Yitso 15

Ni Aaatswa Weku ni kɛ Woo Haa Nyɔŋmɔ Ama Shi

 1-3. Mɛni hewɔ mɛi komɛi nyɛɛɛ ana gbalashihilɛ kɛ fɔlɔi atsɔmɔ mli naagbai anaa lɛ, shi mɛni hewɔ Biblia lɛ baanyɛ aye abua?

EKOLƐ oto oyiŋ akɛ obaama bo diɛŋtsɛ oshia. Ohe shikpɔŋ. Ni okɛ miishɛɛ naa oshia hee lɛ yɛ ojwɛŋmɔŋ. Shi kɛji akɛ obɛ dɛŋdadei ni ohe esako yɛ tsumaa mli hu? Kwɛ bɔ ni omɔdɛŋbɔi lɛ aaafee nɔ ni jeɔ mɔ nijiaŋ wui aha!

² Hefatalɔi pii bote gbalashihilɛ mli ni amɛmiikpa weku ni miishɛɛ yɔɔ mli gbɛ, ni kɛlɛ amɛbɛ dɛŋdadei loo hesaai ni he hiaa ni amɛkɛaatswa eko amɛma shi. Yookpeemɔ lɛ sɛɛ etsɛɛɛ nɔŋŋ kɛkɛ lɛ, nifeemɔi gbohii eje kpo. Béi kɛ naataamɔi batsɔɔ daa gbi nifeemɔ. Kɛ afɔ bii lɛ, tsɛ hee kɛ nyɛ hee lɛ naa amɛ diɛŋtsɛ amɛhe akɛ mɛi ni he esako akɛ fɔlɔi tamɔ amɛji yɛ amɛ gbalashihilɛ lɛ shishijee lɛ.

³ Shi yɛ miishɛɛ mli lɛ, Biblia lɛ baanyɛ aye abua. Eshishitoo mlai tamɔ dɛŋdadei ni haa onyɛɔ otswaa miishɛɛ weku omaa shi. (Abɛi 24:3) Nyɛhaa wɔkwɛa bɔ ni ebaafee eha eba lɛ nakai.

DƐŊDADEI NI AKƐTSWAA GBALASHIHILƐ NI MIISHƐƐ YƆƆ MLI AMAA SHI

 4. Mɛni hewɔ esa akɛ akpa gbalashihilɛ mli naagbai agbɛ lɛ, ni mɛɛ taomɔ nii akɛmamɔ shi yɛ Biblia lɛ mli?

⁴ Bɔ fɛɛ bɔ ni gbalashihilɛ mli hefatalɔi tamɔ mɛi ni sa amɛhe jogbaŋŋ ha lɛ fɛɛ sɛɛ lɛ, amɛyɛ sɔrɔto yɛ henumɔŋ, gbekɛbiiashi niiashikpamɔi, kɛ weku shishitoo mli. No hewɔ lɛ, abaakpa naagbai komɛi agbɛ yɛ gbalashihilɛ lɛ sɛɛ. Mɛɛ gbɛ nɔ aaatsɔ atsu he nii? Ojogbaŋŋ, kɛ tsu-tswalɔi miima shia ko lɛ, amɛkwɛɔ ehe woji anɔ. Enɛɛmɛi ji gbɛtsɔɔmɔi ni esa akɛ anyiɛ sɛɛ. Biblia lɛ kɛ Nyɔŋmɔ taomɔ nii ni aaatsɔ nɔ atswa weku ni miishɛɛ yɔɔ mli ama shi haa. Nyɛhaa wɔpɛia emli fioo komɛi amli agbɛnɛ.

 5. Biblia lɛ maa bɔ ni anɔkwa ni aaaye yɛ gbalashihilɛ mli he hiaa ha lɛ nɔ mi yɛ mɛɛ gbɛ nɔ?

⁵ Anɔkwayeli. Yesu kɛɛ: “Nɔ ni Nyɔŋmɔ eŋɔtsa lɛ, akaha gbɔmɔ miigbala mli.”a (Mateo 19:6) Bɔfo Paulo ŋma akɛ: “Awo gbala hiɛ nyam yɛ nyɛ fɛɛ nyɛteŋ, ni akabule gbala saa hu; shi ajwamaŋbɔlɔi kɛ gbalaŋkulɔi lɛ, Nyɔŋmɔ baakojo amɛ.” (Hebribii 13:4) No hewɔ lɛ esa akɛ gbalashihilɛ mli hefatalɔi anu he akɛ gbɛnaa nii ka amɛnɔ yɛ Yehowa hiɛ akɛ amɛye amɛ hefatalɔi anɔkwale daa.—1 Mose 39:7-9.

 6. Anɔkwayeli baanyɛ abaa gbalashihilɛ yi yɛ mɛɛ gbɛ nɔ?

⁶ Anɔkwayeli kɛ woo kɛ shweshweeshwe feemɔ baa gbalashihilɛ lɛ mli. Hefatalɔi anɔkwafoi le akɛ, bɔ fɛɛ bɔ ni ji lɛ, amɛbaaye amɛbua amɛhe. (Jajelɔ 4:9-12) Kwɛ bɔ ni esoro enɛ yɛ mɛi ni kɛ́ naagba fioo ko je shishi kɛkɛ lɛ amɛshi amɛ gbalashihilɛ lɛ he! Aŋkroaŋkroi nɛɛ muɔ sane naa oya akɛ ‘amɛhala mɔ ni ejaaa lɛ,’ ni akɛ ‘amɛsuɔmɔ egbo,’ ákɛ hefatalɔ hee ni amɛaana ji tsabaa lɛ. Shi enɛ haaa hefatalɔ ko ana hegbɛ ni eda kɛya hiɛ. Shi moŋ, mɛi ni yeee anɔkwa nɛɛ kɛ naagbai lɛ nɔŋŋ baaba amɛhefatalɔ hee lɛ nɔ. Kɛ mɔ ko yɛ shia fɛfɛo shi ena akɛ eyiteŋ miidu lɛ, ebɔɔ mɔdɛŋ ni etsi fɔlɔ lɛ. Efaaa kɛyaaa shia kroko kɛkɛ. Nakai nɔŋŋ hu, hefatalɔ ni aaatsake lɛ lɛ jeee gbɛ ni atsɔɔ nɔ asaa saji otii ni hɔlɔ gbalashihilɛ ni béi yɔɔ mli lɛ shishi lɛ. Kɛ naagbai te shi lɛ, kaabɔ mɔdɛŋ akɛ ooojo foi kɛaajɛ gbalashihilɛ lɛ mli, shi moŋ tsu nii waa ni okɛbaa yi. Anɔkwayeli ni tamɔ nɛkɛ haa ekomefeemɔ lɛ feɔ nɔ ni sa akɛ abu he, ahiɛ mli, ni asumɔ.

 7. Mɛni hewɔ sanegbaa wa yɛ bei pii amli kɛha mɛi ni ebote gbalashihilɛ mli lɛ, shi mɛɛ gbɛ nɔ “gbɔmɔ hee” lɛ ni aaawo lɛ baanyɛ aye abua yɛ?

⁷ Sanegbaa. Biblia abɛ ko kɛɔ akɛ: “Kɛ ajinatoo bɛ lɛ, yiŋtoi feɔ yaka.” (Abɛi 15:22) Kɛlɛ, sanegbaa wa kɛha gbalashihilɛ mli hefatalɔi komɛi. Mɛni hewɔ eyɔɔ nakai? Ejaakɛ gbɔmɛi yɛ sanegbaa gbɛi sɔrɔtoi. Enɛ ji anɔkwa sane ko ni yɛ be babaoo mli lɛ ekɛ shishinumɔ ko ni anaaa kɛ nijiaŋwujee baa. Mɔ ko tsɔsemɔ baanyɛ ana gbɛfaŋnɔ yɛ enɛ mli. Akɛ nɔkwɛmɔ nɔ lɛ, mɛi komɛi yɛ ni amɛdara yɛ fɔlɔi ni beɔ ateŋ. Agbɛnɛ, akɛ onukpai ni ebote gbalashihilɛ mli lɛ, amɛbaleŋ bɔ ni amɛaafee ni amɛkɛ amɛ hefatalɔi awie yɛ mlihilɛ kɛ suɔmɔ gbɛ nɔ. Ni kɛlɛ, esaaa akɛ oshia lɛ fiteɔ kɛbatsɔɔ ‘shia ni béi eyi mli obɔ tɔ.’ (Abɛi 17:1) Biblia lɛ maa “gbɔmɔ hee” lɛ ni aaawo lɛ nɔ mi, ni ekpɛlɛɛɛ mlila kɛ mlifu, kɛ bolɔmɔ kɛ jɛmɔ wiemɔi anɔ.—Efesobii 4:22-24, 31.

 8. Mɛni baanyɛ aye abua kɛ okɛ ogbalashihilɛ mli hefatalɔ kpaaa gbee?

⁸ Mɛni obaanyɛ ofee kɛ nyɛkpaaa gbee? Kɛ mlifu te shi lɛ, ooofee jogbaŋŋ akɛ ooonyiɛ ŋaawoo ni yɔɔ Abɛi 17:14 lɛ sɛɛ: “Ni naataamɔ lɛ mli wako nɛɛ, ŋmɛɛmɔ he!” Hɛɛ, obaanyɛ ofo nɔ ni nyɛwieɔ he lɛ mli kɛyashi sɛɛ mli be ko, beni okɛ ohefatalɔ lɛ fɛɛ ena tsui. (Jajelɔ 3:1, 7) Yɛ fɛɛ sɛɛ lɛ, bɔɔ mɔdɛŋ ni ‘ohe afee oya kɛ ninumɔ, ohumi shi kɛ wiemɔ, ohumi shi kɛ mlifu.’ (Yakobo 1:19) Esa akɛ oti ni ma ohiɛ lɛ afee shihilɛ lɛ saamɔ, jeee ni oye ŋwanejee mli kunim. (1 Mose 13:8, 9) Halamɔ wiemɔi kɛ gbɛ ni otsɔɔ nɔ owieɔ ni baajɔɔ bo kɛ ohefatalɔ lɛ he. (Abɛi 12:18; 15:1, 4; 29:11) Nɔ ni fe fɛɛ lɛ, kaahi shi yɛ mlifu mli, shi taomɔ yelikɛbuamɔ kɛtsɔ sane ni nyɛkɛ Nyɔŋmɔ aaagba yɛ heshibaa mli ni nyɛ fɛɛ nyɛsɔle yɛ he lɛ nɔ.—Efesobii 4:26, 27; 6:18.

 9. Mɛni hewɔ abaanyɛ akɛɛ akɛ sanegbaa jeɔ shishi kɛjɛɔ tsui lɛ mli lɛ?

⁹ Biblia mli abɛ ko kɛɔ akɛ: “Nilelɔ tsui tsɔɔ edaa nii, ni ehaa enaabu nitsɔɔmɔ lɛ faa.” (Abɛi 16:23) Belɛ, yɛ anɔkwale mli lɛ, sanegbaa ni yeɔ omanye lɛ naa samfee yɛ tsui lɛ mli, shi jeee daaŋ eyɔɔ. Mɛni ji su ni ojieɔ lɛ kpo yɛ ohefatalɔ lɛ he? Biblia lɛ woɔ Kristofoi ahewalɛ akɛ, “nyɛnanaa nyɛhaa nyɛhe.” (1 Petro 3:8) Ani obaanyɛ ofee enɛ beni ogbalashihilɛ mli hefatalɔ lɛ kɛ yeyeeye-feemɔ ko ni haoɔ lɛ miikpe? Kɛji nakai ni lɛ, ebaaye ebua bo ni ole gbɛ ni oootsɔ nɔ oha hetoo.—Yesaia 50:4.

10, 11. Mɛɛ gbɛ nɔ wu aaatsɔ ni ekɛ ŋaawoo ni yɔɔ 1 Petro 3:7 lɛ atsu nii?

¹⁰ Woo kɛ Bulɛ. Akɛɔ wumɛi Kristofoi akɛ amɛkɛ amɛŋamɛi ahia shi yɛ “nilee naa, ni nyɛkɛ woo awoa yoo akɛ nɔ ni he waaa tuutu ko.” (1 Petro 3:7) Ni mɔ ko kɛ woo aaaha eŋa lɛ tsɔɔ akɛ eyɔseɔ sɛɛnamɔ ni yɔɔ ehe. Wu ni kɛ eŋa hiɔ shi yɛ “nilee naa” lɛ buɔ ehenumɔi, ehewalɛi, enilee, kɛ woo lɛ waa. Esa akɛ esumɔ akɛ eeekase bɔ ni Yehowa buɔ yei kɛ bɔ ni esumɔɔ ni akɛ amɛ aye aha lɛ.

¹¹ Ha wɔŋɔ lɛ akɛ ekolɛ oyɛ nɔ ko ni sɛɛnamɔ yɔɔ he waa ni okɛ nibii woɔ mli ni waaa kwraa. Ani okwɛŋ gbɛ ni otsɔɔ nɔ okɛ nii nɛɛ tsuɔ nii ohaa lɛ jogbaŋŋ? Ojogbaŋŋ, Petro kɛ wiemɔ “nɔ ni he waaa tuutu ko” tsu nii yɛ gbɛ ni tamɔ nakai nɔ, ni esa akɛ enɛ atsirɛ Kristofonyo wu lɛ ni ejie mlijɔlɛ kpo yɛ eŋa ni esumɔɔ lɛ lɛ gbɛfaŋ.

12. Mɛɛ gbɛ nɔ ŋa aaatsɔ atsɔɔ akɛ ebuɔ ewu waa?

¹² Shi mɛɛ ŋaawoo Biblia lɛ kɛhaa ŋa? Paulo ŋma akɛ: “Esa akɛ ŋa lɛ ana bulɛ ni mli kwɔ aha ewu.” (Efesobii 5:33, NW) Taakɛ bɔ ni ehe hiaa ni ŋa lɛ anu he akɛ akɛ woo miiha lɛ ni ehefatalɔ lɛ sumɔɔ lɛ waa lɛ, ehe miihia ni wu lɛ hu anu he akɛ eŋa lɛ buɔ lɛ. Ŋa ni yɔɔ bulɛ lɛ egbɛŋ ewu lɛ fatɔi eshwaŋ yɛ gbɛ ni nilee bɛ mli nɔ, kɛ eji Kristofonyo loo jeee nakai eji. Ejieŋ woo ni sa lɛ lɛ kɛjɛŋ ehe kɛtsɔ wiemɔ-kɛ-shimɔ kɛ ewu lɛ heguɔgbee yɛ teemɔŋ loo yɛ faŋŋ nɔ.—1 Timoteo 3:11; 5:13.

13. Mɛɛ gbɛ nɔ aaatsɔ atsɔɔ jwɛŋmɔ yɛ toiŋjɔlɛ mli?

¹³ Enɛ etsɔɔɔ akɛ ŋa lɛ nyɛŋ ajie esusumɔi akpo. Kɛ nɔ ko gbaa enaa lɛ, ebaanyɛ ekɛ bulɛ awie he. (1 Mose 21:9-12) Abaanyɛ ni akɛ esusumɔ ko ni ejieɔ lɛ kpo ehaa ewu lɛ ato bɔɔl ni eeefɔ eha lɛ lɛ he. Ebaanyɛ efɔ̃ lɛ blɛoo koni enyɛ emɔ, loo ebaanyɛ ni ekɛ hewalɛ afɔ̃ yɛ gbɛ ni eeepila lɛ lɛ nɔ. Kwɛ bɔ ni eeefee jogbaŋŋ moŋ akɛ hefatalɔi enyɔ lɛ fɛɛ aaakwa naafolɔmɔi, shi moŋ, amɛwie yɛ mlihilɛ kɛ mlijɔlɛ mli!—Mateo 7:12; Kolosebii 4:6; 1 Petro 3:3, 4.

14. Mɛni esa akɛ ofee kɛ miishɛɛ fioo ko ohefatalɔ lɛ jieɔ lɛ kpo yɛ Biblia mli shishitoo mlai ni kɔɔ gbalashihilɛ he lɛ ni akɛaatsu nii lɛ he?

¹⁴ Taakɛ wɔna lɛ, Biblia shishitoo mlai baanyɛ aye abua bo ni otswa gbalashihilɛ ni miishɛɛ yɔɔ mli oma shi. Shi kɛji akɛ miishɛɛ fioo ko pɛ ohefatalɔ lɛ jieɔ lɛ kpo yɛ nɔ ni Biblia lɛ kɛɔ lɛ he? Abaanyɛ atsu babaoo hu kɛji akɛ okɛ Nyɔŋmɔ nilee lɛ tsu nii yɛ ogbɛfaŋnɔ ni otsuɔ lɛ mli. Petro ŋma akɛ: “Nyɛ yeigbayei lɛ hu, nyɛbaa nyɛhe shi nyɛhaa nyɛ diɛŋtsɛ nyɛwumɛi lɛ, koni kɛ mɛi komɛi booo wiemɔ lɛ toi tete lɛ, ashi wiemɔ lɛ sɛɛ ni atsɔ yei lɛ ajeŋba nɔ ni nine ashɛ amɛnɔ, ejaakɛ amɛnaa nyɛjeŋba ni hetsemɔ kɛ gbeyeishemɔ yɔɔ mli lɛ.” (1 Petro 3:1, 2) Shi, enɛ baakɔ wu ni eŋa nyaaa Biblia lɛ he lɛ hu he. Bɔ fɛɛ bɔ ni ohefatalɔ lɛ aaahala akɛ eeefee lɛ, ha Biblia mli shishitoo mlai afee bo hefatalɔ kpakpa. Nyɔŋmɔ nilee hu baanyɛ aha ofee fɔlɔ kpakpa.

GBEKƐBII ATSƆSEMƆ YƐ NYƆŊMƆ NILEE NAA

15. Mɛɛ gbɛ nɔ atsɔɔ akɛ fɔlɔi atsɔsemɔ mli nibii komɛi haa mɛi komɛi, shi mɛɛ gbɛ nɔ aaatsɔ afo shibɔlemɔ nɛɛ mli?

¹⁵ Akplala loo hamlɛ ni mɔ ko yɔɔ lɛ kɛkɛ lɛ haaa efee kapintɛ ni he esa. Nakai nɔŋŋ hu bii ni mɔ ko yɔɔ kɛkɛ lɛ haaa mɔ lɛ afee fɔlɔ ni he esa. Fɔlɔi le jio loo amɛleee jio, yɛ bei pii amli lɛ amɛtsɔseɔ amɛbii yɛ gbɛ ni atsɔse amɛ aha lɛ nɔ. No hewɔ lɛ, akɛ fɔlɔi anifeemɔi komɛi ni tɔmɔi yɔɔ he haa kɛjɛɔ yinɔ kome nɔ kɛyaa yinɔ kroko nɔ. Blema Hebri abɛ ko kɛɔ akɛ: “Tsɛmɛi lɛ yeɔ weinyibii ŋmlikitii, ni bii lɛ moŋ anyanyɔji shwãa.” Ni kɛlɛ, Ŋmalɛ lɛ tsɔɔ akɛ ehe ehiaaa ni mɔ ko anyiɛ gbɛ ni efɔlɔi je efɔ shi lɛ sɛɛ. Ebaanyɛ ehala gbɛ kroko, nɔ ni Yehowa mlai kudɔɔ.—Ezekiel 18:2, 14, 17.

16. Mɛni hewɔ ehe hiaa akɛ oookwɛ oweku, ni mɛni fata enɛ he?

¹⁶ Yehowa miikpa fɔlɔi Kristofoi agbɛ ni amɛkɛ gbɛtsɔɔmɔ kɛ kwɛmɔ kpakpa aha amɛbii. Paulo ŋma akɛ: “Shi kɛ mɔ ko kwɛɛɛ lɛ diɛŋtsɛ emɛi, titri lɛ, lɛ diɛŋtsɛ eshiabii lɛ, ekpa yɛ hemɔkɛyeli lɛ sɛɛ, ni efaŋ mɔ ni heee yeee fe lɛ.” (1 Timoteo 5:8) Mɛɛ wiemɔi ni mli wa nɛ! Ogbɛfaŋnɔ akɛ nihalɔ ni oootsu he nii, ni obii lɛ agbɔmɔtsoŋ, mumɔŋ, kɛ henumɔŋ hiamɔ nii fata he lɛ ji Nyɔŋmɔ gbeyeishelɔ lɛ hegbɛ kɛ gbɛnaa nii. Biblia lɛ kɛ shishitoo mlai ni baanyɛ aye abua fɔlɔi ni amɛtswa shihilɛ ni miishɛɛ yɔɔ mli amɛma shi amɛha amɛbii lɛ haa. Susumɔ enɛɛmɛi ekomɛi ahe.

17. Mɛni he hiaa kɛ obii lɛ aaaná Nyɔŋmɔ mla lɛ yɛ amɛtsuii amli?

¹⁷ Too okadi kpakpa ofɔ shi. Afa fɔlɔi ni ji Israelbii lɛ akɛ: “Ni ojwɛŋ [Nyɔŋmɔ wiemɔi] nɔ otsɔɔ obii, ni owie he, beni ota shi yɛ oshia lɛ kɛ beni onyiɛ gbɛ teŋ kɛ beni oka shi kɛ beni ote shi.” Esa akɛ fɔlɔi atsɔɔ amɛbii lɛ Nyɔŋmɔ taomɔ nii. Shi atsɔ hiɛ akɛ wiemɔi nɛɛ tsɔ nakai famɔ nɛɛ hiɛ akɛ: “Ni nɛkɛ wiemɔi nɛɛ ni miwoɔo he kita ŋmɛnɛ gbi nɛɛ akã otsui nɔ.” (5 Mose 6:6, 7) Hɛɛ, fɔlɔi nyɛŋ ni amɛkɛ nɔ ni amɛbɛ eko lɛ aha. Esa akɛ klɛŋklɛŋ lɛ aŋmala Nyɔŋmɔ mlai lɛ yɛ nyɛ diɛŋtsɛ nyɛtsuii anɔ kɛ nyɛmiisumɔ ni nyɛŋmala yɛ nyɛbii lɛ atsui nɔ.—Abɛi 20:7; okɛto Luka 6:40 he.

18. Yɛ mɛɛ gbɛ nɔ Yehowa eto nɔkwɛmɔ nɔ ni nɔ bɛ kɛha fɔlɔi yɛ suɔmɔ ni ajieɔ lɛ kpo lɛ mli efɔ shi?

¹⁸ Okɛ osuɔmɔ he nɔmimaa aha. Beni abaptisiɔ Yesu lɛ, Yehowa jaje akɛ: “Bo ji misuɔmɔ Bi lɛ, bo ohe tsuijurɔ minaa!” (Luka 3:22) No hewɔ lɛ Yehowa kpɛlɛ e-Bi lɛ nɔ, ewie bɔ ni ekpɛlɛɔ enɔ eha lɛ he faŋŋ ni ema E-suɔmɔ kɛha lɛ lɛ nɔ mi. Yɛ sɛɛ mli lɛ Yesu kɛɛ e-Tsɛ lɛ akɛ: “Oosumɔ mi dani ato je lɛ shishi.” (Yohane 17:24) Belɛ akɛ fɔlɔi ni sheɔ Nyɔŋmɔ gbeyei lɛ, nyɛkɛ nyɛdaaŋ wiemɔi kɛ gbɔmɔtsoŋ nifeemɔi ni tsɔɔ suɔmɔ ni nyɛyɔɔ kɛha amɛ lɛ aha nyɛbii lɛ—ni nyɛfea enɛ yɛ be kɛ bei amli. Nyɛkaia yɛ be fɛɛ mli akɛ “suɔmɔ tswaa mɔ emaa shi.”—1 Korintobii 8:1, NW.

19, 20. Mɛni kɔɔ tsɔsemɔ kpakpa ni akɛaaha gbekɛbii lɛ he, ni Yehowa nɔkwɛmɔ nɔ lɛ he baaba sɛɛnamɔ aha fɔlɔi yɛ mɛɛ gbɛ nɔ?

¹⁹ Tsɔsemɔ. Biblia lɛ maa bɔ ni tsɔsemɔ ni suɔmɔ yɔɔ mli lɛ he hiaa ha lɛ nɔ mi. (Abɛi 1:8) Fɔlɔi ni tsuuu amɛ gbɛnaa nii ahe nii koni amɛkudɔ amɛbii ŋmɛnɛ lɛ kɛ nibii ni baajɛ mli aba wɔ́sɛɛ ni kumɔɔ mɔ tsui lɛ baakpe kɛ̃. Ni kɛlɛ, abɔɔ fɔlɔi kɔkɔ akɛ amɛkafee keketee tsɔ. Paulo ŋma akɛ: “Nyɛ tsɛmɛi lɛ, nyɛkawoa nyɛbii amli la, koni amɛtsui akafa.” (Kolosebii 3:21) Esa akɛ fɔlɔi akwa amɛbii ajajemɔ keketee loo ni amɛaawie amɛfatɔi ahe be fɛɛ be ni amɛaawie amɛshi amɛ mɔdɛŋbɔi lɛ.

²⁰ Yehowa Nyɔŋmɔ, wɔ ŋwɛi Tsɛ lɛ toɔ okadi yɛ tsɔsemɔ ni ekɛhaa lɛ mli. Ejajemɔ lɛ bɛ keketee kɔkɔɔkɔ. Nyɔŋmɔ kɛɛ ewebii lɛ akɛ: “Ha magbala otoi bɔ ni sa kɛkɛ.” (Yeremia 46:28) Esa akɛ fɔlɔi akase Yehowa yɛ enɛ mli. Toigbalamɔ ni tekeɔ husu ni sa loo eyaa shɔŋŋ fe yiŋtoo ni akɛjajeɔ nii ni akɛtsɔɔ nii lɛ woɔ mɔ mlifu diɛŋtsɛ.

21. Te fɔlɔi aaafee tɛŋŋ amɛle kɛ amɛtsɔsemɔ mɔɔ shi?

²¹ Mɛɛ gbɛ nɔ fɔlɔi aaatsɔ ni amɛle akɛ tsɔsemɔ ni amɛkɛhaa lɛ mɔɔ shi? Amɛbaanyɛ amɛbi amɛ diɛŋtsɛ amɛhe akɛ, ‘Mɛni tsɔsemɔ ni mikɛhaa lɛ tsuɔ?’ Esa akɛ etsɔɔ nii. Esa akɛ obi lɛ anu nɔ hewɔ ni akɛ tsɔsemɔ haa lɛ lɛ shishi. Esa akɛ fɔlɔi hu asusu nɔ ni jɛɔ amɛtsɔsemɔ lɛ mli baa yɛ sɛɛ mli lɛ he. Eji anɔkwale akɛ, etamɔ nɔ ni gbekɛbii fɛɛ baanyɛ̃ tsɔsemɔ kɛjɛ shishijee. (Hebribii 12:11) Shi esaaa akɛ tsɔsemɔ haa gbekɛ lɛ nuɔ he akɛ aawo ehe gbeyei loo aakpoo lɛ loo eshi lɛ kɛ jwɛŋmɔ lɛ akɛ eji efɔŋ feelɔ kɛjɛ fɔmɔ mli. Dani Yehowa aaajaje ewebii lɛ, ekɛɛ: “Kaashe gbeyei . . . ejaakɛ mikɛo yɛ.” (Yeremia 46:28) Hɛɛ, esa akɛ akɛ tsɔsemɔ aha yɛ gbɛ ni nyɛbi lɛ aaanu he akɛ nyɛkɛ lɛ yɛ akɛ fɔlɔi ni yɔɔ suɔmɔ ni fiɔ esɛɛ.

“ŊAAWOO KPAKPA” NÁMƆ

22, 23. Te ooofee tɛŋŋ ona gbɛtsɔɔmɔ ni he hiaa kɛha weku ni miishɛɛ yɔɔ mli lɛ tswaa kɛ shimaa?

²² Wɔbaanyɛ wɔda shi akɛ Yehowa kɛ dɛŋdadei ni he hiaa wɔ koni wɔtswa miishɛɛ weku wɔma shi lɛ eha wɔ. Shi dɛŋdadei lɛ ni wɔyɔɔ lɛ kɛkɛ faaa. Esa akɛ wɔkase amɛ kɛ nitsumɔ yɛ gbɛ ni ja nɔ. Akɛ nɔkwɛmɔ nɔ lɛ, tsu-tswalɔ baanyɛ ana sui gbohii yɛ gbɛ ni ekɛ edɛŋdadei lɛ tsuɔ nii haa lɛ nɔ. Ekɛ ekomɛi baatsu nii yɛ gbɛ ni ejaaa kwraa nɔ. Yɛ shihilɛi ni tamɔ nɛkɛ shishi lɛ, nɔ ni baanyɛ ajɛ mli aba ji ekɛ gbɛi ni etsɔɔ nɔ lɛ baatsu nitsumɔ gbonyo. Nakai nɔŋŋ hu ekolɛ kpaako obaana akɛ sui gbohii komɛi ebabote nyɛ weku lɛ mli nigii. Ekomɛi baafee nɔ ni ehe shi waa diɛŋtsɛ ni ewa kɛha tsakemɔ. Shi, nyiɛmɔ Biblia ŋaawoo lɛ sɛɛ: “Nilelɔ anu ni eshwere yɛ enikasemɔ gbɛfaŋ, ni mɔ ni yɔɔ jwɛŋmɔ hu ana ŋaawoo kpakpa.”—Abɛi 1:5.

²³ Obaanyɛ ona gbɛtsɔɔmɔ kpakpa kɛtsɔ ya ni oooya nɔ ona Nyɔŋmɔ he nilee lɛ nɔ. Ha ohiɛ ahi Biblia mli shishitoo mlai ni kɔɔ weku shihilɛ he lɛ nɔ, ni ofee tsakemɔi yɛ he ni ehe hiaa yɛ. Kwɛmɔ Kristofoi ni amɛdara yɛ mumɔŋ ni toɔ okadi kpakpa akɛ gbalashihilɛ mli hefatalɔi kɛ fɔlɔi lɛ. Okɛ amɛ awie. Nɔ ni fe fɛɛ lɛ, okɛ ohiamɔ nii aya Yehowa ŋɔɔ yɛ sɔlemɔ mli. (Lala 55:23; Filipibii 4:6, 7) Ebaanyɛ eye ebua bo ni ona miishɛɛ weku shihilɛ ni woɔ ehiɛ nyam mli ŋɔɔmɔ.

[Shishigbɛ niŋmai]

KAA ONILEE OKWƐ

Yɛ mɛɛ gbɛ nɔ anɔkwayeli, sanegbaa, woo, kɛ bulɛ kɛ gbalashihilɛ mli miishɛɛ baa?

Mɛɛ gbɛi fɔlɔi baanyɛ atsɔ nɔ ama suɔmɔ ni amɛyɔɔ kɛha amɛbii lɛ nɔ mi?

Mɛɛ nibii kɔɔ tsɔsemɔ kpakpa ni akɛhaa lɛ he?

[Baafa muu mfoniri ni yɔɔ baafa 147]