Sanebimɔi Ni Jɛ Kanelɔi Adɛŋ
● Taakɛ Hebribii 12:22, 23 (Authorized Version) tsɔɔ lɛ bɔfo Paulo wieɔ “jalɔi ni ehi kɛwula shi lɛ amumɔi” ahe. Ani nɛkɛ ‘mɛi’ nɛɛ aaanyɛ afee anɔkwafoi ni Paulo ŋma yɛ amɛhe yɛ Hebribii yitso 11 lɛ?
Susumɔ ni akɛhaa akɛ nɛkɛ wiemɔi nɛɛ baanyɛ akɔ gbɔmɛi anɔkwafoi ni yɔɔ hemɔkɛyeli ni hi shi dani Kristofoi abe lɛ shɛ aahu kɛbashi Yohane Baptisilɔ lɛ nɔ lɛ ahe lɛ jeee nɔ ko hee. August 15, 1913, Watchtower lɛ baafai 248 kɛ 249 kɛ susumɔ ko tamɔ nakai ha ni atee nɔ ahiɛ nakai jwɛŋmɔ lɛ mli afii pii. Yɛ kuku nɛɛ mli lɛ wiemɔ “jalɔi” lɛ ejeee kpo yɛ shishijee Hela ŋmalɛ lɛ mli. Ni no hewɔ ni New World Translation lɛ kaneɔ akɛ, “kɛ jalɔi ni aha amɛhi kɛwula shi lɛ amumɔŋ shihilɛ.”—Kwɛmɔ Jerusalem Bible, Emphatic Dioglott, Rotherham, Westminster Version, Kingdom Interlinear Translation
Hebribii 11:8-10 wie Abraham, Isak kɛ Yakob he sane ni etsɔɔ akɛ Abraham shi Ur maŋ ni yɔɔ Kaldea lɛ mli ni ekɛ Isak kɛ Yakob hi buui amli kɛyashi be mli ni Yakob tee Mizraim shikpɔŋ lɛ nɔ yɛ ebi Yosef bei lɛ amli. No hewɔ lɛ ehiii maŋ ko ni aje gbɛ atswa mli yɛ nakai be lɛ mli. Nɔ ko nɔ ko bɛ Hebri Ŋmalɛi lɛ amli ni tsɔɔ akɛ Nyɔŋmɔ kɛ “maŋ ni yɔɔ Shishitoo ni emalɔ kɛ efeelɔ ji Nyɔŋmɔ” wo nakai hii etɛ lɛ shi. Eji nɔ ko ni Paulo wieɔ yɛ sane lɛ he. Ŋwanejee ko kwraa bɛ he akɛ enɛ kɔɔ nɔyeli ni Nyɔŋmɔ baatsɔ ‘Abraham seshi’ lɛ nɔ ato ama shi lɛ he, ni nakai nɔyeli lɛ shishi blematsɛmɛi etɛ nɛɛ baahi yɛ shikpɔŋ nɔ ni amɛna adesa emuuyeli yɛ afii akpe lɛ naagbee.—Gal. 3:16.
Beni Nyɔŋmɔ kɛ Abraham, Isak kɛ Yakob seshibii lɛ jɛ Mizraim kɛba shikpɔŋ ni ekɛwo Abraham shi lɛ nɔ lɛ, amɛhi shi yɛ Kanaan bii ashikpɔŋ nɔ, ni Yeriko pɛ ji maŋ ni Nyɔŋmɔ tsɔ ehewalɛ nɔ efite lɛ. Yɛ no sɛɛ lɛ gbalɔi anɔkwafoi lɛ kɛ yei anɔkwafoi lɛ fɛɛ ni hi shi yɛ blema bei lɛ amli lɛ ná maji diɛŋtsɛ amɛhi mli. No hewɔ lɛ anyɛŋ awie amɛhe taakɛ awie Abraham, Isak kɛ Yakob he lɛ, akɛ amɛmiitao maŋ ko ni baaba wɔsɛɛ yɛ shikpɔŋ nɔ lɛ. Afite Yerusalem yɛ afi 70 Ŋ.B. yɛ be mli ni afo Yohane Baptisilɔ lɛ yitso lɛ sɛɛ afii 39. No ahewɔ lɛ Yudafoi ni ji Kristofoi lɛ po hi shikpɔŋ nɔ maŋ ni anaa lɛ mli kɛyashi be mli ni Tatsɛ Gallus gbala ehe shi kɛjɛ Yerusalem ni Kristofoi lɛ bo Yesu gbalɛ akɛ ashi maŋ lɛ mli lɛ toi.—Mat. 24:15-22.
Hebribii 13:12-14 kɛɔ akɛ asɛŋ Yesu yɛ shikpɔŋ nɔ Yerusalem lɛ gbogboi lɛ asɛɛ, aloo yɛ “agbo lɛ sɛɛ.” Yɛ enɛ hewɔ lɛ Paulo tee nɔ ekɛɛ akɛ, “No hewɔ lɛ agbɛnɛ nyɛhaa wɔjea kpo kɛyaa eŋɔɔ yɛ ŋsra lɛ sɛɛ [tamɔ Azazel tookpakpo lɛ ni aŋmɛɔ ehe kɛyaa ŋa lɛ nɔ lɛ] (3 Mose 16:10) ni wɔtere ehorabɔɔ lɛ. Ejaakɛ wɔbɛ maŋ ni kaa shi yɛ biɛ, shi maŋ ni baaba lɛ moŋ sɛɛgbɛ wɔtaoɔ.” Nakai “maŋ” lɛ kɔɔ ŋwɛi maŋtsɛyeli lɛ, Yerusalem Hee ni Paulo tsi ta yɛ Hebribii 12:22 lɛ he.
Blema anɔkwafoi lɛ, titri lɛ kɛjɛ Abraham nɔ aahu kɛbashi Yohane Baptisilɔ lɛ nɔ lɛ taooo ŋwɛi ni amɛaaya ni amɛyabote ŋwɛi Yerusalem lɛ mli. Amɛbɛ enɛ be jwɛŋmɔ ko. (Mat. 11:11) Amɛnyɛŋ amɛna hiɛnɔkamɔ ni tamɔ nɛkɛ ejaakɛ akɛ Nyɔŋmɔ mumɔ krɔŋkrɔŋ lɛ fɔko amɛ. Yohane 7:39 yeɔ enɛ he odase akɛ: “Shi mumɔ lɛ ni mɛi ni heɔ enɔ yeɔ lɛ baana lɛ hewɔ ewie enɛ; shi Mumɔ krɔŋkrɔŋ lɛ nako aba, ejaakɛ anako awo Yesu hiɛ nyam.” Mumɔ ni akɛfɔɔ Kristofoi hii kɛ yei lɛ ejeee shishi aahu kɛyashi Pentekoste yɛ afi 33 Ŋ.B. lɛ mli da. Mɛi ni akɛ mumɔ krɔŋkrɔŋ lɛ fɔ amɛ kɛjɛ nakai be lɛ mli kɛyaa lɛ kwɛ shihilɛ yɛ ŋwɛi maŋ ko ni akɛ shikpɔŋ nɔ Yerusalem lɛ fee ehe mfoniri lɛ gbɛ.
No hewɔ ni beni Paulo ŋmaa wolo ayaha Hebribii Kristofoi lɛ enyɛ ekɛɛ amɛ yɛ gbɛ ni ja nɔ yɛ Hebribii 12:22 akɛ, “Shi moŋ, Zion Gɔŋ lɛ he nyɛba [jeee Sinai Gɔŋ ni yɔɔ Arabia lɛ], kɛ Nyɔŋmɔ hiɛkalɔ lɛ maŋ ni ji ŋwɛi Yerusalem lɛ, kɛ ŋwɛi bɔfoi akpeiakpei abɔ.” Yɛ Paulo be lɛ mli lɛ no mli lɛ “kromɔbii ni aŋma amɛgbɛi yɛ ŋwɛi lɛ anaabuamɔ” lɛ yeko afii 30. No hewɔ lɛ kpaako eje shishi, ni amɛshɛɛɛ 144,000. Yibɔ ni ji 144,000 lɛ ni ji “kromɔbii ni aŋma amɛgbɛii yɛ ŋwɛi lɛ anaabuamɔ” lɛ ayibɔ lɛ shɛɔ yɛ nɔ ni afɔɔ lɛ tsɛmɔ akɛ Kristofoi Abe ni baa naagbee yɛ “amanehulu kpeteŋkpele” ni yɔɔ Kpojiemɔ 7:14 kɛ Mateo 24:21, 22 lɛ mli. No hewɔ lɛ Paulo kɛ Hebri Kristofoi ni eŋma wolo eyaha amɛ lɛ miibɛŋkɛ nakai “naabuamɔ” aloo asafo lɛ yibɔ ni ji 144,000 lɛ ni aaashɛ he lɛ he.
No sɛɛ ni Hebribii 12:23, 24 kɛɔ akɛ “kɛ Nyɔŋmɔ ni ji mɛi fɛɛ akojolɔ lɛ kɛ jalɔi ni ehi kɛwula shi lɛ amumɔŋ shihilɛ [shishigbɛ niŋmaa, amumɔi] kɛ kpaŋmɔ hee mlidamɔlɔ Yesu lɛ, kɛ lá ni atsɔɔ ashwaa ni wieɔ wiemɔ kpakpa fe Habel nɔ̃ lɛ aŋɔɔ.” No hewɔ lɛ Nyɔŋmɔ ji mɛi fɛɛ akojolɔ ni 144,000 lɛ ni aŋma amɛgbɛii lɛ hu fata he. No hewɔ lɛ esa akɛ mɛi ni kpaa gbɛ akɛ amɛbaafee “naabuamɔ” aloo asafo ni awo ehiɛ nyam lɛ mlibii lɛ atsɔ kojomɔ be ko mli dani Kojolɔ Fe Fɛɛ, Yehowa akpɛlɛ amɛnɔ. Enɛ hewɔ ni be mli ni atsi egbɛi ata pɛ lɛ, kuku lɛ tee nɔ ekɛɛ akɛ “kɛ jalɔi ni ehi kɛwula shi lɛ amumɔŋ shihilɛ.” Kristofoi anaabuamɔ loo asafo ni akɛ mumɔ efɔ amɛ lɛ mlibii lɛ atsɔɔ hemɔkɛyeli nɔ abuɔ amɛ bem. (Rom. 5:1; 8:1-4) Yɛ enɛ hewɔ lɛ atsɛɔ amɛ “jalɔi ni ehi kɛwula shi” lɛ.
No hewɔ lɛ awoɔ amɛ ŋaa akɛ “nyɛŋɔ nyɛgbɔmɔtsei lɛ nyɛdamɔ shi akɛ afɔle ni hiɛ ka ni he tse ni sa Nyɔŋmɔ hiɛ ni nyɛjamɔ lɛ afee mumɔŋ jamɔ.” (Rom. 12:1) No hewɔ lɛ ‘amɛjeɔ kpo kɛyaa ŋsra lɛ sɛɛ amɛ yatereɔ ehorabɔɔ’ lɛ. (Heb. 13:13) Nɛkɛ Kristofoi ni akɛ mumɔ efɔ amɛ lɛ yɛ “mumɔŋ shihilɛ” diɛŋtsɛ bianɛ yɛ shikpɔŋ nɔ ni awoɔ amɛ ŋaa ni amɛnyiɛ yɛ mumɔ ni akɛfɔ amɛ lɛ mli.
Bɔfo Paulo wie Kristofoi ni abu amɛ bem nɛɛ “mumɔŋ shihilɛ” lɛ he sane yɛ yitso lɛ nɔŋŋ mli yɛ Hebribii 12:9: “Ani esaaa wɔ akɛ wɔba wɔhe shi wɔha mumɔi atsɛ lɛ moŋ babaoo koni wɔyi ana wala?” Kɛ atsɔɔ shishi diɛŋtsɛ lɛ, Hela niŋmaa lɛ kaneɔ akɛ “mumɔi lɛ a-Tsɛ.” Lɛ ji asafo ni akɛ mumɔ efɔ amɛ lɛ ni Paulo ŋmaa amɛ wolo lɛ atsɛ, no hewɔ lɛ New World Translation lɛ tsɔɔ shishi ni ehaa ekɔɔ gbɔmɔ he akɛ “Wo mumɔŋ shihilɛ lɛ Tsɛ.” Nɛkɛ wiemɔ nɛɛ kɛ kukuji 14 tsɔ Hebribii 12:23 hiɛ, no hewɔ lɛ efata nɔ ni awieɔ he lɛ he.
Bɔfo Paulo gbala jwɛŋmɔ kɛjɛ hii kɛ yei anɔkwafoi ni hi shi dani Kristofoi abe lɛ ba lɛ nɔ yɛ Hebribii 12:1 kɛtee Kristofoi asafo ni akɛ mumɔ efɔ amɛ lɛ kɛ Nyɔŋmɔ nitsumɔ ni ka nɛkɛ Kristofoi ni akɛ mumɔ efɔ amɛ lɛ anɔ lɛ nɔ. No hewɔ lɛ jeee nɔ ni ewie he yɛ yitso 11 lɛ ekuɔ sɛɛ ebaa nɔ yɛ Hebribii 12: 23 lɛ, Yɛ anɔkwasaji nɛɛ hewɔ lɛ, wiemɔ “jalɔi ni ehi kɛwula shi lɛ amumɔŋ shihilɛ” lɛ kɛ “kromɔbii ni aŋma amɛgbɛii yɛ ŋwɛi lɛ anaabuamɔ kɛ asafo” lɛ he sane lɛ tsuɔ nii yɛ gbɛ kroko nɔ, no hewɔ lɛ enɛ jeee nɔ ni awie yɛ kuku 22 lɛ mlitii ni he ehiaaa. No hewɔ lɛ ehe ehiaaa ni abɔ mɔdɛŋ ni akɛ enɛ ato gbɔmɛi akuu kroko ni sheɔ Nyɔŋmɔ gbeyei tamɔ hii kɛ yei anɔkwafoi ni hi shi yɛ blema bei amli kɛjɛ Habel nɔ kɛbashi Yohane Baptisilɔ lɛ nɔ lɛ ahe,
Agbɛnɛ beni ekɛ sane ni eŋma yɛ Hebribii 12:22, 23 lɛ fɛɛ toɔ Kristofoi asafo lɛ ákɛ akɛ mumɔ efɔ amɛ mlibii pɛ he lɛ, Paulo tee nɔ ekɛɛ akɛ, “kɛ kpaŋmɔ hee mlidamɔlɔ Yesu lɛ, kɛ la ni atsɔɔ ashwaa ni wieɔ wiemɔ kpakpa fe Habel nɔ lɛ.” (Heb, 12:24) Asafo ni akɛ mumɔ efɔ amɛ lɛ mlibii yɛ nakai kpaŋmɔ hee lɛ ni Yesu ji emlidamɔlɔ lɛ mli. Amɛji mɛi ni akɛ Yesu Kristo “lá” lɛ eshwa amɛnɔ yɛ mumɔŋ gbɛ nɔ beni afee ni sɛɛnamɔ ni hi ajɛ mli aba amɛ nɔ fe bɔ ni Habel ni ji lá odasefonyo lɛ lá aaanyɛ afee.
(Heb. 11:4) Ní tsɔɔ akɛ abu amɛ bem ni abua amɛ jalɔi bianɛ kɛtsɔ hemɔkɛyeli ni amɛyoo yɛ nakai lá lɛ mli lɛ nɔ.—Rom. 5:9.
Taakɛ ekɛ enɛɛmɛi fɛɛ kpaa gbee lɛ, Paulo tee no ewie etsɔɔ asafo ni akɛ mumɔ efo amɛ lɛ mlibii lɛ yɛ Hebribii 12:25-28, ni ewo amɛ ŋaa akɛ amɛjie amɛhe kpo akɛ mɛi ni sa amɛ ŋwɛi maŋtsɛyeli lɛ ni ji “Nyɔŋmɔ hiɛkalɔ lɛ maŋ ni ji ŋwɛi Yerusalem” ni amɛbɛŋkɛ he lɛ. Shwɛɛnii lɛ ni akɛ mumɔ efɔ amɛ lɛ asafo ni amɛyibɔ ji 144,000 lɛ ebɛŋkɛ nibii ni Paulo tsi ta yɛ kukuji 22 kɛ 23 lɛ he fe nakai Hebri Kristofoi ni hi shi yɛ klɛŋklɛŋ afii oha lɛ mli lɛ. Ni gbɔmɛi asafo babaoo ko ni ji “tooi krokomɛi” lɛ amlibii kɛ amɛ nyãa akɛ nakai sane lɛ ji. Yɛ anɔkwale mli lɛ, nakai “asafo babaoo” nɛɛ nyiɛɔ yɛ hemɔkɛyeli mli taakɛ blema hii kɛ yei anɔkwafoi ni hi shi dani Kristofoi abe lɛ ba lɛ fee lɛ.
April Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)