Yitso 38

Nyɛjiea Yah Yi yɛ Ekojomɔi lɛ Ahewɔ!

 1. Mɛɛ wiemɔi Yohane nu ni tamɔ “gbee wulu ni tamɔ asafo babaoo gbee yɛ ŋwɛi” lɛ?

BABILON KPETEŊKPELE lɛ bɛ dɔŋŋ! Enɛ ji miishɛɛ sane diɛŋtsɛ. Belɛ ebɛ naakpɛɛ mɔ akɛ Yohane nu miishɛɛ yijiemɔ wiemɔi ahe yɛ ŋwɛi lɛ! “Nii nɛɛ asɛɛ lɛ minu gbee wulu ni tamɔ asafo babaoo gbee yɛ ŋwɛi miikɛɛ: Haleluya!a Yiwalaheremɔ kɛ anunyam kɛ agbojee kɛ hewalɛ lɛ ji Nuŋtsɔ wɔ-Nyɔŋmɔ lɛ nɔ! Ejaakɛ anɔkwa kɛ jalɛ ji ekojomɔi lɛ, akɛni ekojo ajwamaŋ kpeteŋkpele lɛ ni kɛ ejwamaŋbɔɔ lɛ efite shikpɔŋ lɛ, ni etɔ etsuji lɛ ala lɛ he owele yɛ enɔ lɛ. Ni amɛkɛɛ nɔ ni ji shii enyɔ akɛ: Haleluya! Ni elasu lɛ teɔ shi kɛyaa naanɔi anaanɔ.”—Kpojiemɔ 19:1-3.

 2. (a) Mɛni wiemɔ “Haleluya” lɛ tsɔɔ, ni Yohane ni nu enɛ shii enyɔ yɛ biɛ lɛ maa mɛni nɔ mi? (b) Namɔ hiɛ nyam awoɔ akɛni ekpata Babilon Kpeteŋkpele lɛ hiɛ lɛ hewɔ? Tsɔɔmɔ mli.

² Haleluya lɛlɛŋ! Wiemɔ lɛ shishi ji “Nyɛjiea Yah yi, nyɛ gbɔmɛi,” ni “Yah” ji gbɛi krɔŋkrɔŋ, Yehowa, ni afo lɛ kuku. Aakai wɔ Lalatsɛ lɛ ŋaawoo lɛ yɛ biɛ: “Nɔ fɛɛ nɔ ni muɔ lɛ—ha ejie Yah yi. Nyɛjiea Yah yi, nyɛ gbɔmɛi!” (Lala 150:6, New World Translation) Yohane ni nu ni ŋwɛi miila “Haleluya!” shii enyɔ yɛ biɛ yɛ Kpojiemɔ lɛ tsɔɔ bɔ ni anɔkwale lɛ ni ajɛɔ ŋwɛi ajieɔ lɛ kpo lɛ baaya nɔ aha yɛ be fɛɛ mli lɛ. Kristofoi a-Hela Ŋmalɛi lɛ mli Nyɔŋmɔ lɛ nɔŋŋ ji Hebri Ŋmalɛi ni tsɔ hiɛ lɛ mli Nyɔŋmɔ lɛ, ni Yehowa ji egbɛi. Nyɔŋmɔ ni ha blema Babilon gbee shi lɛ ekojo ni ekpata Babilon Kpeteŋkpele lɛ hiɛ agbɛnɛ. Nyɛkɛ anunyam fɛɛ ni sa lɛ kɛha nɔ ni enyɛ etsu nɛɛ ahaa lɛ! Hewalɛ ni kudɔ eshigbeemɔ lɛ ji enɔ shi jee jeŋmaji lɛ ni ekɛ amɛ tsu nii akɛ edɛŋdadei ni amɛfee lɛ amaŋfɔ lɛ nɔ. Yehowa pɛ ji mɔ ni esa akɛ wɔkɛ yiwalaheremɔ aha.—Yesaia 12:2; Kpojiemɔ 4:11; 7:10, 12.

 3. Mɛni hewɔ ajwamaŋ kpeteŋkpele lɛ kojomɔ lɛ sa lɛ jogbaŋŋ lɛ?

³ Mɛni hewɔ ajwamaŋ kpeteŋkpele lɛ sa kojomɔ ni tamɔ nɛkɛ waa lɛ? Yɛ mla ni Yehowa kɛha Noa lɛ—ni kɛtsɔ enɔ lɛ ekɛha adesai fɛɛ lɛ naa lɛ—la ni afɔseɔ ashwieɔ shi kɛkɛ lɛ kɛ gbele fɔbuu baa. Aku sɛɛ ati enɛ mli ekoŋŋ yɛ Nyɔŋmɔ Mla ni ekɛha Israel lɛ mli. (1 Mose 9:6; 4 Mose 35:20, 21) Agbɛnɛ, yɛ nakai Mose Mla lɛ shishi lɛ, gbɔmɔtsoŋ kɛ mumɔŋ gbalafitemɔ fɛɛ kɛ gbele baa. (3 Mose 20:10; 5 Mose 13:1-5) Babilon Kpeteŋkpele lɛ eye la yi sɔ afii akpei babaoo, ni eji mɔ ni eye ajwamaŋbɔɔ he fɔ kwraa kɛmɔ shi. Akɛ nɔkwɛmɔnɔ lɛ, mla ni Roma Katolik Sɔlemɔ lɛ ewo akɛ esɔfoi lɛ akabote gbalashihilɛ mli lɛ eha amɛteŋ mɛi pii kɛ amɛhe ewo jeŋba shara mli, ni ŋmɛnɛ amɛteŋ mɛi pii ena AIDS hela lɛ eko. (1 Korintobii 6:9, 10; 1 Timoteo 4:1-3) Shi ehe eshai wuji, ‘ni abua naa ni ekwɔ kɛyashɛ ŋwɛi tɔɔ,’ lɛ ji emumɔŋ ajwamaŋbɔɔ ni haa mɔ he jɔ̃ɔ lɛ lɛ—ni sɛɛkpee nɔ lɛ ji apasa ni etsɔɔ kɛ ehe ni ekɛyabɔɔ maŋkwralɔi ni bɛ jeŋba lɛ ahe lɛ. (Kpojiemɔ 18:5) Akɛni etoigbalamɔ lɛ enina lɛ hewɔ lɛ, ŋwɛi asafoi lɛ laa Haleluya ni ji enyɔ.

 4. Anɔkwale ni eji akɛ Babilon Kpeteŋkpele lɛ mli lasu lɛ “teɔ shi kɛyaa naanɔi anaanɔ” lɛ feɔ mɛni he okadi?

⁴ Awo Babilon Kpeteŋkpele lɛ mli la tamɔ maŋ ni aye enɔ kunim, ni lasu ni jɛ emli lɛ “teɔ shi kɛyaa naanɔi anaanɔ.” Kɛ asraafoi kunimyelɔi sha maŋtiase diɛŋtsɛ ko lɛ, emli lasu lɛ yaa nɔ eteɔ shi kɛyaa ŋwɛi bei abɔ ni lamulu lɛ edɔ lolo lɛ. Amaŋfɔ nɛɛ mli la ni tsoɔ fiofio lɛ baasha mɔ fɛɛ mɔ ni aaabɔ mɔdɛŋ akɛ eeetswa nɛkɛ maŋ nɛɛ ema shi ekoŋŋ yɛ be mli ni emli lasu lɛ teɔ shi lolo lɛ. Ni akɛni Babilon Kpeteŋkpele lɛ mli lasu lɛ teɔ shi “kɛyaa naanɔi anaanɔ” akɛ enaagbee kojomɔ lɛ he okadi hewɔ lɛ, mɔ ko mɔ ko nyɛŋ atswa nakai yiwalɛ maŋ lɛ ama shi dɔŋŋ. Apasa jamɔ etee kɛmiiya naanɔi anaanɔ. Haleluya, lɛlɛŋ!—Okɛto Yesaia 34:5, 9, 10 he.

 5. (a) Mɛni onukpai 24 lɛ kɛ hiɛkalɔi ejwɛ lɛ feɔ ni amɛkɛɔ? (b) Mɛni hewɔ Haleluya nɔheremɔ lala lɛ ŋɔɔ fɛ Haleluya nɔheremɔ lalai ni ala yɛ Kristendom sɔlemɔtsui amli fɛɛ lɛ?

⁵ Yohane na hiɛkalɔi ejwɛ ko ni amɛbɔle maŋtsɛsɛi lɛ he, kɛ onukpai 24 ni feɔ Maŋtsɛyeli niyelɔi lɛ ni yɔɔ amɛ anunyam ŋwɛi gbɛhei amli lɛ he mfoniri lɛ yɛ ninaa ko ni tsɔ hiɛ lɛ mli. (Kpojiemɔ 4:8-11) Agbɛnɛ ena amɛ ekoŋŋ yɛ be mli ni amɛlaa Haleluya ni ji etɛ yɛ Babilon Kpeteŋkpele lɛ hiɛkpatamɔ lɛ he lɛ: “Ni onukpai nyɔŋmai enyɔ kɛ ejwɛ lɛ kɛ hiɛkalɔi ejwɛ lɛ ho gbee shi ni amɛja Nyɔŋmɔ ni ta maŋtsɛsɛi lɛ nɔ lɛ, ni amɛkɛɛ: Amen, Haleluya!”b (Kpojiemɔ 19:4) Nɛkɛ anunyam Haleluya nɔheremɔ nɛɛ ji nɔ ni akɛfataa “lala hee” ni akɛjieɔ Toobi lɛ yi lɛ he. (Kpojiemɔ 5:8, 9) Agbɛnɛ amɛmiila anunyam kunimyeli lala ni atiɔ mli lɛ, amɛkɛ anunyam fɛɛ miiha Nuŋtsɔ Maŋtsɛ Yehowa yɛ kunim ni eye kwraa yɛ ajwamaŋ kpeteŋkpele, Babilon Kpeteŋkpele lɛ nɔ lɛ hewɔ. Nɛkɛ Haleluyai sɔrɔtoi nɛɛ jijeɔ kɛ ŋɔɔmɔ babaoo fe Haleluya nɔheremɔ lalai fɛɛ ni ala yɛ Kristendom sɔlemɔ tsui amli, he ni amɛgbe Yehowa, loo Yah he guɔ ni amɛkpoo lɛ yɛ lɛ. Nɛkɛ osatofeemɔ mli lala ni gbeɔ Yehowa gbɛi lɛ he guɔ lɛ efee dioo agbɛnɛ kɛmiiya naanɔi anaanɔ!

 6. Namɔ “gbee” anu lɛ, ni mɛɛ hewalɛ ewoɔ, ni namɛi naa gbɛfaŋnɔ yɛ enɔheremɔ mli?

⁶ Afi 1918 mli ni Yehowa je shishi akɛ eeewo ‘mɛi ni sheɔ egbɛi lɛ gbeyei lɛ, mɛi bibii kɛ mɛi wuji’ lɛ nyɔmɔ—ni amɛteŋ klɛŋklɛŋbii ji Kristofoi ni afɔ amɛ mu lɛ ni gboi yɛ anɔkwayeli mli, ni etee amɛ shi ni ekɛ amɛ to amɛ gbɛhe yɛ ŋwɛi akɛ onukpai 24 lɛ. (Kpojiemɔ 11:18) Mɛi krokomɛi fataa mɛnɛɛmɛi ahe amɛkɛlaa Haleluyai lɛ, ejaakɛ Yohane bɔ amaniɛ akɛ: “Ni gbee ko jɛ maŋtsɛsɛi lɛ mli kɛɛ: Nyɛjiea wɔ-Nyɔŋmɔ lɛ yi, nyɛ mɛi ni ji etsuji lɛ fɛɛ kɛ nyɛ mɛi ni nyɛsheɔ lɛ gbeyei, mɛi bibii kɛ mɛi wuji lɛ fɛɛ!” (Kpojiemɔ 19:5) Enɛ ji Yehowa Naawielɔ lɛ diɛŋtsɛ, e-Bi, Yesu Kristo, ni damɔ ‘maŋtsɛsɛi lɛ teŋ’ lɛ “gbee.” (Kpojiemɔ 5:6) Jeee ŋwɛi pɛ, shi moŋ “etsuji lɛ fɛɛ” naa nɛkɛ lala nɛɛ mli gbɛfaŋnɔ yɛ shikpɔŋ nɛɛ nɔ, ni Yohane kuu lɛ ni afɔ amɛ mu lɛ ji mɛi ni nyiɛ enɛ hiɛ yɛ shikpɔŋ lɛ nɔ. Kwɛ bɔ ni mɛnɛɛmɛi kɛ mlifilimɔ naa toiboo ni amɛfeɔ amɛhaa famɔ akɛ: “Nyɛjiea wɔ-Nyɔŋmɔ lɛ yi” lɛ mli gbɛfaŋnɔ!

 7. Kɛ akpata Babilon Kpeteŋkpele lɛ hiɛ sɛɛ lɛ, namɛi baajie Yehowa yi?

⁷ Hɛɛ, akane asafo babaoo lɛ hu afata nɛkɛ tsuji nɛɛ ahe. Kɛjɛ 1935 mli ni mɛnɛɛmɛi je shishi akɛ amɛaaje kpo kɛaajɛ Babilon Kpeteŋkpele lɛ mli ni Nyɔŋmɔ shiwoo nɛɛ eba mli yɛ amɛnɔ: “Eeejɔɔ Yehowa shelɔi lɛ, mɛi bibii kɛ mɛi wuji fɛɛ.” (Lala 115:13) Kɛ akpata Babilon Kpeteŋkpele lɛ ni tamɔ ajwamaŋ lɛ hiɛ lɛ, amɛteŋ mɛi akpekpei abɔ baafata amɛhe ‘ni amɛjie wɔ-Nyɔŋmɔ lɛ yi’—kɛ Yohane kuu lɛ kɛ ŋwɛi asafo lɛ fɛɛ. Yɛ sɛɛ mli lɛ, kɛ́ hii ni atee amɛ shi kɛba wala mli yɛ shikpɔŋ nɔ lɛ ji gbɔmɛi wuji yɛ tsutsu be ko mli aloo jeee nakai amɛji hu lɛ, ŋwanejee ko bɛ he akɛ amɛbaaya nɔ amɛla Haleluyai, yɛ be mli ni amɛaale akɛ Babilon Kpeteŋkpele lɛ etee kɛmiiya naanɔi anaanɔ lɛ. (Kpojiemɔ 20:12, 15) Yijiemɔ fɛɛ aha Yehowa yɛ kunim ni jijeɔ ni eye yɛ blema ajwamaŋ lɛ nɔ lɛ hewɔ!

 8. Mɛɛ hewalɛ kɛ kanyamɔ esa akɛ ŋwɛi lala nɔheremɔ ni ji yijiemɔ ni Yohane nu lɛ kɛha wɔ agbɛnɛ, dani akpata Babilon Kpeteŋkpele lɛ hiɛ?

⁸ Mɛɛ hewalɛ loo kanyamɔ enɛ kɛhaa wɔ fɛɛ koni wɔna Nyɔŋmɔ nitsumɔ kɛha ŋmɛnɛ lɛ mli gbɛfaŋnɔ kɛmɔ shi! Eba akɛ Yah tsuji fɛɛ aaatuu amɛtsui kɛ amɛsusuma fɛɛ amɛwo Nyɔŋmɔ kojomɔi lɛ jajemɔ mli, kɛ Maŋtsɛyeli hiɛnɔkamɔ kpeteŋkpele lɛ, bianɛ, dani Babilon Kpeteŋkpele lɛ agbee shi ni akpata ehiɛ kwraa.—Yesaia 61:1-3; 1 Korintobii 15:58.

‘Haleluya—Yehowa ji Maŋtsɛ!’

 9. Mɛni hewɔ naagbee Haleluya lɛ eyi obɔ kɛ nibii kpakpai ni jijeɔ lɛ?

⁹ Yiŋtoi krokomɛi yɛ ni aaadamɔ nɔ anya, taakɛ Yohane yaa nɔ ekɛɔ wɔ lɛ: “Ni minu gbee ko tamɔ asafo babaoo gbee kɛ nui babaoo agbee kɛ nugbɔshiimɔi ni wa agbee miikɛɛ: Haleluya!c ejaakɛ Nuŋtsɔ [Yehowa] wɔ-Nyɔŋmɔ Ofe lɛ, eje shishi eeye maŋtsɛ.” (Kpojiemɔ 19:6) Nɛkɛ naagbee Haleluya nɛɛ ji nɔ ni haa sanejajemɔ lɛ feɔ nɔ ni yeɔ emuu aloo nɔ ni ŋmɛɔ pɛpɛɛpɛ. Eji ŋwɛi gbee ni naa wa, ni yɔɔ fɛo ni ŋɔɔ fe adesa lalatsɛmɛi akuu ko nɔ̃, egbojee lɛ da fe shikpɔŋ nɔ nui ni jɛɔ tɛsai ayiteŋ amɛshwieɔ jɔɔ mli, ni eyɛ gbeyei fe shikpɔŋ nɔ nugbɔshiimɔi fɛɛ. Ŋwɛi gbeei akpei nyɔŋmai abɔ lɛ yeɔ anɔkwale ni eji akɛ “Nuŋtsɔ [Yehowa], wɔ-Nyɔŋmɔ Ofe lɛ miiye maŋtsɛ” lɛ he gbijurɔ.

10. Mɛɛ shishinumɔ mli aaanyɛ akɛɛ yɛ akɛ Yehowa eje shishi eeye maŋtsɛ yɛ Babilon Kpeteŋkpele lɛ hiɛkpatamɔ lɛ sɛɛ?

¹⁰ Shi, ani kpaako Yehowa eje nɔyeli shishi? Afii akpei abɔ eho kɛjɛ be mli ni Lalatsɛ lɛ jaje akɛ: “Shi Nyɔŋmɔ ji mi-Maŋtsɛ kɛjɛ blema beebe” lɛ. (Lala 74:12) No mli lɛ, Yehowa maŋtsɛyeli lɛ yɛ kɛjɛ blema po ni fe nakai, no hewɔ lɛ te aaafee tɛŋŋ ni ŋwɛi lalatsɛmɛi lɛ aaala akɛ “Yehowa . . . eje shishi eeye maŋtsɛ” lɛ? No ji akɛ, kɛ akpata Babailon Kpeteŋkpele lɛ hiɛ lɛ, Yehowa naŋ bienyɛ hewolɔ ko koni egbala mɛi kɛjɛ toiboo ni amɛaafee amɛha lɛ akɛ Jeŋ Muu Fɛɛ Maŋtsɛ lɛ he dɔŋŋ. Apasa jamɔ woŋ shikpɔŋ lɛ nɔ nɔyelɔi ayiŋ ni amɛte shi amɛwo lɛ dɔŋŋ. Beni blema Babilon gbee shi akɛ jeŋ hewalɛ lɛ, Zion nu kunimyeli sanejajemɔ nɛɛ: “O-Nyɔŋmɔ lɛ yeɔ maŋtsɛ lɛ!” (Yesaia 52:7) Yɛ Maŋtsɛyeli lɛ fɔmɔ yɛ 1914 sɛɛ lɛ, onukpai 24 lɛ jaje akɛ: “Wɔmiidao shi, bo Nuŋtsɔ [Yehowa] Ofe lɛ, . . . akɛ oŋɔ ohewalɛ kpeteŋkpele lɛ ni oye maŋtsɛ.” (Kpojiemɔ 11:17) Agbɛnɛ, yɛ Babilon Kpeteŋkpele lɛ hiɛkpatamɔ lɛ sɛɛ nɛɛ, anu bolɔmɔ lɛ he ekoŋŋ akɛ: “Yehowa . . . eje shishi eeye maŋtsɛ.” Nɔ ko ni adesa kɛ enine efee akɛ nyɔŋmɔ ehiŋ shi ni epele anɔkwa Nyɔŋmɔ kome, Yehowa, maŋtsɛyeli lɛ he dɔŋŋ!

Toobi lɛ Yookpeemɔ lɛ Eshɛ!

11, 12. (a) Te blema Yerusalem wie blema Babilon he eha tɛŋŋ, ni mɛɛ nɔkwɛmɔnɔ enɛ fee kɛha Yerusalem Hee lɛ kɛ Babilon Kpeteŋkpele lɛ? (b) Beni aye Babilon Kpeteŋkpele lɛ nɔ kunim sɛɛ lɛ, mɛɛ lala ŋwɛi asafoi lɛ la ni amɛtswa he adafi?

¹¹ ‘Yoo ni ji mihenyɛlɔ’! Nakai ji bɔ ni Yerusalem, he ni Yehowa sɔlemɔwe jamɔ lɛ yɔɔ lɛ wie yɛ wɔŋjamɔ Babilon he. (Mika 7:8) Nakai nɔŋŋ hu, “maŋ krɔŋkrɔŋ, ni ji Yerusalem hee lɛ” ni emli bii 144,000 lɛ ji ayemforo lɛ yɔɔ nɔ ni amɛbaadamɔ nɔ amɛwie Babilon Kpeteŋkpele lɛ he akɛ eji amɛhenyɛlɔ. (Kpojiemɔ 21:2) Shi naagbee lɛ, haomɔ, amanehulu, kɛ hiɛkpatamɔ eba ajwamaŋ kpeteŋkpele lɛ nɔ. Emumɔi atsɛmɔ nifeemɔi kɛ ŋulamiaŋkwɛlɔi lɛ nyɛɛɛ ahere eyiwala. (Okɛto Yesaia 47:1, 11-13 he.) Eji kunimyeli wulu lɛlɛŋ, kɛha anɔkwa jamɔ!

¹² Akɛni ajwamaŋ ni anyaŋeɔ lɛ lɛ, Babilon Kpeteŋkpele lɛ, etee kɛmiiya naanɔ hewɔ lɛ, abaanyɛ agbala jwɛŋmɔ kɛya Toobi lɛ ayemforo ni ji obalayoo foro ni he tse lɛ nɔ agbɛnɛ! No hewɔ lɛ, ŋwɛi asafoi lɛ kɛ mlifilimɔ laa amɛkɛjieɔ Yehowa yi: “Nyɛhaa wɔmii ashɛa ni wɔmli afilia wɔ ni wɔwoa ehiɛ nyam! Ejaakɛ Toobi lɛ yookpeemɔ lɛ eshɛ, ni eŋa lɛ esaa ehe eto. Ni aha lɛ klala ni he tse ni kpɛɔ nyɛramnyɛram koni ewo. Ejaakɛ klala lɛ ji krɔŋkrɔŋbii lɛ ajalɛ nii lɛ.”—Kpojiemɔ 19:7, 8.

13. Mɛɛ hesaamɔ kɛha Toobi lɛ yookpeemɔ lɛ etee nɔ kɛtsɔ afii ohai abɔ lɛ amli?

¹³ Yesu etee nɔ ejɛ suɔmɔ mli esaa ehe kɛha nɛkɛ ŋwɛi yookpeemɔ nɛɛ kɛtsɔ afii ohai abɔ lɛ mli. (Mateo 28:20; 2 Korintobii 11:2) Etee nɔ etsuu 144,000 lɛ ni feɔ mumɔŋ Israel he “koni eŋɔ lɛ edamɔ shi eha lɛ diɛŋtsɛ ehe akɛ anunyam asafo ni he bɛ kpa ko aloo hiɛkuamɔ ko aloo nakai nɔ ko, shi moŋ efee krɔŋkrɔŋ ni shwamɔ ko akahi ehe.” (Efesobii 5:25-27) Bɔni afee ni amɛnine ashɛ “Nyɔŋmɔ tsɛmɔ ni jɛ ŋwɛi . . . lɛ he jweremɔ nɔ lɛ” nɔ hewɔ lɛ, esa akɛ Kristofonyo fɛɛ Kristofonyo ni afɔ lɛ mu lɛ ajie esu kɛ baŋ momo lɛ kɛ enifeemɔi lɛ eshwie, ni ewo Kristofoi agbɔmɔtso hee lɛ, ni etsu jalɛ nii ‘kɛjɛ esusuma muu fɛɛ mli akɛ Yehowa etsuɔ ehaa.’—Filipibii 3:8, 13, 14; Kolosebii 3:9, 10, 23.

14. Mɛɛ gbɛ nɔ Satan etsɔ ebɔ mɔdɛŋ yɛ akɛ eeefite Toobi lɛ ŋa lɛ mli bii lɛ?

¹⁴ Kɛjɛ Pentekoste afi 33 Ŋ.B. kɛbaa lɛ, Satan kɛ Babilon Kpeteŋkpele lɛ tsu nii akɛ edɛŋdade yɛ mɔdɛŋ ni ebɔɔ koni efite mɛi ni feɔ Toobi lɛ ŋa lɛ mli bii lɛ mli. Beni shɛɔ klɛŋklɛŋ afii oha lɛ naagbee lɛ, enyɛ etɛo Babilon jamɔ mli dumɔwui ewo asafo lɛ mli. (1 Korintobii 15:12; 2 Timoteo 2:18; Kpojiemɔ 2:6, 14, 20) Bɔfo Paulo tsɔɔ mɛi ni fiteɔ hemɔkɛyeli lɛ yɛ nɛkɛ wiemɔi nɛɛ amli: “Ejaakɛ nɛkɛ mɛi nɛɛ ji amale bɔfoi, nitsulɔi shishiulɔi ni tsakeɔ amɛhe feɔ Kristo bɔfoi. Ni enɛ bɛ naakpɛɛ tete; ejaakɛ Satan diɛŋtsɛ tsakeɔ ehe etsɔɔ la bɔfo.” (2 Korintobii 11:13, 14) Yɛ afii ohai abɔ ni nyiɛ sɛɛ ba lɛ amli lɛ, Kristendom ni ekwa hemɔkɛyeli lɛ kɛ atadei ni jara wawai kɛ hegbɛi saa ehe, “afaseo diŋ kɛ muneele atade, . . . shika kɛ tɛi ni jara wa kɛ adiagbai,” taakɛ Babilon Kpeteŋkpele lɛ mli bii ni eshwɛ lɛ fee lɛ. (Kpojiemɔ 17:4) Esɔfoi lɛ kɛ paapai lɛ kɛ maŋtsɛmɛi ni la he kumai yeɔ amɛ bɔ, tamɔ Konstantino kɛ Charlemagne. Ekɛ “krɔŋkrɔŋbii lɛ ajalɛ nii lɛ” esaaa ehe kɔkɔɔkɔ. Akɛ amale loo kantafiti ayemforo lɛ, eji Satan shishiumɔ nitsumɔ diɛŋtsɛ. Shi yɛ naagbee lɛ, etee kɛmiiya naanɔi anaanɔ!

Toobi lɛ Ŋa lɛ Esaa Ehe Eto

15. Amɛnaasɔomɔ lɛ baa yɛ mɛɛ gbɛ nɔ, ni mɛni ataoɔ yɛ Kristofonyo ni afɔ lɛ mu lɛ dɛŋ?

¹⁵ No hewɔ lɛ agbɛnɛ, yɛ nɔ ni shɛɔ aaafee afii 2,000 sɛɛ nɛɛ, ayemforo kuu lɛ mli bii ni ji 144,000 lɛ fɛɛ efee klalo. Shi mɛɛ be mli aloo be naa abaanyɛ akɛɛ akɛ ‘Toobi lɛ ŋa lɛ esaa ehe eto’? Fiofio, kɛjɛ Pentekoste afi 33 Ŋ.B. kɛbaa nɛɛ, akɛ “shiwoo . . . mumɔ krɔŋkrɔŋ lɛ esɔo” mɛi ni afɔ amɛ mu lɛ ni heɔ yeɔ lɛ anaa, ni enɛ baa lɛ nakai yɛ “kpɔmɔ gbi” lɛ hewɔ. Taakɛ bɔfo Paulo wie he lɛ, Nyɔŋmɔ “esɔo wɔnaa, ni ekɛ mumɔ krɔŋkrɔŋ lɛ yibaafoo nɔ eha wɔ yɛ wɔtsuii amli hu.” (Efesobii 1:13; 4:30; 2 Korintobii 1:22) Kristofonyo fɛɛ Kristofonyo ni afɔ lɛ mu lɛ ji mɔ “ni atsɛ kɛ [mɔ] ni ahala,” ni ejie ehe kpo akɛ “anɔkwafo.”—Kpojiemɔ 17:14.

16. (a) Mɛɛ be mli bɔfo Paulo naasɔomɔ lɛ ba naagbee, ni te wɔfeɔ tɛŋŋ wɔleɔ? (b) Mɛɛ be mli abaanyɛ akɛɛ akɛ Toobi lɛ ŋa lɛ “esaa ehe eto” kwraa?

¹⁶ Beni akɛ afii nyɔŋmai abɔ eka lɛ lɛ sɛɛ lɛ, Paulo diɛŋtsɛ baanyɛ ajaje akɛ: “Ta kpakpa lɛ, miwuu; foidamɔ lɛ, mida migbe naa; hemɔkɛyeli lɛ, mihiɛ mli tswɛ; nɔ ni eshwɛ ni ka shi ha mi ji jalɛ akekere lɛ, ni Nuŋtsɔ ni ji jalɛ kojolɔ lɛ baaha mi yɛ nakai gbi lɛ nɔ lɛ, ni jeee mikome ebaaha, shi moŋ mɛi bluublu ni sumɔɔ epuemɔ lɛ hu.” (2 Timoteo 4:7, 8) Etamɔ nɔ ni asɔo bɔfo lɛ naa agbe naa, eyɛ mli akɛ eyɛ heloo mli lolo ni ekɛ la odasefonyo gbele baakpe. Nakai nɔŋŋ hu, be baashɛ ni abaasɔo 144,000 lɛ mli bii ni eshwɛ yɛ shikpɔŋ lɛ nɔ lɛ fɛɛ anaa aŋkroaŋkro akɛ amɛji Yehowa nii. (2 Timoteo 2:19) Enɛ baaba mli yɛ be mli ni Toobi lɛ ŋa lɛ baasaa ehe agbe naa kwraa—ni 144,000 lɛ mli bii lɛ ateŋ mɛi ni fa lɛ anine eshɛ amɛŋwɛi jweremɔ nɔ lɛ nɔ ni mɛi ni yɔɔ shikpɔŋ nɔ lolo lɛ hu efee mɛi ni yɛ naagbee lɛ akpɛlɛ amɛnɔ ni asɔo amɛnaa akɛ anɔkwafoi lɛ.

17. Mɛɛ be mli Toobi lɛ yookpeemɔ lɛ baanyɛ aba nɔ yɛ?

¹⁷ Yɛ nɛkɛ be nɛɛ mli yɛ Yehowa be buu naa, beni 144,000 lɛ anaasɔomɔ lɛ eshɛ naagbee kwraa lɛ, agbɛnɛ ŋwɛibɔfoi lɛ ŋmɛɛɔ kɔɔyɔi ejwɛ ni kɛ amanehulu kpeteŋkpele lɛ baa lɛ ahe. (Kpojiemɔ 7:1-3) Klɛŋklɛŋ lɛ, atsuɔ fɔbuu kojomɔ he nii ashiɔ Babilon Kpeteŋkpele ni tamɔ ajwamaŋ lɛ. No sɛɛ lɛ, Kristo kunimyelɔ lɛ tsaa nɔ yɛ oyaiyeli mli kɛyaa Harmagedon koni eyakpata Satan gbɛjianɔtoo ni eshwɛ yɛ shikpɔŋ nɔ lɛ hiɛ, koni yɛ naagbee lɛ, ekɛ Abonsam kɛ edaimonioi lɛ awo bu kwɔŋkwɔŋ lɛ mli. (Kpojiemɔ 19:11-20:3) Kɛ́ mɛi ni afɔ amɛ mu lɛ ateŋ mɛi komɛi yɛ shikpɔŋ lɛ nɔ lolo lɛ, ŋwanejee ko bɛ he akɛ amɛnine baashɛ amɛŋwɛi nyɔmɔwoo lɛ nɔ ni amɛyafata amɛnanemɛi ayemforo kuu lɛ mli bii lɛ ahe kɛ́ Kristo gbe ekunimyeli lɛ naa nɔŋŋ. Kɛkɛ lɛ, Toobi lɛ yookpeemɔ lɛ baaya nɔ yɛ be ni Nyɔŋmɔ eto lɛ mli!

18. Lala 45 maa bɔ ni ato nibii anaa aha akɛ eeeba yɛ Toobi lɛ yookpeemɔ lɛ mli lɛ nɔ mi yɛ mɛɛ gbɛ nɔ?

¹⁸ Bɔ ni atsɔ gbalɛ nɔ atsɔɔ nibii amli aha yɛ Lala 45 lɛ tsɔɔ bɔ ni ato nibii ni baaya nɔ lɛ anaa aha lɛ mli. Klɛŋklɛŋ lɛ, Maŋtsɛ ni ta okpɔŋɔ nɔ lɛ yaa koni eyaye ehenyɛlɔi anɔ kunim. (Kukuji 1-7) Kɛkɛ lɛ atsu yookpeemɔ lɛ he nii, ni ŋwɛi ayemforo lɛ nanemɛi obalayei, asafo babaoo lɛ sɔmɔɔ lɛ yɛ shikpɔŋ nɔ. (Kukuji 8-15) Nɔ ni nyiɛ sɛɛ lɛ, gbalashihilɛ lɛ woɔ yibii, ateɔ adesai ashi kɛbaa emuuyeli mli yɛ “lumɛi yɛ shikpɔŋ lɛ nɔ fɛɛ” lɛ anɔkwɛmɔ shishi. (Kukuji 16, 17) Mɛɛ anunyam jɔɔmɔi fataa Toobi lɛ yookpeemɔ lɛ he baa nɛkɛ!

Miishɛɛ ji Mɛi ni Afɔ Nine Atsɛ Amɛ Lɛ

19. Mɛni ji miishɛɛ sɔrɔtoi kpawo ni yɔɔ Kpojiemɔ lɛ mli nɔ ni ji ejwɛ lɛ, ni namɛi naa gbɛfaŋnɔ yɛ nɛkɛ miishɛɛ pɔtɛɛ nɛɛ mli?

¹⁹ Agbɛnɛ Yohane ŋma miishɛɛi sɔrɔtoi kpawo ni yɔɔ Kpojiemɔ lɛ mli nɔ ni ji ejwɛ lɛ: “Ni [bɔfo lɛ ni jieɔ nibii nɛɛ akpo etsɔɔ Yohane lɛ] ekɛɛ mi akɛ: ‘Ŋmaa: Miishɛɛ ji mɛi ni atsɛ amɛ kɛba Toobi lɛ yookpeemɔ gbɛkɛnaashi okpɔlɔ lɛ he lɛ.’ Agbɛnɛ, ekɛɛ mi akɛ: ‘Nyɔŋmɔ anɔkwa wiemɔi lɛ nɛ.’” (Kpojiemɔ 19:9, New World Translation)d Mɛi ni atsɛ amɛ kɛba “Toobi lɛ yookpeemɔ gbɛkɛnaashi okpɔlɔ lɛ he lɛ” ji ayemforo kuu lɛ mli bii lɛ. (Okɛto Mateo 22:1-14 he.) Ayemforo kuu lɛ mli bii ni afɔ amɛ mu lɛ fɛɛ naa miishɛɛ ni jɛɔ ninefɔɔ nɛɛ mli baa lɛ eko. Mɛi ni atsɛ amɛ lɛ ateŋ mɛi titri ji mɛi ni amɛtee ŋwɛi momo, he ni gbɛkɛnaashi yookpeemɔ niyenii lɛ baaba yɛ lɛ. Mɛi ni yɔɔ shikpɔŋ nɔ lolo lɛ hu yɛ miishɛɛ, ejaakɛ amɛ hu atsɛ amɛ. Amɛgbɛhe yɛ gbɛkɛnaashi yookpeemɔ niyenii lɛ shishi lɛ ji nɔ ni ama nɔ mi. (Yohane 14:1-3; 1 Petro 1:3-9) Kɛ atee amɛ shi kɛtee ŋwɛi lɛ, kɛkɛ lɛ ayemforo kuu lɛ mli bii fɛɛ ni efee ekome lɛ baaya nɔ ni amɛkɛ Toobi lɛ ana nakai yookpeemɔ ni miishɛɛ ni fe fɛɛ yɔɔ mli lɛ mli gbɛfaŋnɔ.

20. (a) Mɛni wiemɔi nɛɛ tsɔɔ: “Nyɔŋmɔ anɔkwa wiemɔi lɛ nɛ”? (b) Bɔfo lɛ wiemɔi lɛ sa Yohane he yɛ mɛɛ gbɛ nɔ, ni mɛni bɔfo lɛ kɛɛ?

²⁰ Bɔfo lɛ kɛfata he akɛ “Nyɔŋmɔ anɔkwa wiemɔi lɛ nɛ.” Akɛ Hela wiemɔ a·le·thi·nosʹ lɛ tsɔɔ “anɔkwa” shishi ni eshishi ji “krɔŋŋ” aloo “nɔ ni anyɛɔ akɛ he fɔɔ nɔ.” Akɛni nɛkɛ wiemɔi nɛɛ jɛ Yehowa ŋɔɔ diɛŋtsɛ hewɔ lɛ, anɔkwale ni anyɛɔ akɛ he fɔɔ nɔ ni. (Okɛto 1 Yohane 4:1-3; Kpojiemɔ 21:5; 22:6 he.) Akɛ mɔ ni atsɛ lɛ akɛ eba nakai yookpeemɔ okpɔlɔŋmɛɛ lɛ shishi lɛ, Yohane baanyɛ afee mɔ ni na miishɛɛ waa beni enu enɛ he ni esusuɔ jɔɔmɔi ni ka shi kɛha ayemforo kuu lɛ he lɛ. Enɛ sa ehe waa diɛŋtsɛ, yɛ anɔkwale mli lɛ, ehe bahia po ni bɔfo lɛ awo lɛ ŋaa, taakɛ Yohane jajeɔ lɛ: “Ni miho migbee enajianaa ní maja lɛ. Ni ekɛɛ mi akɛ: Kaakwɛ ni ofee! Onaanyo kɛ onyɛmimɛi lɛ ni hiɛ Yesu odase lɛ mli lɛ ateŋ mɔ ko ji mi; Nyɔŋmɔ moŋ oja!”—Kpojiemɔ 19:10a.

21. (a) Mɛni Kpojiemɔ jieɔ lɛ kpo yɛ bɔfoi ahe? (b) Mɛɛ sui esa akɛ Kristofoi ana yɛ bɔfoi ahe?

²¹ Ayeɔ bɔfoi lɛ anɔkwayeli kɛ mɔdɛŋbɔɔ he odase kɛ hiɛsɔɔ yɛ Kpojiemɔ wolo muu lɛ fɛɛ mli. Amɛfata anɔkwalei ni ajieɔ lɛ kpo lɛ he. (Kpojiemɔ 1:1) Amɛfata adesai ahe kɛshiɛɔ sanekpakpa lɛ kɛ agbɛnɛ okadi haomɔi lɛ ni afɔseɔ ashwieɔ shi lɛ. (Kpojiemɔ 14:6, 7; 16:1) Amɛfata Yesu he amɛkɛ lɛ wuu ni akɛshwie Satan kɛ ebɔfoi lɛ kɛjɛ ŋwɛi lɛ, ni amɛbaafata ehe ekoŋŋ yɛ Harmagedon tawuu lɛ mli. (Kpojiemɔ 12:7; 19:11-14) Yɛ anɔkwale mli lɛ, amɛnyɛɔ amɛyaa Yehowa diɛŋtsɛ hiɛ. (Mateo 18:10; Kpojiemɔ 15:6) Ni kɛlɛ, amɛji Nyɔŋmɔ tsuji ni baa amɛhe shi kɛkɛ. Gbɛ ko bɛ akɛ aaaja bɔfoi aloo akɛ jamɔ ni akɛtoɔ nɔ ko he po aaaha amɛ, ni atsɔ “hetselɔ” aloo bɔfo ko nɔ akɛ jamɔ aha Nyɔŋmɔ yɛ jamɔ krɔŋŋ mli. (Kolosebii 2:18) Kristofoi jaa Yehowa pɛ, amɛkɛ amɛfaikpamɔ fɔɔ ehiɛ kɛtsɔɔ Yesu gbɛi anɔ.—Yohane 14:12, 13.

Yesu Nitsumɔ yɛ Gbalɛ Mli

22. Mɛni bɔfo lɛ kɛɛ Yohane, ni mɛni ji wiemɔi lɛ ashishinumɔ?

²² Kɛkɛ ni bɔfo lɛ kɛɛ: “Ejaakɛ odase ni ayeɔ ahaa Yesu lɛ ji nɔ ni kanyaa gbalɛ ni jɛ mumɔŋ lɛ.” (Kpojiemɔ 19:10b, New World Translation) Yɛ mɛɛ gbɛ nɔ? Enɛ tsɔɔ akɛ akanyaa loo atsɛɔ gbalɛ ni jɛ mumɔŋ lɛ fɛɛ yɛ Yesu hewɔ kɛ nitsumɔ ni etsuɔ yɛ Yehowa yiŋtoo mli lɛ hewɔ. Klɛŋklɛŋ gbalɛ ni yɔɔ Biblia lɛ mli lɛ wo shi akɛ seshi ko baaba. (1 Mose 3:15) Yesu batsɔ nakai Seshi lɛ. Kpojiemɔi ni tsara nɔ lɛ tswa gbalɛ anɔkwale tsu agbo ko ema nɛkɛ shishijee shiwoo nɛɛ nɔ. Bɔfo Petro kɛɛ Kornelio Jeŋmaŋnyo ni heɔ yeɔ lɛ akɛ: “Lɛ [Yesu] ehe odase gbalɔi lɛ fɛɛ yeɔ.” (Bɔfoi lɛ Asaji 10:43) Yɛ afii 20 sɛɛ lɛ, bɔfo Paulo kɛɛ akɛ: “Shi Nyɔŋmɔ shiwoi abɔ ni yɔɔ nɛɛ, [Yesu] emli hɛɛ lɛ yɔɔ.” (2 Korintobii 1:20) Yɛ afii 43 krokomɛi asɛɛ lɛ, Yohane diɛŋtsɛ kaiɔ wɔ akɛ: “Anɔkwale lɛ, Yesu Kristo kɛba.”—Yohane 1:17.

23. Mɛni hewɔ gbɛhe kɛ hegbɛ ni kwɔ ni Yesu yɔɔ mli lɛ gbalaaa jwɛŋmɔ kɛjɛɛɛ jamɔ ni wɔkɛhaa Yehowa lɛ nɔ lɛ?

²³ Ani enɛ gbalaa wɔjwɛŋmɔ kɛjɛɔ jamɔ ni wɔkɛhaa Yehowa lɛ nɔ yɛ gbɛ ko nɔ? Dabi. Kaimɔ bɔfo lɛ kɔkɔbɔɔ ŋaawoo lɛ: “Nyɔŋmɔ moŋ oja!” Yesu ebɔɔɔ mɔdɛŋ akɛ ekɛ Yehowa aaaye egbɔ ko. (Filipibii 2:6) Eji anɔkwale akɛ, akɛɔ bɔfoi lɛ fɛɛ akɛ “ha Nyɔŋmɔ bɔfoi lɛ aja lɛ [Yesu],” ni esa akɛ bɔɔ nii fɛɛ ayoo egbɛhe ni kwɔ lɛ koni “nakutso fɛɛ nakutso akula shi yɛ Yesu gbɛi lɛ amli.” Shi kadimɔ enɛ, “kɛwo Tsɛ Nyɔŋmɔ lɛ hiɛ nyam” yɛ efamɔ naa. (Hebribii 1:6; Filipibii 2:9-11) Yehowa kɛ Yesu hegbɛ ni kwɔ lɛ ha lɛ, ni kɛ wɔkpɛlɛ nakai hegbɛ lɛ nɔ lɛ, belɛ wɔkɛ anunyam miiha Nyɔŋmɔ. Kɛ wɔkpooɔ akɛ wɔɔba wɔhe shi wɔha Yesu nɔyeli lɛ, etamɔ akɛ wɔmiikpoo Yehowa Nyɔŋmɔ diɛŋtsɛ.—Lala 2:11, 12.

24. Mɛɛ gbɛkpamɔi enyɔ ni yɔɔ naakpɛɛ wɔsusuɔ he lɛ, ni mɛɛ wiemɔi esa akɛ wɔjaje wɔtsɔɔ?

²⁴ No hewɔ lɛ, nyɛhaa wɔkɛ gbee kome ajajea Lala 146 kɛyashi 150 lɛ mli shishijee wiemɔi lɛ: “Nyɛjiea Yah yi, nyɛ gbɔmɛi!” Eba akɛ Haleluya nɔheremɔ lala lɛ aaajije tamɔ nugbɔshiimɔi ni akɛmiikpa kunim ni Yehowa aaaye yɛ Babilon jeŋ apasa jamɔ maŋtsɛyeli lɛ nɔ lɛ gbɛ! Ni eba akɛ miishɛɛ babaoo baahi shi yɛ be mli ni Toobi lɛ yookpeemɔ lɛ bɛŋkɛɔ lɛ!

[Shishigbɛ niŋmai]

[Akrabatsa ni yɔɔ baafa 273]

“Wolo ni Aŋma Ayaha Sodom kɛ Gomora”

London Daily Telegraph adafitswaa wolo ni ji November 12, 1987, nɔ lɛ bɔ amaniɛ yɛ sane ko ni ka Church of England Osɔfoi lɛ kɛ Asafoŋ Onukpai Agwabɔɔ lɛ hiɛ lɛ he. Enɛ bi ni ashwie “Kristofoi” ni ji hii kɛ hii ni kɛ amɛhe feɔ yakayaka nii lɛ kɛjɛ sɔlemɔ lɛ mli. Niŋmalɔ Godfrey Barker jaje akɛ: “Archbishop of Canterbury ni ji sɔlemɔ lɛ nɔkwɛlɔ lɛ kɛ miishɛɛ ni bɛ tsɔɔ ejwɛŋmɔ yɛ he akɛ: ‘Kɛji akɛ Hetselɔ Paulo baaŋma wolo eyaha Church of England lɛ, wɔbaanyɛ wɔbi akɛ mɛɛ wolo nɛkɛ enɛ aaaji.’” Owura Barker diɛŋtsɛ ha hetoo akɛ: “Wolo ni aŋma ayaha Sodom kɛ Gomora ji hetoo lɛ,” ni ekɛfata he akɛ: “Dr Runcie [osɔfonukpa lɛ] susuɔ akɛ ekanemɔ lɛ baatamɔ Romabii, yitso 1.”

Niŋmalɔ lɛ tsɛ Paulo wiemɔi ni yɔɔ Romabii 1:26-32 lɛ: “Nyɔŋmɔ ŋmɛɛ amɛhe eha hiɛgbejianii ahe hiɛdɔi lɛ. . . . Ni hii kɛ hii tsuɔ hiɛgbejianii . . . mɛi ni le Nyɔŋmɔ jalɛ nii lɛ krɛdɛɛ akɛ mɛi ni tsuɔ nakai nii lɛ sa gbele, ni kɛlɛ jeee feemɔ kɛkɛ amɛfeɔ, shi moŋ amɛnaa mɛi ni tsuɔ nakai nii lɛ ahe tsui hu lɛ.” Kɛkɛ ni emu sane naa akɛ: “Hetselɔ Paulo ehao yɛ gbɔmɛi ni tara sɛii nɛɛ anɔ lɛ ahe. Dr Runcie naagba lɛ ji gbɔmɛi ni damɔ shiɛmɔ adekai lɛ amli lɛ.”

Mɛni hewɔ naagba ni tamɔ nɛkɛ ka osɔfonukpa lɛ nɔ lɛ? No mli lɛ Daily Mail adafitswaa wolo ni aŋma yɛ October 22, 1987, yɛ London lɛ hiɛ wiemɔi wuji yɛ wolo lɛ hiɛ ni jajeɔ akɛ: “‘Osɔfo kome yɛ hii kɛ hii ni kɛ amɛhe feɔ yakayaka nii etɛ mli’ . . . tafaa ni akɛaashwie hii kɛ hii ni kɛ amɛhe feɔ yakayaka nii lɛ ‘baaha aŋa Church of England shinaa lɛ kwraa.’” Amaniɛbɔɔ lɛ tsɛ wiemɔ kɛjɛ “osɔfo” ni ji Yei kɛ Yei ni kɛ Amɛhe Feɔ Yakayaka Nii kɛ Hii kɛ Hii ni kɛ Amɛhe Feɔ Yakayaka Nii a-Kristofoi Akuu lɛ woloŋmalɔ nukpa lɛ wiemɔi amli akɛ: “Kɛ akpɛlɛ nɛkɛ mla nɛɛ nɔ lɛ, ebaafite Sɔlemɔ lɛ, ni Archbishop of Canterbury ni ji osɔfonukpa lɛ le enɛ. Kɛ abu naa lɛ, wɔheɔ wɔyeɔ akɛ Church of England osɔfoi lɛ ateŋ oha fɛɛ mli 30 kɛmiiya oha fɛɛ mli 40 ji hii kɛ hii ni kɛ amɛhe feɔ yakayaka nii. Ni amɛji mɛi ni kɛ ekaa yeɔ buaa Sɔlemɔ lɛ sɔɔmɔ nitsumɔ lɛ.” Ŋwanejee ko bɛ he akɛ sɔlemɔyalɔi ni amɛyifalɛ baa shi lɛ tsɔɔ nyaŋemɔ ni amɛnyaŋeɔ hii kɛ hii ni kɛ amɛhe feɔ yakayaka nii ni amɛkɛ amɛhe ewo sɔɔmɔ nitsumɔ mli lɛ ni shwereɔ kɛyaa hiɛ lɛ.

Mɛni sɔlemɔ lɛ gwabɔɔ lɛ kpɛ amɛyiŋ yɛ he akɛ amɛbaafee? Amɛteŋ mɛi ni fa ni ji 388 (osɔfoi lɛ ateŋ oha fɛɛ mli 95) fɔ oshiki akɛ amɛmiisumɔ mla ni mli waaa. Economist ni aŋma yɛ November 14, 1987, lɛ bɔ enɛ he amaniɛ akɛ: “Church of England sumɔɔɔ hii kɛ hii ni kɛ amɛhe feɔ yakayaka nii lɛ, shi jeee waa tsɔ. Gwabɔɔ lɛ, ni ji Sɔlemɔ lɛ mlawoo gwabɔɔ lɛ ni osɔfoi ni ji hii kɛ hii ni kɛ amɛhe feɔ yakayaka nii yɔɔ amɛjwɛŋmɔ mli lɛ kpɛ yiŋ otsi nɛɛ akɛ hii kɛ hii ni kɛ amɛhe feɔ yakayaka nii ni tamɔɔɔ ajwamaŋbɔɔ kɛ gbalafitemɔ lɛ, jeee esha: eshɛɛɛ ‘nii ni yɔɔ fɛo’ ni ji ‘bɔlɛnamɔ ni ji nifeemɔ ni yaa nɔ yɛ gbalashihilɛ wekukpaa ni hiɔ shi daa lɛ mli ni asumɔɔ lɛ he.’” Beni etsɔɔ sɔrɔtofeemɔ ni yɔɔ Archbishop of Canterbury gbɛhe lɛ kɛ bɔfo Paulo sane ni ejaje ni mli ka shi faŋŋ yɛ Romabii 1:26, 27 lɛ mli lɛ, The Economist lɛ ŋma Paulo wiemɔi lɛ yɛ wolo lɛ mli ni ekɛ saneyitso nɛɛ wo wiemɔ ni ji “Hetselɔ Paulo le nɔ ni esusuɔ lɛ” yiteŋgbɛ.

Yesu Kristo hu le nɔ ni esusuɔ ni ejaje enɛ yɛ faŋŋ mli. Ekɛɛ akɛ “ejaraŋ haŋ Sodom shikpɔŋ lɛ yɛ kojomɔ gbi lɛ nɔ” tamɔ bɔ ni eeeji eha nyɔŋmɔi ajalɔi ni kuɔ amɛhiɛ amɛshwieɔ ewiemɔi anɔ lɛ. (Mateo 11:23, 24) Yesu kɛ wiemɔ ko ni ewo he miitsu nii yɛ biɛ ekɛmiitsɔɔ akɛ nakai jamɔ mli hiɛnyiɛlɔi lɛ ni kpoo Nyɔŋmɔ Bi lɛ kɛ etsɔɔmɔ lɛ ji mɛi ni ahiɔ loo anyaŋeɔ babaoo fe Sodombii lɛ. Yuda 7 jaje akɛ nakai Sodombii lɛ tsɔ “naanɔ la mli,” ni eshishi ji naanɔ hiɛkpatamɔ mli. (Mateo 25:41, 46) Belɛ te mɛi ni akɛɛ atsɛɔ amɛ Kristofoi ni ji jamɔ mli hiɛnyiɛlɔi ni nyiɛɔ amɛ asafoŋbii lɛ ahiɛ yɛ shwilamɔ mli kɛjɛɔ Nyɔŋmɔ Maŋtsɛyeli lɛ mli jeŋba ni nɔ kwɔlɔ lɛ ahe kɛyaa nyenyeŋtswibɔɔ jeŋ ni ekpɔtɔ ni ŋmɛɔ nɔ fɛɛ nɔ feemɔ gbɛ nɛɛ toigbalamɔ lɛ naa baawa aha tɛŋŋ! (Mateo 15:14) Gbee ni jɛ ŋwɛi lɛ kɛ oyaiyeli tsɛ ni ewie yɛ apasa jamɔ, Babilon Kpeteŋkpele lɛ he akɛ: “Nyɛjea emli, mimaŋ, koni nyɛkɛ lɛ akafee ekome yɛ ehe eshai lɛ amli, ni nyɛkana ehaomɔi lɛ eko.”—Kpojiemɔ 18:2, 4.

[Mfonirii ni yɔɔ baafa 275]

Ŋwɛi jije kɛ Haleluyai ejwɛ, amɛjie Yah yi yɛ enaagbee kunim ni eye yɛ Babilon Kpeteŋkpele lɛ nɔ lɛ hewɔ