Wolo Ni Ji Enyɔ Ni Akɛmaje Tesalonikabii Lɛ

2 Shi nyɛmimɛi, nɔ ni kɔɔ be ni wɔ-Nuŋtsɔ Yesu Kristo eba+ kɛ wɔnaa ni abaabua kɛya eŋɔɔ lɛ he lɛ,+ wɔmiibi nyɛ 2 akɛ nyɛkahãa ahosoa nyɛ oya kɛjea nyɛsusumɔ lɛ he, ni nyɛkahãa wiemɔ ni jɛ mumɔŋ*+ loo sane ko ni awie loo wolo ko ni akɛɛ ejɛ wɔŋɔɔ lɛ miihã nyɛtsuii miifã akɛ Yehowa* gbi+ lɛ eshɛ etã.

3 Nyɛkahãa mɔ ko miihã nyɛmiidu gbɛ* yɛ gbɛ ko gbɛ ko nɔ, ejaakɛ ebaŋ ja jamɔkwamɔ+ lɛ eba dã ni ajie mlatɔmɔ gbɔmɔ,+ ni ji hiɛkpatamɔ bi lɛ kpo.+ 4 Eji shiteekɛwolɔ, ni ewóɔ ehe nɔ yɛ nɔ fɛɛ nɔ ni atsɛɔ lɛ nyɔŋmɔ loo nɔ ko ni ajáa* lɛ nɔ, ni no hewɔ lɛ, etaa Nyɔŋmɔ sɔlemɔ shĩa lɛ, ni ekɛ ehe tsɔɔ faŋŋ akɛ nyɔŋmɔ ji lɛ. 5 Ani nyɛkaiii akɛ be ni mikɛ nyɛ yɔɔ lɛ, no mli lɛ mikɛɔ nyɛ nibii nɛɛ?

6 Ni amrɔ nɛɛ, nyɛle nɔ ni tsuɔ nii akɛ gbɛtsiinii koni ajie lɛ kpo yɛ lɛ diɛŋtsɛ ebe lɛ mli lɛ. 7 Anɔkwa, nɛkɛ mlatɔmɔ nɛɛ he teemɔŋ sane lɛ miitsu nii momo,+ shi ja mɔ ni tsuɔ nii amrɔ nɛɛ akɛ gbɛtsiinii lɛ eje gbɛ lɛ nɔ dã. 8 No sɛɛ lɛ, anɔkwa, abaajie mlatɔlɔ lɛ kpo, mɔ ni Nuŋtsɔ Yesu baatsɔ edaaŋ mumɔ lɛ nɔ egbe lɛ+ ni etsɔ be ni eba ni eje kpo faŋŋ+ lɛ nɔ ekpãtã ehiɛ lɛ. 9 Shi be ni mlatɔlɔ lɛ eba lɛ, ebaatsɔ Satan hewalɛ nɔ+ etsu nii kɛ hewalɛ nitsumɔ fɛɛ hewalɛ nitsumɔ kɛ amale okadii kɛ naakpɛɛ nii+ 10 kɛ nɔ fɛɛ nɔ ni ejaaa ni akɛlakaa mɛi.+ Enɛɛmɛi fɛɛ yɛ kɛhã mɛi ni hiɛ miikpãtã lɛ akɛ toigbalamɔ, ejaakɛ amɛnáaa suɔmɔ amɛhãaa anɔkwale lɛ ni amɛmɔɔɔ mli hu bɔ ni afee ni ahere amɛyiwala. 11 Enɛ hewɔ ni Nyɔŋmɔ hã lakamɔ hewalɛ ko ba amɛnɔ koni amɛhe amale lɛ amɛye lɛ,+ 12 bɔ ni afee ni akojo amɛ fɛɛ ejaakɛ amɛheee anɔkwale lɛ amɛyeee, shi moŋ amɛná nii ni ejaaa he miishɛɛ.

13 Shi, nyɛmimɛi ni Yehowa* sumɔɔ, sɔ̃ kã wɔnɔ akɛ wɔdaa Nyɔŋmɔ shi be fɛɛ be yɛ nyɛhewɔ, ejaakɛ kɛjɛ shishijee lɛ, Nyɔŋmɔ tsɔ krɔŋkrɔŋ ni ekɛ emumɔ lɛ fee nyɛ lɛ kɛ hemɔkɛyeli ni nyɛyɔɔ yɛ anɔkwale lɛ mli lɛ nɔ ehala nyɛ+ kɛhã yiwalaheremɔ.+ 14 Etsɔ sane kpakpa ni wɔjajeɔ lɛ nɔ etsɛ nyɛ kɛba enɛ he, koni nyɛná wɔ-Nuŋtsɔ Yesu Kristo anunyam lɛ.+ 15 No hewɔ lɛ, agbɛnɛ, nyɛmimɛi, nyɛdamɔa shi shiŋŋ+ ni nyɛyaa nɔ nyɛhiɛa kusumii* ni atsɔɔ nyɛ lɛ mli,+ kɛji atsɔ sane ni awie nɔ atsɔɔ nyɛ jio, atsɔ wolo ni jɛ wɔŋɔɔ nɔ atsɔɔ nyɛ jio. 16 Agbɛnɛ hu, wɔ-Nuŋtsɔ Yesu Kristo diɛŋtsɛ kɛ Nyɔŋmɔ ni ji wɔ-Tsɛ lɛ, mɔ ni sumɔ wɔ+ ni etsɔ dromɔ lɛ nɔ ehã wɔ naanɔ miishɛjemɔ kɛ hiɛnɔkamɔ kpakpa lɛ,+ 17 ashɛje nyɛmii ni ehã nyɛhe awa* yɛ nitsumɔ kpakpa kɛ wiemɔ kpakpa fɛɛ mli.