Mɛni Biblia lɛ Kɛɔ yɛ Nyɔŋmɔ kɛ Yesu He?

EJI gbɔmɛi aaakane Biblia lɛ kɛaajɛ shishijee kɛyashi naagbee ni amɛbɛ Triniti lɛ he jwɛŋmɔ ko kwraa kulɛ, ani amɛ diɛŋtsɛ amɛbaana jwɛŋmɔ ko ni tamɔ nakai? Dabi kwraa.

Nɔ ni baa nikanelɔ ni kwɛɛɛ hiɛaŋ lɛ jwɛŋmɔŋ yɛ faŋŋ mli ji akɛ Nyɔŋmɔ pɛ ji Ofe, Bɔlɔ lɛ, ni esoro lɛ kwraa yɛ mɔ fɛɛ mɔ he, ni akɛ Yesu, dani eeebatsɔ gbɔmɔ po lɛ, lɛ hu esoro lɛ, mɔ ko ni abɔ lɛ, ni ehɔ Nyɔŋmɔ shishi.

Nyɔŋmɔ lɛ Ekome Ni, Jeee Etɛ

ATSƐƆ Biblia mli tsɔɔmɔ akɛ Nyɔŋmɔ lɛ ekome ni lɛ akɛ nyɔŋmɔ kome jamɔ. Ni osɔfoi ayinɔsane he nilelɔ, L. L. Paine tsɔɔ akɛ nyɔŋmɔ kome jamɔ ni yɔɔ krɔŋŋ lɛ eŋmɛɛɛ Triniti ko gbɛ: “Kpaŋmɔ Momo lɛ yɛ gbagbalii yɛ nyɔŋmɔ kome jamɔ he. Nyɔŋmɔ ji mɔ kome pɛ ni yɔɔ. Jwɛŋmɔ ni ahiɛ akɛ abaana triniti ko yɛ jɛmɛ lɛ . . . bɛ shishitoo ko kwraa.”

Ani tsakemɔ ko ba kɛjɛ nyɔŋmɔ kome jamɔ he yɛ be mli ni Yesu ba shikpɔŋ nɔ lɛ sɛɛ? Paine haa hetoo akɛ: “Tsakemɔ ko kwraa baaa yɛ nɛkɛ sane nɛɛ he yɛ Kpaŋmɔ Momo lɛ kɛ e-Hee lɛ teŋ. Blema nɔ ni ji nyɔŋmɔ kome jamɔ lɛ tee nɔ. Yesu ji Yudanyo, ni fɔlɔi ni ji Yudafoi tsɔse lɛ yɛ Kpaŋmɔ Momo lɛ ŋmalɛi lɛ amli. Etsɔɔmɔ lɛ fɛɛ lɛ Yudafoi atsɔɔmɔ sɔŋŋ ni; eji sanekpakpa hee lɛlɛŋ, shi jeee nyɔŋmɔjamɔ he tsɔɔmɔ hee. . . . Ni ekpɛlɛ Yudafoi a-Nyɔŋmɔ kome jamɔ he ŋmalɛ kpeteŋkpele lɛ nɔ akɛ lɛ diɛŋtsɛ ehemɔkɛyeli: ‘Bo toi, O Israel, Nuŋtsɔ wɔ Nyɔŋmɔ lɛ ji Nyɔŋmɔ kome.’ ”

Anaa nakai wiemɔi lɛ yɛ 5 Mose 6:⁠4. Katolek New Jerusalem Bible (NJB) lɛ kaneɔ yɛ biɛ akɛ: “Bo toi, Israel: Yahweh wɔ Nyɔŋmɔ lɛ ji mɔ kome, ni ji Yahweh pɛ.”a Yɛ wiemɔ he mla ni kɔɔ nakai kuku lɛ he lɛ naa lɛ, wiemɔ “kome” lɛ bɛ babaoo wiemɔi ni tsɔɔ mli ni baanyɛ atsɔɔ akɛ etsɔɔ nɔ kroko fe mɔ kome ko.

Kristofonyo bɔfo Paulo hu etsɔɔɔ tsakemɔ ko yɛ Nyɔŋmɔ su lɛ mli, yɛ beni Yesu ba shikpɔŋ lɛ nɔ lɛ sɛɛ po. Eŋma akɛ: “Nyɔŋmɔ lɛ, mɔ kome ji lɛ.”​—Galatabii 3:​20; kwɛmɔ 1 Korintobii 8:​4-⁠6 hu.

Awieɔ Nyɔŋmɔ he akɛ mɔ kome shii akpei abɔ yɛ Biblia lɛ mli fɛɛ. Kɛ eewie lɛ, ewieɔ tamɔ mɔ aŋkro ni mli gbalako. Biblia lɛ yɛ faŋŋ yɛ enɛ he. Taakɛ Nyɔŋmɔ jaje lɛ: “Mi-ji Yehowa, mi-gbɛi ji no, ni mi-kɛ mi-nunyam lɛ haŋ mɔ kroko.” (Yesaia 42:⁠8) “Mi-ji Yahweh nyɛ Nyɔŋmɔ lɛ . . . Nyɛkanaa nyɔŋmɔi krokomɛi ja mi.” (Wɔma efã ko nɔ mi.)​—2 Mose 20:​2, 3, JB.

Mɛni hewɔ esa akɛ Biblia ŋmalalɔi ni Nyɔŋmɔ kɛ emumɔ tsirɛ amɛ lɛ fɛɛ awie Nyɔŋmɔ he akɛ mɔ kome kɛ eji mɛi etɛ diɛŋtsɛ lɛ? Mɛɛ yiŋtoo he nii enɛ baatsu akɛ ja amɛkɛlaka gbɔmɛi lɛ? Yɛ anɔkwale mli lɛ eji Nyɔŋmɔ feɔ mɛi etɛ kulɛ, ebaaha e-Biblia ŋmalɔi lɛ afee enɛ faŋŋ koni yiŋkɔshikɔshifeemɔ ko akaba he. Kɛ hoo lɛ, kulɛ mɛi ni ŋmala Kristofoi a-Hela Ŋmalɛi lɛ ni kɛ Nyɔŋmɔ diɛŋtsɛ Bi lɛ hi shi lɛ baafee nakai. Shi amɛfeee nakai.

Yɛ no najiaŋ lɛ, nɔ ni Biblia ŋmalɔi lɛ fee lɛ faŋŋ ji akɛ Nyɔŋmɔ lɛ, Mɔ kome ni​—esoro lɛ, Mɔ ni yɔɔ shihilɛ mli ni agbalako emli ni mɔ ko kɛ lɛ yeee egbɔ: “Miji Yehowa, ni mɔ ko bɛ dɔŋŋ, misɛɛ lɛ, Nyɔŋmɔ ko Nyɔŋmɔ ko bɛ!” (Yesaia 45:⁠5) “Bo, ni okometoo ogbɛi ji Yehowa lɛ, bo ji mɔ ni kwɔ fe fɛɛ yɛ shikpɔŋ lɛ nɔ fɛɛ.”​—Lala 83:⁠19.

Ejeee Nyɔŋmɔ ni Mɛi Pii Yɔɔ Emli

YESU tsɛ Nyɔŋmɔ akɛ “anɔkwa Nyɔŋmɔ kome lɛ.” (Yohane 17:⁠3) Ewieee Nyɔŋmɔ he akɛ nyɔŋmɔ ko ni mɛi pii yɔɔ mli. No hewɔ ni atsɛɛɛ mɔ ko mɔ ko yɛ Biblia lɛ mli akɛ Ofe, akɛ ja Yehowa pɛ lɛ. Kɛ jeee nakai lɛ, belɛ ehaa wiemɔ ni ji “ofe” lɛ shishinumɔ feɔ efolo. Be ko bɛ ni atsɛ Yesu loo mumɔ krɔŋkrɔŋ lɛ nakai, ejaakɛ Yehowa pɛ ji mɔ ni kwɔ fe fɛɛ. Ejajeɔ yɛ 1 Mose 17:⁠1 akɛ: “Miji Mawu Ofe lɛ.” Ni 2 Mose 18:​11 kɛɔ akɛ: “Yehowa da fe nyɔŋmɔi fɛɛ.”

Yɛ Hebri Ŋmalɛi lɛ amli lɛ, wiemɔ, ʼelohʹah (nyɔŋmɔ) yɛ babaoo-feemɔ wiemɔi enyɔ, ni ji ʼelo·himʹ (nyɔŋmɔi) kɛ ʼelo·hehʹ (nyɔŋmɔi ni). Nɛkɛ babaoo-feemɔ wiemɔ nɛɛ kɔɔ Yehowa he yɛ be fɛɛ mli, ni kɛ eba lɛ nɛkɛ lɛ atsɔɔ shishi yɛ ekome-feemɔ wiemɔ mli akɛ “Nyɔŋmɔ.” Ani nɛkɛ babaoo-feemɔ wiemɔi nɛɛ tsɔɔ Triniti? Dabi, amɛtsɔɔɔ nakai. William Smith kɛɔ yɛ A Dictionary of the Bible lɛ mli akɛ: “Susumɔ ni bɛ mli ákɛ [ʼelo·himʹ ] miitsɔɔ triniti gbɔmɛi ni yɔɔ Nyɔŋmɔ-su mli lɛ naaa sɛɛfimɔ ko kɛjɛɛɛ woloŋlelɔi aŋɔɔ bianɛ. Eji nɔ ni wiemɔ he mla he nilelɔi tsɛɔ lɛ babaoo-feemɔ yɛ agbojee mli, aloo etsɔɔ ŋwɛi hewalɛ obɔyimɔ, hewalɛi fɛɛ ni Nyɔŋmɔ jieɔ lɛ kpo lɛ.”

The American Journal of Semitic Languages and Literature lɛ kɛɔ yɛ ʼelo·himʹ he akɛ: “Ato wiemɔ lɛ he gbɛjianɔ kɛ feemɔ-wiemɔ ni damɔ shi kɛha ekome-feemɔ, ni ekome-feemɔ wiemɔ nɛɛ nɔ adamɔɔ akɛtsɔɔ mli.” Kɛ wɔɔfee enɛ he nɔkwɛmɔ nɔ lɛ, sabala, ʼelo·himʹ lɛ diɛŋtsɛ jeɔ kpo shii 35 yɛ nibɔɔ he sane lɛ mli, ni be fɛɛ be lɛ, feemɔ-wiemɔ ni tsɔɔ nɔ ni Nyɔŋmɔ kɛɛ kɛ nɔ ni éfee lɛ mli lɛ yɛ ekome-feemɔ wiemɔ mli. (1 Mose 1:⁠1–2:⁠4) No hewɔ lɛ nakai wolo lɛ kɛ sane lɛ ba naagbee akɛ: “Esa akɛ atsɔɔ [ʼelo·himʹ ] mli akɛ babaoo-feemɔ ni mli wa, ni tsɔɔ dalɛ kɛ agbojee.”

ʼElo·himʹ etsɔɔɔ “gbɔmɛi,” shi moŋ “nyɔŋmɔi.” No hewɔ lɛ mɛi ni jeɔ ŋwane akɛ wiemɔ nɛɛ tsɔɔ Triniti lɛ feɔ amɛhe nyɔŋmɔi pii ajalɔi, mɛi ni jaa nyɔŋmɔi pii shi jeee Nyɔŋmɔ kome. Mɛni hewɔ? Ejaakɛ no baatsɔɔ akɛ nyɔŋmɔi etɛ yɔɔ Triniti lɛ mli. Shi etamɔ nɔ ni Triniti sɛɛfilɔi fɛɛ kpoɔ jwɛŋmɔ akɛ nyɔŋmɔi sɔrɔtoi etɛ feɔ Triniti lɛ.

Biblia lɛ hu kɛ wiemɔi, ʼelo·himʹ kɛ ʼelo·hehʹ tsuɔ nii kɛ eewie apasa amagai anyɔŋmɔi babaoo he lɛ. (2 Mose 12:​12; 20:​23) Shi ebaanyɛ ekɔ apasa nyɔŋmɔ kome he yɛ bei krokomɛi amli, tamɔ be mli ni Filistibii lɛ wie “amɛ nyɔŋmɔ [ʼelo·hehʹ ] Dagon lɛ” he lɛ. (Kojolɔi 16:​23, 24) Atsɛɔ Baal akɛ “nyɔŋmɔ ko [ʼelo·himʹ ].” (1 Maŋtsɛmɛi 18:​27) Kɛfata he lɛ, akɛ wiemɔ nɛɛ tsuɔ nii ahaa gbɔmɛi. (Lala 82:​1, 6) Akɛɛ Mose akɛ ebaasɔmɔ akɛ “Nyɔŋmɔ [ʼelo·himʹ ]” eha Aaron kɛ Farao.​—2 Mose 4:​16; 7:⁠1.

Eka shi faŋŋ akɛ, sabalai, ʼelo·himʹ kɛ ʼelo·hehʹ ni akɛtsu nii aha apasa nyɔŋmɔi, kɛ adesai po lɛ, etsɔɔɔ akɛ eko fɛɛ eko damɔ shi kɛha nyɔŋmɔi babaoo; ni asaŋ ʼelo·himʹ loo ʼelo·hehʹ ni akɛto Yehowa he lɛ etsɔɔɔ akɛ efa fe mɔ kome, titri lɛ kɛ wɔsusu odaseyelii ni jɛ Biblia lɛ mli hei krokomɛi ni kɔɔ nɛkɛ sane nɛɛ he lɛ he lɛ.

Yesu Ji Bɔɔ Nɔ Kroko

BENI Yesu yɔɔ shikpɔŋ nɔ lɛ, no mli lɛ eji adesa, eyɛ mli akɛ eyeɔ emuu, ejaakɛ Nyɔŋmɔ ji mɔ ni jie Yesu wala kɛbawo Maria musuŋ. (Mateo 1:​18-25) Shi jeee nɛkɛ eje shishi. Lɛ diɛŋtsɛ ejaje akɛ ejɛ “ŋwɛi [e]kpeleke shi.” (Yohane 3:​13) No hewɔ lɛ eja gbɛ akɛ eeekɛɛ esɛɛnyiɛlɔi lɛ yɛ sɛɛ mli akɛ: “Shi kɛji nyɛna gbɔmɔ bi lɛ [Yesu] miiya ŋwɛi he ni eyɔɔ sa lɛ, no hu?”​—Yohane 6:⁠62.

No hewɔ lɛ, Yesu ehi shi yɛ ŋwɛi dani eba shikpɔŋ nɛɛ nɔ. Shi ani ehi shi akɛ mɛi ni yɔɔ ofe, naanɔ mɛi etɛ yɛ Nyɔŋmɔ-su mli lɛ ateŋ mɔ kome? Dabi, ejaakɛ Biblia lɛ kɛɔ faŋŋ akɛ, beni ebatsɔko adesa lɛ, no mli lɛ Yesu ji mumɔŋ bɔɔ nɔ, taakɛ ŋwɛibɔfoi lɛ hu ji mumɔŋ bɔɔ nii ni Nyɔŋmɔ bɔ amɛ lɛ. Yesu loo ŋwɛibɔfoi lɛ bɛ shihilɛ mli dani abɔ amɛ.

Beni Yesu batsɔko adesa lɛ, no mli lɛ eji “bɔɔ nii fɛɛ ateŋ kromɔ bi.” (Kolosebii 1:​15, NJB) Lɛ ji “Nyɔŋmɔ nibɔɔ lɛ shishijee.” (Kpojiemɔ 3:​14, RS, Katolek nɔ). Anyɛŋ atsɔɔ “shishijee” [Hela, ar·kheʹ ] shishi yɛ gbɛ ni ja nɔ akɛ etsɔɔ akɛ Yesu ji Nyɔŋmɔ nibɔɔ lɛ ‘shishijelɔ.’ Yohane kɛ Hela wiemɔ ar·kheʹ shishinumɔi sɔrɔtoi tsu nii fe shii 20 yɛ e-Biblia mli niŋmaai amli, ni enɛɛmɛi fɛɛ hiɛ shishinumɔ ni ale faŋŋ ni ji “shishijee” lɛ. Hɛɛ, Nyɔŋmɔ bɔ Yesu akɛ Nyɔŋmɔ nibɔɔ ni anaaa lɛ shishijee.

Kadimɔ bɔ ni nakai wiemɔi ni kɔɔ Yesu shishijee he lɛ kɛ wiemɔi ni okadi-feemɔ mli “Nilee” ni yɔɔ Biblia mli Abɛi awolo lɛ mli lɛ wie lɛ kpaa gbee ehaa: “Yahweh bɔ mi, enibɔɔ mli klɛŋklɛŋ yibii, kɛtsɔ enitsumɔi ni etsɛ fe fɛɛ lɛ hiɛ. Afɔ mi dani aŋɔ gɔji lɛ amamɔ shi, dani ŋmeŋmei lɛ ba; dani efee shikpɔŋ lɛ, kɛ ŋa lɛ, kɛ klɛŋklɛŋ nibii ni akɛbɔ je lɛ.” (Abɛi 8:​12, 22, 25, 26, NJB) Yɛ be mli ni akɛ wiemɔ, “Nilee” tsu nii akɛto mɔ ni Nyɔŋmɔ bɔ lɛ lɛ he lɛ, woloŋlelɔi babaoo kpɛlɛɔ nɔ akɛ, eji okadi-feemɔ mli wiemɔ ni kɔɔ Yesu he akɛ mumɔŋ bɔɔ nɔ dani ebatsɔ adesa.

Ákɛ “Nilee” dani ebatsɔ adesa lɛ, Yesu yaa nɔ ekɛɔ akɛ eyɛ “emasɛi [Nyɔŋmɔ masɛi] akɛ ŋaalɔ nukpa.” (Abɛi 8:​30, JB) Nɔ ni kɛ enitsumɔ akɛ ŋaalɔ nukpa nɛɛ kpaa gbee lɛ, Kolosebii 1:​16 wieɔ Yesu he akɛ “lɛ enɔ Nyɔŋmɔ tsɔ ebɔ nii fɛɛ ni yɔɔ ŋwɛi kɛ shikpɔŋ nɔ.”​—Today’s English Version (TEV ).

No hewɔ lɛ, ŋaalɔ nukpa nɛɛ, mɔ ni baa shi nɛɛ, kɛ wɔɔwie nakai lɛ, lɛ enɔ Nyɔŋmɔ Ofe lɛ tsɔ ebɔ nibii krokomɛi fɛɛ. Biblia lɛ muaa sane lɛ naa yɛ nɛkɛ gbɛ nɔ: “Kɛha wɔ lɛ, Nyɔŋmɔ kome pɛ yɔɔ, Tsɛ lɛ, mɔ ni nibii fɛɛ jɛ emli lɛ . . . kɛ Nuŋtsɔ kome, Yesu Kristo, mɔ ni nibii fɛ tsɔ enɔ kɛba lɛ.” (Nɔ ni atsɔmɔ lɛ ji wɔnɔ.)​—1 Korintobii 8:​6, RS Katolek nɔ.

Ŋwanejee ko bɛ he akɛ ŋaalɔ nukpa nɛɛ Nyɔŋmɔ kɛwie akɛ: “Ha wɔfee gbɔmɔ yɛ wɔsubaŋ nɔ” lɛ. (1 Mose 1:​26, NW ) Mɛi komɛi ewie akɛ wiemɔ, “wɔ” ni yɔɔ wiemɔi nɛɛ amli lɛ tsɔɔ Triniti. Shi kɛji akɛ okɛɛ, ‘Ha wɔfee nɔ ko wɔha wɔhe’ lɛ, mɔ ko nuŋ enɛ shishi akɛ abua mɛi pii anaa afee amɛ ekome awo omli. Nɔ ni otsɔɔ kɛkɛ ji akɛ gbɔmɛi aŋkroaŋkroi enyɔ loo mɛi ni fa fe nakai baatsu nɔ ko he nii kutuu. Nakai nɔŋŋ hu beni Nyɔŋmɔ kɛ wiemɔ, “wɔ” tsu nii lɛ, no mli lɛ ekɛ mɔ aŋkro ko miiwie, eklɛŋklɛŋ mumɔŋ bɔɔ nɔ, ŋaalɔ nukpa lɛ, Yesu, beni etsɔko adesa lɛ.

Ani Abaanyɛ Aka Nyɔŋmɔ?

AWIE Yesu he yɛ Mateo 4:⁠1 akɛ “Abonsam . . . ka lɛ.” Yɛ be mli ni “eŋɔ jeŋ maŋtsɛyeli hei fɛɛ kɛ amɛnunyam lɛ” etsɔɔ Yesu sɛɛ lɛ, Satan kɛɛ: “Maŋɔ enɛɛmɛi fɛɛ mahao, kɛji okula shi oja mi lɛ.” (Mateo 4:​8, 9) Satan miibɔ mɔdɛŋ ni eha Yesu afee mɔ ni yeee Nyɔŋmɔ anɔkwale.

Shi mɛɛ anɔkwayeli he kaa nɛkɛ enɛ aaaji kɛji akɛ Yesu ji Nyɔŋmɔ? Ani Nyɔŋmɔ baatse atua ashi lɛ diɛŋtsɛ ehe? Dabi, shi ŋwɛibɔfoi kɛ adesai baanyɛ atse atua amɛshi Nyɔŋmɔ, ni amɛfee nakai. Yesu kaa lɛ baanyɛ afee nɔ ni shishinumɔ yɔɔ mli, kɛ ejeee Nyɔŋmɔ, shi moŋ eji gbɔmɔ aŋkro ni esoro lɛ ni yɔɔ heyeli akɛ efeɔ esuɔmɔnaa nii, mɔ ni baanyɛ afee mɔ ni yeee anɔkwa kɛ ehala nakai, tamɔ ŋwɛibɔfo loo adesa ko.

Shi yɛ gbɛ kroko nɔ lɛ, akɛ Nyɔŋmɔ aaanyɛ afee esha kɛ mɔ ni yeee lɛ diɛŋtsɛ ehe anɔkwale lɛ ji nɔ ko ni ehiŋ feemɔ. “Enitsumɔi hi pɛ . . . Anɔkwa Mawu ji lɛ, . . . jalɔ ji lɛ, ni esa pɛ.” (5 Mose 32:⁠4) No hewɔ lɛ eji Yesu ji Nyɔŋmɔ kulɛ, anyɛɛɛ aka lɛ.​—Yakobo 1:⁠13.

Akɛni Yesu jeee Nyɔŋmɔ hewɔ lɛ, ebaanyɛ efee mɔ ni yeee anɔkwa. Shi ehi shi akɛ anɔkwafo, ni ekɛɛ: “Ho misɛɛ, Satan! Ejaakɛ aŋma akɛ: ‘Nuŋtsɔ [Yehowa] o-Nyɔŋmɔ lɛ oja, ni lɛ kɛkɛ osɔmɔ.’ ”​—Mateo 4:⁠10.

Mɛɛ Jara Kpɔmɔ Nɔ lɛ Hiɛ?

YIŊTOI titrii ahewɔ ni Yesu ba shikpɔŋ nɔ lɛ ateŋ ekome hu kɔɔ Triniti lɛ he diɛŋtsɛ. Biblia lɛ kɛɔ akɛ: “Nyɔŋmɔ kome yɔɔ, kɛ Nyɔŋmɔ kɛ gbɔmɛi ateŋdamɔlɔ kome hu, ni ji gbɔmɔ Kristo Yesu, mɔ ni ŋɔ ehe eha akɛ kpɔmɔ nɔ eha mɛi fɛɛ.”​—1 Timoteo 2:​5, 6.

Yesu, ni ejeee mɔ ni shɛɛɛ adesa ni yeɔ emuu ni ejeee mɔ ni fe nakai hu lɛ, batsɔ kpɔmɔ nɔ ni baye nɔ ni Adam laaje lɛ najiaŋ pɛpɛɛpɛ​—hegbɛ ni akɛaana adesa wala ni yeɔ emuu yɛ shikpɔŋ nɔ. No hewɔ lɛ bɔfo Paulo baanyɛ atsɛ Yesu yɛ gbɛ ni ja nɔ akɛ “naagbee Adam,” ejaakɛ lɛ nɔŋŋ ewie yɛ nakai niŋmaa lɛ mli akɛ: “Taakɛ bɔ ni Adam mli ni mɛi fɛɛ gboiɔ yɛ lɛ, nakai nɔŋŋ kɛ̃ Kristo mli ni amɛ fɛɛ amɛyi aaana wala yɛ.” (1 Korintobii 15:​22, 45) Yesu akɛ adesa lɛ wala ni yeɔ emuu lɛ ji “kpɔmɔ nɔ” ni ŋwɛi jalɛsaneyeli biɔ​—jeee nɔ ni fe, ni jeee nɔ ni shɛɛɛ. Adesa shishitoo mla kɛha jalɛsaneyeli po ji akɛ esa akɛ nyɔmɔ ni awoɔ lɛ afee nɔ ni sa efɔŋ ni afee lɛ.

Shi eji Yesu ji Nyɔŋmɔ-su lɛ fa kulɛ, kpɔmɔ nɔ jara lɛ baafee nɔ ni nɔ kwɔ kwraa fe bɔ ni Nyɔŋmɔ diɛŋtsɛ Mla biɔ lɛ. (2 Mose 21:​23-25; 3 Mose 24:​19-21) Gbɔmɔ Adam, ni yeɔ emuu lɛ fee esha yɛ Eden lɛ, shi jeee Nyɔŋmɔ. No hewɔ lɛ, bɔni afee ni kpɔmɔ nɔ lɛ kɛ Nyɔŋmɔ jalɛsaneyeli akpa gbee diɛŋtsɛ lɛ, esa akɛ efee nɔ ni kɛ lɛ yeɔ egbɔ pɛpɛɛpɛ​—adesa ni yeɔ emuu, “naagbee Adam” lɛ. No hewɔ lɛ, beni Nyɔŋmɔ tsu Yesu kɛba shikpɔŋ nɔ akɛ kpɔmɔ nɔ lɛ, efee Yesu akɛ mɔ ni baasa jalɛsaneyeli, jeee mɔ ni etsake ehe kɛjɛ su kroko mli, ejeee nyɔŋmɔ fa kɛ gbɔmɔ fa, shi moŋ gbɔmɔ ni yeɔ emuu, “ebaa shi fe ŋwɛibɔfoi.” (Hebribii 2:⁠9, NW; okɛto Lala 8:​5, 6 he.) Te aaafee tɛŋŋ ni ofe Nyɔŋmɔ-su lɛ fa ko​—Tsɛ, Bi, loo mumɔ krɔŋkrɔŋ lɛ​—aaafee mɔ ni baa shi fe ŋwɛibɔfoi hu?

“Bi Koome” yɛ Mɛɛ Gbɛ Nɔ?

BIBLIA lɛ tsɛɔ Yesu akɛ Nyɔŋmɔ “Bi koome.” (Yohane 1:​14; 3:​16, 18; 1 Yohane 4:⁠9) Mɛi ni heɔ Triniti lɛ amɛyeɔ lɛ kɛɔ akɛ, akɛni Nyɔŋmɔ yɛ daa hewɔ lɛ, Nyɔŋmɔ Bi lɛ hu yɛ daa. Shi te aaafee tɛŋŋ ni mɔ ko aaafee bi, ni yɛ nakai beaŋ nɔŋŋ lɛ efee mɔ ni etsɛ tamɔ e-Tsɛ ni fɔ lɛ lɛ pɛpɛɛpɛ loo ekɛ lɛ aye egbɔ yɛ afii amli hu?

Mɛi ni heɔ Triniti lɛ amɛyeɔ lɛ tsɔɔ akɛ yɛ Yesu gbɛfaŋ lɛ, “bi koome” lɛ tamɔɔɔ bɔ ni wiemɔ komekomei ashishitsɔɔmɔ wolo tsɔɔ “fɔmɔ,” ni ji “afɔ bi akɛ tsɛ” lɛ mli ehaa lɛ. (Webster’s Ninth New Collegiate Dictionary) Amɛkɛɔ akɛ yɛ Yesu gbɛfaŋ lɛ etsɔɔ “wekukpaa henumɔ ni tsɔɔ shishijee ni abɛ,” bi koome wekukpaa ko kɛkɛ ni shishijee bɛ mli. (Vine’s Expository Dictionary of Old and New Testament Words) Ani jwɛŋmɔ yɛ enɛ mli kɛha bo? Ani nuu aaanyɛ atsɔ tsɛ aha bi ni jeee fɔ afɔ bi lɛ?

Kɛfata he lɛ, mɛni hewɔ Biblia lɛ kɛ Hela wiemɔ kometoo lɛ nɔŋŋ kɛha “bi koome” (taakɛ Vine kpɛlɛɔ nɔ ni etsɔɔɔ mli lɛ) tsuɔ nii ni ekɛtsɔɔ wekukpaa ni ka Isak kɛ Abraham teŋ lɛ? Hebribii 11:​17 wieɔ Isak he akɛ eji Abraham “bi kome.” Sanebimɔ ko nyɛŋ aba he akɛ yɛ Isak sane lɛ mli lɛ, eji bi koome yɛ nakai shishinumɔ lɛ diɛŋtsɛ naa, ekɛ etsɛ lɛ yeee egbɔ yɛ be loo gbɛhe mli.

Shishijee Hela wiemɔ kɛha “bi koome” ni akɛtsu nii aha Yesu kɛ Isak lɛ ji mo·no·ge·nesʹ, ejɛ moʹnos, ni eshishi ji “koome,” kɛ giʹno·mai, shishijee wiemɔ ni eshishi ji “afɔ,” “ba shihilɛ mli” lɛ mli, ni nakai ji bɔ ni Strong Exhaustive Concordance lɛ tsɔɔ. No hewɔ lɛ atsɔɔ mo·no·ge·nesʹ shishi akɛ: “Bi pɛ, bi koome, ni ji akɛ bi pɛ ni afɔ.”​—A Greek and English Lexicon of the New Testament ni E. Robinson ŋma.

Theological Dictionary of the New Testament ni Gerhard Kittel ŋma lɛ kɛɔ akɛ: “[Mo·no·ge·nesʹ ] tsɔɔ ‘mɔ pɛ ni afɔ,’ ni ji akɛ, ebɛ nyɛmimɛi hii loo yei.” Nɛkɛ wolo nɛɛ hu kɛɔ akɛ, “jeee akɛ akɛ Yesu wekukpaa lɛ toɔ nɔ ni ka tsɛ kɛ ebi kome pɛ teŋ lɛ he kɛkɛ” yɛ Yohane 1:​18; 3:​16, 18; kɛ 1 Yohane 4:⁠9. “Eji wekukpaa ni ka bi koome lɛ kɛ Tsɛ lɛ teŋ.”

No hewɔ lɛ, Yesu, Bi koome lɛ na wala shishijee. Ni abaanyɛ atsɛ Nyɔŋmɔ Ofe lɛ yɛ gbɛ ni ja nɔ akɛ e-Fɔlɔ loo Tsɛ, kɛ shishinumɔ ni tamɔ bɔ ni shikpɔŋ nɔ tsɛ ko, tamɔ Abraham, fɔɔ bi lɛ. (Hebribii 11:​17) No hewɔ lɛ, kɛ Biblia lɛ wie Nyɔŋmɔ he akɛ Yesu “Tsɛ” lɛ, nakai nɔŋŋ etsɔɔ lɛ​—akɛ amɛji gbɔmɛi enyɔ ni esoro amɛ. Nyɔŋmɔ ji onukpa. Yesu ji gbekɛ​—yɛ be, gbɛhe, hewalɛ kɛ nilee mli.

Kɛ mɔ ko susu bɔ ni Yesu jeee Nyɔŋmɔ mumɔŋ bi kome pɛ ni abɔ lɛ yɛ ŋwɛi lɛ he lɛ, nɔ hewɔ ni akɛ wiemɔ, “Bi koome” lɛ tsu nii yɛ esane lɛ mli lɛ bafeɔ faŋŋ. Atsɛɔ mumɔŋ bɔɔ nii krokomɛi babaoo, ni ji ŋwɛibɔfoi lɛ akɛ “Nyɔŋmɔ bii,” taakɛ bɔ ni Adam ji lɛ, ejaakɛ amɛwala hewalɛ lɛ jɛ Yehowa Nyɔŋmɔ, wala Nu bu, loo Jɛɛhe lɛ ŋɔɔ. (Hiob 38:⁠7; Lala 36:​10; Luka 3:​38) Shi abɔ mɛnɛɛmɛi fɛɛ kɛtsɔ “Bi koome” lɛ ni ji mɔ ni Nyɔŋmɔ fɔ lɛ tɛɛ lɛ nɔ.​—Kolosebii 1:​15-⁠17.

Ani Abu Yesu akɛ Eji Nyɔŋmɔ?

YƐ BE mli ni afɔɔ Yesu tsɛmɔ yɛ Biblia lɛ mli akɛ Nyɔŋmɔ Bi lɛ, mɔ ko mɔ ko bɛ klɛŋklɛŋ afii oha lɛ mli ni susu ehe akɛ eji Nyɔŋmɔ ni ji Bi. Daimonioi lɛ po ni ‘heɔ yeɔ akɛ Nyɔŋmɔ kome pɛ yɔɔ’ lɛ le kɛjɛ amɛ niiashikpamɔ mli yɛ mumɔi ashihilɛ he lɛ akɛ Yesu jeee Nyɔŋmɔ. No hewɔ lɛ amɛtsɛ Yesu yɛ gbɛ ni ja nɔ akɛ “Nyɔŋmɔ Bi.” (Yakobo 2:​19; Mateo 8:​29) Ni beni Yesu gbo lɛ, Roma asraafoi wɔŋjalɔi ni damɔ emasɛi lɛ na le babaoo ni baaha amɛkɛɛ akɛ nɔ ni amɛnu kɛjɛ esɛɛnyiɛlɔi lɛ anaa lɛ baanyɛ afee anɔkwale, jeee akɛ Yesu ji Nyɔŋmɔ, shi akɛ “lɛlɛŋ, Nyɔŋmɔ bi nɛ.”​—Mateo 27:⁠54.

No hewɔ lɛ wiemɔ, “Nyɔŋmɔ Bi” lɛ kɔɔ Yesu he akɛ bɔɔ nɔ kroko ni esoro lɛ, jeee Triniti ko fa. Akɛ Nyɔŋmɔ Bi lɛ, enyɛŋ efee Nyɔŋmɔ diɛŋtsɛ, ejaakɛ Yohane 1:​18 kɛɔ akɛ: “Nyɔŋmɔ lɛ, mɔ ko enako lɛ pɛŋ.”​—RS, Katolek nɔ.

Kaselɔi lɛ bu Yesu akɛ “Nyɔŋmɔ kɛ gbɔmɛi ateŋdamɔlɔ kome,” jeee akɛ Nyɔŋmɔ diɛŋtsɛ. (1 Timoteo 2:⁠5) Akɛni kɛ aatsɔɔ teŋdamɔlɔ mli lɛ eji mɔ ni esoro lɛ yɛ mɛi ni teŋdaamɔ he hiaa amɛ lɛ ahe hewɔ lɛ, ebaafee sane ni teɔ shi ewoɔ ehe akɛ Yesu kɛ mɛi enyɔ ni ekpataa amɛteŋ lɛ ateŋ mɔ kome aaafee nɔ kometoo lɛ nɔŋŋ. No baatsɔɔ akɛ eekwa efee ehe mɔ ni ejeee.

Biblia lɛ yɛ faŋŋ ni ekɛ ehe kpaa gbee yɛ wekukpaa ni ka Nyɔŋmɔ kɛ Yesu teŋ lɛ he. Yehowa Nyɔŋmɔ pɛ ji Ofe. Lɛ ebɔ Yesu tɛɛ dani eba shikpɔŋ nɛɛ nɔ. No hewɔ lɛ Yesu yɛ shishijee, ni enyɛŋ ekɛ Nyɔŋmɔ aye egbɔ yɛ hewalɛ loo naanɔ shihilɛ mli.

[Shishigbɛ niŋmai]

[Wiemɔ ni akɔ ni akɛmiitsu nii ni yɔɔ baafa 14]

Akɛni Nyɔŋmɔ bɔ Yesu hewɔ lɛ, eyɛ gbɛhe ni ji enyɔ mli yɛ be, hewalɛ, kɛ nilee mli

[Mfoniri ni yɔɔ baafa 15]

Yesu kɛɛ akɛ eyɛ shihilɛ mli dani ebatsɔ adesa, ni Nyɔŋmɔ bɔ lɛ akɛ Nyɔŋmɔ nibɔɔ ni anaaa lɛ shishijee