Sanebimɔi ni Jɛ Kanelɔi Adɛŋ

Mɛni ji “Nyɔŋmɔ Ofe lɛ gbi wulu lɛ nɔ ta” yɛ Harmagedon lɛ, ni mɛni baajɛ mli kɛba?​—Kpojiemɔ 16:14, 16.

Yɛ kukufoo mli lɛ, Harmagedon ta lɛ ji jeŋ muu fɛɛ ta ni Yesu Kristo, ni ji Maŋtsɛ ni Yehowa ehala lɛ lɛ baawu yɛ wɔsɛɛ be mli kɛkpata Nyɔŋmɔ henyɛlɔi ahiɛ. Biblia lɛ tsɔɔ mli akɛ “daimonioi amumɔi” baabua henyɛlɔi nɛɛ, ni ji “maŋtsɛmɛi ni yɔɔ jeŋ muu lɛ fɛɛ lɛ” anaa ‘kɛya Nyɔŋmɔ Ofe lɛ gbi wulu lɛ nɔ ta lɛ yɛ he ko ni atsɛɔ jɛi yɛ Hebri wiemɔ mli akɛ Harmagedon lɛ.’—Kpojiemɔ 16:14, 16.

Mɛi ni baawu ta lɛ buaŋ amɛhe naa yɛ he ko pɔtɛɛ. Harmagedon shishi ji “Megido Gɔŋ.” (Kpojiemɔ 16:16) Gɔŋ ko bɛ shikpɔŋ nɛɛ nɔ ni atsɛ́ lɛ nakai pɛŋ. Kɛfata he lɛ, “shikpɔŋ lɛ nɔ maŋtsɛmɛi lɛ kɛ amɛtai” lɛ nyɛŋ abua amɛhe naa diɛŋtsɛ yɛ hekome. (Kpojiemɔ 19:19) Yɛ no najiaŋ lɛ, “he ko” ni abuaa je lɛŋ maŋkwramɔŋ hiɛnyiɛlɔi lɛ kɛ amɛsɛɛfĩlɔi lɛ anaa kɛyaa lɛ tsɔɔ shidaamɔ ni amɛkɔɔ—ni ji shi ni amɛteɔ amɛwoɔ Yehowa kɛ “tai ní yɔɔ ŋwɛi” ní yɔɔ “maŋtsɛmɛi amaŋtsɛ kɛ nuŋtsɔmɛi anuŋtsɔ” ni ji Yesu Kristo famɔ shishi lɛ.—Kpojiemɔ 19:14, 16.

Nɔ ni sa kadimɔ ji akɛ, wiemɔ “Harmagedon” lɛ kɛ blema Israel maŋtiase ni ji Megido lɛ yɛ tsakpãa. Akɛni aje gbɛ ato Megido maŋtiase lɛ jogbaŋŋ yɛ Karmel Gɔŋ lɛ bokagbɛ hewɔ lɛ, gbɛjegbɛi titri ni jarayelɔi kɛ asraafoi tsɔɔ nɔ yɛ nakai beaŋ lɛ fɛɛ kamɔ jɛmɛ. Megido batsɔ he ko hu ni awuɔ tai yɛ ní afã kome yeɔ afã kroko nɔ kunim butuu. Ákɛ nɔkwɛmɔnɔ lɛ, Israel Kojolɔ Barak ye Kanaanbii lɛ atai ni he wa ní Tatsɛnukpa Sisera nyiɛ amɛhiɛ lɛ anɔ kunim “yɛ Megido nui lɛ anaa.” (Kojolɔi 4:12-24; 5:19, 20) Jɛmɛ niiaŋ nɔŋŋ Kojolɔ Gideon ye Midianbii lɛ anɔ kunim butuu yɛ. (Kojolɔi 7:1-22) Biblia lɛ kɛ Megido to Nyɔŋmɔ ta ni baa lɛ he bɔni afee ni wɔná nɔmimaa akɛ Nyɔŋmɔ baatsɔ e-Bi lɛ nɔ ekpata mɛi fɛɛ ni teɔ shi amɛwoɔ Lɛ lɛ ahiɛ butuu.

Mɛni baajɛ mli kɛba? Harmagedon ta lɛ baajie ju-kɛ-fɔ̃ kɛ efɔŋfeemɔi fɛɛ kɛjɛ shikpɔŋ lɛ nɔ. Ebaagbele gbɛ kɛha be ni yɔɔ nyam fe fɛɛ yɛ adesai ayinɔsane mli. (Kpojiemɔ 21:1-4) Nyɔŋmɔ baajɛ suɔmɔ mli etsɔ e-Maŋtsɛyeli lɛ nɔ etsake shikpɔŋ lɛ efee lɛ paradeiso, ni jalɔi baahi nɔ kɛya naanɔ.—Lala 37:29.