Yesu Tsakemɔ Lɛ​—Kristo Anunyam lɛ He Ninaa

Be ni Yesu tsɔɔ mɛi lɛ anii yɛ Kaisarea Filipi kpokpaa ni kɛ Hermon Gɔŋ lɛ teŋ jekɛmɔ aaafee shitoo 15 lɛ nɔ lɛ, ekɛɛ ebɔfoi lɛ nɔ ko ni ha amɛnaa kpɛ amɛhe, ekɛɛ akɛ: “Lɛɛlɛŋ, miikɛɛ nyɛ akɛ mɛi komɛi yɛ mɛi ni damɔ biɛ nɛɛ ateŋ ni amɛsaŋ amɛnaa gbele kɔkɔɔkɔ kɛyashi amɛbaana gbɔmɔ Bi lɛ miiba yɛ e-Maŋtsɛyeli lɛ mli dã.”​—Mateo 16:28.

Yesu kaselɔi lɛ hiɛ fee amɛ yaa yɛ nɔ ni ewie lɛ he. Aaafee otsi sɛɛ lɛ, ekɛ bɔfoi lɛ ateŋ mɛi etɛ​—Petro, Yakobo, kɛ Yohane​—tee gɔŋ ni kwɔ ko nɔ. No mli lɛ, je ena ejaakɛ wɔ yɛ hii etɛ lɛ ahiɛ. Be ni Yesu sɔleɔ lɛ, etsake yɛ amɛhiɛ. Bɔfoi lɛ na akɛ ehiɛ miikpɛ tamɔ hulu, ni etadei lɛ miiyɛ tamɔ la, amɛyɛ futafuta ni amɛmiikpɛlɛ kaŋkaŋ.

Kɛkɛ ni amɛna hii enyɔ komɛi ni atsɔɔ akɛ amɛji “Mose kɛ Elia.” Amɛ kɛ Yesu bɔi ‘eshimɔ kɛyaa ni baaba mli yɛ Yerusalem lɛ’ he wiemɔ. (Luka 9:30, 31) Ekã shi faŋŋ akɛ Yesu shimɔ kɛyaa lɛ kɔɔ egbele kɛ shi ni abaatee lɛ yɛ no sɛɛ lɛ ni ewie he etsɛko lɛ he. (Mateo 16:21) Nɔ ni tamɔɔɔ bɔ ni Petro susu lɛ, sanegbaa nɛɛ ma nɔ mi akɛ, bɔ fɛɛ bɔ ni fee lɛ Yesu baagbo yɛ gbɛ ni yɔɔ hiɛgbele waa nɔ.

Agbɛnɛ wɔ lɛ tse yɛ bɔfoi etɛ lɛ fɛɛ hiɛ, amɛkwɛ nɔ ni yaa nɔ, ni amɛbo sanegbaa lɛ toi, ni no hã amɛnaa kpɛ amɛhe. Ninaa ni, fɛɛ sɛɛ lɛ efee Petro akɛ nɔ ko diɛŋtsɛ ní miiya nɔ, no hewɔ lɛ ekɛ ehe wo sanegbaa lɛ mli, ekɛɛ akɛ: “Rabi, ehi hã wɔ akɛ wɔyɛ biɛ. No hewɔ lɛ, hã wɔshĩ bui etɛ, onɔ ekome, Mose nɔ ekome, kɛ Elia nɔ ekome.” (Marko 9:5) Ani Petro miitao ni ashĩ bui lɛ akɛni eesumɔ ni ninaa lɛ aya nɔ lɛ hewɔ?

Be ni Petro wieɔ lɛ, atatu halaŋŋ ko baha amɛnɔ, ni gbee ko jɛ atatu lɛ mli kɛɛ: “Mɔ nɛ ji mi-Bi ni misumɔɔ lɛ lɛ, mɔ ni mikpɛlɛ enɔ lɛ. Nyɛboa lɛ toi.” Be ni bɔfoi lɛ ni ŋmiŋmi emɔmɔ amɛ lɛ nu Nyɔŋmɔ gbee lɛ, amɛkɛ amɛhiɛ bumɔ shi, shi Yesu kɛɛ amɛ akɛ: “Nyɛtea shi. Nyɛkashea gbeyei.” (Mateo 17:5-7) Be ni amɛhole amɛhiɛ nɔ lɛ, amɛnaaa mɔ ko akɛ ja Yesu. Ninaa lɛ eba naagbee. Be ni je tsɛre ni amɛmiikpeleke gɔŋ lɛ, Yesu tswa amɛnaa ma ekɛɛ: “Nyɛkagbaa mɔ ko mɔ ko ninaa lɛ kɛyashi abaatee gbɔmɔ Bi lɛ shi kɛjɛ gbohii ateŋ.”​—Mateo 17:9.

Elia ni bɔfoi lɛ na yɛ ninaa lɛ mli lɛ hã amɛbi sane ko. Amɛbi akɛ: “Mɛni hewɔ woloŋmalɔi lɛ kɛɔ akɛ ja Elia eba dã lɛ?” Yesu here nɔ akɛ: “Elia eba momo, ni amɛyooo lɛ.” (Mateo 17:10-12) Yesu miiwie Yohane Baptisilɔ lɛ he ejaakɛ etsu nitsumɔ ni tamɔ Elia nɔ lɛ. Elia saa gbɛ eto Elisha, ni Yohane hu fee nakai ehã Kristo.

Ninaa nɛɛ waje Yesu kɛ bɔfoi lɛ waa! Ehã ana bɔ ni Kristo anunyam yɛ Maŋtsɛyeli lɛ mli lɛ baaji ahã kɛtsɔ hiɛ. No hewɔ lɛ, taakɛ Yesu wo shi lɛ, kaselɔi lɛ na “gbɔmɔ Bi lɛ miiba yɛ e-Maŋtsɛyeli lɛ mli.” (Mateo 16:28) Be ni amɛyɔɔ gɔŋ lɛ nɔ lɛ, amɛna ‘enunyam kpele lɛ kɛ amɛhiŋmɛii.’ Eyɛ mli akɛ Farisifoi lɛ tao ni Yesu afee okadi ko kɛtsɔɔ akɛ lɛ ji Maŋtsɛ ni Nyɔŋmɔ ehala lɛ moŋ, shi efeee eko. Shi ahã Yesu kaselɔi ni bɛŋkɛ lɛ kpaakpa lɛ na Yesu tsakemɔ ni woɔ gbalɛi ni kɔɔ Maŋtsɛyeli lɛ he lɛ obɔ lɛ. No hewɔ lɛ, sɛɛ mli lɛ Petro nyɛ eŋma akɛ: “Ama gbalɛ wiemɔ lɛ nɔ mi ahã wɔ fe tsutsu lɛ.”​—2 Petro 1:16-19.