Hɛl​—Naanɔ Piŋmɔ Aloo Kwamaŋ Gbonyo Bu?

ANI akɛɛ bo akɛ mra be mli Sɔlemɔ Tsɛmɛi lɛ, teŋgbɛ afii lɛ amli Nyɔŋmɔ jamɔ he nilelɔi, kɛ Jamɔ Tsakelɔi taoɔ saji anaa akɛ piŋmɔi ni anaa yɛ hɛl lɛ hiɔ shi kɛyaa naanɔ? Kɛji nakai lɛ, no lɛ ekolɛ eeefee bo naakpɛɛ akɛ ooole akɛ amrɔ nɛɛ Biblia he nilelɔi ni ale amɛ waa lɛ ateŋ mɛi komɛi miite shi amɛmiiwo nakai susumɔ lɛ. Yɛ Britain lɛ, amɛteŋ mɔ kome, John R. W. Stott, ŋma akɛ “Ŋmalɛi lɛ tsɔɔ faŋŋ akɛ hiɛkpatamɔ kwraa ji nɔ ni yɔɔ, ni ákɛ ‘naanɔ piŋmɔ ni anuɔ he’ lɛ ji blema sane ni sa akɛ aŋmɛɛ he ni aha Biblia lɛ hegbɛ lɛ aye klɛŋklɛŋ gbɛhe.”​—Essentials​—A Liberal-Evangelical Dialogue.

Mɛni ha emu sane naa akɛ naanɔ piŋmɔ tsɔɔmɔ lɛ damɔɔɔ Biblia lɛ nɔ lɛ?

Wiemɔ He Nikasemɔ Lɛ

Eklɛŋklɛŋ sane naataomɔ lɛ kɔɔ wiemɔ he. Etsɔɔ mli akɛ kɛ Biblia lɛ miiwie naagbee fɔbuu shihilɛ (“Gehena”; kwɛmɔ akrabatsa lɛ, yɛ baafa 8) he lɛ, bei pii lɛ ekɛ wiemɔ ni ji “hiɛkpatamɔ,” ni ji Hela “feemɔ-wiemɔ apollumi (akpata nii ahiɛ) kɛ gbɛi najiaŋdamɔlɔ apóleia (hiɛkpatamɔ)” tsuɔ nii. Ani nɛkɛ wiemɔi nɛɛ miitsɔɔ piŋmɔ? Stott tsɔɔ mli akɛ kɛji feemɔwiemɔ lɛ tsɔɔ nifeemɔ ni mɔɔ shi ni ekɔɔ nɔ pɔtɛɛ ko he lɛ, no lɛ “apollumi” shishi ji “gbee.” (Mateo 2:​13; 12:​14; 21:41) Enɛ hewɔ lɛ, yɛ Mateo 10:​28, he ni King James Version tsĩɔ ta yɛ akɛ Nyɔŋmɔ kpataa “susuma kɛ gbɔmɔtso fɛɛ hiɛ yɛ hɛl” lɛ, jwɛŋmɔ ni yɔɔ mli lɛ ji hiɛkpatamɔ yɛ gbele mli, shi jeee yɛ naanɔ piŋmɔ mli. Yɛ Mateo 7:​13, 14 lɛ, Yesu kɛ “gbɛ ni etsa [ni] . . . kɛ mɔ yaa wala mli” lɛ to “gbɛ tɛtrɛɛ . . . ni kɛ mɔ yaa hiɛkpatamɔ mli” lɛ he ni eha ana sɔrɔto ni yɔɔ mli. Stott wie he akɛ: “No hewɔ lɛ, eeefee naakpɛɛ, kɛji akɛ gbɔmɛi ni akɛɛ amɛmiina hiɛkpatamɔ mli amanehulu lɛ ahiɛ kpataaa lɛlɛŋ yɛ anɔkwale mli.” No hewɔ lɛ eja gbɛ akɛ emu sane lɛ naa yɛ nɛkɛ gbɛ nɔ akɛ: “Kɛji gbe ni aaagbe mɔ ko lɛ tsɔɔ wala ni ahaaa gbɔmɔtso lɛ ana lɛ, no lɛ hɛl baafee he ni aheɔ gbɔmɔtsoŋ kɛ mumɔŋ shihilɛ fɛɛ kɛjɛɔ mɔ lɛ dɛŋ, ni tsɔɔ nakai bɔɔnii lɛ shihilɛ sɛɛfoo kwraa.”​—Essentials, baafai 315-16.

Bɔ ni Afeɔ Hɛl La he Mfoniri Ahaa lɛ Mlitsɔɔmɔ

Kɛlɛ, mɛi ni sumɔɔ Nyɔŋmɔ jamɔ waa lɛ ateŋ mɛi pii kɛ Southern Baptist Convention sɔlemɔ lɛ sɛinɔtalɔ Morris H. Chapman baakpa gbee, mɔ ni kɛɛ akɛ: “Mishiɛɔ hɛl diɛŋtsɛ” lɛ. Ekɛfata he akɛ: “Biblia lɛ tsɛɔ lɛ ‘la kpaakpo,’ ni misusuuu akɛ abaanyɛ atsake bɔ ni atsɔɔ mli aha nɛɛ.”

Kɛ wɔɔkɛɛ lɛ, la he mfoniri-feemɔ ni akɛtsuɔ nii yɛ Biblia lɛ mli baanyɛ eha mɔ ko afee piŋmɔ he mfoniri yɛ ejwɛŋmɔ mli. Shi, wolo ni atsɛɔ lɛ Essentials lɛ wie akɛ: “Ŋwanejee ko bɛ he akɛ akɛni wɔ fɛɛ wɔna bɔ ni kɛ́ la shã mɔ ni ewaa mɔ he waa lɛ mli niiashikpamɔ lɛ, no hewɔ ni la baa wɔjwɛŋmɔi amli kɛkɔɔ ‘piŋmɔ ni anuɔ hewaa he’ lɛ he lɛ. Shi la lɛ nitsumɔ titri jeee ni ekɛ hewaa aba, shi moŋ ni ekɛ hiɛkpatamɔ aba, taakɛ je lɛŋ flɔnɔi fɛɛ yeɔ he odase lɛ.” (Baafa 316) Nakai emlitsɔɔmɔ ni sa kadimɔ waa lɛ ni oooha ehi ojwɛŋmɔ mli lɛ baaye abua bo ni okatsɔɔ Ŋmalɛi lɛ ashishi kɛ mlitsɔɔmɔ ko ni fataaa he. Nɔkwɛmɔ nii komɛi nɛ:

Yesu wie mɛi ni akɛ amɛ woɔ Gehena lɛ ahe akɛ “amɛgɔ̃gɔ̃mi lɛ gbooo, ni amɛla lɛ hu ahaaa egbo.” (Marko 9:​47, 48) Akɛni wiemɔi ni yɔɔ apokrifa wolo Judith mli (“Ebaatsu la kɛ gɔ̃gɔ̃mii kɛba amɛhewolo mli ní amɛbaafo kɛ piŋmɔ kɛya naanɔi fɛɛ.”​—Judith 16:​17, The Jerusalem Bible) lɛ naa amɛnɔ hewalɛ hewɔ lɛ, Biblia he woji komɛi tsɔɔ saji anaa akɛ Yesu wiemɔi lɛ miitsɔɔ naanɔ piŋmɔ. Ni kɛlɛ, akɛni apokrifa wolo Judith jɛɛɛ Nyɔŋmɔ mumɔ mli hewɔ lɛ, ejeee nɔdaamɔ nɔ ni akɛaatao Marko niŋmaai lɛ ashishinumɔ mli. Yesaia 66:​24, ni eka shi faŋŋ akɛ no ji ŋmalɛ ni Yesu tsĩ ta lɛ, kɛɔ akɛ la lɛ kɛ gɔ̃gɔ̃mii lɛ miikpata Nyɔŋmɔ henyɛlɔi ni egboi lɛ (“agbohii lɛ,” taakɛ Yesaia kɛɛ lɛ) ahiɛ. Anaaa okadi ko kwraa ni tsɔɔ naanɔ piŋmɔ ni anuɔ hewaa he yɛ mli, yɛ Yesaia wiemɔi lɛ aloo Yesu nɔ lɛ hu mli. La ni akɛfee he mfoniri lɛ feɔ hiɛkpatamɔ kwraa he mfoniri.

Kpojiemɔ 14:​9-11 wieɔ mɛi komɛi ahe akɛ “aapiŋ [amɛ] yɛ la kɛ swɔɔ mli . . . Ni amɛpiŋmɔ lɛ lasu lɛ teɔ shi kɛyaa naanɔi anaanɔ.”a Ani enɛ maa naanɔ piŋmɔ ni anuɔ hewaa he yɛ mli yɛ hɛl la mli lɛ nɔ mi? Nɔ ni ŋmalɛ kuku nɛɛ kɛɔ yɛ faŋŋ mli kɛkɛ ji akɛ awaa mɛi fɔji lɛ ayi, shi jeee akɛ awaa amɛ yi kɛyaa naanɔ. Ŋmalɛ lɛ kɛɔ akɛ lasu lɛ​—odaseyeli ni tsɔɔ akɛ la lɛ etsu enitsumɔ ni ji hiɛkpatamɔ lɛ he nii lɛ ​—ji nɔ ni tsaa nɔ kɛyaa naanɔ lɛ, jeee la piŋmɔ lɛ.

Kpojiemɔ 20:​10-15 kɛɔ akɛ yɛ “la kɛ swɔɔ kpaakpo lɛ mli [lɛ], . . . aaapiŋ amɛ nyɔɔŋ kɛ shwane kɛaatee naanɔi anaanɔ.” Kɛji okane klɛŋklɛŋ kwraa lɛ, enɛ baafee tamɔ nɔ ni emaa naanɔ la mli piŋmɔ ni anuɔ hewaa he yɛ mli lɛ nɔ mi, shi eka shi faŋŋ akɛ jeee nakai. Mɛni hewɔ? Yiŋtoi lɛ ateŋ ekome ji akɛ, “kooloo lɛ kɛ amale gbalɔ lɛ” kɛ “gbele kɛ gbohiiaje” hu baagbe naa yɛ nɔ ni awieɔ he yɛ biɛ akɛ “la kpaakpo lɛ” mli. Taakɛ ekolɛ obaamu sane naa yɛ gbɛ ni waaa kwraa nɔ lɛ, kooloo lɛ, amale gbalɔ lɛ, gbele, kɛ gbohiiaje jeee nibii diɛŋtsɛ ni yɔɔ; nɔ hewɔ lɛ, amɛnyɛŋ amɛnu piŋmɔ mli hewaa he. Shi moŋ, G. B. Caird ŋma yɛ ewolo ni ji A Commentary on the Revelation of St. John the Divine, lɛ mli akɛ “la kpaakpo lɛ” tsɔɔ “hiɛkpatamɔ kɛ hiɛnɔkpamɔ kwraa.” Esa akɛ anyɛ ashɛ sɛɛyoomɔ nɛɛ he yɛ gbɛ ni waaa kwraa nɔ, ejaakɛ Biblia lɛ diɛŋtsɛ wieɔ yɛ nɛkɛ la kpaakpo nɛɛ he akɛ: “Enɛ ji gbele ni ji enyɔ lɛ, la kpaakpo lɛ nɛ.”​—Kpojiemɔ 20:⁠14.

Nyɔŋmɔ Jamɔ Mli Haaji lɛ Amligbalamɔ

Yɛ nɛkɛ naataomɔi nɛɛ fɛɛ sɛɛ lɛ, heyelilɔi pii maa nɔ mi akɛ “hiɛkpatamɔ” etsɔɔɔ nɔ ni wiemɔ lɛ kɛɔ lɛ, shi moŋ eetsɔɔ naanɔ piŋmɔ. Mɛni hewɔ? Hɛl la hefatalɔ haaji yɛ Nyɔŋmɔ jamɔ mli lɛ naa amɛsusumɔ nɔ hewalɛ​—no ji adesa susuma ni gbooo tsɔɔmɔ lɛ. Ni akɛni amɛsɔlemɔ lɛ kɛ nɛkɛ haaji nɛɛ ba afii ohai babaoo ni eho nɛ hewɔ lɛ, ekolɛ amɛnuɔ he akɛ ŋmalɛi ni wieɔ hiɛkpatamɔ he lɛ miitsɔɔ naanɔ piŋmɔ diɛŋtsɛ. Ejaakɛ fɛɛ sɛɛ lɛ, anyɛŋ ajie adesa susuma ni gbooo lɛ kɛjɛ shihilɛ mli​—aloo nɔ ko tamɔ nakai, taakɛ mɛi pii susuɔ lɛ.

Shi kadimɔ oti ko ni Anglikan osɔfo Philip E. Hughes kɛma shi lɛ: “Ní aaawie doo akɛ adesa susumɔ lɛ gbooo yɛ ebɔɔ su naa lɛ feɔ shidaamɔ ko ni akpɛlɛko nɔ yɛ Ŋmalɛ lɛ tsɔɔmɔ ko mli lɛ mlihiɛmɔ, ejaakɛ yɛ bɔ ní Biblia wieɔ he ehaa lɛ naa lɛ, anaa adesa su lɛ be fɛɛ be akɛ ekɛ mumɔ kɛ gbɔmɔtso lɛ fɛɛ etsa ni ekɛ lɛ efee ekome. . . . Nyɔŋmɔ kɛ kɔkɔbɔɔ ni ekɛha yɛ shishijee, ni kɔɔ tso ni agu eyeli he lɛ he, akɛ, ‘Gbi nɔ oooye eko lɛ, gbo ooogbo’ lɛ, hã gbɔmɔ lɛ ákɛ bɔɔ nɔ ni yɔɔ heloo-kɛ-mumɔ fɛɛ​—ni kɛ eye eyibii lɛ eko lɛ, nakai nɔŋŋ eeegbo, ákɛ bɔɔ nɔ ni yɔɔ heloo-kɛ-mumɔ fɛɛ. Susumɔ ko bɛ mli ni tsɔɔ akɛ efa ko gbooo, ni no hewɔ lɛ egbele lɛ baaba lɛ fã-kɛ-fã pɛ kɛkɛ.”​—The True Image​—The Origin and Destiny of Man in Christ.

Nakai nɔŋŋ hu, Nyɔŋmɔ jamɔ he nilelɔ Clark Pinnock wie akɛ: “Nɛkɛ susumɔ [ákɛ adesa susuma lɛ gbooo] nɛɛ ena Nyɔŋmɔ jamɔ nɔ hewalɛ babaoo, be babaoo diɛŋtsɛ, shi ebɛ Biblia lɛ mli. Biblia lɛ etsɔɔɔ akɛ susuma lɛ gbooo yɛ adebɔɔ su naa.” Ezekiel 18:​4, 20 kɛ Mateo 10:28 maa enɛ nɔ mi. Kɛfata he lɛ, Yesu diɛŋtsɛ wie enaanyo Lazaro ni egbo lɛ he akɛ “ewɔ,” loo eejɔɔ ehe. Yesu wie akɛ eeya ni “[e]yatsĩɛ lɛ yɛ wɔ lɛ mli.” (Yohane 11:​11-14) No hewɔ lɛ gbɔmɔ adesa, loo adesa susuma, Lazaro gbo, shi beni be ko eho sɛɛ po lɛ, anyɛ atee lɛ shi, ni akɛ lɛ ba wala mli ekoŋŋ. Anɔkwa saji lɛ maa enɛ nɔ mi. Yesu tee Lazaro shi kɛjɛ gbohii ateŋ.​—Yohane 11:​17-44.

Te nɛkɛ saji otii nɛɛ saa naanɔ piŋmɔ tsɔɔmɔ lɛ he ehaa tɛŋŋ? Mra mli yɛ afii ohai 17 lɛ mli lɛ, niŋmalɔ William Temple wie akɛ: “[Ŋmalɛi] yɛ ni wieɔ shɛ ni ashɛɔ mɔ afɔɔ la ni gbooo mli lɛ he. Shi kɛji wɔsusuuu ŋmalɛi nɛɛ ahe kɛ jwɛŋmɔi ní wɔhiɛ momo akɛ anyɛɛɛ akpata nɔ ni ashɛɔ afɔɔ mli lɛ hiɛ kwraa lɛ, no lɛ wɔɔna susumɔ ko, jeee akɛ nɔ ni ashɛ afɔ mli lɛ baashã kɛya naanɔ, shi moŋ ehiɛ baakpata kɛkɛ.” Nɛkɛ sane mlitsɔɔmɔ ni ja nɛɛ ka he eji anɔkwale, ejaakɛ no ji nɔ diɛŋtsɛ ní Biblia lɛ tsɔɔ.

Ŋwanejee ko bɛ he akɛ, oyɛ yiŋtoi ni mli wa ni okɛaabi naanɔ piŋmɔ yɛ hɛl, ni anuɔ hewaa he yɛ mli lɛ he sane. Aloo ekolɛ oosumɔ ni oya hiɛ fe sane ni ooobi kɛkɛ, ní onyiɛ ŋaa ni Nyɔŋmɔ jamɔ he nilelɔ Pinnock wo lɛ sɛɛ, mɔ ni kɛɛ akɛ: “Esa akɛ adamɔ tsɔɔmɔ ni ja kɛmɔ shi nɔ ashɛrɛ hemɔkɛyelii fɛɛ ní kɔɔ hɛl he, ni piŋmɔ ni baaa naagbee lɛ hu fata he lɛ, . . . ashwie kwraa.” Hɛɛ, jeŋba he nilee, jalɛsaneyeli, kɛ nɔ ní he hiaa fe fɛɛ lɛ​—Nyɔŋmɔ Wiemɔ, ni ji Biblia lɛ kɛɔ bo ni ofee nakai.

Kɛ ofee nakai lɛ, obaana akɛ shishinumɔ yɛ bɔ ni hɛl su ji diɛŋtsɛ lɛ he waa. Obaanyɛ ona saji ni yeɔ buaa yɛ nɛkɛ sane nɛɛ he, yɛ Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo lɛ mli.b Ofainɛ kɛ okɛ Yehowa Odasefoi kpe lɛ, bi ni aha bo eko. Kanemɔ yitsei ni ji “Mɛni Baa yɛ Gbele Mli?” “Mɛɛ He Nɛkɛ Hɛl Ji?” kɛ “Gbohiiashitee​—Kɛha Namɛi, ni Yɛ Nɛgbɛ?” Obaana akɛ jeee shishinumɔ pɛ kɛkɛ yɔɔ bɔ ni hɛl su ji diɛŋtsɛ lɛ mli, shi moŋ hiɛnɔkamɔ hu.

[Shishigbɛ niŋmai]

[Akrabatsa ni yɔɔ baafa 8]

WIEMƆI LƐ ASHISHITSƆƆMƆ

Yɛ nɛkɛ sane nɛɛ mli lɛ, wiemɔi “hɛl” kɛ “hɛl Ia” taakɛ Nyɔŋmɔ jamɔ he nilelɔi kɛtsuɔ nii yɛ Kristendom lɛ kɔɔ Hela wiemɔ ge‘en-na, ni jeɔ kpo shii 12 yɛ “Kpaŋmɔ Hee“ lɛ mli lɛ he. (Mateo 5:​22, 29, 30; 10:​28; 18:9; 23:​15, 33; Marko 9:​43, 45, 47; Luka 12:5; Yakobo 3:⁠6) Eyɛ mli akɛ Biblia shishitsɔɔmɔi pii tsɔɔ nɛkɛ Hela wiemɔ nɛɛ shishi”hɛl” moŋ, shi shishitsɔɔmɔi krokomɛi ŋmaa taakɛ egbɛɔ lɛ, akɛ “Gehena.” Ekɛ “gbele ni ji enyɔ lɛ, la kpaakpo lɛ,” ni ji naanɔ hiɛkpatamɔ he mfoniri-feemɔ ni anaa yɛ Biblia lɛ naagbee wolo lɛ mli lɛ kpaa gbee.​—Kpojiemɔ 20:⁠14.

Yɛ wiemɔi krokomɛi enyɔ ni bei komɛi lɛ atsɔɔ shishi “hɛl” lɛ hu agbɛfaŋ lɛ, A Dictionary of the Bible (1914), ni William Smith kwɛ mli lɛ wie akɛ: “Hɛl . . . ji wiemɔ ni wɔ wiemɔi ashishitsɔɔlɔi lɛ kɛfɔɔ nitsumɔ kɛtsɔɔ Hebri wiemɔ Sheol shishi, ni eyɛ dɔlɛ waa. Kulɛ ebaahi moŋ akɛ aaaha Hebri wiemɔ Sheol lɛ ahi shi nakai nɔŋŋ aloo kɛ jeee nakai lɛ, atsɔɔ shishi be fɛɛ be akɛ ‘gbonyo bu’ aloo ‘bu.’ . . . . Yɛ Kpaŋmɔ Hee lɛ mli lɛ, bei komɛi lɛ, wiemɔ Hades tsɔɔ ‘gbonyo bu’ kɛkɛ, taakɛ Sheol hu ji lɛ nɔŋŋ . . . Nɛkɛ shishinumɔ nɛɛ naa hemɔkɛyeli jajemɔi lɛ wieɔ wɔ-Nuŋtsɔ lɛ he yɛ akɛ, ‘Ekpeleke shi kɛtee hɛl’ lɛ, ni tsɔɔ shihilɛ ni gbohii fɛɛ yɔɔ mli lɛ.”

Nɔ ni tamɔɔɔ Gehena, ni feɔ naagbee hiɛkpatamɔ he mfoniri lɛ, Sheol kɛ Hades miiwie gbele, yɛ adesai akwamaŋ gbonyo bu mli lɛ he, kɛ gbɛkpamɔ akɛ abaatee mɔ lɛ shi kɛba wala mli ekoŋŋ.​—Kpojiemɔ 20:⁠13.

[Mfoniri ni yɔɔ baafa 9]

Yesu tsĩɛ Lazaro hiɛ kɛjɛ wɔ ni ji gbele mli