Ani Nyɔŋmɔ Nɔ Kwɔ Fe Yesu yɛ Be Fɛɛ Mli?

YESU ewieee yɛ be ko po mli akɛ eji Nyɔŋmɔ. Nɔ fɛɛ nɔ ni ewie yɛ lɛ diɛŋtsɛ ehe lɛ tsɔɔ akɛ ebuuu ehe akɛ ekɛ Nyɔŋmɔ yeɔ egbɔ yɛ gbɛ ko nɔ​—jeee yɛ hewalɛ mli, jeee yɛ nilee mli, jeee yɛ afii amli.

Yɛ eshihilɛ be fɛɛ mli, kɛ yɛ ŋwɛi loo shikpɔŋ nɔ hu lɛ, ewiemɔ kɛ subaŋ tsɔɔ akɛ ebaa ehe shi ehaa Nyɔŋmɔ. Nyɔŋmɔ ji mɔ ni kwɔ fe fɛɛ yɛ be fɛɛ mli, Yesu ji fioo ni Nyɔŋmɔ bɔ lɛ lɛ.

Yesu Ha Sɔrɔto-feemɔ Ba Ekɛ Nyɔŋmɔ Teŋ

YESU tsɔɔ shii abɔ akɛ eji bɔɔ nɔ ni esoro lɛ yɛ Nyɔŋmɔ he, ni akɛ, lɛ, Yesu, yɛ Nyɔŋmɔ ko ni kwɔ fe lɛ, Nyɔŋmɔ ko ni ejaa lɛ, Nyɔŋmɔ ko ni etsɛɔ lɛ “Tsɛ.” Yesu kɛɛ yɛ sɔlemɔ ko ni ekɛha Nyɔŋmɔ, ni ji Tsɛ lɛ mli akɛ, “Bo, anɔkwa Nyɔŋmɔ kome lɛ.” (Yohane 17:⁠3) Ekɛɛ Maria Magdaleena yɛ Yohane 20:​17 akɛ: “Miiya ŋwɛi yɛ mi-Tsɛ kɛ nyɛ hu nyɛ-Tsɛ kɛ mi-Nyɔŋmɔ kɛ nyɛ hu nyɛ-Nyɔŋmɔ lɛ ŋɔɔ.” (RS, Katolek nɔ.) Ni bɔfo Paulo ma nɛkɛ wekukpaa nɛɛ nɔ mi yɛ 2 Korintobii 1:⁠3 akɛ: “Ajɔɔ Nyɔŋmɔ kɛ wɔ Nuŋtsɔ Yesu Kristo Tsɛ lɛ.” Akɛni Yesu yɛ Nyɔŋmɔ, ni ji e-Tsɛ lɛ hewɔ lɛ, enyɛŋ efee nakai Nyɔŋmɔ lɛ yɛ be kome too lɛ nɔŋŋ mli.

Bɔfo Paulo bɛ yiŋkɔshikɔshi-feemɔ ko yɛ Yesu kɛ Nyɔŋmɔ ni eeewie amɛhe akɛ gbɔmɛi sɔrɔtoi enyɔ lɛ he: “Wɔ lɛ, Nyɔŋmɔ kome pɛ wɔyɔɔ, Tsɛ lɛ, . . . kɛ Nuŋtsɔ kome hu ni ji Yesu Kristo lɛ.” (1 Korintobii 8:​6, JB) Bɔfo lɛ tsɔɔ sɔrɔto-feemɔ lɛ beni etsi “yɛ Nyɔŋmɔ kɛ . . . Yesu Kristo kɛ ebɔfoi ni ehala lɛ ahiɛ lɛ” ta lɛ. (1 Timoteo 5:​21, RS Common Bible) Taakɛ Paulo wieɔ Yesu kɛ bɔfoi lɛ ahe akɛ mɛi sɔrɔtoi yɛ ŋwɛi lɛ, nakai nɔŋŋ hu Yesu kɛ Nyɔŋmɔ ji.

Yesu wiemɔi ni yɔɔ Yohane 8:​17, 18 lɛ hu sa kadimɔ. Ejaje akɛ: “Nyɛ Mla lɛ mli hu aŋma akɛ, ‘Mɛi enyɔ odase lɛ, anɔkwaŋ.’ Mi lɛ, miyeɔ mi diɛŋtsɛ mihe odase, ni Tsɛ ni tsu mi lɛ hu yeɔ mihe odase.” Yesu miitsɔɔ yɛ biɛ akɛ, lɛ kɛ Tsɛ lɛ, ni ji Nyɔŋmɔ Ofe lɛ, ji gbɔmɛi sɔrɔtoi enyɔ, kulɛ te aaafee tɛŋŋ ni ana odasefoi enyɔ yɛ anɔkwale mli hu?

Yesu tsɔɔ ekoŋŋ akɛ esoro lɛ yɛ Nyɔŋmɔ he kɛtsɔ nɔ ni ewie nɛɛ nɔ: “Mɛɛba otsɛɔ mi mɔ kpakpa? Mɔ kpakpa ko bɛ akɛ ja Nyɔŋmɔ kome kɛkɛ.” (Marko 10:​18, JB) No hewɔ lɛ Yesu miikɛɛ akɛ mɔ ko mɔ ko bɛ ni hi tamɔ bɔ ni Nyɔŋmɔ hi lɛ, ni Yesu diɛŋtsɛ po bɛ nakai. Nyɔŋmɔ hi yɛ gbɛ ni haa esoroɔ lɛ yɛ Yesu he lɛ nɔ.

Nyɔŋmɔ Tsulɔ ni Baa Ehe Shi

YESU wie wiemɔi ni tamɔ nɛkɛ shii abɔ: “Bi lɛ diɛŋtsɛ nyɛŋ eto eyiŋ efee nɔ ko ni esumɔɔ, ja nɔ ni enaa akɛ e-Tsɛ lɛ feɔ lɛ pɛ ebaanyɛ efee.” (Yohane 5:​19, The Holy Bible, ni Osɔfo R. A. Knox ŋma) “Jeee mi diɛŋtsɛ misuɔmɔnaa nii feemɔ hewɔ mijɛ ŋwɛi miba, shi moŋ mɔ ni tsu mi lɛ suɔmɔnaa nii feemɔ.” (Yohane 6:​38) “Minitsɔɔmɔ lɛ jeee minɔŋ, shi moŋ mɔ ni tsu mi lɛ nɔŋ.” (Yohane 7:​16) Ani mɔ ni tsuɔ mɔ lɛ nɔ kwɔɔɔ fe mɔ ni atsuɔ lɛ lɛ?

Nɛkɛ wekukpaa nɛɛ jeɔ kpo yɛ Yesu nɔkwɛmɔ nɔ ni kɔɔ weintrom lɛ he lɛ mli. Ekɛ Nyɔŋmɔ, e-Tsɛ lɛ, to weintrom lɛ nɔtsɛ, ni fa gbɛ kɛtee shɔŋŋ, ni ekɛ weintrom lɛ wo okwaafoi, ni damɔ shi kɛha Yudafoi osɔfoi adɛŋ lɛ he. Beni yɛ sɛɛ mli lɛ nɔtsɛ lɛ tsu etsulɔ kɛtee okwaafoi lɛ aŋɔɔ koni amɛha lɛ weintrom lɛ yibii lɛ eko lɛ, okwaafoi lɛ yi tsulɔ lɛ, ni amɛshwie lɛ efolo. Kɛkɛ ni nɔtsɛ lɛ saa tsu tsulɔ ni ji enyɔ, kɛ mɔ ni eji etɛ, ni amɛfee amɛ fɛɛ nakai nɔŋŋ. Kɛkɛ ni yɛ naagbee lɛ nɔtsɛ lɛ kɛɛ: “Matsu mi bi [Yesu] ni misumɔɔ lɛ. Ekolɛ kɛ amɛna lɛ lɛ amɛhiɛ aaasɔ lɛ.” Shi okwaafoi ni amɛfite lɛ kɛɛ: “ ‘Niyelɔ lɛ nɛ; nyɛbaa ni nyɛhaa wɔgbea lɛ, koni nii lɛ atsɔ wɔnɔ.’ Ni amɛtsirɛ eyi sɛɛ kɛjɛ weintrom lɛ mli ni amɛyagbe lɛ.” (Luka 20:​9-16) No hewɔ lɛ Yesu fee lɛ diɛŋtsɛ egbɛhe lɛ he nɔkwɛmɔ nɔ akɛ mɔ ni Nyɔŋmɔ tsu lɛ koni ebafee Nyɔŋmɔ suɔmɔnaa nii, tamɔ bɔ ni tsɛ tsuɔ ebi ni baa ehe shi lɛ.

Yesu sɛɛnyiɛlɔi lɛ buɔ lɛ akɛ Nyɔŋmɔ tsulɔ ni baa ehe shi yɛ be fɛɛ mli, jeee akɛ mɔ ni kɛ Nyɔŋmɔ yeɔ egbɔ. Amɛsɔle amɛha Nyɔŋmɔ yɛ “otsulɔ krɔŋkrɔŋ Yesu, mɔ ni ofɔ lɛ mu lɛ, . . . ni atsɔ otsulɔ krɔŋkrɔŋ Yesu lɛ gbɛi anɔ afee okadii kɛ naakpɛɛ nii” lɛ he.​—Bɔfoi lɛ Asaji 4:​23, 24, 27, 30, RS, Katolek nɔ.

Nyɔŋmɔ nɔ Kwɔ yɛ Bei Fɛɛ Mli

YƐ YESU sɔɔmɔ lɛ shishijee, beni eje kpo kɛjɛ nu ni abaptisi lɛ yɛ mli lɛ mli pɛ kɛkɛ ni Nyɔŋmɔ gbee jɛ ŋwɛi kɛɛ: “Mɔ nɛɛ ji misuɔmɔ Bi, ni mina ehe tsui lɛ.” (Mateo 3:​16, 17) Ani Nyɔŋmɔ miikɛɛ akɛ lɛ nɔŋŋ ji ebi lɛ, akɛ ena lɛ diɛŋtsɛ ehe tsui, akɛ etsu lɛ diɛŋtsɛ ehe? Dabi, Nyɔŋmɔ ni ji Bɔlɔ lɛ miikɛɛ akɛ, lɛ, akɛ mɔ ni nɔ kwɔ lɛ, miikpɛlɛ mɔ ni baa shi lɛ, e-Bi Yesu nɔ, kɛmiiha nitsumɔ ni ka ehiɛ lɛ.

Yesu tsɔɔ bɔ ni e-Tsɛ lɛ kwɔ fe lɛ lɛ beni ekɛɛ: “Nuŋtsɔ lɛ [Yehowa] mumɔ lɛ yɛ minɔ, no hewɔ lɛ efɔ mi mu koni mijaje sanekpakpa lɛ mitsɔɔ ohiafoi.” (Luka 4:​18) Mufɔɔ ji hegbɛ loo hewalɛ loo nitsumɔ ni mɔ ni kwɔ lɛ kɛwoɔ mɔ ni bɛ hegbɛ loo hewalɛ lɛ dɛŋ. Eka shi faŋŋ yɛ biɛ akɛ Nyɔŋmɔ ji mɔ ni kwɔ lɛ, ejaakɛ lɛ efɔ Yesu mu, ekɛ hegbɛ loo hewalɛ ni tsutsu lɛ ebɛ wo edɛŋ.

Yesu ha bɔ ni e-Tsɛ lɛ kwɔ fe lɛ lɛ je kpo faŋŋ yɛ be mli ni kaselɔi enyɔ lɛ anyɛ lɛ bi lɛ ni eha ebihii lɛ ateŋ mɔ kome ata Yesu ninejurɔ nɔ ni mɔ kroko hu ata ebɛku nɔ beni eba e-Maŋtsɛyeli lɛ mli lɛ. Yesu ha hetoo akɛ: “Mininejurɔ kɛ mibɛku nɔ taramɔ lɛ, ejeee minɔ ni mikɛhaa, shi moŋ mɛi ni mi-Tsɛ [ni ji Nyɔŋmɔ] esaa eto amɛ lɛ nɔŋ.” (Mateo 20:​23) Eji Yesu ji Nyɔŋmɔ Ofe lɛ kulɛ, nakai gbɛhei lɛ baanyɛ afee enɔ ni ebaanyɛ ekɛha. Shi Yesu nyɛɛɛ ekɛha, ejaakɛ Nyɔŋmɔ nii ni ekɛhaa ji nomɛi, ni Yesu jeee Nyɔŋmɔ.

Yesu diɛŋtsɛ sɔlemɔi lɛ ji bɔ ni ebaa shi lɛ he nɔkwɛmɔ nɔ ni mli wa. Beni Yesu baagbo lɛ, etsɔɔ mɔ ni kwɔ fe lɛ lɛ yɛ nɛkɛ sɔlemɔ nɛɛ mli: “Ataa, kɛji oosumɔ lɛ, jiemɔ kpulu nɛɛ kɛjɛ minɔ! Shi kɛlɛ, jeee bɔ ni mi misumɔɔ lɛ, shi moŋ bɔ ni bo osumɔɔ.” (Luka 22:​42) Namɔ ekɛ sɔlemɔ fɔɔ ehiɛ lɛ? Ekɛmiifɔ efa ko hiɛ? Dabi, ekɛ sɔlemɔ miifɔ mɔ ko ni yɔɔ sɔrɔto ko kwraa hiɛ, e-Tsɛ lɛ, Nyɔŋmɔ, ni esuɔmɔnaa nii anɔ kwɔlɔ ni baanyɛ afee nɔ ni yɔɔ sɔrɔto yɛ lɛ diɛŋtsɛ enɔ he lɛ, Mɔ pɛ ni baanyɛ ‘ajie kpulu’ lɛ, hiɛ.

Kɛkɛ ni beni ebɛŋkɛ gbele lɛ, Yesu bo waa akɛ: “Mi-Nyɔŋmɔ, mi-Nyɔŋmɔ, mɛɛba okwa mi?” (Marko 15:​34) Namɔ Yesu boɔ etsɛɔ lɛ lɛ? Eetsɛ lɛ diɛŋtsɛ ehe loo efa ko? Yɛ anɔkwale mli lɛ, nakai bolɔmɔ, “Mi-Nyɔŋmɔ,” lɛ jɛɛɛ mɔ ko ni buɔ ehe akɛ Nyɔŋmɔ lɛ ŋɔɔ. Ni eji Yesu ji Nyɔŋmɔ kulɛ, belɛ namɔ kwaa lɛ lɛ? Lɛ diɛŋtsɛ eekwa ehe? Jwɛŋmɔ baŋ enɛ mli. Yesu kɛɛ hu akɛ: “Ataa, odɛŋ mituɔ mimumɔ miwoɔ nɛɛ.” (Luka 23:​46) Kɛ Yesu ji Nyɔŋmɔ lɛ, belɛ mɛɛ yiŋtoo hewɔ etuɔ emumɔ ewoɔ Tsɛ lɛ dɛŋ lɛ?

Beni Yesu gbo lɛ, ehi gbonyo bu mli gbii etɛ mli fai komɛi. Kɛ eji Nyɔŋmɔ lɛ, belɛ Habakuk 1:​12, (NW ) jeee anɔkwale beni ekɛɔ akɛ: “Oo mi-Nyɔŋmɔ, mi-Mɔ Krɔŋkrɔŋ, ogbooo” lɛ. Shi Biblia lɛ kɛɔ akɛ Yesu gbo ni eleee nɔ ko nɔ ko yɛ gbonyo bu mli. Ni namɔ tee Yesu shi kɛjɛ gbohii ateŋ? Kɛ egbo lɛlɛŋ lɛ, belɛ enyɛŋ etee lɛ diɛŋtsɛ ehe shi. Yɛ gbɛ kroko nɔ lɛ, kɛ egboko diɛŋtsɛ lɛ, belɛ kwa ni ekwa efee akɛ egbo lɛ woŋ kpɔmɔ nɔ he nyɔmɔ kɛha Adam esha lɛ. Shi etsɔ egbele diɛŋtsɛ lɛ nɔ ewo nyɔmɔ lɛ fɛɛ. No hewɔ lɛ, “Nyɔŋmɔ [ji mɔ ni] tee lɛ [Yesu] shi ni efɛne gbele piŋmɔi lɛ.” (Bɔfoi lɛ Asaji 2:​24) Nyɔŋmɔ Ofe lɛ ni nɔ kwɔ lɛ tee etsulɔ Yesu ni baa shi lɛ shi kɛjɛ gbohii ateŋ.

Ani Yesu nyɛmɔ ni eyɔɔ akɛ mɔ ni feɔ naakpɛɛ nii, tamɔ gbohii ni eteeɔ amɛ shi lɛ tsɔɔ akɛ eji Nyɔŋmɔ? Ojogbaŋŋ, bɔfoi lɛ kɛ gbalɔi Elia kɛ Elisha hu yɛ nakai hewalɛ lɛ, shi enɛ efeee amɛ mɛi ni fe gbɔmɛi. Nyɔŋmɔ kɛ hewalɛ ni akɛfeɔ naakpɛɛ nii lɛ ha gbalɔi lɛ, Yesu kɛ bɔfoi lɛ koni ekɛtsɔɔ akɛ Lɛ ji mɔ ni fiɔ amɛsɛɛ. Shi enɛ efeee amɛteŋ mɔ ko mɛi pii ni yɔɔ Nyɔŋmɔ-su kome mli lɛ fa.

Yesu Nilee Yashɛɔ He Ko

BENI Yesu kɛ egbalɛ ni kɔɔ nibii agbɛjianɔtoo nɛɛ naagbee lɛ he lɛ ha lɛ, ekɛɛ: “Shi no gbi lɛ kɛ no ŋmlɛtswaa lɛ, mɔ ko mɔ ko leee; ŋwɛibɔfoi lɛ hu leee, ni Bi lɛ tete leee, ja Tsɛ lɛ kome kɛkɛ.” (Marko 13:​32) Eji Yesu ji Bi fa ni kɛ Nyɔŋmɔ-su lɛ yeɔ egbɔ kulɛ, ebaale nɔ ni Tsɛ lɛ le lɛ. Shi Yesu leee, ejaakɛ ekɛ Nyɔŋmɔ yeee egbɔ.

Nakai nɔŋŋ hu wɔkaneɔ yɛ Hebribii 5:⁠8 akɛ Yesu “kase toiboo yɛ amanehului ni ena lɛ amli.” Ani ooonyɛ osusu Nyɔŋmɔ ni esa akɛ ekase nɔ ko lɛ he? Dabi, shi Yesu kase nii, ejaakɛ eleee nɔ fɛɛ nɔ ni Nyɔŋmɔ le lɛ. Ni esa akɛ ekase nɔ ko ni ehe ehiaaa ni Nyɔŋmɔ akase​—toiboo. Ehe ehiaaa ni Nyɔŋmɔ afee toiboo aha mɔ ko.

Sɔrɔto-feemɔ ni ka nɔ ni Nyɔŋmɔ le kɛ nɔ ni Kristo le lɛ teŋ lɛ tee nɔ yɛ be mli ni atee Yesu shi kɛtee ŋwɛi koni ekɛ Nyɔŋmɔ ayahi shi lɛ. Kadimɔ Biblia mli naagbee wolo lɛ klɛŋklɛŋ wiemɔi nɛɛ: “Yesu Kristo kpojiemɔ ni Nyɔŋmɔ ŋɔha lɛ.” (Kpojiemɔ 1:⁠1) Eji Yesu diɛŋtsɛ ji Nyɔŋmɔ-su ko fa kulɛ, ani ehe baahia ni Nyɔŋmɔ-su lɛ fa ko​—Nyɔŋmɔ, kɛ kpojiemɔ aha lɛ? Kulɛ eka shi faŋŋ akɛ ebaale fɛɛ, ejaakɛ Nyɔŋmɔ le. Shi Yesu leee, ejaakɛ ejeee Nyɔŋmɔ.

Yesu Yaa nɔ Ebaa Ehe Shi

YESU baa ehe shi ehaa Nyɔŋmɔ yɛ be mli ni ebako shikpɔŋ lɛ nɔ kɛ agbɛnɛ yɛ sɛɛ mli beni eba lɛ fɛɛ. Etee nɔ eba ehe shi akɛ mɔ ni ji enyɔ yɛ eshitee lɛ sɛɛ po.

Yɛ be mli ni Petro kɛ mɛi ni fata ehe lɛ wieɔ Yesu shitee lɛ he lɛ, ekɛɛ Yudafoi akuashɔŋ lɛ akɛ: “Lɛ [ Yesu] enɔ Nyɔŋmɔ wo kɛtee eninejurɔ nɔ.” (Bɔfoi lɛ Asaji 5:​31) Paulo kɛɛ: “Nyɔŋmɔ wo enɔ gojoo.” (Filipibii 2:⁠9) Eji Yesu ji Nyɔŋmɔ kulɛ, te aaafee tɛŋŋ ni aaawo Yesu nɔ, ni ji akɛ, ni aaawo enɔ gojoo fe gbɛhe ni enaa mli ŋɔɔmɔ yɛ tsutsu lɛ hu? Kulɛ eji Triniti ni awo nɔ lɛ fa momo. Ni kɛji akɛ dani aaawo enɔ lɛ, Yesu kɛ Nyɔŋmɔ yeɔ egbɔ kulɛ, enɔwomɔ ekoŋŋ lɛ baaha efee mɔ ni nɔ kwɔ fe Nyɔŋmɔ.

Paulo hu kɛɛ akɛ Kristo bote “ŋwɛi diɛŋtsɛ . . . koni agbɛnɛ eyapue yɛ Nyɔŋmɔ hiɛ eha wɔ.” (Hebribii 9:​24) Kɛ oyapue yɛ mɔ ko hiɛ lɛ, te ooofee tɛŋŋ ofee nakai mɔ lɛ nɔŋŋ? Onyɛŋ. Ja ofee mɔ kroko ni esoro bo.

Nakai nɔŋŋ hu dani aaatswia Stefano, la odasefonyo lɛ tɛi ni egbo lɛ, “ekwɛ ŋwɛi gãa, ni ena Nyɔŋmɔ anunyam lɛ, kɛ Yesu ni edamɔ Nyɔŋmɔ ninejurɔ nɔ.” (Bɔfoi lɛ Asaji 7:​55) Eka shi faŋŋ akɛ ena gbɔmɛi sɔrɔtoi enyɔ​—shi enaaa mumɔ krɔŋkrɔŋ, ni enaaa Triniti Nyɔŋmɔ-su ko hu.

Yɛ Kpojiemɔ 4:⁠8 kɛyashi 5:⁠7 sane lɛ mli lɛ, ana ni Nyɔŋmɔ ta eŋwɛi maŋtsɛsɛi lɛ nɔ, shi anaaa Yesu nakai. Esa akɛ ebɛŋkɛ Nyɔŋmɔ ni ehe wolo kɛjɛ Nyɔŋmɔ ninejurɔ dɛŋ. Enɛ tsɔɔ akɛ Yesu jeee Nyɔŋmɔ yɛ ŋwɛi, esoro lɛ yɛ Nyɔŋmɔ he.

Nɔ ni kɛ enɛ kpaa gbee lɛ, Bulletin of the John Rylands Library ni yɔɔ Manchester, England, lɛ kɛɛ: “Beni atee Yesu shi kɛtee ŋwɛi wala mli lɛ sɛɛ lɛ, ajieɔ lɛ kpo yɛ nɔ fɛɛ nɔ mli akɛ mɔ aŋkro ni esoro lɛ kwraa yɛ Nyɔŋmɔ he yɛ nɔ fɛɛ nɔ mli taakɛ Yesu ji yɛ shikpɔŋ nɔ akɛ mɔ ni jɛ ŋwɛi ba lɛ. Beni eyɔɔ Nyɔŋmɔ masɛi kɛ agbɛnɛ yɛ be mli ni akɛ lɛ toɔ ehe lɛ, ejeɔ kpo kwraa akɛ ŋwɛi bɔɔ nɔ kroko yɛ Nyɔŋmɔ ŋwɛi gwabɔɔ lɛ mli, taakɛ ŋwɛibɔfoi lɛ ji lɛ​—eyɛ mli akɛ, akɛ Nyɔŋmɔ Bi lɛ, edamɔ gbɛhe kroko mli, ni enɔ kwɔ kwraa fe amɛ.”​—Okɛto Filipibii 2:​11 he.

Bulletin lɛ hu kɛɛ akɛ: “Shi kɛlɛ, nɔ ni awieɔ yɛ eshihilɛ kɛ enitsumɔi ahe akɛ ŋwɛi Kristo lɛ etsɔɔɔ akɛ yɛ eŋwɛi gbɛhe mli lɛ ekɛ Nyɔŋmɔ diɛŋtsɛ yeɔ egbɔ, ni eji Nyɔŋmɔ kwraa. Nɔ ni tamɔɔɔ nakai lɛ, bɔ ni Kpaŋmɔ Hee lɛ feɔ ehe mfoniri akɛ ŋwɛi bɔɔ nɔ kɛ enitsumɔ haa wɔnaa mɔ ko ni esoro lɛ kwraa ni yɔɔ Nyɔŋmɔ shishi hu.”

Yesu baaya nɔ afee mɔ ni esoro lɛ kwraa, Nyɔŋmɔ tsulɔ ni yɔɔ eshishi yɛ ŋwɛi yɛ naanɔ wɔsɛɛ be ni baa lɛ fɛɛ mli. Biblia lɛ wie he yɛ nɛkɛ gbɛ nɔ: “No sɛɛ dani naagbee lɛ baaba, beni [Yesu ni yɔɔ ŋwɛi lɛ] eeeŋɔ maŋtsɛyeli lɛ eha Nyɔŋmɔ kɛ Tsɛ lɛ . . . Kɛkɛ lɛ Bi lɛ diɛŋtsɛ hu aaaŋɔ ehe eto Mɔ ni ŋɔ nii fɛɛ to eshishi lɛ shishi, koni Nyɔŋmɔ afee nibii fɛɛ ayitso.”​—1 Korintobii 15:​24, 28, NJB.

Yesu Ekɛko Dã akɛ Eji Nyɔŋmɔ

BIBLIA lɛ shidaamɔ yɛ faŋŋ. Jeee akɛ Nyɔŋmɔ Ofe lɛ, Yehowa, ji mɔ diɛŋtsɛ ni esoro lɛ yɛ Yesu he kɛkɛ, shi Lɛ ji eyitso yɛ be fɛɛ mli. Awieɔ Yesu he yɛ be fɛɛ mli akɛ mɔ ni baa shi ni esoro lɛ, Nyɔŋmɔ tsulɔ ni baa ehe shi. No hewɔ ni Biblia lɛ kɛɔ yɛ faŋŋ mli akɛ “Kristo yitso ji Nyɔŋmɔ” tamɔ bɔ ni “nuu fɛɛ nuu yitso ji Kristo” lɛ. (1 Korintobii 11:⁠3) Ni enɛ hewɔ ni Yesu diɛŋtsɛ kɛɛ: “Mi-Tsɛ da fe mi.”​—Yohane 14:⁠28.

Anɔkwa sane lɛ ji akɛ Yesu jeee Nyɔŋmɔ ni ekɛko da akɛ nakai eji. Woloŋlelɔi babaoo miiyoo enɛ agbɛnɛ. Taakɛ Rylands Bulletin lɛ kɛɔ lɛ: “Esa akɛ akpɛlɛ anɔkwa sane lɛ nɔ akɛ Kpaŋmɔ Hee lɛ mlipɛimɔ ni afee aaafee afii nyɔŋmai etɛ loo nyɔŋmai ejwɛ ni eho nɛ lɛ miinyiɛ Kpaŋmɔ Hee lɛ he nilelɔi babaoo ni ehe gbɛi lɛ ahiɛ kɛmiimu sane naa akɛ eka shi faŋŋ akɛ . . . Yesu heee lɛ diɛŋtsɛ ehe eyeee akɛ eji Nyɔŋmɔ.”

Bulletin lɛ hu wieɔ klɛŋklɛŋ afii oha lɛ mli Kristofoi lɛ ahe akɛ: “No hewɔ lɛ beni akɛ sabalai ni woo yɔɔ mli tamɔ Kristo, gbɔmɔ Bi, Nyɔŋmɔ Bi kɛ Nuŋtsɔ ha [Yesu] lɛ, enɛɛmɛi jeee gbɛi ni atsɔɔ nɔ akɛɔ akɛ eji Nyɔŋmɔ, shi moŋ akɛ etsu Nyɔŋmɔ nitsumɔ lɛ.”

No hewɔ lɛ jamɔ mli woloŋlelɔi komɛi kpɛlɛɔ nɔ akɛ, jwɛŋmɔ ni ahiɛ akɛ Yesu ji Nyɔŋmɔ lɛ teɔ shi ewoɔ Biblia mli odaseyelii lɛ fɛɛ. Yɛ Biblia lɛ mli lɛ, Nyɔŋmɔ ji mɔ ni nɔ kwɔ fe fɛɛ, ni Yesu ji etsulɔ ni yɔɔ eshishi.

[Wiemɔ ni akɔ ni akɛmiitsu nii ni yɔɔ baafa 19]

‘Kpaŋmɔ Hee lɛ mli nibii amlipɛimɔ enyiɛ woloŋlelɔi pii ahiɛ ni amɛmu sane naa akɛ Yesu heee eyeee akɛ lɛ ji Nyɔŋmɔ.’​—Bulletin of the John Rylands Library

[Mfoniri ni yɔɔ baafa 17]

Yesu kɛɛ Yudafoi lɛ akɛ: “Jeee mi diɛŋtsɛ misuɔmɔnaa nifeemɔ hewɔ mijɛ ŋwɛi miba, shi moŋ mɔ ni tsu mi lɛ suɔmɔnaa nifeemɔ.”​—Yohane 6:⁠38

[Mfoniri ni yɔɔ baafa 18]

Beni Yesu bolɔ akɛ: “Mi-Nyɔŋmɔ, mi-Nyɔŋmɔ, mɛɛba okwa mi?” lɛ, yɛ anɔkwale mli lɛ eheee eyeee akɛ lɛ diɛŋtsɛ ji Nyɔŋmɔ lɛ