Maŋtsɛyeli Lɛ Kɛ—Gbohiiashitee Hiɛnɔkamɔ Lɛ
“Miima nɔ mi miihao yɛ Nyɔŋmɔ kɛ Nuŋtsɔ Yesu Kristo ni baaba ebakojo hiɛkalɔi kɛ gbohii yɛ epuemɔ kɛ emaŋtsɛyeli lɛ mli lɛ hiɛ.”—2 Timoteo 4:1.
1. Kɛ wɔsusu adesai ni amɛhi wala mli pɛŋ lɛ ayifalɛ he lɛ, mɛni hewɔ ni gbohiiashitee he hiɛnɔkamɔ lɛ he hiaa waa nakai lɛ, shi mɛɛ sanebimɔi baa jwɛŋmɔ mli?
1 ABUƆ gbɔmɛi abɔ ni amɛhi shi yɛ shikpɔŋ nɔ da lɛ ayibɔ lɛ he akɔntaa akɛ aaafee kɛjɛ akpekpei toi akpei 14 kɛyashi akpekpei toi akpei 20. Yɛ yibɔ ni aaanyɛ afee anɔkwale lɛ fɛɛ sɛɛ lɛ, anɔkwasaji enyɔ komɛi yɛ: (1) Yehowa Nyɔŋmɔ le gbɔmɛi ayibɔ ni amɛhi shi da lɛ naa pɛpɛɛpɛ, ni eyɛ hewalɛ ni ekɛaaha amɛteŋ mɔ fɛɛ mɔ ni esumɔɔ lɛ wala ni ekɛba shihilɛ mli ekoŋŋ; (2) gbɔmɛi ayifalɛ ni akɛɛ eko bako nakai da yɛ je lɛ mli ni ji gbɔmɛi akpekpei toi akpei 4.4 lɛ ji gbɔmɛi fɛɛ ni amɛhi shi da lɛ ateŋ fã bibioo ko pɛ. Anyɛŋ ajo sane lɛ naamuu lɛ naa foi: adesai ateŋ mɛi ni fa ji mɛi ni amɛgboi ni amɛ wɔsɛɛ be shihilɛ damɔ gbohiiashitee hiɛnɔkamɔ lɛ nɔ. Shi mɛni hewɔ amɛgboi? Ni mɛɛ hiɛnɔkamɔ yɔɔ akɛ amɛaahi shi ekoŋŋ?
2. Mɛni Petro wie ni kɔɔ Kristo shitee lɛ he kɛ nɔ ni E-feɔ yɛ gbohiiashitee he hiɛnɔkamɔ lɛ he?
2 Bɔfo Petro jaje yɛ afi 36 Ŋ.B. akɛ: “Lɛlɛŋ, miyoo akɛ, Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ. . . . Lɛ [Yesu Kristo] Nyɔŋmɔ tee lɛ shi gbi ni ji gbi etɛ lɛ, ni eha ejie ehe kpo etsɔɔ faŋŋ, jeee maŋ muu lɛ fɛɛ, shi moŋ odasefoi ni Nyɔŋmɔ ehala eto momo lɛ, ni ji wɔ mɛi ni wɔkɛ lɛ ye nii ni wɔkɛ lɛ nu, be ni ete shi kɛjɛ gbohii ateŋ lɛ sɛɛ lɛ. Ni ewowɔ kita akɛ wɔshiɛ wɔtsɔɔ maŋ lɛ ni wɔye odase akɛ lɛ ji mɔ ni Nyɔŋmɔ efa eto hiɛkalɔi kɛ gbohii akojolɔ lɛ. Lɛ ehe odase gbalɔi lɛ fɛɛ yeɔ, akɛ mɔ fɛɛ mɔ ni heɔ enɔ yeɔ lɛ aaana ehe eshai faa yɛ egbɛi lɛ ahewɔ.”—Bɔfoi lɛ Asaji 10:34-43.
3. (a) Mɛni hewɔ gbɔmɛi akpekpei toi akpei abɔ egboi nakai lɛ? (b) Tsɔɔmɔ bɔ ni Kristo gbele kɛ eshitee lɛ ji gbohiiashitee he hiɛnɔkamɔ lɛ nɔdaamɔ nɔ̃ lɛ mli.
3 Hɛɛ, nɔ ni ha abua adesai akpekpei toi akpei abɔ ni egboi anaa yɛ gbohiiabui amli ji gbele, ni aná kɛjɛ klɛŋklɛŋ gbɔmɔ Adam ŋɔɔ lɛ. “Enɛ hewɔ lɛ, taakɛ bɔ ni gbɔmɔ kome nɔ esha tsɔ kɛba je lɛŋ, ni gbele tsɔ esha nɔ kɛba, ni no ha gbele lɛ tsɛŋe gbɔmɛi fɛɛ. . . Mɔ kome shigbeemɔ lɛ hewɔ jɛ ni gbele tsɔ nakai mɔ kome lɛ nɔ ye maŋtsɛ lɛ.” (Romabii 5:12, 17) Kristo gbo ni “aha lɛ wala yɛ mumɔ gbɛfaŋ.” (1 Petro 3:18) Kɛtsɔ hemɔkɛyeli yɛ ela ni efɔse eshwie shi lɛ hewɔ lɛ, “mɔ fɛɛ mɔ” ni jɛ “hiɛkalɔi kɛ gbohii ateŋ” baanyɛ ana “eshai faa” ni ajie lɛ kɛjɛ Maŋtsɛ Gbele yiwalɛ nɔyeli lɛ shishi. Dani enɛ aaanyɛ aba lɛ, adesai ateŋ mɛi ni fa baahia gbohiiashitee. No hewɔ lɛ Paulo ŋma akɛ: “Ejaakɛ bɔ ni gbele tsɔ gbɔmɔ [Adam] nɔ kɛba lɛ, nakai nɔŋŋ shitee hu tsɔ gbɔmɔ [Yesu] nɔ kɛba.” (1 Korintobii 15:21) Kristo ma enɛ nɔ mi, ni ekɛɛ Marta akɛ: “Miji shitee lɛ kɛ wala lɛ; mɔ ni heɔ minɔ eyeɔ lɛ, kɛji egbo tete lɛ, ehiɛ aaaka.” (Yohane 11:25) Kristo gbele kɛ shitee lɛ ji gbohiiashitee hiɛnɔkamɔ lɛ nɔdaamɔ nɔ̃.
“Klɛŋklɛŋ Shitee” Lɛ
4, 5. (a) Mɛni Yohane ŋma yɛ “klɛŋklɛŋ shitee” lɛ he, ni mɛɛ hewalɛ kɛ gbɛhe akɛhaa mɛi ni naa shitee nɛɛ mli gbɛfaŋnɔ lɛ? (b) Mɛni Yesu kɛɛ bɔfoi anɔkwafoi 11 lɛ yɛ amɛ wɔsɛɛ be gbɛhe he?
4 Biblia lɛ tsɔɔ akɛ jeee Kristo kome too pɛ baakojo “hiɛkalɔi kɛ gbohii” lɛ. Yɛ be mli ni etsɔɔ mumɔ naa niŋmaa ko mli lɛ, bɔfo Yohane ŋma akɛ: “Ni mina maŋtsɛsɛii, ni amɛho amɛtara nɔ, ni aŋɔ kojomɔ aha amɛ, kɛ mɛi ni afolɔ amɛyii yɛ Yesu odaseyeli lɛ kɛ Nyɔŋmɔ Wiemɔ lɛ hewɔ lɛ asusumai lɛ, kɛ mɛi ni jako kooloo lɛ [Satan maŋkwramɔ gbɛjianɔtoo] loo emaga lɛ ni amɛheko ekadi lɛ yɛ amɛhiɛŋtsei anɔ loo amɛdɛŋ lɛ; ni amɛhiɛ kamɔ, ni amɛkɛ Kristo ye maŋtsɛ afii akpe. Mɔ ni ajɔɔ kɛ mɔ krɔŋkrɔŋ ji mɔ ni aaana gbɛnaa yɛ klɛŋklɛŋ shitee lɛ mli lɛ; gbele ni ji enyɔ lɛ bɛ hewalɛ ko yɛ nakai mɛi lɛ anɔ; shi moŋ amɛaatsɔmɔ Nyɔŋmɔ kɛ Kristo osɔfoi, ni amɛkɛ lɛ aaaye maŋtsɛ afii akpe.”—Kpojiemɔ 20:4, 6.
5 Wɔsɛɛ be maŋtsɛmɛi kɛ kojolɔi ni gboi akɛ Yesu kɛ e-Tsɛ, Yehowa, odasefoi anɔkwafoi lɛ ateŋ klɛŋklɛŋ bii ji bɔfoi anɔkwafoi 11 lɛ. Yesu tsɔɔ akɛ mɛnɛɛmɛi kɛ lɛ baatara maŋtsɛsɛii anɔ yɛ maŋtsɛyeli lɛ mli yɛ Luka 22:28-30, ni ‘amɛkojo Israel akutsei nyɔŋma kɛ enyɔ [mɛi ni jeee osɔfoi ni damɔ shi kɛha adesai ateŋ mɛi ni eshwɛ] lɛ.’
6. Hefatalɔi kojolɔi enyiɛ baaye abua Kristo beni ekojoɔ hiɛkalɔi kɛ gbohii lɛ, ni te atsakeɔ amɛ ahaa tɛŋŋ yɛ amɛ shitee lɛ mli?
6 Ŋmalɛi krokomɛi tsɔɔ akɛ nɛkɛ hegbɛ krɛdɛɛ ni ji Kristo hefatalɔi maŋtsɛmɛi kɛ kojolɔi yɛ emaŋtsɛyeli lɛ mli lɛ ji nɔ ni akɛhaa “asafoku bibioo” ni ji Kristofoi anɔkwafoi 144,000 “ni ahe kɛjɛ shikpɔŋ lɛ nɔ,” “ahe kɛjɛ gbɔmɛi ateŋ” lɛ. (Luka 12:32; Kpojiemɔ 14:1-4) Mɛnɛɛmɛi ŋmɛɛɔ adebɔɔ su mli hiɛnɔkamɔ akɛ amɛbaahi shi kɛya naanɔ yɛ shikpɔŋ nɔ lɛ he bɔni afee ni amɛkɛ lɛ [Kristo] afee “ekome yɛ eshitee lɛ nɔ̃ lɛ mli.” (Romabii 6:5) Paulo ŋma yɛ mɛnɛɛmɛi ahe hu akɛ: “Nakai nɔŋŋ ji gbohiiashitee lɛ hu. Aduɔ lɛ yɛ fitemɔ mli ateeɔ lɛ shi yɛ nɔ ni fiteee mli; . . . aduɔ susuma gbɔmɔtso, ateeɔ mumɔ gbɔmɔtso shi. . . . Heloo kɛ la nine shɛŋ Nyɔŋmɔ maŋtsɛyeli lɛ nɔ ejaakɛ ja nɛkɛ fitemɔ nɔ̃ nɛɛ wo nɔ ni fiteee lɛ.”—1 Korintobii 15:42-53.
7. Mɛni ji nɔ ni wiemɔi komekomei ashishitsɔɔmɔ wolo ko tsɔɔ ni kɔɔ shihilɛ ni gbeIe bɛ mli lɛ he, ni mɛni Paulo kɛ Petro ŋma yɛ ŋwɛi hiɛnɔkamɔ lɛ he?
7 Nɔ ni yɔɔ miishɛɛ ji akɛ, The New International Dictionary of New Testament Theology tsɔɔ akɛ jwɛŋmɔ ni ahiɛ akɛ mɔ fɛɛ mɔ yɛ susuma ni gbooo lɛ ji amale ni ebɛ Ŋmalɛi lɛ amli, ákɛ: “Shihilɛ ni gbele bɛ mli jeee nii ni gbɔmɛi fɛɛ yɔɔ bianɛ, shi moŋ eji wɔsɛɛ be nii ni Kristofoi anine shɛɔ nɔ. Taakɛ 1 Kor. 15:42, 52 kɛ nɔ ni nyiɛ sɛɛ lɛ tsɔɔ lɛ, yɛ be mli ni gbohiiashitee tsakemɔ lɛ eba sɛɛ lɛ pɛ dani heyelilɔi ‘woɔ’ shihilɛ ni gbele bɛ mli atade lɛ. . . . Kɛ gbohiiashitee bako lɛ, anyɛŋ ana shihilɛ ni gbele bɛ mli.” Yɛ anɔkwale mli lɛ, akɛ shihilɛ ni gbele bɛ mli he jweremɔ nɔ lɛ haaa Kristofoi fɛɛ, shi akɛhaa mɛi ni naa “klɛŋklɛŋ shitee kɛmiijɛ gbohii ateŋ” lɛ mli gbɛfaŋnɔ lɛ pɛ. Mɛnɛɛmɛi naa “gboshinii ni fiteee ni he bɛ kpa ko ni ekwaaa, ni aŋɔto yɛ ŋwɛi” aha amɛ.—Kwɛmɔ Filipibii 3:10, 11; 1 Petro 1:3, 4.
“Klɛŋklɛŋ Shitee” Lɛ Be
8. (a) Taakɛ Ŋmalɛi lɛ tsɔɔ lɛ, mɛɛ be mli “klɛŋklɛŋ shitee” lɛ baaha. (b) Tsɔɔmɔ 1 Tesalonikabii 4:14-17 kɛ 1 Korintobii 15:51, 52 shishi.
8 Ŋmalɛi lɛ kɛ nɛkɛ “klɛŋklɛŋ shitee” nɛɛ tsaa Kristo “ba ni eba [Hela, parousia]” lɛ. (1 Korintobii 15:23) Bɔfo Paulo ŋma akɛ: “Ejaakɛ lɛ Nuŋtsɔ lɛ diɛŋtsɛ kɛ oshebɔɔ kɛ ŋwɛi bɔfonukpa gbee kɛ Nyɔŋmɔ tɛtrɛmantrɛ aaajɛ ŋwɛi akpeleke shi, ni gbohii ni yɔɔ Kristo mli [ni je shishi kɛjɛ klɛŋklɛŋ afii oha lɛ mli kɛbashi beni Kristo ba emumɔŋ sɔlemɔ we lɛ yɛ 1918] lɛ tsutsu baate shi. Paulo yaa nɔ ekɛɔ akɛ Kristofoi ni afɔ amɛ mu ni amɛhiɛ kamɔ ni “baashwɛ yɛ Nuŋtsɔ lɛ ba ni eba [parousia] lɛ mli lɛ,” ni agbɛnɛ amɛgboiɔ yɛ parousia lɛ mli lɛ, abaatee amɛ shi amrɔ nɔŋŋ, ni ‘aaasha amɛ fɛɛ yɛ atatui amli kɛaatee Nuŋtsɔ lɛ kpeemɔ yɛ kɔɔyɔɔ mli.’ (1 Tesalonikabii 4:14-17, NW) Ehe ehiaaa ni ‘amɛwɔ’ yɛ gbonyobu mli, ni amɛmiimɛ gbohiiashitee. Yɛ gbele mli lɛ, ‘atsakeɔ amɛfɛɛ, trukaa, hiŋmɛitswaa mli.’—1 Korintobii 15:51, 52.
9. (a) Mɛɛ be mli ba ni Kristo eba ni anaaa lɛ lɛ je shishi? (b) Be eshɛ ni mɛni baaba yɛ ba ni eba lɛ mli, ni mɛni hewɔ abaanyɛ abu Kristofoi ni afɔ amɛ mu ni gboiɔ yɛ heni Kristo eba lɛ mli lɛ akɛ mɛi ni “ajɔɔ” aloo amɛyɔɔ miishɛɛ lɛ?
9 Nibii ni yaa nɔ ni haa Biblia mli gbalɛi baa mli lɛ tsɔɔ akɛ Kristo ba ni eba aloo parousia lɛ je shishi yɛ 1914, afi ni he hiaa lɛ mli. (Mateo 24:3, 7-14) Kɛkɛ ni “je nɛŋ maŋtsɛyeli lɛ [tsɔ] wɔ-Nuŋtsɔ [Yehowa] lɛ kɛ e-Kristo (mɔ ni efɔ lɛ mu) lɛ nɔ̃.” Nii ni ba ni hoso nɛkɛ jeŋ nɛɛ lɛ sɛɛ ni “be ni abaakojo gbohii” lɛ “shɛ.” Nɛkɛ kojomɔ kɛ nyɔmɔ ni awoɔ mɛi ni sa lɛ je shishi yɛ mɛi ni naa “klɛŋklɛŋ shitee” lɛ mli gbɛfaŋnɔ kɛjɛ be mli ni Kristo ba esɔlemɔ we lɛ kɛyaa lɛ anɔ. (Kpojiemɔ 11:15-18) Atsɛɔ nakai Kristofoi ni afɔ amɛ mu ni gboiɔ yɛ anɔkwayeli mli yɛ beni ato Nyɔŋmɔ maŋtsɛyeli lɛ ama shi lɛ sɛɛ lɛ akɛ mɛi ni “ajɔɔ” aloo mɛi ni yɔɔ miishɛɛ. Mɛni hewɔ? Ejaakɛ amɛnɔ̃ lɛ ji gbohiiashitee ni baa yɛ hiŋmɛitswaa mli, eŋmɛɔ amɛ gbɛ ni amɛkɛ amɛhe awo nitsumɔ hee ni amɛkɛ Kristo Yesu baatsu yɛ ŋwɛi lɛ mli amrɔ nɔŋŋ.—Kpojiemɔ 14:13.
10. Mɛɛ yiŋtooi ahewɔ ni akɛɔ akɛ 144,000 lɛ ashitee lɛ ji “klɛŋklɛŋ shitee” lɛ?
10 Atsɛɔ Kristofoi fɛɛ ni afɔ amɛ mu ni ji 144,000 lɛ ni kɛ Kristo baaye maŋtsɛ yɛ ŋwɛi lɛ agbohiiashitee lɛ yɛ gbɛ ni sa nɔ akɛ “klɛŋklɛŋ shitee.” Nakai enɛ ji, ejaakɛ etsɔɔ adesai fɛɛ ashitee kɛmiiba wala mli yɛ shikpɔŋ nɔ lɛ hiɛ yɛ be naa, ni 144,000 Iɛ baatsɔmɔɔ “klɛŋklɛŋ yibii amɛhaa Nyɔŋmɔ kɛ toobi Iɛ.” (Kpojiemɔ 14:1, 4; Yakobo 1:18) Enɛ kɛ amɛ woɔ gbɛhe ko ni he hiaa mli, ejaakɛ adesa ko nyɛŋ ‘aye emuu ashi’ nɛkɛ osɔfoi, maŋtsɛmɛi kɛ kojolɔi 144,000 nɛɛ. (Hebribii 11:40b; Kpojiemɔ 22:1, 2) Agbɛnɛ hu, ehi fe shikpɔŋ nɔ gbohiiashitee Iɛ fɛɛ eko, ejaakɛ ateeɔ 144,000 lɛ ashi “yɛ [Kristo] eshitee lɛ nɔ lɛ mli” kɛyaa wala ni fiteee, ni gbele bɛ mli lɛ mli akɛ Nyɔŋmɔ mumɔŋ bii.—Romabii 6:5.
Shikpɔŋ Nɔ Shitee Lɛ
11. Mɛɛ shitee kroko atsi ta yɛ Kpojiemɔ, yitso 20?
11 Kɛji akɛ “klɛŋklɛŋ shitee” yɛ lɛ, belɛ shishinumɔ yɛ he akɛ esa akɛ sɛɛ mli shitee ko hu ahi shi. Yɛ be mli ni etsɔɔ nɔ ni baaba yɛ afii akpe kojomɔ gbi ni atsɔ hiɛ atsi ta yɛ nakai yitso lɛ nɔŋŋ mli lɛ, bɔfo Yohane ŋma akɛ:
“Ni mina gbohii lɛ, mɛi bibii kɛ mɛi wuji, damɔ maŋtsɛsɛi lɛ hiɛ, ni agbele woji anaa; ni agbele wolo kroko ni ji wala wolo lɛ hu naa. Ni akojo gbohii lɛ yɛ nibii ni aŋma yɛ woji lɛ amli lɛ anaa, bɔ ni sa amɛ nitsumɔi lɛ.”—Kpojiemɔ 20:12.
12, 13. (a) Mɛni hewɔ shishinumɔ bɛ kɛɛmɔ ni aaakɛɛ akɛ ateeŋ gbohii ni eshwɛ Iɛ ashi kɛyashi afii akpe lɛ sɛɛ Iɛ? (b) Belɛ mɛni ji wiemɔ ‘ba wala mli’ aloo ‘ahiɛ tsɛ’ ni akɛtsu nii yɛ Kpojiemɔ 20:5 lɛ shishi? (d) Te aaafee tɛŋŋ ale mɛi ni yɛ naagbee lɛ aŋmaa amɛgbɛi yɛ “wala wolo” Iɛ mli lɛ?
12 Nɛkɛ “gbohii” nɛɛ nɔŋŋ ji “gbohii ni eshwɛ lɛ” ni atsi amɛ ta yɛ kuku enumɔ lɛ yɛ nakai yitso Iɛ nɔŋŋ mli Iɛ, ni awie yɛ amɛhe akɛ “amɛhiɛ nako atsɛ kɛyashi beyinɔ ni aaagbe afii akpe lɛ naa” lɛ. Enɛ nyɛŋ atsɔɔ akɛ ateee amɛ shi kɛyashi afii akpe kojomɔ gbi Iɛ sɛɛ, ejaakɛ akɛ ‘kojomɔ hewalɛ’ haa mɛi ni naa gbɛfaŋnɔ yɛ “klɛŋklɛŋ shitee” lɛ mli lɛ ni amɛkɛ Kristo baafee “osɔfoi” ni “amɛkɛ Kristo ye maŋtsɛ afii akpe.” (Kpojiemɔ 20:4-6) Namɛi amɛbaakojo ni amɛye amɛnɔ akɛ maŋtsɛmɛi, ni amɛbaatsu nii akɛ osɔfoi amɛha namɛi, kɛji akɛ ateee “gbohii ni eshwɛ lɛ” ashi kɛyashi afii akpe lɛ naagbee?
13 No hewɔ lɛ, esa akɛ wiemɔ “ahiɛ . . . tsɛ” (ba wala mli) lɛ akɔ shihilɛ ni yɔɔ afii 1,000 Kojomɔ Gbi lɛ naagbee lɛ he. Etsɔɔ akɛ nɛkɛ gbɔmɛi nɛɛ “ahiɛ tsɛ” (ba wala mli) ni ji akɛ, kpaako amɛnine eshɛ adesa emuuyeli nɔ. Amɛbaahi emuuyeli shihilɛ ni Adam kɛ Hawa yɔɔ mli tsutsu yɛ Eden abɔɔ lɛ mli lɛ mli. Belɛ te Yehowa aaafee tɛŋŋ ale mɛi ni abaaŋma amɛgbɛi yɛ “wala wolo,” aloo “woji” lɛ amli lɛ? Ebaaba kɛtsɔ naagbee kaa ni baaba adesai fɛɛ nɔ lɛ nɔ. (Kpojiemɔ 20:7-10, 12, 15) Yehowa diɛŋtsɛ ‘baabu’ mɛi ni baaye anɔkwale amɛha Nyɔŋmɔ kɛtsɔ naagbee kaa lɛ mli lɛ akɛ ‘jalɔi’ ni amɛbaabote “Nyɔŋmɔ bii lɛ anunyam heyeli” lɛ mli yɛ shikpɔŋ nɔ. (Romabii 8:21, 33) Amɛnine baashɛ naanɔ wala nɔkpɛlɛmɔ ni jɛ ŋwɛi lɛ nɔ, ejaakɛ amɛtamɔɔɔ Adam, mɔ ni yeee omanye yɛ kaa shishi ni yɛ no hewɔ lɛ kerubim ni Nyɔŋmɔ tsu amɛ lɛ tsi lɛ gbɛ ni ekabɛŋkɛ “wala tso” lɛ.—1 Mose 2:9; 3:22-24.
14. Mɛɛ gbɛi anɔ mɛi ni ateeɔ amɛ shi kɛbaa wala mli yɛ shikpɔŋ nɔ yɛ afii akpe be lɛ mli Iɛ ji nɔ ni kɛ hegbɛ kpakpai haa Iɛ?
14 Akɛni “gbohii ni eshwɛ” lɛ fɛɛ ni ateeɔ amɛ shi yɛ Kristo afii 1,000 nɔyeli lɛ mli lɛ baana hegbɛ ni amɛtsɔɔ akɛ amɛsa akɛ aŋmaa amɛgbɛi yɛ Yehowa “wala wolo” lɛ mli kɛyaa naanɔ ni amɛhiɔ shi kɛyaa naanɔ yɛ Nyɔŋmɔ maŋtsɛyeli lɛ shishi lɛ hewɔ lɛ, amɛ shitee lɛ ji nɔ ni kɛ hegbɛ kpakpa haa fe mɛi fioo ko ni atee amɛ shi yɛ Biblia bei amli ni amɛgboi ekoŋŋ lɛ. (1 Maŋtsɛmɛi 17:17-24; 2 Maŋtsɛmɛi 4:17-37; 18:20, 21; Mateo 9:18, 23-26; Luka 7:11-15; Yohane 11:38-44; Bɔfoi lɛ Asaji 9:36-41; 20:7-12) Bɔni afee ni amɛnine ashɛ “shitee ni hi fe no” yɛ Mesia lɛ maŋtsɛyeli loo “maŋ” lɛ mli lɛ nɔ lɛ hewɔ ni hii kɛ yei ni hi shi yɛ blema bei amli lɛ ye Yehowa anɔkwale kɛyashi amɛ gbele mli lɛ.—Hebribii 11:10, 13, 14, 35.
Gbohiiashitee Kɛ Kojomɔ
15, 16. (a) Ani Kojomɔ Gbi lɛ ji nɔ ko ni esa akɛ ashe no gbeyei? Tsɔɔmɔ mli. (b) Namɛi baakojo lɛ, ni mɛni nɔ amɛbaadamɔ?
15 Wɔnaa akɛ ateeɔ “gbohii ni eshwɛ” lɛ ashi yɛ afii akpe lɛ mli bɔni afee ni “akojo gbohii lɛ bɔ ni sa amɛnitsumɔi” yɛ nakai be lɛ mli. (Kpojiemɔ 20:12) Hiɛkpatamɔ gbi he jwɛŋmɔ ni haa ŋmiŋmi mɔɔ mɔ fɛɛ mɔ akɛ eji be ni abaabi mɔ fɛɛ mɔ ni ehi shikpɔŋ nɔ pɛŋ lɛ sane yɛ ehe eshai ni eho lɛ ahewɔ lɛ jeee nɔ ni damɔ Biblia nɔ. Emli saji lɛ tsɔɔ akɛ abaagbele ŋwɛi “woji” aloo mla woji anaa, ni ákɛ abaajɛ “nibii ni aŋma yɛ woji lɛ amli Iɛ anaa” akojo gbohii ni atee amɛ shi lɛ “bɔ ni sa amɛnitsumɔi lɛ,” ni ji akɛ, toiboo ni amɛaafee amɛha nɛkɛ ŋwɛi famɔi nɛɛ aloo yɛ toiboo ni amɛfeŋ lɛ naa.
16 Namɛi baakojo lɛ? Bɔfoi Paulo ŋma akɛ Kristo Yesu “baaba ebakojo hiɛkalɔi kɛ gbohii,” ni yɛ nakai beaŋ nɔŋŋ lɛ ewie Kristo “puemɔ kɛ emaŋtsɛyeli” lɛ he. (2 Timoteo 4:1) Mɛi ni kɛ Kristo tara “maŋtsɛsɛii” anɔ yɛ e-afii akpe maŋtsɛyeli lɛ mli ji 144,000 hefatalɔi kojolɔi lɛ. (Luka 22:28-30; Kpojiemɔ 20:4, 6) Paulo ŋma akɛ: “Ani nyɛleee akɛ mɛi krɔŋkrɔŋi lɛ baakojo je lɛ?”—1 Korintobii 6:2.
17, 18. (a) Ani Yohane 5:29 kɛ Kpojiemɔ 20:12 teɔ shi woɔ ehe? Tsɔɔmɔ mli. (b) Mɛɛ shishinumɔ mli mɛi komɛi “aaate shi kɛaatee kojomɔ lɛ mli”?
17 Yɛ be mli ni ewieɔ nɔ ni baaba yɛ e-afii akpe nɔyeli be, ni eji afii 1,000 Kojomɔ Gbi lɛ hu he lɛ, Yesu jaje akɛ: “Ejaakɛ tsɛ lɛ tete ekojooo mɔ ko, shi moŋ etuu kojomɔ lɛ fɛɛ ewo bi lɛ dɛŋ; . . . Enɛ akafeenyɛ naakpɛɛ; ejaakɛ ŋmlɛtswaa lɛ miiba, nɔ mli ni mɛi fɛɛ ni yɔɔ gbohiiabui lɛ amli lɛ aaanu egbee, ni amɛaaje kpo, mɛi ni efee ekpakpa lɛ aaate shi kɛaatee wala mli, ni mɛi ni etsu nishaianii lɛ aaate shi kɛaatee kojomɔ lɛ mli.”—Yohane 5:22-29.
18 Ani enɛ teɔ shi ewoɔ Kpojiemɔ 20:12, he ni wɔkaneɔ yɛ akɛ “akojo gbohii lɛ yɛ nibii ni aŋma yɛ woji lɛ amli lɛ anaa,” ni ‘agbeleŋ’ nakai woji lɛ anaa kɛyashi aaabote afii akpe lɛ mli da lɛ? Jeee nakai kwraa. Esa akɛ anu Yesu wiemɔi ni yɔɔ Yohane yitso enumɔ lɛ shishi yɛ sɛɛ mli kpojiemɔ ni ekɛha Yohane lɛ naa. (Kpojiemɔ 1:1) Nakai “mɛi ni efee ekpakpa” lɛ kɛ “mɛi ni etsu nishaianii” lɛ baafata “gbohii ni eshwɛ” ni “akojo amɛ, mɔ fɛɛ mɔ bɔ ni sa enitsumɔi” ni amɛtsu yɛ amɛshitee lɛ sɛɛ lɛ ahe. (Kpojiemɔ 20:13) Yɛ be mli ni ekɛ sɔrɔtofeemɔ ni yɔɔ wala shitee kɛ ‘kojomɔ [Hela, a·naʹsta·sis kriʹseos] shitee’ toɔ he lɛ, no mli lɛ Yesu miiwie naagbee nii ni jɛɔ nɛkɛ shitee sɔrɔtoi nɛɛ amii baa lɛ he. Thayer’s Greek-English Lexicon lɛ tsɔɔ a·naʹsta·sis kriʹseos mli akɛ shitee “ni nɔ ni nyiɛɔ sɛɛ baa ji fɔbuu.” Ateee gbɔmɔ lɛ shi koni abu lɛ fɔ amrɔ nɔŋŋ, shi efɔbuu kojomɔ baanyiɛ eshitee lɛ sɛɛ kɛji akɛ ekpoo akɛ eeenyiɛ “nibii ni aŋma yɛ woji lɛ amli lɛ anaa” ni no haaa “aŋma egbɛi lɛ wala wolo lɛ mli” lɛ. Kɛkɛ lɛ ebaagbo “gbele ni ji enyɔ lɛ,” ni wɔsɛɛ be gbohiiashitee he hiɛnɔkamɔ ko bɛ mli.—Kpojiemɔ 20:14, 15; 21:8.
19. Kɛ shishigbɛ niŋmaa. (a) French Biblia ko tsɔɔ Yohane 5:29 shishi yɛ mɛɛ gbɛ nɔ, ni mɛɛ be mli pɛ ebafeɔ faŋŋ akɛ shitee lɛ ji ‘wala mli nɔ’ aloo ‘kojomɔ lɛ mli nɔ’? (b) Ani “jalɔi” kɛ “mɛi ni ejaaa” ni atsi amɛ ta yɛ Bɔfoi lɛ Asaji 24:15 lɛ fɛɛ baa ‘wala shitee mli’ kɛ ‘kojomɔ shitee mli’? Tsɔɔmɔ mli.
19 Eyɛ miishɛɛ akɛ aaakadi akɛ French Ecumenical Translation (ni Katolek kɛ Protestant woloŋlelɔi akuu ko fee) lɛ tsɔɔ Yohane 5:29 shishi akɛ: “Mɛi ni efee ekpakpa lɛ baajɛ mli aba kɛha shitee ni kɛ mɔ yaa wala mli; mɛi ni efee nifɔjianii lɛ, kɛha shitee ni kɛ mɔ yaa kojomɔ mli.” Yɛ be mli pɛ ni nɔ ni ejɛ mɔ ko shitee mli eba lɛ ebafee faŋŋ lɛ dani anyɛɔ aleɔ kɛji akɛ eshitee lɛ ji ‘wala shitee’ aloo ‘kojomɔ shitee.’a
20. (a) Namɛi ehe baahia ni amɛnu “wala nu” lɛ, ni mɛni hewɔ? (b) Mɛɛ sanebimɔ abaatao mli yɛ nikasemɔ ni nyiɛ sɛɛ lɛ mli?
20 Ehe baahia ni gbohii ni abaatee amɛ shi lɛ kɛ “asafo babaoo” lɛ ni jeɔ “amanehulu kpeteŋkpele” ni ka wɔhiɛ nɔŋŋ lɛ mli lɛ anu “wala nu” lɛ, ni ji akɛ amɛkɛ hiɛsɔɔ akpɛlɛ Kristo kpɔmɔ afɔleshãa lɛ kɛ gbɛjianɔtoo krokomɛi fɛɛ ni Yehowa kɛhaa koni akɛjie adesai kɛjɛ esha kɛ gbele mli lɛ nɔ. (Kpojiemɔ 7:9, 10, 14, 17; 22:1, 2) Kristo kɛ ehefatalɔi osɔfoi kɛ kojolɔi 144,000 lɛ kɛ nɛkɛ gbɛjianɔtoo nɛɛ baatsu nii yɛ afii akpe maŋtsɛyeli lɛ mli. Shi ani gbohii lɛ fɛɛ baaba kɛha kojomɔ, ni mɛi ni “amanehulu kpeteŋkpele” ni baa lɛ gbe amɛ lɛ po fata he? Nikasemɔ ni nyiɛ sɛɛ lɛ baabote no hu mli.b
[Shishigbɛ niŋmai]
a Esaaa akɛ abuɔ mɛi ni naa ‘wala shitee’ aloo ‘kojomɔ shitee’ lɛ akɛ amɛji “jalɔi? lɛ kɛ “mɛi ni ejaaa” ni Paulo tsi amɛ ta yɛ Bɔfoi lɛ Asaji 24:15 lɛ. Paulo miiwie gbɔmɛi lɛ ashidaamɔ beni átee amɛ shi ni damɔ amɛ subaŋ dani amɛgboi lɛ nɔ ɛ he. Esa akɛ “jalɔi” lɛ aya nɔ yɛ amɛ jalɛ nifeemɔ lɛ mli kɛtsɔ toiboo ni amɛaafee amɛha nibii ni aŋmala yɛ “woji” lɛ amli lɛ nɔ. Kɛ jeee nakai lɛ, amɛ shitee lɛ baanyɛ afee “kojomɔ” shitee. Nɔ ni tamɔɔɔ enɛ Iɛ, kɛji akɛ “mɛi ni ejaaa” lɛ tsake ni amɛkpɛlɛ Kristo kpɔmɔ afɔleshaa Iɛ nɔ ni amɛbo nibii ni aŋma yɛ “woji” lɛ amli Iɛ toi Iɛ, amɛ shitee lɛ banyɛ afee “wala” nɔ.
b Ajie kɛjɛ April 1, 1982 Blɔfo Buu-Mɔɔ lɛ mli
Sanebimɔi Ni Akɛtiɔ Mli
□ Kristo ji “shitee lɛ kɛ wala” lɛ yɛ mɛɛ gbɛ nɔ?
□ Namɛi naa “klɛŋklɛŋ shitee” lɛ mli gbɛfaŋnɔ ni amɛbaaye amɛbua Maŋtsɛ Yesu Kristo yɛ mɛɛ nitsumɔi amli?
□ Mɛni hewɔ wiemɔ “klɛŋklɛŋ shitee” lɛ sa lɛ?
□ “Gbohii ni eshwɛ lɛ” ‘ba wala mli’ loo “amɛhiɛ . . . tsɛ” yɛ afii akpe lɛ sɛɛ yɛ mɛɛ gbɛ nɔ, ni mɛni hewɔ amɛ shitee lɛ ji nɔ ni hi fe mɛi ni atee amɛ shi kɛba shikpɔŋ nɔ yɛ Biblia bei amli lɛ anɔ̃ lɛ?
□ Mɛni nɔ abaadamɔ akojo gbohii ni atee amɛ shi Iɛ, ni mɛni he baahia amɛ koni ajie amɛ kɛjɛ esha kɛ gbele mli?
[Wiemɔ ni akɔ ni akɛmiitsu nii ni yɔɔ baafa 7]
“Shihilɛ ni gbele bɛ mli jeee nii ni gbɔmɛi fɛɛ yɔɔ bianɛ, shi moŋ eji wɔsɛɛ be nii ni Kristofoi anine shɛɔ nɔ. . . . Kɛ gbohiiashitee bako lɛ, anyɛŋ ana shihilɛ ni gbele bɛ mli.”—The New International Dictionary of New Testament Theology.
[Mfoniri ni yɔɔ baafa 8]
Biblia lɛ tsɔɔ akɛ abaatee mɛi pii ashi kɛba wala mli yɛ shikpɔŋ nɔ