‘Nyɛhia Shi Akɛ Mɛi Ni Muji Kɛ Kpa Ko Bɛ Amɛhe, Yɛ Toiŋjɔlɛ Mli’
“Nyɛbɔa mɔdɛŋ koni ana nyɛ ni muji loo kpa ko bɛ nyɛhe yɛ ehiɛ, yɛ hejɔlɛ mli.”—2 PETRO 3:14.
1, 2. Mɛni ji krɔŋkrɔŋ-feemɔ?
YEHOWA NYƆŊMƆ yɛ krɔŋkrɔŋ. Ebi, Yesu Kristo, wie ehe yɛ sɔlemɔ mli akɛ: “Ataa Krɔŋkrɔŋ.” (Yohane 17:1, 11) Ni atsɔɔ akɛ anu ni mumɔŋ bɔɔ nii ni yɔɔ ŋwɛi lɛ miijaje akɛ: “Krɔŋkrɔŋ, krɔŋkrɔŋ, krɔŋkrɔŋ ji Yehowa Zebaot lɛ.” (Yesaia 6:3) Shi mɛni ji krɔŋkrɔŋ-feemɔ?
2 Atsɔɔ wiemɔi “krɔŋkrɔŋ” kɛ “krɔŋkrɔŋfeemɔ” shishi kɛjɛ Hebri wiemɔi ni eshishinumɔ ji “nɔ ni kpɛlɛɔ,” “nɔ ni yɔɔ ehee loo eŋmɔŋ, nɔ ni woko muji loo ehe tse” yɛ gbɔmɔtsoŋ lɛ mli. Shi akɛ nɛkɛ wiemɔi nɛɛ tsuɔ nii yɛ Ŋmalɛ lɛ mli titri yɛ jeŋba loo mumɔŋ shishinumɔ mli. Jwɛŋmɔ ni shishijee Hebri lɛ hiɛ ji hetsemɔ, he ni atuu kwraa aha, aloo krɔŋkrɔŋ-feemɔ kɛha Yehowa, Nyɔŋmɔ ni yɔɔ krɔŋkrɔŋ lɛ. Wiemɔi ni atsɔɔ shishi akɛ “krɔŋkrɔŋ” kɛ “krɔŋkrɔŋ-feemɔ” yɛ Kristofoi a-Hela Ŋmalɛi lɛ amli lɛ hu tsɔɔ he ni átse ni akɛyakpɛtɛ Nyɔŋmɔ he. Akɛtsuɔ nii hu akɛtoɔ krɔŋkrɔŋ feemɔ ni ji Yehowa su he, kɛ agbɛnɛ krɔŋŋ-feemɔ loo emuuyeli,ni yɔɔ mɔ ko jeŋba mli. No hewɔ lɛ, krɔŋkrɔŋ-feemɔ shishi ji hetsemɔ, krɔŋŋ-feemɔ, kɛ krɔŋkrɔŋ.
Aatao Krɔŋkrɔŋ-Feemɔ Kɛmiijɛ Yehowa Webii Adɛŋ
3. Mɛni hewɔ Yehowa sa jamɔ ni he tse lɛ?
3 Belɛ, mɛni ji ŋwɛi jajemɔ: “Krɔŋkrɔŋ, krɔŋkrɔŋ, krɔŋkrɔŋ ji Nuŋtsɔ Nyɔŋmɔ Ofe” lɛ shishi! (Kpojiemɔ 4:8) Enɛ kɛ krɔŋkrɔŋ-feemɔ, hetsemɔ ni nɔ kwɔ fɛɛ miiha Nyɔŋmɔ! No hewɔ lɛ, Yehowa “Krɔŋkrɔŋ Fe Fɛɛ” lɛ sa jamɔ ni he tse. (Abɛi 9:10) Enɛ hewɔ lɛ Yehowa Nyɔŋmɔ fa gbalɔ Mose ni ekɛɛ Israelbii lɛ akɛ “Nyɛfea krɔŋkrɔŋ, ejaakɛ Mi, Yehowa, nyɛ-Nyɔŋmɔ lɛ, mɔ krɔŋkrɔŋ ji mi.”—3 Mose 19:1, 2.
4. Mɛɛ gbɛ nɔ wɔɔnyɛ wɔtsɔ wɔja Yehowa yɛ nɔkpɛlɛmɔ mli yɛ?
4 Mɔ fɛɛ mɔ ni kɛɔ akɛ ekɛ sɔɔmɔ ni ákpɛlɛ nɔ miiha Yehowa yɛ be mli ni ekɛ ehe woɔ muji nitsumɔ mli lɛ ji mɔ ni Yehowa hiɔ, ejaakɛ nilee ni Nyɔŋmɔ gbeyeishemɔ yɔɔ mli kɛ krɔŋkrɔŋ-feemɔ mli pɛ abaanyɛ aja lɛ yɛ, yɛ nɔkpɛlɛmɔ mli. (Abɛi 20:25; 21:27) No hewɔ lɛ, beni Nyɔŋmɔ gba akɛ ebaakpa gbɛ koni ewebii ni aŋɔ amɛ nom lɛ aku amɛsɛɛ amɛjɛ Babilon kɛba Yerusalem ekoŋŋ lɛ, ekɛɛ: “Aaatsɛ lɛ gbɛ krɔŋkrɔŋ lɛ, mɔ ko ni he tseee enyiɛŋ nɔ.” (Yesaia 35:8) Shwɛɛnii ni ku amɛsɛɛ yɛ 537 D.Ŋ.B. lɛ fee nakai kɛ jwɛŋmɔ ni yɔɔ krɔŋkrɔŋ, koni amɛkɛsaa amɛtswa “Mɔ Krɔŋkrɔŋ Fe Fɛɛ” lɛ anɔkwale jamɔ ama shi ekoŋŋ. Ni Israelbii lɛ baanyɛ ajie amɛhe kpo akɛ amɛyɛ krɔŋkrɔŋ kɛtsɔ Nyɔŋmɔ toi ni amɛaabo lɛ nɔ. Shi amɛhiii shi akɛ gbɔmɛi ni yɔɔ krɔŋkrɔŋ, ni he bɛ muji ko yɛ ehiɛ.—Okɛto Yakobo 1:27 he.
5. Paulo tsɔɔ akɛ esa akɛ mumɔŋ Israelbii lɛ aja Nyɔŋmɔ yɛ krɔŋkrɔŋ-feemɔ mli yɛ mɛɛ gbɛ nɔ?
5 Esa akɛ mumɔŋ Israelbii aloo Kristofoi ni afɔ amɛ mu lɛ hu aja Yehowa yɛ krɔŋkrɔŋ-feemɔ mli. (Galatabii 6:16) Yɛ enɛ gbɛfaŋ lɛ, bɔfo Paulo kpa enanemɛi heyelilɔi lɛ fai ‘ni amɛkɛ amɛgbɔmɔtsei adamɔ shi akɛ afɔle ni hiɛ ka ni yɔɔ krɔŋkrɔŋ ni saa Nyɔŋmɔ hiɛ.’ Bɔni afee ni amɛnyɛ amɛfee enɛ lɛ, esa akɛ heyelilɔi lɛ akwɛ akɛ amɛmiifee ŋwɛi suɔmɔnaanii lo, ejaakɛ Paul kɛfata he akɛ: “Ni nyɛjeŋba akatamɔ jeŋbii ajeŋba, shi moŋ nyɛkɛ nyɛjwɛŋmɔ ni etsɔ ehee lɛ atsakea nyɛhe koni nyɛyoo nii ni ji Nyɔŋmɔ suɔmɔnaa nii kpakpai ni sa ehiɛ jogbaŋŋ ni hi kɛwulashi lɛ.”—Romabii 12:1, 2.
6. Esa akɛ Kristofoi fɛɛ akwɛ amɛhe nɔ jogbaŋŋ yɛ mɛni he?
6 Yɛ be ni wɔyi faa babaoo nɛɛ mli lɛ, mɛi heei pii hiɛ foi kɛmiiba Yehowa gbɛjianɔtoo lɛ mli. Amɛ hu amɛjaa Yehowa yɛ krɔŋkrɔŋ-feemɔ mli. Kwɛ bɔ ni amɛmli filiɔ amɛ akɛ amɛaaje “amanehulu kpeteŋkpele” lɛ mli ni amɛyaná naanɔ wala mli ŋɔɔmɔ yɛ shikpɔŋ nɔ paradeiso lɛ mli yɛ Nyɔŋmɔ jalɛ gbɛjianɔtoo hee lɛ mli! (Mateo 24:21; Luka 23:43) Shi kɛji akɛ mɛi ni hiɛ ŋwɛi hiɛnɔkamɔ lɛ kɛ “asafo babaoo” ni yɔɔ shikpɔŋ nɔ shihilɛ he gbɛkpamɔ lɛ aaana naanɔ wala mli ŋɔɔmɔ lɛ, belɛ, esa akɛ amɛkwɛ amɛhe nɔ jogbaŋŋ kɛjɛ subaŋi ni buleɔ mɔ lɛ he aloo nɔ fɛɛ nɔ ni kɛ Ŋmalɛi lɛ mli jeŋba kɛ tsɔɔmɔi kpaaa gbee lɛ he.—Kpojiemɔ 7:9, 14.
7. Mɛni Petro kɛɛ ni maa bɔ ni ehe hiaa akɛ mɔ aaafee mɔ ni yɔɔ sɔrɔto ‘yɛ jeŋbai krɔŋkrɔŋi amli’ lɛ nɔ mi?
7 Yɛ be mli ni etsɔɔ wɔbe nɛɛ lɛ, bɔfo Petro ŋma akɛ: “Shi Nuŋtsɔ [Yehowa] lɛ gbi lɛ aaaba tamɔ julɔ baa nyɔŋ, ni no mli lɛ ŋwɛi [jeŋ nɔyelii] lɛ aaaho aya kɛ gbɛɛmɔ, ni je nɛŋ shishijee nii [je Iɛ sui kɛ egbɛi] lɛ aaasere yɛ la mli, ni shikpɔŋ [adesa weku ni amɛtsi amɛhe kɛjɛ Nyɔŋmɔ he lɛ] kɛ emli nitsumɔi lɛ aaasha,” ni aaayoo amɛ akɛ amɛtamɔ “ŋwɛi” kɛ “jeŋ nɛŋ shishijee nii” ni tsoɔ yɛ Yehowa gbi lɛ mli hiɛkpatamɔ “la” lɛ mli. No hewɔ lɛ, Petro kɛfata he akɛ: “Agbɛnɛ, akɛni nɛkɛ nibii nɛɛ fɛɛ baafite hewɔ lɛ, mɛɛ gbɔmɛi sa akɛ nyɛtsɔmɔ yɛ jeŋbai krɔŋkrɔŋi kɛ Nyɔŋmɔ jamɔi amli? Mɛi ni kwɛɔ gbɛ ni amɛshwɛɔ Nyɔŋmɔ gbi lɛ baa lɛ, no mli ni ŋwɛi aaahere kɛ la ni eeeshã, ni jeŋ shishijee nii hu aaasere yɛ Ia mli!” Hɛɛ, esa akɛ Yehowa Odasefoi fɛɛ afee gbɔmɛi ni yɔɔ sɔrɔto “yɛ jeŋbai krɔŋkrɔŋi amli.” Ni mɛi ni hiɛɔ amɛ krɔŋkrɔŋ-feemɔ mli lɛ baanyɛ akpa shihilɛ hé ni yɔɔ shweshweeshwe yɛ Nyɔŋmɔ jalɛ ‘ŋwɛi hee kɛ shikpɔŋ hee’ lɛ mli lɛ gbɛ. (2 Petro 3:7, 10-13) Mɛɛ gbɛkpamɔi ni jɔɔmɔi yɔɔ mli nɛ!
8. Mɛni ehe hiaa ni Kristofonyo afee kɛ étsi ehe kɛjɛ krɔŋkrɔŋ-feemɔ gbɛ lɛ nɔ?
8 Shi, kɛji akɛ Kristofonyo ko ebɔ mɔdɛŋ jogbaŋŋ yɛ Yehowa sɔɔmɔ mli yɛ be ko shi yɛ sɛɛ mli lɛ, eyadi subaŋi ni gbeɔ ehe guɔ lɛ asɛɛ aloo ebafee mɔ ni kɛ Biblia mli tsɔɔmɔi loo jeŋbai kpaaa gbee dɔŋŋ lɛ hu? Belɛ, no tsɔɔ akɛ etsi ehe kɛjɛ krɔŋkrɔŋ-feemɔ he ni ehe baahia ni ejie anɔkwa tsuitsakemɔ kpo ni ekɔ gbɛ ni baaha etsake ejeŋba. Taakɛ Paulo kɛɛ enanemɛi ni afɔ amɛ mu lɛ: “Agbɛnɛ, nyɛ mɛi ni asumɔɔ nyɛ, akɛ nɔ ni wɔna nɛkɛ shiwoi nɛɛ ahewɔ lɛ, nyɛhaa wɔtsua wɔhe kɛjɛa heloo kɛ mumɔ fɛɛ he muji mli, ni wɔgbe hetsemɔ naa yɛ Nyɔŋmɔ gbeyeishemɔ mli.” (2 Korintobii 7:1) Kristofonyo fɛɛ Kristofonyo ni naa akɛ ehe miihia ni ejaje egbɛi kɔɔdɔji lɛ baana akɛ Ŋmalɛ mli ŋaawoo ni nɔkwɛlɔi ni yɔɔ suɔmɔ lɛ kɛhaa lɛ ji jɔɔmɔ diɛŋtsɛ kɛha amɛ.—Abɛi 28:13; Yakobo 5:13-20.
9. Yɛ 2 Petro 3:14 hewɔ lɛ, mɛɛ sanebimɔ teɔ shi?
9 Yɛ be mli ni ekɛ enine etsɔɔ jalɛ gbɛjianɔtoo hee lɛ, Petro kɛfata he akɛ: “Suɔmɔmɛi, akɛni nyɛkwɛɔ nii nɛɛ agbɛ nɛɛ, nyɛbɔa mɔdɛŋ koni ana nyɛ ni muji loo kpa ko bɛ nyɛhe yɛ [Yehowa Nyɔŋmɔ] hiɛ, yɛ hejɔlɛ mli.” (2 Petro 3:14) Awie nakai wiemɔi lɛ atsɔɔ Kristofoi ni afɔ amɛ mu lɛ, shi yɛ anɔkwale mli lɛ, esa akɛ ana Yehowa Odasefoi fɛɛ akɛ ‘amɛhe bɛ kpa ko, amɛhe bɛ muji ko, ni amɛhiɔ shi yɛ toiŋjɔlɛ mli.’ No hewɔ lɛ, mɛni esa akɛ wɔfee?
“Muji Loo Kpa Ko Bɛ Nyɛhe”
10. “Asafo babaoo” lɛ efɔ amɛ “atadei” lɛ ahe ni ehe etse yɛ Yesu la lɛ mli yɛ mɛɛ gbɛ nɔ?
10 Ehe miihia ni wɔfee bɔ fɛɛ bɔ ni wɔɔnyɛ ni ana wɔ akɛ “muji loo kpa ko bɛ” wɔhe. Mɛi ni jɛ “asafo babaoo” lɛ ateŋ lɛ ‘efɔ amɛ atadei lɛ ahe ni amɛha eyɛ futaa yɛ Toobi lɛ la lɛ mli.’ Be ko lɛ, amɛji esha je nɛɛ fa ni nibii tara amɛ atadei ni haa ayoo amɛ lɛ mli, amɛhe ewo muji yɛ Yehowa hiɛ. Te fee tɛŋŋ ni amɛhe amɛ atadei lɛ ahe tse futaa yɛ Yesu Kristo, ni ji “Toobi lɛ la lɛ mli” lɛ? Kɛtsɔ hé ni amɛhe amɛye akɛ ‘kɛ ashwieee la shi lɛ, aŋɔfaaa’ ni akɛ Yesu ji “Nyɔŋmɔ Toobi lɛ ni woɔ je lɛ he esha kɛyaa lɛ” nɔ. (Kpojiemɔ 7:9, 14; Hebribii 9:22; Yohane 1:29, 36) Amɛfee enɛ kɛtsɔ amɛhe nɔ ni amɛjɔɔ kwraa amɛha Nyɔŋmɔ ni amɛkɛ baptisimɔ, nu mli kwraa ni akɛ amɛ wo fee he okadi lɛ nɔ. Esa akɛ afee henɔjɔɔmɔ ni tamɔ nɛkɛ kɛtsɔ Yesu Kristo nɔ kɛ hemɔkɛyeli akɛ ela ni efɔse eshwie shi lɛ haa Nyɔŋmɔ nyɛɔ ekɛ amɛhe eshai keɔ amɛ ni efeɔ amɛ mɛi ni sa ni akpɛlɛ amɛnɔ yɛ E-hiɛ.
11. Akɛni esha fiteɔ toiŋjɔlɛ ni ka wɔkɛ Yehowa teŋ lɛ hewɔ lɛ, mɛɛ shihilɛ mli ehe hiaa ni wɔhi?
11 Esa akɛ “asafo babaoo” lɛ aha amɛ “atadei” ayɛ futaa kɛtsɔ amɛhe ni amɛkɛwoŋ je lɛŋ nibii amli lɛ nɔ koni amɛkalaaje amɛ Kristofoi asu kɛ baŋ ni haa ayooɔ amɛ akɛ Yehowa Odasefoi ni akpɛlɛ amɛnɔ lɛ. Yɛ anɔkwale mli lɛ, ehe miihia ni anɔkwale Kristofoi fɛɛ atsi amɛhe kɛjɛ muji ni amɛkɛ je lɛŋ gbɛi, nifeemɔi kɛ subaŋ aaawo amɛhe lɛ nɔ. Akɛni esha fiteɔ toiŋjɔlɛ ni ka wɔkɛ Yehowa teŋ hewɔ lɛ, kɛ́ wɔhi shi yɛ gbɛ ni aaaha anyɛ akpata wɔhe eshai lɛ ahawɔ lɛ pɛ nɔ aaana wɔ akɛ mɛi ni “yɔɔ toiŋjɔlɛ” mli yɛ “Yehowa gbi” wulu ni baa lɛ nɔ. Esaaa akɛ apasa jamɔ nifeemɔi aloo je nɛɛ jeŋba lɛ woɔ wɔhe muji kɔkɔɔkɔ.
12. Mɛɛ gbɛ nɔ aaatsɔ ni akɛ 2 Petro 2:13 atsu nii yɛ Kristofoi asafo lɛ mli po?
12 Ni wɔɔhi shi akɛ mɛi ni muji loo kpa ko bɛ amɛhe lɛ biɔ jeŋba kɛ subaŋi ni kɛ nakai “amale tsɔɔlɔi” lɛ anɔ̃ kpaaa gbee lɛ nɔ, mɛi ni Petro wie amɛhe akɛ: “Amɛbuɔ daa ahoshwibɔɔ akɛ nii ni ŋɔɔ; mujiatsɛmɛi ni he yɔɔ taŋ ni; amɛbɔɔ ahoshwi yɛ amɛgbɛdu lɛ amli, beni amɛkɛnyɛ yeɔ nii lɛ.” (2 Petro 2:1, 13) Hɛɛ, yɛ asafo lɛ mli po lɛ, esa akɛ wɔhiɛ ahi wɔhe nɔ yɛ nɛkɛ amale tsɔɔlɔi nɛɛ ni “amɛbuɔ daa ahoshwibɔɔ akɛ nii ni ŋɔɔ” lɛ ahe. Yɛ jetsɛremɔ ŋmlɛtswai amli, yɛ be mli ni abaanyɛ afee babaoo ni akɛye abua mɛi krokomɛi yɛ mumɔŋ lɛ, gbɔmɛi ni mumɔ lɛ tsirɛɛɛ amɛ lɛ baanyɛ ni amɛkɛ amɛhe awo nɔfɔŋfeemɔ mli, emli fufeemɔi yɛ niyeli kɛ daanumɔ mli. Amɛbaabɔ mɔdɛŋ ni amɛha hiɛtserɛjiemɔ be tamɔ yookpeemɔ okpɔlɔŋmɛɛ atsɔ be ni amɛkɛteeɔ amɛhenumɔi yɛ lalai kɛ jooi ni teeɔ bɔlɛnamɔ he akɔnɔ, fufeemɔ kɛ daanumɔ babaoo ni tekeɔ nɔ lɛ ashi. Esaaa akɛ aŋmɛɔ gbɛ ni nɔ ko ni tamɔ nɛkɛ baa Yehowa webii ateŋ.—Yesaia 5:11, 12; kwɛmɔ Buu-Mɔɔ April 1, 1984, baafai 20-26.
13. Mɛni ji nɔ ni mɔ ni ŋmɛɔ okpɔlɔ ko lɛ baanyɛ afee koni henaabuamɔ lɛ afee nɔ ni tswaa mɔ emaa shi yɛ mumɔŋ?
13 Nɔ fɛɛ nɔ ni baaba yɛ hiɛtserɛjiemɔ ko shishi lɛ ka mɔ ni tsɛɔ nakai hiɛtserɛjiemɔ kɛ henaabuamɔ lɛ nɔ, bɔni afee ni nɔ ni afeɔ lɛ afee nɔ ni baatswa mɔ ama shi yɛ mumɔŋ lɛ, ebaafee nilee gbɛ akɛ aaaha mɛi lɛ ayifalɛ afee bibioo bɔ ni sa ni eeenyɛ ekudɔ ni ekafɔ nine etsɛ mɔ ko ni ekolɛ ekɛ sui komɛi ni ehiii baaba mli. Taakɛ Paulo wiemɔi ni yɔɔ 2 Timoteo 2:20-22 lɛ tsɔɔ lɛ, jeee mɛi fɛɛ ni kɛ amɛhe bɔɔ asafo lɛ he lɛ bafeɔ mɛi ni ji nanemɛi ni sa akɛ́ akɛ amɛ bɔɔ. No hewɔ lɛ, gbɛnaa nii ko kaaa Kristofonyo ni fɔɔ nine etsɛɔ mɛi lɛ nɔ akɛ etsɛ aŋkroaŋkroi ni ele akɛ amɛnyɛɛɛ amɛmɔ amɛnaabu mli aloo amɛfeɔ niyenii loo daanumɔ he fu lɛ. Ekaiɔ, wɔ akɛ, ‘nii wɔyeɔ jio, loo nii wɔnuɔ jio, aloo nɔ fɛɛ nɔ ni wɔfeɔ lɛ, esa akɛ wɔfee ni wɔkɛwo Nyɔŋmɔ hiɛ nyam.’—1 Korintobii 10:31.
14. Mɛɛ shidaamɔ esa akɛ akɔ yɛ apasa tsɔɔlɔi ahe?
14 Mɛi ni kɛ wɔ bɔɔ lɛ ateŋ mɛi fioo ko pɛ ji ‘mujiatsɛmɛi kɛ mɛi ni eje kpa ni kɛ amɛhe woɔ apasa tsɔɔmɔi amli yɛ miishɛɛ mli.’ Shi esa akɛ nɔkwɛlɔi kɛ mɛi krokomɛi ni yɔɔ asafo lɛ mli lɛ ahiɛ ahi amɛhe nɔ, ni amɛkɛ shiŋŋfeemɔ akwa apasa tsɔɔlɔi fɛɛ ni baaju shi amɛbote asafo lɛ mli ni amɛbɔ mɔdɛŋ akɛ amɛaaha jeŋba shara loo tsɔɔmɔ ni ejaaa ashwere lɛ. (Yuda 3, 4) Wɔhe ni wɔkɛaakpɛtɛ Nyɔŋmɔ jalɛ tɛi ni efolɔ eshwie shi lɛ ahe gbagbalii pɛ nɔ wɔɔtsɔ wɔha asafo lɛ ahi shi akɛ nɔ ni muji loo kpa ko bɛ he.
Mɛni Ataoɔ Koni Wɔhi “Hejɔlɛ Mli”?
15. (a) Te wɔɔfee tɛŋŋ ni toiŋjɔlɛ aba wɔkɛ Nyɔŋmɔ teŋ? (b) Mɛni esa akɛ wɔfee ni ana wɔ akɛ wɔyɛ “hejɔlɛ mli” yɛ Yehowa gbi wulu ni baa lɛ nɔ?
15 Ni aaana wɔ akɛ wɔyɛ “hejɔlɛ mli” lɛ, ebiɔ ni Yehowa webii aha toiŋjɔlɛ ahi amɛkɛ lɛ teŋ. (2 Petro 3:14) Akɛ nɛkɛ shidaamɔ nɛɛ eduro wɔ kɛtsɔ Yesu Kristo nɔ, mɔ ni Paulo ŋma yɛ ehe akɛ: “Ejaakɛ esa Nyɔŋmɔ hiɛ akɛ obɔyimɔ fɛɛ ahi nyɛmli; ni etsɔ lɛ nɔŋŋ enɔ ekpata ekɛ nibii fɛɛ teŋ kwraa, nii ni yɔɔ ŋwɛi lɛ, akɛni lɛ diɛŋtsɛ etsɔ esɛŋmɔtso lá lɛ nɔ eha hejɔlɛ ba lɛ.” (Kolosebii 1:19, 20) Esha ni hiɛdɔɔ yɔɔ mli fiteɔ wekukpaa ni ka mɔ ko kɛ Yehowa teŋ lɛ, ni ehaa mɔ lɛ bafeɔ mɔ ni ehe nilee buɔ lɛ fɔ, ehaoɔ, yɛ be mli ni toiŋjɔlɛ loo hejɔlɛ bafeɔ mɛi ni boɔ Nyɔŋmɔ kitai lɛ anɔ̃. (Lala 38:3; Yesaia 48:18) Kɛ̀ aaana wɔ akɛ mɛi ni yɔɔ “hejɔlɛ mli” loo toiŋjɔlɛ mli yɛ Yehowa gbi wulu ni baa lɛ nɔ lɛ, belɛ ehe miihia ni wɔhi shi yɛ Nyɔŋmɔ gbeyeishemɔ mli bɔ ni no aaaha atsɔ Yesu la ni efɔse eshwie shi yɛ sɛŋmɔtso lɛ nɔ lɛ akpata wɔhe eshai lɛ.
16. Taakɛ bɔfo Paulo tsɔɔ lɛ, te wɔɔfee tɛŋŋ ni wɔtiu toiŋjɔlɛ yɛ wɔkɛ wɔnanemɛi heyelilɔi ateŋ?
16 Esa akɛ hejɔlɛ loo toiŋjɔlɛ hu aba wɔkɛ Yehowa jalɔi krokomɛi hu ateŋ. Paulo wo hewalɛ akɛ: “Nyɛhaa wɔtiua hejɔlɛ nibii kɛ nibii ni wɔkɛaaha wɔnanemɛi anane amɔ shi moŋ.” Yitso lɛ fɛɛ tsɔɔ akɛ esa akɛ wɔkwɛ jogbaŋŋ koni wɔkatɔtɔ wɔnanemɛi heyelilɔi anane yɛ niyeli, ninumɔ loo nɔ kroko mli. (Romabii 14:13-23) Shi babaoo yɛ sane nɛɛ mli fe no pɛ, ejaakɛ Paulo kɛɛ Efeso Kristofoi lɛ akɛ: “Miikpa nyɛ fai nyɛnyiɛa bɔ ni sa tsɛmɔ ni aŋɔtsɛ nyɛ lɛ, yɛ heshibaa jwɛŋmɔ kɛ humifeemɔ fɛɛ mli, ni nyɛkɛ tsuishitoo ahiɛhiɛ nyɛhe yɛ suɔmɔ mli, ni nyɛbɔ mɔdɛŋ ni nyɛto mumɔ ekomefeemɔ lɛ yɛ hejɔlɛ kpaa lɛ mli.” (Efesobii 4:1-3) Yɛ anɔkwale mli lɛ, wɔmiisumɔ ni wɔjie ekomefeemɔ ni ka wɔteŋ lɛ kpo wɔtsɔɔ, kɛtsɔ wiemɔi kɛ nifeemɔi fɛɛ ni gbaa toiŋjɔlɛ naa ni wɔɔkwa lɛ nɔ kɛ agbɛnɛ shi ni wɔdaamɔ shiŋŋ akɛ mɛi ni fiɔ je muu fɛɛ maŋtsɛ ni Yehowa ji lɛ sɛɛ lɛ nɔ.
17. Taakɛ 1 Petro 3:10-12 tsɔɔ lɛ, ‘toiŋjɔlɛ ni wɔɔtao’ lɛ kɔɔ mɛni he?
17 Toiŋjɔlɛ ni wɔɔtao lɛ biɔ ni wɔkwɛ wɔnifeemɔi kɛ wɔwiemɔ fɛɛ jogbaŋŋ, ejaakɛ bɔfo Petro ŋma akɛ: “Shi mɔ ni taoɔ akɛ etsɛ yɛ jeŋ ni ena gbii kpakpai lɛ, ha emɔ elilɛi amli kɛjɛ efɔŋ he, kɛ enaabu hu, koni ekawie apasa wiemɔ; ewi efɔŋ ni efee ekpakpa, etao hejɔlɛ ni enyiɛ no sɛɛ. Ejaakɛ Nuŋtsɔ [Yehowa] lɛ hiŋmɛi ka jalɔi ahe, eboɔ amɛfaikpamɔ toi; shi mɛi ni feɔ nifɔjianii lɛ, Nuŋtsɔ lɛ [Yehowa] ejie ehiɛ eka amɛ.” (1 Petro 3:10-12; Lala 34:12-16) Belɛ esa akɛ Yehowa anɔkwa tsuji aya nɔ ‘atao toiŋjɔlɛ’ yɛ gbɛi sɔrɔtoi fɛɛ nɔ kɛ aaana amɛ akɛ amɛyɛ “toiŋjɔlɛ.”
Okɛ Ohe Afɔ Yehowa Yelikɛbuamɔ Nɔ
18. Mɛni wɔbaanyɛ wɔfee kɛji akɛ je lɛ gbɛi, nifeemɔi loo sui komɛi miiŋɔɔ wɔnaa lɛ?
18 Petro tsɔɔ akɛ “je nɛŋ shishijee nii,” je lɛ mumɔ, aloo esubaŋi kɛ gbɛi lɛ “aaasere yɛ la mli,” aloo abaakpata hiɛ, yɛ “Yehowa gbi” lɛ nɔ. (2 Petro 3:7, 10, NW) Shi mɛni wɔbaanyɛ wɔfee kɛji akɛ je lɛ gbɛ̀i, nifeemɔ, aloo sui ŋɔɔ wɔnaa? Yɛ anɔkwale mli lɛ, ehe miihia ni wɔŋɔ hegbɛi ni gbɛjianɔ ni ato yɛ mumɔŋ kɛtsɔ Yehowa asafo lɛ nɔ lɛ kɛhaa wɔ lɛ fɛɛ. Nɔ ni fata enɛ he ji akɛ esa akɛ wɔkase Nyɔŋmɔ Wiemɔ lɛ kɛ Kristofoi awoji ni “tsulɔ anɔkwafo kɛ nilelɔ” lɛ kɛha lɛ daa nɛɛ. (Mateo 24:45-47) Esa akɛ wɔya nɔ wɔtsɔɔ hiɛsɔɔ wɔha kpɔmɔ gbɛjianɔtoo lɛ, Yesu “mɔ ni tamɔ toobi ni he bɛ kpa ko loo ŋmaamɔnɔ ko lɛ la ni jara wa lɛ.”—1 Petro 1:18, 19.
19. Yɛ mɛɛ gbɛ nɔ sɔlemɔ baanyɛ aye abua kɛji akɛ je lɛŋ sui komɛi miina wɔnɔ hewalɛ lɛ?
19 Esa akɛ wɔsɔle wɔbi Nyɔŋmɔ yelikɛbuamɔ koni ‘wɔnyiɛ jalɛ sɛɛ.’ (1 Timoteo 6:11-14) Kɛ wɔyoo akɛ je lɛ sui komɛi miiná wɔnɔ hewalɛ, aloo naanyo heyelilɔ ko ni yɔɔ suɔmɔ egbala wɔjwɛŋmɔ kɛtee enɛ nɔ lɛ, eeefee nilee gbɛ akɛ wɔɔwie nɛkɛ naagba nɛɛ he diɛŋtsɛ yɛ wɔsɔlemɔi amli ni wɔbi Yehowa ni eye ebua wɔ ni wɔye nɔ ni wɔjwɛŋmɔ dɔɔ kɛyaa nɔ nɛɛ nɔ kunim. Yɛ anɔkwale mli lɛ, ebaafee nɔ ni sa jogbaŋŋ akɛ wɔɔbi Nyɔŋmɔ mumɔ lɛ kɛ eyelikɛbuamɔ hu, koni wɔwo mumɔ lɛ yibii lɛ ni tamɔɔɔ je lɛ sui kɛ egbɛi kwraa lɛ. (Galatabii 5:16-26; Lala 25:4, 5; 119:27, 35) Yehowa baanyɛ aye abua wɔ ni wɔjwɛŋ nibii ni ja, nibii ni he tse, nibii ni yɔɔ gbɛi kpakpa kɛ nibii ni sa yijiemɔ lɛ ahe. Ni kwɛ bɔ ni esa jogbaŋŋ akɛ wɔɔsɔle wɔha lɛ daa kɛjɛ wɔtsuiŋ tɔɔ koni “Nyɔŋmɔ toiŋjɔlɛ” ni anyɛŋ akɛ nɔ ko ato he lɛ abu wɔtsui kɛ wɔjwɛŋmɔŋ nyɛmɔi ahe! (Filipibii 4:6, 7) Kɛkɛ lɛ, yeyeeye-feemɔ, kaai kɛ nibii ni tamɔ nakai efeŋ nɔ ni baada aaahu ni wɔnyɛŋ nɔ wɔye. Shi moŋ, toiŋjɔlɛ ni Nyɔŋmɔ kɛhaa lɛ kɛ kpoofeemɔ ji nɔ ni baaye lumɔ yɛ wɔshihilɛ amli. Yɛ anɔkwale mli lɛ, “mɛi ni sumɔɔ [Yehowa] omla lɛ yɛ toiŋjɔlɛ babaoo.”—Lala 119:165.
Hii Shi Akɛ Mɔ Ni ‘He Bɛ Muji Loo Kpa Ko Yɛ Hejɔlɛ Mli’
20. Mɛni hewɔ wɔbaanyɛ wɔkɛɛ akɛ wɔbaanyɛ wɔhi shi akɛ mɛi ni muji loo kpa ko bɛ amɛhe yɛ mumɔŋ lɛ?
20 Yɛ miishɛɛ mli lɛ, Nyɔŋmɔ baanyɛ akpɛlɛ mɛi fɛɛ ni yɔɔ Yehowa gbɛjanɔtoo lɛ mli, ni mɛi heei ni baa kpaako lɛ fata he lɛ anɔ. (Bɔfoi lɛ Asaji 10:34, 35) Yɛ Yehowa yelikɛbuamɔ naa lɛ, wɔbaanyɛ “wɔkpa nɔshafeemɔ kɛ je nɛŋ akɔnɔi lɛ, ni wɔhi shi taakɛ anɔkwale Kristofoi baafee.” (Tito 2:11-14) Eyɛ mli akɛ tsutsu lɛ, wɔtsi wɔhe kɛjɛ Yehowa he, ni wɔjwɛŋmɔi yɛ nitsumɔi gbohii anɔ moŋ, shi atsɔ Kristo gbele lɛ nɔ akpata wɔkɛ Nyɔŋmɔ teŋ. No hewɔ lɛ, agbɛnɛ wɔbaanyɛ wɔhi shi akɛ mɛi ni he bɛ kpa ko yɛ mumɔŋ, shi ja wɔtee nɔ wɔfi shi yɛ hemɔkɛyeli lɛ mli ni wɔtsiii wɔhe hu kɛjɛɛɛ sanekpakpa lɛ he hiɛnɔkamɔ lɛ he.—Kolosebii 1:21-23.
21. Yɛ mɛɛ gbɛ nɔ aaana wɔ yɛ naagbee akɛ ‘mɛi ni he bɛ muji loo kpa ko yɛ hejɔlɛ mli’?
21 Yɛ Yehowa, kɛ e-Wiemɔ lɛ kɛ egbɛjianɔtoo lɛ yelikɛbuamɔ naa lɛ, wɔbaanyɛ wɔhi shi akɛ mɛi ni je lɛ gbɛi, enifeemɔi kɛ subaŋi woko amɛhe muji ni amɛhe bɛ kpa ko. Enɛ nɔ wɔbaatsɔ ni wɔna anɔkwale toiŋjɔlɛ diɛŋtsɛ. Hɛɛ, kɛ wɔtee nɔ wɔŋmɛ wɔtsui shi yɛ wɔjamɔ krɔŋkrɔŋ ni wɔkɛhaa Yehowa lɛ mli lɛ, abaanyɛ ana wɔ yɛ naagbee akɛ ‘mɛi ni he bɛ muji ko loo kpa ko yɛ hejɔlɛ mli.’a
[Shishigbɛ niŋmai]
a Ajie kɛjɛ May 1, 1986 Watchtower lɛ mli
Te Obaaha Hetoo Oha Tɛŋŋ?
◻ Mɛni hewɔ ataoɔ krɔŋkrɔŋ-feemɔ kɛjɛɔ Yehowa webii adɛŋ lɛ?
◻ Te wɔɔfee tɛŋŋ wɔhi shi akɛ mɛi ni he bɛ muji kɛ kpa ko?
◻ Mɛni ataoɔ koni wɔhi shi “yɛ hejɔlɛ mli”?
◻ Mɛɛ gbɛi anɔ nɛkɛ wɔɔnyɛ wɔtsɔ wɔtsɔɔ akɛ wɔkɛ wɔhe fɔɔ Nyɔŋmɔ yelikɛbuamɔ nɔ?
[Mfonirii ni yɔɔ baafa 14, 15]
Nibii amli ni anyɛɔ ahiɔ shi yɛ akɛ mɛi hi ‘he bɛ muji loo kpa ko yɛ toiŋjɔlɛ mli’ Sɔɔmɔ ni akɛhaa Nyɔŋmɔ yɛ tsui muu fɛɛ henɔjɔɔmɔ mli
Kristofoi asu kɛ baŋ lɛ ni wɔɔna
Naanyobɔɔ ni tswaa mɔ maa shi yɛ mumɔŋ ni wɔɔna
Wɔkɛ Nyɔŋmɔ teŋ toiŋjɔlɛ ni wɔɔtao kɛtsɔ sɔlemɔ nɔ