Bɔ ni Je Nɛɛ Naagbee lɛ Baaba Lɛ Eha
“Nyɛ lɛ nyɛbɛ duŋ mli, ní gbi lɛ aaabati nyɛ shi tamɔ julɔ.”—1 TES. 5:4.
ANI OBAANYƐ OTSƆƆ MLI?
Mɛɛ nifeemɔi ni anaaa ŋmalɛi ni nyiɛ sɛɛ nɛɛ wieɔ he?
1. Mɛni baaye abua wɔ ni wɔsara ní nakai beaŋ nɔŋŋ lɛ wɔkpee naagbai anaa?
ETSƐŊ, naakpɛɛ nifeemɔi baaya nɔ yɛ shikpɔŋ lɛ nɔ. Biblia mli gbalɛi amlibaa maa enɛ nɔ mi, no hewɔ lɛ esa akɛ wɔsara. Mɛni baaye abua wɔ koni wɔfee nakai? Bɔfo Paulo wo wɔ hewalɛ ni ‘wɔkwɛ nii ni anaaa lɛ.’ Hɛɛ, esa akɛ wɔha naanɔ wala he nyɔmɔwoo lɛ ahi wɔjwɛŋmɔŋ, kɛ́ wɔbaaná yɛ ŋwɛi jio, shikpɔŋ lɛ nɔ jio. Paulo ŋma wiemɔi nɛɛ koni ekɛwo enanemɛi héyelilɔi lɛ hewalɛ ní amɛkɛ amɛjwɛŋmɔ ama nɔ ni baajɛ anɔkwa ni amɛyeɔ lɛ mli kɛba lɛ nɔ. Nakai feemɔ baaye abua amɛ ni amɛdamɔ naagbai kɛ yiwai anaa.—2 Kor. 4:8, 9, 16-18; 5:7.
2. (a) Kɛ́ wɔɔhiɛ wɔhiɛnɔkamɔ lɛ mli kpɛŋŋ lɛ, mɛni esa akɛ wɔfee? (b) Mɛni he wɔbaasusu yɛ nikasemɔ nɛɛ kɛ nɔ ni baanyiɛ sɛɛ lɛ mli?
2 Nɔ ko ni he hiaa waa ni wɔbaanyɛ wɔkase yɛ Paulo wiemɔ lɛ mli ji akɛ: Kɛ́ wɔɔhiɛ wɔhiɛnɔkamɔ lɛ mli kpɛŋŋ lɛ, esa akɛ wɔkwɛ nii kɛteke nibii ni wɔnaa amrɔ nɛɛ. Esa akɛ wɔkɛ wɔjwɛŋmɔ ama nifeemɔi ni he hiaa waa ni wɔkɛ wɔhiŋmɛii enaaa amrɔ nɛɛ anɔ. (Heb. 11:1; 12:1, 2) No hewɔ lɛ, nyɛhaa wɔsusua nifeemɔi nyɔŋma ni baaya nɔ wɔsɛɛ ni kɔɔ wɔnaanɔ wala he hiɛnɔkamɔ lɛ he lɛ ahe wɔkwɛa.a
MƐNI KƐ́ NO BA NƆŊŊ LƐ NAAGBEE LƐ BAABA?
3. (a) Mɛni atsĩ tã yɛ 1 Tesalonikabii 5:2, 3 lɛ ni baaba mli wɔsɛɛ? (b) Mɛni maŋkwramɔŋ hiɛnyiɛlɔi baafee, ni ekolɛ namɛi baafata amɛhe kɛfee nakai?
3 Paulo tsĩ nifeemɔ ko ni baaba wɔsɛɛ lɛ tã yɛ wolo ni eŋma Tesalonikabii lɛ mli. (Nyɛkanea 1 Tesalonikabii 5:2, 3.) Egbala jwɛŋmɔ kɛtee “Nuŋtsɔ [Yehowa] gbi” lɛ nɔ. ‘Yehowa gbi’ ni akɛtsu nii yɛ biɛ lɛ tsɔɔ be ni apasa jamɔ hiɛkpatamɔ lɛ baaje shishi, kɛyashi Harmagedon ta lɛ baafɛ. Shi kɛlɛ, dani Yehowa gbi lɛ baaje shishi lɛ, je lɛŋ nɔyelɔi lɛ baawie akɛ, “Hejɔlɛ yɛ ni wɔyɛ shweshweeshwe!” Ekolɛ amɛbaawie wiemɔ nɛɛ shi kome loo amɛbaawie kɛtsara nɔ. Ekolɛ maji komɛi baasusu akɛ etsɛŋ ni amɛbaaná amɛnaagbai wuji komɛi anaa tsabaa. Ni jamɔŋ hiɛnyiɛlɔi lɛ hu? Amɛji je lɛ fã, no hewɔ lɛ eeenyɛ efee akɛ amɛkɛ maŋkwralɔi lɛ baafee ekome yɛ enɛ mli. (Kpoj. 17:1, 2) Belɛ, jamɔŋ hiɛnyiɛlɔi lɛ baafee amɛhe tamɔ apasa gbalɔi ni hi shi yɛ blema Yuda lɛ. Yehowa wie yɛ amɛhe akɛ: “Amɛkɛɔ akɛ, ‘Hejɔlɛ yɛ! Hejɔlɛ yɛ!’ shi hejɔlɛ ko bɛ.”—Yer. 6:14, NW; 23:16, 17.
4. Mɛni wɔle ni mɛi ni yɔɔ je lɛ mli lɛ leee?
4 Ekɔɔɔ he eko mɛi ni baafata he kɛkɛɛ akɛ, “Hejɔlɛ yɛ ni wɔyɛ shweshweeshwe!” lɛ, no baaha ana akɛ etsɛŋ ni Yehowa gbi lɛ baaje shishi. No hewɔ ni Paulo kɛɛ akɛ: “Anyɛmimɛi, nyɛ lɛ nyɛbɛ duŋ mli, ní gbi lɛ aaabati nyɛ shi tamɔ julɔ. Ejaakɛ nyɛ fɛɛ lɛ, labii ji nyɛ.” (1 Tes. 5:4, 5) Wɔle nɔ ni Ŋmalɛ lɛ tsɔɔ yɛ nibii ni yaa nɔ amrɔ nɛɛ lɛ he, shi mɛi babaoo ni yɔɔ je lɛ mli lɛ leee. Mɛɛ gbɛ nɔ gbalɛ ni kɔɔ kɛɛmɔ ni abaakɛɛ akɛ, “Hejɔlɛ yɛ ni wɔyɛ shweshweeshwe!” lɛ baatsɔ aba mli? Esa akɛ wɔmɛ ni wɔkwɛ bɔ ni ebaaba lɛ eha. No hewɔ lɛ, nyɛhaa wɔtswaa wɔfai shi akɛ ‘wɔbaashi kpe ni wɔhiɛ akã shi.’—1 Tes. 5:6; Zef. 3:8.
“MAŊNYƐ” KO NI EYALEEE BƆ NI ENAAGBEE BAAJI AHA
5. (a) Te “amanehulu babaoo” lɛ baaje shishi aha tɛŋŋ? (b) Mɛɛ “maŋnyɛ” baasusu akɛ nɔfɔŋ ko baŋ enɔ lɛ?
5 No sɛɛ lɛ mɛni baaba? Paulo tsɔɔ mli akɛ: ‘Be mli ni amɛaakɛɛ akɛ: Hejɔlɛ yɛ ni wɔyɛ shweshweeshwe! lɛ, no mli nɔŋŋ hiɛkpatamɔ aaabatua amɛ trukaa.’ “Babilon kpeteŋkpele lɛ,” loo “yoo ajwamaŋ lɛ” ni ji apasa jamɔi fɛɛ ni yɔɔ je lɛŋ lɛ hiɛ ni abaakpata lɛ baafee ‘hiɛkpatamɔ ni baaba trukaa’ nɛɛ shishijee. (Kpoj. 17:5, 6, 15) Nakai tutuamɔ ni baaba apasa jamɔi srɔtoi fɛɛ, ni Kristendom fata he lɛ anɔ lɛ, ji “amanehulu babaoo” lɛ shishijee. (Mat. 24:21; 2 Tes. 2:8) Nifeemɔ nɛɛ baaha mɛi babaoo ahiɛ afee amɛ yaa. Mɛni hewɔ? Ejaakɛ kɛyashi nakai beaŋ lɛ, yoo ajwamaŋ lɛ baashi etsitsi akɛ eji “maŋnyɛ” ní ‘enaŋ awerɛho ko.’ Shi trukaa lɛ, ebaayɔse akɛ eyabuuu akɔntaa jogbaŋŋ yɛ bɔ ni enaagbee baatamɔ aha lɛ he. Abaabɛɛ lɛ oya kɛje shihilɛ mli, oookɛɛ yɛ “gbi kome nɔ.”—Kpoj. 18:7, 8.
6. Namɛi baakpata apasa jamɔ hiɛ?
6 Nyɔŋmɔ Wiemɔ lɛ tsɔɔ akɛ, “kooloo” ko kɛ ‘ekolontoi nyɔŋma’ ji mɔ ni baatutua yoo ajwamaŋ lɛ. Kɛ́ wɔkase Kpojiemɔ wolo lɛ, wɔbaana akɛ kooloo lɛ ji Jeŋmaji Ekomefeemɔ lɛ. “Akolontoi nyɔŋma” lɛ damɔ shi kɛha maŋkwramɔŋ nɔyelii fɛɛ ni yɔɔ amrɔ nɛɛ ni fĩɔ “kooloo ni tsuɔ tamɔ muneele” nɛɛ sɛɛ lɛ.b (Kpoj. 17:3, 5, 11, 12) Te tutuamɔ lɛ naa baayakpa aha tɛŋŋ? Maji ni yɔɔ Jeŋmaji Ekomefeemɔ lɛ mli lɛ baahà yoo ajwamaŋ lɛ nibii lɛ, amɛbaakpa ehe mama koni ana bɔ ni eji diɛŋtsɛ, amɛbaakpata ehiɛ, ni “amɛkɛ la aaashã lɛ” wɛlɛŋŋ. Kɛ́ akpata ehiɛ lɛ, enaagbee ji no.—Nyɛkanea Kpojiemɔ 17:16.
7. Mɛni baaha “kooloo” lɛ atutua yoo ajwamaŋ lɛ?
7 Biblia mli gbalɛ tsɔɔ nɔ hu ni kɛ tutuamɔ nɛɛ baaba. Yɛ gbɛ ko nɔ lɛ, Yehowa kɛbaawo maŋ nɔyelɔi lɛ atsuiiaŋ “koni amɛfee eyiŋtoo nii lɛ,” ni ji akɛ, amɛkpata yoo ajwamaŋ lɛ hiɛ. (Kpoj. 17:17) Akɛni je lɛŋ jamɔi lɛ fĩɔ tawuu sɛɛ hewɔ lɛ, amɛkã he amɛhaaa toiŋjɔlɛ ahi je lɛŋ; enɛ hewɔ lɛ, maji lɛ baasusu akɛ kɛ́ akpata yoo ajwamaŋ lɛ hiɛ lɛ, amɛtoiŋ baajɔ amɛ. Kɛ́ nɔyelɔi lɛ tutua yoo ajwamaŋ lɛ, amɛbaasusu akɛ amɛmiitsu “jwɛŋmɔ kome” ni amɛhiɛ lɛ he nii. Shi yɛ anɔkwale mli lɛ, Nyɔŋmɔ kɛ amɛ baatsu nii akɛ edɛŋ dade ni ekɛbaabɛɛ apasa jamɔ kwraa. No hewɔ lɛ, Satan gbɛjianɔtoo lɛ fã kome baatutua fã kroko trukaa, ni Satan nyɛŋ he nɔ ko kwraa afee.—Mat. 12:25, 26.
ABAATUTUA NYƆŊMƆ WEBII LƐ
8. Mɛɛ tutuamɔ “Gog ní yɔɔ Magog shikpɔŋ lɛ nɔ” lɛ kɛbaaba?
8 Kɛ́ akpata apasa jamɔ hiɛ sɛɛ lɛ, Nyɔŋmɔ webii lɛ baaya nɔ ‘ahi shi shweshweeshwe,’ ni amɛbaahi shi ní “amɛbɛ gbogbo.” (Ezek. 38:11, 14) Mɛni baaba kuu ni yaa nɔ amɛjáa Yehowa, ní etamɔ nɔ ni emli bii lɛ bɛ hebuu ko lɛ nɔ? Eeenyɛ efee akɛ, “majimaji babaoo” baasumɔ ní amɛtutua amɛ. Nyɔŋmɔ Wiemɔ lɛ tsɔɔ akɛ, “Gog ní yɔɔ Magog shikpɔŋ lɛ nɔ” lɛ ji mɔ ni kɛ nakai tutuamɔ lɛ baaba. (Nyɛkanea Ezekiel 38:2, 15, 16.) Te esa akɛ wɔna nakai tutuamɔ lɛ wɔha tɛŋŋ?
9. (a) Mɛni ji nɔ titri ni kã Kristofoi atsui nɔ? (b) Mɛni esa akɛ wɔfee bianɛ kɛwaje wɔhemɔkɛyeli lɛ?
9 Tutuamɔ nɛɛ ni Nyɔŋmɔ webii ele kɛtsɔ hiɛ lɛ haaa amɛfee yeyeeye. Yehowa gbɛ́i lɛ hetsemɔ kɛ enɔyeli lɛ bembuu moŋ ji nɔ titri ni kã wɔtsui nɔ, shi jeee wɔyi ni abaabaa. Yɛ anɔkwale mli lɛ, Yehowa ewie nɔ ni fe shii 60 sɔŋŋ yɛ Ezekiel wolo lɛ mli akɛ: “Nyɛaaná nyɛle akɛ mi ji Yehowa lɛ!” (Ezek. 6:7) No hewɔ lɛ, wɔmiishwe waa ní wɔna be ni nakai Ezekiel gbalɛ lɛ ni yɔɔ naakpɛɛ lɛ baaba mli, ni wɔyɛ hekɛnɔfɔɔ akɛ “Nuŋtsɔ [Yehowa] le bɔ ni efeɔ ejieɔ jalɔi yɛ kaa mli.” (2 Pet. 2:9) Shi dani nakai be lɛ aaashɛ lɛ, wɔmiisumɔ ni wɔŋɔ hegbɛ fɛɛ hegbɛ kɛwaje wɔhemɔkɛyeli lɛ, bɔni afee ni wɔnyɛ wɔya nɔ wɔye Yehowa anɔkwa, ekɔɔɔ he eko kai ni wɔkɛbaakpe. Mɛni esa akɛ wɔfee? Esa akɛ wɔsɔle, wɔkase Nyɔŋmɔ Wiemɔ lɛ ni wɔjwɛŋ nɔ, ni wɔjaje Maŋtsɛyeli sane lɛ wɔtsɔɔ mɛi. Nakai feemɔ baaha naanɔ wala he hiɛnɔkamɔ ni wɔyɔɔ lɛ mli awa tamɔ “sɛkɛ” ni tseee.—Heb. 6:19; Lala 25:21.
ESA AKƐ JEŊMAJI LƐ ANÁ ALE MƆ NI YEHOWA JI
10, 11. Mɛni kɛ Harmagedon baaba, ni mɛni baaya nɔ yɛ nakai beaŋ?
10 Kɛ́ atutua Yehowa tsuji lɛ, mɛɛ naakpɛɛ nɔ ko baaba? Yehowa baatsɔ Yesu kɛ eŋwɛi ta lɛ nɔ efã E-webii lɛ ahe. (Kpoj. 19:11-16) Yehowa baatsɔ “Nyɔŋmɔ Ofe lɛ gbi wulu lɛ nɔ ta lɛ”—ni ji Harmagedon ta lɛ—nɔ efã E-webii lɛ ahe.—Kpoj. 16:14, 16.
11 Yehowa tsɔ Ezekiel nɔ ewie nakai ta lɛ he akɛ: “Ni matsɛ́ klante kɛaaba [Gog nɔ] yɛ migɔji lɛ fɛɛ nɔ, Nuŋtsɔ Yehowa kɛɛ: mɔ fɛɛ mɔ klante aaakã enyɛmi nɔ.” Tsuifãa sɔŋŋ baaha mɛi ni yɔɔ Satan gbɛfaŋ lɛ ayiŋ afutu amɛ, ni amɛbaatutua amɛhe. Kɛlɛ, Satan diɛŋtsɛ he ejeŋ mli. Yehowa kɛɛ akɛ: “Maha . . . la kɛ swɔɔ anɛ ashwie [Gog] kɛ etai lɛ kɛ majimaji babaoo ní fata ehe lɛ anɔ.” (Ezek. 38:21, 22) Mɛni baajɛ nɔ ni Nyɔŋmɔ baafee nɛɛ mli kɛba?
12. Mɛni abaanyɛ jeŋmaji lɛ anɔ ni amɛfee?
12 Jeŋmaji lɛ baayɔse akɛ Yehowa diɛŋtsɛ ji mɔ ni eha akpataa amɛhiɛ lɛ. Kɛkɛ lɛ, taakɛ eba lɛ yɛ blema Mizraimbii ni tiu Israelbii lɛ kɛtee Ŋshɔ Tsuru lɛ mli lɛ agbɛfaŋ lɛ, Satan ta lɛ baabolɔ akɛ: “Yehowa . . . miiwu miiha amɛ!” (2 Mose 14:25) Hɛɛ, abaanyɛ jeŋmaji lɛ anɔ ni amɛná amɛle mɔ ni Yehowa ji. (Nyɛkanea Ezekiel 38:23.) Bei enyiɛ eshwɛ ni nibii nɛɛ fɛɛ baaje shishi?
JEŊ HEWALƐ KO ETEŊ SHI DƆŊŊ
13. Mɛni wɔle yɛ amaga ni Daniel wie he lɛ fã ni ji enumɔ lɛ he?
13 Gbalɛ ko ni yɔɔ Daniel wolo lɛ mli lɛ haa wɔnaa he ni wɔshɛ amrɔ nɛɛ. Daniel wie amaga ko ni tamɔ gbɔmɔ ni akɛ dadei srɔtoi fee lɛ he. (Dan. 2:28, 31-33) Edamɔ shi kɛha jeŋ hewalɛi srɔtoi ni etsara nɔ kɛba kɛjɛ blema kɛbashi wɔbei nɛɛ amli ní ená Nyɔŋmɔ webii anɔ hewalɛ waa lɛ. Amɛ ji Babilon, Medo-Persia, Hela, Roma—kɛ jeŋ hewalɛ kroko, ni ji naagbee nɔ yɛ wɔbei nɛɛ amli. Daniel gbalɛ lɛ haa wɔnaa akɛ naagbee jeŋ hewalɛ nɛɛ ji amaga lɛ nanetokotai kɛ enanewaobii lɛ. Yɛ Jeŋ Ta I lɛ mli lɛ, wekukpaa krɛdɛɛ ko bakã Britain kɛ United States teŋ. Hɛɛ, amaga ni yɔɔ Daniel gbalɛ lɛ mli lɛ fã ni ji enumɔ lɛ ji Anglo-Amerika Jeŋ Hewalɛ lɛ. Amaga lɛ naagbee fã lɛ ji nanetokotai lɛ, ni tsɔɔ akɛ jeŋ hewalɛ ko ni adesa kudɔɔ eteŋ shi yɛ no sɛɛ dɔŋŋ. Sũ kɛ dade nanetokotai kɛ nanewaobii lɛ feɔ bɔ ni Anglo-Amerika Jeŋ Hewalɛ lɛ nyɛɛɛ etsu nii jogbaŋŋ lɛ he mfoniri.
14. Mɛɛ jeŋ hewalɛ baaye nɔ kɛyashi Harmagedon baaba?
14 Nakai gbalɛ lɛ nɔŋŋ tsɔɔ akɛ Nyɔŋmɔ Maŋtsɛyeli lɛ, ni akɛ tɛ wulu ko fee he mfoniri lɛ, tse kɛjɛ gɔŋ ni damɔ shi kɛha Yehowa nɔyeli lɛ nɔ yɛ afi 1914. Amrɔ nɛɛ, nakai tɛ lɛ miiba kɛfoi ní ebatswa amaga lɛ nanetokotai lɛ. Ebaajwara nanetokotai lɛ kɛ amaga muu lɛ fɛɛ wɔtsɔwɔtsɔ yɛ Harmagedon. (Nyɛkanea Daniel 2:44, 45.) Belɛ, Anglo-Amerika Jeŋ Hewalɛ lɛ baakã he afee jeŋ hewalɛ ni yeɔ nɔ kɛyashi Harmagedon baaba. Kwɛ bɔ ni wɔmii baashɛ wɔhe aha beni gbalɛ nɛɛ náa emlibaa lɛ!c Shi mɛni Yehowa baafee Satan?
NƆ NI ABAAFEE NYƆŊMƆ HENYƐLƆ NI FE FƐƐ LƐ
15. Mɛni baaba Satan kɛ edaimonioi lɛ anɔ yɛ Harmagedon sɛɛ?
15 Klɛŋklɛŋ lɛ, esa akɛ Satan ana bɔ ni abaakpata eshikpɔŋ nɔ gbɛjianɔtoo lɛ fɛɛ hiɛ, kɛjɛ shishijee kɛyashi naagbee. No sɛɛ lɛ, eshɛ Satan diɛŋtsɛ hu nɔ. Bɔfo Yohane tsɔɔ nɔ ni baanyiɛ sɛɛ kɛba. (Nyɛkanea Kpojiemɔ 20:1-3.) Yesu Kristo—‘bɔfo ni hiɛ bu kwɔŋkwɔŋ lɛ naa samfee lɛ’—baamɔ Satan kɛ edaimonioi lɛ ni ekɛ amɛ baawo bu kwɔŋkwɔŋ lɛ mli afii akpe. (Luka 8:30, 31; 1 Yoh. 3:8) Nakai nifeemɔ lɛ ji onufu lɛ yitso nɔ ni abaatswa lɛ shishijee.d—1 Mose 3:15.
16. Mɛni baaba Satan nɔ yɛ “bu kwɔŋkwɔŋ” lɛ mli?
16 Mɛni ji “bu kwɔŋkwɔŋ” ni akɛ Satan kɛ edaimonioi lɛ baawo mli lɛ? Hela wiemɔ ni Yohane kɛtsu nii akɛ “bu kwɔŋkwɔŋ” lɛ tsɔɔ he ko ni mɔ ko mɔ ko nyɛɛɛ aya, ja Yehowa kɛ bɔfo ni ehala ni ‘hiɛ bu kwɔŋkwɔŋ lɛ naa samfee lɛ’ pɛ. Yɛ jɛmɛ lɛ, ebaafee tamɔ nɔ ni Satan egbo, “koni ekashishiu jeŋmaji lɛ dɔŋŋ.” Hɛɛ, abaaha “jata ni hũuɔ” lɛ amu shi kɔ̃i!—1 Pet. 5:8.
NIBII NI KƐ TOIŊJƆLƐ BAABA
17, 18. (a) Mɛɛ nifeemɔi ni anaaa wɔsusu he yɛ nikasemɔ nɛɛ mli? (b) Yɛ nifeemɔi nɛɛ asɛɛ lɛ, mɛɛ miishɛɛ shihilɛ kã wɔhiɛ?
17 Nibii ni sa kadimɔ waa kɛ nifeemɔi ni yɔɔ naakpɛɛ jwere wɔhiɛ. Wɔmiikwɛ bɔ ni kɛɛmɔ ni abaakɛɛ akɛ: “Hejɔlɛ yɛ ni wɔyɛ shweshweeshwe!” lɛ baaba mli eha lɛ gbɛ. Kɛkɛ lɛ, wɔbaana Babilon Kpeteŋkpele lɛ hiɛkpatamɔ lɛ, tutuamɔ ni Gog ni jɛ Magog lɛ kɛbaaba lɛ, kɛ Harmagedon ta lɛ. No sɛɛ lɛ, akɛ Satan kɛ edaimonioi lɛ baawo bu kwɔŋkwɔŋ lɛ mli. Kɛ́ nifeemɔi nɛɛ ba naagbee, ni nɔfɔŋfeemɔ sɛɛ fo lɛ, wɔbaaje shihilɛ hee shishi—Kristo Afii Akpe Nɔyeli lɛ, be mli ni wɔbaaná “hejɔlɛ babaoo” lɛ.—Lala 37:10, 11.
18 Yɛ nifeemɔi enumɔ ni wɔsusu he nɛɛ asɛɛ lɛ, “nii ni anaaa” krokomɛi hu yɛ ni wɔbaasumɔ ni ‘wɔkwɛ.’ Wɔbaasusu enɛɛmɛi ahe yɛ nikasemɔ ni baanyiɛ sɛɛ lɛ mli.
[Shishigbɛ niŋmai]
a Abaasusu nifeemɔi nyɔŋma lɛ ahe yɛ nikasemɔ nɛɛ kɛ nɔ ni baanyiɛ sɛɛ lɛ mli.
b Kwɛmɔ Kpojiemɔ—Enaagbee Kwraa lɛ Ebɛŋkɛ! wolo lɛ baafa 251-258 lɛ.
c Wiemɔ ni ji ‘eeekpata maŋtsɛyelii nɛɛ fɛɛ ahiɛ’ ni akɛtsu nii yɛ Daniel 2:44 lɛ kɔɔ maŋtsɛyelii, loo jeŋ hewalɛi ni amaga lɛ fãi srɔtoi lɛ feɔ amɛhe mfoniri lɛ ahe. Kɛlɛ, Biblia gbalɛ kroko ni wieɔ jeŋ hewalɛi nɛɛ ahe lɛ tsɔɔ akɛ, ‘maŋtsɛmɛi ni yɔɔ jeŋ muu lɛ fɛɛ lɛ’ kɛ Yehowa baawuu yɛ “Nyɔŋmɔ Ofe lɛ gbi wulu lɛ nɔ ta lɛ” mli. (Kpoj. 16:14; 19:19-21) No hewɔ lɛ, jeee maŋtsɛyelii ni amaga lɛ feɔ amɛhe mfoniri lɛ pɛ hiɛ abaakpata yɛ Harmagedon, shi moŋ je lɛŋ maŋtsɛyelii krokomɛi fɛɛ.
d Be ni akɛ Satan kɛ edaimonioi lɛ baawo “la kɛ swɔɔ kpaakpo” lɛ mli yɛ afii akpe lɛ sɛɛ lɛ baafee onufu lɛ yitso nɔ ni abaatswa lɛ naagbee nɔ kwraa.—Kpoj. 20:7-10; Mat. 25:41.
[Akrabatsa ni yɔɔ baafa 4]
NIFEEMƆI ENUMƆ NI BAABA:
1 Mɛi baakɛɛ, “Hejɔlɛ yɛ ni wɔyɛ shweshweeshwe!”
2 Jeŋmaji lɛ baatutua “Babilon kpeteŋkpele lɛ,” ni amɛbaakpata ehiɛ
3 Abaatutua Yehowa webii lɛ
4 Harmagedon ta lɛ
5 Akɛ Satan kɛ edaimonioi lɛ baawo bu kwɔŋkwɔŋ lɛ mli