Nyɛwoa Gbɔmɛi Fɛɛ Hiɛ Nyam
“Nyɛwoa mɛi fɛɛ; . . . nyɛshea Nyɔŋmɔ gbeyei, nyɛwoa maŋtsɛ.”—1 PETRO 2:17.
1. (a) Yɛ Nyɔŋmɔ kɛ Kristo sɛɛ lɛ, namɛi hu sa woo? (b) Taakɛ 1 Petro 2:17 tsɔɔ lɛ, mɛɛ gbɛi anɔ nɛkɛ esa akɛ akɛ woo aha adesai yɛ?
WƆNA akɛ gbɛnaa nii ka wɔnɔ akɛ wɔkɛ woo aha Yehowa Nyɔŋmɔ kɛ Yesu Kristo hu. No ji nɔ ni ja, ni nilee kɛ suɔmɔ yɔɔ mli akɛ wɔɔfee. Ni kɛlɛ Nyɔŋmɔ Wiemɔ lɛ tsɔɔ akɛ esa akɛ wɔwo wɔnanemɛi gbɔmɛi hu ahiɛ nyam. Akɛɔ wɔ akɛ, “nyɛwoa mɛi fɛɛ.” (1 Petro 2:17) Akɛni nɛkɛ kuku nɛɛ muɔ naa kɛ famɔ ni ji “nyɛwoa maŋtsɛ” hu hewɔ lɛ, nɔ ni etsɔɔ ji akɛ esa akɛ wɔkɛ woo aha mɛi ni eji amɛ gbɛnaa akɛ amɛnaa yɛ gbɛhe mli ni amɛyɔɔ lɛ hewɔ lɛ hu. No hewɔ lɛ, belɛ namɔ esa akɛ wɔkɛ woo aha yɛ gbɛ ni sa nɔ? Ekolɛ mɛi ni esa akɛ wɔkɛ woo aha amɛ lɛ ayi fa fe bɔ ni mɛi komɛi susuɔ. Ekolɛ wɔɔkɛɛ akɛ gbɛi ejwɛ yɛ ni wɔɔtsɔ nɔ wɔwo mɛi krokomɛi.
Okɛ Woo Aha Maŋkwramɔŋ Nɔyelɔi
2. Te wɔfeɔ tɛŋŋ wɔleɔ akɛ “maŋtsɛ” ni atsi eta yɛ 1 Petro 2:17 lɛ kɔɔ adesa fɛɛ adesa ni ji maŋtsɛ loo maŋkwramɔŋ nɔyelɔ he lɛ?
2 Gbɛi nɛɛ ateŋ klɛŋklɛŋ nɔ lɛ kɔɔ maŋ nɔyelɔi lɛ ahe. Ehe miihia ni wɔwo maŋkwramɔŋ nɔyelɔi. Beni Petro wo ŋaa akɛ: “Nyɛwoa maŋtsɛ” lɛ, mɛni hewɔ ni wɔkɛɔ akɛ maŋkwramɔŋ nɔyelɔi yɔɔ Petro jwɛŋmɔ mli lɛ? Ejaakɛ eewie shihilɛ ni yɔɔ Kristofoi asafo lɛ sɛɛ lɛ he. Ewie wiemɔ ni nyiɛ sɛɛ nɛɛ egbe naa nɔŋŋ ni ekɛɛ nakai lɛ: “No hewɔ lɛ nyɛbaa nyɛhe shi nyɛhaa gbɔmɛi agbɛjianɔtoo fɛɛ gbɛjianɔtoo, yɛ Nuŋtsɔ lɛ hewɔ, maŋtsɛ mɔ ni yeɔ nɔ lɛ jio, lumɛi ni etsu . . . lɛ jio.” Kadimɔ hu akɛ, Petro kɛ Nyɔŋmɔ toɔ “maŋtsɛ” lɛ he, ni ekɛɔ akɛ: “Nyɛshea Nyɔŋmɔ gbeyei, nyɛwoa maŋtsɛ.” (1 Petro 2:13, 14) No hewɔ lɛ “maŋtsɛ” ni Petro woɔ wɔ hewalɛ ni wɔwo lɛ lɛ kɔɔ adesai ni yeɔ nɔ akɛ maŋtsɛmɛi kɛ maŋkwramɔŋ nɔyelɔi lɛ ahe.
3. Namɛi ji “hegbɛi ni yeɔ nɔ lɛ,” ni mɛni sa amɛ?
3 Bɔfo Paulo hu fãa wɔ yɛ nakai gbɛ nɔ nɔŋŋ akɛ: “Mɔ fɛɛ mɔ aba ehe shi aha hegbɛi ni yeɔ nɔ lɛ.” Nɛkɛ “hegbɛi ni yeɔ nɔ” nɛɛ jeee Yehowa Nyɔŋmɔ aloo Yesu Kristo, shi moŋ amɛji maŋkwramɔŋ nɔyelɔi lɛ, maŋ onukpai lɛ. Akɛni mɛnɛɛmɛi yɔɔ ejwɛŋmɔ mli hewɔ lɛ, Paulo tee nɔ akɛ: “No hewɔ lɛ, bɔ ni ji mɔ fɛɛ mɔ gbɛnaa lɛ, nyɛfea nyɛhaa lɛ, . . . mɔ nɔ ni ji woo lɛ, woo.” Hɛɛ, nɛkɛ gbɔmɛi ni Nyɔŋmɔ eŋmɛ amɛ gbɛ ni amɛna maŋkwramɔŋ nɔyeli nɛɛ sa woo.—Romabii 13:1, 7.
4. (a) Mɛɛ gbɛ nɔ akɛ woo haa maŋkwramɔŋ nɔyelɔi yɛ? (b) Mɛɛ nɔkwɛmɔ nɔ bɔfo Paulo fee efɔ shi eha wɔ yɛ woo ni akɛhaa nɔyelɔi lɛ mli?
4 Mɛɛ gbɛ nɔ wɔtsɔɔ wɔwoɔ maŋkwramɔŋ nɔyelɔi yɛ? Gbɛ kome ji bulɛ ni mli kwɔ ni wɔɔjie kpo wɔtsɔɔ amɛ. (Okɛto 1 Petro 3:15 he.) Ni, eyɛ mli akɛ ekolɛ amɛyitseiaŋ wala moŋ, shi kɛlɛ amɛgbɛhe lɛ hewɔ lɛ, bulɛ ni tamɔ nɛkɛ sa amɛ. Roma yinɔsaneŋmalɔ Tacitus wie Amralo Felike he akɛ nuu ni “susuɔ akɛ ebaanyɛ efee efɔŋ fɛɛ efɔŋ ni mɔ ko nyɛɛɛ abi lɛ sane yɛ he.” Ni kɛlɛ Paulo je ewiemɔ ni ekɛfa ehe yɛ Felike hiɛ lɛ shishi kɛ bulɛ. Yɛ nakai gbɛ nɔ nɔŋŋ lɛ, Paulo kɛ bulɛ kɛɛ Maŋtsɛ Herode Agripa II akɛ, “eŋɔɔ minaa akɛ mibajie minaa ŋmɛnɛ yɛ ohiɛ,” eyɛ mli akɛ Paulo le akɛ Agripa kɛ enyɛmiyoo yɛ akɛ eŋa. Nakai nɔŋŋ hu, Paulo kɛ woo ha Festo, ni ekɛlɛ wie ni etsɛ lɛ “Festo jurɔ,” eyɛ mli akɛ Festo jaa wɔji.—Bɔfoi lɛ Asaji 24:10; 26:2, 3, 24, 25.
5. Mɛɛ gbɛ kroko nɔ atsɔɔ akɛ woo haa hegbɛi ni yeɔ nɔ lɛ yɛ, ni mɛɛ gbɛ nɔ Yehowa Odasefoi feɔ nɔkwɛmɔ nɔ kpa yɛ enɛ feemɔ mli?
5 Gbɛ kroko ni wɔtsɔɔ nɔ wɔwoɔ maŋ nɔyelɔi lɛ ji nɔ ni Paulo tsɔɔ mli faŋŋ beni eŋma sane ni kɔɔ hegbɛi ni yeɔ nɔ lɛ agbɛfaŋ nii ni wɔkɛaaha amɛ lɛ he lɛ. Ekɛɛ “mɔ gbɛfaŋ ni ji onia lɛ, nyɛtsua onia; mɔ nɔ ni ji too lɛ, too.” (Romabii 13:7) Yehowa Odasefoi kɛ woo ni tamɔ nɛkɛ haa ni maŋ nɔ he ni amɛyɔɔ lɛ kɔɔɔ he eko. Yɛ Italia lɛ, adafitswaa wolo ni atsɛɔ lɛ La Stampa lɛ bɔ amaniɛ akɛ: “Amɛji maŋbii ni yeɔ anɔkwa fe mɛi fɛɛ ni mɔ ko aaasumɔ: amɛjooo toowoo naa foi aloo ni amɛaabɔ mɔdɛŋ ni amɛku mlai ni amɛnyaaa he lɛ amli kɛha amɛsɛɛnamɔ.” Ni The Post ni aŋma yɛ Palm Beach, Florida, yɛ U.S. Amerika lɛ wie nɛkɛ yɛ Yehowa Odasefoi lɛ ahe akɛ: “Amɛwoɔ amɛtoo. Amɛji maŋbii ni yeɔ anɔkwa yɛ maŋ nɛɛ mli fɛɛ lɛ ateŋ mɛi komɛi.”
Okɛ Woo Aha Nitsumɔtsɛmɛi
6. Namɛi hu bɔfo Paulo kɛ Petro kɛɛ esa akɛ wɔkɛ woo aha amɛ?
6 He ni ji enyɔ ni woo sa yɛ ji hei ni wɔtsuɔ nii yɛ. Bɔfo Paulo kɛ Petro fɛɛ ma bɔ ni ehe hiaa ni Kristofoi kɛ woo aha mɛi ni yeɔ amɛnɔ onukpai yɛ nitsumɔ mli lɛ nɔ mi. Paulo ŋma akɛ: “Tsuji abɔ ni yɔɔ apã shishi lɛ abu amɛ diɛŋtsɛ amɛnuŋtsɔmɛi lɛ akɛ mɛi ni woo fɛɛ sa amɛ, koni akawie Nyɔŋmɔ gbɛi lɛ kɛ tsɔɔmɔ lɛ he musubɔɔ wiemɔ. Shi mɛi ni yɔɔ nuŋtsɔmɛi heyelilɔi lɛ akagbe amɛhe guɔ, akɛni nyɛmimɛi ji amɛ hewɔ lɛ, shi moŋ amɛsɔmɔ amɛ jogbaŋŋ.” Ni Petro kɛɛ: “Webii, nyɛkɛ gbeyeishemɔ fɛɛ abaa nyɛhe shi nyɛhaa nyɛnuŋtsɔmɛi, jeee mɛi kpakpai kɛ mlihilɔi kɛkɛ, shi moŋ mɛi fɔji hu.”—1 Timoteo 6:1, 2; 1 Petro 2:18; Efesobii 6:5; Kolosebii 3:22, 23.
7. (a.) Mɛɛ gbɛ nɔ akɛ ŋaawoo ni Biblia lɛ kɛhaa “tsuji” akɛ amɛkɛ woo aha amɛ “nuŋtsɔmɛi” lɛ tsuɔ nii yɛ gbɛ kpakpa nɔ ŋmɛnɛ? (b Mɛni esa akɛ Kristofoi ni ji nitsulɔi ni yɔɔ nitsumɔtsɛmɛi ni ji Kristofoi lɛ akwɛ jogbaŋŋ ni amɛ fee?
7 Eji anɔkwale akɛ tsuji anɔ yeli bɛ babaoo ŋmɛnɛ. Shi shishijee taomɔ nii ni kudɔɔ Kristofoi yɛ nyɔŋ loo tsulɔ kɛ enuŋtsɔ teŋ lɛ nɔŋŋ tsuɔ nii yɛ nitsulɔ kɛ enitsumɔtsɛ hu teŋ. No hewɔ lɛ, gbɛnaa nii ka nitsulɔi ni ji Kristofoi lɛ anɔ akɛ amɛkɛ woo aha nitsumɔtsɛmɛi ni anyɛɛɛ asa amɛhiɛ lɛ tete po. Ni kɛ ebalɛ akɛ nitsumɔtsɛ lɛ ji naanyo heyelilɔ lɛ hu? Yɛ najiaŋ ni aaakpa gbɛ akɛ nakai wekukpaa lɛ baaha ana hegbɛi krɛdɛɛi komɛi moŋ lɛ, esa akɛ nitsulɔ lɛ asɔmɔ enitsumɔtsɛ ni ji Kristofonyo lɛ jogbaŋŋ, ni ekaŋɔ hegbɛ ko ni ekɛna ehe sɛɛ yɛ gbɛ ni ejaaa nɔ.
Woo yɛ Weku Kɔkrɔɔ lɛ Mli
8, 9. (a) Namɛi abiɔ ni gbekɛbii kɛ woo aha? (b) Mɛni hewɔ esa akɛ gbɛkɛbii kɛ woo ni tamɔ nɛkɛ aha lɛ, ni mɛɛ gbɛ nɔ amɛaafee enɛ yɛ?
8 He ni ji etɛ ni woo sa yɛ ji yɛ weku kɔkrɔɔ lɛ mli. Akɛ nɔkwɛmɔ nɔ lɛ, gbɛnaa nii ka gbekɛbii anɔ akɛ amɛkɛ woo aha amɛfɔlɔi. Jeee Mla ni akɛha Mose lɛ kɛkɛ bi ni amɛfee nakai, shi moŋ eji gbɛnaa nii ni ka Kristofoi anɔ. Bɔfo Paulo ŋma akɛ: “Nyɛ bii lɛ, nyɛboa nyɛfɔlɔi lɛ atoi yɛ Nuŋtsɔ lɛ mli; ejaakɛ enɛ ja. ‘Wo otsɛ kɛ onyɛ.’”—Efesobii 6:1, 2; 2 Mose 20:12.
9 Mɛni hewɔ ni esa akɛ gbekɛbii awo amɛfɔlɔi lɛ? Esa akɛ amɛwo amɛ yɛ hegbɛ ni Nyɔŋmɔ kɛha amɛfɔlɔi lɛ hewɔ kɛ agbɛnɛ hu nɔ ni amɛfɔlɔi lɛ efee eha amɛ, ni amɛfɔ amɛ, ni amɛkwɛ amɛnɔ ni amɛlɛ amɛ aahu kɛjɛ amɛgbekɛbiiashi kɛbaa lɛ hewɔ. Mɛɛ gbɛ nɔ esa akɛ gbekɛbii awo amɛfɔlɔi yɛ? Esa akɛ amɛfee enɛ, titri lɛ kɛtsɔ toiboo ni amɛaafee ni amɛba amɛhe shi hu amɛha amɛ lɛ nɔ. (Abɛi 23:22, 25, 26; Kolosebii 3:20) Ni akɛ woo ni tamɔ nɛkɛ aaaha lɛ baabi ni gbekɛbii ni edara lɛ aye abua amɛfɔlɔi loo niimɛi kɛ naamɛi ni edara yɛ afii amli lɛ yɛ heloo gbɛfaŋ kɛ mumɔŋ fɛɛ. Ebaabi ni akɛ nilee atsu nii ni aha enɛ kɛ gbɛnaa nii krokomɛi lɛ aŋmɛ pɛpɛɛpɛ, tamɔ kwɛmɔ ni mɔ lɛ aaakwɛ lɛ diɛŋtsɛ ebii kɛ ehe ni ekɛaawo Kristofoi akpeei kɛ shiɛmɔ nitsumɔ lɛ mli kwraa kɛmɔ shi.—Efesobii 5:15-17; 1 Timoteo 5:8; 1 Yohane 3:17.
10. Gbɛnaa nii ka ŋamɛi anɔ akɛ amɛkɛ woo aha namɛi, ni mɛɛ gbɛi anɔ amɛaatsɔ amɛfee enɛ yɛ?
10 Ni kɛlɛ jeee gbekɛbii lɛ pɛ ji mɛi ni yɔɔ weku lɛ mli ni gbɛnaa nii ka amɛnɔ akɛ amɛkɛ woo aha mɛi krokomɛi. Esa akɛ ŋamɛi kɛ woo aha amɛwumɛi. Bɔfo Paulo kɛɛ hu akɛ esa akɛ “ŋa lɛ ashe ewu.” (Efesobii 5:33; 1 Petro 3:1, 2) Eka shi faŋŋ akɛ ni ‘aaashe’ wumɛi lɛ hu biɔ ni akɛ woo aha amɛ. Sara wo ewu Abraham beni etsɛ lɛ akɛ “nuŋtsɔ” lɛ. (1 Petro 3:6) No hewɔ lɛ ŋamɛi, nyɛkasea Sara. Nyɛkɛ woo ahaa nyɛwumɛi kɛtsɔ kpɛlɛmɔ ni nyɛaakpɛlɛ amɛyiŋkpɛi anɔ koni nyɛtsu he nii ni eye omanye lɛ nɔ. Kɛ nyɛfee nɔ fɛɛ nɔ ni nyɛaanyɛ koni nyɛkɛye nyɛbua nyɛwumɛi lɛ ni amɛtere amɛjatsui lɛ, moŋ fe ni nyɛkɛ eko aaafata he lɛ, no lɛ nyɛkɛ woo miiha amɛ.
11. Mɛɛ gbɛnaa nii jwere wumɛi anɔ yɛ woo he, ni mɛni hewɔ?
11 Ni wumɛi lɛ hu? Afaa amɛ yɛ Nyɔŋmɔ Wiemɔ lɛ mli akɛ: “Nakai nɔŋŋ kɛ nyɛ wumɛi lɛ nyɛkɛ amɛ [nyɛŋamɛi lɛ] ahĩa shi yɛ nilee naa, ni nyɛkɛ woo awoa yoo akɛ nɔ ni he waaa tuutu ko, akɛni amɛkɛ nyɛ fɛɛ ji wala duromɔ lɛ wɔfaasei lɛ, koni akatsimɔ nyɛsɔlemɔi lɛ agbɛ.” (1 Petro 3:7) Eka shi faŋŋ akɛ esa akɛ enɛ aha wu fɛɛ wu asusu eyiŋ jogbaŋŋ. Etamɔ nɔ ni akɛ wolo ko ekpɛtɛ eŋa lɛ he ni aŋma yɛ nɔ akɛ “Ejara wa. Ehe waaa. Hiɛmɔ lɛ jogbaŋŋ. Okɛ woo aha lɛ!” No hewɔ lɛ esa akɛ wumɛi akai akɛ ja amɛkɛ woo haa amɛŋamɛi kɛtsɔ amɛhe ni amɛaasusu lɛ nɔ, kɛ jeee nakai lɛ amɛbaafite wekukpaa ni ka amɛkɛ Yehowa Nyɔŋmɔ teŋ lɛ, ejaakɛ abaatsimɔ amɛsɔlemɔi lɛ anaa. Lɛlɛŋ, sɛɛnamɔi baa he kɛhaa weku lɛ mlibii lɛ fɛɛ kɛ amɛkɛ woo ha amɛhe.
Yɛ Asafo lɛ Mli
12. (a) Namɛi anɔ gbɛnaa nii ka akɛ amɛkɛ woo aha yɛ asafo lɛ mli? (b) Mɛɛ gbɛ nɔ Yesu tsɔɔ yɛ akɛ eja gbɛ akɛ aaakpɛlɛ woo nɔ?
12 Agbɛnɛ gbɛnaa nii ni ka mɔ fɛɛ mɔ nɔ akɛ ekɛ woo aha mɛi krokomɛi ni yɔɔ Kristofoi asafo lɛ mli lɛ hu yɛ. Awoɔ wɔ ŋaa akɛ: “Mɔ fɛɛ mɔ kɛ woo aha enaanyo tsutsu.” (Romabii 12:10) Yesu tsɔɔ faŋŋ yɛ ebɛbuai lɛ ekome mli akɛ eja gbɛ akɛ mɔ aaakpɛlɛ woo nɔ. Ekɛɛ akɛ kɛji afɔ̃ wɔ nine kɛtee okpɔlɔŋmɛɛ ko shishi lɛ, esa akɛ wɔtara okpɔlɔ lɛ shishi gbɛ, ejaakɛ no dani mɔ ni fɔ̃ wɔ nine lɛ baaha wɔyatara yitso gbɛ, ni wɔbaana woo yɛ wɔnanemɛi ni afɔ̃ amɛ nine lɛ fɛɛ ahiɛ. (Luka 14:10) Agbɛnɛ, akɛni wɔ fɛɛ wɔhiɛ sɔɔ woo ni akɛhaa wɔ lɛ waa hewɔ lɛ, ani esaaa ni wɔnuɔ nii ahe wɔhaa mɛi krokomɛi ni wɔkɛ woo haa wɔhe? Mɛɛ gbɛ nɔ wɔɔtsɔ wɔfee enɛ?
13. Mɛni ji gbɛi komɛi ni wɔɔtsɔ nɔ wɔwo mɛi krokomɛi yɛ asafo lɛ mli?
13 Hiɛsɔɔ wiemɔi ni wɔɔwie yɛ nitsumɔ kpakpa ko ni atsu aha wɔ lɛ he lɛ tamɔ woo ni akɛhaa nɔŋŋ. No hewɔ lɛ wɔbaanyɛ wɔkɛ woo aha wɔhe kɛtsɔ yijiemɔi anɔ, ekolɛ yɛ wiemɔ ko loo sane hetoo ni mɔ ko aaaha yɛ asafo lɛ mli lɛ he. Kɛfata he lɛ, wɔbaanyɛ wɔkɛ woo aha wɔhe kɛtsɔ heshibaa jwɛŋmɔ ni wɔɔwo yɛ wɔnyɛmimɛi hii kɛ yei Kristofoi lɛ ahe, kɛ agbɛnɛ ni wɔkɛ amɛ aaaye yɛ bulɛ mli lɛ nɔ. (1 Petro 5:5) Kɛtsɔ no nɔ lɛ wɔtsɔɔ akɛ wɔbuɔ amɛ akɛ nanemɛi Yehowa Nyɔŋmɔ sɔɔlɔi ni sa woo.
14. (a) Mɛɛ gbɛ nɔ nyɛmimɛi hii ni yɔɔ asafo lɛ mli kɛ woo ni sa aaaha nyɛmimɛi yei lɛ yɛ? (b) Mɛni tsɔɔ akɛ nikee ji gbɛ kome ni wɔtsɔɔ nɔ wɔwoɔ mɛi krokomɛi?
14 Bɔfo Paulo wo obalanyo Timoteo ŋaa akɛ ekɛ Kristofoi yei onukpai lɛ ahi shi akɛ nyɛmɛi, kɛ obalayei lɛ hu akɛ eheloonaa nyɛmimɛi yei, “yɛ hetsemɔ fɛɛ mli.” Hɛɛ, kɛji nyɛmimɛi hii lɛ baakwɛ jogbaŋŋ koni amɛkaŋɔ nyɛmimɛi yei Kristofoi lɛ ahe hegbɛi ni esaaa, tamɔ ni amɛkɛ amɛ aaabɔ gbagbalii nɛkɛ lɛ, no tsɔɔ akɛ amɛkɛ woo haa amɛ. Paulo tee nɔ eŋma akɛ: “Yei okulafoi ni ji okulafoi lɛlɛŋ lɛ, wo amɛ.” Gbɛ kome ni esa akɛ atsɔ nɔ awo okulafo ni ehia lɛ lɛ ji kɛtsɔ heloonaa yelikɛbuamɔ nɔ. Shi dani ebaasa akɛ aha lɛ enɛ lɛ, esa akɛ efee “mɔ ni ataa ehe sane kpakpa akɛ etsu nijuji.” (1 Timoteo 5:2-10) Yɛ heloonaa nikeenii agbɛfaŋ lɛ, Luka ŋma yɛ gbɔmɛi ni yɔɔ Melita ŋshɔkpɔ lɛ nɔ lɛ ahe akɛ: “Ni amɛ hu amɛwo wɔhiɛ nyam babaoo, ni beni wɔfaa yɛ jɛi lɛ, amɛha wɔ nibii ni hiaa wɔ.” (Bɔfoi lɛ Asaji 28:10) No hewɔ lɛ abaanyɛ akɛ woo aha mɛi krokomɛi kɛtsɔ heloonaa nikee nɔ.
15. (a) Namɛi ahe gbɛnaa nii krɛdɛɛ ka wɔnɔ akɛ wɔwo amɛ? (b) Mɛni ji gbɛ kome ni wɔɔtsɔ nɔ wɔwo mɛi ni nyiɛɔ hiɛ lɛ?
15 Beni Paulo yaa nɔ yɛ wolo ni eŋma Timoteo lɛ mli lɛ, eŋma akɛ: “Onukpai ni yeɔ nɔ jogbaŋŋ lɛ, esa akɛ aŋɔ woo toi enyɔ awo amɛ, titri lɛ mɛi ni bɔɔ wiemɔ kɛ tsɔɔmɔ he mɔdɛŋ lɛ.” (1 Timoteo 5:17) Mɛɛ gbɛi anɔ wɔɔtsɔ wɔwo onukpai lɛ, aloo nɔkwɛlɔi lɛ? Paulo kɛɛ: “Nyɛkasea mi, taakɛ bɔ ni mi hu mikaseɔ Kristo lɛ.” (1 Korintobii 11:1) Kɛ wɔbo Paulo wiemɔi akɛ wɔkase lɛ lɛ toi lɛ, no tsɔɔ akɛ wɔkɛ woo miiha lɛ. Enɛ kɔɔ mɛi ni nyiɛɔ hiɛ yɛ wɔteŋ ŋmɛnɛ lɛ ahe. Kɛ wɔkase amɛ jogbaŋŋ, ni wɔnyiɛ amɛ nɔkwɛmɔ nɔ lɛ sɛɛ lɛ, no baatsɔɔ akɛ wɔkɛ woo miiha amɛ.
16. Mɛni ji gbɛi krokomɛi ni abaanyɛ atsɔ nɔ awo mɛi ni nyiɛɔ hiɛ lɛ?
16 Gbɛ kroko ni wɔtsɔɔ nɔ wɔkɛ woo haa nɔkwɛlɔi lɛ ji kɛtsɔ ŋaawoo nɛɛ toiboo nɔ: “Nyɛboa nyɛtsɔɔlɔi lɛ atoi ni nyɛbaa nyɛhe shi nyɛhaa amɛ; ejaakɛ amɛ amɛbuɔ nyɛsusumai lɛ ahe akɛ mɛi ni baabu he akɔntaa.” (Hebribii 13:17) Hɛɛ, taakɛ bɔ ni gbekɛbii woɔ amɛfɔlɔi kɛtsɔ toiboo ni amɛfeɔ amɛhaa amɛ lɛ nɔ lɛ, nakai nɔŋŋ wɔwoɔ mɛi ni nyiɛɔ hiɛ yɛ wɔteŋ lɛ kɛtsɔ toiboo ni wɔfeɔ kɛ wɔhe shi ni wɔbaa wɔhaa amɛ lɛ nɔ. Ni, taakɛ nakai Melitabii mlihilɔi lɛ tsɔ heloonaa nikee nɔ amɛwo Paulo kɛ ehefatalɔi lɛ ahiɛ nyam lɛ, awo Asafo lɛ najiaŋdamɔlɔi gbɛfalɔi pii ahiɛ nyam yɛ nɛkɛ gbɛ nɔ yɛ be kɛ bei amli. Shi, kɛlɛ, esaaa ni amɛbiɔ nɛkɛ nikeenii nɛɛ aloo amɛhaa aleɔ akɛ kɛ amɛna lɛ amɛmiisumɔ aloo ehe miihia amɛ.
17. Mɛɛ gbɛnaa nii jwere mɛi ni hiɛ nɔkwɛmɔ hegbɛi lɛ anɔ yɛ woo ni amɛkɛaaha mɛi krokomɛi lɛ he?
17 Yɛ gbɛ kroko nɔ lɛ, mɛi fɛɛ ni yɔɔ nɔkwɛlɔi agbɛhei amli yɛ teokrase gbɛjianɔtoo lɛ mli—kɛ yɛ nyɛ asafo lɛ mli jio, yɛ kpokpaa loo kpokpaa wulu nɔ akɛ nɔkwɛlɔ gbɛfalɔ, aloo yɛ Buu Mɔɔ Asafo lɛ nitsumɔ he niji lɛ eko mli, aloo yɛ weku kɔkrɔɔ lɛ mli hu lɛ—gbɛnaa nii ka amɛnɔ akɛ amɛkɛ woo aha mɛi ni amɛkwɛɔ amɛnɔ lɛ. Enɛ biɔ ni amɛna henumɔ kɛ nyɛmimɛi ahedɔɔ. Ehe miihia ni amɛfee mɛi ni anyɛɔ abɛŋkɛɔ amɛ be fɛɛ be, amɛfee mɛi ni he jɔ ni amɛbaa amɛhe shi yɛ amɛtsuii kɛ amɛjwɛŋmɔi amli, taakɛ Kristo kɛɛ lɛ diɛŋtsɛ eji lɛ.—Mateo 11:29, 30.
Nyɛbɔa Mɔdɛŋ ni Nyɛkɛ Woo Ahaa Nyɛhe
18. (a) Mɛni baanyɛ atsi wɔ gbɛ ni wɔkɛ woo akaha mɛi ni sa woo lɛ? (b) Mɛni hewɔ ni jwɛŋmɔ fɔŋ namɔ kɛ nii ahe wiemɔ su ejaaa gbɛ lɛ?
18 Ehe miihia ni wɔteŋ mɔ fɛɛ mɔ abɔ mɔdɛŋ ni wɔkɛ woo aha wɔhe, ejaakɛ hewalɛ ko ni he wa waa tsiɔ wɔ gbɛ ni wɔkafee enɛ. Nakai naatsii, loo gbɛtsii nii lɛ ji wɔtsui ni yeee emuu lɛ. Biblia lɛ kɛɔ akɛ, “gbɔmɔ tsuiŋ jwɛŋmɔ lɛ efɔŋ ji kɛjɛ egbekɛbiiashi.” (1 Mose 8:21) Adesai asui lɛ ateŋ ekome ni baanyɛ atsi woo ni wɔkɛaaha mɛi krokomɛi lɛ naa ji jwɛŋmɔ fɔŋ kɛ nii ahe wiemɔ su ni wɔɔna. Adesai ni he waaa ni yeee emuu ji wɔ fɛɛ, ni Yehowa mɔbɔnalɛ kɛ emlihilɛ ni wɔsaaa lɛ he hiaa wɔ. (Romabii 3:23, 24) Yɛ enɛ ni wɔle hewɔ lɛ, nyɛhaa wɔkwɛa jogbaŋŋ ni wɔkawiea wɔnyɛmimɛi agbɔjɔmɔi ahe fe nine aloo ni wɔna wɔnyɛmimɛi anifeemɔi ahe jwɛŋmɔ fɔŋ.
19. Mɛni baaye abua wɔ ni wɔwuu wɔshi nɛkɛ subaŋi fɔji nɛɛ?
19 Nɛkɛ adesai asu ni yeee emuu nɛɛ naa tsabaa ji suɔmɔ kɛ henɔyeli. Ehe miihia ni wɔna henumɔ, anɔkwayeli kɛ jwɛŋmɔ kpakpa yɛ wɔnyɛmimɛi ahe, ni wɔna nibii kpakpai ni amɛfeɔ lɛ. Kɛ nɔ ko yɛ ni wɔnuuu shishi lɛ, nyɛhaa wɔsumɔa be fɛɛ be moŋ akɛ wɔɔsusu wɔnyɛmimɛi lɛ ahe akɛ amɛyeee fɔ yɛ nibii ni wɔbɛ nɔmimaa yɛ amɛhe lɛ amli, ni wɔbo Petro ŋaawoo nɛɛ toi: “Shi titri lɛ, nyɛ suɔmɔ ni nyɛkɛsumɔɔ nyɛhe lɛ mli awaa, ejaakɛ suɔmɔ haa eshai babaoo nɔ.” (1 Petro 4:8) Kɛji wɔkɛ woo ni sa wɔnyɛmimɛi aaaha amɛ lɛ, no lɛ esa akɛ wɔna suɔmɔ ni tamɔ nɛkɛ.
20, 21. (a) Mɛni ji subaŋ kroko ni baanyɛ atsi woo ni esa akɛ wɔkɛha wɔhe lɛ naa? (b) Mɛni baaye abuɔ wɔ ni wɔwuu wɔshi nɛkɛ henumɔ nɛɛ?
20 Su kroko ni nyɛɔ etsĩɔ woo ni sa ni wɔkɛhaa mɛi krokomɛi lɛ naa ji henumɔ ni wɔnaa ni haa wɔmli fuɔ oya, aloo ehaa wɔnuɔ nii ahe fe nine lɛ. Niiahenumɔ yɛ egbɛhe. Esa akɛ nitɛŋlɔi anu gbɛɛmɔi kɛ sui sɔrɔtoi lɛ ahe akɛ amɛnitsumɔ lɛ fa. Shi ni wɔɔnu nii ahe fe nine, aloo ni wɔmli aaafu oya yɛ wɔkɛ mɛi krokomɛi asharamɔ mli lɛ ji hiɛjoomɔ su ko ni haa wɔlaajeɔ wɔ toiŋjɔlɛ ni etsĩɔ wɔ gbɛ ni wɔkɛ woo akaha mɛi krokomɛi.
21 Wiemɔi ni anaa yɛ Jajelɔ 7:9 lɛ haa wɔ ŋaawoo kpakpa yɛ enɛ gbɛfaŋ: “Kaaha omumɔ mli miifu oya, ejaakɛ mlifu lɛ, kwashiai amiinaa eyɔɔ.” No hewɔ lɛ etsɔɔ nilee kɛ jwɛŋmɔ kpakpa ni bɛ, kɛ agbɛnɛ suɔmɔ ni bɛ, akɛ mɔ ko aaanu nii ahe fe nine aloo emli aaafu oya. Esa akɛ wɔhiɛ ahi wɔhe nɔ, kɛ jeee nakai lɛ, wɔhenumɔi ni egbee shi, tamɔ wɔsusumɔi ni wooo mɔ hewalɛ, aloo ni wɔɔwie nii ahe, aloo ni wɔɔnu nii ahe fe nine lɛ baatsi wɔ gbɛ ni wɔkɛ woo akaha mɛi fɛɛ ni sa woo lɛ.
22. Te abaanyɛ amu gbɛnaa nii ni ka wɔnɔ akɛ wɔkɛ woo aha wɔhe lɛ naa aha tɛŋŋ?
22 Lɛlɛŋ, wɔyɛ yiŋtoi babaoo ni wɔɔdamɔ nɔ wɔwo mɛi krokomɛi. Ni, taakɛ wɔtsɔ hiɛ wɔna lɛ, gbɛi babaoo diɛŋtsɛ yɛ ni wɔɔtsɔ nɔ wɔjie woo ni tamɔ nɛkɛ kpo. Esa akɛ wɔhiɛ ahi wɔhe nɔ yɛ bei fɛɛ mli, kɛ jeee nakai lɛ hiɛjoomɔ loo jwɛŋmɔ fɔŋ ko baatsi woo ni wɔkɛaaha mɛi krokomɛi lɛ naa. Titri lɛ, ehe miihia ni wɔhiɛ ahi wɔhe nɔ ni wɔwo mɛi ni yɔɔ wɔweku kɔkrɔɔ lɛ mli lɛ, wumɛi kɛ ŋamɛi kɛ woo aha amɛhe ni gbekɛbii awo amɛfɔlɔi. Ni yɛ asafo lɛ mli hu lɛ, gbɛnaa nii ka wɔnɔ akɛ wɔwo wɔnanemɛi jalɔi, ni titri lɛ, mɛi ni tsuɔ nii waa yɛ wɔteŋ ni yɔɔ nɔkwɛlɔi agbɛhei amli lɛ. Yɛ nɛkɛ hei nɛɛ fɛɛ mli lɛ, eeefee wɔ diɛŋtsɛ wɔsɛɛnamɔ akɛ wɔɔwo mɛi ni atsi amɛ ta yɛ yiteŋgbɛ nɛɛ yɛ gbɛ ni sa nɔ, ejaakɛ, taakɛ Yesu kɛɛ lɛ: “Nɔ hamɔ mli yɛ jɔɔmɔ fe hemɔ.”—Bɔfoi lɛ Asaji 20:35.
◻ Mɛni hewɔ, ni mɛɛ gbɛ nɔ wɔɔtsɔ wɔwo hegbɛi ni yeɔ nɔ Iɛ yɛ?
◻ Mɛɛ Biblia mli Ŋaawoo abaanyɛ akɛtsɔɔ wekukpaa ni esa akɛ ehi nitsulɔ kɛ enitsumɔtsɛ teŋ lɛ mli?
◻ Mɛɛ gbɛ nɔ esa akɛ ajie woo kpo yɛ weku kɔkrɔɔ lɛ mli yɛ?
◻ Mɛɛ woo krɛdɛɛ ko abaanyɛ ajie lɛ kpo yɛ asafo lɛ mli, ni mɛni hewɔ?
◻ Mɛɛ gbɛ nɔ aaatsɔ aye adesai agbɔjɔmɔi ni haaa akɛ woo aha mɛi krokomɛi lɛ anɔ lɛ?
[Nikasemɔ lɛ he Sanebimɔi]