Nii Ni Yɔɔ Ŋwɛi Kɛ Nii Ni Yɔɔ Shikpɔŋ Lɛ Nɔ Lɛ Anaabuamɔ
‘Esa ehiɛ akɛ eto gbɛjianɔtoo koni eŋɔ nibii fɛɛ eto yitso kome shishi yɛ Kristo mli, nii ni yɔɔ ŋwɛi kɛ nii ni yɔɔ shikpɔŋ lɛ nɔ lɛ fɛɛ.’—EFESOBII 1:9, 10.
1. Mɛni ‘sa Yehowa hiɛ’ akɛ ebaafee yɛ ŋwɛi kɛ shikpɔŋ he?
JEŊ FƐƐ TOIŊJƆLƐ! Nakai ji Yehowa ni ji “hejɔlɛ Nyɔŋmɔ lɛ” yiŋtoo ni yɔɔ nyam. (Hebribii 13:20) Ekɛ emumɔ tsirɛ bɔfo Paulo ni eŋma akɛ ‘esa E-hiɛ’ akɛ “eŋɔ nibii fɛɛ eto yitso kome shishi yɛ Kristo mli, nii ni yɔɔ ŋwɛi kɛ nii ni yɔɔ shikpɔŋ lɛ nɔ lɛ fɛɛ.” (Efesobii 1:9, 10) Te feemɔ wiemɔ ni atsɔɔ shishi yɛ kuku nɛɛ mli akɛ ‘aŋɔ ato’ lɛ shishi diɛŋtsɛ? Biblia he nilelɔ J. B. Lightfoot ŋma akɛ: “Nakai wiemɔ lɛ tsɔɔ ekomefeemɔ ni baahi jeŋ fɛɛ, nɔ̃ mli ni nifeemɔi ni kɛ mligbalamɔ baa ehiŋ mli, shi moŋ mɛi fɛɛ ni yɔɔ mli lɛ baafee ekome yɛ Kristo mli. Esha kɛ gbele, awerɛhoyeli kɛ nijiaŋwujee kɛ nɔnaa fɛɛ sɛɛ baafo.”
“Nii ni Yɔɔ Ŋwɛi”
2. Namɛi ji “nii ni yɔɔ ŋwɛi” ni esa akɛ abua amɛnaa lɛ?
2 Beni bɔfo Petro wieɔ anɔkwa Kristofoi ahiɛnɔkamɔ ni yɔɔ miishɛɛ lɛ he lɛ, eŋma akɛ: “Yɛ eshiwoo lɛ naa lɛ wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.” (2 Petro 3:13) “Ŋwɛi hee” ni awo shi yɛ he ni ŋmalɛ nɛɛ wieɔ he lɛ ji nɔyeli hee ni ji Mesia Maŋtsɛyeli lɛ. Abaabua “nii ni yɔɔ ŋwɛi” ni Paulo tsĩ tã yɛ wolo ni eŋma Efesobii lɛ amli lɛ anaa “yɛ Kristo mli.” Nakai nii lɛ ji adesai fioo ni ahala amɛ koni amɛfata Kristo he kɛye nɔ yɛ ŋwɛi lɛ. (1 Petro 1:3, 4) Ahé Kristofoi 144,000 ní afɔ amɛ mu lɛ “kɛjɛ shikpɔŋ lɛ nɔ,” “kɛjɛ gbɔmɛi ateŋ” koni amɛfata Kristo he kɛye nɔ yɛ eŋwɛi Maŋtsɛyeli lɛ mli.—Kpojiemɔ 5:9, 10; 14:3, 4; 2 Korintobii 1:21; Efesobii 1:11; 3:6.
3. Mɛni hewɔ abaanyɛ akɛɛ akɛ ‘aŋɔ mɛi ni afɔ amɛ mu lɛ ata ŋwɛiniiaŋ’ yɛ be mli ni amɛyɔɔ shikpɔŋ nɔ lolo po lɛ?
3 Atsɔɔ mumɔ krɔŋkrɔŋ lɛ nɔ afɔ́ɔ Kristofoi ni afɔ amɛ mu lɛ ehee, ni amɛbatsɔmɔɔ Yehowa mumɔŋ bii. (Yohane 1:12, 13; 3:5-7) Akɛni Yehowa ŋɔɔ amɛ efeɔ “[e]bii” hewɔ lɛ, amɛbatsɔmɔɔ Yesu nyɛmimɛi. (Romabii 8:15; Efesobii 1:5) No hewɔ lɛ, beni amɛyɔɔ shikpɔŋ nɔ po lɛ, akɛɔ akɛ ‘atée amɛ shi, ni aŋɔ amɛ ata ŋwɛiniiaŋ yɛ Kristo Yesu mli.’ (Efesobii 1:3; 2:6) Amɛnáa hegbɛ ni nɔ kwɔ tamɔ nɛkɛ yɛ Nyɔŋmɔ sɔɔmɔ mli ejaakɛ ‘akɛ shiwoo lɛ mumɔ krɔŋkrɔŋ ni ji amɛgboshinii lɛ ayibaafɔ̃ɔnɔ lɛ esɔo amɛnaa,’ ni asaa enɛ ato amɛ yɛ ŋwɛi. (Efesobii 1:13, 14; Kolosebii 1:5) Belɛ, mɛnɛɛmɛi ji “nii ni yɔɔ ŋwɛi” ni Yehowa etsɔ hiɛ etsɔɔ amɛyifalɛ ní esa akɛ abua amɛnaa lɛ.
Aje Nibii Anaabuamɔ lɛ Shishi
4. Mɛɛ be, ni mɛɛ gbɛ nɔ atsɔ aje “nii ni yɔɔ ŋwɛi” lɛ anaabuamɔ lɛ shishi?
4 Yɛ Yehowa “gbɛjianɔtoo” loo gbɛ ni etsɔɔ nɔ etsuɔ nibii ahe nii lɛ naa lɛ, abaaje “nii ni yɔɔ ŋwɛi” lɛ anaabuamɔ shishi yɛ “bei lɛ ayinɔ.” (Efesobii 1:10) Yɛ Pentekoste afi 33 Ŋ.B. lɛ, nakai bei ni awieɔ he lɛ shɛ. Yɛ nakai gbi lɛ nɔ lɛ, afɔse mumɔ krɔŋkrɔŋ ashwie bɔfoi lɛ kɛ kaselɔi komɛi ni ji hii kɛ yei ni ebua amɛhe naa lɛ anɔ. (Bɔfoi lɛ Asaji 1:13-15; 2:1-4) Nɔ ni tee nɔ lɛ ma nɔ mi ákɛ akɛ kpaŋmɔ hee lɛ eje nitsumɔ shishi, ni eji okadi hu ni tsɔɔ akɛ ato Kristofoi asafo lɛ kɛ maŋ hee ni ji mumɔŋ Israel loo “Nyɔŋmɔ Israel” lɛ shishi.—Galatabii 6:16; Hebribii 9:15; 12:23, 24.
5. Mɛni hewɔ Yehowa to “maŋ” hee yɛ heloonaa Israel najiaŋ lɛ?
5 Mla kpaŋmɔ ni akɛ heloonaa Israel fee lɛ haaa aná “osɔfoi amaŋtsɛyeli kɛ maŋ krɔŋkrɔŋ” ní baasɔmɔ yɛ ŋwɛi kɛya naanɔ. (2 Mose 19:5, 6) Yesu kɛɛ Yudafoi ajamɔŋ hiɛnyiɛlɔi lɛ akɛ: “Abaashɔ̃ Nyɔŋmɔ maŋtsɛyeli lɛ yɛ nyɛdɛŋ, ni aaaŋɔha jeŋmaŋ ko ní woɔ yibii.” (Mateo 21:43) Kristofoi ni afɔ amɛ mu ní akɛfee kpaŋmɔ hee lɛ ji mɛi ni feɔ nakai maŋ ni ji mumɔ Israel lɛ. Bɔfo Petro ŋma amɛ akɛ: “Nyɛ lɛ, weku ní ahala ji nyɛ, maŋtsɛmɛi ní yeɔ osɔfoi, jeŋmaŋ krɔŋkrɔŋ, maŋ ní eŋɔfee enɔ̃, koni nyɛjaje mɔ ni tsɛ́ nyɛ kɛjɛ duŋ lɛ mli kɛba lɛ diɛŋtsɛ enaakpɛɛ la lɛ he lɛ agbojee lɛ; nyɛ lɛ sá lɛ nyɛjeee maŋ, shi agbɛnɛ lɛ Nyɔŋmɔ maŋ ji nyɛ.” (1 Petro 2:9, 10) Kpaŋmɔ ni Yehowa kɛ heloonaa Israel fee akɛ emaŋ lɛ eba naagbee. (Hebribii 8:7-13) Ni taakɛ Yesu gba efɔ̃ shi lɛ, ashɔ̃ hegbɛ ni kulɛ amɛaaná yɛ Mesia Maŋtsɛyeli lɛ mli lɛ yɛ amɛdɛŋ aha mumɔ Israelbii ni ji mɛi 144,000 lɛ.—Kpojiemɔ 7:4-8.
Akɛ Amɛ Fee Maŋtsɛyeli He Kpaŋmɔ
6, 7. Mɛɛ kpaŋmɔ krɛdɛɛ Yesu kɛ emumɔŋ nyɛmimɛi lɛ fee, ni te ehe baa sɛɛnamɔ kɛhaa wɔ tɛŋŋ?
6 Gbi gbɛkɛ ni Yesu to egbele lɛ Kaimɔ lɛ shishi lɛ, ekɛɛ ebɔfoi anɔkwafoi lɛ akɛ: “Nyɛji mɛi ni kɛ mi ehi shi yɛ mikaai lɛ amli; ni mi hu miito maŋtsɛyeli maha nyɛ taakɛ bɔ ni mitsɛ eto eha mi lɛ, koni nyɛye nii ni nyɛnu yɛ mikpɔlɔ lɛ he yɛ mimaŋtsɛyeli lɛ mli, ni nyɛtara sɛii anɔ ni nyɛkojo Israel akutsei nyɔŋma kɛ enyɔ lɛ.” (Luka 22:28-30) Nɔ̃ he ni Yesu wieɔ yɛ ŋmalɛ nɛɛ mli lɛ ji kpaŋmɔ krɛdɛɛ ni ekɛ emumɔŋ nyɛmimɛi 144,000 ní ‘baaye anɔkwa kɛya gbele mli,’ ákɛ ‘kunimyelɔi’ lɛ fee lɛ.—Kpojiemɔ 2:10; 3:21.
7 Kuu fioo nɛɛ mlibii lɛ ŋmɛɛɔ hegbɛ akɛ amɛaahi shi ákɛ adesai yɛ shikpɔŋ nɛɛ nɔ kɛya naanɔ lɛ he. Amɛbaafata Kristo he kɛtara maŋtsɛ sɛii anɔ yɛ ŋwɛi koni amɛye nɔ, ni amɛkojo adesai. (Kpojiemɔ 20:4, 6) Agbɛnɛ nyɛhaa wɔsusua ŋmalɛi krokomɛi ni kɔɔ mɛi ni afɔ amɛ mu nɛɛ pɛ ahe, ní no haa wɔnaa nɔ hewɔ ni “tooi krokomɛi” lɛ yeee Kaimɔ lɛ okadi nibii lɛ eko lɛ ahe wɔkwɛa.—Yohane 10:16.
8. Mɛni ji nɔ ni aboloo ní mɛi ni afɔ amɛ mu lɛ yeɔ lɛ tsɔɔ? (Kwɛmɔ akrabatsa ni yɔɔ baafa 23 lɛ mli.)
8 Mɛi ni afɔ amɛ mu lɛ kɛ Kristo naa amanehulu, ni amɛyɛ he miishɛɛ akɛ amɛaagboi tamɔ lɛ. Paulo ní efata kuu fioo nɛɛ mlibii lɛ ahe lɛ wie akɛ efee klalo akɛ ekɛ nɔ fɛɛ nɔ ni eyɔɔ lɛ aaashã afɔle bɔni afee ni ‘Kristo afee enɔ̃, koni ele lɛ kɛ eshitee lɛ hewalɛ lɛ, ni ekɛ lɛ ana amanehulu.’ Hɛɛ, Paulo yɛ he miishɛɛ akɛ ‘ebaagbo tamɔ Yesu.’ (Filipibii 3:8, 10) Kristofoi ni afɔ amɛ mu lɛ babaoo eto amɛtsui shi yɛ ‘nibii ni afee Yesu kɛtee gbele mli’ ní amɛ hu amɛkɛkpeɔ lɛ amli.—2 Korintobii 4:10.
9. Mɛɛ gbɔmɔtso Kaimɔ aboloo lɛ feɔ he okadi?
9 Beni Yesu toɔ Nuŋtsɔ lɛ Gbɛkɛnaashi Niyenii lɛ shishi lɛ, ekɛɛ akɛ: “Enɛ ji migbɔmɔtso lɛ.” (Marko 14:22) No mli lɛ, egbɔmɔtso diɛŋtsɛ ní etsɛŋ ni abaayi lɛ ni apila lɛ lɛ he ewieɔ lɛ. Aboloo ní masha bɛ mli ní akɛfeɔ egbɔmɔtso lɛ he okadi lɛ sa jogbaŋŋ. Mɛni hewɔ? Ejaakɛ kɛ́ aawie masha he yɛ Biblia lɛ mli lɛ, anyɛɔ akɛdamɔɔ shi ahaa esha loo nɔ fɔŋ. (Mateo 16:4, 11, 12; 1 Korintobii 5:6-8) Yesu eye emuu, ni esha ko bɛ egbɔmɔtso ákɛ adesa lɛ mli. Ekɛ egbɔmɔtso ni eye emuu lɛ shã afɔle akɛ kpatamɔnɔ. (Hebribii 7:26; 1 Yohane 2:2) Enɛ ni efee lɛ he ba sɛɛnamɔ kɛha Kristofoi ni yɔɔ ŋwɛi hiɛnɔkamɔ kɛ mɛi ni yɔɔ hiɛnɔkamɔ akɛ amɛbaahi paradeiso mli yɛ shikpɔŋ nɔ kɛya naanɔ lɛ fɛɛ.—Yohane 6:51.
10. Mɛi ni nuɔ Kaimɔ wein lɛ eko lɛ kɛ ‘Kristo lá lɛ bɔɔ naanyo’ yɛ mɛɛ gbɛ nɔ?
10 Beni Paulo wieɔ wein ni Kristofoi ni afɔ amɛ mu lɛ nuɔ yɛ Kaimɔ lɛ shishi lɛ he lɛ, eŋma akɛ: “Jɔɔmɔ kpulu lɛ ní wɔjɔɔ lɛ, ani jeee Kristo lá lɛ naanyobɔɔ lɛ ni?” (1 Korintobii 10:16) Mɛi ni nuɔ wein lɛ kɛ ‘Kristo lá lɛ bɔɔ naanyo’ yɛ mɛɛ gbɛ nɔ? Yɛ anɔkwale mli lɛ, amɛbɛ mli ni akɛ kpɔmɔnɔ lɛ hã, ejaakɛ amɛ diɛŋtsɛ lɛ, kpɔmɔ he miihia amɛ. Kɛlɛ, kɛtsɔ hemɔkɛyeli ni amɛyɔɔ yɛ Kristo lá ni nyɛɔ mɔ ekpɔ̃ɔ lɛ mli lɛ nɔ lɛ, abu amɛ bem ákɛ mɛi ni sa ŋwɛi shihilɛ. (Romabii 5:8, 9; Tito 3:4-7) Kristo lá ni efɔse eshwie shi lɛ nɔ atsɔɔ afeɔ mɛi 144,000 ni baafata ehe kɛye nɔ lɛ ‘krɔŋkrɔŋ,’ ni no nɔŋŋ nɔ atsɔ ahala amɛ, ni atsuu amɛhe kɛjɛ esha he, ni amɛbatsɔmɔ “mɛi krɔŋkrɔŋi.” (Hebribii 10:29; Daniel 7:18, 27; Efesobii 2:19) Hɛɛ, Kristo lá ni efɔse eshwie shi lɛ nɔ etsɔ ‘ekpɔ̃ mɛi eha Nyɔŋmɔ kɛjɛ akutso fɛɛ akutso kɛ wiemɔ fɛɛ wiemɔ kɛ maŋ fɛɛ maŋ kɛ jeŋmaŋ fɛɛ jeŋmaŋ mli, ni efee amɛ maŋtsɛmɛi kɛ osɔfoi eha wɔ-Nyɔŋmɔ lɛ, ni amɛbaaye shikpɔŋ lɛ nɔ.’—Kpojiemɔ 5:9, 10.
11. Kɛ́ mɛi ni afɔ amɛ mu lɛ nu Kaimɔ wein lɛ, mɛni amɛkɛ no tsɔɔ?
11 Beni Yesu toɔ egbele lɛ he Kaimɔ lɛ shishi lɛ, ekɛ kpulu kɛ wein lɛ ha ebɔfoi anɔkwafoi lɛ, ni ekɛɛ amɛ akɛ: “Nyɛ fɛɛ nyɛnua eko! ejaakɛ enɛ ji milá ni ji kpaŋmɔ hee lɛ nɔ̃ lɛ, ní [aa]afɔse ashwie shi yɛ mɛi pii ahewɔ [kɛ]ha eshaifaa lɛ.” (Mateo 26:27, 28) Taakɛ bɔ ni atsɔ tsina hii kɛ tooi kpakpoi alá nɔ aha Mla kpaŋmɔ ni Nyɔŋmɔ kɛ Israel maŋ lɛ fee lɛ bafee nɔ ni yɔɔ hiɛdɔɔ lɛ, nakai nɔŋŋ yɛ Pentekoste afi 33 Ŋ.B. lɛ, atsɔ Yesu lá lɛ nɔ aha kpaŋmɔ ni Yehowa kɛ mumɔŋ Israel fee lɛ bafee nɔ ni yɔɔ hiɛdɔɔ. (2 Mose 24:5-8; Luka 22:20; Hebribii 9:14, 15) Wein ni damɔ shi kɛha ‘kpaŋmɔ lɛ lá’ ní mɛi ni afɔ amɛ mu lɛ nuɔ lɛ tsɔɔ akɛ amɛfata mɛi ni akɛfee kpaŋmɔ hee lɛ ahe, ni ákɛ amɛmiiná emli sɛɛnamɔi lɛ eko.
12. Te abaptisiɔ mɛi ni afɔ amɛ mu lɛ awoɔ Kristo gbele lɛ mli ahaa tɛŋŋ?
12 Nɔ kroko hu yɛ ní mɛi ni afɔ amɛ mu lɛ kaiɔ. Yesu kɛɛ ekaselɔi anɔkwafoi lɛ akɛ: “Kpulu ni mibanu lɛ, nyɛaanu, ni baptisimɔ ni akɛaabaptisi mi lɛ, akɛaabaptisi nyɛ.” (Marko 10:38, 39) Sɛɛ mli lɛ, bɔfo Paulo wie Kristofoi ní ‘abaptisiɔ amɛ awoɔ Kristo gbele lɛ mli’ lɛ ahe. (Romabii 6:3) Mɛi ni afɔ amɛ mu lɛ kɛ amɛshihilɛ shãa afɔle. Amɛgboɔ afɔleshãa gbele, kɛ shishinumɔ akɛ amɛhaa hegbɛi fɛɛ ni amɛnáa akɛ amɛaahi shi kɛya naanɔ yɛ shikpɔŋ nɔ lɛ ŋmɛɛɔ amɛ. Kɛ́ Kristofoi ni afɔ amɛ mu lɛ ye anɔkwa kɛtee gbele mli, ni atée amɛ shi akɛ mumɔŋ bɔɔ nii, ní amɛyafata Kristo he ‘kɛye maŋtsɛ’ yɛ ŋwɛi lɛ, belɛ Kristo gbele lɛ mli ní abaptisi amɛ awo lɛ eba naagbee.—2 Timoteo 2:10-12; Romabii 6:5; 1 Korintobii 15:42-44, 50.
Okadi Nibii lɛ Yeli
13. Mɛni hewɔ mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ yeee Kaimɔ okadi nibii lɛ eko lɛ, ni mɛni hewɔ amɛyaa Kaimɔ lɛ shishi?
13 Akɛni aboloo kɛ wein ní akɛtsɔɔ yɛ Kaimɔ nifeemɔ lɛ shishi lɛ yeli biɔ ni mɔ atsɔ shihilɛi ni wɔsusu he lɛ fɛɛ mli hewɔ lɛ, ekã shi faŋŋ akɛ ebafeŋ nɔ ni hi akɛ mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ aaaye nibii nɛɛ eko. Mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ diɛŋtsɛ yɔseɔ akɛ amɛfataaa Kristo kuu ni ji mɛi ni afɔ amɛ mu lɛ ahe, ni amɛfataaa mɛi ni Yehowa kɛ amɛ fee kpaŋmɔ koni amɛfata Yesu Kristo he kɛye maŋtsɛ lɛ hu ahe. Akɛni “kpulu” lɛ damɔ shi kɛha kpaŋmɔ lɛ hewɔ lɛ, mɛi ni akɛfee kpaŋmɔ hee lɛ pɛ yeɔ okadi nibii lɛ eko. Abaptisiii mɛi ni yɔɔ hiɛnɔkamɔ akɛ amɛbaahi Maŋtsɛyeli lɛ shishi yɛ shikpɔŋ nɔ akɛ adesai ni eye emuu lɛ awooo Yesu gbele lɛ mli, ni asaŋ ahalako amɛ akɛ amɛyafata ehe kɛye nɔ yɛ ŋwɛi. No hewɔ lɛ, kɛ́ amɛye okadi nibii lɛ eko lɛ, no baatsɔɔ akɛ amɛkɛ amɛhe miiwo nifeemɔ ko ni kɔɔɔ amɛhe mli. No hewɔ lɛ, eyɛ mli akɛ amɛyaa Kaimɔ lɛ shishi moŋ, shi amɛyeee okadi nibii lɛ eko, ni kɛlɛ amɛyaa shishi bɔni afee ni amɛkɛjie bulɛ kpo yɛ nifeemɔ lɛ he. Amɛdaa Yehowa shi yɛ nibii fɛɛ ni etsɔ e-Bi lɛ nɔ efee eha amɛ lɛ he, ni emli ekome ji amɛhe eshai ni ekɛkeɔ amɛ yɛ Kristo lá ni efɔse eshwie shi lɛ hewɔ.
14. Aboloo kɛ wein lɛ ní mɛi ni afɔ amɛ mu lɛ yeɔ lɛ wajeɔ amɛ yɛ mumɔŋ yɛ mɛɛ gbɛ nɔ?
14 Eshwɛ fioo ni Kristofoi ni yi faaa ni ahala amɛ koni amɛyafata Kristo he kɛye nɔ yɛ ŋwɛi lɛ fɛɛ ayi baashɛ yɛ ŋwɛi. Kaimɔ nibii ni mɛi ni afɔ amɛ mu lɛ yeɔ lɛ wajeɔ amɛ yɛ mumɔŋ kɛyashiɔ amɛshihilɛ ni amɛkɛshãa afɔle lɛ baa naagbee. Ákɛ Kristo kuu lɛ mlibii lɛ, ekomefeemɔ yɛ amɛ kɛ amɛnyɛmimɛi hii kɛ yei krokomɛi ni afɔ amɛ mu lɛ ateŋ. Okadi aboloo kɛ wein lɛ ní amɛyeɔ lɛ haa amɛkaiɔ akɛ sɔ̃ kã amɛnɔ akɛ amɛye anɔkwa kɛyashi amɛbaagboi.—2 Petro 1:10, 11.
“Nii ni Yɔɔ Shikpɔŋ lɛ nɔ” lɛ Anaabuamɔ
15. Namɛi kɛ Kristofoi ni afɔ amɛ mu lɛ eyafee ekome lɛ?
15 Kɛjɛ afi 1930 afii lɛ amli kɛbaa nɛɛ, “tooi krokomɛi” babaoo ní amɛfataaa “asafoku bibioo” lɛ he, shi moŋ amɛyɛ hiɛnɔkamɔ akɛ amɛbaahi shi kɛya naanɔ yɛ shikpɔŋ lɛ nɔ lɛ ebafata mɛi ni afɔ amɛ mu lɛ ahe. (Yohane 10:16; Luka 12:32; Zakaria 8:23) Amɛbatsɔmɔ Kristo nyɛmimɛi lɛ ananemɛi anɔkwafoi, ni amɛyeɔ amɛbuaa amɛ kɛshiɛɔ “maŋtsɛyeli lɛ he sanekpakpa nɛɛ” kɛyeɔ jeŋmaji lɛ fɛɛ odase. (Mateo 24:14; 25:40) Enɛ ni amɛfeɔ lɛ baaha Kristo abu amɛ “gwantɛŋi” ni ekɛ amɛ adamɔ “eninejurɔ nɔ” kɛ́ eba jeŋmaji lɛ kojomɔ. (Mateo 25:33-36, 46) Yɛ hemɔkɛyeli ni amɛyɔɔ yɛ Kristo lá lɛ mli lɛ hewɔ lɛ, amɛji mɛi ni baafee “asafoku babaoo” ni baaje “amanehulu kpeteŋkpele lɛ” mli lɛ.—Kpojiemɔ 7:9-14.
16. Namɛi fata “nii ni yɔɔ shikpɔŋ nɔ lɛ” ahe, ni mɛi nɛɛ fɛɛ baaná hegbɛ akɛ amɛtsɔmɔ “Nyɔŋmɔ bii” yɛ mɛɛ gbɛ nɔ?
16 Kɛ́ mɛi 144,000 lɛ fɛɛ ayi shɛ yɛ ŋwɛi lɛ, abaaŋmɛɛ “kɔɔyɔi” ní baakpata Satan yiwalɛ nibii agbɛjianɔtoo ni yɔɔ shikpɔŋ nɔ lɛ hiɛ lɛ ahe. (Kpojiemɔ 7:1-4) Yɛ Kristo kɛ ehefatalɔi maŋtsɛmɛi kɛ osɔfoi lɛ Afii Akpe Nɔyeli lɛ mli lɛ, abaatée mɛi babaoo ni aleee amɛyifalɛ shi abafata asafo babaoo lɛ ahe. (Kpojiemɔ 20:12, 13) Mɛnɛɛmɛi baaná hegbɛ akɛ amɛaatsɔmɔ Mesia Nɔyeli lɛ ni enɔ Maŋtsɛ ji Kristo Yesu lɛ shishibii yɛ shikpɔŋ lɛ nɔ kɛya naanɔ. Yɛ Afii Akpe Nɔyeli lɛ naagbee lɛ, abaaka “nibii ni yɔɔ shikpɔŋ lɛ nɔ” nɛɛ akwɛ nɔ ni ji naagbee nɔ̃ kwraa. Mɛi ni baaye anɔkwa yɛ nakai kaa lɛ mli lɛ baatsɔmɔ “Nyɔŋmɔ bii” yɛ shikpɔŋ lɛ nɔ.—Efesobii 1:10; Romabii 8:21; Kpojiemɔ 20:7, 8.
17. Mɛɛ gbɛ nɔ Yehowa aaatsɔ etsu eyiŋtoo lɛ he nii?
17 No baatsɔɔ akɛ, Yehowa etsɔ “[e]gbɛjianɔtoo” ni nilee kpele yɔɔ mli loo gbɛ ni etsɔɔ nɔ etsuɔ nibii ahe nii lɛ nɔ etsu eyiŋtoo akɛ “[ee]eŋɔ nibii fɛɛ eto yitso kome shishi yɛ Kristo mli, nii ni yɔɔ ŋwɛi kɛ nii ni yɔɔ shikpɔŋ lɛ nɔ lɛ fɛɛ” lɛ he nii. No mli lɛ, toiŋjɔlɛ baahi jeŋ fɛɛ, ni bɔɔ nii ni yɔɔ ŋwɛi kɛ shikpɔŋ nɔ ní yɔɔ nilee lɛ fɛɛ kɛ miishɛɛ baaba amɛhe shi yɛ Yehowa ni ji Yiŋtolɔ Kpeteŋkpele lɛ jalɛ nɔyeli lɛ shishi.
18. Kaimɔ lɛ shishi ní mɛi ni afɔ amɛ mu lɛ kɛ amɛnanemɛi lɛ baaya lɛ he baaba sɛɛnamɔ aha amɛ fɛɛ yɛ mɛɛ gbɛ nɔ?
18 Kɛ́ mɛi fioo ni afɔ amɛ mu lɛ kɛ amɛnanemɛi ni ji tooi krokomɛi akpekpei abɔ lɛ anaa yakpe shi yɛ April 12 afi 2006 lɛ, kwɛ bɔ ni no baawo amɛhemɔkɛyeli lɛ mli hewalɛ aha! Amɛbaaye Kristo gbele lɛ Kaimɔ lɛ taakɛ Yesu fã akɛ: “Nyɛfea enɛ ni nyɛŋɔkai mi” lɛ. (Luka 22:19) Esa akɛ mɛi fɛɛ ni baaya nifeemɔ nɛɛ shishi lɛ akai nibii ni Yehowa etsɔ esuɔmɔ Bi Yesu Kristo nɔ efee eha amɛ lɛ.
Kɛha Emlitĩi
• Mɛni ji Yehowa yiŋtoo kɛha nii ni yɔɔ ŋwɛi kɛ nii ni yɔɔ shikpɔŋ lɛ nɔ lɛ?
• Namɛi ji “nii ni yɔɔ ŋwɛi” lɛ, ni mɛɛ gbɛ nɔ atsɔ abua amɛnaa?
• Namɛi ji “nii ni yɔɔ shikpɔŋ” lɛ nɔ lɛ, ni mɛɛ hiɛnɔkamɔ amɛyɔɔ?
[Akrabatsa ni yɔɔ baafa 23]
“Kristo Gbɔmɔtso Lɛ”
Beni Paulo wieɔ nɔ ni aboloo ni Kristo nanemɛi ni afɔ amɛ mu lɛ yeɔ lɛ tsɔɔ lɛ he yɛ 1 Korintobii 10:16, 17 lɛ, etsĩ “gbɔmɔtso” tã yɛ shishinumɔ krɛdɛɛ ko hewɔ. Ekɛɛ akɛ: “Aboloo ní wɔkumɔɔ lɛ, ani jeee Kristo gbɔmɔtso lɛ naanyobɔɔ lɛ ni? Ejaakɛ aboloo kome ni, ni wɔyi pii lɛ gbɔmɔtso kome ji wɔ, ejaakɛ wɔ fɛɛ wɔyeɔ aboloo kome lɛ eko.” Kɛ́ Kristofoi ni afɔ amɛ mu lɛ ye Kaimɔ aboloo lɛ, amɛkɛ no tsɔɔ ekomefeemɔ ni yɔɔ amɛteŋ ákɛ kuu ni afɔ amɛ mu, ni kuu nɛɛ tamɔ gbɔmɔtso, ni e-Yitso ji Kristo.—Mateo 23:10; 1 Korintobii 12:12, 13, 18.
[Mfonirii ni yɔɔ baafa 23]
Mɛni hewɔ mɛi ni afɔ amɛ mu lɛ pɛ yeɔ aboloo lɛ ni amɛ nuɔ wein lɛ?
[Mfoniri ni yɔɔ baafa 25]
Yehowa baatsɔ egbɛjianɔtoo lɛ nɔ efee bɔɔ nii ni yɔɔ ŋwɛi kɛ shikpɔŋ nɔ lɛ fɛɛ ekome