Yitso 4

Yesu Kɛ Hewalɛwoo Ba

 1. Namɛi Yohane ŋma amɛ agbɛnɛ lɛ, ni namɛi ŋmɛnɛ esa akɛ amɛna nɛkɛ shɛɛ saji nɛɛ ahe miishɛɛ waa lɛ?

ESA akɛ nɔ ni nyiɛ sɛɛ nɛɛ afee nɔ ko ni mɔ fɛɛ mɔ ni kɛ ehe ebɔ Nyɔŋmɔ webii asafoi lɛ ahe ŋmɛnɛ lɛ ana he miishɛɛ waa. Naa shɛɛ saji sɔrɔtoi. Amɛkɔɔ nibii pɔtɛɛ ahe yɛ be mli ni “be ni ato” lɛ bɛŋkɛɔ lɛ. (Kpojiemɔ 1:3) Eji nɔ ni yɛ kɛha wɔnaanɔ sɛɛnamɔ akɛ wɔɔbo nakai wiemɔi lɛ atoi. Nɔ ni aŋma afɔ shi lɛ kaneɔ akɛ: “Yohane ŋma yaha asafoi kpawo ni yɔɔ Asia lɛ: Duromɔ kɛ hejɔlɛ aha nyɛ, kɛjɛ mɔ ni yɔɔ lɛ kɛ mɔ ni yɛ lɛ kɛ mɔ ni baaba lɛ dɛŋ, ni kɛjɛ mumɔi kpawo ni yɔɔ emaŋtsɛsɛi lɛ hiɛ lɛ ŋɔɔ, ni kɛjɛ Yesu Kristo . . . dɛŋ.”—Kpojiemɔ 1:4, 5a.

 2. (a) Mɛni yibɔ ni ji “kpawo” lɛ tsɔɔ? (b) Shɛɛ saji ni akɛyaha “asafoi kpawo” lɛ kɔɔ namɛi ahe ŋmɛnɛ yɛ Nuŋtsɔ lɛ gbi nɛɛ mli?

² Yohane ŋma yaha “asafoi kpawo” lɛ, ni atsi asafoi nɛɛ ata aha wɔ yɛ sɛɛ mli gbalɛ lɛ mli. Afɔɔ yibɔ “kpawo” lɛ tatsii yɛ Kpojiemɔ. Edamɔ shi kɛha emuuyeli, titri lɛ nibii ni kɔɔ Nyɔŋmɔ kɛ esafo ni efɔ amɛ mu lɛ ahe. Akɛni Nyɔŋmɔ webii asafoi ni yɔɔ jeŋ fɛɛ lɛ ayi efa kɛyashɛ akpei nyɔŋmai abɔ yɛ Nuŋtsɔ lɛ gbi lɛ mli hewɔ lɛ, wɔbaanyɛ wɔna nɔmimaa akɛ nɔ ni akɛɔ mɛi ni afɔ amɛ mu lɛ “asafoi kpawo” lɛ titri lɛ hu kɔɔ Nyɔŋmɔ webii fɛɛ he ŋmɛnɛ. (Kpojiemɔ 1:10) Hɛɛ, Yohane yɛ sane ko ni he hiaa waa kɛha Yehowa Odasefoi asafoi fɛɛ kɛ mɛi fɛɛ ni kɛ amɛhe ebɔ amɛhe lɛ yɛ he fɛɛ he yɛ shikpɔŋ lɛ nɔ.

 3. (a) Yɛ Yohane ŋamɔ lɛ mli lɛ, nɛɛgbɛ “duromɔ kɛ hejɔlɛ” baa kɛjɛɔ? (b) Mɛɛ bɔfo Paulo wiemɔi komɛi tamɔ Yohane ŋamɔi nɛɛ nɔŋŋ?

³ “Duromɔ kɛ hejɔlɛ”—kwɛ bɔ ni asumɔɔ enɛɛmɛi ahaa titri lɛ kɛ wɔyoo he ni amɛjɛ lɛ! “Mɔ” ni enɛɛmɛi fɛɛ jɛ eŋɔɔ ji Nuŋtsɔ Maŋtsɛ Yehowa diɛŋtsɛ, mɔ ni ji “naanɔi a-Maŋtsɛ” lɛ, ni hiɔ shi “kɛjɛ naanɔ kɛyaa naanɔ” lɛ. (1 Timoteo 1:17; Lala 90:2) Mɛi ni enɛ kɔɔ amɛhe yɛ biɛ hu ji “mumɔi kpawo” ni tsɔɔ Nyɔŋmɔ nifeemɔ hewalɛ loo mumɔ krɔŋkrɔŋ lɛ nitsumɔ yɛ emuuyeli mli yɛ be mli ni ekɛ shishinumɔ kɛ jɔɔmɔ bahaa mɛi fɛɛ ni boɔ gbalɛ lɛ mli wiemɔi lɛ atoi lɛ. Mɔ ni ekɔɔ ehe titri hu ji “Yesu Kristo,” ni Yohane ŋma yɛ ehe yɛ sɛɛ mli nɛkɛ lɛ: “Ni duromɔ kɛ anɔkwale eyi lɛ obɔ.” (Yohane 1:14) No hewɔ lɛ, nɔ ni yɔɔ Yohane ŋamɔi lɛ amli lɛ tamɔ nɔ ni bɔfo Paulo tsi ta ekɛgbe wolo ni ji enyɔ ni eŋma eyaha Korinto asafo lɛ naa lɛ: “Nuŋtsɔ Yesu Kristo duromɔ lɛ kɛ Nyɔŋmɔ suɔmɔ lɛ kɛ mumɔ krɔŋkrɔŋ lɛ naanyobɔɔ lɛ kɛ nyɛ fɛɛ ahi shi.” (2 Korintobii 13:13) Eba akɛ nɛkɛ wiemɔi nɛɛ hu aaakɔ wɔteŋ mɔ fɛɛ mɔ ni sumɔɔ anɔkwale lɛ ŋmɛnɛ lɛ he!—Lala 119:97.

“Odasefonyo Anɔkwafo Lɛ”

 4. Te Yohane tee nɔ etsɔɔ bɔ ni Yesu Kristo ji lɛ mli eha tɛŋŋ, ni mɛni hewɔ bɔ ni etsɔɔ mli eha lɛ sa jogbaŋŋ lɛ?

⁴ Yɛ Yehowa sɛɛ lɛ, Yesu ji mɔ ni hiɛ yɔɔ nyam fe fɛɛ yɛ jeŋ muu fɛɛ taakɛ Yohane yɔseɔ lɛ ni etsɔɔ bɔ ni eji lɛ mli akɛ “‘Odasefonyo Anɔkwafo lɛ,’ ‘Gbohii ateŋ kromɔbi,’ kɛ ‘Shikpɔŋ lɛ nɔ maŋtsɛmɛi lɛ anɔyelɔ lɛ.’” (Kpojiemɔ 1:5b) Akɛ lɛ ema shi shiŋŋ akɛ Odasefonyo kpeteŋkpele kɛha Nyɔŋmɔ ni Yehowa ji lɛ tamɔ nyɔŋtsere ni yɔɔ ŋwɛi lɛ. (Lala 89:38) Yɛ be mli ni ehiɛ emuuyeli mli aahu kɛtee afɔleshaa gbele mli lɛ sɛɛ lɛ, ebafee adesai ateŋ klɛŋklɛŋ mɔ ni atee lɛ shi kɛtee mumɔŋ wala ni gbele bɛ mli lɛ mli. (Kolosebii 1:18) Agbɛnɛ ni eyɔɔ Yehowa hiɛ nɛɛ, awo enɔ kɛteke shikpɔŋ lɛ nɔ maŋtsɛmɛi fɛɛ, ni ‘aŋɔ ŋwɛi kɛ shikpɔŋ nɔ . . . hegbɛ fɛɛ aha lɛ.’ (Mateo 28:18; Lala 89:28; 1 Timoteo 6:15) Awo lɛ akɛ Maŋtsɛ yɛ 1914 koni eye shikpɔŋ nɔ jeŋmaji lɛ anɔ.—Lala 2:6-9.

 5. (a) Yohane tee nɔ ejie hiɛsɔɔ kpo etsɔɔ Nuŋtsɔ Yesu Kristo yɛ mɛɛ gbɛ nɔ? (b) Yesu nikeenii ni ji ewala akɛ adesa ni yeɔ emuu lɛ he baa sɛɛnamɔ kɛhaa namɛi, ni Kristofoi ni afɔ amɛ mu lɛ ena jɔɔmɔi krɛdɛɛ mli gbɛfaŋnɔ yɛ mɛɛ gbɛ nɔ?

⁵ Yohane tee nɔ etsɔɔ hiɛsɔɔ eha Nuŋtsɔ Yesu Kristo yɛ nɛkɛ miishɛɛ wiemɔi nɛɛ amli: “Mɔ ni sumɔɔ wɔ, ni ekɛ lɛ diɛŋtsɛ ela etsuu wɔhe kɛjɛ wɔhe eshai lɛ amli,—ni eŋɔ wɔ efee maŋtsɛmɛi, kɛ osɔfoi eha e-Tsɛ Nyɔŋmɔ lɛ,—lɛ aŋɔ anunyam kɛ nɔyeli lɛ aha kɛyashi naanɔi anaanɔ! Amen.” (Kpojiemɔ 1:5d, 6) Yesu kɛ adesa wala ni yeɔ emuu ni eyɔɔ lɛ ha koni asaa akɛ adesai aje lɛ mli mɛi ni heɔ enɔ yeɔ lɛ aba wala ni yeɔ emuu mli ekoŋŋ. Bo, nikanelɔ ni asumɔɔ bo, obaanyɛ ofata enɛ he! (Yohane 3:16) Shi Yesu afɔleshaa gbele lɛ gbele gbɛ kɛha jɔɔmɔ krɛdɛɛ ko ni baaba mɛi ni batsɔmɔɔ Kristofoi ni afɔ amɛ mu tamɔ Yohane lɛ anɔ. Atsɔ Yesu kpɔmɔ afɔleshaa lɛ nɔ abu mɛnɛɛmɛi jalɔi. Akɛni amɛkpoo shikpɔŋ nɔ wala gbɛkpamɔi fɛɛ, taakɛ Yesu fee lɛ hewɔ lɛ, akɛ Nyɔŋmɔ mumɔ krɔŋkrɔŋ lɛ efɔ́ asafo kuu bibioo lɛ, kɛ gbɛkpamɔ akɛ abaatee amɛ shi ni amɛyasɔmɔ akɛ maŋtsɛmɛi kɛ osɔfoi kɛ Yesu Kristo yɛ e-Maŋtsɛyeli lɛ mli. (Luka 12:32; Romabii 8:18; 1 Petro 2:5; Kpojiemɔ 20:6) Mɛɛ hegbɛ kpeteŋkpele po nɛ! Ŋwanejee ko bɛ he akɛ no hewɔ ni Yohane jaje kɛ nɔmimaa akɛ anunyam lɛ kɛ hewalɛ lɛ ji Yesu nɔ lɛ!

“Naa Eeba kɛ Atatui Lɛ”

 6. (a) Mɛni Yohane tswa he adafi yɛ Yesu ni “eeba yɛ ŋwɛi atatui lɛ anɔ” lɛ he, ni mɛɛ Yesu gbalɛ ko Yohane baanyɛ akai lɛ? (b) Yesu ‘baa’ yɛ mɛɛ gbɛ nɔ, ni namɛi baawo yara babaoo yɛ shikpɔŋ nɔ lɛ?

⁶ No sɛɛ lɛ, Yohane kɛ miishɛɛ tswa adafi akɛ: “Naa, eeba kɛ atatui lɛ ni hiŋmɛi fɛɛ hiŋmɛi aaana lɛ kɛ mɛi ni tsurɔ lɛ nii lɛ hu; shikpɔŋ lɛ nɔ akutsei lɛ fɛɛ aaawo yara yɛ ehewɔ. Hɛɛ, Amen.” (Kpojiemɔ 1:7) Ŋwanejee ko bɛ he akɛ akai Yohane Yesu gbalɛ ni etsɔ hiɛ ekɛha ni kɔɔ nibii agbɛjianɔtoo lɛ naagbee lɛ he lɛ yɛ biɛ. Yesu jaje akɛ: “Kɛkɛ ni gbɔmɔ bi lɛ okadi lɛ aaapue yɛ ŋwɛi, ni no lɛ shikpɔŋ lɛ nɔ akutsei lɛ fɛɛ aaawo yara, ni amɛaana gbɔmɔ bi lɛ akɛ eeba yɛ ŋwɛi atatui lɛ anɔ kɛ hewalɛ kɛ anunyam babaoo.” (Mateo 24:3, 30) No hewɔ lɛ Yesu ‘baa’ kɛtsɔɔ ejwɛŋmɔ ni egbalaa kɛyaa Yehowa kojomɔi ni ekɛbaa jeŋmaji lɛ anɔ lɛ nɔ. Nɔ ni baajɛ enɛ mli aba ji tsakemɔi yɛ shikpɔŋ nɔ yɛ naakpɛɛ gbɛ nɔ, ni akɛni “shikpɔŋ lɛ nɔ akutsei fɛɛ” ekpoo ba ni Yesu eba maŋtsɛyeli hewalɛ mli nɛɛ hewɔ lɛ, “Nyɔŋmɔ Ofe lɛ mlifu ni naa wa lɛ” baaba amɛnɔ diɛŋtsɛ.—Kpojiemɔ 19:11-21; Lala 2:2, 3, 8, 9.

 7. “Hiŋmɛi fɛɛ hiŋmɛi” ni toigbolɔi anɔ lɛ fata he lɛ “hu aaana” Yesu yɛ mɛɛ gbɛ nɔ?

⁷ Yesu kɛɛ ekaselɔi lɛ yɛ enaagbee gbɛkɛ ni ekɛ amɛ ye lɛ mli akɛ: “Eshwɛ fioo kɛkɛ ni je lɛ enaŋ mi dɔŋŋ.” (Yohane 14:19) Belɛ te feɔ tɛŋŋ ni “hiŋmɛi fɛɛ hiŋmɛi aaana lɛ” lɛ? Esaaa akɛ wɔkpaa gbɛ akɛ Yesu henyɛlɔi lɛ kɛ amɛhiŋmɛi diɛŋtsɛ nɛɛ baana lɛ, ejaakɛ bɔfo Paulo kɛɛ, yɛ be mli ni Yesu ekwɔ kɛtee ŋwɛi lɛ akɛ, agbɛnɛ Yesu “hiɔ la ni anyɛŋ abɛŋkɛ lɛ mli,” “mɔ ni gbɔmɔ ko gbɔmɔ ko enako lɛ da, ni enyɛŋ lɛ ena hu lɛ.” (1 Timoteo 6:16) Eka shi faŋŋ akɛ, Yohane kɛ ‘na’ lɛ miitsɔɔ ‘eyoomɔ,’ taakɛ bɔ ni wɔnyɛɔ wɔnaa loo wɔyooɔ Nyɔŋmɔ sui ni anaaa lɛ kɛtsɔɔ ebɔɔnii anɔ lɛ. (Romabii 1:20) Yesu ‘miiba kɛ atatui’ ni tsɔɔ akɛ ebaafee mɔ ni hiŋmɛi diɛŋtsɛ nɛɛ nyɛŋ lɛ ana taakɛ bɔ ni kɛ hulu yaje atatui asɛɛ lɛ anyɛɛɛ ana lɛ. Kɛ atatui tsi hulu hiɛ yɛ jetsɛremɔ mli po lɛ, wɔle akɛ eyɛ jɛmɛ ejaakɛ jetsɛremɔ la lɛ kpɛɔ kɛbɔleɔ wɔhe. Nakai nɔŋŋ hu, eyɛ mli akɛ anaaa Nuŋtsɔ Yesu moŋ, shi abaajie lɛ kpo tamɔ ‘lalilɛi yɛ be mli ni ekɛ oweletɔɔ baa mɛi ni booo ehe sanekpakpa lɛ toi lɛ anɔ lɛ.’ Abaanyɛ mɛnɛɛmɛi hu nɔ koni “amɛna lɛ.”—2 Tesalonikabii 1:6-8; 2:8, New World Translation.

 8. (a) Namɛi ji “mɛi ni tsurɔ lɛ nii” yɛ afi 33 Ŋ.B. lɛ, ni namɛi ji nakai mɛi lɛ ŋmɛnɛ? (b) Akɛni Yesu bɛ shikpɔŋ nɛɛ nɔ dɔŋŋ hewɔ lɛ, te aaafee tɛŋŋ ni gbɔmɛi ‘aaatsurɔ lɛ nii’ hu?

⁸ “Mɛi ni tsurɔ lɛ nii” lɛ hu ‘baana’ Yesu. Namɛi ji mɛnɛɛmɛi? Beni agbe Yesu yɛ afii 33 Ŋ.B. lɛ, Romabii lɛ kɛ akpɔlɔ tsurɔ lɛ diɛŋtsɛ. Egbee lɛ he fɔ lɛ ka Yudafoi lɛ hu nɔ, ejaakɛ Petro kɛɛ amɛteŋ mɛi komɛi yɛ Pentekoste akɛ: “Nyɔŋmɔ eŋɔ nɛkɛ Yesu ni nyɛsɛŋ lɛ nɛɛ efee Nuŋtsɔ kɛ Kristo fɛɛ.” (Bɔfoi lɛ Asaji 2:5-11, 36; okɛto Zakaria 12:10; Yohane 19:37 he.) Nakai Romabii lɛ kɛ Yudafoi lɛ egboi bianɛ yɛ nɔ ni miihe ashɛ afii 2,000 nɛ. No hewɔ lɛ ‘mɛi ni tsurɔ lɛ nii’ ŋmɛnɛ lɛ damɔ shi kɛha jeŋmaji kɛ gbɔmɛi ni jieɔ nakai nyɛɛ su lɛ nɔŋŋ ni ajie lɛ kpo atsɔɔ Yesu beni asɛŋ lɛ lɛ. Yesu bɛ shikpɔŋ nɛɛ nɔ dɔŋŋ. Shi kɛ shitee-kɛ-wolɔi wa Yehowa Odasefoi ni yeɔ Yesu he odase lɛ ayi aloo amɛkpɛlɛ niseniianii ni afee amɛ lɛ nɔ ŋmɛnɛ lɛ, belɛ etamɔ nɔ ni shitee-kɛ-wolɔi nɛɛ ‘miitsurɔ’ Yesu diɛŋtsɛ ‘nii.’—Mateo 25:33, 41-46.

“Alfa lɛ kɛ Omega Lɛ”

 9. (a) Namɔ wieɔ agbɛnɛ lɛ, ni shii enyiɛ efeɔ nakai yɛ Kpojiemɔ? (b) Mɛni Yehowa tsɔɔ, beni etsɛɔ lɛ diɛŋtsɛ ehe akɛ “Alfa lɛ kɛ Omega lɛ” kɛ “Ofe” lɛ?

⁹ Agbɛnɛ, naakpɛɛ nii amli naakpɛɛ nii! Nuŋtsɔ Yehowa Maŋtsɛ lɛ diɛŋtsɛ miiwie. Kwɛ bɔ ni enɛ sa jogbaŋŋ akɛ nɔ ko ni tsɔɔ ninaai ni baaje kpo lɛ hiɛ, ejaakɛ lɛ ji wɔ Jeŋ Muu Fɛɛ Tsɔɔlɔ kɛ Kpojiemɔ fɛɛ Jɛɛhe! (Yesaia 30:20) Wɔ Nyɔŋmɔ lɛ jajeɔ akɛ: “Mi ji Alfa lɛ kɛ Omega lɛ, . . . Mɔ ni yɔɔ lɛ kɛ Mɔ ni yɛ lɛ kɛ Mɔ ni baaba lɛ . . . Ofe lɛ.” (Kpojiemɔ 1:8) Enɛ ji shii etɛ ni Yehowa diɛŋtsɛ wieɔ kɛjɛɔ ŋwɛi yɛ Kpojiemɔ lɛ mli klɛŋklɛŋ nɔ. (Kwɛmɔ Kpojiemɔ 21:5-8; 22:12-15 hu.) Klɛŋklɛŋ afii oha lɛ mli Kristofoi lɛ baayoo alfa kɛ omega akɛ Hela alfabeta lɛ mli klɛŋklɛŋ nɔ kɛ naagbee nɔ lɛ oya. Yehowa ni kɛ nɛkɛ niŋmaai okadii enyɔ nɛɛ tsɛɔ lɛ diɛŋtsɛ ehe lɛ maa nɔ mi akɛ Nyɔŋmɔ ofe ko tsɔko ehiɛ, ni eko hu baŋ yɛ esɛɛ. Ekɛ sane ni kɔɔ Nyɔŋmɔyeli he lɛ baaba naagbee yɛ omanyeyeli mli kɛya naanɔ. Abaabu lɛ bem akɛ Nyɔŋmɔ Ofe kome pɛ ni yɔɔ, Jeŋ Muu Fɛɛ Maŋtsɛ ni yeɔ ebɔɔnii fɛɛ nɔ.—Okɛto Yesaia 46:10; 55:10, 11 he.

10. (a) Te Yohane tsɔɔ bɔ ni lɛ diɛŋtsɛ eji lɛ mli eha tɛŋŋ, ni nɛgbɛ atsi enaa yɛ lɛ? (b) Namɛi ye bua ni akɛ wolo ni Yohane ŋma lɛ yaha asafoi lɛ? (d) Mɛɛ gbɛ nɔ atsɔɔ akɛ mumɔŋ niyenii haa ŋmɛnɛ yɛ be babaoo mli?

¹⁰ Akɛni Yohane yɛ hekɛnɔfɔɔ akɛ Yehowa baakudɔ saji yɛ gbɛ ni esumɔɔ nɔ lɛ, ekɛɛ enanemɛi tsuji lɛ akɛ: “Mi Yohane ni ji nyɛnyɛmi kɛ nyɛnaanyo yɛ Yesu Kristo amanehulu lɛ kɛ emaŋtsɛyeli lɛ kɛ etsuishiŋmɛɛ lɛ mli lɛ, miyɛ ŋshɔkpɔ ni atsɛɔ lɛ Patmo lɛ nɔ yɛ Nyɔŋmɔ wiemɔ lɛ kɛ Yesu Kristo he odaseyeli lɛ hewɔ.” (Kpojiemɔ 1:9) Ákɛ gboklɛfonyo yɛ Patmo yɛ sanekpakpa lɛ hewɔ, ni ekɛ enyɛmimɛi lɛ miiŋmɛ amɛtsui shi yɛ amanehului amli, kɛ hiɛnɔkamɔ ni ma shi shiŋŋ akɛ amɛbaana Maŋtsɛyeli ni baa lɛ mli gbɛfaŋnɔ lɛ, Yohane ni eda lɛ na Kpojiemɔ wolo lɛ mli klɛŋklɛŋ ninaai lɛ agbɛnɛ. Ŋwanejee ko bɛ he akɛ nɛkɛ ninaai nɛɛ wo lɛ hewalɛ babaoo, taakɛ bɔ ni Yohane kuu lɛ naa ekaawoo ŋmɛnɛ yɛ amɛmlibaa ni amɛnaa lɛ hewɔ lɛ. Wɔleee gbɛ ni Yohane tsɔ nɔ ekɛ Kpojiemɔ wolo lɛ yaha asafoi lɛ moŋ, ejaakɛ atsi enaa yɛ nakai be lɛ mli. (Kpojiemɔ 1:11; 22:18, 19) Eka shi faŋŋ akɛ Yehowa bɔfoi lɛ ye bua ni afee enɛ, taakɛ bɔ ni amɛfaa Yehowa Odasefoi anɔkwafoi ni sɔmɔɔ yɛ hei ni agu nitsumɔ lɛ yɛ loo atsi naa ŋmɛnɛ hu he lɛ, no hewɔ lɛ enɛ eye ebua ni anyɛ akɛ mumɔŋ niyenii ni he hiaa nyɛmimɛi ni anɔkwale lɛ he hɔmɔ yeɔ amɛ lɛ eha amɛ yɛ ebe naa pɛpɛɛpɛ.—Lala 34:7, 8.

11. Mɛɛ hegbɛ ni tamɔ nɔ ni Yohane hiɛ sɔ lɛ Yohane kuu ni yɔɔ ŋmɛnɛ lɛ hu buɔ no jogbaŋŋ lɛ?

¹¹ Kwɛ bɔ ni Yohane hiɛ baasɔ hegbɛ ni ena akɛ Yehowa kɛ lɛ atsu nii akɛ adafitswaa gbɛ kɛha asafoi lɛ! Nakai nɔŋŋ hu Yohane kuu lɛ ni yɔɔ ŋmɛnɛ lɛ buɔ hegbɛ kpeteŋkpele ni amɛna akɛ amɛkɛ mumɔŋ niyenii aaaha Nyɔŋmɔ webii lɛ yɛ “be ni sa nɔ.” (Mateo 24:45) Eba akɛ ooofee mɛi ni nɛkɛ mumɔŋ niyenii nɛɛ woɔ amɛ hewalɛ lɛ ateŋ mɔ kome koni onine ashɛ anunyam oti ni ji naanɔ wala lɛ nɔ!—Abɛi 3:13-18; Yohane 17:3.

[Akrabatsa ni yɔɔ baafa 21]

Mumɔŋ Niyenii ni Anaa Yɛ Bei ni Mli Wawai Amli

Yɛ naagbee gbii nɛɛ amli, beni Yehowa Odasefoi ena nɔ babaoo yɛ yiwaa kɛ haomɔi amli lɛ, ehe ehia kɛha amɛ akɛ amɛnine aaashɛ mumɔŋ niyenii nɔ bɔni afee ni amɛhe awa yɛ hemɔkɛyeli lɛ mli. Yɛ be babaoo mli lɛ, amɛnine shɛɔ niyenii ni he hiaa nɔ, ni wɔdaa Yehowa hewalɛ ni ejieɔ lɛ kpo yɛ naakpɛɛ gbɛi anɔ yɛ be babaoo mli lɛ he shi.

Akɛ nɔkwɛmɔnɔ lɛ, yɛ Germany yɛ Hitler shishi lɛ, Odasefoi lɛ ŋmala Buu-Mɔɔ lɛ ni Nazi nɔyelɔi yiwalɔi lɛ egu lɛ bibii yɛ woji bibii anɔ ni amɛjara. Yɛ Hamburg lɛ, Gestapo lɛ yatutua shia ko he ni akalaa woji lɛ yɛ lɛ. Eji shia bibioo kwraa, ni he ko he ko bɛ ni aaanyɛ akɛ nɔ ko atee jogbaŋŋ. Ashi typewriter ni akɛŋmaa saji lɛ yɛ adeka ko mli yɛ jɛmɛ, ni tsɔne agbo ni akɛkalaa woji lɛ hu hɔ atomo jwɛinii ko mli yɛ tsu lɛ shishi. Agbɛnɛ nɔ ni yɔɔ jwɛinii nɛɛ mli ji adeka ko ni woji tɛtrɛbii eyi mli obɔ! Etamɔ nɔ ni bɔ fɛɛ bɔ ni ji lɛ abaana enɛ. Shi mɛni ba? Asraafonyo ni gbele adeka lɛ naa lɛ fee nakai yɛ gbɛ ni haaa ena typewriter lɛ. Yɛ tsu lɛ shishi hu lɛ, shiatsɛ lɛ bɔ amaniɛ akɛ: “Asraafoi etɛ lɛ damɔ tsu lɛ teŋ, ni kadimɔ akɛ, nɔ ni yɔɔ jwɛinii lɛ sɛɛ ji adeka ko ni Buu-Mɔɔ lɛ eyi mli obɔ. Shi etamɔ nɔ ni amɛteŋ mɔ ko mɔ no enaaa enɛ; etamɔ nɔ ni ashwila amɛhiŋmɛi.” Wɔmiida Yehowa shi yɛ naakpɛɛ nifeemɔ nɛɛ hewɔ; anyɛ atee nɔ atsɔ shia nɛɛ mli akɛ mumɔŋ niyenii ha yɛ bei ni mli wawai ni osharai hu yɔɔ mli nɛɛ amli.

Yɛ 1960 afii lɛ amli lɛ, no mli lɛ maŋ ta miiya nɔ yɛ Nigeria kɛ amɛkpokpaa lɛ ekome ni ji Biafra teŋ. Akɛni Nigeria shikpɔŋkuku lɛ ebɔle Biafra he kɛkpe hewɔ lɛ, gbɛ kome pɛ ni atsɔɔ nɔ ajɛɔ maŋsɛɛ abaa mli ji kɛtsɔ kɔɔyɔɔŋ lɛji ashidaamɔ he ko nɔ. Enɛ tsɔɔ akɛ oshara eba Odasefoi ni yɔɔ Biafra lɛ he akɛ abaafo mumɔŋ niyenii ni amɛnine shɛɔ nɔ lɛ mli. Kɛkɛ ni 1968 shishijee mli lɛ, Biafra nɔyeli lɛ mli onukpai lɛ kɛ nitsumɔ wo amɛmaŋ nitsulɔi lɛ ekome dɛŋ koni eyatsu nɔ ko ni he hiaa eha amɛ yɛ Europa ni akɛ mɔ kroko hu tee he ni Biafra kɔɔyɔɔŋ lɛji adaamɔ he lɛ yɔɔ lɛ koni eyatsu nii yɛ jɛmɛ. Duromɔ naa lɛ, nɛkɛ hii enyɔ nɛɛ ji Yehowa Odasefoi, ni agbɛnɛ naa amɛ ni amɛyaje hei enyɔ ni jɛmɛ ji he ni Biafrabii lɛ tsɔɔ amɛkɛ je lɛ yeɔ sharamɔ yɛ. Nyɛmimɛi enyɔ nɛɛ yɔse akɛ gbɛjianɔtoo nɛɛ jɛ Yehowa. No hewɔ lɛ, amɛkɛ amɛhe ha nɛkɛ nitsumɔ ni oshara yɔɔ mli nɛɛ koni amɛtsɔ nɔ ni amɛha mumɔŋ niyenii aba Biafra. Ni amɛnyɛ amɛfee enɛ yɛ ta be lɛ fɛɛ mli. Amɛteŋ mɔ kome kɛɛ akɛ: “Gbɛjianɔtoo lɛ ji nɔ ko ni tekeɔ nɔ ni adesai baanyɛ ato he gbɛjianɔ.”

[Akrabatsa ni yɔɔ baafa 19]

Yibɔ Okadii ni Yɔɔ Kpojiemɔ

Yibɔ Okadi Lɛ Shishinumɔ

Esa akɛ anu yibɔ okadii ni atsi ta yɛ Kpojiemɔ lɛ ekomɛi ashishi akɛ eji yibɔ diɛŋtsɛ. Yɛ be babaoo mli lɛ, ŋmalɛ lɛ mli sane lɛ yeɔ buaa ni ayɔseɔ enɛ. (Kwɛmɔ Kpojiemɔ 7:4, 9; 11:2, 3; 12:6, 14; 17:3, 9-11; 20:3-5.)