1. Mɛni hewɔ Yuda tsake yiŋtoo hewɔ ni eŋmaa wolo eyaha enanemɛi Kristofoi lɛ mli lɛ?

AFII ohai nyɔŋma kɛ nɛɛhu ni eho nɛ lɛ, kaselɔ Yuda to eyiŋ akɛ ebaaŋma enanemɛi heyelilɔi lɛ yɛ ‘yiwalaheremɔ ni amɛ fɛɛ amɛhiɛ mli lɛ he.’ Shi ebana akɛ ehe miihia ni ewo amɛ hewalɛ ni amɛpele “hemɔkɛyeli ni atu awo krɔŋkrɔŋ bii lɛ adɛŋ shikome nyɔŋlo lɛ he waa.” Mɛni hewɔ? Ejaakɛ “nɔshafeelɔi” komɛi eju shi amɛbote asafo lɛ mli ni “amɛŋɔɔ wɔ-Nyɔŋmɔ duromɔ lɛ amɛbɔɔ nyenyeŋtswi.”​—Yuda 3, 4.

 2. Eyɛ mli akɛ yiwalaheremɔ he sane lɛ he susumɔ ŋɔɔ moŋ, shi yɛ bei komɛi amli lɛ, mɛni ji nɔ ni esa akɛ wɔtsɔ sɔlemɔ nɔ wɔsusu he?

² Kwɛ miishɛɛ ni enɛ ji akɛ wɔ fɛɛ wɔɔsusu yiwalaheremɔ ni wɔhiɛ mli lɛ he! Nakai sane lɛ nɔjwɛŋmɔ haa mɔ tsui nyɔɔ emli babaoo, ni wɔmli filiɔ wɔ yɛ be mli ni wɔkpaa nakai yiwalaheremɔ he jɔɔmɔi lɛ fɛɛ gbɛ lɛ. Shi kɛlɛ, bei komɛi shɛɔ ni yɛ be mli ni esa akɛ wɔwie yiwalaheremɔ he moŋ lɛ, wɔnaa ni ebi ni wɔsusu saji krokomɛi ni hiɛdɔɔ yɔɔ mli lɛ ahe. Kɛji akɛ ajajeee nɛkɛ nibii nɛɛ lɛ, ebaanyɛ efite wɔhemɔkɛyeli, ebaaha wala he foidamɔ lɛ aje wɔdɛŋ. Taakɛ bɔ ni Yuda kɔkɔbɔɔ ni ekɛshiɔ nyenyeŋtswibɔɔ lɛ mli wa waa lɛ, nakai nɔŋŋ ŋmɛnɛ, esa akɛ Kristofoi atsɔ sɔlemɔ nɔ amɛsusu Ŋmalɛ mli ŋaawoo ni kɔɔ mɔ he tɛ̃ɛ aloo ekɔɔ sane ko he tɛ̃ɛ lɛ he.

Mɛi Krokomɛi Ahe Eshai

 6, 7. Efɔŋfeelɔi nɛɛ ateŋ mɛi komɛi bɔɔ mɔdɛŋ ni amɛtsɔ mɛi komɛi ayiŋ yɛ mɛɛ gbɛ nɔ?

⁶ Shi eka shi faŋŋ akɛ etamɔ nɔ ni mɛi komɛi ni sumɔɔ nɔ ni ja lɛ eŋmɛ gbɛ ni amɛtsui elaka amɛ, ejaakɛ amɛtamɔɔɔ mɛi ni nyɛɔ efɔŋ. (Lala 97:​10; Amos 5:15) Nɔ ni jɛɔ mli baa ji akɛ amɛkɛ amɛhe woɔ nibii ni ji eshafeemɔ mli ni amɛhiɛɛɛ ta ni awuɔ koni amɛfee nɔ ni ja lɛ mli. Yɛ bei komɛi amli lɛ, amɛbaaya shɔŋŋ po ni amɛha mɛi komɛi afata amɛhe yɛ amɛnɔfɔŋfeemɔ gbɛ lɛ nɔ. Kwɛ bɔ ni ehe hiaa akɛ wɔɔkpoo nɛkɛ susumɔi nɛɛ!​—Okɛto Abɛi 1:​10-15 he.

⁷ Yɛ bei komɛi amli lɛ, eka shi faŋŋ akɛ mɛi ni enyɛɛɛ efɔŋ lɛ wieɔ dɔkɔbii akɛ ehaa efɔŋ ni aaasumɔ akɛ afee teɔ shi yɛ mɛi ni boɔ amɛtoi lɛ atsui amli. Ekolɛ amɛwoɔ amɛ hewalɛ ni amɛkɛ amɛhe awo jeŋba shara mli aloo nifeemɔ ko ni bɛŋkɛɔ jeŋba ko ni Nyɔŋmɔ ekpɛlɛɛɛ nɔ lɛ mli. Aloo amɛbaawo mɔ ko hewalɛ ni ekɛ ehe awo shihilɛ ni kɛ oshara diɛŋtsɛ baa emumɔŋ shihilɛ nɔ lɛ mli. Mɛi ni bɔɔ mɔdɛŋ ni amɛtsɔ mɛi ayiŋ nɛkɛ lɛ baakɛɛ akɛ Yehowa ji suɔmɔ Nyɔŋmɔ ni ebaana mɛi ni feɔ esha lɛ mɔbɔ. Nɛkɛ tsuiŋ kutumpɔo nɛɛ baanyɛ afite nii kɛya naanɔ. (Yeremia 17:9; Yuda 4) Yɛ anɔkwale mli lɛ, esa akɛ ‘wɔkɔ wɔnaji kɛjɛ amɛteŋ.’!​—Abɛi 1:⁠15.

13. Yuda tsɔɔ akɛ esa akɛ wɔsusu Yehowa webii ni wɔɔbu amɛhe kɛjɛ efɔŋfeelɔi ahe lɛ he yɛ mɛɛ gbɛ nɔ?

¹³ Esa akɛ wɔsusu Yehowa webii ni wɔɔbu amɛhe kɛjɛ mɛi ni baabɔ mɔdɛŋ ni amɛlaka amɛ kɛyabote nɔfɔŋfeemɔ mli lɛ ahe. “Nɔshafeelɔi” ni yɔɔ Yuda gbii lɛ amli lɛ bɔ mɔdɛŋ ni ‘amɛŋɔ Nyɔŋmɔ duromɔ lɛ amɛbɔ nyenyeŋtswi,’ shi nakai kaselɔ anɔkwafo lɛ fee enii oya koni ekɛbɔ enanemɛi heyelilɔi lɛ kɔkɔ ni ekɛbu amɛhe. Ekai amɛ kɔkɔbɔɔ nɔkwɛmɔ nii ni Israelbii ni yeee anɔkwale, ŋwɛibɔfoi toigbolɔi, kɛ mɛi krokomɛi kɛha lɛ. Kanemɔ ewolo ni jɛ mumɔŋ ni eŋma lɛ, ni obaana akɛ Kristofoi ni yeɔ anɔkwale lɛ nyɛŋ ata shi kɛkɛ yɛ be mli ni aahe afite asafo lɛ hetsemɔ lɛ aloo yɛ be mli ni ehe miihia ni abu Nyɔŋmɔ webii ahe kɛjɛ gbɔmɛi ni bɛ jeŋba ni hiɛ jwɛŋmɔi ni he tseee lɛ ahe lɛ.