɛ nɔ?
18 Beni ajie Israelbii lɛ kɛjɛ Mizraim nyɔŋyeli mli lɛ sɛɛ nɔŋŋ lɛ, atsu hii 12 koni amɛyasara Kanaan shikpɔŋ lɛ amɛkwɛ. Shi amɛteŋ mɛi nyɔŋma bɛ hemɔkɛyeli, amɛyiŋ fee amɛ kɔshikɔshi yɛ nyɛmɔ ni Yehowa yɔɔ ni ekɛaaha eshiwoo akɛ ekɛ shikpɔŋ lɛ aaaha Israel aba mli lɛ he. Nɔ ni kanya amɛ ji nii ni amɛkɛ amɛhiŋmɛii diɛŋtsɛ nɛɛ na. Yɛ mɛi 12 lɛ ateŋ lɛ, Yoshua kɛ Kaleb pɛ tsɔɔ akɛ amɛkɛ hemɔkɛyeli nyiɛɔ, shi jeee nii ni amɛnaa. (Okɛto 2 Korintobii 5:7 he.) Yɛ hemɔkɛyeli ni amɛjie kpo amɛtsɔɔ hewɔ lɛ, amɛ pɛ ji mɛi ni jɛ nakai gbɔmɛi lɛ ateŋ bote Shiwoo Shikpɔŋ lɛ nɔ.—4 Mose 13:1-33; 14:35-38.
19. Shishitoo ni aaatswa hemɔkɛyeli ama nɔ lɛ mli ekwɔ ŋmɛnɛ fe be fɛɛ yɛ mɛɛ gbɛ nɔ, ni kɛlɛ mɛni esa akɛ wɔfee?
19 Ŋmɛnɛ, wɔdamɔ Nyɔŋmɔ jalɛ jeŋ hee lɛ husui anaa. Kɛ wɔɔnyɛ wɔbote mli lɛ, hemɔkɛyeli he baahia. Yɛ miishɛɛ mli lɛ, anɔkwale lɛ shishitoo ni wɔkɛ nakai hemɔkɛyeli lɛ aaadamɔ nɔ lɛ mli ekwɔ naakpa. Wɔyɛ Nyɔŋmɔ Wiemɔ muu lɛ fɛɛ, Yesu Kristo kɛ esɛɛnyiɛlɔ ni afɔ amɛ mu lɛ anɔkwɛmɔ nɔ lɛ, mumɔŋ nyɛmimɛi hii kɛ yei akpekpei abɔ sɛɛfimɔ, kɛ Nyɔŋmɔ mumɔ krɔŋkrɔŋ sɛɛfimɔ ni fa babaoo fe be fɛɛ. Ni kɛlɛ, wɔɔfee jogbaŋŋ akɛ wɔɔpɛi wɔhemɔkɛyeli mli ni wɔto gbɛjianɔ ni wɔwaje lɛ yɛ be mli ni wɔbaanyɛ wɔfee nakai lɛ.
20. Mɛɛ sanebimɔi ebaafee nɔ ni sa akɛ wɔɔbi wɔhe?
20 Ekolɛ obaakɛɛ akɛ, ‘Oh, miheɔ miyeɔ akɛ anɔkwale lɛ nɛ.’ Shi te ohemɔkɛyeli mli wa ha tɛŋŋ? Bi ohe akɛ: ‘Ani Yehowa ŋwɛi Maŋtsɛyeli lɛ ji pɔtɛɛ kɛha mi taakɛ adesa nɔyeli ji lɛ? Ani miyɔseɔ ni mifiɔ Yehowa gbɛjianɔtoo ni anaa lɛ kɛ e-Nɔyeli Kuu lɛ sɛɛ kpɛŋŋ? Ani mikɛ hemɔkɛyeli hiŋmɛi miina akɛ aakudɔ jeŋmaji lɛ kɛmiiya naagbee gbɛhe mli kɛha Harmagedon? Ani mihemɔkɛyeli lɛ tamɔ “odasefoi babaoo ni . . . tamɔ atatu” ni atsi amɛ ta yɛ Hebribii yitso 11 lɛ anɔ?’—Hebribii 12:1; Kpojiemɔ 16:14-16.
21. Yɛ mɛɛ gbɛ nɔ hemɔkɛyeli kanyaa mɛi ni yɔɔ eko lɛ, ni ájɔɔ amɛ yɛ mɛɛ gbɛ nɔ? (Okɛ saji ni jɛ baafa 13 akrabatsa lɛ mli afata he.)
21 Atsirɛɔ mɛi ni yɔɔ hemɔkɛyeli ni damɔ anɔkwale nɔ lɛ kɛhaa nifeemɔ. Taakɛ afɔle ni Habel sha ni akpɛlɛ nɔ lɛ ji lɛ, amɛ yijiemɔ afɔlei lɛ saa Nyɔŋmɔ hiɛ. (Hebribii 13:15, 16) Taakɛ Noa, jalɛ shiɛlɔ ni bo Nyɔŋmɔ toi lɛ ji lɛ, amɛdiɔ jalɛ sɛɛ akɛ Maŋtsɛyeli shiɛlɔi. (Hebribii 11:7; 2 Petro 2:5) Taakɛ Abraham ji lɛ, mɛi ni yɔɔ hemɔkɛyeli ni damɔ anɔkwale nɔ lɛ boɔ Yehowa toi yɛ nibii ni ehiii haaa amɛ lɛ fɛɛ sɛɛ, kɛ enɛ kɛ amɛ woɔ shihilɛi ni mli wawai fe fɛɛ po mli. (Hebribii 11:17-19) Taakɛ Yehowa tsuji anɔkwafoi ni hi shi yɛ blema bei lɛ amli ji lɛ, amɛŋwɛi Tsɛ ni yɔɔ suɔmɔ lɛ jɔɔ mɛi ni yɔɔ hemɔkɛyeli ŋmɛnɛ lɛ babaoo ni ekwɛɔ amɛnɔ.—Mateo 6:25-34; 1 Timoteo 6:6-10.
22. Abaanyɛ awaje hemɔkɛyeli yɛ mɛɛ gbɛ nɔ?
22 Kɛ oji Yehowa tsulɔ shi onaa akɛ ohemɔkɛyeli egbɔjɔ yɛ gbɛ ko nɔ lɛ, mɛni obaanyɛ ofee? Wajemɔ ohemɔkɛyeli lɛ kɛtsɔ hiɛdɔɔ ni okɛaakase Nyɔŋmɔ Wiemɔ lɛ ni oha anɔkwale nui ni eyi otsui mli obɔ lɛ aho yɔɔ yɛ onaabu lɛ nɔ. (Abɛi 18:4) Kɛ owajeee ohemɔkɛyeli daa lɛ, ebaagbɔjɔ, ekpa nitsumɔ, ni egbo. (1 Timoteo 1:19; Yakobo 2:20, 26) Tswaa ofai shi akɛ enɛ baŋ ohemɔkɛyeli nɔ kɔkɔɔkɔ. Kpa Yehowa yelikɛbuamɔ he fai, ni osɔle akɛ: “Ye obua mihemɔkɛyeli ni mibɛ lɛ!”—Marko 9:24.
Mɛni Ji Ohetooi?
◻ Mɛni ji hemɔkɛyeli?
◻ Mɛni hewɔ hemɔkɛyeli nyɛŋ ahi shi ni anɔkwale kɛ mumɔ krɔŋkrɔŋ fataaa he lɛ?
◻ Mɛɛ gbɛ nɔ Yesu Kristo batsɔ Mɔ ni Haa wɔhemɔkɛyeli Yeɔ Emuu yɛ?
◻ Mɛni hewɔ esa akɛ wɔpɛi bɔ ni wɔhemɔkɛyeli mli wa ha lɛ mli lɛ?
[Akrabatsa ni yɔɔ baafa 13]
MƐI Nl YƆƆ HEMƆKƐYELI LƐ. . .
◻ Wieɔ Yehowa he.—2 Korintobii 4:13.
◻ Tsuɔ nitsumɔi ni tamɔ Yesu nɔ lɛ.—Yohane 14:12.
◻ Ji hewalɛwoo jɛɛhe kɛha mɛi krokomɛi.—Romabii 1:8, 11, 12.
◻ Yeɔ je lɛ nɔ kunim.—1 Yohane 5:5.
◻ Bɛ nɔ ko ni amɛaadamɔ nɔ amɛshe gbeyei.—Yesaia 28:16.
◻ Yɛ hegbɛ ko ni aaaha amɛnine ashɛ naanɔ wala nɔ.—Yohane 3:16.