Suɔmɔ Akɛ “Ekomefeemɔ Kpaa” Lɛ Feɔ Nɔ Ni ‘Eye Emuu’
1. Abaanyɛ akɛ Yehowa ato nifeelɔ he yɛ mɛɛ gbɛ nɔ, ni weku fɛɛ weku na egbɛi kɛjɛ eŋɔɔ yɛ mɛɛ gbɛ nɔ?
1 NIFEELƆ Kpeteŋkpele ni fe fɛɛ ni yɔɔ jeŋ muu fɛɛ, Yehowa Nyɔŋmɔ Ofe lɛ baanyɛ afee kpaa loo “ekomefeemɔ kpaa” ko ni baahi shi shiŋŋ kɛya naanɔ. Wekukpaai ni yɔɔ shikpɔŋ nɔ po baanyɛ afee nɔ ni mli wa waa; ni awieɔ Yehowa Nyɔŋmɔ he akɛ “mɛi fɛɛ ni atsɛ amɛ akɛ bii yɛ ŋwɛi kɛ shikpɔŋ lɛ nɔ lɛ a-Tsɛ krɔŋŋ lɛ.” (Efesobii 3:14, 15) Kɛjɛ jeŋ muu fɛɛ Nu Afua ni ba yɛ blematsɛ Noa gbii lɛ amli lɛ sɛɛ kɛbaa nɛɛ adesa weku fɛɛ weku fa kpo kɛjɛ nakai nuu anɔkwafo ni Nyɔŋmɔ kpɛlɛ enɔ akɛ mɔ ni sa akɛ ehaa eweku lɛ yi kɛtsɔɔ jeŋ muu fɛɛ nu afua lɛ mli lɛ mli. Yɛ anɔkwa sane nɛɛ hewɔ lɛ, adesa weku fɛɛ weku ni yɔɔ shikpɔŋ nɔ bianɛ lɛ na ‘egbɛi’ kɛjɛ Noa ŋɔɔ, ni ji akɛ, akɛni weku lɛ yɔɔ wala mli koni ena gbɛi hewɔ. Yehowa Nyɔŋmɔ bafee mɔ ni kɛ gbɛi komɛi ha aŋkroaŋkroi komɛi yɛ shikpɔŋ nɔ yɛ blema, shi ekɛ gbɛi haaa adesa wekui lɛ tɛɛ. Shi kɛlɛ amɛgbɛi lɛ jɛ lɛ, ejaakɛ kulɛ amɛnyɛŋ amɛba shihilɛ mli akɛ weku ni hiɛ gbɛi eji jeee lɛ ejɛ akɛ jeŋ muu fɛɛ Wala Halɔ lɛ hewɔ kulɛ.—1 Mose 5:1, 2, 32.
2. Yɛ mɛɛ gbɛ nɔ mɔ ni tse atua eshi Nyɔŋmɔ weku lɛ batsɔ tsɛ kɛha weku ko, no hewɔ lɛ mɛɛ sane esa jogbaŋŋ akɛ wɔteŋ mɔ fɛɛ mɔ aaabi lɛ diɛŋtsɛ ehe?
2 Adesa tse ehe kɛjɛ ŋwɛi Tsɛ lɛ jeŋ muu fɛɛ weku lɛ he. Mɔ ni ha enɛ ba ji bɔɔ nɔ ko ni he wa fe adesa ni tse atua eshi Nyɔŋmɔ ŋwɛibɔfoi aweku ni yɔɔ ŋwɛi lɛ, atuatselɔ ni abale lɛ kɛ gbɛi ni ji Satan Abonsam lɛ. Akɛni ebua sɛɛnyiɛlɔi anaa kɛba emasɛi yɛ ŋwɛi hewɔ lɛ, ebatsɔ, kɛ aaakɛɛ lɛ, tsɛ, shi jeee suɔmɔ ji nɔ ni fimɔɔ eweku lɛ mlibii lɛ efeɔ amɛ ekome. Be ko lɛ, Yesu Kristo, Yehowa jeŋ muu fɛɛ weku lɛ mlinyo ko ni ji anɔkwafo fe fɛɛ lɛ kɛɛ Yudafoi ni teɔ shi woɔ lɛ lɛ akɛ: “Nyɔŋmɔ ji nyɛtsɛ kulɛ nyɛaasumɔ mi; ejaakɛ mi lɛ Nyɔŋmɔ ŋɔɔ mijɛ miba; . . . nyɛ lɛ nyɛtsɛ ni nyɛjɛ emli ji Abonsam, ni nyɛtsɛ lɛ tsinebaa nii nyɛsumɔɔ akɛ nyɛfee. Lɛ lɛ gbɔmɔgbelɔ ji lɛ kɛjɛ teteete, ni edamɔɔɔ anɔkwale lɛ mli, ejaakɛ anɔkwale bɛ emli. Kɛ eemale lɛ, lɛ diɛŋtsɛ enii ahe ewieɔ, ejaakɛ amalelɔ kɛ malemɔtsɛ ji lɛ.” (Yohane 8:42, 44) Yɛ enɛ hewɔ lɛ mɔ fɛɛ mɔ baanyɛ abi lɛ diɛŋtsɛ ehe sane nɛɛ ŋmɛnɛ akɛ: Kɛ mikɛ nɛkɛ susumɔ kpaa nɛɛ aaatsu nii lɛ, belɛ namɔ ji ‘mitsɛ’?
3. Yɛ mɛɛ gbɛ nɔ shihilɛ ni Satan yɔɔ mli kɛjɛ Jeŋ Ta I be lɛ mli lɛ yɔɔ sɔrɔto dani nakai be lɛ shɛ lɛ, ni mɛɛ sɔlemɔ titri lɛ ehe hiaa ni aha hetoo aha mɛi fɛɛ ni kɛ amɛhe kpɛtɛɔ Nyɔŋmɔ gbɛjianɔtoo lɛ he lɛ?
3 Ashwie Satan Abonsam kɛjɛ Yehowa Nyɔŋmɔ jeŋ muu fɛɛ weku lɛ mli yɛ be mli ni etse atua lɛ sɛɛ, ni yɛ sɛɛ mli lɛ ashwie edaimonioi lɛ ni yɔɔ eshishi akɛ tsɛ lɛ hu. Ejie ehe kpo yɛ Eden abɔɔ lɛ mli etsɔɔ adesai akɛ Kaalɔ lɛ, ni yɛ no sɛɛ po lɛ aŋmɛ lɛ gbɛ, koni ekpa shikpɔŋ lɛ nɔ yɛ efɔŋfeemɔ he ta ni efa kɛ anɔkwale lɛ ni eteɔ shi ewoɔ lɛ mli. (Hiob 1:7; 2:2) Shi amrɔ nɛɛ, kɛjɛ “ta” ni agba afɔ shi ni ba yɛ Nyɔŋmɔ Maŋtsɛyeli ni yɔɔ ŋwɛi lɛ fɔmɔ sɛɛ, yɛ “jeŋmaji abei ni ato” lɛ naagbee yɛ 1914 sɛɛ nɛɛ, ashwie Satan Abonsam kɛ edaimonioi lɛ kɛjɛ ŋwɛi kɛba shikpɔŋ nɔ ni amɛkɛ ŋwɛibɔfoi lɛ naaa sharamɔ dɔŋŋ. Amɛnyɛŋ amɛna hegbɛ amɛbote ŋwɛi ni ŋwɛibɔfoi lɛ yɔɔ jɛmɛ lɛ dɔŋŋ. No hewɔ lɛ wɔbaanyɛ wɔnu mlifu ni Satan ena eha Nyɔŋmɔ jeŋ muu fɛɛ gbɛjianɔtoo lɛ kɛ emlibii anɔkwafoi lɛ shishi waa. (Kpojiemɔ 12:1-12; Luka 21:24) No hewɔ lɛ, enɛ ji bei amli be ni esa akɛ aha bɔfo Paulo suɔmɔ he sɔlemɔ ni aŋma afɔ shi yɛ Kolosebii 1:2 aha anɔkwafoi ni kɛ amɛhe kpɛtɛɔ Yehowa gbɛjianɔtoo lɛ he yɛ shikpɔŋ nɔ lɛ hetoo, ni ji akɛ: “Duromɔ kɛ hejɔlɛ ni jɛ wɔtsɛ Nyɔŋmɔ lɛ kɛ Nuŋtsɔ Yesu Kristo dɛŋ lɛ ahanyɛ.” Toiŋjɔlɛ ni esa akɛ aba amɛteŋ nɛɛ he sɔlemɔ lɛ nyɛŋ aba mli kɛji akɛ ekomefeemɔ bɛ amɛteŋ. Toiŋjɔlɛ loo hejɔlɛ biɔ gbeekpamɔ yɛ mligbɛ yɛ Nyɔŋmɔ ni haa toiŋjɔlɛ lɛ gbɛjianɔtoo lɛ mlibii ateŋ, hɛɛ, ekome, ni gbɛjianɔtoo lɛ mlibii lɛ kɛ amɛhe aaafee.
4. Yehowa odasefoi ni amɛfee ekome lɛ daa lɛ shi yɛ mɛni he, ehe miihia ni amɛya nɔ amɛnyiɛ yɛ mɛni mli?
4 Bɔni afee ni gbɛjianɔtoo mli ekomefeemɔ ni toiŋjɔlɛ jɛɔ mli baa ni haa Yehowa Odasefoi agbɛjianɔtoo ni yɔɔ jeŋ fɛɛ lɛ feɔ sɔrɔto ŋmɛnɛ lɛ ahi shi lɛ, amɛbaanyɛ amɛfee nɔ ni akɛɛ Kolose asafo lɛ mlibii lɛ akɛ amɛfee lɛ, “nyɛkɛ miishɛɛ adaa tsɛ lɛ shi, mɔ ni ha wɔsa mɛi ni yeɔ krɔŋkrɔŋbii agboshinii lɛ eko yɛ la mli” lɛ. (Kolosebii 1:12) Ehe miihia ni wɔya nɔ wɔnyiɛ yɛ la ni faa lɛ mli, ni agbɛnɛ wɔje gbɛ wɔbɔ mɔdɛŋ krɛdɛɛ ko yɛ nibii agbɛjianɔtoo momo nɛɛ “naagbee gbii” nɛɛ mli ni wɔhi shi akɛ ‘mɛi ni sa’ kɛha eshishinumɔ ni yaa hiɛ lolo kɛ agbɛnɛ kɛha nɔ fɛɛ nɔ ni aaafee wɔgboshinii yɛ gbɛjianɔtoo hee lɛ mli lɛ.—2 Timoteo 3:1.
Amɛfee Ekome Tamɔ “Kuu Kome”
5. Mɛni mli agbala Yehowa Odasefoi ni yɔɔ ŋmɛnɛ lɛ kɛjɛ yɛ nibii sɔrɔtoi ni gbálaa mɛi amli lɛ fɛɛ sɛɛ, shi mɛni hewɔ ni “kwɛlɔ kome” lɛ “kuu kome” lɛ ehi shi yɛ ekomefeemɔ mli lɛ?
5 Ŋmɛnɛ, ana akɛ Yehowa Odasefoi jɛ adesa wekui babaoo mli fe bɔ ni eji yɛ klɛŋklɛŋ afii oha lɛ mli Kristofoi lɛ ahe lɛ. Yɛ enɛ hewɔ lɛ, agbala amɛ kɛjɛ adesa wekui fɛɛ ni yɔɔ shikpɔŋ nɔ Iɛ amli, amɛhiɛ hewolo nɔ sui sɔrɔtoi fɛɛ eko ni amɛjɛ shihilɛi sɔrɔtoi fɛɛ mli. Kulɛ nɛkɛ nibii ni sa kadimɔ nɛɛ baanyɛ afee nɔ ni gbalaa Yehowa Odasefoi ateŋ moŋ. Shi ebɛ lɛ nakai! Amɛyɔseɔ akɛ, yɛ amɛweku, hewolo nɔ su, wiemɔ, maŋ kɛ shihilɛ mli ni amɛyɔɔ lɛ fɛɛ sɛɛ lɛ, amɛ fɛɛ amɛshihilɛ jɛ he kome ni amɛjɛ anɔkwale la kome mli. Mɛi ni yɔɔ Yehowa Odasefoi ateŋ yɛ naagbee be nɛɛ mli ji shwɛɛnii ni ji Kristofoi ni akɛ mumɔ efɔ́ amɛ ni amɛyɔɔ ŋwɛiyaa he hiɛnɔkamɔ kɛ “asafo babaoo” ni Tookwɛlɔ Kpakpa, Yesu Kristo, tsɛ amɛ “tooi krokomɛi” lɛ. (Yohane 10:16; Kpojiemɔ 7:9-17; Mateo 25:31-46) Shi kɛlɛ, gbalɛ kakadaŋŋ ni Yesu Kristo gba fɔ shi lɛ efeko yaka, eyɛ mli akɛ ekɛɛ akɛ: “Ni amɛaafee kuu kome, kɛ kwɛlɔ kome.” Tookwɛlɔ Kpakpa lɛ etsɔɔ bɔ ni ehe esa yɛ nɛkɛ gbɔmɛi ni tamɔ gwantɛŋi ni sumɔɔ toiŋjɔlɛ nɛɛ ni efee amɛ “kuu kome” lɛ mli, ni sɔrɔtofeemɔ ni yɔɔ amɛhiɛnɔkamɔ kɛha wɔsɛɛ be mli lɛ kɔɔɔ he eko. Amɛ fɛɛ amɛkɛ ekomefeemɔ sumɔɔ amɛ “kwɛlɔ kome” ni jɛ esuɔmɔ mli ekɛ ewala akɛ adesa lɛ sha afɔle eha amɛ fɛɛ lɛ, ni amɛbaa amɛhe shi amɛhaa lɛ.
6. Mɛni hewɔ ni shwɛɛnii lɛ ni yɔɔ ŋwɛi hiɛnɔkamɔ lɛ kpako Biblia mli anɔkwalei ni kɔɔ “tooi krokomɛi” lɛ ahe lɛ jajemɔ lɛ?
6 Biblia mli “anɔkwale” ni gwantɛŋi ni yɔɔ ŋmɛnɛ lɛ fɛɛ sumɔɔ babaoo lɛ yɛ babaoo kɛɛmɔ yɛ Paradeiso hiɛnɔkamɔ he kɛha “asafo babaoo” ni jɛ Tookwɛlɔ lɛ “tooi krokomɛi” lɛ ateŋ lɛ. No hewɔ lɛ, akɛ mɛi ni sumɔɔ Nyɔŋmɔ Wiemɔ lɛ mli “anɔkwale” lɛ fɛɛ lɛ, edɔɔɔ mumɔŋ shwɛɛni lɛ ni no hewɔ lɛ amɛaatsĩ nɔ ko ni he yɔɔ sɛɛnamɔ naa kɛjɛ nɛkɛ “tooi krokomɛi” nɛɛ ahe, shi moŋ amɛjɛ amɛsuɔmɔ mli amɛha jeŋ fɛɛ ele nakai shikpɔŋ nɔ hiɛnɔkamɔ fɛfɛo lɛ, titri lɛ kɛjɛ afi 1935. Shwɛɛnii lɛ le akɛ amrɔ nɛɛ “nibii fɛɛ agbɛjianɔtoo bei lɛ ni Nyɔŋmɔ ewie he yɛ egbalɔi krɔŋkrɔŋi lɛ anaa kɛjɛ teteete lɛ” mli amɛyɔɔ nɛɛ. (Bɔfoi lɛ Asaji 3:21) Kɛha shwɛɛnii lɛ nɛkɛ anɔkwale nɛɛ kpojiemɔ efee “krɔŋkrɔŋbii agboshinii lɛ eko yɛ la mli” lɛ fa. Kɛjɛ be mli ni aje wolo tɛtrɛɛ, Buu-Mɔɔ nɛɛ kalamɔ shishi kɛjɛ July 1879 lɛ, etee nɔ efee Nyɔŋmɔ dɛŋdade ni akɛaatsĩɛ nɛkɛ Paradeiso he hiɛnɔkamɔ kɛha adesai ni akpɔ̃ amɛ nɛɛ hiɛ. Buu Mɔɔ Biblia kɛ Woji Bibii Asafo lɛ woji krokomɛi lɛ fɛɛ etee nɔ eye ebua ni ewo ni ema nakai hiɛnɔkamɔ ni “asafo babaoo” lɛ ni jɛ “tooi krokomɛi” lɛ ateŋ lɛ nyaa he babaoo ŋmɛnɛ lɛ mli hewalɛ, kɛ hiɛsɔɔ ni suɔmɔ yɔɔ mli kɛha shwɛɛnii lɛ.
7. Yɛ afi 1935 mli lɛ, mɛɛ hiɛnɔkamɔ, yɛ amɛ nɔ̃ lɛ sɛɛ, shwɛɛnii ni afɔ amɛ mu lɛ jɛ amɛsuɔmɔ mli amɛkɛma shi, ni mɛni hewɔ ni amɛŋmɛ gbɛ ni abaptisi mɛi ni hiɛ nɛkɛ hiɛnɔkamɔ nɛɛ?
7 Yehowa odasefoi ni amɛjɔɔ amɛhe nɔ ni abaptisi amɛ lɛ etee nɔ amɛmɔ “hiɛnɔkamɔ kome” ni akɛma amɛhiɛ yɛ Efesobii 4:4-6 lɛ mli aahu kɛjɛ 1986 agbiɛnaa be mli kɛbashi ŋmɛnɛŋmɛnɛ, akɛ: “Gbɔmɔtso kome kɛ mumɔ kome, taakɛ bɔ nɔŋŋ ni atsɛ nyɛ hu yɛ nyɛtsɛmɔ nɔhiɛkamɔ kome lɛ mli lɛ: Nuŋtsɔ kome, hemɔkɛyeli kome, baptisimɔ kome, Nyɔŋmɔ kɛ mɛi fɛɛ atsɛ kome.” Shi yɛ nakai afi ni ji 1935 ni akaiɔ jogbaŋŋ lɛ mli, yɛ kpee ni afee yɛ Washington, D.C. lɛ shishi ayoo “asafo babaoo” ni yɔɔ Kpojiemɔ 7:9-17 (Authorized Version) lɛ akɛ amɛ amɛji Tookwɛlɔ Kpakpa lɛ “tooi krokomɛi” ni yɔɔ Yohane 10:16 lɛ. Shwɛɛnii ni afɔ amɛ mu lɛ ni tee nɔ amɛmɔ amɛ “hiɛnɔkamɔ kome” ni sa nɛɛ mli lɛ nya babaoo yɛ Ŋmalɛ Krɔŋkrɔŋ lɛ mli la ni ekpɛ nɛɛ hewɔ ni amɛto amɛhe gbɛjianɔ koni amɛjɛ amɛtsuiŋ fɛɛ amɛkɛbua nakai “tooi krokomɛi” lɛ anaa. Amɛfeee amɛnii akɛ “tooi krokomɛi” lɛ miiku “baptisimɔ kome” lɛ mla lɛ mli akɛni amɛ diɛŋtsɛ lɛ amɛhaa amiɔ amɛ nu lɛ hewɔ, ejaakɛ nɛkɛ “tooi krokomɛi” nɛɛ abaptisimɔ lɛ hu ji amɛhenɔjɔɔmɔ kɛ Yehowa Nyɔŋmɔ hamɔ kɛtsɔ Kristo nɔ lɛ he okadi tamɔ bɔ ni eji yɛ shwɛɛnii ni afɔ amɛ mu lɛ anɔ lɛ he lɛ. Suɔmɔ ni amɛkɛha amɛhe lɛ mli balɛɛ agbɛnɛ ni eyaha amɛ diɛŋtsɛ amɛ-Tookwɛlɔ lɛ “tooi krokomɛi” ni esumɔɔ amɛ jogbaŋŋ lɛ anɔ.
8. Mɛɛ suɔmɔ, yɛ blema Israel gbii lɛ amli, abaanyɛ akɛ suɔmɔ ni ka kui enyɔ ni yɔɔ “kuu kome” lɛ teŋ lɛ ato he?
8 Suɔmɔ diɛŋtsɛ ni ayɔɔ kɛha he lɛ tee nɔ ni emli ekwɔ yɛ “kuu kome” lɛ ni tamɔ gwantɛŋi ni yɔɔ David Kpeteŋkpele, Yesu Kristo shishi lɛ ateŋ. Nɛkɛ suɔmɔ kpaa ni feɔ amɛ ekome nɛɛ tamɔ suɔmɔ ni mli tseee, ni gbooo ni ka maŋtsɛ ni ahala lɛ ni afɔ lɛ mu, David ni jɛ Yuda akutso lɛ mli lɛ kɛ Yonatan ni sumɔɔ lɛ ni jeee pɛsɛmkunyatsɛ ni ji maŋtsɛ Saul ni yeɔ nɔ lɛ binuu lɛ nɔ lɛ teŋ lɛ. (2 Samuel 1:25-27) Be fioo ko dani amɛaagbala mli yɛ naagbee kwraa lɛ, “Yonatan saa ha David ka kita ekoŋŋ yɛ esuɔmɔ ni ekɛsumɔɔ lɛ lɛ hewɔ; ejaakɛ esumɔɔ lɛ taakɛ bɔ ni esumɔɔ lɛ diɛŋtsɛ ehe.” (1 Samuel 20:17) Yɛ be mli ni enu Yonatan kɛ etsɛ gbele he yɛ tawuu he lɛ, enɛ nyɛ David nɔ ni efo lala ko ni ekɛ nɛkɛ wiemɔi nɛɛ gbe naa: “Osane miidɔ mi, minyɛmi Yonatan! Osane eŋɔɔ minaa kɛho; osuɔmɔ ni okɛsumɔɔ mi lɛ yɛ naakpɛɛ, efe yei asuɔmɔ po!” (2 Samuel 1:26) Suɔmɔ ni amɛyɔɔ kɛha amɛhe lɛ ji “ekomefeemɔ kpaa ni yeɔ emuu.” Gbele pɛ gbala amɛteŋ.
9. Akɛ “tooi krokomɛi” ni yɔɔ jɛmɛ lɛ fee namɔ he mfoniri, ni mɛɛ gbɛ nɔ yɛ naagbee lɛ nakai kui enyɔ lɛ baagbala amɛmli, shi kɛlɛ amɛsuɔmɔ lɛ hu nɔ gbɔŋ?
9 Yonatan fee “tooi krokomɛi” ni yɔɔ ŋmɛnɛŋmɛnɛ bei nɛɛ mli lɛ he mfoniri. Yɛ wɔsɛɛ be ko mli, yɛ “Nyɔŋmɔ Ofe lɛ gbi wulu lɛ nɔ ta” yɛ Harmagedon sɛɛ lɛ, Yonatan kuu lɛ ni yɔɔ wala mli lɛ kɛ shwɛɛnii lɛ ni feɔ David kuu lɛ baagbala mli. (Kpojiemɔ 16:14, 16) Enɛ jɛ gbele ni baaŋɔ shwɛɛnii lɛ ni asumɔɔ amɛ lɛ kɛya hewɔ, “aaasha” amɛ, taakɛ eji lɛ, yɛ atatui amli kɛaatee Nuŋtsɔ lɛ kpeemɔ yɛ kɔɔyɔɔ mli,” kɛtsɔ amɛshitee yɛ mumɔŋ kɛmiijɛ gbele mli ni baa trukaa yɛ hiŋmɛitswaa mli lɛ nɔ. (1 Tesalonikabii 4:17) Amɛbaaya nɔ amɛsumɔ “tooi krokomɛi” ni amɛshi amɛ yɛ sɛɛ yɛ shikpɔŋ nɔ lɛ. Yɛ anɔkwale mli lɛ, amɛbaajie amɛsuɔmɔ lɛ kpo amɛtsɔɔ yɛ gbɛ ni mli wa nɔ kɛjɛ nakai be lɛ mli!
“Suɔmɔ Ji Amɛteŋ Nɔ Ni Fe Fɛɛ
10, 11. Mɛni hewɔ ni hemɔkɛyeli kɛ hiɛnɔkamɔ jeee nɔ ni dara tamɔ suɔmɔ, taakɛ ajaje yɛ 1 Korintobii 13:13?
10 Enɛ kaiɔ wɔ Paulo wiemɔi yɛ be mli ni ekɛ esane mli tsɔɔmɔ ni yɔɔ fɛo lɛ eha yɛ 1 Korintobii yitso 13 lɛ, akɛ: “Shi agbɛnɛ hemɔkɛyeli, hiɛnɔkamɔ, suɔmɔ, nɛkɛ nii etɛ nɛɛ hiɔ shi; shi suɔmɔ ji amɛteŋ nɔ ni fe fɛɛ” lɛ. (1 Korintobii 13:13) Nakai enɛ ji yɛ mɛɛ gbɛ nɔ? Ojogbaŋŋ, klɛŋklɛŋ lɛ susumɔ nɔ ni awie yɛ Hebribii 11:1 (NW) lɛ he: “Hemɔkɛyeli ji nii ni mɛi ahiɛ ka nɔ lɛ agbɛkpamɔ kɛ nɔmimaa, nii ni yɔɔ diɛŋtsɛ lɛ ahe odaseyeli yɛ faŋŋ, tsɛ anaa.” Belɛ eka shi faŋŋ akɛ, hiɛ kaa nibii nɛɛ anɔ yɛ be ni “anaaa” lɛ pɛ mli. Akɛ nɔkwɛmɔ nɔ lɛ, tamɔ Abraham. Etsɔɔ hemɔkɛyeli yɛ Yehowa Nyɔŋmɔ kɛ nyɛmɔ ni E-yɔɔ akɛ ekɛaatee gbohii ashi lɛ mli. No hewɔ lɛ ekɛ hekɛnɔfɔɔ mɛ nibii ni enaaa lɛ dani egbo. No hewɔ lɛ, yɛ hemɔkɛyeli ni mli wa ni Yehowa Odasefoi ni yɔɔ ŋmɛnɛ lɛ yɔɔ yɛ E-mli hewɔ lɛ, amɛkɛ amɛhiɛ fɔɔ nibii ni amɛnaaa lɛ anɔ, ni amɛmɛɔ enɛɛmɛi. Kɛ, yɛ be ni sa mli lɛ, amɛna “nii ni amɛhiɛ ka nɔ lɛ,” amɛhemɔkɛyeli kɛ hiɛnɔkamɔ ni kɔɔ nibii ahe lɛ baa naagbee, ni tsɔɔ akɛ eba mli. Enɛ ji nɔ ni Paulo tsɔɔ mli lolo yɛ nɔ ni ekɛɛ yɛ Romabii 8:24, 25 lɛ, he ni wɔkaneɔ yɛ akɛ:
11 “Ejaakɛ nɔhiɛkamɔ naa ahere wɔyiwala yɛ. Shi nɔhiɛkamɔ ni anaa lɛ, ejeee nɔhiɛkamɔ: shi namɔ hiɛ kãa nɔ ni enaa lɛ nɔ? Shi kɛ nɔ ni wɔnaaa lɛ nɔ wɔhiɛ ka lɛ, belɛ wɔkɛ tsuishiŋmɛɛ kwɛɔ lɛ gbɛ.”
12. Yɛ mɛɛ gbɛ nɔ Yehowa Odasefoi ena “nibii fɛɛ agbɛjianɔtoo be” lɛ taakɛ atsɔɔ mli yɛ Bɔfoi lɛ Asaji 3:21, no hewɔ lɛ mɛɛ sui ji nɔ ni amɛsɛɛ baafo yɛ be ni sa mli, shi mɛɛ su ji nɔ ni sɛɛ efoŋ?
12 Nakai nɔŋŋ hu kɛjɛ ta lɛ sɛɛ afi ni ji 1919 kɛbaa nɛɛ Yehowa Odasefoi ni yɔɔ shikpɔŋ nɔ lɛ ena “nibii fɛɛ agbɛjianɔtoo be lɛ ni Nyɔŋmɔ ewie he yɛ egbalɔi krɔŋkrɔŋi lɛ anaa kɛjɛ teteete lɛ.” Amɛna bɔ ni Yehowa gbɛjianɔtoo ni anaa lɛ ena hewalɛ kɛjɛ Jeŋ Ta I mli haomɔ ni kɛ gbele baa lɛ mli kɛ bɔ ni aku sɛɛ asaa atswa lɛ ekoŋŋ lɛ. Agbɛnɛ ekusɛɛ eeja Yehowa Nyɔŋmɔ ekoŋŋ, yɛ mumɔŋ paradeiso mli yɛ shikpɔŋ nɛɛ nɔ biɛ. (Yesaia yitso 35) Ana kpɔmɔ kɛjɛ Babilon Kpeteŋkpele, jeŋ apasa jamɔ maŋtsɛyeli lɛ mli. (Kpojiemɔ 18:14) Nibii pii ni agba afɔ shi yɛ Kpojiemɔ, Biblia lɛ mli naagbee wolo lɛ mli lɛ eba mli aloo amɛmiiba mli. Ni no hewɔ lɛ hemɔkɛyeli kɛ hiɛnɔkamɔ ni damɔ nɛkɛ Biblia mli hemɔkɛyeli nɛɛ nɔ lɛ miitsu amɛyiŋtoo he nii, ni kɛ amɛtsu amɛyiŋtoo he nii amɛgbe naa lɛ, amɛsɛɛ baafo. Ah, hɛɛ, shi suɔmɔ hu? 5888Ehi shi ni ebaaya nɔ ehi shi. Akɛni je lɛ ebote fitemɔ shihilɛ ko mli ni aahe asere nibii ni yɔɔ je lɛŋ yɛ dɔlɛ ni naa wa lɛ mli hewɔ lɛ, kɛlɛ, “ekomefeemɔ kpaa ni yeɔ emuu” ni damɔ suɔmɔ ni jɛ Nyɔŋmɔ ŋɔɔ nɔ lɛ fiteee. Ehiɔ shi pɛpɛɛpɛ ehaa Nyɔŋmɔ kɛ egbɛjianɔtoo ni ekpɛlɛ enɔ lɛ kɛ agbɛnɛ yɛ shwɛɛnii lɛ ni ji “kuu bibioo” lɛ kɛ “asafo babaoo” lɛ ni jɛ “tooi krokomɛi” lɛ ateŋ ni ehereɔ amɛ atuu kɛbaa lɛ teŋ. Ebafeɔ nɔ ni ‘eye emuu.’ Suɔmɔ, akɛ “ekomefeemɔ kpaa” lɛ ji Nyɔŋmɔ mumɔ lɛ yibii.
13. Mɛni hewɔ suɔmɔ gboŋ gbi ko gbi ko lɛ?
13 Nyɔŋmɔ ji suɔmɔ ni ejie ehe kpo yɛ gbɔmɔtso mli diɛŋtsɛ; ni akɛni Nyɔŋmɔ gbooo hewɔ lɛ, suɔmɔ hu gboŋ gbi ko gbi ko. Awieɔ Nyɔŋmɔ he yɛ gbɛ ni ja nɔ akɛ, “Nyɔŋmɔ lɛ suɔmɔ ni.”
14. Mɛɛ anɔkwale abaanyɛ ati mli akɛɛ, yɛ hewalɛ ni suɔmɔ yɔɔ ni ekɛfeɔ mɛi ekome lɛ hewɔ?
14 Yɛ ekomefeemɔ hewalɛ ni suɔmɔ yɔɔ lɛ he lɛ, abaanyɛ ati mumɔnaa anɔkwale ni awie he yɛ 1 Yohane 4:8, 16 lɛ mli ni atsɔɔ mli ni alɛɛ mli: “Nyɔŋmɔ lɛ, suɔmɔ ji lɛ, ni mɔ ni hiɔ suɔmɔ mli lɛ, ehiɔ Nyɔŋmɔ mli, ni Nyɔŋmɔ hu hiɔ emli.”
15. Mɛni tsirɛ Nyɔŋmɔ yɛ be mli ni ebɔɔ gbɔmɔ lɛ, ni mɛni hewɔ wɔhiɛ baanyɛ asɔ ni wɔfee wɔ nii yɛ gbɛ ni sa nɔ yɛ nakai hewalɛ ni tsirɛɔ mɔ lɛ hewɔ?
15 No hewɔ lɛ, beni Nyɔŋmɔ bɔ klɛŋklɛŋ adesa bɔɔ nɔ lɛ yɛ shikpɔŋ nɔ lɛ, suɔmɔ ji nɔ ni tsirɛ lɛ ni ha efee enɛ. Taakɛ 1 Mose 1:27 bɔɔ amaniɛ yɛ enɛ he lɛ: “Ni Nyɔŋmɔ bɔ gbɔmɔ yɛ esubaŋ Iɛ nɔ, Nyɔŋmɔ subaŋ lɛ nɔ ebɔ lɛ yɛ.” Jeee akɛ klɛŋklɛŋ gbɔmɔ lɛ hiɛ Nyɔŋmɔ gbɔmɔtso su, shi moŋ akɛ sui sɔrɔtoi ni Nyɔŋmɔ diɛŋtsɛ yɔɔ lɛ eko ke lɛ, ni nɛkɛ jwɛŋmɔŋ, mumɔŋ kɛ tsui mli sui nɛɛ haa esoroɔ lɛ yɛ bɔɔ nii ni yɔɔ wala ni baa shi yɛ shikpɔŋ nɔ lɛ ahe. Yɛ enɛ hewɔ lɛ, adesa bɔɔ nɔ ni akɛ nibii eke lɛ nɛɛ hiɛ baanyɛ asɔ suɔmɔ ni e-Bɔlɔ lɛ yɔɔ kɛha lɛ lɛ ni ebaanyɛ ehere nakai suɔmɔ lɛ nɔ yɛ gbɛ ni sa nɔ, tamɔ bi feɔ etsɛ. Weku mli tsakpaa ko ka amɛteŋ ni nɔ ni haa enɛ feɔ nɔ ni yɔɔ lɛlɛŋ ji sane ni amɛkɛ amɛhe gbaa daa ni ekɔɔɔ he eko akɛ eshikpɔŋ nɔ bi lɛ enaaa Tsɛ lɛ, akɛni gbɔmɔ ko nyɛŋ ana Nyɔŋmɔ ni eya nɔ ehi shi yɛ no sɛɛ hewɔ. Nyɔŋmɔ jaje nɛkɛ anɔkwa sane nɛɛ etsɔɔ Mose sɛɛ mli: “Mɔ ko mɔ ko enaŋ mi, ni eyi aaana wala.” (2 Mose 33:20) Atsakeee nɛkɛ mla nɛɛ, ejaakɛ yɛ nɔ ni fe afii akpe kome kɛ ohai enumɔ sɛɛ lɛ bɔfo Yohane ŋma eyaha nanemɛi Kristofoi lɛ akɛ: “Nyɔŋmɔ lɛ, mɔ ko enako lɛ pɛŋ; bi koome ni yɔɔ tsɛ lɛ mlishi lɛ, lɛ ebajie lɛ shi etsɔɔ faŋŋ.”—Yohane 1:18.
16. Yohane kɛ enanemɛi kaselɔi lɛ here Nyɔŋmɔ suɔmɔ ni tamɔ tsɛ nɔ̃ lɛ nɔ kɛ mɛni, ni te ekomefeemɔ “kpaa” lɛ efee tɛŋŋ yɛ shwɛɛnii ni afɔ amɛ mu lɛ kɛ “tooi krokomɛi” lɛ ateŋ?
16 Akɛ Nyɔŋmɔ bi ni akɛ mumɔ efɔ́ lɛ lɛ, bɔfo Yohane kɛ Yehowa Nyɔŋmɔ kɛ e-Bi “nyɔŋmɔ ni ji bi koome lɛ,” Yesu Kristo, yɛ wekukpaa ko mli. Yohane kɛ enanemɛi Kristofoi lɛ here Nyɔŋmɔ suɔmɔ ni tamɔ tsɛ ko nɔ̃ lɛ nɔ kɛ suɔmɔ ni tamɔ fɔlɔi kɛ amɛbii ateŋ nɔ̃. Nakai suɔmɔ lɛ ji “ekomefeemɔ kpaa” ni ka amɛ kɛ amɛŋwɛi Tsɛ ni anaaa lɛ lɛ teŋ. Eha mɛi ni akɛ mumɔ efɔ́ amɛ lɛ kɛ amɛhe kpɛtɛ amɛhe-amɛhe akɛ Nyɔŋmɔ mumɔŋ bii ni ákɛ nyɛmimɛi hii kɛ yei Kristofoi Yɛ be mli ni wɔtaoɔ nakai “ekomefeemɔ kpaa” lɛ mli ŋmɛnɛ lɛ wɔnaa akɛ efee nɔ ni ‘yeɔ emuu,’ ejaakɛ shwɛɛnii ni afɔ amɛ mu lɛ mlibii lɛ kɛ amɛhe kpɛtɛɔ amɛhe gbagbalii ni anyɛɛɛ atserɛ amɛmli akɛ nanemɛi jalɔi kɛ Odasefoi kɛha Yehowa Nyɔŋmɔ. Nɛkɛ suɔmɔ nɛɛ haa amɛhiɔ Nyɔŋmɔ weku lɛ mli kɛ agbɛnɛ Kristofoi anyɛmifeemɔ lɛ mli. Nɔ ni sa kadimɔ lɛ, amɛnanemɛi jalɔi ni yɔɔ Nyɔŋmɔ sɔlemɔ we lɛ, “asafo babaoo” ni ji Kristo “tooi krokomɛi” lɛ amlibii lɛ hu jieɔ nakai suɔmɔ ni anyɛɛɛ agbe ni fimɔɔ Yehowa Odasefoi ŋmɛnɛ ni efee amɛ ekome yɛ emuuyeli mli lɛ kpo. Eba akɛ wɔɔtswa wɔfai shi, taakɛ bɔfo Paulo fee lɛ, ákɛ bɔɔ nɔ ko bɛ ni baanyɛ agbala “wɔkɛ Nyɔŋmɔ suɔmɔ ni yɔɔ Kristo Yesu, wɔ-Nuŋtsɔ lɛ mli lɛ mli.”—Romabii 8:38, 39.a
[Shishigbɛ niŋmai]
a Ajie kɛjɛ December 15, 1982 Blɔfo Buu-Mɔɔ lɛ mli.
Te Ohaa Hetoo Ohaa Tɛŋŋ?
□ Weku fɛɛ weku na egbɛi kɛjɛ Nyɔŋmɔ ŋɔɔ yɛ mɛɛ gbɛ nɔ?
□ Yɛ mɛɛ gbɛ nɔ esa akɛ nakai anɔkwale lɛ ana hewalɛ yɛ mɛi fɛɛ ni yɔɔ Kristofoi asafo lɛ mli lɛ anɔ?
□ Yonatan fee namɛi ahe mfoniri?
□ Mɛni hewɔ suɔmɔ da fe hemɔkɛyeli kɛ hiɛnɔkamɔ lɛ?
□ Suɔmɔ fimɔɔ wɔ kɛkpɛtɛɔ Nyɔŋmɔ he yɛ mɛɛ gbɛ nɔ?
[Mfoniri ni yɔɔ baafa 14]
Suɔmɔ ni mli kwɔ ni ka David kɛ Yonatan teŋ lɛ fee suɔmɔ ni ka mɛi ni afɔ amɛ mu lɛ kɛ “tooi krokomɛi” lɛ ateŋ lɛ he mfoniri