Kojomɔ Gbi—Hiɛnɔkamɔ Be!
KƐJI kojomɔ gbi lɛ hesusumɔ woɔ ohe gbeyei lɛ, belɛ mɛni hewɔ otaooo nɔ ni Biblia lɛ kɛɔ yɛ he lɛ mli? Akɛ nɔkwɛmɔ nɔ lɛ, ani eji anɔkwale akɛ kɛji Nyɔŋmɔ kojo eshafeelɔi lɛ, ashɛrɛɔ amɛ ashwieɔ hɛl la mli?
Ojogbaŋŋ, ŋwɛi kojomɔ ni aŋma he sane afɔ shi klɛŋklɛŋ lɛ ba mli yɛ adesai ayinɔsane shishijee mli tɔ̃ɔ. Adam kɛ Hawa na hegbɛ ni kulɛ amɛaahi shi kɛya naanɔ yɛ paradeiso shikpɔŋ nɔ. (1 Mose 1:26-28; 2:7-9, 15-25) Shi, amɛfee esha, ni amɛbaje Nyɔŋmɔ fɔbuu kojomɔ shishi. Mɛni jɛ mli ba? Nyɔŋmɔ he wala nikeenii lɛ yɛ amɛdɛŋ. Yɛ wiemɔ kroko mli lɛ, amɛgboi. Nyɔŋmɔ kɛɛ amɛ akɛ: “Ohiɛ latsaa mli oooye nii yɛ, kɛyashi beyinɔ ni oooku osɛɛ kɛaatee shikpɔŋ su mli, ejaakɛ emli ajieo kɛjɛ. Ejaakɛ su jio, ni su mli oooku osɛɛ kɛaatee!”—1 Mose 3:16-19.
Kojomɔ ni mli wa nɛ, shi eja hu. Ni eka shi faŋŋ akɛ hɛl la sane ko bɛ mli. Beni Adam kɛ Hawa gboi lɛ, amɛku amɛsɛɛ kɛtee su lɛ mli. Amɛje shihilɛ mli kwraa. Biblia lɛ etsɔɔɔ yɛ he ko akɛ Adam he ko aloo gbɔmɔ adesa kroko ko he ko hiɔ shi yɛ gbele sɛɛ koni apiŋ lɛ yɛ he ko kɛya naanɔi anaanɔ. Shi moŋ, wɔkaneɔ akɛ: “Shi hiɛkalɔi le akɛ amɛbaagboi; shi gbohii lɛ, amɛleee nɔ ko nɔ ko.”—Jajelɔ 9:5.
Ani ole akɛ Biblia lɛ kɛɔ nɛkɛ? Agbɛnɛ hu, ani ole akɛ Biblia lɛ kɛ wiemɔ “susuma ni gbooo” lɛ tsuuu nii kɔkɔɔkɔ? Yɛ no najiaŋ lɛ, ekɛɔ akɛ: “Susuma ni feɔ esha lɛ, lɛ nɔŋŋ eeegbo.” (Ezekiel 18:4, King James Version) Enɛ kɛ Biblia mli shishitoo mla nɛɛ kpaa gbee jogbaŋŋ: “Esha dɛŋ nyɔmɔwoo lɛ, gbele ni.” (Romabii 6:23, KJ) Nɛkɛ mla nɛɛ saa wɔ fɛɛ wɔhe. Adam eshafeelɔ lɛ seshibii ji wɔ fɛɛ, no hewɔ lɛ wɔ fɛɛ wɔfeɔ esha ni wɔnine shɛɔ esha he nyɔmɔwoo ni ji gbele lɛ nɔ. Taakɛ Biblia lɛ kɛɔ lɛ: “Gbɔmɔ kome nɔ esha tsɔ kɛba je lɛŋ, ni gbele tsɔ esha nɔ kɛba, ni no ha gbele lɛ tsɛŋe gbɔmɛi fɛɛ, ejaakɛ amɛ fɛɛ amɛfee esha lɛ.” (Romabii 5:12, KJ) Kojomɔ Gbi lɛ ji Nyɔŋmɔ gbɛjianɔtoo ni ekɛbaahere wɔyiwala kɛjɛ nɛkɛ shihilɛ nɛɛ mli lɛ mli oti fe fɛɛ.
Nɔdaamɔ Nɔ Kɛha Kojomɔ Gbi Lɛ
Taakɛ bɔ ni Biblia lɛ tsɔɔ lɛ, aaafee afii 2,000 ni eho nɛ ni Nyɔŋmɔ to nɔdaamɔ nɔ kɛha nɔ ni baaba yɛ Kojomɔ Gbi lɛ nɔ lɛ shishi efɔ shi. Enɛ ba mli beni Yesu ba shikpɔŋ nɔ ni ekɛ ewala ni yeɔ emuu lɛ ha yɛ wɔhewɔ lɛ. Yesu diɛŋtsɛ tsɔɔ mli akɛ: “Ejaakɛ nɛkɛ Nyɔŋmɔ sumɔ je lɛ, akɛ eŋɔ e-Bi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala.”—Yohane 3:16.
Kɛji wɔna hemɔkɛyeli yɛ Yesu mli lɛ, no lɛ wɔnaa efɔleshaa lɛ he sɛɛ amrɔ nɛɛ po yɛ mumɔŋ. Nyɔŋmɔ kɛ wɔhe eshai lɛ keɔ wɔ ni eŋmɛɔ wɔ gbɛ koni wɔbɛŋkɛ lɛ. (Yohane 14:6; 1 Yohane 2:1, 2) Shi wɔka he wɔyeee emuu lolo, eshafeelɔi, ni no hewɔ lɛ, gbɔmɔtsoŋ helai mɔmɔɔ wɔ lolo ni yɛ naagbee lɛ wɔgboiɔ. Wɔnine shɛko naanɔ wala ni Yesu wo shi yɛ he lɛ nɔ lolo. Enɛ baajɛ Kojomɔ Gbi lɛ mli aba.
Kojomɔ Gbi Lɛ
Bɔfo Yohane na Kojomɔ Gbi lɛ he ninaa, ni etsɔɔ mli taakɛ bɔ ni nyiɛ sɛɛ nɛɛ: “Ni mina maŋtsɛsɛi yɛŋ ko ni da, kɛ mɔ ni ta nɔ lɛ, ni shikpɔŋ kɛ ŋwɛi jo foi yɛ ehiɛ, ni anaaa gbɛ aha amɛ. Ni mina gbohii lɛ, mɛi bibii kɛ mɛi wuji, damɔ maŋtsɛsɛi lɛ hiɛ, ni agbele woji anaa; ni agbele wolo kroko ni ji wala wolo lɛ hu naa. Ni akojo gbohii lɛ yɛ nibii ni aŋma yɛ woji lɛ amli lɛ anaa, bɔ ni sa amɛnitsumɔi lɛ.”—Kpojiemɔ 20:11, 12, KJ.
Hɛɛ, taakɛ Yohane ninaa lɛ tsɔɔ lɛ, Nyɔŋmɔ diɛŋtsɛ baafee Kojomɔ Gbi lɛ sɛinɔtalɔ. Shi mɔ kroko hu yɛ gbɛfaŋnɔ yɛ mli. Bɔfo Paulo tsɔɔ mli akɛ: “[Nyɔŋmɔ] eto gbi ko, nɔ nɔ ni ebaatsɔ nuu ni eto lɛ nɔ ekojo jeŋ muu lɛ fɛɛ yɛ jalɛ naa.” (Bɔfoi lɛ Asaji 17:31, KJ) Namɔ ji nakai mɔ lɛ? Yesu, mɔ diɛŋtsɛ ni kɛɛ nɛkɛ lɛ: “Ejaakɛ Tsɛ lɛ tete ekojooo mɔ ko, shi moŋ etuu kojomɔ lɛ fɛɛ ewo bi lɛ dɛŋ.” (Yohane 5:22, KJ) No hewɔ lɛ Yesu baafee Kojolɔ ni Nyɔŋmɔ ehala lɛ yɛ Kojomɔ Gbi lɛ nɔ.
Sanekpakpa ji enɛ kɛha gbɔmɛi adesai. Sanekpakpai lɛ jieɔ Yesu kpo akɛ eji mɔ ko ni yɔɔ mlihilɛ kpele. Ewooo ehe nɔ aloo ni eeefee shɛii, shi moŋ ‘ehe jɔ, ni ebaa ehe shi kɛjɛɔ etsui mli.’ (Mateo 11:29; 14:14; 20:34) Eŋɔɔ wɔnaa waa akɛ wɔyɛ kojolɔ ni tamɔ nɛkɛ dɛŋ.
Mɛɛ Be Ebaaba?
Shi kɛlɛ, mɛɛ be Kojomɔ Gbi lɛ baashɛ? Kpojiemɔ kɛɔ akɛ ebaaba beni “shikpɔŋ kɛ ŋwɛi [e]jo foi yɛ ehiɛ.” Enɛ haa wɔkaiɔ bɔfo Petro wiemɔ lɛ: “Shi ŋwɛi kɛ shikpɔŋ ni yɔɔ nɛɛ, lɛ nɔŋŋ ewiemɔ akɛto amɛ aha la, ni akɛ amɛ eto kɛyashi kojomɔ kɛ gbɔmɛi ni kwa Nyɔŋmɔ lɛ ahiɛkpatamɔ gbi lɛ nɔ.” (2 Petro 3:7) Ani akɛ la baasha shikpɔŋ nɛɛ diɛŋtsɛ? Dabi, Biblia lɛ yɛ faŋŋ yɛ nɛkɛ oti nɛɛ nɔ. Akpataŋ shikpɔŋ nɛɛ diɛŋtsɛ hiɛ kɔkɔɔkɔ. “Oŋɔ shikpɔŋ lɛ oto . . . koni ekahoso gbi ko gbi ko.” (Lala 104:5, KJ) Petro wiemɔi lɛ tsɔɔ akɛ amrɔ nɛɛ je lɛŋ nibii agbɛjianɔtoo ni ekwa Nyɔŋmɔ lɛ ji nɔ ni abaakpata ehiɛ lɛ. Gbɔmɛi ni sheee Nyɔŋmɔ gbeyei lɛ ahiɛ abaakpata lɛ, ni jeee shibɔlemɔ ŋulami ni ji Shikpɔŋ lɛ.—Yohane 12:31; 14:30; 1 Yohane 5:19.
Abaakpata nɛkɛ gbɔmɛi ni sheee Nyɔŋmɔ gbeyei nɛɛ ahiɛ yɛ nɔ ni Biblia lɛ tsɛɔ lɛ Harmagedon ta—ni, taakɛ bɔ ni nɛkɛ wolo tɛtrɛɛ nɛɛ fɔɔ tsɔɔmɔ lɛ, etsɛŋ ni ebaaba lɛ mli. (Kpojiemɔ 16:14, 16) Yɛ no sɛɛ lɛ, akɛ Satan diɛŋtsɛ baawo bu kwɔŋkwɔŋ mli ni abaatsi enaa koni ekana hegbɛ ekɛ ehe wo adesai asaji amli afii akpe, ni nɛkɛ afii akpe nɛɛ ji Kojomɔ Gbi lɛ sɛɛjɛkɛmɔ diɛŋtsɛ. (Kpojiemɔ 19:17–20:3) Mɛni baaba anɔkwafoi lɛ anɔ yɛ be mli ni akpata mɛi ni sheee Nyɔŋmɔ gbeyei lɛ ahiɛ yɛ Harmagedon lɛ sɛɛ? Amɛyi baana wala kɛyabote Kojomɔ Gbi lɛ mli tɔ̃ɔ. Wɔkaneɔ akɛ: “Mɛi ni eye emuu lɛ aaashwɛ yɛ [shikpɔŋ lɛ] nɔ; shi aaafolɔ mɛi fɔji lɛ kɛaajɛ shikpɔŋ lɛ nɔ.”—Abɛi 2:21, 22.
Yɛ enɛ sɛɛfimɔ mli lɛ, Biblia lɛ wieɔ akɛ “asafo babaoo ni mɔ ko mɔ ko nyɛŋ akane ni jɛ jeŋmaŋ fɛɛ jeŋmaŋ kɛ akutsei kɛ maji kɛ maji anɔ wiemɔi amli” baapue yɛ shikpɔŋ nɔ dani Harmagedon baaba. Mɛnɛɛmɛi “jɛ amanehulu kpeteŋkpele lɛ mli lɛ”; yɛ wiemɔ kroko mli lɛ, amɛna yiwalaheremɔ kɛjɛ nɛkɛ jeŋ ni sheee Nyɔŋmɔ gbeyei nɛɛ naagbee lɛ mli tamɔ bɔ ni ahere Noa yiwala yɛ jeŋ ni hi shi yɛ egbii amli lɛ naagbee lɛ. (Kpojiemɔ 7:9-17; 2 Petro 2:5) Ani ole akɛ nɛkɛ Kristofoi asafo babaoo ni yɔɔ ekaa ni amɛjɛ jeŋmaji fɛɛ mli nɛɛ yɛ bianɛ po? Mɛnɛɛmɛi ahiɛ ka nɔ akɛ amɛbaaje amanehulu kpeteŋkpele lɛ mli ni amɛhi shi kɛya naanɔ yɛ shikpɔŋ nɔ. Amɛshihilɛ ji odaseyeli ni nɔmimaa yɔɔ mli akɛ Kojomɔ Gbi lɛ ebɛŋkɛ.
Namɛi Abaakojo Lɛ?
Abaakojo nɛkɛ asafo babaoo nɛɛ yɛ Kojomɔ Gbi lɛ nɔ. Shi efeŋ amɛkome pɛ. Yohane sane lɛ yaa nɔ akɛ: “Ni ŋshɔ jie gbohii ni yɔɔ emli lɛ eha, ni gbele kɛ gbohiiaje [hɛl] jie gbohii ni yɔɔ amɛmli lɛ amɛha; ni akojo amɛ, mɔ fɛɛ mɔ bɔ ni sa enitsumɔi lɛ.” (Kpojiemɔ 20:13, KJ) Naa odaseyeli kroko ni tsɔɔ akɛ gbɔmɛi enaaa amanehulu kɛyaaa naanɔ yɛ hɛl. Kɛji hɛl baajie gbohii ni yɔɔ emli lɛ eha lɛ, no lɛ te aaafee tɛŋŋ ni mɔ ko aaahi jɛmɛ kɛya naanɔ hu? Yɛ anɔkwale mli lɛ, Biblia mli hɛl lɛ ji adesai akwamaŋ gbonyo bu, he ni gbohii lɛ yɔɔ akɛ mɛi ni nuuu nɔ ko nɔ ko he ni amɛmiimɛ gbohiiashitee. Yɛ Kojomɔ Gbi lɛ nɔ lɛ, abaajie gbohii fɛɛ ni yɔɔ hɛl lɛ kɛjɛ jɛmɛ.—Jajelɔ 9:10.
Namɛi abaatee amɛ shi kɛjɛ gbohiiaje yɛ Kojomɔ Gbi lɛ nɔ? Bɔfo Paulo kɛɛ akɛ: “Gbohiiashitee baaba, ni jalɔi kɛ mɛi ni ejaaa fɛɛ baate shi.” (Bɔfoi lɛ Asaji 24:15, KJ) No hewɔ lɛ, abaatee Nyɔŋmɔ tsuji anɔkwafoi, “jalɔi” lɛ ashi. Shi nakai nɔŋŋ eji yɛ mɛi krokomɛi babaoo ni anyɛŋ amɛ akane, “mɛi ni ejaaa” lɛ hu ahe. Eka shi faŋŋ akɛ, gbohiiashitee lɛ baasa mɛi fɛɛ ni amɛgboi ni amɛka he amɛyɔɔ gbohii abui amli lolo lɛ ahe—ja mɛi ni hiɛdɔɔ yɔɔ esha ni amɛfee lɛ he waa akɛ Nyɔŋmɔ diɛŋtsɛ ekojo amɛ momo akɛ mɛi ni esaaa wala lɛ pɛ.—Mateo 12:31.
Kojomɔ Lɛ
Shi kɛlɛ, mɛni baaba asafo babaoo ni abaahere amɛyiwala lɛ kɛ mɛi ni abaatee amɛ shi lɛ anɔ yɛ Kojomɔ Gbi lɛ nɔ? Biblia lɛ kɛɔ akɛ: “Ni akojo gbohii lɛ yɛ nibii ni aŋma yɛ woji lɛ amli lɛ anaa, bɔ ni sa amɛnitsumɔi lɛ.” Be ni akɛpɛiɔ nii amli jogbaŋŋ diɛŋtsɛ nɛ. Abaaŋmala mɛi fɛɛ ni sumɔɔ ni amɛfee amɛnii yɛ ‘nibii ni aŋmala yɛ woji lɛ amli’—ni eka shi faŋŋ akɛ eji kitai ni Nyɔŋmɔ kɛha adesai yɛ nakai beaŋ—lɛ anaa lɛ agbɛii yɛ “wala wolo lɛ” mli. (Kpojiemɔ 20:12, KJ) Amɛbaafee mɛi ni nyiɛ gbɛ nɔ kɛmiiya naanɔ wala namɔ mli!
Kɛkɛ lɛ, yɛ naagbee lɛ, Kristo afɔleshaa gbele lɛ kɛ gbɔmɔtsoŋ sɛɛnamɔi baaba! Mɛi ni aŋmala amɛgbɛii yɛ wala wolo lɛ mli yɛ nakai beaŋ lɛ gbɔjɔŋ kɛyaŋ hela kɛ gbele mli dɔŋŋ. Shi moŋ abaahole amɛnɔ fiofio kɛshɛ adesa emuuyeli mli, kɛ naanɔ wala ni awo shi yɛ he aha mɛi ni jieɔ hemɔkɛyeli kpo yɛ Yesu mli lɛ hu. Mɛɛ gbɛkpamɔ ni yɔɔ nyam nɛ! Shi yɛ enɛ fɛɛ sɛɛ lɛ, eka shi faŋŋ akɛ mɛi komɛi baakpoo akɛ amɛbooo ‘nibii ni aŋmala yɛ woji lɛ amli’ lɛ toi. Mɛni baaba amɛnɔ? Amɛnaŋ naanɔ wala. Shi moŋ, Ŋmalɛi lɛ kɛɔ akɛ: “Ni kɛ mɔ ko yɛ ni anaaa akɛ aŋma egbɛi yɛ wala wolo lɛ mli lɛ, ashɛɔ lɛ afɔɔ la kpaakpo lɛ mli.”—Kpojiemɔ 20:15, KJ].
Ani enɛ ji hɛl la ni Kristemdom wieɔ he lɛ? Dabi, ejaakɛ wɔkaneɔ yɛ kuku ni tsɔ enɛ hiɛ lɛ mli akɛ: “Ni gbele kɛ gbohiiaje [hɛl] lɛ, ashɛrɛ amɛ ashwie la kpaakpo lɛ mli. Enɛ ji gbele ni ji enyɔ lɛ.” (Kpojiemɔ 20:14, KJ) Kɛji ashɛ hɛl afɔ la kpaakpo lɛ mli lɛ, no lɛ la kpaakpo lɛ diɛŋtsɛ nyɛŋ afee hɛl la mɔ. Kɛfata he lɛ, gbele jeee nɔ ko ni yɔɔ gbɔmɔtso loo su ni abaanyɛ awo lɛ ashɛ afɔ he ko. No hewɔ lɛ, belɛ la kpaakpo lɛ ji okadifeemɔ mli nɔ. Mɛni he okadi? Biblia lɛ kɛɔ akɛ: “Enɛ ji gbele ni ji enyɔ lɛ.” Kɛji ashɛrɛ gbele kɛ Hades awo la kpaakpo lɛ mli lɛ, ‘amɛgboiɔ,’ amɛjeɔ shihilɛ mli kwraa. Nakai nɔŋŋ hu, adesai atuatselɔi ni yagbeɔ naa yɛ jɛmɛ lɛ gboiɔ, aloo amɛjeɔ shihilɛ mli kwraa. Ni kɛlɛ, enɛ ji gbele ni ji enyɔ lɛ, ni gbohiiashitee he hiɛnɔkamɔ ko bɛ mli.
Kojomɔ Gbi—Hiɛnɔkamɔ Be
No hewɔ lɛ kɛ wɔsusu Kojomɔ Gbi lɛ he lɛ, esaaa ni ewoɔ wɔhe gbeyei loo wɔnijiaŋ jeɔ wui. Shi moŋ, Kojomɔ Gbi lɛ ji be kɛha hiɛnɔkamɔ, be ni akɛ naanɔ wala ni Adam laaje lɛ baaku sɛɛ abaha adesai ekoŋŋ. Bo jɔɔmɔi ni ekɛbaaha mɛi ni abaakojo amɛ akɛ anɔkwafoi lɛ toi: “Naa, Nyɔŋmɔ buu lɛ yɛ gbɔmɛi ateŋ, ni eseshi ebuu lɛ yɛ amɛteŋ, ni amɛaatsɔmɔ emaŋ, ni Nyɔŋmɔ diɛŋtsɛ kɛ amɛ aaahi shi, ni eeetsɔ amɛ-Nyɔŋmɔ. Ni Nyɔŋmɔ aaatsumɔ amɛhiɛaŋ yaafo nui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpojiemɔ 21:3, 4.
Beni afii akpe kojomɔ gbi lɛ baaba naagbee lɛ, adesai anɔkwafoi ni jɛ shikpɔŋ lɛ nɔ hei sɔrɔtoi fɛɛ baaye emuu yɛ naagbee kwraa. No mli lɛ, ‘amɛhiɛ etsɛ̃’ yɛ eshishinumɔ kwraa naa, ni yiŋtoo ni yɔɔ Kojomɔ Gbi lɛ he lɛ eba mli. (Kpojiemɔ 20:5) Kɛkɛ lɛ, Biblia lɛ kɛɔ akɛ, abaaŋmɛ Satan gbɛ ni ena adesai ahe gbɛ shikome ekoŋŋ ni ji naagbee nɔ. (Kpojiemɔ 20:3, 7-10) Mɛi ni baate shi amɛwo lɛ yɛ nɛkɛ naagbee nɔ nɛɛ mli lɛ baana Biblia mli shiwoo nɛɛ mlibaa kwraa lɛ mli ŋɔɔmɔ: “Jalɔi lɛ, shikpɔŋ lɛ aaatsɔ amɛnɔ ni amɛaahi nɔ daa.”—Lala 37:29.
Mɛɛ gbɛjianɔtoo ni yɔɔ naakpɛɛ Kojomɔ Gbi lɛ ji nɛkɛ! Ni kwɛ bɔ ni esa kadimɔ jogbaŋŋ akɛ wɔɔsaa wɔhe wɔto bianɛ, kɛtsɔ Biblia lɛ kasemɔ, Nyɔŋmɔ suɔmɔnaa nii kasemɔ, kɛ nɛkɛ Nyɔŋmɔ suɔmɔnaa nii nɛɛ kɛ nitsumɔ yɛ wɔshihilɛ mli lɛ nɔ! Ebɛ naakpɛɛ akɛ lalatsɛ lɛ tsɔɔ bɔ ni enaa Nyɔŋmɔ kojomɔ lɛ he miishɛɛ ehaa, beni eŋma nɛkɛ lɛ: “Ŋwɛi anya, ni shikpɔŋ lɛ mli afili lɛ; ŋshɔ ahũu kɛ emli nii lɛ fɛɛ. Ŋa abɔ oshe kɛ nɔ fɛɛ nɔ ni yɔɔ nɔ, ni kooŋ tsei fɛɛ ala kɛ miishɛɛ yɛ Yehowa hiɛ; ejaakɛ eba, ejaakɛ eba ebaakojo shikpɔŋ lɛ.”—Lala 96:11-13.