Yitso 41

Nyɔŋmɔ Kojomɔ Gbi Lɛ​—Miishɛɛ ni Baajɛ Mli Aba!

Ninaa 15​—Kpojiemɔ 20:11–21:8

Saneyitso: Gbohiiashitee lɛ diɛŋtsɛ, Kojomɔ Gbi, kɛ ŋwɛi hee kɛ shikpɔŋ hee lɛ mli jɔɔmɔi

Emlibaa be: Afii Akpe Nɔyeli lɛ

 1. (a) Mɛni adesai laaje beni Adam kɛ Hawa fee esha lɛ? (b) Mɛɛ Nyɔŋmɔ yiŋtoo ko tsakeko, ni te wɔfeɔ tɛŋŋ wɔleɔ enɛ hu?

AKƐ adesai lɛ, abɔ wɔ koni wɔhi shi kɛya naanɔ. Eji Adam kɛ Hawa bo Nyɔŋmɔ famɔi atoi kulɛ, amɛgboiŋ gbi ko gbi ko. (1 Mose 1:28; 2:8, 16, 17; Jajelɔ 3:10, 11) Shi beni amɛfee esha lɛ, amɛlaaje emuuyeli kɛ wala kɛha amɛ diɛŋtsɛ amɛhe kɛ amɛshwiei, kɛkɛ ni gbele baye adesai anɔ maŋtsɛ akɛ henyɛlɔ ni enaaa mɔbɔ. (Romabii 5:12, 14; 1 Korintobii 15:26) Ni kɛlɛ, Nyɔŋmɔ yiŋtoo akɛ eeeha adesai ni yeɔ emuu ahi shi kɛya naanɔ yɛ paradeiso shikpɔŋ nɔ lɛ tsakeee. Yɛ suɔmɔ kpele ni eyɔɔ kɛhaa adesai hewɔ lɛ, etsu e-Bi koome, Yesu, kɛba shikpɔŋ nɔ, ni ekɛ ewala akɛ adesa ni yeɔ emuu lɛ ha akɛ kpɔmɔ nɔ kɛha Adam shwiei lɛ ateŋ “mɛi pii.” (Mateo 20:28; Yohane 3:16) Yesu baanyɛ ni ekɛ efɔleshaa lɛ mli hegbɛ ni ena lɛ asaa adesai ni heɔ yeɔ lɛ kɛba wala mli yɛ emuuyeli mli yɛ paradeiso shikpɔŋ nɔ ekoŋŋ. (1 Petro 3:18; 1 Yohane 2:2) Mɛɛ yiŋtoo ni yɔɔ nyam enɛ ji kɛha adesai akɛ ‘amɛaanya ni amɛmli afili amɛ’!—Yesaia 25:8, 9.

 2. Mɛni Yohane bɔɔ he amaniɛ yɛ Kpojiemɔ 20:11, ni mɛni ji “maŋtsɛsɛi yɛŋ ko ni da” lɛ?

² Akɛni akɛ Satan ewo bu kwɔŋkwɔŋ lɛ mli hewɔ lɛ, Yesu anunyam Afii Akpe Nɔyeli lɛ jeɔ shishi. Agbɛnɛ wɔbote “gbi” ni Nyɔŋmɔ eto akɛ “ebaatsɔ nuu ni eto lɛ nɔ ekojo jeŋ muu lɛ fɛɛ yɛ jalɛ naa” lɛ mli. (Bɔfoi lɛ Asaji 17:31; 2 Petro 3:8) Yohane jaje akɛ: “Ni mina maŋtsɛsɛi yɛŋ ko ni da, kɛ mɔ ni ta nɔ lɛ, ni shikpɔŋ kɛ ŋwɛi jo foi yɛ ehiɛ, ni anaaa gbɛ aha amɛ.” (Kpojiemɔ 20:11) Mɛni ji nɛkɛ “maŋtsɛsɛi yɛŋ ko ni da” nɛɛ? Ejeee ekroko fe “Nyɔŋmɔ ni ji mɛi fɛɛ akojolɔ lɛ” kojomɔ sɛi lɛ. (Hebribii 12:23) Agbɛnɛ ebaakojo adesai yɛ mɔ ni baana Yesu kpɔmɔ afɔleshaa lɛ he sɛɛ lɛ naa.—Marko 10:45.

 3. (a) Anɔkwale ni eji akɛ Nyɔŋmɔ maŋtsɛsɛi lɛ “da” ni eji “eyɛŋ” lɛ tsɔɔ mɛni? (b) Namɔ baatsu kojomɔ lɛ he nii yɛ Kojomɔ Gbi lɛ nɔ, ni mɛni nɔ ebaadamɔ?

³ Nyɔŋmɔ maŋtsɛsɛi lɛ “da,” ni emaa Jeŋ Muu Fɛɛ Nuŋtsɔ lɛ nyam kpeteŋkpele lɛ nɔ mi, ni eji ‘eyɛŋ’ hu, ni enɛ hu gbalaa jwɛŋmɔ kɛbaa ejalɛ nifeemɔ ni tɔmɔ ko kwraa bɛ he lɛ nɔ. Lɛ ji adesai fɛɛ a-Kojolɔ ni fe fɛɛ. (Lala 19:7-11; Yesaia 33:22; 51:5, 8) Shi ekɛ kojomɔ nitsumɔ lɛ ewo Yesu Kristo dɛŋ: “Ejaakɛ Tsɛ lɛ tete ekojooo mɔ ko, shi moŋ etuu kojomɔ lɛ fɛɛ ewo Bi lɛ dɛŋ.” (Yohane 5:22) Mɛi ni fata Yesu he ji 144,000 lɛ ni “akɛ kojomɔ hewalɛ ha amɛ . . . [kɛha] afii akpe” lɛ. (Kpojiemɔ 20:4) Yɛ enɛ po mli lɛ, tɛi ni Yehowa efolɔ eshwie shi lɛ ji nɔ ni tsɔɔ nɔ ni baaba aŋkroaŋkro fɛɛ nɔ yɛ Kojomɔ Gbi lɛ nɔ.

 4. Akɛ “ŋwɛi kɛ shikpɔŋ jo foi” lɛ tsɔɔ mɛni?

⁴ Te ebaa lɛ tɛŋŋ ni “shikpɔŋ kɛ ŋwɛi jo foi yɛ ehiɛ” lɛ? Nɛkɛ ŋwɛi nɛɛ nɔŋŋ ji nɔ ni tsi ehe kɛtee tamɔ akotaa wolo yɛ be mli ni atse naasɔomɔ ni ji ekpaa lɛ naa lɛ—adesai nɔyelɔi ni yeɔ nɔ ni “akɛ amɛ eto aha la, ni akɛ amɛ eto kɛyashi kojomɔ kɛ gbɔmɛi ni kwa Nyɔŋmɔ lɛ ahiɛkpatamɔ gbi lɛ nɔ” lɛ. (Kpojiemɔ 6:14; 2 Petro 3:7) Shikpɔŋ lɛ ji nibii agbɛjianɔtoo ni yɔɔ nɛkɛ nɔyeli nɛɛ shishi lɛ. (Kpojiemɔ 8:7) Kooloo lɛ kɛ shikpɔŋ lɛ nɔ maŋtsɛmɛi lɛ kɛ amɛtai lɛ, kɛ agbɛnɛ mɛi ni he kooloo lɛ okadi lɛ kɛ mɛi ni jaa emaga lɛ ahiɛkpatamɔ kadiɔ nɛkɛ ŋwɛi kɛ shikpɔŋ nɛɛ foijee lɛ. (Kpojiemɔ 19:19-21) Akɛni akojo Satan shikpɔŋ kɛ eŋwɛi lɛ hewɔ lɛ, Kojolɔ Kpeteŋkpele lɛ kɛ Kojomɔ Gbi kroko he famɔ haa.

Afii Akpe Kojomɔ Gbi Lɛ

 5. Beni shikpɔŋ lɛ kɛ ŋwɛi momo lɛ ejo foi lɛ sɛɛ lɛ, namɛi eshwɛ ni abaakojo amɛ lɛ?

⁵ Namɛi eshwɛ ni abaakojo amɛ yɛ be mli ni shikpɔŋ momo lɛ kɛ ŋwɛi momo lɛ ejo foi lɛ? Jeee 144,000 lɛ mli shwɛɛnii ni afɔ amɛ mu lɛ, ejaakɛ akojo mɛnɛɛmɛi momo ni asɔo amɛnaa. Kɛji akɛ mɛi ni afɔ amɛ mu lɛ ateŋ mɛi komɛi yɛ wala mli yɛ shikpɔŋ nɔ lolo yɛ Harmagedon sɛɛ lɛ, esa akɛ amɛgboi koni amɛnine ashɛ amɛ ŋwɛi nyɔmɔwoo nɔ kɛtsɔ gbohiiashitee nɔ. (1 Petro 4:17; Kpojiemɔ 7:2-4) Shi akpekpei abɔ ni ji asafo babaoo lɛ ni agbɛnɛ amɛje amanehulu kpeteŋkpele lɛ mli lɛ “damɔ maŋtsɛsɛi lɛ hiɛ” ni anaa amɛ faŋŋ. Abu mɛnɛɛmɛi jalɔi momo kɛha yibaamɔ yɛ hemɔkɛyeli ni amɛyɔɔ yɛ Yesu la ni efɔse eshwie shi lɛ mli lɛ hewɔ, shi esa akɛ amɛkojomɔ lɛ aya nɔ kɛtsɔ afii akpe lɛ mli yɛ be mli ni Yesu yaa nɔ ekudɔɔ amɛ kɛyaa “wala nu bui ahe” lɛ. Kɛkɛ lɛ, beni akɛ amɛ eba adesai emuuyeli mli ni yɛ no sɛɛ lɛ aka amɛ lɛ, abaabu amɛ jalɔi kwraa kɛmɔ shi. (Kpojiemɔ 7:9, 10, 14, 17) Ehe baahia ni akojo gbekɛbii ni jeɔ amanehulu kpeteŋkpele lɛ mli lɛ kɛ gbekɛbii ni asafo babaoo lɛ fɔɔ amɛ yɛ Afii Akpe lɛ mli lɛ hu nakai nɔŋŋ yɛ afii akpe be lɛ mli.—Okɛto 1 Mose 1:28; 9:7; 1 Korintobii 7:14 he.

 6. (a) Mɛɛ gbɔmɛi babaoo ko Yohane na, ni wiemɔ “mɛi bibii kɛ mɛi wuji” lɛ tsɔɔ mɛni? (b) Te aaafee tɛŋŋ ni akɛ akpekpei abɔ ni anyɛŋ akane amɛ ni yɔɔ Nyɔŋmɔ kaimɔ mli lɛ aba?

⁶ Shi, Yohane na gbɔmɛi babaoo ko ni fa fe asafo babaoo lɛ ni je mli lɛ. Amɛyibɔ baashɛ akpekpei toi akpei abɔ! “Ni mina gbohii lɛ, mɛi bibii kɛ mɛi wuji, damɔ maŋtsɛsɛi lɛ hiɛ, ni agbele woji anaa.” (Kpojiemɔ 20:12a) “Mɛi bibii kɛ mɛi wuji” lɛ damɔ shi kɛha adesai ni ehi shikpɔŋ nɛɛ nɔ ni amɛgboi yɛ afii 6,000 ni eho nɛɛ mli lɛ ateŋ mɛi ni na gbɛi ni abale amɛ kɛ mɛi ni naaa gbɛi ni aleee amɛ lɛ. Yesu wie e-Tsɛ lɛ he yɛ Sanekpakpa lɛ ni bɔfo Yohane ŋma yɛ Kpojiemɔ lɛ sɛɛ nɔŋŋ lɛ mli akɛ: “Ni eha lɛ [Yesu] hegbɛ akɛ ekojo hu, ejaakɛ gbɔmɔ bi ji lɛ. Enɛ akafee nyɛ naakpɛɛ; ejaakɛ ŋmɛlɛtswaa lɛ miiba, nɔ mli ni mɛi fɛɛ ni yɔɔ kaimɔ gbohii abui lɛ amli lɛ aaanu egbee, ni amɛaaje kpo.” (Yohane 5:27-29, New World Translation) Mɛɛ nitsumɔ ni da ni yɔɔ naakpɛɛ nɛ—nɔ ni gbelei kɛ gbɔmɛi ni afu amɛ yɛ bui amli yɛ yinɔsane be fɛɛ mli lɛ efee lɛ ni aaasaa ekoŋŋ! Ŋwanejee ko bɛ he akɛ akɛ gbɔmɛi akpekpei abɔ ni anyɛŋ akane amɛ ni yɔɔ Nyɔŋmɔ kaimɔ mli lɛ baaba fiofio koni asafo babaoo lɛ—ni kɛ akɛ amɛ to mɛi ni baa nɛɛ ahe lɛ amɛji mɛi fioo lɛ—anyɛ atsu naagbai ni baanyɛ ate shi lɛ ahe nii akɛni mɛi ni atee amɛshi nɛɛ baasumɔ ni amɛdi amɛtsutsu shihilɛ momo lɛ kɛ ehelooŋ gbɔjɔmɔi kɛ subaŋi lɛ asɛɛ lɛ hewɔ.

Namɛi Ateɔ Amɛ Shi ni Akojoɔ Amɛ Lɛ?

7, 8. (a) Mɛɛ wolo agbele mli lɛ, ni mɛni yaa nɔ yɛ no sɛɛ? (b) Namɛi naŋ gbohiiashitee lɛ?

⁷ Yohane kɛfata he akɛ: “Ni agbele wolo kroko ni ji wala wolo lɛ hu naa. Ni akojo gbohii lɛ yɛ nibii ni aŋma yɛ woji lɛ amli lɛ anaa, bɔ ni sa amɛnitsumɔi lɛ. Ni ŋshɔ jie gbohii ni yɔɔ emli lɛ eha, ni gbele kɛ gbohiiaje (Hades) jie gbohii ni yɔɔ amɛmli lɛ amɛha; ni akojo amɛ, mɔ fɛɛ mɔ, bɔ ni sa enitsumɔi lɛ.” (Kpojiemɔ 20:12b, 13) Nii ni yɔɔ naakpɛɛ ni anaa diɛŋtsɛ nɛ! ‘Ŋshɔ, gbele, kɛ gbohiiaje (Hades)’ fɛɛ naa gbɛfaŋnɔ yɛ mli, shi kadimɔ akɛ nɛkɛ wiemɔi nɛɛ etsɔɔɔ mɛi fɛɛ ni yɔɔ mli lɛ.a Beni Yona yɔɔ loo agbo lɛ musuŋ, ni no hewɔ lɛ eyɔɔ ŋshɔ teŋ lɛ, ewie lɛ diɛŋtsɛ ehe akɛ eyɛ Sheol, loo Hades (gbohiiaje). (Yona 2:2) Kɛ Adam gbele lɛ emɔ mɔ ko lɛ, belɛ eka shi faŋŋ akɛ lɛ hu eyɛ Hades loo gbohiiaje. Nɛkɛ gbalɛ wiemɔi nɛɛ kɛ nɔmimaa ni mli wa haa akɛ akuŋ hiɛ ashwieŋ mɔ ko mɔ ko nɔ.

⁸ Shi, yibɔ babaoo ko yɛ ni aleee amɛyifalɛ ni amɛnaŋ shitee. Mɛi ni fata mɛnɛɛmɛi ahe ji woloŋmalɔi lɛ kɛ Farisifoi lɛ ni tsakeee amɛtsui ni kpoo Yesu kɛ ebɔfoi lɛ, jamɔ mli “mlakwamɔ gbɔmɔ” lɛ kɛ Kristofoi ni afɔ amɛ mu lɛ “ni amɛgbee shi lɛ.” (2 Tesalonikabii 2:3; Hebribii 6:4-6; Mateo 23:29-33, New World Translation) Yesu hu wie gbɔmɛi ni tamɔ abotiai yɛ je lɛ naagbee gbii lɛ amli ni yaa “naanɔ la lɛ ni asaa ato Abonsam kɛ ebɔfoi lɛ mli,” ni ji, “naanɔ hiɛkpatamɔ” lɛ ahe. (Mateo 25:41, 46, New World Translation) Gbohiiashitee ko bɛ kɛha mɛnɛɛmɛi!

 9. Yɛ mɛɛ gbɛ nɔ bɔfo Paulo tsɔɔ akɛ mɛi komɛi baana duromɔ krɛdɛɛ ko yɛ shitee lɛ mli, ni namɛi fata mɛnɛɛmɛi ahe?

⁹ Yɛ gbɛ kroko nɔ lɛ, abaaduro mɛi komɛi yɛ gbɛ krɛdɛɛ ko nɔ yɛ shitee lɛ mli. Bɔfo Paulo tsɔɔ enɛ beni ekɛɛ: “Miyɛ Nyɔŋmɔ nɔ hiɛnɔkamɔ akɛ gbohiiashitee baaba, ni jalɔi kɛ mɛi ni ejaaa fɛɛ baate shi.” (Bɔfoi lɛ Asaji 24:15) Yɛ shikpɔŋ nɔ shitee lɛ gbɛfaŋ lɛ, mɛi ni baafata “jalɔi” nɛɛ ahe ji blema hii kɛ yei anɔkwafoi—Abraham, Rahab, kɛ mɛi krokomɛi babaoo—ni abu amɛ jalɔi akɛni amɛtsɔmɔ Nyɔŋmɔ shieŋtsɛmɛi lɛ hewɔ. (Yakobo 2:21, 23, 25) Mɛi ni yɔɔ nɛkɛ kuu nɛɛ nɔŋŋ mli ji toi krokomɛi ni ji jalɔi ni gboi yɛ anɔkwa ni amɛyeɔ Yehowa lɛ mli yɛ ŋmɛnɛŋmɛnɛ beaŋ lɛ. Eka shi faŋŋ akɛ mɛi ni hiɛɔ amɛ emuuyeli mli nɛɛ fɛɛ baana mra shitee yɛ Yesu Afii Akpe Nɔyeli be lɛ mli. (Hiob 14:13-15; 27:5; Daniel 12:13; Hebribii 11:35, 39, 40) Ŋwanejee ko bɛ he akɛ akɛ hegbɛi krɛdɛɛi baawo jalɔi ni atee amɛ shi nɛɛ ateŋ mɛi pii adɛŋ ni amɛkwɛ nitsumɔ kpeteŋkpele ni ji Paradeiso ni akuɔ sɛɛ akɛbaa ekoŋŋ lɛ nɔ.—Lala 45:17; okɛto Yesaia 32:1, 16-18; 61:5; 65:21-23 he.

10. Namɛi ji “mɛi ni ejaaa lɛ” ni abaatee amɛ shi lɛ?

¹⁰ Shi, namɛi ji “mɛi ni ejaaa” ni atsi amɛ ta yɛ Bɔfoi lɛ Asaji 24:15 lɛ? Mɛi ni baafata mɛnɛɛmɛi ahe ji adesai babaoo ni gboi yɛ yinɔsane be fɛɛ mli, titri lɛ, mɛi ni hi shi ‘yɛ be ni aleee nɔ ko lɛ amli’ lɛ. (Bɔfoi lɛ Asaji 17:30) Yɛ he ni afɔ mɛnɛɛmɛi yɛ, loo he ni amɛhi hewɔ lɛ, amɛnaaa hegbɛ ni amɛkɛaakase toiboo ni amɛaafee amɛha Yehowa suɔmɔnaa nii. Kɛfata he lɛ, mɛi komɛi baanyɛ ahi shi ni amɛnu yiwalaheremɔ sane lɛ, shi amɛhereee nɔ bɔ ni sa yɛ nakai be lɛ mli aloo amɛgboi po dani eeenyɛ eba akɛ amɛaanyɛ amɛya amɛhiɛ kɛyashɛ henɔjɔɔmɔ kɛ baptisimɔ he. Yɛ gbohiiashitee lɛ mli lɛ, ehe baahia ni mɛi ni tamɔ nɛkɛ afee tsakemɔi yɛ amɛjwɛŋmɔ kɛ shihilɛ mli kɛ hegbɛ kɛha naanɔ wala namɔ nɛɛ he aaanyɛ aba sɛɛnamɔ aha amɛ.

Wala Wolo Lɛ

11. (a) Mɛni ji “wala wolo lɛ,” ni namɛi agbɛii aŋmala yɛ wolo nɛɛ mli? (b) Mɛni hewɔ abaagbele wala wolo lɛ mli yɛ Afii Akpe Nɔyeli lɛ mli lɛ?

¹¹ Yohane wieɔ “wala wolo” lɛ he. Enɛ ji mɛi ni baana naanɔ wala kɛjɛ Yehowa dɛŋ lɛ ahe sane ni aŋmala ashwie shi. Aŋmala Yesu nyɛmimɛi ni afɔ amɛ mu lɛ, asafo babaoo lɛ, kɛ hii anɔkwafoi ni hi shi yɛ blema, tamɔ Mose agbɛii yɛ nɛkɛ wolo nɛɛ mli. (2 Mose 32:32, 33; Daniel 12:1; Kpojiemɔ 3:5) Shi, “mɛi ni ejaaa” lɛ ni atee amɛ shi lɛ ateŋ mɔ ko gbɛi bɛ wala wolo lɛ mli. No hewɔ lɛ abaagbele wala wolo lɛ mli yɛ Afii Akpe Nɔyeli be lɛ mli koni anyɛ aŋmala mɛi krokomɛi ni he saa lɛ agbɛii yɛ mli. Mɛi ni anyɛɛɛ aŋma amɛgbɛi yɛ wolo lɛ, loo wala wolo lɛ mli lɛ, ‘ashɛrɛɔ amɛ awoɔ la kpaakpo lɛ mli.’—Kpojiemɔ 20:15; okɛto Hebribii 3:19 he.

12. Mɛni baatsɔɔ nɔ ni baaha aŋma mɔ ko gbɛi yɛ wala wolo lɛ ni agbele mli lɛ mli, ni Yehowa Kojolɔ ni ehala lɛ lɛ fee enɛ he nɔkwɛmɔnɔ yɛ mɛɛ gbɛ nɔ?

¹² Belɛ mɛni baanyɛ atsɔɔ kɛji akɛ anyɛ aŋma mɔ ko gbɛi yɛ wala wolo ni agbele mli lɛ mli yɛ nakai be lɛ mli? Nɔ titri lɛ tamɔ bɔ ni eyɔɔ yɛ Adam kɛ Hawa gbii lɛ amli lɛ nɔŋŋ: toiboo kɛha Yehowa. Taakɛ bɔfo Yohane ŋma eyaha enanemɛi Kristofoi lɛ: “Je lɛ miiho aya kɛ emli sɛɛdii nii lɛ, shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.” (1 Yohane 2:4-7, 17) Kojolɔ ni Yehowa ehala lɛ lɛ to okadi yɛ toiboo he sane nɛɛ mli: “Ni tsɛ Nyɔŋmɔ Bi ji [Yesu] lɛ moŋ, shi kɛlɛ ekase toiboo yɛ amanehului ni ena lɛ amli, ni akɛni ehi kɛwula shi hewɔ lɛ, etsɔ mɔ mli ni naanɔ yiwalaheremɔ jɛɔ ehaa mɛi fɛɛ ni boɔ lɛ toi lɛ.”—Hebribii 5:8, 9.

Woji Krokomɛi Amli Gbelemɔ

13. Mɛɛ gbɛ nɔ esa akɛ mɛi ni atee amɛ shi lɛ atsɔ nɔ ajie amɛtoiboo lɛ kpo yɛ, ni mɛɛ shishitoo mlai esa akɛ amɛnyiɛ sɛɛ?

¹³ Te mɛi ni atee amɛ shi nɛɛ aaafee tɛŋŋ amɛjie toiboo ni amɛfeɔ lɛ kpo? Yesu diɛŋtsɛ gbala jwɛŋmɔ kɛtee kitai wuji enyɔ lɛ nɔ, akɛ: “Kitai lɛ fɛɛ ateŋ klɛŋklɛŋ nɔ ji enɛ: ‘Bo toi, Israel! Nuŋtsɔ [Yehowa] wɔ-Nyɔŋmɔ lɛ, Nuŋtsɔ [Yehowa] kome ni; ni sɔɔmɔ Nuŋtsɔ [Yehowa] o-Nyɔŋmɔ lɛ kɛ otsui fɛɛ kɛ osusuma fɛɛ kɛ ojwɛŋmɔ fɛɛ kɛ onyɛmɔ fɛɛ!’ Enɛ ji klɛŋklɛŋ kita. Ni nɔ ni ji enyɔ lɛ tamɔ no: ‘Suɔmɔ onaanyo tamɔ bɔ ni osumɔɔ bo diɛŋtsɛ ohe.’” (Marko 12:29-31) Agbɛnɛ hu Yehowa shishitoo mlai ni akɛmamɔ shi shiŋŋ lɛ hu yɛ ni esa akɛ amɛnyiɛ sɛɛ, tamɔ juu, amale, gbɔmɔgbee, kɛ jeŋba shara ni amɛaatsi amɛhe kɛaajɛ he lɛ.—1 Timoteo 1:8-11; Kpojiemɔ 21:8.

14. Mɛɛ woji krokomɛi agbeleɔ mli, ni mɛni yɔɔ mli?

¹⁴ Shi, Yohane etsi woji krokomɛi ni abaagbele naa yɛ Afii Akpe Nɔyeli lɛ mli lɛ ta. (Kpojiemɔ 20:12) Mɛɛ woji ji enɛɛmɛi? Yɛ bei komɛi amli lɛ, Yehowa kɛ famɔi pɔtɛɛ komɛi haa yɛ shihilɛi pɔtɛɛ komɛi amli. Akɛ nɔkwɛmɔnɔ lɛ, yɛ Mose gbii lɛ amli lɛ, ekɛ mlai sɔrɔtoi ni baatsɔɔ wala aha Israelbii lɛ kɛji akɛ amɛbo toi lɛ ha amɛ. (5 Mose 4:40; 32:45-47) Yɛ klɛŋklɛŋ afii oha lɛ mli lɛ, akɛ famɔi heei ha koni eye ebua anɔkwafoi lɛ koni amɛnyɛ amɛnyiɛ Yehowa shishitoo mlai asɛɛ yɛ Kristofoi anibii agbɛjianɔtoo lɛ shishi. (Mateo 28:19, 20; Yohane 13:34; 15:9, 10) Agbɛnɛ Yohane miibɔ amaniɛ akɛ abaakojo “gbohii lɛ yɛ nibii ni aŋmala yɛ woji lɛ amli lɛ anaa, bɔ ni sa amɛnitsumɔi lɛ.” Eka shi faŋŋ akɛ belɛ, nɛkɛ woji nɛɛ amli gbelemɔ lɛ baaha ale Yehowa taomɔ nii ni ato naa aha adesai lɛ fɛɛ yɛ afii akpe lɛ mli. Kɛ amɛkɛ nɛkɛ akpɔi kɛ kitai ni yɔɔ woji lɛ amli lɛ tsu nii yɛ amɛshihilɛi amli lɛ, adesai toibolɔi baanyɛ ni amɛha amɛgbii asɛɛ atsɛ, koni yɛ naagbee lɛ amɛnine ashɛ naanɔ wala nɔ.

15. Mɛɛ tsɔsemɔ he tafaa ko he baahia yɛ gbohiiashitee lɛ mli, ni te gbohiiashitee lɛ aaaba aha tɛŋŋ?

¹⁵ Mɛɛ teokrase tsɔsemɔ he tafaa babaoo enɛ he baahia aha nɛkɛ! Yɛ afi 2005 mli lɛ,Yehowa Odasefoi ni yɔɔ jeŋ fɛɛ lɛ fee shia Biblia mli nikasemɔi ni aaafee 6,061,534 yɛ hei sɔrɔtoi. Shi yɛ shitee lɛ mli lɛ, abaadamɔ Biblia lɛ kɛ woji heei lɛ anɔ afee nikasemɔi akpekpei abɔ ni anyɛŋ akane! Ehe baahia ni Nyɔŋmɔ webii fɛɛ atsɔmɔ tsɔɔlɔi ni amɛbɔ mɔdɛŋ hu yɛ mli. Yɛ be mli ni mɛi ni atee amɛ shi lɛ yaa amɛhiɛ lɛ, ŋwanejee ko bɛ he akɛ amɛ hu amɛbaana nitsɔɔmɔ he gbɛjianɔtoo ni da nɛɛ mli gbɛfaŋnɔ. Eka shi faŋŋ akɛ shitee lɛ baaya nɔ bɔ ni mɛi ni yɔɔ wala mli lɛ baana miishɛɛ akɛ amɛaahere amɛ tsutsu weku lɛ mli bii kɛ nanemɛi lɛ atuu ni amɛtsɔɔ amɛ nii, koni amɛ hu amɛhere mɛi krokomɛi hu atuu ni amɛtsɔɔ amɛ nii. (Okɛto 1 Korintobii 15:19-28, 58 he.) Yehowa Odasefoi fe akpekpei ekpaa ni kɛ ekaa gbɛɔ anɔkwale lɛ amɛshwaa ŋmɛnɛ lɛ kɛ shishitoo kpakpa ko miifɔ shi amɛha hegbɛi ni amɛhiɛ ka nɔ akɛ amɛbaana yɛ gbohiiashitee lɛ mli lɛ.—Yesaia 50:4; 54:13.

16. (a) Namɛi agbɛii aŋmalaŋ yɛ wolo lɛ loo wala wolo lɛ mli lɛ? (b) Namɛi ji mɛi ni amɛshitee lɛ baatsɔ “wala” nɔ lɛ?

¹⁶ Yɛ shikpɔŋ nɔ shitee lɛ he lɛ, Yesu kɛɛ akɛ ‘mɛi ni fee ekpakpa lɛ aaate shi kɛaatee wala mli, ni mɛi ni fee efɔŋ lɛ aaate shi kɛaatee kojomɔ lɛ mli.’ Akɛ bɔ ni esoro “wala” kɛ “kojomɔ” yɛ biɛ lɛ miito eko he, ni etsɔɔ akɛ mɛi ni ateɔ amɛ shi ni “tsu nishaianii” yɛ be mli ni atsɔse amɛ yɛ Ŋmalɛ ni jɛ mumɔŋ lɛ kɛ woji lɛ anaa lɛ sɛɛ lɛ, akojoɔ amɛ akɛ mɛi ni esaaa wala. Aŋmalaŋ amɛgbɛi yɛ wolo lɛ loo wala wolo lɛ mli. (Yohane 5:29) Enɛ hu baafee anɔkwale yɛ mɔ fɛɛ mɔ ni tsutsu lɛ edi anɔkwale gbɛ lɛ sɛɛ shi yɛ sɛɛ mli lɛ, yɛ yiŋtoi komɛi ahewɔ lɛ, egba afa yɛ Afii Akpe Nɔyeli lɛ mli lɛ he. Abaanyɛ atsumɔ loo agbe gbɛi lɛ hu. (2 Mose 32:32, 33) Yɛ gbɛ kroko nɔ lɛ, mɛi ni kɛ toiboo diɔ nibii ni aŋmala yɛ woji lɛ amli lɛ sɛɛ lɛ agbɛi baahi nibii ni aŋmala ashwie shi lɛ amli, wala wolo lɛ mli, ni amɛya nɔ amɛhi shi. Kɛha amɛ lɛ, shitee lɛ eyafee nɔ ni ji “wala mli” nɔ.

Gbele kɛ Gbohiiaje Naagbee

17. (a) Mɛɛ naakpɛɛ nifeemɔ ko Yohane tsɔɔ mli? (b) Mɛɛ be mli gbohiiaje (Hades) mli nɔ fɛɛ nɔ baata? (d) Mɛɛ be mli “abaashɛrɛ” Adam gbele lɛ “awo la kpaakpo lɛ mli”?

¹⁷ Yɛ no sɛɛ lɛ, Yohane tsɔɔ nɔ ko ni yɔɔ naakpɛɛ diɛŋtsɛ mli! “Ni gbele kɛ gbohiiaje (Hades) lɛ, ashɛrɛ amɛ ashwie la kpaakpo lɛ mli. Enɛ ji gbele ni ji enyɔ lɛ, la kpaakpo lɛ nɛ. Ni kɛ mɔ ko yɛ ni anaaa akɛ aŋma egbɛi yɛ wala wolo lɛ mli lɛ, ashɛɔ lɛ afɔɔ la kpaakpo lɛ mli.” (Kpojiemɔ 20:14, 15) Yɛ afii akpe Kojomɔ Gbi lɛ naagbee lɛ, ajieɔ “gbele kɛ gbohiiaje” kɛyaa kwraa. Mɛni hewɔ enɛ heɔ afii akpe lɛ? Gbohiiaje (Hades) ni ji adesai fɛɛ akwamaŋ gbonyobu lɛ mli bii lɛ fɛɛ taa yɛ be mli ni ateɔ naagbee mɔ ni yɔɔ Nyɔŋmɔ kaimɔ mli lɛ shi lɛ. Shi bei abɔ ni esha ni akɛfɔ adesai lɛ ekpɛtɛ amɛhe nɛɛ, Adam gbele lɛ kɛ amɛ yɛ lolo. No hewɔ lɛ ehe baahia ni mɛi fɛɛ ni atee amɛ shi kɛba shikpɔŋ lɛ nɔ lɛ kɛ agbɛnɛ asafo babaoo lɛ ni je Harmagedon mli lɛ abo nɔ ni aŋmala ashwie shi yɛ woji lɛ amli lɛ toi kɛyashi be mli ni akɛ Yesu kpɔmɔ nɔ lɛ jara lɛ aaatsu amɛhe nii kwraa ni akɛjie hela, gbɔlɛ, kɛ fatɔi krokomɛi ni amɛna kɛjɛ fɔmɔ mli lɛ kɛya. Kɛkɛ lɛ Adam gbele lɛ, kɛ gbohiiaje (Hades) fɛɛ lɛ, “ashɛrɛ amɛ ashwie la kpaakpo lɛ mli.” Amɛbaafee mɛi ni etee kɛmiiya naanɔ!

18. (a) Te bɔfo Paulo tsɔɔ omanye ni Yesu nɔyeli akɛ Maŋtsɛ lɛ eye lɛ mli eha tɛŋŋ? (b) Mɛni Yesu feɔ adesa weku ni eye emuu lɛ? (d) Mɛni nibii krokomɛi yaa nɔ yɛ afii akpe lɛ naagbee?

¹⁸ No hewɔ lɛ, gbɛjianɔtoo ni bɔfo Paulo tsɔɔ mli yɛ ewolo ni eŋma eyaha Korintobii lɛ mli lɛ baaba mli kwraa: “Shi ja [Yesu] eye maŋtsɛ kɛyashi beyinɔ ni [Nyɔŋmɔ] eeeŋɔ ehenyɛlɔi lɛ fɛɛ eto enajiashi. Naagbee henyɛlɔ ni abaafo esɛɛ ji [Adam] gbele.” Yɛ no sɛɛ lɛ mɛni baaba? “Shi beni aŋɔ nii fɛɛ ato Bi lɛ shishi lɛ, no lɛ lɛ diɛŋtsɛ hu eeeŋɔ ehe eto Mɔ ni ŋɔ nii fɛɛ to eshishi lɛ shishi.” Yɛ gbɛ kroko nɔ lɛ, Yesu “eeeŋɔ maŋtsɛyeli lɛ eha Nyɔŋmɔ kɛ Tsɛ lɛ.” (1 Korintobii 15:24-28) Hɛɛ, akɛni Yesu etsɔ ekpɔmɔ afɔleshaa lɛ jara lɛ nɔ eye Adam gbele lɛ nɔ kunim hewɔ lɛ, ekɛ adesai aweku ni eye emuu baaha e-Tsɛ, Yehowa. Eka shi faŋŋ akɛ yɛ nɛkɛ be nɛɛ mli, yɛ afii akpe lɛ naagbee, aŋmɛɔ Satan he fioo ni naagbee kaa ni baatsɔɔ mɛi ni amɛgbɛi baahi wala wolo lɛ mli daa lɛ baa. “Nyɛmiaa nyɛhiɛ waa” koni nyɛgbɛi ahi mli!—Luka 13:24; Kpojiemɔ 20:5, New World Translation.

[Shishigbɛ niŋmaa]

[Mfoniri ni yɔɔ baafa 298]

Abaaŋmala “mɛi ni ejaaa” ni atee amɛ shi ni boɔ woji ni agbele mli yɛ Afii Akpe Nɔyeli lɛ mli lɛ toi lɛ hu agbɛii yɛ wala wolo lɛ mli