Biblia Mli Wolo ni Ji 62—1 Yohane

Mɔ ni Ŋma: Bɔfo Yohane

Heni Aŋma Yɛ: Efeso aloo he ko ni bɛŋkɛ jɛmɛ

Be ni Aŋma Agbe Naa: Aaafee afi 98 Ŋ.B.

YOHANE, ni ji kaselɔ ni Yesu Kristo sumɔɔ esane waa lɛ sumɔɔ jalɛnifeemɔ waa diɛŋtsɛ. Enɛ ha ená sɛɛyoomɔ yɛ bɔ ni Yesu susuɔ nii ahe ehaa lɛ he. No hewɔ lɛ efeee wɔ naakpɛɛ akɛ suɔmɔ ji nɔ titrii ni ewie he yɛ woji ni eŋmala lɛ amli. Shi kɛlɛ ejeee mɔ ko ni haa henumɔ kudɔɔ enifeemɔ ejaakɛ Yesu wie ehe akɛ “nyɔŋmɔshiimɔ bii [Boanerges]” lɛ ateŋ mɔ kome. (Mar. 3:17) Anɔkwa sane ji akɛ, eŋmala ewoji etɛ lɛ kɛfã anɔkwale kɛ jalɛnifeemɔ he, ejaakɛ no mli lɛ hemɔkɛyeli kwamɔ ni bɔfo Paulo gba fɔ̃ shi akɛ ebaaba lɛ miiya nɔ. Yohane woji etɛ ni eŋmala lɛ fɛɛ yɛ amɛbe naa, ejaakɛ atsɔ nɔ ni awo mra be mli Kristofoi lɛ hewalɛ bɔni afee ni amɛnyɛ amɛwu ashi “mɔ fɔŋ lɛ” tutuamɔi lɛ.—2 Tes. 2:3, 4; 1 Yoh. 2:13, 14; 5:18, 19.

² Kɛ́ akwɛ saji ni yɔɔ mli lɛ, abaanyɛ ana akɛ aŋmala Mateo kɛ Marko Sanekpakpai lɛ kwraa dani aŋmala woji nɛɛ—kɛ agbɛnɛ hu lɛ woji ni Petro kɛ Paulo ŋmala beni amɛyɔɔ maŋsɛɛ lɛ. Bei tsake yɛ nakai beaŋ. Atsĩii Yudafoi ajamɔ ní ji hegbeyeiwoo nɔ̃ kpele kɛha asafoi ni kpaako atoɔ shishi lɛ tã; ni etamɔ nɔ ni nɔ ko kwraa bɛ ni tsɔɔ akɛ atsĩ tã tɛ̃ɛ shikome po yɛ Hebri Ŋmalɛi lɛ amli. Yɛ no najiaŋ lɛ, Yohane wie “naagbee ŋmɛlɛtswaa lɛ” kɛ “antikristoi pii” moŋ ni baapue lɛ ahe. (1 Yoh. 2:18) Ewie etoibolɔi lɛ ahe beni ekɛ wiemɔ ni ji “mibii bibii” lɛ tsu nii ní ewie ehe akɛ “onukpa lɛ.” (1 Yoh. 2:1, 12, 13, 18, 28; 3:7, 18; 4:4; 5:21; 2 Yoh. 1; 3 Yoh. 1) Enɛ fɛɛ tsɔɔ akɛ eŋmala ewoji lɛ yɛ be ko sɛɛ. Agbɛnɛ hu, 1 Yohane 1:3, 4 miitao atsɔɔ akɛ aŋma Yohane Sanekpakpa lɛ yɛ nakai be lɛ nɔŋŋ mli. Aheɔ ayeɔ akɛ Yohane gbe ewoji etɛ lɛ ŋmaa naa aaafee afi 98 Ŋ.B., no sɛɛ etsɛɛɛ tsɔ ni bɔfo lɛ gbo lɛ, ni ákɛ aŋmala woji nɛɛ yɛ he ko ni bɛŋkɛ Efeso.

³ Yohane ji mɔ ni ŋma Yohane Klɛŋklɛŋ Wolo lɛ ejaakɛ emli wiemɔi lɛ je Sanekpakpa ni ji ejwɛ lɛ ni ŋwanejee ko kwraa bɛ he akɛ Yohane ni ŋma emli wiemɔi lɛ. Ákɛ nɔkwɛmɔnɔ lɛ, eje Yohane Klɛŋklɛŋ Wolo lɛ shishi kɛ wiemɔi nɛɛ akɛ ekɛ ehiŋmɛi na “wala wiemɔ lɛ . . . , naanɔ wala lɛ, nɔ ni kɛ tsɛ lɛ yɔɔ ni ejie ehe kpo etsɔɔ wɔ lɛ,” ni wiemɔi nɛɛ je wiemɔi ni Yohane kɛje e-Sanekpakpa lɛ shishi lɛ. Woloŋmalɔi tamɔ Irenaeus, Polycarp, kɛ Papias ni hi shi yɛ afi 100 Ŋ.B. afii lɛ amli lɛ kɛ Muratori Wolo lɛ kpɛlɛ nɔ akɛ Yohane Klɛŋklɛŋ Wolo lɛ fata Biblia mli woji lɛ ahe.a Eusebius (ni hi shi kɛjɛ aaafee afi 260-342 Ŋ.B.) bɔ amaniɛ akɛ mɔ fɛɛ mɔ kpɛlɛ nɔ akɛ Yohane Klɛŋklɛŋ Wolo lɛ fata Biblia mli woji lɛ ahe.b Shi esa akɛ wɔkadi akɛ yɛ Bibliai ni etsɛ waa ni yɔɔ wiemɔi komɛi amli lɛ mli lɛ, akɛ saji komɛi efata he yɛ yitso 5 lɛ kuku 7 lɛ naagbee kɛ kuku 8 shishijee, akɛ “Yɛ ŋwɛi lɛ: Tsɛ lɛ, wiemɔ lɛ, kɛ Mumɔ krɔŋkrɔŋ lɛ, ni mɛi etɛ nɛɛ ekomeŋ. Ni mɛi etɛ ji mɛi ni yeɔ odase yɛ shikpɔŋ lɛ nɔ lɛ.” (Ga Biblia Momo lɛ) Shi saji nɛɛ bɛ Hela wiemɔ lɛ mli wolokpoi ni akɛ niji ŋmala ni etsɛ waa lɛ amli ni ekã shi faŋŋ akɛ mɛi komɛi ni miitao amɛfa Triniti tsɔɔmɔ lɛ he lɛ ju shi ni amɛkɛ wo mli. Ŋmɛnɛŋmɛnɛ beaŋ Bibliai ni yɔɔ wiemɔi srɔtoi amli ni Katolikbii kɛ Protestantbii fee lɛ ateŋ babaoo yɛ ni ajie sane nɛɛ yɛ mli.—1 Yoh. 1:1, 2.c

⁴ Yohane ŋma ‘esuɔmɔ mɛi’ ni ji ‘ebii’ lɛ koni ebu amɛhe kɛjɛ “antikristoi pii” ni shi amɛteŋ ni miibɔ mɔdɛŋ ni amɛlaka amɛ kɛ amale tsɔɔmɔi ni baaha amɛkpoo anɔkwale lɛ he. (2:7, 18) Ekolɛ Helabii anilee ni blema Gnostic jamɔ ni emli bii lɛ heɔ amɛyeɔ akɛ amɛná teemɔŋ saji amli nilee kɛjɛ Nyɔŋmɔ ŋɔɔ fata he lɛ ná hemɔkɛyeli kwalɔi ni ji antikristoi nɛɛ anɔ hewalɛ.d Yohane gbala saneyitsei etɛ ni ji esha, suɔmɔ kɛ antikristo lɛ mli fitsofitso ni ekɛ ekãa pii wie eshi hemɔkɛyeli kwamɔ. Nɔ ni Yohane ŋma yɛ esha he kɛ wiemɔi ni ekɛfi Yesu afɔleshaa kɛha esha lɛ sɛɛ lɛ tsɔɔ akɛ antikristoi ni ewie amɛhe lɛ buɔ amɛhe jalɔi fe nine ni amɛwieɔ akɛ esha bɛ amɛhe ni Yesu kpɔmɔ afɔleshaa lɛ he ehiaaa amɛ. ‘Amɛnilee’ ni haa amɛgbalaa mɛi ajwɛŋmɔ kɛbaa amɛnɔ lɛ eha amɛtsɔmɔ ŋkomeŋfatsɛmɛi kɛ mɛi ni bɛ suɔmɔ, ni Yohane ha anɔkwa sane nɛɛ fee faŋŋ beni eyaa nɔ emaa Kristofoi asuɔmɔ diɛŋtsɛ lɛ nɔ mi lɛ. Kɛfata he lɛ, ekolɛ Yohane miiwie eeshi amale tsɔɔmɔi ni antikristoi lɛ tsɔɔ beni egbala mli akɛ Yesu ji Kristo lɛ, ni akɛ ehi shi yɛ mumɔŋ dani abafɔ lɛ akɛ gbɔmɔ ni akɛ eba yɛ heloo mli akɛ Nyɔŋmɔ Bi koni anyɛ ahere mɛi ni baahe lɛ aye lɛ. (1:7-10; 2:1, 2; 4:16-21; 2:22; 1:1, 2; 4:2, 3, 14, 15) Yohane tsɛ apasa tsɔɔlɔi nɛɛ yɛ faŋŋ mli akɛ amɛji “antikristoi” ni etsɔɔ gbɛi srɔtoi ni abaanyɛ atsɔ nɛ ayoo mɛi ni ji Nyɔŋmɔ bii kɛ mɛi ni ji Abonsam bii.—2:18, 22; 4:3.

⁵ Eeenyɛ efee akɛ aŋma wolo nɛɛ kɛha Kristofoi fɛɛ ejaakɛ atsĩii asafo pɔtɛɛ ko tã akɛ amɛ aŋma aha. Yiŋtoo kroko hewɔ ni eeenyɛ efee akɛ nakai ji sane lɛ ji ákɛ akɛ ŋamɔi kpaaa sane lɛ hiɛ ni akɛmuuu naa hu. Mɛi komɛi etsɔɔ mli akɛ ejeee wolo kɛkɛ ni aŋma mɛi shi eji wolo krɛdɛɛ ko ni miiwie saneyitso pɔtɛɛ ko he. Wiemɔ ni ji “nyɛ” (akɛ niŋmaa okadii wuji eŋma enɛ yɛ New World Translation lɛ mli kɛtsɔɔ ákɛ akɛ mɛi pii miiwie) ni akɛtsu nii yɛ wolo nɛɛ mli lɛ tsɔɔ akɛ mɔ ni ŋma lɛ kɛ kuu ko miiwie shi jeee mɔ aŋkro ko.

NƆ HEWƆ NI EHE YƆƆ SƐƐNAMƆ

¹¹ Taakɛ ehe bahia ni abɔ anɔkwa Kristofoi akɔkɔ yɛ “antikristoi pii” lɛ ahe beni Ŋmɛnɛŋmɛnɛ Beaŋ klɛŋklɛŋ afi 100 lɛ baa naagbee lɛ, nakai nɔŋŋ eji ŋmɛnɛ hu. Esa akɛ anɔkwa Kristofoi ahiɛ ‘sane ni amɛnu kɛjɛ shishijee akɛ amɛsumɔsumɔɔ amɛhe’ lɛ mli ni awa ní amɛkɛ Nyɔŋmɔ afee ekome ni amɛkakpoo anɔkwa tsɔɔmɔ lɛ ni tsɔɔ akɛ amɛhi shi yɛ jalɛ naa ni amɛkɛ ekãa awie. (2:18; 3:11; 2:27-29) Kɔkɔbɔi ni he hiaa waa lɛ ateŋ ekome hu ji nɔ ni kɔɔ “heloo lɛ sɛɛdii nii lɛ kɛ hiŋmɛii lɛ asɛɛdii nii lɛ kɛ shihilɛ lɛ mli hewoo lɛ” ni ji heloonaa nibii asɛɛtiumɔ kɛ nibii fɔji ni ehe shi yɛ je lɛŋ ni ená mɛi ni kɛɔ akɛ Kristofoi ji amɛ lɛ ateŋ mɛi babaoo nɔ hewalɛ lɛ. Anɔkwa Kristofoi tsiɔ amɛhe kɛjɛɔ je lɛ kɛ emli sɛɛdii nii lɛ ahe ejaakɛ amɛle akɛ “mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.” Sɛɛnamɔ yɛ he waa akɛ wɔɔkase Ŋmalɛi ni ajɛ mumɔŋ aŋma lɛ koni wɔle Nyɔŋmɔ suɔmɔnaa nii lɛ ni wɔhi shi yɛ naa ejaakɛ je lɛ mli sɛɛdii nii lɛ, jamɔŋ mligbalamɔ kɛ nyɛɛ ehe shi waa yɛ wɔgbii nɛɛ amli!—2:15-17.

¹² Wɔsɛɛnamɔ hewɔ ni Yohane Klɛŋklɛŋ Wolo lɛ haa wɔnaa srɔtofeemɔ ni yɔɔ la ni jɛɔ Tsɛ lɛ ŋɔɔ kɛ duŋ ni jɛɔ abonsam ŋɔɔ ni fiteɔ anɔkwale lɛ teŋ faŋŋ, wɔnaa srɔtofeemɔ ni yɔɔ Nyɔŋmɔ tsɔɔmɔi ni haa anáa wala kɛ antikristo lɛ amalei lɛ teŋ, ni wɔnaa srɔtofeemɔ ni yɔɔ suɔmɔ ni mɛi ni kɛ Tsɛ lɛ kɛ Bi lɛ efee ekome lɛ asafo lɛ yɔɔ kɛ nyɛ̃ɛ ni tamɔ Kain nɔ lɛ ni kpataa mɔ hiɛ ni mɛi ni ‘jɛ wɔteŋ amɛtee, beni afee ni amɛjie amɛhe shi akɛ jeee amɛ fɛɛ amɛji wɔteŋ mɛi komɛi’ lɛ yɔɔ lɛ teŋ. (2:19; 1:5-7; 2:8-11, 22-25; 3:23, 24, 11, 12) Akɛni wɔhiɛ esɔ enɛ hewɔ lɛ, esa akɛ wɔshwe waa koni ‘wɔye je lɛ nɔ kunim.’ Mɛɛ gbɛ nɔ wɔbaanyɛ wɔtsɔ wɔfee enɛ? Kɛtsɔ hemɔkɛyeli ni mli wa ni wɔɔná kɛ “Nyɔŋmɔ suɔmɔ lɛ” ni tsɔɔ emlai lɛ anɔyeli lɛ ni wɔɔná.—5:3, 4.

¹³ Kwɛ bɔ ni ama hewalɛ ni kanyaa mɔ ni ji “Nyɔŋmɔ suɔmɔ lɛ” nɔ mi yɛ Yohane Klɛŋklɛŋ Wolo lɛ mli fɛɛ! Atsɔɔ wɔ srɔtofeemɔ agbo ni yɔɔ je lɛ suɔmɔ lɛ kɛ Tsɛ lɛ suɔmɔ lɛ teŋ lɛ yɛ yitso 2 lɛ mli. Sɛɛ mli lɛ aha wɔle akɛ “Nyɔŋmɔ lɛ, suɔmɔ ji lɛ.” (4:8, 16) Ni mɛɛ suɔmɔ kpakpa po eji nɛkɛ! Ajie enɛ kpo jogbaŋŋ kɛtsɔ tsu ni Tsɛ lɛ tsu “ebi lɛ akɛ je lɛ yiwalaherelɔ” lɛ nɔ. (4:14) Esa akɛ enɛ atsirɛ wɔ koni wɔná suɔmɔ ni baaha wɔhiɛ asɔ nii ni wɔkashe gbeyei, ní ekɛ bɔfo lɛ wiemɔi lɛ akpã gbee akɛ: “Wɔsumɔɔ lɛ, ejaakɛ lɛ tsutsu esumɔ wɔ.” (4:19) Esa akɛ suɔmɔ ni wɔyɔɔ lɛ afee tamɔ Tsɛ lɛ kɛ Bi lɛ suɔmɔ lɛ nɔŋŋ—suɔmɔ kpakpa ni haa akɛ he shãa afɔle. Taakɛ Yesu kɛ esusuma ŋmɛ shi eha wɔ lɛ, nakai nɔŋŋ “sa akɛ wɔ hu wɔkɛ wɔwala ŋmɛɔ shi yɛ wɔnyɛmimɛi ahewɔ,” ní wɔmli ahi aha mɛi koni wɔkasumɔ wɔnyɛmimɛi lɛ yɛ wiemɔ pɛ mli, shi moŋ “yɛ nitsumɔ kɛ anɔkwale mli.” (3:16-18) Taakɛ Yohane wolo ni eŋma lɛ tsɔɔ mli faŋŋ lɛ, suɔmɔ nɛɛ kɛ Nyɔŋmɔ he anɔkwa nilee ji nɔ ni feɔ mɛi ni yaa nɔ amɛkɛ Nyɔŋmɔ nyiɛɔ lɛ ekome ni ehaa amɛkɛ Tsɛ lɛ kɛ Bi lɛ náa wekukpãa ni mli wa. (2:5, 6) Maŋtsɛyeli lɛ he niyelɔi ni suɔmɔ tsakpãa kpakpa tamɔ nɛkɛ yɔɔ amɛteŋ lɛ ahe ni Yohane wie akɛ: “Ni wɔyɛ anɔkwafo lɛ mli, yɛ ebi Yesu Kristo lɛ mli; mɔnɛ ji anɔkwa Nyɔŋmɔ lɛ kɛ naanɔ wala lɛ.”—5:20.

[Shishigbɛ niŋmai]