Yitso 23

Kpoo ni Ji Enyɔ Lɛ​—Tabilɔi ni Tara Okpɔŋɔi Anɔ

 1. Yɛ mɔdɛŋ ni osɔfoi lɛ bɔ koni amɛgbe baalabii lɛ fɛɛ sɛɛ lɛ, mɛni eba, ni mɛni ji nɔ ni kpooi sɔrɔtoi enyɔ ni baaba lɛ tsɔɔ?

KƐJƐ 1919 kɛbaa nɛɛ, okadi baalabii lɛ ni tutuaa Kristendom lɛ egba osɔfoi lɛ anaa babaoo. Amɛbɔ mɔdɛŋ akɛ amɛaagbe baalabii lɛ fɛɛ, shi mɛnɛɛmɛi etee nɔ amɛba kɛ hewalɛ fe be fɛɛ. (Kpojiemɔ 9:7) Ni jeee fɛɛ nɛ! Yohane ŋma akɛ: “Klɛŋklɛŋ kpoo lɛ eho; naa, kpooi enyɔ miiba lolo yɛ nii nɛɛ asɛɛ.” (Kpojiemɔ 9:12) Haomɔi ni piŋɔ mɛi yɛ lolo kɛha Kristendom.

 2. (a) Mɛni ba beni bɔfo ni ji ekpaa lɛ kpa etɛtrɛmaŋtɛrɛ lɛ? (b) “Gbee [ni] jɛ shika afɔleshaa latɛ . . . lɛ akolontoi . . . lɛ amli” lɛ damɔ shi kɛha mɛni? (d) Mɛni hewɔ atsi bɔfoi ejwɛ ata lɛ?

² Nɛgbɛ kpoo ni ji enyɔ lɛ jɛ? Yohane ŋma akɛ: “Ni bɔfo ni ji ekpaa lɛ kpa, ni minu gbee ko jɛ shika afɔleshaa latɛ ni ma Nyɔŋmɔ hiɛ lɛ akoloŋtoi ejwɛ lɛ mli kɛɛ bɔfo ni ji ekpaa lɛ ni hiɛ tɛtrɛmaŋtɛrɛ lɛ akɛ: Fɛnemɔ bɔfoi ejwɛ lɛ ni afimɔ yɛ Eufrate faa kpeteŋkpele lɛ naa lɛ!” (Kpojiemɔ 9:13, 14) Hetoo ni ba kɛjɛ shika afɔleshaa latɛ lɛ akoloŋtoi lɛ amli lɛ ha afɛne bɔfoi lɛ. Enɛ ji shika tsofa-kɛ-ŋma afɔleshaa latɛ lɛ, ni akɛ krɔŋkrɔŋbii lɛ asɔlemɔi lɛ eto shika tɔi lɛ amli tsofa-kɛ-ŋma ni jɛ afɔleshaa latɛ nɛɛ nɔ lɛ he shii enyɔ momo. (Kpojiemɔ 5:8; 8:3, 4) No hewɔ lɛ, nɛkɛ gbee kome nɛɛ damɔ shi kɛha krɔŋkrɔŋbii ni yɔɔ shikpɔŋ lɛ nɔ lɛ asɔlemɔ yɛ ekomefeemɔ mli lɛ. Amɛkpaa fai akɛ amɛ diɛŋtsɛ lɛ ajie amɛ koni amɛkɛ amɛhe awo sɔɔmɔ mli kɛ ekaa akɛ Yehowa “tsuji,” ejaakɛ enɛ ji Hela wiemɔ ni atsɔɔ shishi akɛ “bɔfoi” lɛ shishijee shishinumɔ. Mɛni hewɔ ŋwɛibɔfoi ejwɛ yɔɔ lɛ? Nɛkɛ okadi yibɔ nɛɛ miitao atsɔɔ akɛ abaato amɛ gbɛjianɔ jogbaŋŋ ni no aaaha amɛkpele shikpɔŋ muu lɛ fɛɛ nɔ.—Kpojiemɔ 7:1; 20:8.

 3. “Afimɔ” bɔfoi ejwɛ lɛ “yɛ Eufrate faa kpeteŋkpele lɛ naa” yɛ mɛɛ gbɛ nɔ?

³ Te fee tɛŋŋ ni “afimɔ” nakai bɔfoi lɛ “yɛ Eufrate faa kpeteŋkpele lɛ naa lɛ”? Yɛ blema bei lɛ amli lɛ Eufrate faa lɛ yɛ shikpɔŋ ni Yehowa kɛwo Abraham shi lɛ kooyi-boka husui anaa. (1 Mose 15:18; 5 Mose 11:24) Eka shi faŋŋ akɛ, atsi ŋwɛibɔfoi lɛ anaa yɛ shikpɔŋ ni Nyɔŋmɔ kɛha amɛ lɛ husui anaa, aloo he ni amɛtsuɔ nii yɛ yɛ shikpɔŋ nɔ lɛ naa, koni amɛkɛ amɛhe akawo sɔɔmɔ ni Yehowa esaa amɛ eto kɛha no lɛ mli kɛmiimɔ shi. Akɛ Eufrate lɛ hu toɔ Babilon maŋtiase lɛ he waa, ni yɛ Yerusalem shigbeemɔ yɛ 607 D.Ŋ.B. lɛ sɛɛ lɛ, heloonaa Israelbii ye afii 70 yɛ nom mli yɛ jɛmɛ, ‘afimɔ amɛ yɛ Eufrate faa kpeteŋkpele lɛ naa.’ (Lala 137:1) Ana ni afimɔ mumɔŋ Israelbii lɛ yɛ naatsii ni tamɔ nakai naa, ni amɛbɛ miishɛɛ ni amɛmiibi Yehowa gbɛtsɔɔmɔ yɛ 1919 mli.

 4. Mɛɛ nitsumɔ ka bɔfoi ejwɛ lɛ anɔ, ni atsu enɛ yɛ mɛɛ gbɛ nɔ?

⁴ Yɛ miishɛɛ mli lɛ, Yohane bɔ amaniɛ akɛ: “Ni afɛne bɔfoi ejwɛ lɛ ni asaa ato ŋmɛlɛtswaa lɛ kɛ gbi lɛ kɛ nyɔŋ lɛ kɛ afi lɛ, koni amɛgbe gbɔmɛi amlijai etɛ mli ekome.” (Kpojiemɔ 9:15) Yehowa ji Bebulɔ ni tɔ̃ɔɔ. Eto be eha ehe ni eeenyiɛ no sɛɛ. No hewɔ lɛ, aŋmɛɛ nɛkɛ tsuji nɛɛ ahe yɛ be ni eto lɛ naa pɛpɛɛpɛ koni amɛtsu nɔ ni esa akɛ amɛtsu lɛ. Kwɛmɔ miishɛɛ ni amɛna be mli ni amɛje kpo kɛjɛ nyɔŋyeli mli yɛ 1919, ni amɛfee klalo kɛha nitsumɔ lɛ! Amɛyɛ nitsumɔ, jeee ni amɛpiŋ kɛkɛ, shi moŋ yɛ naagbee lɛ “koni amɛgbe gbɔmɛi amlijai etɛ mli ekome.” Enɛ kɔɔ haomɔi ni klɛŋklɛŋ tɛtrɛmaŋtɛrɛi ejwɛ lɛ ni akpa lɛ kɔɔ he lɛ, nɔ ni hao shikpɔŋ lɛ, ŋshɔ lɛ, ŋshɔ mli bɔɔ nii, nu bui kɛ faai kɛ ŋwɛi la kpɛmɔ jɛɛhei lɛ amlijai etɛ mli ekome lɛ he. (Kpojiemɔ 8:7-12) Ŋwɛibɔfoi lɛ yaa amɛhiɛ lolo. “Amɛgbe” loo amɛkpa mumɔŋ gbele shihilɛ mli ni Kristendom yɔɔ lɛ he mama kwraa amɛtsɔɔ. Sanejajemɔi ni tamɔ tɛtrɛmaŋtɛrɛi ni akɛha kɛjɛ 1922 kɛbaa lɛ ni eeya nɔ lolo kɛbashi amrɔ nɛɛ lɛ etsu enɛ.

 5. Yɛ Kristendom gbɛfaŋ lɛ, tɛtrɛmaŋtɛrɛ kpamɔ ni ji ekpaa lɛ jije yɛ 1927 yɛ mɛɛ gbɛ nɔ?

⁵ Kaimɔ akɛ, ŋwɛibɔfo lɛ ekpa tɛtrɛmaŋtɛrɛ ni ji ekpaa lɛ bianɛ. Yɛ enɛ nɔheremɔ mli lɛ, afee Biblia Kaselɔi lɛ daa afi majimaji ateŋ kpee ni ji ekpaa lɛ yɛ Toronto, Ontario, Canada. Yɛ Hɔgbaa, July 24, 1927 lɛ, ato wiemɔi lɛ ahe gbɛjianɔ kɛtsɔ redio nitsumɔ hei 53 nɔ, redio nɔ wiemɔ he gbɛjianɔtoo ni da fe fɛɛ eko kɛbashi nakai be lɛ mli. Wiemɔi ni atsɔ nɔ akɛha lɛ tee toibolɔi ni aaashɛ akpekpei babaoo ŋɔɔ. Klɛŋklɛŋ lɛ, yiŋkpɛɛ ni mli wa waa kpa Kristendom he mama akɛ egbo yɛ mumɔŋ, ni ekpa ninefɔɔ nɛɛ mli: “Yɛ haomɔ be nɛɛ mli lɛ, Yehowa Nyɔŋmɔ miibi ni gbɔmɛi lɛ akpoo ni amɛshi ‘Kristendom’ loo ‘Kristojamɔ ni ato he gbɛjianɔ’ lɛ kwraa ni amɛtsi amɛhe kwraa kɛjɛ he . . . ; [ha] gbɔmɛi lɛ kɛ amɛtsui mli hetuu-kɛ-hamɔ kɛ sɔɔmɔ kwraa aha Yehowa Nyɔŋmɔ kɛ e-Maŋtsɛ kɛ emaŋtsɛyeli lɛ.” Maŋshiɛmɔ ni nyiɛ sɛɛ ba lɛ yitso ji “Heyeli kɛha Gbɔmɛi Lɛ.” J. F. Rutherford, ni kɛ maŋshiɛmɔ nɛɛ ha yɛ hewalɛ mli taakɛ efɔɔ feemɔ lɛ, nɔ ko ni tamɔ “la kɛ lasu kɛ swɔɔ” ni Yohane na agbɛnɛ yɛ eninaa lɛ mli lɛ.

 6. Te Yohane tsɔɔ tabilɔi ni tara okpɔŋɔi anɔ ni ena yɛ no sɛɛ lɛ mli eha tɛŋŋ?

⁶ “Ni tabilɔi ni tara okpɔŋɔi anɔ lɛ ayibɔ ji akpei nyɔŋmai enyɔ toi akpei nyɔŋma; ni minu amɛyibɔ lɛ. Ni bɔ ni mina okpɔŋɔi lɛ kɛ amɛnɔtaralɔi lɛ yɛ ninaa lɛ mli nɛ: Ni amɛdamai ni amɛwo lɛ su tamɔ la kɛ afaseo diŋ kɛ swɔɔ damai; ni okpɔŋɔi lɛ ayitsei tamɔ jatai ayitsei, ni la kɛ lasu kɛ swɔɔ faa kɛjɛɔ amɛdaaŋ. Nɛkɛ haomɔi etɛ, ni ji la kɛ lasu kɛ swɔɔ ni faa kɛjɛɔ amɛdaaŋ nɛɛ, akɛgbe gbɔmɛi amlijai etɛ mli ekome.”—Kpojiemɔ 9:16-18.

7, 8. (a) Tabilɔi ni tara okpɔŋɔi anɔ lɛ nyiɛ yɛ namɛi akudɔmɔ kɛ gbɛtsɔɔmɔ shishi? (b) Okpɔŋɔi ni atara amɛnɔ nɛɛ tamɔ baalabii ni tsɔ amɛhiɛ lɛ yɛ mɛɛ gbɛi anɔ?

⁷ Eka shi faŋŋ akɛ okpɔŋɔnɔtaralɔi nɛɛ miiho yɛ ŋwɛibɔfoi ejwɛ lɛ akudɔmɔ kɛ gbɛtsɔɔmɔ shishi. Mɛɛ nii ni yɔɔ gbeyei nɛ! Te obaafee onii oha tɛŋŋ kɛji akɛ bo ji mɔ ni okpɔŋɔnɔtaralɔi nɛɛ tutuaa lɛ! Na ni ooona amɛ kɛkɛ lɛ baaha oshe gbeyei waa. Ani okadi bɔ ni okpɔŋɔnɔtaralɔi nɛɛ tamɔ baalabii ni tsɔ hiɛ lɛ? Baalabii lɛ tamɔ okpɔŋɔi; yɛ okpɔŋɔnɔtaralɔi nɛɛ agbɛfaŋ lɛ, amɛji okpɔŋɔi. Belɛ amɛ fɛɛ amɛkɛ amɛhe ewo teokrase tawuu mli. (Abɛi 21:31) Baalabii lɛ yɛ nyanyɔji tamɔ jatai anyanyɔji; okpɔŋɔnɔtaralɔi lɛ okpɔŋɔi lɛ yitsei tamɔ jatai ayitsei. No hewɔ lɛ kui enyɔ lɛ fɛɛ kɛ Jata ni jɛ Yuda akutso lɛ mli, Yesu Kristo, ni eji amɛ-Hiɛnyiɛlɔ, Tatsɛ, kɛ amɛ-Nɔkwɛmɔnɔ lɛ nyiɛ.—Kpojiemɔ 5:5; Abɛi 28:1.

⁸ Baalabii lɛ kɛ okpɔŋɔnɔtaralɔi lɛ fɛɛ naa Yehowa kojomɔ nitsumɔ lɛ mli gbɛfaŋnɔ. Baalabii lɛ faa kpo kɛjɛɔ lasu ni damɔ shi kɛha kpoo kɛ hiɛkpatamɔ la kɛha Kristendom lɛ he okadi lɛ mli; nɔ ni jɛɔ okpɔŋɔi lɛ hu adaaŋ yɛ biɛ ji la, lasu kɛ swɔɔ. Baalabii lɛ yɛ dade damai, ni tsɔɔ akɛ hetuu kɛ jalɛ nifeemɔ hamɔ ni gbaaa afa buɔ amɛtsuii ahe; okpɔŋɔnɔtaralɔi lɛ wo damai ni amɛsu tamɔ etsuru, blu, kɛ eŋɔli, ni damɔ shi kɛha kojomɔ wiemɔi ni gbeɔ mɔ ni faa kpo kɛjɛɔ nɛkɛ okpɔŋɔi nɛɛ adaaŋ tamɔ la, lasu kɛ swɔɔ lɛ. (Okɛto 1 Mose 19:24, 28; Luka 17:29, 30 he.) Baalabii lɛ yɛ leii ni tamɔ nyɔŋmɔŋkaakroi ni amɛkɛpiŋɔ mɛi; okpɔŋɔi lɛ yɛ leii ni tamɔ onufui ni amɛkɛgbeɔ mɛi! Etamɔ nɔ ni okpɔŋɔnɔtaralɔi lɛ baatsa nɔ ni baalabii lɛ je shishi lɛ nɔ, shi kɛ hewalɛ babaoo kɛyashi naagbee.

 9. Tabilɔi okpɔŋɔnɔtaralɔi nɛɛ feɔ mɛni he mfoniri?

⁹ No hewɔ lɛ mɛni okpɔŋɔnɔtaralɔi nɛɛ feɔ he mfoniri? Taakɛ Yohane kuu ni afɔ amɛ mu lɛ je shishi akɛ amɛaajaje Yehowa ŋwɛi kojomɔi ni ji oweletɔɔ amɛshi Kristendom tamɔ tɛtrɛmaŋtɛrɛ kɛ hewalɛ koni ‘amɛtsɛ̃rɛ ni amɛye awui’ lɛ, nakai nɔŋŋ wɔbaakpa gbɛ akɛ akɛ kuu ni yɔɔ wala mli nɛɛ nɔŋŋ baatsu nii ‘ni amɛgbe,’ ni ji akɛ, ni amɛha ale akɛ Kristendom kɛ esɔfoi lɛ egboi kwraa yɛ mumɔŋ, ni Yehowa eshɛrɛ amɛ eshwie ni be eshɛ kɛha amɛnaanɔ hiɛkpatamɔ yɛ “la flɔnɔɔ” mli. Yɛ anɔkwale mli lɛ, esa akɛ Babilon Kpeteŋkpele lɛ fɛɛ hiɛ akpata. (Kpojiemɔ 9:5, 10; 18:2, 8; Mateo 13:41-43) Shi dani ehiɛkpatamɔ lɛ aaaba lɛ, Yohane kuu lɛ kɛ “mumɔŋ klante ni ji Nyɔŋmɔ wiemɔ lɛ” tsu nii ni amɛkɛkpa Kristendom shihilɛ ni tamɔ gbele lɛ he mama. Ŋwɛibɔfoi ejwɛ lɛ kɛ okpɔŋɔnɔtaralɔi lɛ kɛ gbɛtsɔɔmɔ haa yɛ nɛkɛ “gbɔmɛi amlijai etɛ mli ekome” ni agbe amɛ yɛ okadi gbɛ nɔ nɛɛ mli. (Efesobii 6:17; Kpojiemɔ 9:15, 18) Enɛ tsɔɔ gbɛjianɔtoo kɛ teokrase gbɛtsɔɔmɔ kpakpa yɛ Nuŋtsɔ Yesu Kristo nɔkwɛmɔ shishi, yɛ be mli ni Maŋtsɛyeli jajelɔi akuu ni he yɔɔ gbeyei lɛ faa kɛyaa ta lɛ hiɛ lɛ.

Akpei Nyɔŋmai Enyɔ Toi Akpei Nyɔŋma

10. Tabilɔi ni tara okpɔŋɔi anɔ akpei nyɔŋmai enyɔ toi akpei nyɔŋma yɔɔ yɛ mɛɛ shishinumɔ naa?

¹⁰ Te aaafee tɛŋŋ ni aaana okpɔŋɔi kɛ amɛnɔtaralɔi akpei nyɔŋmai enyɔ toi akpei nyɔŋma lɛ? Myriad shishi ji 10,000. No hewɔ lɛ akpei nyɔŋmai enyɔ toi akpei nyɔŋma lɛ baafee akpekpei 200.a Yɛ miishɛɛ mli lɛ, amrɔ nɛɛ Maŋtsɛyeli jajelɔi akpekpei abɔ yɛ, shi amɛyibɔ lɛ shɛɛɛ akpekpei ohai abɔ! Shi kaimɔ Mose wiemɔi ni yɔɔ 4 Mose 10:36 lɛ: “Kuu osɛɛ, Yehowa! Kɛba Israel akpei nyɔŋmai akpei abɔ lɛ aŋɔɔ!” (Okɛto 1 Mose 24:60 he.) Eshishinumɔ diɛŋtsɛ baatsɔɔ akɛ, ‘Kuu osɛɛ kɛba Israel akpekpei nyɔŋmai abɔ lɛ ŋɔɔ.’ Shi Israel yibɔ yɛ Mose gbii lɛ amli lɛ shɛɔ aaafee akpekpei enyɔ loo etɛ. Belɛ mɛni ji nɔ ni Mose kɛɔ lɛ? Ŋwanejee ko bɛ he akɛ nɔ ni yɔɔ ejwɛŋmɔ mli ji akɛ anyɛŋ akane Israelbii lɛ ayibɔ tamɔ “ŋwɛi ŋulamii kɛ ŋshɔ naa shia” ni anyɛŋ akane lɛ. (1 Mose 22:17; 1 Kronika 27:23) No hewɔ lɛ ekɛ wiemɔ “akpei nyɔŋma” tsu nii ni ekɛtsɔɔ yibɔ ko ni da shi aleee amɛyifalɛ. No hewɔ lɛ, The New English Bible lɛ tsɔɔ kuku nɛɛ shishi akɛ: “Jɔɔmɔ ohe, Israel akpei abɔ ni anyɛɛɛ akane lɛ NUŊTSƆ.” Enɛ kɛ bɔ ni atsɔɔ wiemɔ “akpei nyɔŋma” lɛ shishi nɔ ni ji shii enyɔ nɔ ni anaa yɛ Hela kɛ Hebri wiemɔ komekomei ashishitsɔɔmɔ woji amli lɛ kpaa gbee: “asafo babaoo ni anyɛŋ akane,” “asafo babaoo.”—The New Thayer’s Greek-English Lexicon of the New Testament; Gesenius’ A Hebrew and English Lexicon of the Old Testament, ni Edward Robinson tsɔɔ shishi lɛ.

11. Dani Yohane kuu lɛ yifalɛ aaashɛ akpei nyɔŋma po yɛ okadifeemɔ naa lɛ, mɛni he baahia?

¹¹ Ni kɛlɛ, Yohane kuu lɛ mlibii ni eshwɛ lolo yɛ shikpɔŋ nɛɛ nɔ lɛ ayibɔ shɛɛɛ 10,000—ebaaa akpei nyɔŋma lɛ diɛŋtsɛ he po. Te aaafee tɛŋŋ ni aaanyɛ akɛ amɛ ato okpɔŋɔnɔtaralɔi akpei abɔ ni anyɛɛɛ akane amɛ he lɛ? Kɛ amɛaatsɔ akpei nyɔŋmai abɔ yɛ okadi gbɛ nɔ po lɛ, ani esaaa akɛ mɛi krokomɛi bafataa amɛhe? No ji nɔ ni he ehia amɛ lɛ, ni yɛ Yehowa duromɔ naa lɛ, no ji nɔ ni amɛnine shɛ nɔ! Nɛgbɛ mɛnɛɛmɛi ba kɛjɛ?

12, 13. Mɛɛ yinɔsane mli nibii ni ba kɛjɛ 1918 kɛyashi 1935 tsɔɔ he ni yifalɛ nɛɛ ba kɛjɛ?

¹² Kɛjɛ 1918 kɛbashi 1922 lɛ, Yohane kuu lɛ je shishi amɛkɛ miishɛɛ gbɛkpamɔ ko ha adesai ni amɛhao lɛ akɛ “akpekpei abɔ ni yɔɔ wala mli bianɛ lɛ gboiŋ.” Aha ale yɛ afi 1923 mli hu akɛ, gwantɛŋi ni yɔɔ Mateo 25:31-34 lɛ baana wala yɛ shikpɔŋ nɔ yɛ Nyɔŋmɔ Maŋtsɛyeli lɛ shishi. Akɛ hiɛnɔkamɔ ni tamɔ nakai ha yɛ wolo bibioo Freedom for the Peoples, ni ajie lɛ kpo yɛ majimaji ateŋ kpee ni afee yɛ 1927 shishi lɛ mli. Yɛ afi 1930 shishijee mli lɛ, abatsɔɔ akɛ Yehonadab jalɔ lɛ kuu lɛ kɛ ‘mɛi ni damɔɔ ŋtsɔi ni amɛyeɔ ŋkɔmɔ’ yɛ Kristendom mumɔŋ shihilɛ ni yɔɔ mɔbɔ lɛ hewɔ lɛ tamɔ okadi gwantɛŋi ni yɔɔ shikpɔŋ nɔ wala he gbɛkpamɔ lɛ. (Ezekiel 9:4; 2 Maŋtsɛmɛi 10:15, 16) Yɛ be mli ni ekudɔɔ gbɔmɛi ni tamɔ nɛkɛ kɛyaa ŋmɛnɛŋmɛnɛ beaŋ “abobaa maji” lɛ amli lɛ, The Watchtower ni ji August 15, 1934 nɔ lɛ jaje akɛ: “Mɛi ni ji Yonadab kuu lɛ enu Nyɔŋmɔ tɛtrɛmaŋtɛrɛ lɛ gbɛɛmɔ lɛ ni amɛbo kɔkɔbɔɔ lɛ toi kɛtsɔ amɛfoijee kɛmiiba Nyɔŋmɔ gbɛjianɔtoo lɛ mli lɛ nɔ, koni amɛkɛ amɛhe ababɔ Nyɔŋmɔ webii, koni amɛbahi shi yɛ jɛmɛ.”—4 Mose 35:6.

¹³ Yɛ 1935 mli lɛ, aje gbɛ afɔ Yonadab kuu nɛɛ nine koni amɛba Yehowa Odasefoi akpee ni amɛfee yɛ Washington, D.C., U.S.A. lɛ shishi. Yɛ jɛmɛ, yɛ Sohaa, May 31, ni J. F. Rutherford kɛ ewiemɔ ni ehe gbɛi ni ji “Asafo Babaoo” lɛ ha, ni emli ni etsɔɔ yɛ faŋŋ mli akɛ nɛkɛ kuu ni yɔɔ Kpojiemɔ 7:9 lɛ nɔŋŋ ji gwantɛŋi ni yɔɔ Mateo 25:33 lɛ—kuu ni amɛjɔɔ amɛhe nɔ ni yɔɔ shikpɔŋ nɔ hiɛnɔkamɔ lɛ. Akɛ nɔ ni tsɔɔ hiɛ egbaa nibii ni baaba lɛ, abaptisi Odasefoi heei 840 yɛ nakai kpee lɛ shishi, ni amɛteŋ mɛi pii ji asafo babaoo lɛ mli bii.b

14. Ani asafo babaoo lɛ baana gbɛfaŋnɔ yɛ okadi tabilɔi ni tara okpɔŋɔi anɔ nɛɛ atutuamɔ lɛ mli, ni mɛɛ yiŋ akpɛ ni ajaje atsɔɔ yɛ 1963?

¹⁴ Ani asafo babaoo nɛɛ ená okpɔŋɔnɔtaralɔi lɛ atutuamɔ ni je shishi yɛ 1922 ni ama nɔ mi krɛdɛɛ yɛ Toronto kpee lɛ shishi yɛ 1927 lɛ mli gbɛfaŋnɔ? Yɛ ŋwɛibɔfoi ejwɛ lɛ, Yohane kuu ni afɔ amɛ mu lɛ akudɔmɔ shishi lɛ, amɛfee nakai! Amɛfata Yohane kuu lɛ he yɛ yiŋkpɛɛ ko ni kanyaa mɔ lɛ jajemɔ mli yɛ “Naanɔ Sanekpakpa” Kpee ni afee yɛ 1963 ni akɛbɔle jeŋ fɛɛ lɛ shishi. Nɛkɛ yiŋkpɛɛ nɛɛ jaje akɛ “jeŋ muu fɛɛ shikpɔŋhosomɔ ko ni anako eko da ka je nɛɛ hiɛ, kɛ emaŋkwramɔŋ gbɛjianɔtoi fɛɛ kɛ ŋmɛnɛŋmɛnɛ beaŋ Babilon jamɔi lɛ ahiɛ ni ebaahoso amɛ ni ejwara amɛ dukuduku.” Atsɔɔ yiŋkpɛɛ lɛ mli akɛ “wɔbaaya nɔ ni wɔjaje ‘naanɔ sanekpakpa’ lɛ ni kɔɔ Nyɔŋmɔ Mesia maŋtsɛyeli lɛ he lɛ kɛ nɔ ni kɔɔ ekojomɔi lɛ ahe lɛ, ni tamɔ haomɔi kɛha ehenyɛlɔi lɛ shi abaatsu he nii ni akɛkpɔ̃ gbɔmɛi fɛɛ ni sumɔɔ ni amɛja Nyɔŋmɔ kɛ Bɔlɔ lɛ yɛ nɔkpɛlɛmɔ mli yɛ mumɔ kɛ anɔkwale mli lɛ ni hiɛaŋkwɛmɔ bɛ mli.” Akpɛlɛ nɛkɛ yiŋkpɛɛ nɛɛ nɔ kɛ miishɛɛ yɛ kpeei sɔrɔtoi 24 ni afee kɛbɔle je lɛŋ ni kpeeyalɔi ni naa shɛɔ 454,977 ba lɛ ashishi, ni amɛteŋ mɛi ni fe oha mlijaa 95 ji asafo babaoo lɛ mli bii.

15. (a) Nitsulɔi ni Yehowa kɛ amɛ tsuɔ nii yɛ esɔɔmɔ lɛ mli lɛ oha mlijaa enyiɛ feɔ asafo babaoo lɛ yɛ afi 2005 mli? (b) Yɛ mɛɛ gbɛ nɔ Yesu sɔlemɔ ni yɔɔ Yohane 17:20, 21 lɛ maa ekomefeemɔ ni ka asafo babaoo lɛ kɛ Yohane kuu lɛ teŋ lɛ nɔ mi?

¹⁵ Asafo babaoo lɛ etee nɔ amɛjaje ekome ni amɛkɛ Yohane kuu lɛ feɔ lɛ amɛtsɔɔ yɛ haomɔi ni amɛfataa he kɛfɔseɔ ashwieɔ Kristendom nɔ lɛ mli. Yɛ afi 2005 mli lɛ, no mli lɛ nɛkɛ asafo babaoo nɛɛ feɔ nitsulɔi ni Yehowa kɛtsuɔ nii yɛ shiɛmɔ mli lɛ oha mlijaa 99.8. Amɛmli bii lɛ kɛ Yohane kuu ni Yesu sɔle yɛ amɛhe yɛ Yohane 17:20, 21 akɛ: “Shi jeee mɛnɛɛmɛi ahewɔ kɛkɛ mibiɔ lɛ, shi mɛi ni baahe minɔ aye yɛ amɛwiemɔ naa lɛ hu ahewɔŋ; koni amɛ fɛɛ amɛfee ekome taakɛ bɔ ni bo, Ataa, oyɔɔ mimli ni mi hu miyɔɔ omli lɛ, koni amɛ hu amɛfee ekome yɛ wɔmli, koni je lɛ ahe aye akɛ bo otsu mi” lɛ feɔ ekome yɛ amɛtsui muu fɛɛ mli. Yɛ be mli ni Yohane kuu ni afɔ amɛ mu lɛ nyiɛɔ hiɛ yɛ Yesu gbɛtsɔɔmɔ shishi lɛ, asafo babaoo lɛ hu ni yɔɔ ekaa lɛ kɛ amɛ naa gbɛfaŋnɔ yɛ okpɔŋɔnɔtaralɔi atutuamɔ ni da fe fɛɛ yɛ yinɔsane mli lɛ mli!c

16. (a) Te Yohane tsɔɔ bɔ ni okadi okpɔŋɔi nɛɛ anaabui kɛ leii lɛ yɔɔ lɛ mli eha tɛŋŋ? (b) Asaa Yehowa webii anaabui aha sɔɔmɔ nitsumɔ yɛ mɛɛ gbɛ nɔ? (d) Yɛ anɔkwale ni eji akɛ “amɛleii tamɔ onufui” lɛ damɔ shi kɛha mɛni?

¹⁶ Dɛŋdadei ahe miihia okpɔŋɔnɔtaralɔi lɛ kɛha tawuu lɛ. Ni kwɛ bɔ ni Yehowa kɛ enɛ eha yɛ naakpɛɛ gbɛ nɔ. Yohane tsɔɔ mli: “Ejaakɛ okpɔŋɔi lɛ ahewalɛi yɛ amɛdaaŋ kɛ amɛleii amli, ejaakɛ amɛleii lɛ tamɔ onufui, ni yitsei yɛ he, ni nomɛi amɛkɛfeɔ efɔŋ.” (Kpojiemɔ 9:19) Yehowa ehala esɔɔlɔi ni amɛjɔɔ amɛhe nɔ ni abaptisi amɛ lɛ eha nɛkɛ sɔɔmɔ nitsumɔ nɛɛ. Etsɔ Teokrase Sɔɔmɔ Skul lɛ kɛ asafoŋ kpeei kɛ skul sɔrɔtoi anɔ etsɔɔ amɛ gbɛ ni amɛaatsɔ nɔ amɛshiɛ wiemɔ lɛ, bɔni afee ni amɛnyɛ amɛkɛ ekaa awie kɛ “nikaselɔi alilɛii.” Ekɛ ewiemɔi ewo amɛdaaŋ ni etsu amɛ koni amɛyajaje ekojomɔi lɛ “yɛ faŋŋ kɛ shia kɛ shia.” (2 Timoteo 4:2; Yesaia 50:4; 61:2; Yeremia 1:9, 10; Bɔfoi lɛ Asaji 20:20) Yohane kuu lɛ kɛ asafo babaoo lɛ eshi shɛɛ saji ni tsɛ̃rɛɔ mɔ ni damɔ shi kɛha “leii” yɛ amɛsɛɛ tamɔ Bibliai, woji wuji, woji bibii kɛ woji tɛtrɛbii akpekpei toi akpei abɔ ni amɛja yɛ afii lɛ amli lɛ. Kɛha mɛi ni teɔ shi woɔ amɛ, ni abɔɔ amɛ kɔkɔ yɛ “efɔŋ” ni jɛɔ Yehowa ŋɔɔ baa lɛ he lɛ, nɛkɛ tabilɔi ni tara okpɔŋɔi anɔ nɛɛ ayifalɛ tamɔ akpei nyɔŋmai enyɔ toi akpei nyɔŋma lɛlɛŋ.—Okɛto Yoel 2:4-6 he.

17. Ani Yehowa Odasefoi naa gbɛfaŋnɔ ko yɛ tabilɔi okpɔŋɔnɔtaralɔi lɛ atutuamɔ yɛ maji ni anyɛɛɛ akɛ woji aha yɛ nitsumɔ lɛ naa ni atsi hewɔ lɛ mli? Tsɔɔmɔ mli.

¹⁷ Okpɔŋɔnɔtaralɔi nɛɛ fa ni yɔɔ ekaa waa ji nyɛmimɛi ni yɔɔ shikpɔji ni atsi Yehowa Odasefoi anitsumɔ lɛ naa yɛ jɛmɛ lɛ anɔ lɛ. Amɛtamɔ gwantɛŋi yɛ klaji ateŋ, no hewɔ lɛ esa akɛ ‘amɛhiɛ atɛ̃ tamɔ onufui ni amɛfee kpoo tamɔ okpoi.’ Yɛ toiboo ni amɛfeɔ amɛhaa Yehowa hewɔ lɛ, amɛnyɛŋ amɛkpa nibii ni amɛna ni amɛnu lɛ ahe wiemɔ. (Mateo 10:16; Bɔfoi lɛ Asaji 4:19, 20; 5:28, 29, 32) Akɛni amɛbɛ woji komɛi ni amɛbaaja yɛ faŋŋ mli aloo fioo ko pɛ amɛyɔɔ hewɔ lɛ, ani esa akɛ wɔmu sane naa akɛ amɛnaaa nɛkɛ okpɔŋɔnɔtaralɔi atutuamɔ nɛɛ mli gbɛfaŋnɔ? Dabida kwraa! Amɛyɛ amɛnaabui kɛ hegbɛ ni jɛ Yehowa ŋɔɔ ni amɛkɛbaatsu nii ni amɛkɛjaje Biblia mli anɔkwalei lɛ. Amɛfeɔ enɛ trukaa ni amɛkɛtsɔɔ mɛi ayiŋ, amɛtoɔ nikasemɔi ahe gbɛjianɔ yɛ Biblia lɛ mli ni ‘amɛtsɔɔ mɛi pii agbɛ kɛtee jalɛ mli.’ (Daniel 12:3) Eyɛ mli akɛ amɛkɛ amɛleii lɛ yeŋ awui loo amɛkɛfeŋ efɔŋ kɛ shishinumɔ akɛ amɛaashi woji ni amɛmli saji lɛ anaa wawai moŋ, shi okadi la, lasu kɛ swɔɔ jɛɔ amɛdaaŋ yɛ be mli ni amɛyeɔ odase yɛ ŋaa kɛ hiɛtɛɛ mli yɛ Yehowa bembuu gbi ni baa lɛ he lɛ.

18. Wiemɔi enyiɛ kɛ woji enyiɛ okpɔŋɔnɔtaralɔi nɛɛ eja shɛɛ sane ni haoɔ mɔ nɛɛ yɛ mli?

¹⁸ Yɛ hei krokomɛi hu lɛ, Maŋtsɛyeli lɛ he woji lɛ yaa nɔ ekpaa Kristendom Babilon tsɔɔmɔi kɛ egbɛi ahe mama, eyeɔ lɛ awui yɛ okadi gbɛ nɔ. Akɛni amɛkɛ woji akalamɔ he gbɛjianɔtoo ni etee hiɛ yɛ ebe naa tsuɔ nii hewɔ lɛ, nɛkɛ okpɔŋɔnɔtaralɔi nɛɛ nyɛ amɛja Bibliai, woji wuji, woji tɛtrɛbii kɛ woji bibii akpekpei toi akpei abɔ yɛ shikpɔŋ lɛ nɔ wiemɔi ni fa fe 450 mli—shii toi babaoo fe akpei nyɔŋmai enyɔ toi akpei nyɔŋma diɛŋtsɛ yɛ afii 68 ni tsɔ afi 2005 hiɛ lɛ mli. Mɛɛ tsɛ̃rɛmɔ nakai leii lɛ tsɛ̃rɛ mɛi nɛkɛ!

19, 20. (a) Eyɛ mli akɛ Kristendom ji mɔ pɔtɛɛ ni akɛ shɛɛ saji nɛɛ tutuaa moŋ, shi te mɛi krokomɛi ni yɔɔ shikpɔji ni yɔɔ Kristendom sɛɛ shɔŋŋ lɛ ehere nɔ amɛha tɛŋŋ? (b) Te Yohane tsɔɔ bɔ ni gbɔmɛi lɛ feɔ amɛnii yɛ he amɛhaa lɛ mli eha tɛŋŋ?

¹⁹ Yehowa to eyiŋ akɛ nɛkɛ sane ni haoɔ mɛi nɛɛ “agbe gbɔmɛi amlijai etɛ mli ekome.” No hewɔ lɛ mɔ pɔtɛɛ ni etutuaa ji Kristendom. Shi eyashɛ shikpɔji ni yɔɔ Kristendom sɛɛ kwraa lɛ anɔ, kɛ babaoo ni le Kristendom jamɔi amli osatofeemɔ lɛ jogbaŋŋ lɛ anɔ. Ani gbɔmɛi ni yɔɔ nɛkɛ shikpɔji nɛɛ anɔ lɛ etsi ebɛŋkɛ Yehowa he akɛni amɛmiina haomɔ ni baa jamɔ gbɛjianɔtoo ni ekpɔtɔ nɛɛ nɔ lɛ hewɔ? Mɛi pii efee nakai! Heshibalɔi kɛ gbɔmɛi ni yɔɔ suɔmɔ ni hiɔ hei ni yɔɔ Kristendom sɛɛ ni enyɛɛɛ ena amɛnɔ hewalɛ amrɔ lɛ ateŋ mɛi pii ehere nɛkɛ sane nɛɛ nɔ. Shi yɛ gbɔmɛi ni eshwɛ lɛ fɛɛ agbɛfaŋ lɛ, Yohane tsɔɔ nɔ ni amɛfeɔ yɛ he lɛ mli: “Ni gbɔmɛi ni shwɛ ni agbeee amɛ yɛ nɛkɛ haomɔi nɛɛ amli lɛ, amɛtsakeee amɛtsui kɛjɛɛɛ amɛninenaa nitsumɔi lɛ ahe, koni amɛfɔɔ daimonioi kɛ shika kɛ jwiɛtɛi kɛ ayawa kɛ tɛ kɛ tso amagai ni enaaa nii ni amɛnuuu nii ni amɛnyɛɛɛ amɛwie lɛ ajamɔ; ni asaŋ amɛtsakeee amɛtsui kɛjɛɛɛ amɛwuiyelii kɛ amɛsuui kɛ amɛ ajwamaŋbɔi kɛ amɛjuui lɛ amli.” (Kpojiemɔ 9:20, 21) Jeŋ muu fɛɛ tsakemɔ ko baŋ yɛ mɛi ni tsakeee amɛtsui nɛɛ agbɛfaŋ. Mɛi fɛɛ ni kaa he amɛyaa nɔ yɛ amɛyiwalɛ gbɛi lɛ amli lɛ kɛ fɔbuu kojomɔ ni jɛ Yehowa ŋɔɔ baakpe yɛ ebembuu gbi wulu lɛ nɔ. Shi “mɔ fɛɛ mɔ ni aaatsɛ Yehowa gbɛi anɔ lɛ, aaahere eyiwala.”—Yoel 3:5; Lala 145:20; Bɔfoi lɛ Asaji 2:20, 21.

²⁰ Nɔ ni wɔsusu he bianɛ lɛ ji kpoo ni ji enyɔ lɛ fa. Babaoo yɛ ni baaba dani nɛkɛ kpoo nɛɛ baaba naagbee, taakɛ wɔbaana yɛ yitsei ni nyiɛ sɛɛ lɛ amli lɛ.

[Shishigbɛ niŋmai]

[Mfoniri ni yɔɔ baafa 149]

Tɛtrɛmaŋtɛrɛ ni ji ekpaa lɛ kpamɔ kɛ kpoo ni ji enyɔ lɛ ba

[Mfonirii ni yɔɔ baafa 150]

Bɔfoi ejwɛ lɛ kudɔɔ okpɔŋɔnɔtaralɔi atafaa ni da fe fɛɛ yɛ yinɔsane mli lɛ

[Mfonirii ni yɔɔ baafa 153]

Okpɔŋɔnɔtaralɔi ni anyɛɛɛ akane amɛ lɛ eja woji ni adamɔ Biblia lɛ nɔ aŋmala lɛ akpekpei abɔ ni anyɛɛɛ akane

[Mfonirii ni yɔɔ baafa 154]

Gbɔmɛi ni eshwɛ lɛ tsakeee amɛtsuii