Okɛ Ohe Akawo Mɛi Krokomɛi Ahe Eshai Amli
“Mikɛ mɛi ni ewieee anɔkwale tarako shi; ni mikɛ mɛi ni kɛ bɔ ni amɛji lɛ teɔ lɛ ebɔɔɔ.”—LALA 26:4, NW.
1. Mɛni hewɔ Yuda tsake yiŋtoo hewɔ ni eŋmaa wolo eyaha enanemɛi Kristofoi lɛ mli lɛ?
AFII ohai nyɔŋma kɛ nɛɛhu ni eho nɛ lɛ, kaselɔ Yuda to eyiŋ akɛ ebaaŋma enanemɛi heyelilɔi lɛ yɛ ‘yiwalaheremɔ ni amɛ fɛɛ amɛhiɛ mli lɛ he.’ Shi ebana akɛ ehe miihia ni ewo amɛ hewalɛ ni amɛpele “hemɔkɛyeli ni atu awo krɔŋkrɔŋ bii lɛ adɛŋ shikome nyɔŋlo lɛ he waa.” Mɛni hewɔ? Ejaakɛ “nɔshafeelɔi” komɛi eju shi amɛbote asafo lɛ mli ni “amɛŋɔɔ wɔ-Nyɔŋmɔ duromɔ lɛ amɛbɔɔ nyenyeŋtswi.”—Yuda 3, 4.
2. Eyɛ mli akɛ yiwalaheremɔ he sane lɛ he susumɔ ŋɔɔ moŋ, shi yɛ bei komɛi amli lɛ, mɛni ji nɔ ni esa akɛ wɔtsɔ sɔlemɔ nɔ wɔsusu he?
2 Kwɛ miishɛɛ ni enɛ ji akɛ wɔ fɛɛ wɔɔsusu yiwalaheremɔ ni wɔhiɛ mli lɛ he! Nakai sane lɛ nɔjwɛŋmɔ haa mɔ tsui nyɔɔ emli babaoo, ni wɔmli filiɔ wɔ yɛ be mli ni wɔkpaa nakai yiwalaheremɔ he jɔɔmɔi lɛ fɛɛ gbɛ lɛ. Shi kɛlɛ, bei komɛi shɛɔ ni yɛ be mli ni esa akɛ wɔwie yiwalaheremɔ he moŋ lɛ, wɔnaa ni ebi ni wɔsusu saji krokomɛi ni hiɛdɔɔ yɔɔ mli lɛ ahe. Kɛji akɛ ajajeee nɛkɛ nibii nɛɛ lɛ, ebaanyɛ efite wɔhemɔkɛyeli, ebaaha wala he foidamɔ lɛ aje wɔdɛŋ. Taakɛ bɔ ni Yuda kɔkɔbɔɔ ni ekɛshiɔ nyenyeŋtswibɔɔ lɛ mli wa waa lɛ, nakai nɔŋŋ ŋmɛnɛ, esa akɛ Kristofoi atsɔ sɔlemɔ nɔ amɛsusu Ŋmalɛ mli ŋaawoo ni kɔɔ mɔ he tɛ̃ɛ aloo ekɔɔ sane ko he tɛ̃ɛ lɛ he.
Wɔ Diɛŋtsɛ Wɔhe Eshai
3. Mɛni hewɔ tsɔsemɔ he hiaa wɔ lɛ, ni te esa akɛ wɔkpɛlɛ enɛ nɔ wɔha tɛŋŋ?
3 Lalatsɛ David kɛɛ akɛ: “Nɔsha mli afɔmi yɛ, ni esha mli minyɛ ŋɔmi hɔ yɛ.” (Lala 51:7) Afɔ wɔ fɛɛ akɛ eshafeelɔi. (Romabii 5:12) Bɔfo Yohane ŋma akɛ: “Kɛji wɔkɛɛ akɛ esha ko bɛ wɔhe lɛ, wɔ diɛŋtsɛ wɔhe wɔshishiuɔ, ni anɔkwale lɛ bɛ wɔ mli.” (1 Yohane 1:8) Akɛ eshafeelɔi lɛ, be shɛɔ ni kãmɔ kɛ tsɔsemɔ he hiaa wɔ bɔni afee ni wɔkɛjaje wɔgbɛ. Nɛkɛ kamɔ nɛɛ baa kɛjɛɔ Yehowa ŋɔɔ kɛtsɔɔ e-Wiemɔ, Biblia lɛ kɛ egbɛjianɔtoo lɛ nɔ. Ekamɔ loo E-tsɔsemɔ jajeɔ wɔ, ni eyeɔ ebuaa wɔ koni wɔnyiɛ yɛ jalɛ mli yɛ ehiɛ. Taakɛ bɔfo Paulo kɛɛ lɛ: “Shi tsɔsemɔ lɛ, amrɔmrɔ nɛɛ efeee mɔ akɛ miishɛɛ nɔ̃ ni, shi dɔlɛ nɔ̃ moŋ; shi kɛ fee sɛɛ lɛ, ewoɔ hejɔlɛ yibii ni ji jalɛ lɛ ehaa mɛi ni etsɔ nɔ ekase nɔ ko lɛ.” (Hebribii 12:11) Yɛ toiŋjɔlɛ yibii ni tsɔsemɔ ni tamɔ nɛkɛ woɔ lɛ hewɔ lɛ, esa akɛ wɔkɛ shidaa amɔ mli.
4. Mɛɛ be mli abaanyɛ akɛ tsɔsemɔ loo kamɔ aha, ni mɛni baanya ajɛ mli aba?
4 Abaanyɛ akɛ tsɔsemɔ ni jɛ Yehowa ŋɔɔ aha kɛ́ wɔmiije gbɛ ko ni nɔ ni baajɛ mli aba ji efɔŋfeemɔ babaoo lɛ shishi lɛ. (Galatabii 6:1) Yɛ bei komɛi amli lɛ, tsɔsemɔ lɛ baanyɛ aba yɛ be mli ni wɔtsɔ gbɛ fɔŋ lɛ nɔ diɛŋtsɛ lɛ. Tsɔsemɔ aloo kãmɔ ni tamɔ nɛkɛ lɛ mli baawa, taakɛ bɔ ni bɔfo Paulo wo Korintobii lɛ hewalɛ waa akɛ amɛfee amɛshi ajwamaŋbɔlɔ ko yɛ asafo lɛ mli lɛ. (1 Korintobii 5:1-5) Yɛ fɛɛ mli lɛ, akɛ tsɔsemɔ lɛ haa koni nɔfɔŋfeelɔ lɛ atsake etsui, ekpale kɛjɛ egbɛ nɔ, ni etsɔ gbɛ ni yɔɔ trɔmɔɔ nɔ koni eshi esha akɔnɔi ni kɛ mɔ yaa nɔfɔŋfeemɔ ni hiɛdɔɔ yɔɔ mli he lɛ. (Okɛto Bɔfoi lɛ Asaji 3:19 he.) Yehowa tsuji daa shi yɛ nɛkɛ tsɔsemɔ nɛɛ hewɔ, taakɛ bɔ ni mɔfɔŋ ni aka ehiɛ yɛ blema Korinto lɛ na ekamɔ lɛ he sɛɛ ni agbɛnɛ eka shi faŋŋ akɛ asaa lɛ ekoŋŋ kɛba asafo lɛ suɔmɔ naanyobɔɔ mli ekoŋŋ lɛ.—2 Korintobii 2:5-8.
5. Mɛni ji nɔ ni Kristofoi ni kɛ amɛhe woɔ efɔŋfeemɔ ni hiɛdɔɔ yɔɔ mli lɛ mli lɛ fɔɔ feemɔ?
5 Mɛi ni amɛjɔɔ amɛhe nɔ amɛha Yehowa lɛ ateŋ mɛi ni sa lɛ ahiɛ yɛ amɛhe nɔ diɛŋtsɛ yɛ bɔ ni ehe ehia ni amɛnyiɛ yɛ jalɛ gbɛ nɔ yɛ Nyɔŋmɔ hiɛ lɛ he. Kɛ́ amɛkɛ amɛhe wo eshafeemɔ ni hiɛdɔɔ yɔɔ mli lɛ mli lɛ, amɛkɛ oyaiyeli tsiɔ amɛhe kɛjɛɔ amɛgbɛ fɔŋ lɛ nɔ, amɛyaa onukpai ni ahala amɛ lɛ aŋɔɔ ni amɛyeɔ anɔkwale tsuitsakemɔ he odase amɛtsɔɔ amɛ. (Yakobo 5:13-16) Yɛ anɔkwale ni eji akɛ kɛ́ akɛ aaato he lɛ Yehowa Odasefoi lɛ ateŋ mɛi fioo ko pɛ ashwieɔ amɛ kɛjɛɔ asafo lɛ mli daa afi lɛ ji odaseyeli ni tsɔɔ akɛ amɛnyɛɔ efɔŋ ni amɛsumɔɔ ni amɛfee nɔ ni hi.—Lala 34:14; 45:8.
Mɛi Krokomɛi Ahe Eshai
6, 7. Efɔŋfeelɔi nɛɛ ateŋ mɛi komɛi bɔɔ mɔdɛŋ ni amɛtsɔ mɛi komɛi ayiŋ yɛ mɛɛ gbɛ nɔ?
6 Shi eka shi faŋŋ akɛ etamɔ nɔ ni mɛi komɛi ni sumɔɔ nɔ ni ja lɛ eŋmɛ gbɛ ni amɛtsui elaka amɛ, ejaakɛ amɛtamɔɔɔ mɛi ni nyɛɔ efɔŋ. (Lala 97:10; Amos 5:15) Nɔ ni jɛɔ mli baa ji akɛ amɛkɛ amɛhe woɔ nibii ni ji eshafeemɔ mli ni amɛhiɛɛɛ ta ni awuɔ koni amɛfee nɔ ni ja lɛ mli. Yɛ bei komɛi amli lɛ, amɛbaaya shɔŋŋ po ni amɛha mɛi komɛi afata amɛhe yɛ amɛnɔfɔŋfeemɔ gbɛ lɛ nɔ. Kwɛ bɔ ni ehe hiaa akɛ wɔɔkpoo nɛkɛ susumɔi nɛɛ!—Okɛto Abɛi 1:10-15 he.
7 Yɛ bei komɛi amli lɛ, eka shi faŋŋ akɛ mɛi ni enyɛɛɛ efɔŋ lɛ wieɔ dɔkɔbii akɛ ehaa efɔŋ ni aaasumɔ akɛ afee teɔ shi yɛ mɛi ni boɔ amɛtoi lɛ atsui amli. Ekolɛ amɛwoɔ amɛ hewalɛ ni amɛkɛ amɛhe awo jeŋba shara mli aloo nifeemɔ ko ni bɛŋkɛɔ jeŋba ko ni Nyɔŋmɔ ekpɛlɛɛɛ nɔ lɛ mli. Aloo amɛbaawo mɔ ko hewalɛ ni ekɛ ehe awo shihilɛ ni kɛ oshara diɛŋtsɛ baa emumɔŋ shihilɛ nɔ lɛ mli. Mɛi ni bɔɔ mɔdɛŋ ni amɛtsɔ mɛi ayiŋ nɛkɛ lɛ baakɛɛ akɛ Yehowa ji suɔmɔ Nyɔŋmɔ ni ebaana mɛi ni feɔ esha lɛ mɔbɔ. Nɛkɛ tsuiŋ kutumpɔo nɛɛ baanyɛ afite nii kɛya naanɔ. (Yeremia 17:9; Yuda 4) Yɛ anɔkwale mli lɛ, esa akɛ ‘wɔkɔ wɔnaji kɛjɛ amɛteŋ.’!—Abɛi 1:15.
Mɛi Krokomɛi Ahe Eshai Ni Akɛ He Woɔ Mli
8. Mɛɛ sanebimɔi esa akɛ asusu he?
8 Shi kɛji akɛ wɔyoo akɛ nifeemɔ ko ni mɔ ko woɔwɔ ŋaa yɛ he lɛ ehiii hu? Ani enɛ ni wɔɔkpoo lɛ haa wɔyeɔ wɔhe kɛjɛɔ sane lɛ he gbɛnaa nii ni aaaka wɔnɔ lɛ mli? Kɛ́ wɔle akɛ mɛi ni kɛ nɔfɔŋfeemɔ he ŋaa nɛɛ haa wɔ lɛ kɛ amɛhe woɔ mli lɛ, mɛni esa akɛ wɔfee?
9. Mɛni hewɔ mɛi komɛi etsiii efɔŋfeemɔ ni mɛi krokomɛi efee lɛ ata lɛ, ni mɛni hewɔ enɛ ji hiɛdɔɔ sane lɛ?
9 Mɛi komɛi yɛ ni amɛyɛ nɔfɔŋfeemɔ ko ni etee nɔ lɛ he nilee ni amɛwieŋ nɔ ko nɔ ko yɛ he amɛtsɔŋ mɛi ni gbɛnaa nii ka amɛnɔ akɛ amɛha asafo lɛ he atse lɛ. Mɛni hewɔ? Ekolɛ amɛsumɔɔɔ ni abuɔ amɛ akɛ mɛi ni eyafolɔ mɛi anaa. Aloo, yɛ anɔkwayeli ni ejaaa gbɛ lɛ henumɔ ni amɛna hewɔ lɛ, amɛbaafee dioo yɛ sane lɛ he aloo amɛbaawie amɛtsɔɔ mɛi ni baawo lɛ shi akɛ amɛtsiŋ ta, shi amɛbaaha ehi teemɔŋ lɛ pɛ. Sane ni hiɛdɔɔ yɔɔ mli nɛ. Mɛni hewɔ? Ejaakɛ nɔ ni baajɛ mli aba diɛŋtsɛ ji akɛ mɔ lɛ kɛ ehe miiwo mɛi krokomɛi ahe eshai amli.
10, 11. (a) Mɛni ji nɔ ni bɔfo Yohane wie yɛ mɛi krokomɛi ahe eshai ni wɔkɛ wɔhe aaawo mli lɛ he? (b) Kɛ́ wɔbanu efɔŋ ko ni asafo lɛ mlinyo ko efee lɛ he lɛ, mɛni ji nɔ ni wɔbaabi wɔ diɛŋtsɛ wɔhe?
10 Bɔfo Yohane tsɔɔ akɛ mɔ ko baanyɛ ni ekɛ ehe awo mɔ kroko he esha mli. Eŋma akɛ: “Mɔ fɛɛ mɔ ni tɔ̃ɔ ni ehiii Kristo tsɔɔmɔ lɛ mli lɛ, ebɛ Nyɔŋmɔ . . . kɛ mɔ ko ba nyɛŋɔɔ ni ehiɛɛɛ nɛkɛ tsɔɔmɔ nɛɛ lɛ nyɛkaherea lɛ kɛbaa nyɛwe, ni nyɛkafalaa lɛ tete; ejaakɛ mɔ ni falaa lɛ lɛ, ekɛ lɛ feɔ ekome yɛ enitsumɔi fɔji lɛ amli.” (2 Yohane 9-11) Hemɔkɛyeli kwalɔ ni etsi ehe kɛjɛ “Kristo tsɔɔmɔ” lɛ he lɛ efeŋ mɔ ni sa ákɛ akɛ lɛ bɔɔ naanyo, ni kɛji akɛ anɔkwale Kristofonyo lɛ ŋaaa lɛ lɛ, belɛ eekwa enɔfɔŋfeemɔ lɛ ni ekɛ ehe aaawo mli lɛ.
11 Akɛni nɛkɛ sane lɛ ji yɛ hemɔkɛyeli kwɔlɔ lɛ gbɛfaŋ hewɔ lɛ, eka shi faŋŋ akɛ wɔsumɔŋ ni wɔkɛ wɔhe awo mɛi krokomɛi ni amɛjeŋba shara mli nitsumɔi lɛ ebafee faŋŋ yɛ wɔhiɛ lɛ anɔfɔŋfeemɔ lɛ mli. No hewɔ lɛ, kɛji akɛ wɔbale akɛ asafo lɛ mlinyo ko ebatsɔ julɔ aloo daatɔɔlɔ hu? Kɛji akɛ wɔwooɔ nakai mɔ lɛ hewalɛ koni etao Yehowa dɛŋ eshaifaa ni ejaje ehe shai lɛ etsɔɔ onukpai lɛ, belɛ ani wɔbafeɔ mɛi ni eye amɛhe kwraa lo? Dabi, ejaakɛ gbɛnaa nii ni hiɛdɔɔ yɔɔ mli ebaka wɔnɔ.
Hetsemɔ Kɛ Hebuu He Hiaa
12. Mɛni hewɔ esa akɛ wɔjwɛŋ asafo lɛ mumɔŋ hetsemɔ he lɛ?
12 Esa akɛ wɔ aŋkroaŋkroi lɛ wɔtsɔɔ akɛ wɔsusuɔ asafo lɛ mumɔŋ hetsemɔ he. Kwɛ bɔ ni ama enɛ nɔ mi jogbaŋŋ aha yɛ be mli ni nomii ni ji Yudafoi Iɛ miihe ashi Babilon yɛ afii ohai ekpaa D.Ŋ.B. lɛ! Famɔ ni Nyɔŋmɔ kɛha amɛ ji akɛ: “Nyɛtsia nyɛhe, nyɛtsia nyɛhe! Nyɛjea kpo kɛjɛa jɛi! Nyɛkataa nɔ ko ni he tseee he! Nyɛjea kpo kɛjɛa [Babilon] emli! Nyɛ mɛi ni nyɛtereɔ Yehowa nibii lɛ, nyɛtsua nyɛhe!”—Yesaia 52:11.
13. Yuda tsɔɔ akɛ esa akɛ wɔsusu Yehowa webii ni wɔɔbu amɛhe kɛjɛ efɔŋfeelɔi ahe lɛ he yɛ mɛɛ gbɛ nɔ?
13 Esa akɛ wɔsusu Yehowa webii ni wɔɔbu amɛhe kɛjɛ mɛi ni baabɔ mɔdɛŋ ni amɛlaka amɛ kɛyabote nɔfɔŋfeemɔ mli lɛ ahe. “Nɔshafeelɔi” ni yɔɔ Yuda gbii lɛ amli lɛ bɔ mɔdɛŋ ni ‘amɛŋɔ Nyɔŋmɔ duromɔ lɛ amɛbɔ nyenyeŋtswi,’ shi nakai kaselɔ anɔkwafo lɛ fee enii oya koni ekɛbɔ enanemɛi heyelilɔi lɛ kɔkɔ ni ekɛbu amɛhe. Ekai amɛ kɔkɔbɔɔ nɔkwɛmɔ nii ni Israelbii ni yeee anɔkwale, ŋwɛibɔfoi toigbolɔi, kɛ mɛi krokomɛi kɛha lɛ. Kanemɔ ewolo ni jɛ mumɔŋ ni eŋma lɛ, ni obaana akɛ Kristofoi ni yeɔ anɔkwale lɛ nyɛŋ ata shi kɛkɛ yɛ be mli ni aahe afite asafo lɛ hetsemɔ lɛ aloo yɛ be mli ni ehe miihia ni abu Nyɔŋmɔ webii ahe kɛjɛ gbɔmɛi ni bɛ jeŋba ni hiɛ jwɛŋmɔi ni he tseee lɛ ahe lɛ.
14. Kɛji akɛ efɔŋfeelɔ ko ejajeee etɔmɔ lɛ etsɔɔɔ onukpai lɛ, belɛ mɛɛ gbɛ nɔ Lala 26:4 baanyɛ aye abua wɔ koni wɔto yiŋ yɛ nɔ ni esa akɛ wɔfee lɛ he?
14 Shi kɛlɛ, kɛji akɛ wɔwo efɔŋfeelɔ ko hewalɛ koni etao Nyɔŋmɔ dɛŋ eshaifaa ni ejaje enɔtɔmɔ lɛ etsɔɔ onukpai lɛ, shi eetsi eeto aloo enaaa bɔ ni ehe hiaa akɛ eeetsɔ gbɛ ni tamɔ nɛkɛ nɔ hu? Ani wɔbaanyɛ wɔŋmɛɛ sane lɛ he kɛkɛ? Mɛi komɛi baasusu akɛ amɛsumɔɔɔ ni amɛkɛ amɛhe woɔ sane lɛ mli. Amɛsumɔŋ ni amɛfite naanyobɔɔ ni ka amɛ kɛ mɔ ni tɔɔ lɛ teŋ lɛ. Ni amɛsumɔŋ ni abu amɛ akɛ mɛi ni kɛ teemɔŋ sane eteee yɛ onukpai lɛ ni amɛyakɛɛ amɛ lɛ hewɔ. Shi, susumɔ ni ejaaa nɛ. Lalatsɛ David kɛɛ: “Mikɛ gbɔmɛi ni ewieee anɔkwale tarako shi, ni mikɛ osatofoi hu ebɔko.” (Lala 26:4) Yɛ anɔkwale mli lɛ, belɛ, wɔsumɔŋ ni wɔfee “osatofoi” ananemɛi.
15. Mɛɛ gbɛnaa nii 3 Mose 5:1 tsɔɔ akɛ eka wɔ nɔ yɛ be mli ni wɔha mɔ ni etɔ lɛ be bɔ ni sa koni eyabɔ onukpai lɛ enɔfɔŋfeemɔ lɛ he amaniɛ lɛ?
15 No hewɔ lɛ, yɛ be mli ni wɔha mɔ ni tɔɔ lɛ be babaoo bɔ ni ekɛaabɔ enɔfɔŋfeemɔ lɛ he amaniɛ etsɔɔ onukpai lɛ sɛɛ lɛ, belɛ ebafeɔ gbɛnaa nii ni ka wɔnɔ yɛ Yehowa hiɛ akɛ wɔkɛ wɔhe akawo nakai mɔ lɛ he esha lɛ mli. Ehe miihia ni wɔkɛɛ nɔkwɛlɔi ni sa lɛ akɛ gbɔmɔ lɛ ejie nɔfɔŋfeemɔ ko ni hiɛdɔɔ yɔɔ mli kpo etsɔɔ bo ni ebi ni amɛtao mli. Enɛ kɛ 3 Mose 5:1 baakpa gbee, ejaakɛ jɛmɛ kɛɔ akɛ: “Shi kɛji mɔ ko fee esha ni enu ni mɔ ko miilomɔ ni lɛ nɔŋŋ ji odase ni ena aloo ele sane lɛ, kɛ ejajeee lɛ, eloo musu.” Ni kɛlɛ esa akɛ wɔkwa oyaiyeli ni wɔkɛaafee nii ni damɔ efɔŋfeemɔ ni wɔsusuɔ kɛkɛ lɛ nɔ.
16. Mɛni ji nɔ ni he hiaa kwraa fe anɔkwale ni aaaye naanyo ko ni sumɔɔɔ ni ebɔɔ enɔfɔŋfeemɔ lɛ he amaniɛ etsɔɔ onukpai lɛ?
16 Yɛ ŋmɛnɛŋmɛnɛ je nɛɛ mli lɛ, mɛi krokomɛi atɔmɔi ni atsimɔɔ nɔ lɛ ji nɔ ni afeɔ. Mɛi pii yɛ ni amɛmɔɔ amɛnaabu mli kpɛŋŋ tamɔ tɛ gbogbo ni amɛwieee kɛ eba akɛ esa ni amɛjie mɛi krokomɛi anɔfɔŋfeemɔ kpo amɛtsɔɔ mɛi ni esa akɛ amɛle saji ni tamɔ nɛkɛ lɛ. Ebiɔ hewalɛ ni mɔ ni hiɛ Kristofoi asu kɛ baŋ lɛ yɔɔ ni ekɛtswa onukpai ni ahala amɛ lɛ adafi yɛ efɔŋfeemɔ ni hiɛdɔɔ yɔɔ mli ni enaanyo heyelilɔ lɛ kɛ ehe ewo mli lɛ he. Shi kɛji akɛ wɔbaaná Yehowa hiɛ duromɔ lɛ, belɛ esaaa akɛ wɔhaa naanyobɔɔ shwilaa wɔhiŋmɛi yɛ mɔ kroko lɛ nɔfɔŋfeemɔ he. Wekukpaa aloo ekomefeemɔ ni aaaka wɔkɛ Nyɔŋmɔ teŋ lɛ he hiaa kwraa fe anɔkwale ni wɔɔye naanyo ko ni efee efɔŋ ni hiɛdɔɔ yɔɔ mli ni esumɔɔɔ ni ejie sane lɛ kpo etsɔɔ onukpai ni ahala amɛ lɛ.
Naagbai Ni Esa Akɛ Wɔ Fɛɛ Wɔsusu He
17. Mɛni feɔ anɔkwale ni eji akɛ ehe miihia ni gbekɛbii komɛi ni yɔɔ wɔteŋ lɛ akwɛ amɛhe nɔ jogbaŋŋ koni amɛkɛ amɛhe akawo mɛi krokomɛi anɔshafeemɔ mli lɛ he mfoniri loo nɔkwɛmɔ?
17 Mɛi krokomɛi ahe eshai ni akɛ he woɔ mli he naagba nɛɛ yɛ obalaŋtai komɛi ni yɔɔ wɔteŋ lɛ amli. Amɛfeɔ dioo ni amɛsumɔɔɔ akɛ amɛaagba mɛi ni esa akɛ amɛleɔ mɛi ni feɔ esha ni baanyɛ aye asafo lɛ awui ni nɔ ni baanyɛ ajɛ mli aba ji Yehowa duromɔ ni anaŋ lɛ he saji lɛ. Mɛi krokomɛi anɔfɔŋfeemɔ ni atsimɔɔ nɔ lɛ fa babaoo yɛ je lɛŋ skul gbɛjianɔtoi lɛ amli. Shi kɛji akɛ nɛkɛ su nɛɛ babote asafo lɛ mli lɛ ekɛ naagbai babaoo baaba. Ánu amaniɛbɔi ni kɔɔ gbekɛbii ni feɔ ekome amɛfeɔ efɔŋ ni amɛkaa kita amɛtsɔɔ amɛhe akɛ amɛhaŋ onukpai lɛ kɛ fɔlɔi lɛ ale nii ni yaa nɔ lɛ he nɔ ko lɛ. Gbekɛbii nɛɛ ni ŋmɛɛ amɛhe amɛha amɛtipɛŋfoi kɛ bɔ ni amɛsumɔɔ ni kuu mli ni amɛyɔɔ lɛ hiɛ asɔ amɛ lɛ kɛ tsuiŋdɔlɛ babaoo eba nɛkɛ obalaŋtai nɛɛ kɛ amɛfɔlɔi kɛ mɛi krokomɛi ni yɔɔ asafo lɛ mli lɛ anɔ yɛ be mli ni amɛnɔfɔŋfeemɔ lɛ jeɔ kpo lɛ. Esa akɛ wɔkai akɛ nɔ ko bɛ ni aŋɔtee ni ejeŋ kpo, ni wɔgbɛnaa nii titri yɛ Yehowa hiɛ lɛ ateŋ ekome ji ni wɔye wɔbua ni egbɛjianɔtoo lɛ he atse.—Luka 8:17.
18. Mɛni esa akɛ fɔlɔi Kristofoi afee kɛ́ amɛbi fee efɔŋ?
18 Esa akɛ Yehowa tsuji fɛɛ akwɛ amɛhe nɔ jogbaŋŋ koni amɛkɛ amɛhe akawo mɛi krokomɛi ahe eshai amli. Fɔlɔi komɛi bɔɔ mɔdɛŋ ni amɛbu amɛbii ajeŋba gbonyo lɛ bem, amɛbɔɔ mɔdɛŋ ni amɛtsimɔ amɛsaji anɔ. Shi, esaaa akɛ fɔlɔi ni ji Kristofoi ŋɔɔ su lɛ akɛ mɔ fɛɛ mɔ ete shi ewo amɛbii, kɛji akɛ nɛkɛ gbekɛbii nɛɛ fee efɔŋ lɛ. Shi esa akɛ fɔlɔi ni sheɔ Nyɔŋmɔ gbeyei lɛ aye abua amɛbii ni tɔ̃ɔ lɛ koni amɛhe ni amɛkpɛlɛ tsɔsemɔ fɛɛ tsɔsemɔ ni he hiaa ni atsɔɔ mli yɛ Nyɔŋmɔ Wiemɔ lɛ mli lɛ anɔ, ejaakɛ enɛ he baaba sɛɛnamɔ aha amɛ.
19. (a) Mɛni ji nɔ ni esa akɛ Kristofoi ni amɛbote gbalashihilɛ mli lɛ akwɛ amɛhe nɔ jogbaŋŋ yɛ he yɛ eshai ni hiɛdɔɔ yɔɔ mli lɛ he? (b) Mɛni ji nɔ ni esa akɛ onukpai afee kɛji akɛ amɛteŋ mɔ ko aloo asafoŋ sɔɔlɔ ko fee esha ni hiɛdɔɔ yɔɔ mli?
19 Esa akɛ Kristofoi ni amɛbote gbalashihilɛ mli lɛ hu akwɛ amɛhe nɔ jogbaŋŋ koni amɛkaku Nyɔŋmɔ mlai amli kɛtsɔ eshai ni hiɛdɔɔ yɔɔ mli ni amɛteŋ mɔ ko aaafee ni amɛaatsimɔ nɔ lɛ nɔ. Esa akɛ amɛkai Anania kɛ Safira ni fee ekome amɛkɛfee esha shi amɛnyɛɛɛ amɛtsimɔ amɛnɔshafeemɔ ni hiɛdɔɔ yɔɔ mli lɛ nɔ lɛ. (Bɔfoi lɛ Asaji 5:1-11) Esa akɛ onukpai lɛ hu ahiɛ ahi amɛhe nɔ koni amɛkatsimɔ amɛhe saji aloo asafoŋ sɔɔlɔi ahe saji anɔ kɛji akɛ amɛteŋ mɔ ko efee esha ko ni hiɛdɔɔ yɔɔ mli ni eeenyɛ eba akɛ aaanyɛ ashwie lɛ kɛjɛ asafo lɛ mli lɛ. Esa akɛ amɛnyiɛ shishitoo mla ni Paulo kɛfɔ shi lɛ sɛɛ. Eŋma akɛ: “Kaaŋɔ oniji oshwie mɔ ko nɔ oya, ni asaŋ kaaŋɔ ohe ofutu mɛi krokomɛi ahe eshai amli. Too ohe krɔŋŋ.”—1 Timoteo 5:22.
Nilee Ni Yɔɔ Hi Ni Aaahi Shi Akɛ Mɛi Ni He Bɛ Shwamɔ Lɛ Mli
20. Ni wɔɔtsimɔ mɛi krokomɛi anɔshafeemɔ nɔ aloo wɔkɛ wɔhe aaawo mli lɛ, mɛni moŋ esa akɛ wɔfee?
20 Esaaa akɛ Yehowa tsuji kɛ amɛhe woɔ je nɛɛ gbɛi gbohii lɛ amli aloo amɛkaseɔ eko. Yɛ be mli ni eŋmaa wolo eyaha Gaio lɛ, bɔfo Yohane kɛɛ: “Suɔlɔ, kaakase nɔ ni ji efɔŋ, shi kasemɔ nɔ ni ji ekpakpa moŋ, mɔ ni feɔ ekpakpa lɛ, ejɛ Nyɔŋmɔ mli; mɔ ni feɔ efɔŋ lɛ enako Nyɔŋmɔ.” (3 Yohane 11) Kwɛ nɔkpakpa ni eji akɛ wɔɔha Nyɔŋmɔ Wiemɔ lɛ akudɔwɔ ni yɛ no hewɔ lɛ, wɔfee nɔ ni ji ekpakpa! Ni wɔɔtsimɔ mɛi krokomɛi anɔfɔŋfeemɔi anɔ aloo wɔkɛ wɔhe aaawo mli moŋ lɛ, nɔ ni esa akɛ wɔfee moŋ ji ni wɔtswa wɔfai shi akɛ wɔɔkpɛ́ tamɔ kanei, wɔfee mɛi ni shwamɔ ko bɛ amɛhe mɛi ni leee efɔŋ. (Filipibii 2:14, 15) Gbɛnaa nii ka Nyɔŋmɔ sɔɔlɔ fɛɛ sɔɔlɔ nɔ akɛ eha asafo lɛ he atse, yɛ be mli ni lɛ diɛŋtsɛ lɛ ehiɔ shi akɛ mɔ ni shwamɔ ko bɛ ehe. (2 Petro 3:14, 15) Shi kɛji akɛ nɔ ni mɔ ko efee Iɛ miigba onaa yɛ ja ni nɔ ni efee lɛ ja aloo ejaaa he hu? Esa akɛ onyɛ owie he otsɔɔ onukpai lɛ, koni ona gbɛ ni ja ni esa akɛ otsɔ nɔ.
21. (a) Suɔmɔ ni Kristo yɔɔ kɛha asafo lɛ ji nɔkwɛmɔ nɔ kɛha wɔ yɛ mɛɛ gbɛ nɔ? (b) Mɛɛ gbɛnaa nii bakaa wɔ nɔ yɛ mɛi krokomɛi anɔshafeemɔ he?
21 Esa akɛ suɔmɔ ni wɔyɔɔ kɛha Yehowa gbɛjianɔtoo lɛ atamɔ nɔ ni Yesu Kristo yɔɔ kɛha emumɔŋ ayemforo lɛ, asafo lɛ. Kristo “sumɔɔ asafo lɛ ni eŋɔ lɛ diɛŋtsɛ ehe eha yɛ ehewɔ, koni ekɛ nu hejuu lɛ atsuu ehe yɛ wiemɔ mli ni eha efee krɔŋkrɔŋ koni eŋɔ lɛ edamɔ shi eha lɛ diɛŋtsɛ ehe akɛ anunyam asafo ni he bɛ kpa ko aloo hiɛkuamɔ ko aloo nakai nɔ ko shi moŋ; efee krɔŋkrɔŋ ni shwamɔ ko akahi ehe.” (Efesobii 5:25-27) Nakai nɔŋŋ hu esa akɛ suɔmɔ ni wɔyɔɔ kɛha Yehowa gbɛjianɔtoo lɛ atsirɛ wɔ ni wɔfee nɔ fɛɛ nɔ ni wɔɔnyɛ ni wɔkɛha ehe atse. Ekaba kɔkɔɔkɔ akɛ wɔɔfee nɔ ko ni baagbe Nyɔŋmɔ loo egbɛjianɔtoo lɛ he guɔ aloo ni wɔɔkpɛlɛ mɛi krokomɛi anɔfɔŋfeemɔ nɔ yɛ asafo lɛ mli. Shi moŋ, nyɛhaa wɔwoa efɔŋfeelɔi ahewalɛ ni amɛjaje amɛjeŋba ni amɛtao yelikɛbuamɔ kɛjɛ onukpai lɛ adɛŋ. Kɛ́ amɛfeee enɛ yɛ beko mli lɛ, belɛ nyɛhaa wɔtsua gbɛnaa nii ni ka wɔnɔ lɛ he nii ni wɔbɔ nɔkwɛlɔi ni ahala amɛ lɛ amaniɛ. Yɛ nɛkɛ gbɛ nɔ lɛ, belɛ wɔbafeŋ mɛi ni kɛ amɛhe woɔ mɛi krokomɛi ahe eshai amli ni amɛnɔfɔŋfeemɔ lɛ he gbɛnaa nii ko baka wɔnɔ.
22. (a) Bɔni afee ni wɔnine ashɛ yiwalaheremɔ nɔ lɛ, mɛni esa akɛ wɔfee? (b) Mɛɛ sanebimɔi yɔɔ lolo ni esa akɛ asusu he?
22 Yiwalaheremɔ ni wɔfee wɔhiɛ mli lɛ ji jwɛtri ko ni anyɛŋ akɛ nɔ ko ato he. Kɛ̀ wɔnine baashɛ nɔ lɛ, esa akɛ wɔya nɔ wɔnyiɛ yɛ gbɛ ni ja nɔ yɛ Yehowa hiɛ. No hewɔ lɛ nyɛhaa wɔyea wɔbuaa wɔhe koni wɔfee nakai. Ni wɔkɛ wɔhe akawo mɛi krokomɛi ahe eshai amli. Yehowa ejɛ esuɔmɔ mli eto gbɛjianɔ eha wɔ koni ekɛye ebua wɔ yɛ enɛ feemɔ mli, ni onukpai ni ahala amɛ lɛ tsuɔ nii ni he hiaa yɛ enɛ mli. Shi te amɛfeɔ tɛŋŋ amɛkaseɔ Yehowa kɛ e-Bi, Tookwɛlɔ Kpakpa lɛ? Mɛɛ yelikɛbuamɔ onukpai baanyɛ amɛkɛha wɔ yɛ gbɛ ni kɛ mɔ yaa wala mli lɛ nɔ? Nikasemɔ ni nyiɛ sɛɛ nɛɛ baaha sanebimɔi nɛɛ ahetooa.
[Shishigbɛ niŋmai]
a Ajie kɛjɛ November 15, 1985 Watchtower lɛ mli.
Ani Obaanyɛ Okai?
◻ Te esa akɛ obu tsɔsemɔ oha tɛŋŋ?
◻ Kɛ̃ onaanyo heyelilɔ ko kɛɛ bo akɛ efee esha ko ni hiɛdɔɔ yɔɔ mli lɛ, mɛni ji nɔ ni esa akɛ owo lɛ hewalɛ ni efee?
◻ Mɛni esa akɛ ofee kɛ ole akɛ efɔŋfeelɔ ko ejajeko esha ni efee lɛ etsɔko onukpai ni ahala amɛ lɛ?
◻ Kɛji akɛ wɔji onukpai, gbalashihilɛ mli hefatalɔi, aloo gbekɛbii hu lɛ, te wɔɔfee tɛŋŋ wɔkwa mɛi krokomɛi ahe eshai ni wɔkɛ wɔhe aaawo mli?
[Mfoniri ni yɔɔ baafa 23]
Bɔfo Yohane bɔ kɔkɔ eshi mɛi krokomɛi ahe eshai ni wɔkɛ wɔhe aaawo mli