Yitso 13
Asafo Babaoo ko Damɔ Yehowa Maŋtsɛsɛi lɛ Hiɛ
1. (a) Dani Nyɔŋmɔ tsuji ni tsɔ Kristofoi abe lɛ hiɛ lɛ aloo 144,000 lɛ aaana amɛnyɔmɔwoo lɛ, esa ni amɛtsɔ mɛni mli? (b) Shi mɛni baaba aha asafo babaoo ko ni yɔɔ wala mli beni “amanehulu kpeteŋkpele” lɛ fɛɔ lɛ?
EYƐ mli akɛ Nyɔŋmɔ tsuji anɔkwafoi kɛjɛ Ha- bel nɔ kɛbashi Yohane Baptisilɔ lɛ nɔ lɛ kɛ Nyɔŋmɔ suɔmɔnaa nifeemɔ ye klɛŋklɛŋ gbɛhe yɛ amɛshihilɛ mli moŋ, shi ebiɔ ni amɛ fɛɛ amɛgboi ni amɛmɛ gbohiiashitee lɛ. Esa akɛ 144,000 lɛ ni baafata Kristo he yɛ eŋwɛi Maŋtsɛyeli lɛ mli lɛ hu agboi dani amɛnine ashɛ amɛnyɔmɔwoo lɛ nɔ. Nɔ ni tamɔɔɔ enɛ lɛ, aha bɔfo Yohane na yɛ ninaa mli akɛ asafo babaoo ko yɛ ni baaje “amanehulu kpeteŋkpele” lɛ mli, ni amɛgboiŋ, shi amɛbaahi shi kɛya naanɔ.—Kpoj. 7:9-17.
“ASAFO BABAOO” LƐ NI AAAYOO AMƐ
2. Mɛni kɛ “asafo babaoo” lɛ ni yɔɔ Kpojiemɔ 7:9 lɛ yɔsemɔ kɛ ehe shishinumɔ ni yɔɔ faŋŋ lɛ ba?
2 Afii ohai abɔ ho ni anyɛɛɛ ayoo mɛi ni “asafo babaoo” nɛɛ ji lɛ. Shi gbalɛi ni kɔɔ he lɛ ashishinumɔ fiofio ha ebafee faŋŋ. Yɛ 1923 mli lɛ, ayɔse “gwantɛŋi” ni yɔɔ Yesu abɛbua lɛ mli yɛ Mateo 25:31-46 lɛ kɛ “tooi krokomɛi” ni etsi amɛ ta yɛ Yohane 10:16 lɛ akɛ amɛji gbɔmɛi ni yɔɔ wala mli bianɛ ni baana hegbɛ akɛ mɛi ni baahi shi kɛya naanɔ yɛ shikpɔŋ nɛɛ nɔ lɛ. Ana yɛ 1931 mli akɛ mɛi ni awie amɛhe yɛ Ezekiel 9:1-11 akɛ nuu lɛ ni hiɛ woloŋmalɔ tɔ lɛ kadi amɛhiɛnaai lɛ fata “gwantɛŋi” ni yɔɔ Mateo yitso 25 lɛ ahe. Kɛkɛ ni yɛ 1935 mli lɛ, ana “asafo kuu yuu” loo “asafo babaoo” lɛ ni yɔɔ Kpojiemɔ 7:9-17 lɛ akɛ amɛ nɔŋŋ amɛfeɔ “gwantɛŋi” ni yɔɔ Yesu abɛbua ni kɔɔ gwantɛŋi kɛ abotiai ahe lɛ mli lɛ. Eyɛ mli akɛ ayɔse kɛjɛ 1923 mli tɔ̃ɔ akɛ aŋkroaŋkroi ni hiɛ gwantɛŋ su nɛɛ miijie amɛhe kpo moŋ, shi 1935 mli dani amɛyifalɛ lɛ bɔi hiɛ yaa oyayaayai. Gbɔmɛi akpekpei abɔ yɛ ŋmɛnɛ ni miitao ni ayoo amɛ akɛ nakai “tooi krokomɛi” ni ji “asafo babaoo” lɛ ni ená ŋwɛi nɔkpɛlɛmɔ lɛ fã.
3. Mɛni hewɔ ‘maŋtsɛsɛi lɛ hiɛ ni amɛdamɔ’ lɛ etsɔɔɔ akɛ amɛfata kuu ni yaa ŋwɛi lɛ he lɛ?
3 Ajie sɔrɔto ni ka “asafo babaoo” lɛ kɛ mumɔŋ Israel mlibii 144,000 ni atsɔ hiɛ atsi amɛ ta yɛ Kpojiemɔ lɛ yitso lɛ nɔŋŋ mli lɛ ateŋ lɛ kpo. Yohane enaaa “asafo babaoo” nɛɛ yɛ eninaa lɛ mli akɛ mɛi ni yɔɔ ŋwɛi. Nyɔŋmɔ ‘maŋtsɛsɛi lɛ hiɛ ni amɛdamɔ’ (Hela: e·noʹpi·on tou throʹnou, ‘maŋtsɛsɛi lɛ he ni ajɛ ana amɛ’) lɛ etsɔɔɔ akɛ esa ni amɛhi ŋwɛi. He ni amɛdamɔ lɛ yɛ Nyɔŋmɔ “hiɛ” kɛkɛ, mɔ ni kɛɔ wɔ akɛ ejɛɔ ŋwɛi enaa gbɔmɛi abii lɛ. (Kpoj. 7:9; Lala 11:4: okɛto Lala 100:1, 2 kɛ Luka 1:74, 75 kɛ Bɔfoi lɛ Asaji 10:33, Kingdom Interlinear he.) Nakai nɔŋŋ, ehe ehiaŋ ni “jeŋmaji lɛ fɛɛ” ahi ŋwɛi bɔni afee ni amɛyaje Kristo maŋtsɛsɛi lɛ hiɛ (eshishitsɔɔmɔ ŋmiiŋmi, ‘yɛ ehiɛ gbɛ’) taakɛ bɔ ni awie yɛ Mateo 25:31, 32 lɛ. Anɔkwale ni eji akɛ “asafo babaoo ni mɔ ko mɔ ko nyɛŋ akane,” lɛ jeee kuu ko ni yɔɔ ŋwɛi lɛ jeɔ kpo faŋŋ kɛ akɛto Kpojiemɔ 7:4-8 kɛ 14:1-4 he, he ni ajie gbɔmɛi ayibɔ krɛdɛɛ ni ahala kɛjɛ shikpɔŋ nɔ kɛyaa ŋwɛi lɛ kpo yɛ lɛ.
4. (a) Mɛni ji “amanehulu kpeteŋkpele” lɛ ni amɛjeɔ mli lɛ? (b) Taakɛ atsɔɔ yɛ Kpojiemɔ 7:11, 12 lɛ, namɛi naa “asafo babaoo” lɛ ni amɛfataa amɛhe yɛ jamɔ mli lɛ?
4 Beni Yohane tsɔɔ mɛi ni “asafo babaoo” nɛɛ ji lɛ, eŋma akɛ: “Mɛnɛɛmɛi ji mɛi ni jɛ amanehulu kpeteŋkpele lɛ mli lɛ.” Nɔ ni amɛjeɔ mli nɛɛ baafee amanehulu kpeteŋkpele fe fɛɛ ni anako eko da yɛ shikpɔŋ nɔ. (Kpoj. 7:13, 14; Mat. 24:21) Ŋwanejee ko bɛ he akɛ mɛi ni baaje Yehowa gbi wulu kpele ni yɔɔ gbeyei nɛɛ mli lɛ baale mɔ ni kpɔ̃ amɛ nɛkɛ lɛ. Beni amɛkɛ amɛ yiwalaheremɔ lɛ he shidaa haa Nyɔŋmɔ kɛ Toobi lɛ, kɛkɛ lɛ, taakɛ Yohane na yɛ ninaa lɛ mli lɛ, bɔɔ nii anɔkwafoi fɛɛ ni yɔɔ ŋwɛi lɛ kɛ gbee koome baafata mɛnɛɛmɛi ahe yɛ anɔkwa Nyɔŋmɔ koome lɛ jamɔ mli amɛkɛɛ akɛ: “Amen! Jɔɔmɔ kɛ anunyam kɛ nilee kɛ shidaa kɛ agbojee kɛ hewalɛ kɛ nyɛmɔ aha wɔ-Nyɔŋmɔ lɛ kɛjɛ naanɔ kɛya naanɔ! Amen.”—Kpoj. 7:11, 12.
AKA AMƐ AKƐ AMƐSA YIWALAHEREMƆ LO
5. (a) Te wɔɔfee tɛŋŋ wɔle nɔ ni ebiɔ dani mɔ ko atsɔ “asafo babaoo” ni baana yibaamɔ lɛ ateŋ mɔ kome lɛ? (b) Beni ohaa sanebimɔi ni yɔɔ kuku nɛɛ naagbee lɛ ahetoo lɛ, tsɔɔmɔ nɔ ni ebiɔ dani mɔ ko aje “amanehulu kpeteŋkpele” lɛ mli.
5 “Asafo babaoo” lɛ ayibaamɔ baaba mli yɛ Yehowa diɛŋtsɛ jalɛ taomɔ nii kɛ gbeekpamɔ naa. Sui ni akɛyɔseɔ mɛi ni baana yibaamɔ lɛ jeɔ kpo faŋŋ yɛ Biblia gbalɛi ni kɔɔ amɛhe lɛ mli. No hewɔ lɛ, mɛi ni taoɔ jalɛ sɛɛ gbɛ lɛ baanyɛ atsu he nii bianɛ bɔni afee ni amɛna yibaamɔ. Wɔtsi ŋmalɛi ni nyiɛ sɛɛ nɛɛ ata momo. Shi agbɛnɛ susumɔ he jogbaŋŋ kɛtsɔ ŋmalɛi krokomɛi ni atsɛ afata he lɛ ayelikɛbuamɔ nɔ, ni osusu nɔ ni esa akɛ ofee ni oshɛ nɛkɛ gbalɛ mli taomɔ nibii nɛɛ ahe lɛ he.
“Tooi krokomɛi” ni atsi amɛ ta yɛ Yohane 10:16 lɛ
Akɛ mɔ ko aaabo Yesu gbee toi lɛ tsɔɔ mɛni diɛŋtsɛ? (Yoh. 10:27; Mat. 9:9; Efes. 4:17-24)
Mɛɛ gbɛ nɔ wɔbaatsɔ wɔjie lɛ kpo akɛ wɔkpɛlɛɔ Kristo nɔ akɛ wɔ “kwɛlɔ kome”? (Mat. 23:10, 11)
““Gwantɛŋi” lɛ ni yɔɔ Yesu abɛbua ni kɔɔ gwantɛŋi kɛ abotiai ahe lɛ mli lɛ (Mat. 25:31-46)
Namɛi ji Kristo “nyɛmimɛi” ni mɛnɛɛmɛi feɔ amɛ ejurɔ lɛ? (Heb. 2:10, 11; 3:1)
Mɛɛ shihilɛi ni mli wawai amli ajɛ atsɛ amɛ afata Kristo nyɛmimɛi ni yɔɔ shikpɔŋ nɔ lɛ ahe? Ni mɛɛ nitsumɔ amɛkɛ anɔkwayeli yeɔ buaa? (Kpoj. 12:12, 17; Mat. 24:14; 28:19, 20)
Gbɔmɛi ni nuu lɛ ni hiɛ woloŋmalɔ tɔ lɛ kadi amɛ kɛha yibaamɔ lɛ (Ezek. 9:1-11)
Mɛɛ gbɛ nɔ amɛtsɔɔ yɛ akɛ amɛsumɔɔɔ nihii nii ni afeɔ yɛ okadi gbɛ nɔ Yerusalem, aloo Kristendom lɛ? (Kpoj. 18:4, 5)
Mɛni fata “kadimɔ” lɛ he ni haa esoroɔ amɛ yɛ Kristofoi osatofoi lɛ ahe ni ekadiɔ amɛ kɛhaa yibaamɔ lɛ? (1 Pet. 3:21; Mat. 7:21-27; Yoh. 13:35)
6. Bɔ ni Yohane wie “asafo babaoo” lɛ he eha lɛ yeɔ ebuaa wɔ ni wɔnuɔ nɔ hewɔ ni ahereɔ amɛyiwala lɛ shishi yɛ mɛɛ gbɛ nɔ?
6 Bɔ ni awie “asafo babaoo” lɛ he yɛ Kpojiemɔ 7:9-15 lɛ kɛ mlitsɔɔmɔ kroko ni he hiaa fataa he. Beni egbaa wɔ bɔ ni “asafo babaoo” lɛ mlibii lɛ yɔɔ yɛ “amanehulu kpeteŋkpele” lɛ sɛɛ lɛ, Ŋmalɛi lɛ gbalaa jwɛŋmɔ kɛbaa nibii ni adamɔ nɔ ahere amɛyiwala lɛ hu nɔ.
7. Mɛni amɛtsu dani “amanehulu kpeteŋkpele” lɛ ba, ni atsɔɔ enɛ yɛ mɛɛ gbɛ nɔ?
7 Eyɛ mli akɛ amɛjɛ jeŋmaji, akutsei, maji kɛ majianɔ wiemɔi fɛɛ mli moŋ, shi ana akɛ amɛfee ekome ‘kɛdamɔ maŋtsɛsɛi lɛ hiɛ,’ ni amɛkpɛlɛɔ Yehowa, Mɔ ni ta maŋtsɛsɛi lɛ nɔ akɛ Jeŋ Muu Fɛɛ Maŋtsɛ lɛ nɔ. Amɛkɛ amɛshihilɛ eye odase akɛ amɛji enɔyeli lɛ sɛɛfilɔi anɔkwafoi. Anɔkwale ni eji akɛ “amɛfɔ amɛtadei lɛ ahe, ni amɛha eyɛ futaa yɛ Toobi lɛ la lɛ mli” lɛ tsɔɔ akɛ amɛyɔse bɔ ni esha kpatamɔ nɔ ni Nyɔŋmɔ Toobi Yesu afɔleshaa lɛ kɛhaa lɛ he hiaa amɛ lɛ. (Yoh. 1:29; 1 Yoh. 2:2) Amɛjɛ hemɔkɛyeli mli amɛjɔɔ amɛhe nɔ amɛha Nyɔŋmɔ yɛ nakai afɔleshaa lɛ hewɔ, ni amɛkɛ numiimɔ efee ehe okadi ni agbɛnɛ amɛnaa shidaamɔ ni he tse yɛ Nyɔŋmɔ hiɛ, taakɛ bɔ ni amɛtadei yɛji lɛ feɔ he mfoniri lɛ. Amɛkpako amɛhemɔkɛyeli yɛ Nyɔŋmɔ Bi lɛ mli lɛ jajemɔ yɛ faŋŋ mli. (Mat. 10:32, 33) Yɛ enɛɛmɛi fɛɛ kɛ gbeekpamɔ naa lɛ, awie amɛhe akɛ amɛyɛ Nyɔŋmɔ sɔlemɔ we lɛ, aloo ejeŋ muu fɛɛ jamɔ he lɛ, akɛ mɛi ni jaa Nyɔŋmɔ “nyɔɔŋ kɛ shwane.” Yɛ nɛkɛ gbɛ nɔ lɛ, abuɔ amɛ akɛ anɔkwa jamɔ sɛɛfilɔi anɔkwafoi kɛ e-Maŋtsɛyeli lɛ jajelɔi.—Yes. 2:2, 3.
8. Bɔni afee ni sane nɛɛ he aba sɛɛnamɔ aha wɔ lɛ, mɛni esa akɛ wɔfee?
8 Ani gbalɛ mli mfonirii nɛɛ ashishitsɔɔmɔ lɛ kɔɔ ohe? Ani gbɛi komɛi yɛ ni obaanyɛ otsɔ nɔ otsake oshihilɛ ni ekɛ nɔ ni atsɔɔ yɛ biɛ lɛ akpa gbee? Kɛ nakai ni lɛ, belɛ, be ni esa akɛ okɛfee enɛ lɛ ji bianɛ!
MUMƆŊ PARADEISO MLI SHIHILƐ
9. Te Yohane wie mumɔŋ jɔɔmɔi ni “asafo babaoo” lɛ naa mli ŋɔɔmɔ bianɛ po lɛ he eha tɛŋŋ?
9 Ani ohiɛ ka nɔ akɛ obaana yibaamɔ akɛ “asafo babaoo” lɛ ateŋ mɔ kome? Kɛji otsake oshihilɛ ni ekɛ Yehowa jalɛ gbɛi lɛ kpaa gbee lɛ, belɛ ŋwanejee ko bɛ he akɛ ooná shihilɛ ni awo shi yɛ he ni atsɛɔ lɛ yɛ gbɛ ni ja nɔ akɛ mumɔŋ paradeiso lɛ mli ŋɔɔmɔ. Akɛɛ bɔfo Yohane akɛ: “Hɔmɔ yeŋ amɛ dɔŋŋ, ni kumai hu yeŋ amɛ dɔŋŋ, ni asaŋ hulu loo latsaa ko esaŋ amɛhe dɔŋŋ; ejaakɛ Toobi lɛ ni yɔɔ maŋtsɛsɛi lɛ teŋ lɛ aaalɛ amɛ, ni eeetsɔɔ amɛ gbɛ kɛaatee wala nu bui ahe, ni Nyɔŋmɔ aaatsumɔ amɛhiɛaŋ yaafonui fɛɛ.” (Kpoj. 7:16, 17) Yɛ mɛɛ gbɛ nɔ enɛ eba mli anɔkwale yɛ ogbɛfaŋ?
10. (a) Yɛ mumɔŋ shishinumɔ naa lɛ, yɛ mɛɛ gbɛ nɔ eji anɔkwale akɛ ‘hɔmɔ kɛ kumai yeŋ’ “asafo babaoo” lɛ dɔŋŋ? (b) Ani ona enɛ mlibaa?
10 Dani oooba obaje Tookwɛlɔ Kpakpa, Yesu Kristo, suɔmɔ kwɛmɔ nɛɛ shishi lɛ, no mli lɛ ani jalɛ he kumai kɛ hɔmɔ miiye bo? (Okɛto Mateo 5:6 he.) Kɛ nakai ni lɛ, belɛ Yehowa pɛ baanyɛ ekɛ nɔ ni oshweɔ lɛ aha kɛtsɔ e-Bi lɛ nɔ. Beni okase Yehowa jalɛ gbɛi lɛ ahe nii lɛ—eyiŋtoo akɛ ebaakpata mɛi fɔji ahiɛ kɛ emɔbɔnalɛ mli ni ejɛ eto yiwalaheremɔ he gbɛjianɔ eha Adam shwiei lɛ—ha ŋwanejee ko bɛ he akɛ, ona miishɛɛ fe be fɛɛ yɛ oshihilɛ mli. Mumɔŋ niyenii kɛ nu ni jɛ Nyɔŋmɔ Wiemɔ lɛ mli, ni atsɔɔ egbɛjianɔtoo lɛ nɔ akɛhaa lɛ etee nɔ eha ona miishɛɛ. (Yes. 65:13, 14) Ni kɛ ojɔɔ ohe nɔ oha Nyɔŋmɔ kɛtsɔ Kristo nɔ lɛ, belɛ yiŋtoo diɛŋtsɛ yɛ oshihilɛ mli bianɛ. (Okɛto Yohane 4:32-34 he.) Wɔsɛɛ naanɔ wala yɛ miishɛɛ mli yɛ shikpɔŋ nɔ Paradeiso mli ka ohiɛ, ejaakɛ Toobi lɛ ‘aaatsɔɔ [“asafo babaoo” lɛ] gbɛ kɛaatee wala nu bui ahe.’
11. (a) Yɛ mɛɛ gbɛ nɔ eji anɔkwale akɛ ‘hulu loo latsaa ko hu esaŋ amɛhe dɔŋŋ’? (b) Te enɛ he hiaa bo ha tɛŋŋ?
11 Akɛ “gwantɛŋi” anɔkwafoi lɛ, Tookwɛlɔ Kpakpa lɛ buɔ “asafo babaoo” lɛ hu he ni elɛɔ amɛ jogbaŋŋ. No hewɔ ni awie amɛhe yɛ okadi gbɛ nɔ akɛ ‘hulu loo latsaa ko esaŋ amɛhe dɔŋŋ’ lɛ. Enɛ etsɔɔɔ akɛ, akɛ “asafo babaoo” lɛ ateŋ mɔ kome lɛ, onaaa yiwaa ko kwraa kɛjɛɛɛ je lɛ mli. Shi moŋ, enɛ tsɔɔ akɛ abuɔ ohe kɛjɛɔ Nyɔŋmɔ mlifu ni tamɔ la ni tsoɔ lɛ mli. Ni beni efɔseɔ ŋwɛi hiɛkpatamɔ eshwieɔ mɛi fɔji anɔ lɛ, ekpataŋ ohiɛ. Nɛkɛ wekukpaa ni akpɛlɛ nɔ nɛɛ baanyɛ ahi shi kɛya naanɔ—Ezek. 38:22, 23; okɛto Lala 11:6; 85:4, 5 he.
12. Atsumɔ ohiɛ yaafonui lɛ bianɛ po yɛ mɛɛ gbɛ nɔ?
12 Mɛɛ miishɛɛ ni shishinumɔ yɔɔ mli aaaji onɔ nɛkɛ, kɛ oji “asafo babaoo” lɛ ateŋ mɔ kome diɛŋtsɛ lɛ! Oyɛ hiɛnɔkamɔ akɛ obaana mɛi fɔji ahiɛkpatamɔ kwraa, ni agbɛnɛ esha naŋ onɔ hewalɛ yɛ jwɛŋmɔ kɛ gbɔmɔtso mli dɔŋŋ. Shi amrɔ nɛɛ po, awerɛho ni gbɔmɛi yeɔ akɛni amɛbɛ Nyɔŋmɔ he nilee lɛ esaaa ohe. Oona oole miishɛɛ ni yɔɔ kɛha gbɔmɛi ni amɛ-Nyɔŋmɔ ji Yehowa lɛ. (Lala 144:15b) Yɛ nɛkɛ gbɛ nɔ lɛ, oje shishi oona shiwoo nɛɛ mlibaa: “Nyɔŋmɔ aaatsumɔ amɛhiɛaŋ yaafonui fɛɛ.”
13. Mɛni kɛ nɔ ko baafata miishɛɛ ni yɔɔ mumɔŋ paradeiso lɛ mli lɛ he, beni Kristo afii akpe nɔyeli lɛ yaa nɔ lɛ?
13 Taakɛ bɔ ni “asafo babaoo” lɛ baaje nibii agbɛjianɔtoo nɛɛ naagbee lɛ mli lɛ, nakai nɔŋŋ eji yɛ mumɔŋ paradeiso lɛ he. Kɛ oji amɛteŋ mɔ kome lɛ, belɛ obaaka he ona mumɔŋ niyenii ni akɛŋmɛ okpɔlɔ lɛ mli ŋɔɔmɔ yɛ be mli ni Kristo afii akpe nɔyeli lɛ yaa nɔ lɛ. Onilee yɛ Nyɔŋmɔ diɛŋtsɛ he lɛ mli baakwɔ beni onaa akɛ eyiŋtoo ni efeee yaka lɛ baa mli yɛ anunyam mli lɛ. Omiishɛɛ baafa beni onaa gbɛfaŋnɔ yɛ gbɔmɛi asafo ni amɛyifalɛ yaa hiɛ ni teɔ shi kɛjɛɔ gbohii ateŋ amɛbaa lɛ ahe nyamɔ ni amɛbafata ohe yɛ anɔkwa jamɔ mli lɛ mli gbɛfaŋnɔ lɛ. Ni jɔɔmɔi diɛŋtsɛ ni anaa yɛ no be lɛ mli lɛ ahe baaba sɛɛnamɔ babaoo aha Nyɔŋmɔ tsuji fɛɛ beni amɛnaa akɛ enɛɛmɛi ji Yehowa diɛŋtsɛ suɔmɔ kpojiemɔ lɛ.—Yes. 25:6-9; Yak. 1:17.
Sanegbaa Ni Akɛtiɔ Mli
● Mɛɛ saji ni ba ni ekaaa Biblia lɛ kɛtoɔ “asafo babaoo” lɛ he, ni yɛ mɛɛ gbɛ nɔ?
● Kɛ wɔmiisumɔ ni wɔfata nakai “asafo babaoo” ni Nyɔŋmɔ kpɛlɛɔ amɛnɔ lɛ he lɛ, mɛni esa akɛ wɔfee bianɛ?
● Te mumɔŋ paradeiso lɛ mli jɔɔmɔi lɛ ahe hiaa bo ha tɛŋŋ?