Harmagedon—Nɔ Ni Baatsɔ Paradeiso Mlibotemɔ Hiɛ!
ISRAEL. Afɔɔ nakai gbɛi lɛ tatsii yɛ Nyɔŋmɔjamɔ hei kɛ aawie Nyɔŋmɔ ta kpeteŋkpele lɛ he lɛ. Belɛ ŋwanejee ko bɛ he akɛ no hewɔ ni gbɔmɛi pii tsuuɔ amɛhiŋmɛi amɛshwieɔ Boka Teŋgbɛ nɔ lɛ. Shi kɛlɛ, bɔfo Paulo ni ji Hebri fɔmɔ bi lɛ ŋma akɛ: “Jeee mɛi ni jɛ Israel mli lɛ fɛɛ ji Israel. . . . No ji akɛ, jeee heloo naa bii [heloo naa Yudafoi] lɛ ji Nyɔŋmɔ bii.” Yuda maŋ lɛ laaje hegbɛ ni amɛkɛaafee Nyɔŋmɔ “Israel” lɛ kɛtsɔ kpoomɔ ni amɛkpoo Yesu Kristo akɛ Mesia lɛ nɔ. (Romabii 9:6-8; Mateo 21:43) Yɛ enɛ hewɔ lɛ Hebri gbalɔ Mose etsɔ hiɛ ebɔ kɔkɔ akɛ oshara ko ni yɔɔ gbeyei baajɛ mli aba kɛ́ heloo naa Israel bii lɛ tee nɔ yɛ Yehowa Nyɔŋmɔ nɔ toi ni amɛgboɔ lɛ mli.—5 Mose 28:58-68.
Belɛ namɛi feɔ “Israel” ni Paulo wieɔ amɛ, he lɛ? Lɛ diɛŋtsɛ etsɔɔ mli akɛ: “Mɔ ni ji Yudanyo yɛ mligbɛ lɛ ji Yudanyo, ni eketiafoo lɛ ji tsui mli nɔ kɛtsɔ mumɔ lɛ nɔ.” (Romabii 2:28, 29, NW) Harmagedon gbalɛi lɛ kɔɔ shikpɔŋ ko ni yɔɔ Boka Teŋgbɛ lɛ he, shi titri lɛ shihilɛ ko ni jeŋ muu lɛ fɛɛ baa mli lɛ he.
Gbɛ Ni Yaa Harmagedon Lɛ
Jeŋ tai, shikpɔŋ hosomɔi, hɔmɔ, mlakwamɔ ni baafá—Yesu tsɔɔ akɛ shihilɛ nɛɛ baafee “ba ni eba” ni anaaa lɛ lɛ, kɛ “nibii agbɛjianɔtoo nɛɛ naagbee” lɛ he “okadi.” Taakɛ aye he odase shii abɔ yɛ Ŋmalɛ naa yɛ wolo nɛɛ mli lɛ, kɛjɛ 1914 ni ji afi ko ni kɛ gbɛjianɔtoo ko baa naagbee lɛ nɔ kɛbaa nɛɛ nibii agbɛjianɔtoo nɛɛ naagbee lɛ mli wɔyɔɔ nɛɛ. Odaseyeli ni fata he ji Yesu wiemɔi nɛɛ ni eba mli yɛ ŋmɛnɛŋmɛnɛ be nɛɛ mli lɛ: “Ni aaashiɛ maŋtsɛyeli lɛ he sane kpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.” (Mateo 24:3-14) Mɛi ni ji “Nyɔŋmɔ Israel” lɛ mlibii diɛŋtsɛ lɛ enyiɛ nɛkɛ shiɛmɔ nitsumɔ nɛɛ hiɛ yɛ shikpɔji 205 nɔ. Belɛ “naagbee lɛ” ebɛŋkɛ kpaakpa.
Shi “naagbee lɛ” baa yɛ mɛɛ gbɛ nɔ? Abaanyɛ alo mfoniri ko ni yeɔ emuu bɔ ni sa kɛjɛ yinɔsane mli kpaai ni egbɛ eshwa Biblia lɛ mli fɛɛ lɛ amli.
Akɛ nɔkwɛmɔ nɔ lɛ: Taakɛ Daniel gba lɛ, komunist “kooyigbɛ maŋtsɛ” lɛ kɛ ebienyɛ ni jeee komunistnyo “wuoyigbɛ maŋtsɛ” lɛ kɛ amɛhe ewo jeŋ nɔyeli he mpleshii mli bianɛ. Mɛni nyiɛ sɛɛ? Daniel tsɔ hiɛ ena akɛ kɔmunist “kooyigbɛ maŋtsɛ” lɛ kɛ hewalɛ baashɔ̃ heloo gbɛfaŋ nibii babaoo ni akɛ “shika,” “jwiɛtɛi” kɛ “fɛo nibii” fee he mfoniri lɛ.—Daniel 11:40-43.a
Shi kɛlɛ, jeŋ nɔyelɔi lɛ kɛ amɛhe baakpa gbee ko kɛ̃. Amɛbaabolɔ akɛ: “Hejɔlɛ yɛ ni wɔyɛ shweshweeshwe!” (1 Tesalonikabii 5:1-3) Shi abaafite omanyeyeli henumɔ ni ána nɛɛ oya. Maŋkwramɔŋ hiɛnyiɛlɔi ni bɔ ni jamɔ kɛ ehe woɔ amɛsaji amli haa lɛ eje amɛ tsine lɛ, baafee ekome ni amɛkpata ehiɛ—oya, shikome nyɔŋlo. Shi Yehowa Nyɔŋmɔ diɛŋtsɛ ji mɔ ni baakwɛ ni akpata Satan gbɛjianɔtoo lɛ fa ni ahiɔ waa ni ji apasa jamɔ lɛ hiɛ.—Kpojiemɔ 17:1-18.
Shi “Israel” diɛŋtsɛ lɛ yi baaná wala, shi jeee kɛtsɔ shamɔ ni aaasha lɛ kɛjɛ shikpɔŋ nɔ trukaa taakɛ ŋmɛnɛŋmɛnɛ beaŋ shiɛlɔi komɛi kɛɔ lɛ nɔ. Gbalɔ Ezekiel tsɔɔ nɔ ni baaba, klɛŋklɛŋ lɛ ewie nɔ ni Satan (ni atsɛɔ lɛ yɛ biɛ akɛ Gog lɛ) kɛɛ, akɛ: “Mayatua mɛi ni yɔɔ kpoo [Yehowa webii], ni amɛhiɔ shi shweshweeshwe lɛ.” Akɛni nyɛ̃ɛ ni eyɔɔ kɛha Yehowa “yoo” lɛ eye enɔ hewɔ lɛ, Satan baatutua anɔkwale Kristofoi lɛ. (Ezekiel 38:2, 11, 12) No hewɔ lɛ nɔ ni akɛbaatsɔɔ mɔ ni fe enyɛmi, ni agba he sane afɔ shi afii ohai abɔ lɛ baashɛ enaagbee kwraa.
Yɛ Gog tutuamɔ nɛɛ nɔheremɔ mli lɛ, Yehowa baafee nii ni ekɛfa E-webii lɛ ahe. Abaabaa amɛyi ni akɛtse Yehowa gbɛi krɔŋkrɔŋ lɛ he. Ni enɛ baaba ejaakɛ Yehowa diɛŋtsɛ kɛ Harmagedon eba—Ezekiel 38:18-23.
‘Kɛmiiya He Ko Ni Atsɛɔ Lɛ Harmagedom’
Agba afɔ shi yɛ Biblia mli wolo ni ji Kpojiemɔ lɛ akɛ “mumɔi fɔji awiemɔi ni he tseee” yaa “maŋtsɛmɛi ni yɔɔ jeŋ muu lɛ fɛɛ lɛ aŋɔɔ koni amɛyabua amɛnaa kɛya Nyɔŋmɔ Ofe lɛ gbi wulu lɛ nɔ ta lɛ.” Akɛni Satan amale kɛ shishiumɔ wiemɔ nɛɛ tsirɛɔ amɛ hewɔ lɛ, abaabua “‘maŋtsɛmɛi” lɛ anaa yɛ he kome “kɛya he ko ni atsɛɔ lɛ yɛ Hebri wiemɔ mli akɛ Harmagedon [“Megido Gɔŋ”].—Kpojiemɔ 16:13-16.
Gɔŋ ko ni hiɛ nakai gbɛi diɛŋtsɛ bɛ. Eji anɔkwale moŋ akɛ awuu tai babaoo yɛ maŋ ko ni ji Megido lɛ masɛi. Shi gɔŋ ko ni tamɔ nakai ehiko jɛmɛ ni eko bɛ jɛi hu—ja afabaŋ ko ni akɛ sũ efo. Agbɛnɛ anyɛŋ abaa je lɛ asraafoi fɛɛ anaa awo Esdraelon Ŋa lɛ nɔ yɛ Megido shishi gbɛ, taakɛ mɛi komɛi susuɔ lɛ. Eyɛ mli akɛ aná wiemɔ Harmagedon lɛ kɛjɛ Megido moŋ, shi nɔ ni etsɔɔ diɛŋtsɛ lɛ yɛ wiemɔ lɛ shishinumɔ mli, ni ji akɛ, “asraafoi anaabuamɔ gɔŋ.” Enɛɛmɛi fɛɛ tsɔɔ akɛ Harmagedon jeee he ko pɔtɛɛ shi moŋ shihilɛ ko: je lɛ ni buaa ehe naa koni ete shi ewo Yehowa kɛ ewebii lɛ.
Biɛ ji heni Yehowa diɛŋtsɛ kɛ ehe woɔ ta lɛ mli yɛ. Abaakpata maŋkwramɔŋ gbɛjianɔtooi lɛ ahiɛ “hiɛkalɔi,” aloo yɛ be mli ni amɛkã amɛnitsumɔ he lɛ. (Kpojiemɔ 19:20) Tsuifaa kɛ ŋmiŋmi baafɛ yɛ be mli ni nɔyeli hewalɛ fiteɔ lɛ! Ni gbeyei baamɔmɔ shikpɔŋ lɛ nɔ bii bɔ ni anyɛŋ atsɔɔ mli yɛ be mli ni Yehowa fɔseɔ etawuu nii ni fe adesa nɔ̃ lɛ eshwieɔ shi lɛ. (Ezekiel 38:18-23; Zakaria 14:12, 13) “Ni mɛi ni Yehowa aaagbe amɛ yɛ nakai gbi Iɛ nɔ lɛ aaakamɔ shi kɛaajɛ shikpɔŋ lɛ naagbee he kome kɛaatee shikpɔŋ lɛ naagbee he kroko lɛ.”—Yeremia 25:33.
Yesu Kristo, ni ji Nyɔŋmɔ “yoo” loo ŋwɛi gbɛjianɔtoo lɛ “seshi” diɛŋtsɛ lɛ baanyiɛ ŋwɛibɔfoi ni ji jalɔi ata lɛ hiɛ kɛya kunimyeli mli. Abaaye Satan nɔ kunim ni ashɛ lɛ afɔ “bu kwɔŋkwɔŋ” ni enyɛŋ nɔ ko efee yɛ mli lɛ mli afii akpe. (Kpojiemɔ 20:1-3) Ni Yehowa webii baaná ŋwɛi yibaamɔ kɛ hebuu kɛtsɔ Nyɔŋmɔ ta kpeteŋkpele lɛ mli—Mateo 24:21, 22, 37-39.
No Sɛɛ Lɛ—Toiŋjɔlɛ Paradeiso!
Ŋwanejee ko bɛ he akɛ nɔ ni abaana yɛ Harmagedon sɛɛ nɔŋŋ ji shibɔlemɔ ŋulami ni akpata ehiɛ fɛɛ. Nitsumɔ ni ji shikpɔŋ lɛ ni aaaku sɛɛ akɛba Paradeiso shihilɛ mli ekoŋŋ lɛ baatamɔ nɔ ko ni wa naakpa Shi abaatsu enɛ yɛ Nyɔŋmɔ ŋwɛi nɔyeli lɛ gbɛtsɔɔmɔ shishi. Yɛ be ni sa mli lɛ, shikpɔŋ lɛ fɛɛ nɔ baafee fɛo tamɔ adesa klɛŋklɛŋ shĩa lɛ, Eden abɔɔ lɛ, ni adesai ni ji jalɔi “amii baashɛ amɛhe yɛ hejɔlɛ babaoo” ni baakpele wɔ jeŋ kutruku nɛɛ nɔ lɛ mli.—Lala 37:11.
Yɛ be ni sa mli lɛ shikpɔŋ lɛ baatsɔ Paradeiso ni adesai baaná mumɔŋ kɛ heloo gbɛfaŋ jɔɔmɔi babaoo mli ŋɔɔmɔ. Ejaakɛ ‘Nyɔŋmɔ baashi ebuu yɛ gbɔmɛi ateŋ! Ni yɛ be mli ni gbɔmɛi nyiɛɔ ŋwɛi nɔyeli lɛ gbɛtsɔɔmɔ sɛɛ lɛ, “Nyɔŋmɔ baatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ.” (Kpojiemɔ 21:1-4) Emuuyeli shihilɛ ko ni yɔɔ nyam baaye hela, ŋkɔmɔyeli kɛ gbele po najiaŋ.
He Ko Ni Yɔɔ Shweshweeshwe?
No hewɔ lɛ, esa akɛ Harmagedon mli ni oooje, ni oyabote nakai toiŋjɔlɛ Paradeiso lɛ mli lɛ afee nɔ ni he hiaa bo fe fɛɛ. Anyɛŋ ana he ko ni yɔɔ shweshweeshwe yɛ jamɔi sɔrɔtoi ni mli egbala lɛ kɛ Kristendom teŋ. Amɛhiii shi yɛ Yesu wiemɔ ákɛ esɛɛnyiɛlɔi lɛ “jɛɛɛ je lɛ mli” lɛ naa. (Yohane 17:16) Ni asaŋ amɛshiɛɛɛ “maŋtsɛyeli lɛ he sanekpakpa lɛ” hu. (Mateo 24:14) Jamɔi ni akɛɛ atsɛɔ amɛ Kristofoi lɛ amli egbala amɛfee jamɔi kui sɔrɔtoi ohai abɔ ni amɛjieee suɔmɔ ni Yesu kɛɛ ebaakadi enɔkwa sɛɛnyiɛlɔi lɛ kpo amɛtsɔɔɔ.—Yohane 13:35.
Belɛ nɛgbɛ he ni yɔɔ shweshweeshwe lɛ yɔɔ? Eyɛ anɔkwale “Nyɔŋmɔ Israel” lɛ ŋɔɔ. (Galatabii 6:16) Nɛkɛ Kristofoi ni afɔ amɛ mu nɛɛ egbɛko amɛshwako Kristendom jamɔi sɔrɔtoi lɛ amli, shi moŋ amɛji gbɛjianɔtoo kome ko fã. Ni mɛi ni kɛ amɛhe ebɔ Yesu sɛɛnyiɛlɔi ni afɔ amɛ mu nɛɛ ahe hu ji mɛi ni fe 2,000,000 ni amɛhiɛnɔkamɔ ji akɛ amɛbaaje “amanehulu kpeteŋkpele” lɛ mli. (Kpojiemɔ 7:9, 14, NW) Nɛkɛ Nyɔŋmɔ yijielɔi ni ato amɛ gbɛjianɔ nɛɛ ‘tsɛɔ Yehowa gbɛi lɛ, ni amɛmiikpa gbɛ akɛ ‘amɛbaaje mli shweshweeshwe.’ (Yoel 3:5) Hɛɛ, jeee akɛ mɛi ni ji anɔkwale “Israel” lɛ tsɛɔ gbɛi krɔŋkrɔŋ lɛ pɛ kɛkɛ, shi moŋ akɛ gbɛi Yehowa Odasefoi ewo amɛ. Amɛkɛ miishɛɛ baaye amɛbua bo ni okase yibaamɔ kɛtsɔ Nyɔŋmɔ ta kpeteŋkpele lɛ mli kɛ naanɔ wala he hiɛnɔkamɔ yɛ toiŋjɔlɛ Paradeiso lɛ mli lɛ he nii babaoo.
[Shishigbɛ niŋmai]
[Mfonirii ni yɔɔ baafa 5]
“Hejɔlɛ kɛ shweshweeshwe!” bolɔmɔ lɛ baatsɔ tutuamɔ kpele ni baaba jamɔi fɛɛ nɔ lɛ hiɛ!
[Mfoniri ni yɔɔ baafa 7]
Harmagedon jeee nɛkɛ he nɛɛ ni yɔɔ Megido lɛ, shi moŋ eji okadi jeŋ shihilɛ ko