Nyɛfea Kpojiemɔ Wolo Lɛ Kanelɔi Ni Yɔɔ Miishɛɛ
“Miishɛɛ ji mɔ ni kaneɔ lɛ kɛ mɛi ni nuɔ gbalɛ wiemɔi nɛɛ, kɛ mɛi ni yeɔ nibii ni aŋmala yɛ mli lɛ anɔ lɛ.”—KPOJIEMƆ 1:3, NW.
1. Mɛɛ shihilɛi amli bɔfo Yohane yɔɔ beni eŋma Kpojiemɔ wolo lɛ, ni mɛɛ yiŋtoo hewɔ aŋmala ninaai nɛɛ ashwie shi lɛ?
“MI YOHANE . . . miyɛ ŋshɔkpɔ ni atsɛɔ lɛ Patmo lɛ nɔ yɛ Nyɔŋmɔ wiemɔ lɛ kɛ Yesu Kristo he odaseyeli lɛ hewɔ.” (Kpojiemɔ 1:9) Shihilɛi nɛɛ amli bɔfo Yohane kɛŋma Apokalips loo Kpojiemɔ wolo lɛ. Asusuɔ akɛ aŋɔ lɛ nom kɛtee Patmo yɛ Roma Maŋtsɛ Domitian (81-96 Ŋ.B.), mɔ ni kɛ maŋtsɛ jamɔ ba ni ebatsɔ Kristofoi ayiwalɔ lɛ nɔyeli beaŋ.[1] Beni Yohane yɔɔ Patmo lɛ, enine shɛ ninaai srɔtoi ní eŋmala eshwie shi lɛ nɔ. Ewieee koni ekɛwo mra be mli Kristofoi lɛ ahe gbeyei, shi moŋ koni ekɛwaje amɛ, ekɛshɛje amɛmii, ni ekɛwo amɛ hewalɛ yɛ kaai ni amɛkɛkpe kɛ nɔ ni kã amɛhiɛ lɛ hewɔ.—Bɔfoi lɛ Asaji 28:22; Kpojiemɔ 1:4; 2:3, 9, 10, 13.
2. Mɛni hewɔ Kristofoi ni yɔɔ ŋmɛnɛ lɛ yɔɔ shihilɛ mli ni Yohane kɛ enanemɛi Kristofoi lɛ yaje mli lɛ he miishɛɛ lɛ?
2 Shihilɛi amli ni aŋmala Biblia mli wolo nɛɛ yɛ lɛ he hiaa Kristofoi ni yɔɔ ŋmɛnɛ lɛ waa. Yohane yɛ yiwaa shishi ejaakɛ eeye Yehowa kɛ E-Bi, Kristo Yesu he odase. Ekɛ enanemɛi Kristofoi lɛ yɛ yiwaa shishi ejaakɛ eyɛ mli akɛ amɛmiibɔ mɔdɛŋ ni amɛfee maŋbii kpakpai moŋ, shi amɛnyɛŋ amɛkɛ amɛhe awo maŋtsɛ jamɔ lɛ mli.[3] (Luka 4:8) Anɔkwa Kristofoi naa amɛhe yɛ nakai shihilɛ nɔŋŋ mli ŋmɛnɛ yɛ maji komɛi anɔ, he ni Maŋ lɛ yɔɔ hegbɛ akɛ etsɔɔ “nɔ ni sa akɛ Nyɔŋmɔ jálɔi afee” lɛ. No hewɔ lɛ, kwɛ bɔ ni wiemɔi ni anaa yɛ Kpojiemɔ wolo lɛ hiɛkpamɔ lɛ mli lɛ woɔ mɔ hewalɛ haa akɛ: “Miishɛɛ ji mɔ ni kaneɔ lɛ kɛ mɛi ni nuɔ gbalɛ wiemɔi nɛɛ, kɛ mɛi ni yeɔ nibii ni aŋmala yɛ mli lɛ anɔ lɛ.” (Kpojiemɔ 1:3, NW) Hɛɛ, mɛi ni kaneɔ Kpojiemɔ lɛ, ni amɛfeɔ toiboo lɛ baanyɛ aná anɔkwa miishɛɛ kɛ jɔɔmɔi babaoo.
3. Namɔ ji Kpojiemɔi ni akɛha Yohane lɛ Jɛɛhe?
3 Namɔ diɛŋtsɛ ji Kpojiemɔ lɛ Jɛɛhe, ni mɛɛ gbɛ nɔ etsɔ ekɛha? Kuku ni jeɔ shishi lɛ kɛɔ wɔ akɛ: “Yesu Kristo kpojiemɔ ni Nyɔŋmɔ ŋɔ ha lɛ, ni ekɛtsɔɔ etsuji nɔ ni sa akɛ eba mli oya, ni ekɛtsu ebɔfo lɛ ni ekɛbatsɔɔ etsulɔ Yohane.” (Kpojiemɔ 1:1) Kɛ wɔɔwie he kuku lɛ, Kpojiemɔ lɛ Jɛɛhe diɛŋtsɛ ji Yehowa Nyɔŋmɔ, mɔ ni kɛha Yesu, ni Yesu kɛtsɔ bɔfo ko nɔ ni ekɛha Yohane. Kɛ wɔpɛi nibii amli kɛtsa nɔ fioo lɛ, wɔnaa akɛ Yesu tsɔ mumɔ krɔŋkrɔŋ lɛ hu nɔ ni ekɛ shɛɛ saji ha asafoi lɛ, ni eha Yohane na ninaai.[4]—Kpojiemɔ 2:7, 11, 17, 29; 3:6, 13, 22; 4:2; 17:3; 21:10; okɛto Bɔfoi lɛ Asaji 2:33 he.
4. Mɛni nɔ Yehowa tsɔɔ lolo ŋmɛnɛ ni ekɛnyiɛɔ ewebii ahiɛ yɛ shikpɔŋ lɛ nɔ?
4 Yehowa kã he ekɛ e-Bi, ni ji “asafo lɛ yitso” lɛ tsuɔ nii ni ekɛtsɔɔ etsuji anii yɛ shikpɔŋ lɛ nɔ. (Efesobii 5:23; Yesaia 54:13; Yohane 6:45) Yehowa kɛ emumɔ lɛ hu tsuɔ nii ni ekɛtsɔɔ ewebii anii. (Yohane 15:26; 1 Korintobii 2:10)[5] Ni taakɛ bɔ ni Yesu kɛ “etsulɔ Yohane” tsu nii ni ekɛ mumɔŋ niyenii ha klɛŋklɛŋ afii oha lɛ mli asafoi lɛ, nakai nɔŋŋ ŋmɛnɛ ekɛ “tsulɔ anɔkwafo kɛ nilelɔ” ní ji ‘enyɛmimɛi’ ni afɔ amɛ mu ni yɔɔ shikpɔŋ lɛ nɔ lɛ tsuɔ nii koni amɛha ewebii lɛ kɛ amɛhefatalɔi lɛ mumɔŋ ‘ŋmãa yɛ be ni sa nɔ.’ (Mateo 24:45-47; 25:40) Miishɛɛ ji mɛi ni kpɛlɛɔ ‘nikeenii kpakpai’ ni wɔnine shɛɔ nɔ akɛ mumɔŋ niyenii, kɛ gbɛ ni E-tsɔɔ nɔ ekɛhaa wɔ lɛ Jɛɛhe lɛ nɔ lɛ.—Yakobo 1:17.
Asafoi ni Kristo Kudɔɔ
5. (a) Mɛni he akɛ Kristofoi asafoi lɛ kɛ amɛ nɔkwɛlɔi lɛ to? (b) Yɛ emuu ni adesai yeee lɛ fɛɛ sɛɛ lɛ, mɛni baaha wɔná miishɛɛ?
5 Akɛ Kristofoi asafoi lɛ to kanetsei ahe yɛ Kpojiemɔ wolo lɛ shishijee gbɛ yitsei lɛ amli. Akɛ amɛnɔkwɛlɔi lɛ to bɔfoi (tsulɔi) kɛ ŋulamii ahe. (Kpojiemɔ 1:20)a Beni Kristo wieɔ lɛ diɛŋtsɛ ehe lɛ, ekɛɛ Yohane ni eŋma akɛ: “Nii ni mɔ ni hiɛ ŋulamii kpawo lɛ yɛ eninejurɔ ni enyiɛɔ shika kanetsei kpawo lɛ ateŋ lɛ kɛɛ nɛ.” (Kpojiemɔ 2:1) Shɛɛ saji kpawo ni akɛyaha Asia asafoi kpawo lɛ tsɔɔ akɛ, yɛ Ŋ.B. klɛŋklɛŋ afii oha lɛ mli lɛ, asafoi lɛ kɛ amɛ onukpai lɛ yɛ sui ni amɛbɔɔ mɔdɛŋ waa yɛ mli kɛ nɔ ni amɛbaa shi yɛ mli. Nakai nɔŋŋ eji ŋmɛnɛ. No hewɔ lɛ, kɛ́ wɔhiɛ kpaaa anɔkwa sane ni eji akɛ Kristo, ni ji wɔ Yitso lɛ yɛ asafoi lɛ ateŋ lɛ nɔ lɛ, no lɛ wɔbaaná miishɛɛ babaoo. Ele nɔ̃ diɛŋtsɛ ni yaa nɔ lɛ. Nɔkwɛlɔi lɛ yɛ “eninejurɔ” yɛ mfonirifeemɔ gbɛ nɔ, ni tsɔɔ akɛ, amɛyɛ ekudɔmɔ kɛ egbɛtsɔɔmɔ shishi, ni amɛbaabu gbɛ ni amɛtsɔɔ nɔ amɛkwɛɔ asafoi lɛ anɔ lɛ he akɔntaa amɛha lɛ.—Bɔfoi lɛ Asaji 20:28; Hebribii 13:17.
6. Mɛni tsɔɔ akɛ jeee nɔkwɛlɔi lɛ pɛ baabu amɛhe akɔntaa amɛha Kristo?
6 Shi kɛlɛ, kɛji wɔsusu akɛ onukpai lɛ pɛ ji mɛi ni baabu amɛnifeemɔi ahe akɔntaa amɛha Kristo lɛ, no lɛ wɔmiilaka wɔhe. Kristo kɛɛ yɛ eshɛɛ saji lɛ ateŋ ekome mli akɛ: “Asafoi lɛ fɛɛ aaaná ale akɛ miji mɔ ni taoɔ sabai kɛ tsuii amli, ni maha nyɛteŋ mɔ fɛɛ mɔ bɔ ni nyɛnitsumɔi lɛ yɔɔ lɛ.” (Kpojiemɔ 2:23) Enɛ feɔ kɔkɔbɔɔ kɛ hewalɛwoo yɛ be kome too lɛ nɔŋŋ mli—kɔkɔbɔɔ akɛ Kristo le wɔ mligbɛ kanyamɔi ni ehe shi waa lɛ, kɛ hewalɛwoo hu ejaakɛ emaa nɔ mi ehaa wɔ akɛ Kristo le mɔdɛŋ ni wɔbɔɔ lɛ, ni kɛji wɔfee nɔ fɛɛ nɔ ni wɔɔnyɛ lɛ, ebaajɔɔ wɔ.—Marko 14:6-9; Luka 21:3, 4.
7. Kristofoi ni yɔɔ Filadelfia lɛ ‘hiɛ Yesu tsuishiŋmɛɛ wiemɔi lɛ amli’ yɛ mɛɛ gbɛ nɔ?
7 Kãmɔ ko bɛ Kristo shɛɛ sane ni ekɛyaha asafo ni yɔɔ Lidia maŋtiase ni ji Filadelfia lɛ mli, shi moŋ shiwoo ko yɛ mli ni esa akɛ wɔná he miishɛɛ babaoo. “Ejaakɛ oye mitsuishiŋmɛɛ wiemɔ lɛ nɔ hewɔ lɛ, mi hu matoo yɛ kaa ŋmɛlɛtswaa ni baaba jeŋ muu lɛ fɛɛ nɔ ni akɛbaka mɛi ni yɔɔ shikpɔŋ lɛ nɔ lɛ mli.” (Kpojiemɔ 3:10) Hela wiemɔ kɛha “oye mitsuishiŋmɛɛ wiemɔ lɛ nɔ” lɛ hu baanyɛ atsɔɔ akɛ “oye nɔ ni mikɛɛ yɛ tsuishiŋmɛɛ he lɛ nɔ.” Kuku 8 lɛ tsɔɔ akɛ, jeee akɛ Kristofoi ni yɔɔ Filadelfia lɛ ye Kristo famɔi lɛ anɔ kɛkɛ, shi moŋ amɛnyiɛ eŋaawoo ni tsɔɔ akɛ amɛ diɛŋtsɛ amɛkɛ tsuishiŋmɛɛ aye anɔkwa lɛ sɛɛ.[6]—Mateo 10:22; Luka 21:19.
8. (a) Mɛɛ shiwoo Yesu kɛha Filadelfia Kristofoi lɛ? (b) Namɛi “kaa ŋmɛlɛtswaa” lɛ saa amɛhe ŋmɛnɛ?
8 Yesu kɛfata he akɛ ebaato amɛ yɛ “kaa ŋmɛlɛtswaa” lɛ mli. Nɔ ni enɛ tsɔɔ pɔtɛɛ kɛha Kristofoi ni yɔɔ nakai be lɛ mli lɛ, wɔleee. Eyɛ mli akɛ yɛ Domitian gbele sɛɛ yɛ afi 96 Ŋ.B. lɛ, yiwaa lɛ sɛɛ fo fioo moŋ, shi yiwaa kroko je shishi yɛ Trajan nɔyeli shishi (98-117 Ŋ.B.), ni ŋwanejee ko bɛ he akɛ, ekɛ kaai krokomɛi ba.[7] Shi, “kaa ŋmɛlɛtswaa” titri lɛ ba yɛ “Nuntsɔ lɛ gbi lɛ nɔ” yɛ “naagbee be” ni wɔyɔɔ mli bianɛ nɛɛ mli. (Kpojiemɔ 1:10; Daniel 12:4) Yɛ Jeŋ Ta I lɛ mli kɛ esɛɛ nɔŋŋ lɛ, Kristofoi ni akɛ mumɔ efɔ amɛ mu lɛ tsɔ kaa be pɔtɛɛ ko mli.[8] Shi kɛlɛ, “kaa ŋmɛlɛtswaa” lɛ kã he eyɛ lolo. Esaa “jeŋ muu lɛ fɛɛ,” ni mɛi akpekpei abɔ ni feɔ asafo babaoo, ni yɔɔ hiɛnɔkamɔ akɛ amɛbaafo amanehulu kpeteŋkpele lɛ fata he lɛ he. (Kpojiemɔ 3:10; 7:9, 14) Kɛ́ ‘wɔfee nɔ ni Yesu wie yɛ tsuishiŋmɛɛ he,’ ni ji: “Mɔ ni hiɛɔ mli kɛwulaa shi lɛ, lɛ aaahere eyiwala” lɛ, no lɛ wɔbaaná miishɛɛ.—Mateo 24:13.
Miishɛɛ ní Wɔkɛaaba Wɔhe Shi Wɔha Yehowa Maŋtsɛyeli Lɛ
9, 10. (a) Mɛɛ gbɛ̀i anɔ esa akɛ Yehowa maŋtsɛsɛi lɛ he ninaa lɛ asa wɔ he yɛ? (b) Kpojiemɔ wolo lɛ ní wɔɔkane lɛ baaha wɔná miishɛɛ yɛ mɛɛ gbɛ nɔ?
9 Esa akɛ Yehowa maŋtsɛsɛi lɛ kɛ eŋwɛi kojomɔhe lɛ he ninaa ni yɔɔ Kpojiemɔ yitsei 4 kɛ 5 lɛ mli lɛ aha wɔnaa akpɛ wɔhe. Esa akɛ yijiemɔ wiemɔi ni ŋwɛi bɔɔnii ni yɔɔ hewalɛ lɛ jɛ amɛtsuiŋ amɛwie be mli ni amɛjɛɔ miishɛɛ mli amɛbaa amɛhe shi amɛhaa Yehowa maŋtsɛyeli ni ja lɛ awo wɔ hewalɛ. (Kpojiemɔ 4:8-11) Esa akɛ anu wɔgbee yɛ mɛi ni kɛɔ nɛkɛ lɛ ateŋ, akɛ: “Aŋɔ jɔɔmɔ kɛ agbojee kɛ anunyam kɛ nɔyeli lɛ aha mɔ ni ta maŋtsɛsɛi lɛ nɔ lɛ kɛ toobi lɛ kɛjɛ naanɔ kɛya naanɔ!”—Kpojiemɔ 5:13.
10 Kɛ́ wɔɔwie diɛŋtsɛ lɛ, enɛ tsɔɔ Yehowa suɔmɔnaa nii ni wɔkɛ heshibaa aaafee yɛ miishɛɛ mli yɛ nɔ fɛɛ nɔ mli. Bɔfo Paulo ŋma akɛ: “Nɔ fɛɛ nɔ ni nyɛfeɔ yɛ wiemɔ loo nitsumɔ gbɛfaŋ lɛ, nyɛfea fɛɛ yɛ Yesu Kristo gbɛi amli, ni nyɛtsɔa enɔ nyɛdaa Nyɔŋmɔ kɛ tsɛ lɛ shi.” (Kolosebii 3:17) Kɛ wɔjɛ wɔjwɛŋmɔ kɛ wɔtsuii amli tɔŋŋ wɔkpɛlɛ Yehowa maŋtsɛyeli lɛ nɔ, ni wɔfee esuɔmɔnaa nii yɛ wɔshihilɛ mli nɔ fɛɛ nɔ mli lɛ, no lɛ Kpojiemɔ lɛ ní wɔɔkane lɛ baaha wɔná miishɛɛ diɛŋtsɛ.
11, 12. (a) Abaahoso Satan shikpɔŋ nɔ gbɛjianɔtoo lɛ ní akpata hiɛ yɛ mɛɛ gbɛ nɔ? (b) Taakɛ Kpojiemɔ yitso 7 lɛ tsɔɔ lɛ, namɔ “aaanyɛ shi adamɔ” yɛ nakai be lɛ mli?
11 Wɔhe shi ni wɔɔba wɔha Yehowa maŋtsɛyeli lɛ yɛ miishɛɛ mli lɛ kɛ miishɛɛ baaha wɔ aŋkroaŋkroi kɛ gbɔmɛi fɛɛ. Etsɛŋ ni mfonirifeemɔŋ shikpɔŋhosomɔ kpeteŋkpele ko baahoso Satan jeŋ gbɛjianɔtoo lɛ eshwie shi kwraa, ni ekpata hiɛ.[9] Adesai ni kpooɔ akɛ amɛaaba amɛhe shi amɛwo Kristo ŋwɛi Maŋtsɛyeli nɔyeli, ni damɔ shi kɛha Nyɔŋmɔ jeŋ muu fɛɛ nɔyeli ni sa lɛ shishi naŋ abobaahe. Gbalɛ lɛ kɛɔ akɛ: “Shikpɔŋ lɛ nɔ maŋtsɛmɛi lɛ kɛ mɛi agboi lɛ kɛ asafoiatsɛmɛi lɛ kɛ niiatsɛmɛi lɛ kɛ hewalɔi lɛ, kɛ nyɔ̃ŋ fɛɛ nyɔ̃ŋ kɛ odehe fɛɛ odehe yateetee amɛhe yɛ bui amli kɛ gɔji atɛsaai amli, ni amɛkɛɛ gɔji lɛ kɛ tesaai lɛ akɛ: Nyɛgbea wɔnɔ, ni nyɛteea wɔ kɛjɛa mɔ ni ta maŋtsɛsɛi lɛ nɔ lɛ hiɛ kɛ toobi lɛ mlifu lɛ naa. Ejaakɛ emlifu gbi wulu lɛ eshɛ, ni namɔ aaanyɛ shi adamɔ?”—Kpojiemɔ 6:12, 15-17.
12 Yɛ nakai sanebimɔ lɛ he lɛ, bɔfo Yohane wie mɛi ni feɔ asafo babaoo ni jɛ amanehulu kpeteŋkpele lɛ mli lɛ ahe yɛ yitso ni nyiɛ sɛɛ lɛ mli akɛ, ‘amɛdamɔ maŋtsɛsɛi lɛ hiɛ kɛ toobi lɛ hiɛ.’ (Kpojiemɔ 7:9, 14, 15) Nyɔŋmɔ maŋtsɛsɛi lɛ hiɛ ni amɛdamɔ lɛ tsɔɔ akɛ amɛkpɛlɛɔ nakai maŋtsɛsɛi lɛ nɔ ni amɛbaa amɛhe shi kwraa amɛhaa Yehowa maŋtsɛyeli lɛ. No hewɔ lɛ, akpɛlɛ amɛnɔ.[10]
13. (a) Mɛni mɛi ni yɔɔ shikpɔŋ lɛ nɔ lɛ ateŋ mɛi babaoo jáa, ni mɛni he mfoniri okadi ni yɔɔ amɛhiɛŋtsei kɛ amɛnine he lɛ feɔ? (b) No hewɔ lɛ, mɛni hewɔ tsuishiŋmɛɛ he baahia lɛ?
13 Yɛ gbɛ kroko nɔ lɛ, yitso 13 lɛ wieɔ shikpɔŋ lɛ nɔ bii ni eshwɛ lɛ ahe akɛ amɛmiijá Satan maŋkwramɔŋ gbɛjianɔtoo ní akɛ kooloo awuiyelɔ ko efee ehe mfoniri lɛ. Amɛheɔ okadi ko yɛ “amɛhiɛŋtsei” anɔ loo yɛ “amɛninejurɔ” nɔ, ni tsɔɔ akɛ, amɛjɛɔ amɛjwɛŋmɔŋ kɛ gbɔmɔtsoŋ fɛɛ amɛfiɔ nakai gbɛjianɔtoo lɛ sɛɛ. (Kpojiemɔ 13:1-8, 16, 17) Agbɛnɛ yitso 14 lɛ kɛfata he akɛ: “Kɛ mɔ ko já kooloo lɛ kɛ amaga lɛ, ni ehe ekadi lɛ yɛ ehiɛŋtso nɔ loo enine nɔ lɛ, lɛ hu eeenu Nyɔŋmɔ mlifu dãa ni afutu lɛ krɔŋŋ awo emlifu kpulu lɛ mli lɛ eko . . . Biɛ krɔŋkrɔŋ bii lɛ ni yeɔ Nyɔŋmɔ kitai lɛ kɛ Yesu nɔ hemɔkɛyeli lɛ nɔ lɛ atsuishiŋmɛɛ lɛ yɔɔ.” (Kpojiemɔ 14:9, 10, 12) Beni be shwieɔ mli lɛ, sanebimɔ lɛ baaya nɔ afee akɛ: Namɔ sɛɛ ofiɔ? Yehowa kɛ emaŋtsɛyeli lɛ, loo maŋkwramɔŋ gbɛjianɔtoo ni sheee Nyɔŋmɔ gbeyei ni akɛ kooloo awuiyelɔ efee he mfoniri lɛ? Miishɛɛ ji mɛi ni heee kooloo lɛ okadi lɛ, ni amɛkɛ anɔkwayeli baa amɛhe shi amɛhaa Yehowa maŋtsɛyeli lɛ.
14, 15. Mɛɛ shɛɛ sane akɛfo Harmagedon he sane ni awie he yɛ Kpojiemɔ lɛ mli lɛ mli, ni mɛni etsɔɔ kɛha wɔ?
14 “Jeŋ muu lɛ fɛɛ” nɔ maŋtsɛmɛi lɛ miiya ni amɛyawuu, amɛkɛ Yehowa yaawuu yɛ maŋtsɛyeli he sane lɛ he. Abaawuu ta lɛ yɛ Harmagedon, ni ji “Nyɔŋmɔ Ofe lɛ gbi wulu lɛ nɔ ta lɛ.” (Kpojiemɔ 16:14, 16) Sane srɔto ko ní yɔɔ miishɛɛ jeɔ kpo yɛ bɔ ni awie shikpɔŋ lɛ nɔ maŋtsɛmɛi ni buaa amɛhe naa ni amɛkɛ Yehowa ayawuu lɛ he aha lɛ teŋ tuuntu. Yesu diɛŋtsɛ ba ninaa lɛ mli ni ekɛɛ akɛ: “Naa, miiba taakɛ julɔ. Ajɔɔ mɔ ni saraa ni etoɔ etadei lɛ, koni ekanyiɛ yayai ni ana ehiɛgbele lɛ.” (Kpojiemɔ 16:15) Abaanyɛ akɛ enɛ ato Levibii ni buɔ sɔlemɔwe lɛ he, ni ajieɔ amɛtadei yɛ amɛhe ni ashwieɔ amɛhiɛ shi yɛ maŋ kɛji ana akɛ amɛwɔ yɛ be mli ní esa akɛ amɛbu lɛ he.[12]
15 Shɛɛ sane lɛ yɛ faŋŋ: Kɛ wɔmiisumɔ ni wɔná yibaamɔ kɛfo Harmagedon lɛ, no lɛ esa akɛ wɔha wɔhiɛ ahi wɔhe nɔ yɛ mumɔŋ ni wɔya nɔ wɔwo mfonirifeemɔŋ atadei ni kadiɔ wɔ akɛ Yehowa Nyɔŋmɔ Odasefoi anɔkwafoi lɛ. Kɛ wɔkpoo mumɔŋ wɔdɔiwɔɔ ni wɔtee nɔ wɔkɛ ekãa gbɛ “naanɔ sanekpakpa” ni kɔɔ Nyɔŋmɔ Maŋtsɛyeli ni ato ama shi lɛ he lɛ wɔshwã lɛ, no lɛ wɔbaaná miishɛɛ.—Kpojiemɔ 14:6.
‘Miishɛɛ Ji Mɔ Fɛɛ Mɔ ni Yeɔ Wiemɔi Nɛɛ Anɔ Lɛ’
16. Mɛni hewɔ Kpojiemɔ wolo lɛ naagbee yitsei lɛ haa wɔnáa miishɛɛ lɛ?
16 Miishɛɛ sɔŋŋ ji nɔ ni mɛi ni kɛ miishɛɛ kaneɔ Kpojiemɔ wolo lɛ baaná yɛ be mli ni amɛkaneɔ naagbee yitsei ni wieɔ wɔhiɛnɔkamɔ ni yɔɔ naakpɛɛ—ŋwɛi hee kɛ shikpɔŋ hee, ni ji ŋwɛi jalɛ Maŋtsɛyeli nɔyeli ni yeɔ adesai aweku ni he tse nɔ, ni fɛɛ kɛ yijiemɔ bahaa “Yehowa Nyɔŋmɔ Ofe” lɛ he sane lɛ. (Kpojiemɔ 21:22) Beni ninaai ni yɔɔ naakpɛɛ ni tsara nɔ lɛ baa naagbee lɛ, bɔfo ni atsu lɛ lɛ kɛɛ Yohane akɛ: “Anɔkwa wiemɔi ni ma shi shiŋŋ nɛ; ni Nuntsɔ ni ji gbalɔi amumɔi lɛ a-Nyɔŋmɔ lɛ tsu ebɔfo lɛ ni ebatsɔɔ etsuji nii ni sa akɛ aba oya. Naa, miiba oya. [Miishɛɛ ji, NW] mɔ ni kɛ nɛkɛ wolo nɛɛ mli gbalɛ wiemɔi lɛ toɔ lɛ.”—Kpojiemɔ 22:6, 7.
17. (a) Mɛɛ nɔmimaa akɛha yɛ Kpojiemɔ 22:6? (b) Mɛni esa akɛ wɔkwɛ jogbaŋŋ ni wɔkpoo?
17 Mɛi ni kɛ miishɛɛ kaneɔ Kpojiemɔ lɛ baakai akɛ wiemɔi ni tamɔ enɛɛmɛi je kpo yɛ “wolokpo” lɛ shishijee mli.[13] (Kpojiemɔ 1:1, 3) Wiemɔi nɛɛ maa nɔ mi kɛhaa wɔ akɛ, “nii ni” agba yɛ Biblia lɛ naagbee wolo lɛ mli lɛ ‘baaba mli oya.’ Wɔshɛ shɔŋŋ yɛ naagbee be lɛ mli, ni etsɛŋ ni nibii ni he hiaa ni Kpojiemɔ wolo lɛ wie he efɔ̃ shi lɛ baaba mli oya kɛtsara nɔ. No hewɔ lɛ, esaaa akɛ wɔhaa nɔ ni tamɔ toiŋjɔlɛ shihilɛ ni yɔɔ Satan gbɛjianɔtoo lɛ mli lɛ haa wɔwɔɔ. Nikanelɔ ni hiɛ yɔɔ ehe nɔ lɛ baakai kɔkɔbɔɔi ni akɛha yɛ shɛɛ saji ni akɛmaje Asia asafoi kpawo lɛ mli lɛ, ni ebaatsi ehe kɛjɛ heloonaa ninamɔi, wɔŋjamɔ, jeŋba shara, kulɔkulɔfeemɔ, kɛ hemɔkɛyeli kwamɔ tsɔnei ahe.[15]
18, 19. (a) Mɛni hewɔ esa akɛ Yesu aba lɛ, ni mɛɛ hiɛnɔkamɔ Yohane wie he ni wɔkɛ lɛ kpãa gbee lɛ? (b) Mɛɛ yiŋtoo hewɔ Yehowa ‘baaba’ lɛ?
18 Yesu wie shii abɔ yɛ Kpojiemɔ wolo lɛ mli akɛ: “Miiba oya.” (Kpojiemɔ 2:16; 3:11; 22:7, 20a) Esa akɛ eba ni ebakojo Babilon Kpeteŋkpele lɛ, Satan maŋkwramɔŋ gbɛjianɔtoo lɛ, kɛ adesai fɛɛ ni baaa amɛhe shi amɛhaaa Yehowa maŋtsɛyeli ni Mesia Maŋtsɛyeli lɛ damɔ shi kɛha lɛ. Wɔfeɔ wɔgbee ekome kɛfataa bɔfo Yohane he ni wɔjajeɔ akɛ: “Amen. Hɛɛ, ba, Nuntsɔ Yesu!”—Kpojiemɔ 22:20b.
19 Yehowa diɛŋtsɛ wie akɛ: “Naa, miiba oya, ni mihiɛ minyɔmɔwoo lɛ kɛmiiba, ni mawo mɔ fɛɛ mɔ nyɔmɔ yɛ enitsumɔ lɛ naa.” (Kpojiemɔ 22:12) Yɛ be mli ni wɔmɛɔ nyɔmɔwoo ni yɔɔ nyam ni ji wala ni bɛ naagbee ákɛ “ŋwɛi hee” loo “shikpɔŋ hee” ní awo shi lɛ fã lɛ, eba akɛ wɔkɛ ekãa aaafata he ní akɛfɔ̃ mɛi fɛɛ ni yɔɔ tsuijurɔ lɛ nine akɛ: “Ba! Ni mɔ ni kumai yeɔ lɛ lɛ, ha ni eba, ni mɔ ni sumɔɔ lɛ, ha ni ebayɛ wala nu lɛ yaka.” (Kpojiemɔ 22:17) Eba akɛ amɛ hu amɛaatsɔmɔ Kpojiemɔ wolo ni jɛ mumɔŋ, ni kanyaa mɔ lɛ kanelɔi ni yɔɔ miishɛɛ!
[Shishigbɛ niŋmaa]
a Kwɛmɔ Kpojiemɔ—Enaagbee Kwraa lɛ Ebɛŋkɛ! lɛ baafai 28-29, 136 (shishigbɛ niŋmaa).
Saji Otii Kɛha Emlitii
◻ Mɛɛ gbɛ nɔ Yehowa tsɔ ekɛ Kpojiemɔ lɛ ha, ni mɛni wɔbaanyɛ wɔkase kɛjɛ enɛ mli?
◻ Mɛni hewɔ esa akɛ wɔná miishɛɛ akɛ wɔɔkane shɛɛ saji ni akɛmaje asafoi kpawo ni yɔɔ Asia lɛ?
◻ Abaanyɛ abaa wɔyi yɛ “kaa ŋmɛlɛtswaa” lɛ mli yɛ mɛɛ gbɛ nɔ?
◻ Kɛ wɔye wolokpo lɛ mli wiemɔi ni yɔɔ Kpojiemɔ wolo lɛ mli lɛ nɔ lɛ, mɛɛ miishɛɛ baafee wɔnɔ?
[Mfoniri ni yɔɔ baafa 15]
Miishɛɛ ji mɛi ni yɔseɔ sanekpakpa lɛ Jɛɛhe lɛ
[Mfoniri ni yɔɔ baafa 18]
Miishɛɛ ji mɔ ni shiɔ kpe lɛ