Ani Ofee Klalo Kɛha Yehowa Gbi Lɛ?

“Yehowa gbi wulu lɛ ebɛŋkɛ, ebɛŋkɛ, ni eeye oyai naakpa.”—ZEFANIA 1:14.

 1. Te Ŋmalɛi lɛ wieɔ Yehowa gbi lɛ he ehaa tɛŋŋ?

ETSƐŊ ni Yehowa “gbi wulu ni he yɔɔ gbeyei lɛ” baaba nibii agbɛjianɔtoo fɔŋ nɛɛ nɔ. Ŋmalɛi lɛ wieɔ Yehowa gbi lɛ he akɛ tawuu, duŋ, mlifu, haomɔ, hejaramɔ, tsuifaa, kɛ amaŋfɔfeemɔ gbi. Ni kɛlɛ, mɛi komɛi ayi baana wala, ejaakɛ “mɔ fɛɛ mɔ ni aaatsɛ Yehowa gbɛi anɔ lɛ, aaahere eyiwala.” (Yoel 3:3-5; Amos 5:18-20) Hɛɛ, Nyɔŋmɔ baakpata ehenyɛlɔi ahiɛ yɛ nakai beaŋ, ni ebaahere ewebii ayiwala.

 2. Mɛni hewɔ esa akɛ wɔna oyaiyeli henumɔ yɛ Yehowa gbi lɛ he lɛ?

² Nyɔŋmɔ gbalɔi lɛ kɛ oyaiyeli henumɔ wie Yehowa gbi lɛ he. Akɛ nɔkwɛmɔ nɔ lɛ, Zefania ŋma akɛ: “Yehowa gbi wulu lɛ ebɛŋkɛ, ebɛŋkɛ, ni eeye oyai naakpa.” (Zefania 1:14) Shihilɛ lɛ biɔ oyaiyeli babaoo ŋmɛnɛ ejaakɛ Nyɔŋmɔ Blafo Nukpa, Maŋtsɛ Yesu Kristo, miihe ‘ekɛ eklante lɛ aŋmɔ ehɛ, koni eta okpɔŋɔ nɔ kɛje kpo yɛ anɔkwale, mlijɔlɛ, kɛ jalɛ hewɔ.’ (Lala 45:4, 5) Ani ofee klalo kɛha nakai gbi lɛ?

Amɛná Gbɛkpamɔi ni Mli Wa

 3. Mɛɛ gbɛkpamɔi Tesalonika Kristofoi lɛ ateŋ mɛi komɛi ná, ni mɛɛ yiŋtoi enyɔ hewɔ ni amɛtɔ̃ lɛ?

³ Mɛi pii ená gbɛkpamɔi ni baaa mli yɛ Yehowa gbi lɛ he. Mra be mli Kristofoi ni hi Tesalonika lɛ ateŋ mɛi komɛi wie akɛ, ‘Yehowa gbi lɛ eshɛ eta!’ (2 Tesalonikabii 2:2) Shi yiŋtoi enyɔ komɛi yɛ ni nomɛi ahewɔ ni ebɛŋkɛko lɛ. Beni etsĩɔ enɛɛmɛi ateŋ ekome tã lɛ, bɔfo Paulo wie akɛ: “Be mli ni amɛaakɛɛ akɛ: ‘Hejɔlɛ yɛ ni wɔyɛ shweshweeshwe!’ lɛ, no mli nɔŋŋ hiɛkpatamɔ aaabatua amɛ trukaa.” (1 Tesalonikabii 5:1-6) Wɔ diɛŋtsɛ hu wɔmiimɛ nakai wiemɔi lɛ amlibaa yɛ nɛkɛ “naagbee be” nɛɛ mli. (Daniel 12:4) Tesalonikabii lɛ bɛ odaseyeli kroko hu ni tsɔɔ akɛ Yehowa gbi wulu lɛ eshɛ shi, ejaakɛ Paulo kɛɛ amɛ akɛ: “Ja Nyɔŋmɔ jamɔ kwamɔ lɛ eba fɛɛ dã.” (2 Tesalonikabii 2:3) Beni Paulo ŋmala nakai wiemɔi lɛ (aaafee afi 51 Ŋ.B.) lɛ, no mli lɛ ‘hemɔkɛyeli kwamɔ’ kɛmiijɛ anɔkwa Kristojamɔ he lɛ ejieko ehe kpo jogbaŋŋ kɛmɔko shi. Ŋmɛnɛ, wɔnaa ni eje kpo faŋŋ yɛ Kristendom. Shi, yɛ amɛ gbɛkpamɔi ni baaa mli lɛ fɛɛ sɛɛ lɛ, yɛ naagbee lɛ, nakai anɔkwafoi ni afɔ amɛ mu ni yɔɔ Tesalonika, ni tee nɔ amɛsɔmɔ Nyɔŋmɔ yɛ anɔkwayeli mli kɛyashi gbele mli lɛ, anine shɛ ŋwɛi nyɔmɔwoo nɔ. (Kpojiemɔ 2:10) Wɔ hu wɔnine baashɛ nyɔmɔwoo nɔ kɛji wɔtee nɔ wɔye anɔkwa beni wɔmɛɔ Yehowa gbi lɛ.

 4. (a) Akɛ Yehowa gbi lɛ tsaa mɛni nɔ yɛ 2 Tesalonikabii 2:1, 2? (b) Mɛɛ susumɔi mɛi ni atsɛɔ amɛ Sɔlemɔ lɛ Tsɛmɛi lɛ ná yɛ Kristo sɛɛkuu lɛ kɛ saji ni kɔɔ he lɛ ahe?

⁴ Biblia lɛ kɛ “Yehowa gbi wulu lɛ” he wiemɔ tsaa “ba ni wɔ Nuntsɔ Yesu Kristo eba” lɛ nɔ. (2 Tesalonikabii 2:1, 2, NW) Mɛi ni atsɛɔ amɛ akɛ Sɔlemɔ lɛ Tsɛmɛi ná shishinumɔi sɔrɔtoi yɛ Kristo sɛɛkuu lɛ, kɛ ba ni eba lɛ, kɛ e-Afii Akpe Nɔyeli lɛ he. (Kpojiemɔ 20:4) Yɛ Ŋ.B. afii ohai enyɔ lɛ mli lɛ, Papias ni jɛ Hierapolis lɛ baná susumɔi komɛi ni ji gbɛkpamɔi ni tsɔɔ bɔ ni shikpɔŋ lɛ baaba nii yɛ naakpɛɛ gbɛ nɔ yɛ Kristo Afii Akpe Nɔyeli lɛ mli. Justin Martyr wie ba ni Yesu eba lɛ he shii abɔ, ni ekpa gbɛ akɛ Yerusalem ni asaa ato ama shi ekoŋŋ lɛ baafee he ni E-Maŋtsɛyeli baajɛ aye nɔ. Irenæus ni jɛ Lyons lɛ hu tsɔɔ akɛ yɛ Roma Maŋtsɛyeli lɛ hiɛkpatamɔ sɛɛ lɛ, Yesu baapue ni akɛ hiŋmɛi baana lɛ, ni ebaafimɔ Satan, ni ebaaye maŋtsɛ yɛ shikpɔŋ nɔ Yerusalem.

 5. Mɛni woloŋlelɔi komɛi ewie yɛ Kristo “Baa ni Ji Enyɔ” lɛ kɛ e-Afii Akpe Maŋtsɛyeli lɛ he?

⁵ Yinɔsaneŋmalɔ Philip Schaff wie akɛ “hemɔkɛyeli ni jeɔ kpo fe fɛɛ” yɛ be ni tsɔ Nikaea Gwabɔɔ ni atsɛ yɛ afi 325 Ŋ.B. lɛ hiɛ lɛ mli ji “hemɔkɛyeli ni tsɔɔ Kristo anunyam nɔyeli ni akɛ hiŋmɛi naa yɛ shikpɔŋ nɔ, ní hetselɔi ni atee amɛ shi lɛ baafata ehe kɛye nɔ afii akpe, dani mɛi fɛɛ agbohiiashitee kɛ kojomɔ lɛ baaba.” A Dictionary of the Bible, ni James Hastings fee lɛ wie akɛ: “Tertullian, Irenæus, kɛ Hippolytus kã he amɛmiikpa [Yesu Kristo] Baa ni eshɛ shi etã lɛ gbɛ lolo; shi Alexandria Tsɛmɛi lɛ kɛ susumɔ gbɛ hee ko eha wɔ. . . . Kɛjɛ be mli ni Augustine tsɔɔ akɛ Afii Akpe Nɔyeli lɛ nɔŋŋ ji be mli ni Sɔlemɔ lɛ asraafoi lɛ kɛyɔɔ wala mli lɛ kɛbaa nɛɛ, no etsi Kristo Baa ni Ji Enyɔ lɛ eto wɔsɛɛ be ni yɔɔ shɔŋŋ mli.”

Yehowa Gbi lɛ kɛ Ba ni Yesu Eba Lɛ

 6. Mɛni hewɔ esaaa ni wɔmuɔ sane naa akɛ Yehowa gbi lɛ yɛ wɔsɛɛ be shɔŋŋ lɛ?

⁶ Susumɔi ni ejaaa kɛ hiɛnɔkamɔi ni feɔ yaka baa, shi nyɛkahaa wɔsusua akɛ Yehowa gbi lɛ yɛ wɔsɛɛ be shɔŋŋ. Ba ni Yesu eba ni anaaa lɛ kɛ hiŋmɛi, ni kɔɔ enɛ he yɛ Ŋmalɛ shishinumɔ naa lɛ, eje shishi momo. Buu-Mɔɔ kɛ Yehowa Odasefoi awoji krokomɛi ni tamɔ nakai lɛ kɛ Ŋmalɛ mli odaseyeli hãa yɛ be kɛ bei amli kɛmaa nɔ mi akɛ, ba ni Kristo eba lɛ je shishi yɛ afi 1914.a No hewɔ lɛ, belɛ, mɛni Yesu wie yɛ ba ni eba lɛ he mɔ?

 7. (a) Mɛni ji ba ni Yesu eba lɛ kɛ nibii agbɛjianɔtoo lɛ naagbee lɛ he okadi lɛ fãi komɛi? (b) Te wɔɔfee tɛŋŋ ni ahere wɔyiwala?

⁷ Ba ni Yesu eba lɛ batsɔ saneyitso kɛha sanegbaa beni eshwɛ fioo ni ebaagbo lɛ. Beni amɛnu ni egba Yerusalem sɔlemɔtsu lɛ hiɛkpatamɔ lɛ efɔ shi sɛɛ lɛ, ebɔfoi lɛ, ni ji Petro, Yakobo, Yohane, kɛ Andrea bi akɛ: “Mɛɛ be mli nibii nɛɛ baaba, ni mɛni baafee ba ni oba lɛ kɛ nibii agbɛjianɔtoo lɛ naagbee lɛ he okadi?” (Mateo 24:1-3, NW; Marko 13:3, 4) Yɛ hetoohamɔ mli lɛ, Yesu gba tai, hɔmɔ, shikpɔŋhosomɔi, kɛ ba ni eba lɛ kɛ nibii agbɛjianɔtoo lɛ he “okadi” lɛ he kadimɔ nii krokomɛi efɔ shi. Ewie hu akɛ: “Mɔ ni hiɛɔ mli kɛyawulaa shi lɛ, lɛ aaahere eyiwala.” (Mateo 24:13) Abaahere wɔyiwala kɛji wɔkɛ anɔkwayeli ŋmɛ wɔtsui shi kɛyashi wala ni wɔyɔɔ mli amrɔ nɛɛ naagbee, loo kɛyashi gbɛjianɔtoo fɔŋ nɛɛ naagbee.

 8. Dani Yudafoi agbɛjianɔtoo lɛ naagbee lɛ aaaba lɛ, mɛni esa akɛ atsu agbe naa, ni mɛni afeɔ yɛ enɛ he ŋmɛnɛ?

⁸ Dani naagbee lɛ aaaba lɛ, ba ni Yesu eba lɛ he okadi ko ni he hiaa waa baaba mli. Ewie yɛ enɛ he akɛ: ‘Aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.’ (Mateo 24:14) Dani Romabii lɛ aaakpata Yerusalem hiɛ ni Yudafoi anibii agbɛjianɔtoo lɛ aaaba naagbee yɛ afi 70 Ŋ.B. lɛ, Paulo nyɛ ewie akɛ ‘aashiɛ sanekpakpa lɛ aatsɔɔ bɔɔ nii fɛɛ ni yɔɔ ŋwɛi shishi lɛ.’ (Kolosebii 1:23) Shi ŋmɛnɛ, Yehowa Odasefoi miitsu shiɛmɔ nitsumɔ kpele yɛ “je nɛŋ fɛɛ.” Nyɔŋmɔ egbele gbɛ, yɛ afii fioo ni ho nyɛsɛɛ nɛɛ lɛ amli, koni anyɛ aye odase kpeteŋkpele yɛ Europa Bokagbɛ. Woji akalamɔ tsɔnei kɛ nibii krokomɛi ni amɛyɔɔ yɛ jeŋ fɛɛ lɛ hewɔ lɛ, Yehowa gbɛjianɔtoo lɛ efee klalo kɛha nitsumɔ babaoo, yɛ “shikpɔŋkuku ni ayako mli dã” lɛ po mli. (Romabii 15:22, 23, NW) Ani otsui tsirɛɔ bo koni ofee nɔ ni fe fɛɛ ni ooonyɛ ni okɛye odase dani naagbee lɛ aba? Kɛ́ nakai lɛ, no lɛ Nyɔŋmɔ baanyɛ awaje bo koni oná nitsumɔ ni kã wɔhiɛ ni nyɔmɔwoo yɔɔ mli lɛ mli gbɛfaŋnɔ.—Filipibii 4:13; 2 Timoteo 4:17.

 9. Mɛɛ oti ko Yesu wie he, taakɛ aŋma yɛ Mateo 24:36 lɛ?

⁹ Maŋtsɛyeli-shiɛmɔ nitsumɔ ni agba afɔ shi lɛ kɛ ba ni Yesu eba lɛ he okadi lɛ fãi krokomɛi lɛ miiba mli amrɔ nɛɛ. Enɛ hewɔ lɛ, nibii agbɛjianɔtoo fɔŋ nɛɛ naagbee lɛ ebɛŋkɛ. Lɛlɛŋ, Yesu wie akɛ: “Shi no gbi lɛ kɛ no ŋmɛlɛtswaa lɛ mɔ ko mɔ ko leee he eko, bɔfoi ni yɔɔ ŋwɛi lɛ tete leee, ni bi lɛ tete leee, ja mitsɛ kome kɛkɛ.” (Mateo 24:4-14, 36) Shi Yesu gbalɛ lɛ baanyɛ aye abua wɔ ni wɔfee klalo kɛha “no gbi lɛ kɛ no ŋmɛlɛtswaa lɛ.”

Amɛfee Klalo

10. Te wɔfeɔ tɛŋŋ wɔleɔ akɛ wɔbaanyɛ wɔshi kpe yɛ mumɔŋ?

¹⁰ Kɛji wɔyi aaana wala yɛ Yehowa gbi wulu lɛ nɔ lɛ, no lɛ esa akɛ wɔshi kpe yɛ mumɔŋ ni wɔdamɔ shi shiŋŋ wɔha anɔkwa jamɔ. (1 Korintobii 16:13) Wɔle akɛ wɔbaanyɛ wɔŋmɛ wɔtsui shi yɛ gbɛ ni tamɔ nɛkɛ nɔ, ejaakɛ weku ko ni sheɔ Nyɔŋmɔ gbeyei fee nakai ni amɛyi na wala kɛtsɔ Nu Afua ni kpata adesai fɔji ahiɛ yɛ afi 2370 D.Ŋ.B. lɛ mli. Beni ekɛ nakai yinɔ lɛ toɔ ba ni eba lɛ he lɛ, Yesu wie akɛ: “Bɔ ni Noa gbii lɛ fee lɛ, nakai ba ni gbɔmɔ Bi lɛ eba lɛ hu baatamɔ. Ejaakɛ bɔ ni yɔɔ yɛ gbii ni nyiɛ nu afua lɛ hiɛ lɛ amli, ni mɛi lɛ hiɛ niyeli kɛ ninumɔ kɛ yoowɛɛ kɛ gbalahamɔ mli aahu kɛyashi gbi ni Noa yabote adeka lɛ mli; ni amɛhiɛ bɛ amɛhe nɔ kɛyashi nu afua lɛ baloo amɛ fɛɛ kɛtee lɛ, nakai nɔŋŋ ba ni gbɔmɔ Bi lɛ eba lɛ aaatamɔ.”—Mateo 24:37-39, NW.

11. Mɛɛ gbɛ Noa kɔ́, yɛ yiwalɛ nifeemɔ ni hi shi yɛ egbii lɛ amli lɛ fɛɛ sɛɛ?

¹¹ Taakɛ wɔji lɛ, Noa kɛ eweku lɛ hi yiwalɛ jeŋ ko mli. Ŋwɛibɔfoi toigbolɔi, ni ji “Nyɔŋmɔ bihii” tsake amɛhe gbɔmɛi ni amɛkɛ yei bahi shi akɛ amɛŋamɛi ni amɛkɛ amɛ fɔ́ Nefilim ni amɛhiii kwraa—yiwalɔi ni ŋwanejee ko bɛ he akɛ amɛha yiwalɛ shihilɛ lɛ mli wo wu. (1 Mose 6:1, 2, 4; 1 Petro 3:19, 20) Shi kɛlɛ, “Noa kɛ Nyɔŋmɔ nyiɛ” yɛ hemɔkɛyeli mli. “Eye emuu yɛ eyinɔbii lɛ”—ni ji yinɔ fɔŋ ni hi shi yɛ egbii lɛ amli lɛ “ateŋ.” (1 Mose 6:9-11) Kɛ wɔtsɔ sɔlemɔ nɔ wɔkɛ wɔhe fɔ̃ Nyɔŋmɔ nɔ lɛ, wɔ hu wɔbaanyɛ wɔfee nakai yɛ nɛkɛ yiwalɛ jeŋ fɔŋ nɛɛ mli, beni wɔmɛɔ Yehowa gbi lɛ.

12. (a) Mɛɛ nitsumɔ Noa tsu, kɛfata adeka lɛ kpɛɛ he? (b) Te gbɔmɛi fee amɛnii yɛ Noa shiɛmɔ lɛ he amɛha tɛŋŋ, ni mɛni jɛ mli ba kɛha amɛ?

¹² Ale Noa jogbaŋŋ akɛ mɔ ko ni kpɛ adeka ko kɛha wala yibaamɔ kɛtsɔ Nu Afua lɛ mli. Eji “jalɛ shiɛlɔ” hu, shi eyinɔbii lɛ “[ahiɛ] bɛ amɛhe nɔ” yɛ eshɛɛ sane ni jɛ Nyɔŋmɔ ŋɔɔ lɛ he. Amɛye nii ni amɛnu nii, amɛbote gbalashihilɛ mli, amɛto wekui ashishi, ni amɛtee nɔ yɛ daa gbi shihilɛ mli nifeemɔi amli aahu kɛyashi Nu Afua lɛ baloo amɛ fɛɛ kɛtee. (2 Petro 2:5; 1 Mose 6:14) Amɛsumɔɔɔ ni amɛnu wiemɔ kɛ jeŋba ni ja he sane ko, tamɔ bɔ ni yinɔ fɔŋ ni yɔɔ ŋmɛnɛ lɛ tsimɔɔ etoii yɛ nɔ ni Yehowa Odasefoi wieɔ yɛ “tsuitsakemɔ kɛ Nyɔŋmɔ hamɔ,” Kristo mli hemɔkɛyeli, jalɛ nifeemɔ, kɛ “kojomɔ ni baaba” lɛ he lɛ pɛpɛɛpɛ. (Bɔfoi lɛ Asaji 20:20, 21; 24:24, 25) Nɔ ko bɛ ni aŋma afɔ̃ shi ni tsɔɔ mɛi abɔ ni yɔɔ shikpɔŋ lɛ nɔ beni Noa jajeɔ Nyɔŋmɔ shɛɛ sane lɛ. Shi wɔyɛ nɔmimaa yɛ nɔ kome he, ákɛ gbɔmɛi abɔ ni yɔɔ shikpɔŋ nɔ lɛ nɔ gbɔ́ kwraa yɛ afi 2370 D.Ŋ.B.! Nu Afua lɛ kpata mɛi fɔji lɛ ahiɛ, ni abaa mɛi ni efee klalo kɛha nakai Nyɔŋmɔ nifeemɔ lɛ pɛ ayi—Noa kɛ mɛi krokomɛi kpawo ni yɔɔ eweku lɛ mli lɛ.—1 Mose 7:19-23; 2 Petro 3:5, 6.

13. Mɛɛ kojomɔ akpɔ ni ajɛ ŋwɛi awo Noa ná mli hekɛnɔfɔɔ kɛmɔ shi, ni efee enii yɛ enɛ kɛ gbeekpamɔ naa yɛ mɛɛ gbɛ nɔ?

¹³ Nyɔŋmɔ kɛ afii babaoo tsɔɔɔ hiɛ etswaaa Noa adafi yɛ gbi kɛ ŋmɛlɛtswaa pɔtɛɛ nɔ ni Nu Afua lɛ baaba lɛ he. Shi, beni Noa eye afii 480 lɛ, Yehowa wo akpɔ akɛ: “Mimumɔ lɛ kɛ gbɔmɛi epeleŋ he daa yɛ amɛ gbɛduu lɛ mli; ejaakɛ heloo ji amɛ, ni amɛgbii afee afii oha kɛ nyɔŋmai enyɔ.” (1 Mose 6:3) Noa ná hekɛnɔfɔɔ kɛmɔ shi yɛ nɛkɛ kojomɔ akpɔ ni ajɛ ŋwɛi awo nɛɛ mli. Beni eye afii 500 sɛɛ lɛ, “efɔ́ Shem kɛ Ham kɛ Yafet,” ni kusum ni yɔɔ nakai beaŋ lɛ tsɔɔ akɛ afii 50 kɛmiishɛ 60 ho dani ebihii lɛ bote gbalashihilɛ mli. Beni akɛɛ Noa akɛ ekpɛ adeka lɛ kɛha yibaamɔ kɛtsɔ Nu Afua lɛ mli lɛ, eka shi faŋŋ akɛ nakai ebihii lɛ kɛ amɛŋamɛi lɛ ye amɛbua lɛ yɛ nakai nitsumɔ lɛ mli. Eeenyɛ efee akɛ adeka lɛ kpɛɛ kɛ Noa sɔɔmɔ akɛ “jalɛ shiɛlɔ” lɛ bakpe pɛpɛɛpɛ, ni no hã etsu nii ni enaaa deka kwraa yɛ afii 40 loo 50 ni ho dani Nu Afua lɛ ba lɛ mli. (1 Mose 5:32; 6:13-22) Ekɛ eweku lɛ fee amɛnii yɛ hemɔkɛyeli mli, yɛ nakai afii lɛ amli fɛɛ. Nyɛhaa wɔ hu wɔjiea hemɔkɛyeli kpo beni wɔshiɛɔ sanekpakpa lɛ ni wɔmɛɔ Yehowa gbi lɛ.—Hebribii 11:7.

14. Yɛ naagbee lɛ, mɛni Yehowa kɛɛ Noa, ni mɛni hewɔ?

¹⁴ Beni eshwɛ fioo ni ebaagbe adeka lɛ naa lɛ, ekolɛ Noa baasusu akɛ Nu Afua lɛ baa eshɛ shi eta, eyɛ mli akɛ eleee be pɔtɛɛ ni ebaaba. Yɛ naagbee lɛ, Yehowa kɛɛ lɛ akɛ: “Eshwɛ biɛ gbii kpawo ni maha nu abanɛ yɛ shikpɔŋ lɛ nɔ shwane-shwane kɛ nyɔɔŋ-nyɔɔŋ gbii nyɔŋmai ejwɛ.” (1 Mose 7:4) No hã Noa kɛ eweku lɛ ná be ni fa bɔ ni sa ni amɛkɛaabua kooloi henɔi lɛ fɛɛ anaa amɛbawo adeka lɛ mli koni amɛ diɛŋtsɛ hu amɛbote mli dani Nu Afua lɛ aje shishi. Ehe ehiaaa ni wɔle gbi kɛ ŋmɛlɛtswaa nɔ ni gbɛjianɔtoo nɛɛ hiɛkpatamɔ lɛ baaje shishi; akɛ kooloi ayibaamɔ woko wɔdɛŋ, ni adesai ni kpaa gbɛ akɛ amɛyi baana wala lɛ miibote mfonirifeemɔŋ adeka, ni ji Nyɔŋmɔ webii amumɔŋ paradeiso lɛ mli momo.

“Nyɛsaraa”

15. (a) Te obaatsɔɔ Yesu wiemɔi ni anaa yɛ Mateo 24:40-44 lɛ mli yɛ bo diɛŋtsɛ owiemɔ mli oha tɛŋŋ? (b) Mɛɛ hewalɛ le ni wɔleee be pɔtɛɛ ni Yesu baaba ebatsu Nyɔŋmɔ oweletɔɔ he nii lɛ náa yɛ wɔnɔ?

¹⁵ Yesu wie yɛ ba ni eba lɛ he akɛ: “No mli lɛ mɛi enyɔ [aaatsu nii yɛ] ŋmɔshi, aaaŋɔ mɔ kome, ni aaashi mɔ kroko lɛ. Mɛi enyɔ aaawiɛ [ŋmaa ni amɛkɛfee mamu] yɛ wiɛ sɛɛ; aaaŋɔ mɔ kome ni aaashi mɔ kroko lɛ. No hewɔ lɛ nyɛsaraa, ejaakɛ nyɛleee nɔ ŋmɛlɛtswaa nɔ ni nyɛ nuntsɔ lɛ baa. Shi nyɛnaa nyɛlea akɛ, kɛ́ shiatsɛ ko le nɔ ŋmɛlɛtswaa nɔ ni julɔ baa lɛ, kulɛ eeesara ni eŋmɛŋ gbɛ ni agbu ewe lɛ awoŋ. No hewɔ lɛ nyɛ hu nyɛsaa nyɛhe nyɛtoa, ejaakɛ nɔ ŋmɛlɛtswaa ni nyɛsusuuu lɛ nɔ gbɔmɔ bi lɛ baa.” (Mateo 24:40-44; Luka 17:34, 35) Le ni wɔleee be pɔtɛɛ ni Yesu baaba ni ebatsu Nyɔŋmɔ oweletɔɔ he nii lɛ haa wɔhiɛ hiɔ wɔhe nɔ ni ehaa wɔnaa hegbɛ daa gbi koni wɔkɛma nɔ mi akɛ jeee pɛsɛmkunya henumɔi wɔkɛsɔmɔɔ Yehowa lɛ.

16. Mɛni baaba aŋkroaŋkroi ni ‘ashi amɛ’ kɛ mɛi ni ‘aŋɔ amɛ’ lɛ anɔ?

¹⁶ Aŋkroaŋkroi ni ‘ashi amɛ’ koni akpata amɛkɛ mɛi fɔji lɛ ahiɛ lɛ ateŋ mɛi komɛi baafee mɛi ni be ko lɛ amɛbaná hiɛtɛjemɔ, shi pɛsɛmkunya shihilɛ gbɛ yeɔ amɛnɔ kunim kwraa lɛ. Eba akɛ wɔɔfata mɛi ni ‘aŋɔ amɛ,’ mɛi ni etu amɛhe kwraa amɛha Yehowa ni amɛdaa lɛ shi lɛlɛŋ yɛ mumɔŋ nibii ni etsɔɔ “tsulɔ anɔkwafo kɛ nilelɔ” lɛ nɔ ehaa amɛ lɛ he lɛ ahe. (Mateo 24:45-47) Nyɛhaa wɔsɔmɔa Nyɔŋmɔ aahu kɛyashi naagbee, kɛ “suɔmɔ ni jɛ tsui ni mli tse kɛ henilee kpakpa kɛ hemɔkɛyeli ni apasa ko bɛ mli lɛ mli.”—1 Timoteo 1:5.

Nifeemɔi Krɔŋkrɔŋi Ahe Miihia

17. (a) Mɛni agba afɔ shi yɛ 2 Petro 3:10? (b) Mɛni ji nifeemɔi kɛ nitsumɔi ni 2 Petro 3:11 woɔ he hewalɛ lɛ ekomɛi?

¹⁷ Bɔfo Petro ŋma akɛ: “Nuntsɔ [Yehowa, NW] gbi lɛ baaba tamɔ julɔ baa nyɔɔŋ, ni no mli lɛ ŋwɛi lɛ aaaho aya kɛ gbɛɛmɔ, ni je nɛŋ shishijee nii lɛ aaasere yɛ la mli, ni shikpɔŋ kɛ emli nitsumɔi lɛ aaashã.” (2 Petro 3:10) Mfonirifeemɔŋ ŋwɛi kɛ shikpɔŋ lɛ nyɛŋ adamɔ Nyɔŋmɔ mlifu ni tsoɔ lɛ naawalɛ lɛ naa. No hewɔ lɛ Petro kɛfata he akɛ: “Agbɛnɛ, akɛni nɛkɛ nibii nɛɛ fɛɛ baafite hewɔ lɛ, mɛɛ gbɔmɛi sa akɛ nyɛtsɔmɔ yɛ jeŋbai krɔŋkrɔŋi kɛ Nyɔŋmɔ jamɔi amli?” (2 Petro 3:11) Nifeemɔi kɛ nitsumɔi nɛɛ ekomɛi ji Kristofoi akpeei ashishi ni wɔɔhi daa, ejurɔ ni wɔɔfee mɛi krokomɛi, kɛ gbɛfaŋnɔ ni wɔɔna kɛmɔ shi yɛ sanekpakpa lɛ shiɛmɔ mli.—Mateo 24:14; Hebribii 10:24, 25; 13:16.

18. Kɛji wɔna akɛ wɔkɛ wɔhe ebɔi je lɛ bɔɔ lɛ, mɛni esa akɛ wɔfee?

¹⁸ “Jeŋbai krɔŋkrɔŋi kɛ Nyɔŋmɔ jamɔ” nifeemɔi biɔ ni ‘wɔto wɔhe kɛjɛ je nɛŋ koni ekawo wɔhe muji.’ (Yakobo 1:27) Shi kɛji akɛ wɔkɛ wɔhe bɔi je nɛɛ bɔɔ hu? Ekolɛ aalaka wɔ kɛmiiya shidaamɔ ni yɔɔ oshara mli yɛ Nyɔŋmɔ hiɛ, kɛtsɔ hiɛtserɛjiemɔ ni he tseee ni wɔɔdi sɛɛ loo kɛtsɔ lalai ni woɔ je nɛŋ mumɔ ni Nyɔŋmɔ gbeyeishemɔ bɛ mli lɛ he hewalɛ ni wɔɔbo toi lɛ nɔ. (2 Korintobii 6:14-18) Kɛ́ nakai ji sane lɛ, nyɛhaa wɔtaoa Nyɔŋmɔ yelikɛbuamɔ yɛ sɔlemɔ mli, bɔni afee ni wɔkɛ je lɛ hiɛ akakpata, shi moŋ ni wɔdamɔ gbɔmɔ Bi lɛ hiɛ akɛ mɛi ni akpɛlɛɔ amɛnɔ. (Luka 21:34-36; 1 Yohane 2:15-17) Kɛji wɔjɔɔ wɔhe nɔ wɔha Nyɔŋmɔ lɛ, no lɛ eka shi faŋŋ akɛ wɔbaasumɔ ni wɔfee bɔ fɛɛ bɔ ni wɔɔnyɛ ni wɔná wɔkɛ lɛ teŋ wekukpaa kpakpa ni wɔha ehi shi daa, koni no ahã wɔfee klalo kɛha Yehowa gbi wulu ni he yɔɔ gbeyei lɛ.

19. Mɛni hewɔ Maŋtsɛyeli jajelɔi asafoi babaoo baanyɛ akpa gbɛ akɛ amɛaahi shi kɛtsɔ nibii agbɛjianɔtoo fɔŋ nɛɛ naagbee lɛ mli lɛ?

¹⁹ Noa ni sheɔ Nyɔŋmɔ gbeyei lɛ kɛ eweku lɛ hi shi kɛfo Nu Afua ni kpata nakai blema je lɛ hiɛ lɛ. Jalɔi aŋkroaŋkroi ayi na wala kɛtsɔ Yudafoi anibii agbɛjianɔtoo ni ba naagbee yɛ afi 70 Ŋ.B. lɛ mli. Akɛ nɔkwɛmɔ nɔ lɛ, bɔfo Yohane yɛ ekaa yɛ Nyɔŋmɔ sɔɔmɔ mli lolo aaafee afi 96-98 Ŋ.B. beni eŋma Kpojiemɔ wolo lɛ, kɛ e-Sanekpakpa lɛ, kɛ woji etɛ ni jɛ mumɔŋ lɛ. Yɛ mɛi akpei abɔ ni kpɛlɛ anɔkwa hemɔkɛyeli lɛ nɔ yɛ Pentekoste afi 33 Ŋ.B. lɛ agbɛfaŋ lɛ, eeenyɛ efee akɛ amɛteŋ mɛi pii hi shi kɛtsɔ Yudafoi agbɛjianɔtoo lɛ naagbee lɛ mli. (Bɔfoi lɛ Asaji 1:15; 2:41, 47; 4:4) Ŋmɛnɛ, Maŋtsɛyeli jajelɔi asafo babaoo baanyɛ ana hiɛnɔkamɔ akɛ amɛbaahi shi kɛtsɔ amrɔ nɛɛ nibii agbɛjianɔtoo fɔŋ nɛɛ naagbee lɛ mli.

20. Mɛni hewɔ esa akɛ wɔfee ‘jalɛ shiɛlɔi’ ni yɔɔ ekaa lɛ?

²⁰ Akɛni yibaamɔ kɛmiiya jeŋ hee lɛ mli kã wɔhiɛ hewɔ lɛ, nyɛhaa wɔfea ‘jalɛ shiɛlɔi’ ni yɔɔ ekaa. Kwɛ hegbɛ ni eji akɛ wɔɔsɔmɔ Nyɔŋmɔ yɛ nɛkɛ naagbee gbii nɛɛ amli! Ni kwɛ miishɛɛ ni eji akɛ wɔɔtsɔɔ gbɔmɛi agbɛ kɛba ŋmɛnɛŋmɛnɛ beaŋ “adeka,” ni ji mumɔŋ paradeiso ni Nyɔŋmɔ webii naa mli ŋɔɔmɔ lɛ mli! Eba akɛ gbɔmɛi akpekpei abɔ ni yɔɔ mli bianɛ lɛ aaaya nɔ amɛye anɔkwa, ni amɛshi kpe yɛ mumɔŋ, ni amɛfee klalo kɛha Yehowa gbi wulu lɛ. Shi mɛni baaye abua wɔ fɛɛ koni wɔshi kpe?

[Shishigbɛ niŋmai]

Te Obaaha Hetoo Tɛŋŋ?

◻ Mɛɛ gbɛkpamɔi mɛi komɛi ená yɛ Yehowa gbi lɛ kɛ ba ni Kristo eba lɛ he?

◻ Mɛni hewɔ wɔbaanyɛ wɔwie akɛ Noa kɛ eweku lɛ fee klalo kɛha Nu Afua lɛ?

◻ Mɛni baaba mɛi ni ‘shiɔ kpe’ lɛ kɛ mɛi ni efeee nakai lɛ anɔ?

◻ Mɛni hewɔ nifeemɔi krɔŋkrɔŋi ahe hiaa, titri lɛ, beni wɔbɛŋkɛɔ Yehowa gbi lɛ he lɛ?