Saji ni Mɛi ni Kaneɔ lɛ Biɔ

Nɛgbɛ Abaawu Harmagedon Ta Lɛ Yɛ?

Awuŋ Harmagedon ta lɛ yɛ shikpɔŋ lɛ nɔ he ko pɔtɛɛ. Yɛ no najiaŋ lɛ, ebaaya nɔ yɛ shikpɔŋ muu lɛ fɛɛ nɔ. Mɛni hewɔ? Ejaakɛ fãi enyɔ ni kɛ amɛhe baawu ta lɛ ayi fa babaoo aahu akɛ amɛhoŋ he kome yɛ shikpɔŋ lɛ nɔ.

Atsɛ́ɔ Harmagedon hu akɛ “Nyɔŋmɔ Ofe lɛ gbi wulu lɛ nɔ ta.” Yehowa Nyɔŋmɔ baaha e-Bi Kristo Yesu abua ŋwɛibɔfoi atai lɛ anaa koni amɛwu amɛshi shikpɔŋ lɛ nɔ nɔyelɔi fɔji lɛ fɛɛ.—Kpojiemɔ 16:14; 19:11-16.

Satan baalaka jeŋmaji lɛ yɛ gbɛ ko nɔ koni amɛbafata etai lɛ ahe kɛwu ta lɛ. Biblia lɛ wieɔ “daimonioi amumɔi” ahe akɛ amɛyaa “maŋtsɛmɛi [nɔyelɔi] ni yɔɔ jeŋ muu lɛ fɛɛ lɛ aŋɔɔ, koni amɛyabua amɛnaa kɛya . . . he ko ni atsɛɔ jɛi yɛ Hebri wiemɔ mli akɛ Harmagedon lɛ.”—Kpojiemɔ 16:14-16.

Kpojiemɔ wolo lɛ pɛ ji Biblia mli wolo ni eha Biblia kanelɔi babaoo esusu nɔ ni enɛ tsɔɔ lɛ he waa diɛŋtsɛ. Mɛi babaoo ni susuɔ akɛ esa akɛ anu saji nɛɛ ashishi yɛ bɔ ni aŋma lɛ lɛ naa pɛpɛɛpɛ lɛ etsɔɔ he pɔtɛɛ ni amɛheɔ amɛyeɔ akɛ ta lɛ baaje shishi yɛ, ni asaŋ amɛkɛ tsuiyeli miikpa nibii ní yaa nɔ yɛ nakai kpokpaa lɛ nɔ lɛ ashi. Abaanyɛ ana susumɔ ni ahiɛ akɛ Harmagedon baaba yɛ he ko pɔtɛɛ lɛ yɛ Helabii awolo ko ni etsɛ fe fɛɛ ni wieɔ Kpojiemɔ wolo lɛ he ni Oecumenius ŋma yɛ afi 500 Ŋ.B. afii lɛ amli lɛ mli.

Beni John F. Walvoord ni ji Dallas Osɔfoi a-Nikasemɔhe lɛ tsutsu sɛinɔtalɔ lɛ wieɔ susumɔ ko ní ehé shi waa ni osɔfoi ni Feɔ Keketee yɛ Jamɔŋ Saji Ahe lɛ hiɛ lɛ he lɛ, ewie akɛ Harmagedon ji “naagbee ta ni hiɛnɔkamɔ bɛ mli ni abaawuu yɛ jeŋ ni haomɔ eyi mli obɔ nɛɛ mli yɛ Middle East.” Walvoord tsɔɔ mli akɛ he ni wɔsɛɛ ta kpeteŋkpele nɛɛ baaya nɔ yɛ ji “‘Megido Gɔŋ lɛ nɔ,’ ni ji gɔŋ bibioo ko ni yɔɔ Palestina kooyigbɛ yɛ jɔɔ wulu lɛ naagbee gbɛ.”

Shi kɛlɛ, Kpojiemɔ wolo lɛ etsɔɔɔ akɛ Harmagedon baaba yɛ he ko diɛŋtsɛ. Eshishijee wiemɔi lɛ tsɔɔ akɛ ákɛ amaniɛbɔɔ lɛ ha yɛ “okadii” amli. (Kpojiemɔ 1:1, NW) Yehowa Odasefoi ejɛ jeeŋmɔ beebe amɛtsɔɔ yɛ amɛwolo ni ji Studies in the Scriptures, Kpo IV lɛ mli akɛ: “Esaaa akɛ wɔkpaa gbɛ akɛ gbɔmɛi baabua amɛhe naa diɛŋtsɛ kɛya Megido Gɔŋ lɛ nɔ.”

Blema Megido tsɔɔ shihilɛ ko ni Nyɔŋmɔ henyɛlɔi lɛ nyɛŋ ajo naa foi. No hewɔ lɛ, yɛ Harmagedon lɛ, Nyɔŋmɔ baajie juu-kɛfɔ̃ kɛ efɔŋfeemɔ fɛɛ kɛya, ekɔɔɔ he eko he ni nifeemɔ nɛɛ yaa nɔ yɛ, yɛ je lɛŋ.—Kpojiemɔ 21:8.

Esaaa akɛ mɛi ni sumɔɔ Yehowa Nyɔŋmɔ kɛ e-Bi Yesu Kristo lɛ sheɔ Harmagedon gbeyei. Nyɔŋmɔ baawu ta nɛɛ ashi adesai ní ekojoɔ amɛ akɛ amɛji efɔŋfeelɔi ni yitseiaŋ wala lɛ. Eta ni ekɛbaaba lɛ kpataŋ mɛi fɛɛ ahiɛ. Biblia lɛ kɛɔ akɛ: “Nuŋtsɔ [Yehowa] le bɔ ni efeɔ ejieɔ jalɔi.” (2 Petro 2:9) Shiwoo ko ni haa mɔ tsui nyɔɔ emli ni yɔɔ Lala 37:34 lɛ kɛɔ akɛ: “Kwɛmɔ Yehowa gbɛ ni onyiɛ egbɛ lɛ nɔ, ni eeewó onɔ, koni shikpɔŋ lɛ atsɔ onɔ̃; beni aaafolɔ mɛi fɔji lɛ, ooona.”