Yitso 9
Yesu Gbɛi lɛ ni Aaahiɛ Mli Kpɛŋŋ
PERGAMO
1. Mɛɛ asafo nine shɛ Yesu shɛɛ sane ni nyiɛ sɛɛ lɛ nɔ, ni mɛɛ maŋ nɛkɛ nakai Kristofoi lɛ hiɔ mli?
KƐ OFA gbɛ shitoi 50 kɛjɛ ŋshɔnaa gbɛ ni jɛ Smirna lɛ kɛmiiya kooyigbɛ ni agbɛnɛ otee shitoi 15 kɛbote mli kɛtsɔ Caicus Faa lɛ jɔɔ lɛ mli lɛ, wɔbaa Pergamo, ni amrɔ nɛɛ atsɛɔ lɛ Bergama lɛ. Maŋ lɛ he gbɛi yɛ Zeus loo Jupiter sɔlemɔtsu ni yɔɔ jɛmɛ lɛ hewɔ. Yɛ 1800 afii lɛ amli lɛ, shitsalɔi ni taoɔ blema nibii lɛ yafa afɔleshaa latɛ ni yɔɔ nakai sɔlemɔ we lɛ kɛtee Germany, ni anaa yɛ jɛmɛ bianɛ, kɛ amagai kɛ wɔŋjalɔi anyɔŋmɔi sɔrɔtoi ahe nibii, yɛ Pergamon Blema Nibii Atoo He ni yɔɔ Berlin lɛ. Mɛɛ shɛɛ sane Nuŋtsɔ Yesu kɛbaamaje asafo ni yɔɔ he ni wɔŋjamɔ eyi jɛmɛ obɔ lɛ?
2. Mɛɛ gbɛ nɔ Yesu tsɔ ni eha ayoo lɛ, ni ‘tsi kɛ enaa ŋta’ ni eyɔɔ lɛ tsɔɔ mɛni?
2 Klɛŋklɛŋ lɛ, Yesu tsɔɔ mɔ ni eji, akɛ: “Ni Pergamo asafo lɛ bɔfo lɛ, ŋmaa oyaha lɛ akɛ: Nii ni mɔ ni hiɛ tsi kɛ enaa ŋta ni naa ba lɛ kɛɛ nɛ.” (Kpojiemɔ 2:12) Yesu miiti bɔ ni atsɔɔ akɛ eji yɛ Kpojiemɔ 1:16 lɛ mli kɛmiiha lɛ yɛ biɛ. Akɛ Kojolɔ kɛ Blafo lɛ, ebaatswia mɛi ni waa ekaselɔi lɛ ayi lɛ nii. Kwɛ bɔ ni nakai sane nɔmimaa lɛ haa mɔ mii shɛɔ ehe ehaa! Shi yɛ kojomɔ he lɛ, esa akɛ abɔ mɛi ni yɔɔ asafo lɛ mli lɛ kɔkɔ akɛ Yehowa, ni miitsu nii kɛmiitsɔ nɛkɛ “kpaŋmɔ lɛ bɔfo” ni ji Yesu Kristo nɔ lɛ “baafee odasefonyo ni he yɔɔ oya” ashi mɛi fɛɛ ni kɛɔ akɛ amɛji Kristofoi ni diɔ wɔŋjamɔ, jeŋba shara, amale kɛ shishiumɔ sɛɛ ni kwɛɛɛ ohiafoi lɛ. (Maleaki 3:1, 5; Hebribii 13:1-3) Esa akɛ abo ŋaawoo kɛ kamɔ ni Nyɔŋmɔ haa Yesu kɛhaa lɛ toi!
3. Mɛɛ apasa jamɔ tee nɔ yɛ Pergamo, ni mɛni hewɔ abaanyɛ akɛɛ akɛ “Satan maŋtsɛsɛi” lɛ yɛ jɛmɛ lɛ?
3 Agbɛnɛ Yesu kɛɔ asafo lɛ akɛ: “Mile onitsumɔi lɛ kɛ he ni oyɔɔ lɛ, he ni Satan maŋtsɛsɛi yɔɔ lɛ.” (Kpojiemɔ 2:13a) Eji anɔkwale akɛ Satan jamɔ ebɔle nakai Kristofoi lɛ ahe kɛkpe. Kɛfata Zeus sɔlemɔtsu lɛ he lɛ, Aesculapius, ni ji nyɔŋmɔ ni tsaa mɔ lɛ gbatsu hu yɛ. Ale Pergamo hu akɛ he ni ajɛɔ ajaa maŋtsɛ lɛ. Hebri wiemɔ ni atsɔɔ shishi akɛ “Satan” lɛ shishi ji “Shitee-kɛ-Wolɔ,” ni “emaŋtsɛsɛi” lɛ damɔ shi kɛha ejeŋ muu fɛɛ nɔyeli ni ajɛ ŋwɛi aŋmɛ lɛ gbɛ kɛha be ko lɛ. (Hiob 1:6, New World Translation Reference Bible, shishi gbɛ niŋmaa) Amaga jamɔ ni fa babaoo yɛ Pergamo lɛ tsɔɔ akɛ Satan “maŋtsɛsɛi” lɛ ma shi shiŋŋ yɛ nakai maŋ lɛ mli. Kwɛ bɔ ni Satan mli baafu aha akɛ nakai Kristofoi lɛ ni yɔɔ jɛmɛ lɛ kulaaa shi amɛhaaa lɛ yɛ maŋ jamɔ mli!
4. (a) Mɛɛ yijiemɔ Yesu kɛhaa Kristofoi ni yɔɔ Pergamo lɛ? (b) Mɛni Roma bɔfo Pliny ŋma eyaha Maŋtsɛ Trajan yɛ bɔ ni efeɔ Kristofoi lɛ ahe? (d) Yɛ oshara lɛ fɛɛ sɛɛ lɛ, mɛni ji gbɛ ni Kristofoi ni yɔɔ Pergamo lɛ tsɔ nɔ?
4 Hɛɛ, “Satan maŋtsɛsɛi” lɛ yɛ Pergamo diɛŋtsɛ. Yesu tee nɔ akɛ: “Ni ohiɛ migbɛi lɛ amli, ni okwako mihemɔkɛyeli lɛ yɛ no gbii lɛ amli tete, beni Antipa ji midasefonyo anɔkwafo, ni agbe lɛ yɛ nyɛteŋ, heni Satan yɔɔ lɛ.” (Kpojiemɔ 2:13b) Mɛɛ yijiemɔ ni kanyaa mɔ susuma po ji enɛ! Ŋwanejee ko bɛ he akɛ nɔ ni ha agbe Antipa akɛ la odasefonyo lɛ jɛ bɔ ni ekpoo akɛ ekɛ ehe aaawo daimonioi anifeemɔi kɛ Roma maŋtsɛ lɛ jamɔ lɛ mli lɛ hewɔ. Beni Yohane nine shɛ gbalɛ nɛɛ nɔ lɛ sɛɛ etsɛɛɛ ni Pliny Bibioo ni ji Maŋtsɛ Trajan ni yɔɔ Roma lɛ bɔfo loo najiaŋdamɔlɔ lɛ ŋma wolo eyaha Trajan ni etsɔɔ gbɛ ni etsɔɔ nɔ etsuɔ gbɔmɛi ni afolɔɔ amɛnaa akɛ amɛji Kristofoi lɛ ahe nii yɛ mli—nifeemɔ gbɛ ko ni maŋtsɛ lɛ kpɛlɛ nɔ. Mɛi ni kpoo akɛ amɛji Kristofoi lɛ aŋmɛɔ amɛhe, taakɛ Pliny kɛɛ lɛ, “beni amɛbo amɛtsɛ nyɔŋmɔi lɛ kɛnyiɛ misɛɛ taakɛ mifeɔ lɛ, ni amɛshã tsofa-kɛ-ŋma ni amɛkɛ wein hu eha bo [Trajan] omaga lɛ . . . ni kɛfata he lɛ, amɛlomɔ Kristo hu.” Agbeɔ mɔ fɛɛ mɔ ni anaa lɛ akɛ eji Kristofonyo. Eyɛ mli akɛ amɛkɛ oshara ni tamɔ nɛkɛ kpeɔ moŋ, shi Kristofoi ni yɔɔ Pergamo lɛ kwaaa amɛ hemɔkɛyeli lɛ. Amɛmɔ ‘Yesu gbɛi lɛ mli kpɛŋŋ’ ejaakɛ amɛtee nɔ amɛkɛ woo ha gbɛhe ni nɔ kwɔ ni eyɔɔ mli akɛ Yehowa Bembulɔ kɛ Kojolɔ ni ehala lɛ lɛ. Amɛkɛ anɔkwayeli nyiɛ Yesu nanemaa hei asɛɛ akɛ Maŋtsɛyeli odasefoi.
5. (a) Mɛɛ ŋmɛnɛŋmɛnɛ beaŋ maŋtsɛ jamɔ yɔɔ ni kɛ kaai babaoo eba Kristofoi anɔ yɛ wɔbe nɛɛ mli? (b) Mɛɛ yelikɛbuamɔ Buu-Mɔɔ lɛ kɛha Kristofoi?
5 Yesu eha ale yɛ bei sɔrɔtoi amli akɛ Satan ji mɔ ni yeɔ ŋmɛnɛŋmɛnɛ yiwalɛ je lɛ nɔ, shi yɛ emuuyeli mli ni Yesu hiɛ hewɔ lɛ, Satan nine shɛɛɛ enɔ. (Mateo 4:8-11; Yohane 14:30) Yɛ wɔbe nɛɛ mli lɛ, jeŋmaji ni he wa lɛ, titri lɛ “kooyigbɛ maŋtsɛ lɛ” kɛ “wuoyigbɛ maŋtsɛ lɛ” epele jeŋ nɔyeli he. (Daniel 11:40) Akanya maŋhedɔɔ waa yɛ mɛi amli, ni ŋmɛnɛŋmɛnɛ beaŋ maŋtsɛ jamɔ ni yɔɔ ni ji maŋhedɔɔ lɛ ji nɔ ni egbɛ eshwa shikpɔŋ muu lɛ fɛɛ nɔ. Saji ni kɔɔ maŋ saji ni akɛ he wooo mli ni je kpo yɛ November 1, 1939, kɛ agbɛnɛ November 1, 1979 blɔfo Buu-Mɔɔ kɛ agbɛnɛ September 1, 1986 Ga Buu-Mɔɔ lɛ mli lɛ etsɔɔ Biblia mli tsɔɔmɔ ni kɔɔ sane nɛɛ he lɛ mli faŋŋ, ni ekɛ gbɛtsɔɔmɔ eha nakai Kristofoi lɛ ni miisumɔ ni amɛnyiɛ yɛ Yehowa gbɛi amli ni amɛye je lɛ nɔ kunim lɛ, taakɛ Yesu hu kɛ ekaafeemɔ fee lɛ.—Mika 4:1, 3, 5; Yohane 16:33; 17:4, 6, 26; 18:36, 37; Bɔfoi lɛ Asaji 5:29.
6. Te Yehowa Odasefoi lɛ edamɔ shi shiŋŋ yɛ ŋmɛnɛŋmɛnɛ beaŋ amɛha tɛŋŋ, taakɛ Antipa fee lɛ?
6 Ŋaawoo ni tamɔ nɛkɛ efee nɔ ni he hiaa waa. Yɛ maŋhedɔɔ mumɔ ni asusuuu nɔ ko he yɛ mli lɛ hewɔ lɛ, ehe bahia ni Yehowa Odasefoi, mɛi ni afɔ amɛ mu lɛ kɛ amɛnanemɛi lɛ fɛɛ adamɔ shi shiŋŋ yɛ amɛ hemɔkɛyeli lɛ mli. Yɛ United States, Amerika nɛkɛ lɛ, ashwie skul gbekɛbii kɛ tsɔɔlɔi ohai abɔ akɛni amɛŋaaa maŋ aflaŋaa lɛ hewɔ, yɛ be mli ni yɛ Germany lɛ akɛ yiwalɛ fee Odasefoi lɛ nisenianii akɛni amɛkpoo akɛ amɛaaŋa swastika loo German aflaŋaa lɛ hewɔ. Taakɛ akadi momo lɛ, Hitler Nazibii lɛ gbe Yehowa tsuji anɔkwafoi lɛ akpei abɔ ejaakɛ amɛkpoo akɛ amɛkɛ amɛhe aaawo maŋ amaga jamɔ nɛɛ mli. Yɛ 1930 afii nɛɛ amli, yɛ be mli ni Japan Shinto maŋtsɛ jamɔ lɛ ehe shi waa lɛ, gbɛgbalɔi enyɔ ko ni ji sɔɔlɔi tɛo Maŋtsɛyeli dumɔ wui lɛ yɛ Taiwan ni no mli lɛ Japanbii ebaye amɛnɔ lɛ. Nɔyelɔi ni ji asraafoi lɛ kɛ amɛ wo tsuŋ, ni amɛteŋ mɔ kome gbo yɛ jɛmɛ yɛ nisenianii ni afee amɛ lɛ hewɔ. Yɛ sɛɛ mli lɛ ajie mɔ kroko lɛ, shi ni ajie lɛ pɛ kɛkɛ ni atswa lɛ tu yɛ esɛɛ—akɛ ŋmɛnɛŋmɛnɛ beaŋ Antipa. Kɛbashi ŋmɛnɛ gbi nɛɛ, maji pii yɛ ni maŋ okadii ajamɔ kɛ he ni atuɔ ahaa Maŋ lɛ pɛ ji nɔ ni abiɔ yɛ jɛmɛ. Awo Odasefoi obalaŋtai pii atsuŋ, ni mɛi ni agbe amɛ lɛ hu fa, yɛ bɔ ni amɛdamɔɔ shi kɛ ekaa akɛ Kristofoi ni kɛ amɛhe wooo maŋ saji amli lɛ hewɔ. Kɛ oji obalaŋta ni kɛ saji ni tamɔ nɛkɛ miikpe lɛ, kasemɔ Nyɔŋmɔ Wiemɔ lɛ daa bɔni afee ni ‘ona hemɔkɛyeli ni baa susuma yi,’ koni onine ashɛ naanɔ wala nɔ.—Hebribii 10:39-11:1; Mateo 10:28-31.
7. Te gbekɛbii komɛi damɔ maŋ hedɔɔ jamɔ lɛ naa yɛ India amɛha tɛŋŋ, ni mɛni jɛ mli ba?
7 Obalaŋtai ni yaa skul kɛ saji ni tamɔ nɛkɛ ekpe. Yɛ 1985, yɛ Kerala maŋ ni yɔɔ India lɛ mli lɛ, Yehowa Odasefoi ni ji gbekɛbii bibii etɛ kpoo akɛ amɛaaŋmɛɛ amɛ hemɔkɛyeli ni damɔ Biblia lɛ nɔ lɛ he koni amɛkɛsaa, akɛ, amɛlaaa maŋ loo jakumaŋ lala lɛ. Amɛkɛ bulɛ damɔ shi beni mɛi krokomɛi laa, ni kɛlɛ ashwie amɛ kɛjɛ skul. Amɛtsɛ te shi ewo nɛkɛ sane nɛɛ aahu kɛyashi sane lɛ yashɛ India Saneyeli He Wulu lɛ hiɛ, he ni kojolɔi enyɔ lɛ ye sane lɛ ha gbekɛbii lɛ, ni amɛkɛ ekaa jaje akɛ: “Wɔ blema saji lɛ tsɔɔ tsuishitoo; wɔ jeŋ nilee lɛ tsɔɔ tsuishitoo; wɔ maŋ nɔkwɛmɔ gbɛjianɔtoo lɛ kɛ tsuishitoo tsuɔ nii; nyɛkahaa wɔfutua mli.” Adafitswaa woji kɛ emli saji ni wie sane nɛɛ he ekpakpa lɛ ha maŋ muu lɛ fɛɛ ni no mli lɛ gbɔmɛi ni yɔɔ mli lɛ ayifalɛ miihe ashɛ gbɔmɛi ayifalɛ ni yɔɔ jeŋ muu fɛɛ lɛ mlijaa enumɔ mli ekome lɛ le akɛ Kristofoi ni jaa anɔkwa Nyɔŋmɔ ni ji Yehowa yɛ nakai shikpɔŋ lɛ nɔ ni akɛ mɛnɛɛmɛi damɔɔ shi yɛ anɔkwayeli mli amɛhaa Biblia mli shishitoo mlai.
Sui ni Fiteɔ Mɔ
8. Mɛɛ kamɔ Yesu na akɛ ehe miihia ni ekɛha Kristofoi ni yɔɔ Pergamo lɛ?
8 Hɛɛ, Kristofoi ni yɔɔ Pergamo lɛ ji emuuyeli mlihiɛlɔi. Yesu kɛɛ: “Shi kɛlɛ, mikɛo yɛ sane fioo ko.” Mɛni amɛfee ni baaha awie ashi amɛ lɛ? Yesu kɛɔ wɔ: “Oyɛ mɛi yɛ jɛi ni hiɛ Bileam, mɔ ni tsɔɔ Balak akɛ etsɔ Israelbii lɛ atsɔne ni amɛye wɔji afɔleshaa nii ni amɛbɔ ajwamaŋ lɛ tsɔɔmɔ lɛ mli.”—Kpojiemɔ 2:14.
9. Namɔ ji Bileam, ni te fee tɛŋŋ ni eŋaawoo lɛ “kɛ gbɛtsii nii fɔ Israelbii lɛ ahiɛ” lɛ?
9 Yɛ Mose gbii lɛ amli lɛ, Maŋtsɛ Balak ni jɛ Moab lɛ yabɔ Bileam, gbalɔ ni jeee Israelnyo, ni le Yehowa gbɛi lɛ he nɔ ko lɛ apaa, koni elomɔ Israel. Yehowa te shi ewo Bileam, ni enyɛ enɔ koni ejaje jɔɔmɔi moŋ eshwie Israelbii lɛ anɔ kɛ kpoo kɛha amɛ henyɛlɔi lɛ. Bileam kpa Balak fai yɛ nɔ ni eba ni esumɔɔɔ nɛɛ hewɔ ni ewo lɛ ŋaa ko ni yɔɔ nigii ni ebaanyɛ ni etsɔ nɔ etutua amɛ: Ha Moab yei lɛ alaka Israel hii lɛ kɛya ajwamaŋbɔɔ jeŋba shara kɛ apasa nyɔŋmɔ Baal ni jɛ Peor lɛ jamɔ mli! Nɛkɛ ŋaatsɔɔ nɛɛ tsu nii. Yehowa jalɛ mlifu te shi ewo amɛ, ni etsu hela kɛba amɛteŋ ni gbe nakai Israel ajwamaŋbɔlɔi lɛ ateŋ mɛi 24,000—gbele hela ni sɛɛ fo yɛ be mli ni osɔfo Pinehas tsɔ gbɛ kpakpa nɔ etsu nii ni ekɛjie nɔ fɔŋ lɛ kɛjɛ Israel lɛ.—4 Mose 24:10, 11; 25:1-3, 6-9; 31:16.
10. Mɛɛ gbɛtsii nii loo nanetɔtɔmɔ nii ebote asafo ni yɔɔ Pergamo lɛ mli, ni mɛni hewɔ ebaanyɛ eba akɛ nakai Kristofoi lɛ baanu he akɛ Nyɔŋmɔ baaku ehiɛ eshwie amɛtɔmɔi anɔ lɛ?
10 Agbɛnɛ, ani pampii ni tamɔ nakai nɔŋŋ yɛ Pergamo yɛ Yohane gbii lɛ amli? Eko yɛ! Jeŋba shara kɛ wɔŋjamɔ ebote asafo lɛ mli. Nakai Kristofoi lɛ boko Nyɔŋmɔ kɔkɔbɔɔ ni akɛha kɛtsɔ bɔfo Paulo nɔ lɛ toi. (1 Korintobii 10:6-11) Akɛni amɛŋmɛ amɛtsui shi yɛ yiwaa mli hewɔ lɛ, ekolɛ amɛnu he akɛ Yehowa baaku ehiɛ eshwie amɛ bɔlɛnamɔ mli tɔmɔi lɛ anɔ. No hewɔ lɛ Yesu fee lɛ faŋŋ akɛ esa akɛ amɛjie nɔ fɔŋ feemɔ nɛɛ kɛjɛ amɛteŋ.
11. (a) Esa akɛ Kristofoi akwɛ amɛhe nɔ jogbaŋŋ yɛ mɛni he, ni mɛɛ susumɔ loo jwɛŋmɔ esa akɛ amɛkwa? (b) Mɛi enyiɛ ashwie amɛ kɛjɛ Kristofoi asafo lɛ mli, yɛ afii abɔ lɛ amli, ni titri lɛ mɛni nɔ adamɔ?
11 Nakai nɔŋŋ hu ŋmɛnɛ, esa akɛ Kristofoi akwɛ amɛhe nɔ jogbaŋŋ koni amɛkafee “nɔsha feelɔi ni ŋɔɔ Nyɔŋmɔ duromɔ lɛ amɛbɔɔ nyenyeŋtswi.” (Yuda 4) Eka wɔnɔ akɛ wɔnyɛ nɔ ni ehiii ni ‘wɔgbala wɔgbɔmɔtsei lɛ mai’ bɔni afee ni wɔnyɛ wɔtiu Kristofoi ajeŋba kpakpa gbɛ lɛ sɛɛ. (1 Korintobii 9:27; Lala 97:10; Romabii 8:6) Esaaa akɛ wɔsusuɔ kɔkɔɔkɔ akɛ ekaa ni wɔfeɔ yɛ Nyɔŋmɔ sɔɔmɔ mli kɛ emuuyeli mli hiɛmɔ yɛ yiwaa shishi lɛ haa hegbɛ koni wɔkɛ wɔhe awo bɔlɛnamɔ mli jeŋba shara mli. Yɛ afii ni eho lɛ amli lɛ, mɛi ni tɔ̃ɔ ni ashwieɔ amɛ kɛjɛɔ jeŋ muu fɛɛ Kristofoi asafo lɛ mli, yɛ ajwamaŋbɔɔ titri hewɔ lɛ ayi efa kɛbote akpei nyɔŋmai abɔ mli. Afii lɛ ekomɛi yɛ ni mɛi ni ashwieɔ amɛ nɛkɛ lɛ ayi faa kwraa fe mɛi ni gboi yɛ blema Israel yɛ Baal-Peor jamɔ hewɔ lɛ. Eba akɛ wɔɔha wɔhiɛ ahi wɔhe nɔ koni wɔkagbee su ni tamɔ nɛkɛ mli!—Romabii 11:20; 1 Korintobii 10:12.
12. Taakɛ eji yɛ Nyɔŋmɔ tsuji ni hi shi yɛ blema bei lɛ amli lɛ ahe lɛ, mɛɛ shishitoo mlai kɔɔ Kristofoi ahe ŋmɛnɛ?
12 Yesu ka Pergamo Kristofoi lɛ hu hiɛ yɛ ‘nii ni akɛsha afɔle aha wɔji ni amɛye lɛ hewɔ.’ Mɛni baanyɛ afee enɛɛmɛi? Yɛ Paulo wiemɔi ni ekɛha Korintobii lɛ hewɔ lɛ, ekolɛ mɛi komɛi kɛ amɛ Kristofoi aheyeli lɛ miitsu nii yɛ gbɛ fɔŋ nɔ ni amɛmiifite mɛi krokomɛi ahenilee. Eeenyɛ ebalɛ akɛ amɛkɛ amɛhe miiwo amaga jamɔi amli kusum nifeemɔi diɛŋtsɛ amli. (1 Korintobii 8:4-13; 10:25-30) Esa akɛ Kristofoi anɔkwafoi ni yɔɔ ŋmɛnɛ lɛ ajie suɔmɔ ni pɛsɛmkunya bɛ mli lɛ kpo yɛ amɛ Kristofoi aheyeli lɛ he nitsumɔ mli, koni amɛkwɛ jogbaŋŋ koni amɛkatɔtɔ mɛi krokomɛi anane. Eka shi faŋŋ akɛ esa akɛ amɛkwa ŋmɛnɛŋmɛnɛ beaŋ amaga jamɔ, tamɔ TV, sinii, kɛ kpɔiaŋgbɔlemɔ mli gbɔmɛi ni ehe gbɛi lɛ ajamɔ, aloo ni amɛkɛ shika aaafee amɛ nyɔŋmɔ, aloo ni amɛkɛ amɛmusu aaafee nakai!—Mateo 6:24; Filipibii 1:9, 10; 3:17-19.
Kwa Kui ni kɛ Mligbalamɔi Baa!
13. Mɛɛ kamɔ wiemɔi Yesu kɛha Kristofoi ni yɔɔ Pergamo lɛ ekoŋŋ, ni mɛni hewɔ enɛ he hiaa asafo lɛ?
13 Yesu tee nɔ eka Kristofoi ni yɔɔ Pergamo lɛ lolo akɛ: “Nakai nɔŋŋ hu oyɔɔ mɛi ni hiɛ Nikolaemɛi atsɔɔmɔ lɛ ni minyɛɔ lɛ mli.” (Kpojiemɔ 2:15) Yesu etsɔ hiɛ ejie Efesobii lɛ ayi yɛ nyɛ ni amɛnyɛɔ nɛkɛ kuu nɛɛ hewɔ. Shi ŋaawoo he miihia Kristofoi ni yɔɔ Pergamo lɛ yɛ gbɛ ni amɛaatsɔ nɔ ni amɛha asafo lɛ aye ehe kɛjɛ kui ni kɛ mligbalamɔ baa lɛ ahe. Ehe miihia ni amɛfee shiŋŋ babaoo yɛ tɛi ni afolɔ ashwie shi aha Kristofoi lɛ mli bɔni afee ni anyɛ abaa ekomefeemɔ ni Yesu sɔle yɛ he yɛ Yohane 17:20-23 lɛ yi. Ehe miihia ni “anyɛ awie atsɔɔ mɛi yɛ nitsɔɔmɔ ni tsaa mɔ lɛ mli, ni mɛi ni kuɔ wiemɔ lɛ naa lɛ hu, aka amɛhiɛ.”—Tito 1:9, New World Translation.
14. (a) Kristofoi asafo lɛ kɛ namɛi eshi mple kɛjɛ mra gbii lɛ amli, ni te bɔfo Paulo tsɔɔ bɔ ni amɛji lɛ mli eha tɛŋŋ? (b) Mɛɛ Yesu wiemɔi esa akɛ mɛi ni baasumɔ ni amɛyanyiɛ kuu ko ni baatse amɛhe lɛ asɛɛ lɛ abo toi?
14 Kɛjɛ mra gbii lɛ amli tɔɔ, ni ehe bahia ni Kristofoi asafo lɛ ate shi awo hemɔkɛyeli kwalɔi henɔwolɔi ni tsɔɔ wiemɔi ni yɔɔ dɔkɔbii nɔ “amɛkɛ mligbalamɔi kɛ pampitoo baa” ni kɛ tsɔɔmɔ ni akɛha kɛtsɔ Yehowa adafitswaa gbɛ lɛ nɔ lɛ enyiɛɛɛ lɛ. (Romabii 16:17, 18) Bɔfo Paulo bɔ kɔkɔ yɛ nɛkɛ hegbeyeiwoo nɛɛ he yɛ nɔ ni miihe ashɛ ewoji lɛ fɛɛ mli.a Yɛ ŋmɛnɛŋmɛnɛ beaŋ, beni Yesu kɛ anɔkwale asafo lɛ eba e-Kristofoi akrɔŋŋfeemɔ kɛ ekomefeemɔ mli ekoŋŋ lɛ, oshara ni yɔɔ kui ni kɛ mligbalamɔi baa lɛ he lɛ yɛ lolo. No hewɔ lɛ, mɔ fɛɛ mɔ ni baasumɔ ni ekɛ ehe ayabɔ kuu ko ni baatse ehe lɛ he, ni yɛ nɛkɛ gbɛ nɔ lɛ, eto kuu kroko lɛ abo Yesu wiemɔi ni nyɛi sɛɛ nɛɛ toi: “No hewɔ lɛ tsakemɔ otsui! Shi kɛ jeee nakai lɛ, maba onɔ oya ni mikɛ midaaŋ tsi lɛ kɛ amɛ aaabawuu.”—Kpojiemɔ 2:16.
15. Kui ni kɛ mligbalamɔi baa jeɔ shishi yɛ mɛɛ gbɛ nɔ?
15 Mɛɛ gbɛ nɔ kui ni kɛ mligbalamɔi baa nɛɛ jeɔ shishi yɛ? Ekolɛ mɔ ko ni tsɛɔ ehe tsɔɔlɔ tɛoɔ yiŋkɔshikɔshifeemɔ yɛ mɛi amli, ejeɔ Biblia mli anɔkwale ko he ŋwane (ekolɛ naagbee bei amli ni wɔyɔɔ lɛ), no hewɔ lɛ kuu ko tseɔ ehe kɛyanyiɛɔ esɛɛ. (2 Timoteo 3:1; 2 Petro 3:3, 4) Aloo mɔ ko wieɔ eshiɔ gbɛ ni Yehowa haa atsuɔ enitsumɔ lɛ yɛ nɔ lɛ ni ekɛɔ mɛi ni sumɔɔ ni amɛna mumɔ ni haaa akɛ he awo nitsumɔ mli babaoo lɛ akɛ ebɛ Ŋmalɛ lɛ mli ni asaŋ hu ehe ehiaaa akɛ aaaya shia-kɛ-shia ni ayajaje Maŋtsɛyeli lɛ he sane lɛ. Sɔɔmɔ nitsumɔ ni tamɔ nɛkɛ ni akɛ he aaawo mli ni akɛnyiɛ Yesu kɛ ebɔfoi lɛ anɔkwɛmɔnɔ lɛ sɛɛ lɛ baaha mɔ ko aba ehe shi; ni kɛlɛ amɛmiisumɔ ni amɛtsi amɛhe ni amɛha nibii afee mlɛo aha amɛ, ekolɛ ni amɛkane Biblia lɛ pɛ yɛ be kɛ bei amli akɛ kuu ko yɛ teemɔŋ. (Mateo 10:7, 11-13; Bɔfoi lɛ Asaji 5:42; 20:20, 21) Gbɔmɛi ni tamɔ nɛkɛ kɛ amɛ diɛŋtsɛ amɛsusumɔi ni kɔɔ Yesu gbele lɛ Kaimɔ lɛ he, Ŋmalɛ naa famɔ akɛ atsi he kɛjɛ la he, gbijurɔyelii, kɛ tawa shɛremɔ he lɛ haa. Agbɛnɛ, amɛbaa Yehowa gbɛi lɛ shi; etsɛɛɛ kɛkɛ lɛ amɛyagbee Babilon Kpeteŋkpele lɛ gbɛ ni ŋmɛɔ nɔ fɛɛ nɔ feemɔ gbɛ lɛ mli. Nɔ ni ehiii fe fɛɛ lɛ, Satan tsirɛɔ mɛi komɛi ni amɛtsɔɔ amɛhe ‘ni amɛyiɔ amɛnanemɛi tsuji lɛ,’ be ko mli amɛnyɛmimɛi lɛ.—Mateo 24:49; Bɔfoi lɛ Asaji 15:29; Kpojiemɔ 17:5.
16. (a) Mɛni hewɔ esa akɛ mɛi ni hosoɔ yɛ hemɔkɛyeli kwamɔ hewɔ lɛ ahe afee oya ni amɛtsake amɛtsui lɛ? (b) Mɛni baaba mɛi ni sumɔɔɔ akɛ amɛtsakeɔ amɛtsui lɛ anɔ?
16 Esa akɛ mɔ fɛɛ mɔ ni baahoso yɛ hewalɛ ni hemɔkɛyeli kwalɔi aaana yɛ enɔ hewɔ lɛ he afee oya ni ebo Yesu tsɛmɔ akɛ atsake lɛ toi! Esa akɛ akpoo hemɔkɛyeli kwamɔ shishiumɔ wiemɔi akɛ ebɔɔ ni nakai eji hu lɛ! Nɔ ni hɔ sɛɛ ji nyɛɛ kɛ hetsɛ, ni teɔ shi woɔ jalɛ, hetsemɔ, kɛ anɔkwalei ni asumɔɔ ni Yesu kɛlɛɔ esafo lɛ. (Luka 12:42; Filipibii 1:15, 16; 4:8, 9) Yɛ mɛi ni kpooɔ akɛ amɛaatsake amɛtsui lɛ agbɛfaŋ lɛ, Nuŋtsɔ Yesu kɛ “[edaaŋ] tsi lɛ kɛ amɛ aaabawuu” diɛŋtsɛ. Eesha ewebii lɛ amli bɔni afee ni ebaa ekomefeemɔ ni esɔle yɛ he yɛ enaagbee gbɛkɛ ni ekɛ ekaselɔi lɛ yɔɔ shikpɔŋ nɔ lɛ yi. (Yohane 17:20-23, 26) Akɛni hemɔkɛyeli kwalɔi lɛ kpooɔ ŋaawoo ni suɔmɔ yɔɔ mli lɛ kɛ yelikɛbuamɔ ni ŋulamii ni yɔɔ eninejurɔ nɔ lɛ kɛhaa amɛ lɛ hewɔ lɛ, Yesu kojoɔ amɛ ni egbalaa amɛtoi ‘waa,’ ni ekɛ amɛ woɔ “gbɛ sɛɛ duŋ” lɛ mli. Ashwieɔ amɛ, ni amɛnyɛŋ amɛtsu nii dɔŋŋ akɛ mãsha yɛ Nyɔŋmɔ webii ateŋ.—Mateo 24:48-51; 25:30; 1 Korintobii 5:6, 9, 13; Kpojiemɔ 1:16.
‘Mana ni Aŋɔtee kɛ Tɛ Yɛŋ’
17. Mɛɛ nyɔmɔwoo mɛɔ Kristofoi ni afɔ amɛ mu ni ‘yeɔ kunim’ lɛ, ni ehe miihia ni Kristofoi ni yɔɔ Pergamo lɛ aye mɛni nɔ kunim?
17 Nyɔmɔwoo ko ni da miimɛ mɛi fɛɛ ni boɔ Yesu ŋaawoo, ni atsɔ Yehowa mumɔ krɔŋkrɔŋ lɛ kudɔmɔ nɔ akɛha lɛ toi lɛ. Bo toi! “Mɔ ni yɔɔ toi lɛ ha ni enu nɔ ni mumɔ lɛ kɛɔ asafoi lɛ. Mɔ ni yeɔ kunim lɛ, maha lɛ mana ni aŋɔtee lɛ eko eye, ni maha lɛ tɛ yɛŋ, ni tɛ lɛ nɔ lɛ aŋma gbɛi hee ni mɔ ko leee akɛ ja mɔ ni naa lɛ.” (Kpojiemɔ 2:17) No hewɔ lɛ, aawo Kristofoi ni yɔɔ Pergamo lɛ hewalɛ koni ‘amɛye kunim’ taakɛ afee Smirna Kristofoi lɛ. Kɛ amɛbaanyɛ amɛye omanye lɛ, belɛ esa akɛ mɛi ni yɔɔ Pergamo, yɛ he ni Satan maŋtsɛsɛi lɛ ma lɛ atsi amɛhe kɛjɛ amaga jamɔ he. Esa akɛ amɛye jeŋba shara, kui ni kɛ mligbalamɔi baa, kɛ hemɔkɛyeli kwamɔ ni kɔɔ Balak, Bileam kɛ Nikolaemɛi akui ahe lɛ nɔ kunim. Kɛ amɛfee nakai lɛ, abaafɔ̃ nakai Kristofoi ni afɔ amɛ mu lɛ nine ni amɛbaye “mana ni aŋɔtee” lɛ eko. Mɛni ji nɔ ni enɛ tsɔɔ?
18, 19. (a) Mɛni ji mana ni Yehowa kɛha Israelbii lɛ? (b) Mɛɛ mana akɛtee lɛ? (d) Mana ni akɛtee lɛ yeli feɔ mɛni he mfoniri?
18 Yehowa kɛ mana ha yɛ Mose gbii lɛ amli, koni ewaje Israelbii lɛ yɛ amɛ ŋa nɔ gbɛfaa lɛ mli. Nakai mana lɛ jeee nɔ ni aŋɔtee, ejaakɛ daa leebi lɛ—ja Hejɔɔmɔ Gbi lɛ—ebaa yɛ naakpɛɛ gbɛ nɔ, tamɔ nɔ komɛi kokolobii bibii tamɔ bɔ ni efi ni ha shikpɔŋ. Eji ŋwɛi gbɛjianɔtoo ni baaha Israelbii lɛ aya nɔ ahi wala mli. Bɔni afee ni amɛkai enɛ lɛ, Yehowa fa Mose akɛ eha nɛkɛ “aboloo” nɛɛ eko ahi shika kpulu lɛ mli yɛ kpaŋmɔ adeka krɔŋkrɔŋ lɛ mli yɛ “[Israel] yinɔi fɛɛ mli.”—2 Mose 16:14, 15, 23, 26, 33; Hebribii 9:3, 4.
19 Mɛɛ okadi ni sa po ji enɛ! Akɛ mana nɛɛ eto sɔlemɔtsu lɛ mli Krɔŋkrɔŋ Fe Fɛɛ lɛ, he ni naakpɛɛ la ni tsotsoro Kpaŋmɔ Adeka lɛ naa nɔ́ lɛ yiteŋ lɛ damɔ shi kɛha jɛmɛ ni Yehowa yɔɔ lɛ. (2 Mose 26:34) Aŋmɛɛɛ mɔ ko gbɛ ni ebote he krɔŋkrɔŋ nɛɛ bɔni afee ni eyaye mana ni aŋɔtee lɛ eko. Shi Yesu kɛɛ akɛ esɛɛnyiɛlɔi ni afɔ amɛ mu lɛ ni yeɔ kunim lɛ baaye “mana ni aŋɔtee” lɛ eko. Taakɛ bɔ ni Kristo ni tsɔ amɛhiɛ lɛ fee lɛ, amɛ hu amɛboteɔ, “jeee he krɔŋkrɔŋ ni akɛ niji fee ni ji nii lɛ diɛŋtsɛ lɛ ahenɔ kɛkɛ lɛ mli, . . . shi moŋ ŋwɛi diɛŋtsɛ.” (Hebribii 9:12, 24) Kɛ atee amɛ shi lɛ, amɛkɛ shihilɛ ni fitemɔ kɛ gbele bɛ mli haa amɛhe—gbɛjianɔtoo ni yɔɔ naakpɛɛ ni Yehowa kɛha, ni damɔ shi kɛha “mana ni aŋɔtee” ni fiteee lɛ ni akɛha amɛ. Kwɛ hegbɛ ni nɛkɛ kuu fioo ni yeɔ kunim nɛɛ ena!—1 Korintobii 15:53-57.
20, 21. (a) Tɛ yɛŋ ni akɛhaa Kristofoi ni afɔ amɛ mu lɛ feɔ mɛni he mfoniri? (b) Akɛni tɛi yɛji 144,000 pɛ yɔɔ hewɔ lɛ, mɛɛ hiɛnɔkamɔ asafo babaoo lɛ yɔɔ?
20 Amɛnine shɛɔ “tɛ yɛŋ” ko hu nɔ. Akɛ tɛi tsuɔ nii yɛ Roma saneyeli hei yɛ be mli ni akojoɔ mɛi.b Tɛ yɛŋ tsɔɔ akɛ aŋmɛɛ mɔ lɛ he, yɛ be mli ni tɛ diŋ tsɔɔ fɔbuu, yɛ be babaoo mli lɛ gbele. “Tɛ yɛŋ” ni Yesu kɛha Kristofoi ni yɔɔ Pergamo lɛ baatsɔɔ akɛ ekojoɔ amɛ akɛ amɛyeee fɔ, amɛyɛ krɔŋŋ ni amɛhe tse. Shi Yesu wiemɔi lɛ baanyɛ ana shishinumɔ ni yaa hiɛ lolo. Yɛ Roma bei amli lɛ, akɛ tɛi hu tsuɔ nii tamɔ tikitii koni akɛbote nifeemɔi ni he hiaa lɛ ashishi. No hewɔ lɛ tɛ yɛŋ lɛ baanyɛ atsɔɔ nɔ ko krɛdɛɛ ko kɛha Kristofonyo ni afɔ lɛ mu ni yeɔ kunim lɛ—gbɛ ni aŋmɛɔ lɛ koni eba he ko ni yɔɔ nyam yɛ ŋwɛi yɛ Toobi lɛ yookpeemɔ lɛ shishi. Tɛi 144,000 ni tamɔ nɛkɛ pɛ akɛha.—Kpojiemɔ 14:1; 19:7-9.
21 Ani enɛ tsɔɔ akɛ ashi bo ni asusuuu ohe akɛni oji asafo babaoo ni ji nanemɛi jalɔi lɛ ateŋ mɔ kome lɛ hewɔ? Dabida kwraa! Yɛ be mli ni onine shɛɛɛ tɛ yɛŋ ni haa aŋɔɔ bo awoɔ ŋwɛi lɛ nɔ lɛ, kɛ oooŋmɛ otsui shi lɛ, obaanyɛ oje amanehulu kpeteŋkpele lɛ mli koni oyana gbɛfaŋnɔ yɛ miishɛɛ nitsumɔ ni ji Paradeiso ni akuɔ sɛɛ akɛbaa shikpɔŋ nɔ ekoŋŋ lɛ mli. Mɛi ni baafata ohe yɛ enɛ mli ji anɔkwafoi ni gboi dani Kristofoi abe lɛ ba ni atee amɛ shi lɛ kɛ tooi krokomɛi lɛ ni gboi nyɛsɛɛ nɛɛ nɔŋŋ lɛ. Yɛ naagbee lɛ, gbohii ni akpɔ amɛ lɛ fɛɛ baana hegbɛ akɛ amɛaana shitee ni kɛ mɔ yaa wala mli yɛ paradeiso shikpɔŋ nɔ lɛ mli gbɛfaŋnɔ.—Lala 45:17; Yohane 10:16; Kpojiemɔ 7:9, 14.
22, 23. Gbɛi ni aŋma yɛ tɛ lɛ nɔ ni akɛhaa Kristofoi ni afɔ amɛ mu lɛ tsɔɔ mɛni, ni mɛɛ hewalɛwoo esa akɛ enɛ kɛha?
22 Mɛni ji gbɛi hee ni aŋma yɛ tɛ lɛ nɔ lɛ? Gbɛi ji nɔ ko ni atsɔɔ nɔ akɛyooɔ mɔ ko ni haa efeɔ sɔrɔto yɛ mɛi krokomɛi ahe. Nɛkɛ Kristofoi ni afɔ amɛ mu nɛɛ anine shɛɔ tɛ lɛ nɔ yɛ be mli ni amɛgbe amɛ shikpɔŋ nɔ nitsumɔ lɛ naa akɛ kunimyelɔi lɛ sɛɛ. Eka shi faŋŋ akɛ belɛ gbɛi ni yɔɔ tɛ lɛ nɔ lɛ kɔɔ hegbɛ ni amɛna akɛ amɛkɛ Yesu aaafee ekome yɛ ŋwɛi lɛ he—gbɛhe ko ni haa ayeɔ yitsoŋ sane ni jɛ sɔɔmɔ yɛ anɔkwayeli mli ni mɛi ni nine shɛɔ ŋwɛi Maŋtsɛyeli lɛ nɔ lɛ pɛ naa enɛ ni amɛnaa mli ŋɔɔmɔ lɛ. No hewɔ lɛ, eji gbɛi loo gbɛhe ko “ni mɔ ko mɔ ko leee akɛ ja mɔ ni naa lɛ.”—Okɛto Kpojiemɔ 3:12 he.
23 Mɛɛ kanyamɔ enɛ ji kɛha Yohane kuu lɛ koni “amɛbo nɔ ni mumɔ lɛ kɛɔ asafoi lɛ toi” ni amɛkɛtsu nii! Ni kwɛ bɔ ni enɛ woɔ amɛ hefatalɔi, asafo babaoo lɛ hewalɛ, koni amɛkɛ amɛ asɔmɔ yɛ anɔkwayeli mli yɛ be mli ni amɛnaa amɛnaanyobɔɔ yɛ shikpɔŋ nɛɛ nɔ lɛ mli gbɛfaŋnɔ ni amɛkɛ amɛhe woɔ Yehowa Maŋtsɛyeli lɛ ni amɛhaa mɛi leɔ lɛ mli lɛ!
[Shishigbɛ niŋmai]
a Kwɛmɔ 1 Korintobii 3:3, 4, 18, 19; 2 Korintobii 11:13; Galatabii 4:9; Efesobii 4:14, 15; Filipibii 3:18, 19; Kolosebii 2:8; 1 Tesalonikabii 3:5; 2 Tesalonikabii 2:1-3; 1 Timoteo 6:3-5; 2 Timoteo 2:17; 4:3, 4; Tito 1:13, 14; 3:10; Hebribii 10:26, 27 hu.
b Kwɛmɔ Bɔfoi lɛ Asaji 26:10 kɛ shishigbɛ niŋmaa lɛ, New World Translation Reference Bible.
[Mfonirii ni yɔɔ baafa 43]
Nɛkɛ odaseyelii nɛɛ ni tsɔɔ wɔŋjamɔ babaoo lɛ ji nɔ ko ni anaa faŋŋ yɛ Pergamon Museum ni yɔɔ Berlin lɛ
[Mfoniri ni yɔɔ baafa 45]
Akɛ mana lɛ eko to kpaŋmɔ adeka lɛ mli. Ni akɛ okadi mana ni akɛto lɛ aaaha amɛ lɛ tsɔɔ akɛ mɛi ni afɔ amɛ mu ni yeɔ kunim lɛ nine shɛɔ shihilɛ ni gbele bɛ mli nɔ
[Mfoniri ni yɔɔ baafa 45]
Tɛ yɛŋ lɛ yɛ kɛha mɛi ni aŋɔɔ amɛ awoɔ Toobi lɛ yookpeemɔ lɛ mli lɛ