‘Abaafo Gbele Sɛɛ Kwraa’
“Naagbee henyɛlɔ ni abaafo esɛɛ ji gbele.” —1 KORINTOBII 15:26.
1, 2. (a) Mɛɛ hiɛnɔkamɔ bɔfo Paulo wie akɛ mɛi ni egboi lɛ yɔɔ? (b) Mɛɛ sanebimɔ ni kɔɔ gbohiiashitee lɛ he Paulo ha hetoo?
“MIHEƆ . . . gbɔmɔtso lɛ gbohiiashitee lɛ, kɛ naanɔ wala miyeɔ.” Nakai ji bɔ ni Bɔfoi lɛ Ahemɔkɛyeli Jajemɔ lɛ kɛɔ. Katolikbii kɛ Protestantbii fɛɛ nuɔ he akɛ eji sɔ̃ ni kã amɛnɔ akɛ amɛkɛɛ daa, shi amɛyooo akɛ amɛhemɔkɛyelii lɛ tamɔ Hela jeŋ nilee lɛ pɛpɛɛpɛ fe nɔ fɛɛ nɔ ni bɔfoi lɛ he amɛye. Shi, bɔfo Paulo kpoo Hela jeŋ nilee, ni eheee susuma ni gbooo tsɔɔmɔ lɛ eyeee. Ni kɛlɛ, ená hemɔkɛyeli ni mli wa akɛ wɔsɛɛ be shihilɛ ko yɛ, ni eŋma yɛ mumɔ naa akɛ: “Naagbee henyɛlɔ ni abaafo esɛɛ ji gbele.” (1 Korintobii 15:26) Mɛni no tsɔɔ kɛha adesai ni gboiɔ lɛ?
2 Kɛ́ wɔɔha hetoo lɛ, no lɛ hã wɔku wɔsɛɛ kɛya Paulo sanegbaa ni kɔɔ gbohiiashitee lɛ he, ni aŋma yɛ 1 Korintobii yitso 15 lɛ nɔ ekoŋŋ. Obaakai akɛ yɛ shishijee kukuji lɛ amli lɛ, Paulo kɛ gbohiiashitee lɛ ma shi shiŋŋ akɛ Kristofoi atsɔɔmɔ lɛ fã ni he hiaa waa. Agbɛnɛ, eha sanebimɔ pɔtɛɛ ko hetoo akɛ: “Shi ekolɛ mɔ ko aaabi akɛ: Te gbohii aaafee tɛŋŋ ate shiŋ? ni asaŋ mɛɛ gbɔmɔtso amɛkɛaaba?”—1 Korintobii 15:35.
Mɛɛ Gbɔmɔtso?
3. Mɛni hewɔ mɛi komɛi kpoo gbohiiashitee lɛ?
3 Yɛ sane ni ebi nɛɛ naa lɛ, benɛ ekolɛ Paulo eto eyiŋ akɛ ekɛbaaku hewalɛ ni Plato jeŋ nilee lɛ ená lɛ naa. Plato tsɔɔ akɛ gbɔmɔ yɛ susuma ni gbooo ni hiɔ shi yɛ gbɔmɔtso lɛ gbele sɛɛ. Ŋwanejee ko bɛ he akɛ, Kristofoi atsɔɔmɔ lɛ bafee tamɔ nɔ ko ni he ehiaaa, kɛha mɛi ni akɛ nɛkɛ susumɔ nɛɛ etsɔse amɛ lɛ. Kɛji susuma lɛ hiɔ shi yɛ gbele sɛɛ lɛ, mɛɛ hiamɔ yɔɔ gbohiiashitee he mɔ? Kɛfata he lɛ, ekolɛ gbohiiashitee lɛ fee tamɔ susumɔ ni jwɛŋmɔ bɛ mli. Ní gbɔmɔtso lɛ ekpɔtɔ ni etsɔ sũ lɛ, te ebaafee tɛŋŋ ni ete shi hu? Biblia mli saji ahe wielɔ Heinrich Meyer kɛɔ akɛ eeenyɛ efee akɛ Korintobii lɛ ekomɛi ashitee-kɛ-woo wiemɔ lɛ damɔ “jeŋ nilee mli shishinumɔ ni amɛhiɛ akɛ anyɛŋ akɛ gbɔmɔtso lɛ heloo lɛ diɛŋtsɛ aba wala mli ekoŋŋ lɛ nɔ.”
4, 5. (a) Mɛni hewɔ jwɛŋmɔ bɛ mɛi ni bɛ hemɔkɛyeli lɛ ashitee-kɛ-woo wiemɔi lɛ amli lɛ? (b) Tsɔɔmɔ Paulo nɔkwɛmɔnɔ ni kɔɔ “dumɔwu kuli” lɛ he lɛ mli. (d) Mɛɛ gbɔmɔtsei Nyɔŋmɔ kɛhaa mɛi ni afɔ amɛ mu ni ateeɔ amɛ shi lɛ?
4 Paulo kpa bɔ ni amɛsusumɔ lɛ ji susumɔ folo lɛ he mama akɛ: “Kwashia! Nɔ ni bo diɛŋtsɛ odũɔ lɛ, ja egbo fɛɛ dã ni eyi náa wala, ni asaŋ nɔ ni odũɔ lɛ, jeee tso ni baaba lɛ odũɔ lɛ, shi moŋ dumɔwu kuli ko kɛkɛ, kɛ́ ŋmãa ni jio, nii ni eshwɛ lɛ eko ni jio; shi Nyɔŋmɔ haa lɛ tso bɔ ni esumɔɔ, ni wú fɛɛ wú lɛ, ehaa lɛ lɛ diɛŋtsɛ etso.” (1 Korintobii 15:36-38) Nyɔŋmɔ eteeŋ gbɔmɔtsei ni gbɔmɛi yɔɔ beni amɛhi shikpɔŋ nɔ lɛ nɔŋŋ shi. Shi moŋ, tsakemɔ baaba.
5 Paulo kɛ gbohiiashitee lɛ to bɔ ni adũɔ dumɔwu ni ekwɛ̃ɔ lɛ he. Anaaa tso ni baakwɛ̃ kɛjɛ mli lɛ he okadi ko kwraa yɛ ŋmãa kuli bibioo ni abaadũ lɛ mli. The World Book Encyclopedia lɛ kɛɔ akɛ: “Kɛ́ wú ní adũ lɛ bɔi kwɛ̃ɛ lɛ, egbalaa nu babaoo ewoɔ emli. Nu lɛ haa tsofa-futumɔ mli tsakemɔi babaoo baa yɛ dumɔwu lɛ mli. Ehaa dumɔwu lɛ mli agũgũ lɛ fũɔ ni ejwaa wú lɛ hehaanɔ lɛ ni ejeɔ mli.” Enɛ tsɔɔ akɛ, dumɔwu lɛ gboɔ ákɛ wú ni adu, ni etsɔɔ tso ni jɛɔ mli lɛ. “Nyɔŋmɔ haa lɛ tso” kɛ shishinumɔ akɛ eto jeŋ nilee mli mlai ni kudɔɔ etsakemɔ lɛ ashishi momo, ni wú fɛɛ wú náa tso yɛ lɛ diɛŋtsɛ ehenɔ. (1 Mose 1:11) Nakai nɔŋŋ hu klɛŋklɛŋ lɛ, Kristofoi ni afɔ amɛ mu lɛ gboiɔ akɛ adesai. No sɛɛ lɛ, Nyɔŋmɔ kuɔ sɛɛ ekɛ amɛ baa wala mli ekoŋŋ yɛ gbɔmɔtsei heei kwraa mli, yɛ lɛ diɛŋtsɛ ebe ni eto mli. Taakɛ Paulo kɛɛ Filipibii lɛ, “Yesu Kristo . . . baatsake wɔgbɔmɔtso ni hiɛ bɛ nyam lɛ, koni etamɔ enunyam gbɔmɔtso lɛ su.” (Filipibii 3:20, 21; 2 Korintobii 5:1, 2) Ateeɔ amɛ shi yɛ mumɔŋ gbɔmɔtsei amli ni amɛhiɔ shi yɛ mumɔi ashihilɛhe lɛ.—1 Yohane 3:2.
6. Mɛni hewɔ nilee yɔɔ mli akɛ aaahe aye akɛ Nyɔŋmɔ baanyɛ ekɛ mumɔŋ gbɔmɔtsei ni sa ahã mɛi ni ateeɔ amɛ shi lɛ?
6 Ani enɛ wa tsɔ fe bɔ ni aaanyɛ ahe aye? Dabi. Paulo tsɔɔ mli akɛ abɔ kooloi yɛ sui sɔrɔtoi babaoo mli. Kɛfata he lɛ, ekɛ ŋwɛibɔfoi to adesai ni hiɛ heloo-kɛ-lá lɛ ahe ni etsɔɔ sɔrɔtofeemɔ ni yɔɔ amɛteŋ, ni ekɛɛ: “Ŋwɛi gbɔmɔtsei yɛ, ni shikpɔŋ nɔ gbɔmɔtsei hu yɛ.” Sɔrɔtofeemɔ kpele hu yɛ bɔɔnii ni wala bɛ mli lɛ amli. “Ŋulami kome fe ŋulami kroko anunyam,” taakɛ Paulo kɛɛ jeeŋmɔ kwraa dani jeŋ nilee kpá nɛkɛ ŋulamii nɛɛ ashi akɛ ŋulamii bluu, ŋulamii tsuji agboi, kɛ ŋulamii bibii yɛji lɛ. Yɛ enɛ hewɔ lɛ, ani nilee bɛ mli akɛ Nyɔŋmɔ baanyɛ asaa mumɔŋ gbɔmɔtsei ni sa eto kɛha mɛi ni afɔ amɛ mu ni ateeɔ amɛ shi lɛ?—1 Korintobii 15:39-41.
7. Mɛni ji nɔ ni fiteee lɛ shishinumɔ? kɛ nɔ ni gbooo lɛ shishinumɔ?
7 Kɛkɛ ni Paulo kɛɛ akɛ: “Nakai nɔŋŋ ji gbohiiashitee lɛ hu. Adũɔ lɛ yɛ fitemɔ mli, ateeɔ lɛ shi yɛ nɔ ni fiteee mli.” (1 Korintobii 15:42) Kɛ́ adesa gbɔmɔtso lɛ eye emuu po lɛ, enyɛɔ efiteɔ. Abaanyɛ agbe lɛ. Ákɛ nɔkwɛmɔnɔ lɛ, Paulo wie akɛ Yesu ni atee lɛ shi lɛ, “ekuŋ esɛɛ kɛyaŋ fitemɔ mli dɔŋŋ.” (Bɔfoi lɛ Asaji 13:34) Eyɛ mli akɛ eye emuu moŋ, shi ekuŋ esɛɛ kɛbaŋ wala mli yɛ adesa gbɔmɔtso ni fiteɔ lɛ mli kɔkɔɔkɔ. Gbɔmɔtsei ni Nyɔŋmɔ kɛhaa mɛi ni afɔ amɛ mu ni ateeɔ amɛ shi lɛ fiteee—gbele loo fitemɔ bɛ hewalɛ ko yɛ amɛnɔ. Paulo tee nɔ akɛ: “Adũɔ lɛ yɛ nɔ ni bɛ nyam mli, ateeɔ lɛ shi yɛ anunyam mli; adũɔ lɛ yɛ gbedemɔ mli, ateeɔ lɛ shi yɛ hewalɛ mli; adũɔ susuma gbɔmɔtso, ateeɔ mumɔ gbɔmɔtso shi.” (1 Korintobii 15:43, 44) Kɛfata he lɛ, Paulo kɛɛ akɛ: “[Ja] nɛkɛ gbele nɔ̃ nɛɛ wo nɔ ni gbooo lɛ.” Gbó ni agbooo nɛɛ miitsɔɔ wala ni sɛɛ efooo, nɔ ni anyɛɛɛ akpata hiɛ. (1 Korintobii 15:53; Hebribii 7:16) Nɛkɛ gbɛ nɔ mɛi ni atee amɛ shi lɛ tsɔɔ amɛhiɛɔ “ŋwɛinyo lɛ hu subaŋ,” ni ji Yesu, mɔ ni hã amɛ gbohiiashitee lɛ nyɛ eba mli lɛ.—1 Korintobii 15:45-49.
8. (a) Te wɔfeɔ tɛŋŋ wɔleɔ akɛ mɛi ni atee amɛ shi lɛ ji aŋkroaŋkroi ni amɛji beni amɛyɔɔ shikpɔŋ nɔ lɛ nɔŋŋ? (b) Mɛɛ gbalɛi baaba mli kɛji gbohiiashitee lɛ ba mli?
8 Yɛ tsakemɔ nɛɛ fɛɛ sɛɛ lɛ, mɛi ni atee amɛ shi lɛ kã he amɛji aŋkroaŋkroi ni amɛji dani amɛgboi lɛ nɔŋŋ. Abaatee amɛ shi kɛ kaimɔ ni amɛyɔɔ lɛ kɛ Kristofoi asui kpakpai hu ni amɛyɔɔ lɛ nɔŋŋ pɛpɛɛpɛ. (Maleaki 3:3; Kpojiemɔ 21:10, 18) Amɛtamɔɔ Yesu Kristo yɛ enɛ gbɛfaŋ. Etsake kɛjɛ mumɔ mli kɛbatsɔ gbɔmɔ adesa. Kɛkɛ ni egbo ni atee lɛ shi akɛ mumɔ. Ni kɛlɛ, “Yesu Kristo lɛ, bɔ ni eyɔɔ nyɛ kɛ ŋmɛnɛ lɛ, nakai nɔŋŋ eyɔɔ kɛyaa naanɔ.” (Hebribii 13:8) Kwɛ hegbɛ ni yɔɔ nyam ni mɛi ni afɔ amɛ mu lɛ ená! Paulo kɛɛ: “Shi beni nɛkɛ fitemɔ nɔ̃ nɛɛ ewo nɔ ni fiteee lɛ, ni nɛkɛ gbele nɔ̃ nɛɛ ewo nɔ ni gbooo lɛ, no lɛ wiemɔ ni aŋma lɛ aaaba mli akɛ: ‘Ami gbele yɛ kunim mli.’ ‘Bo gbele, nɛgbɛ ogãi lɛ yɔɔ? bo gbohiiaje, nɛgbɛ okunim lɛ yɔɔ?’ ”—1 Korintobii 15:54, 55; Yesaia 25:8; Hoshea 13:14.
Shikpɔŋ nɔ Gbohiiashitee?
9, 10. (a) Yɛ 1 Korintobii 15:24 lɛ mli wiemɔi lɛ anaa lɛ, mɛni ji “naagbee lɛ,” ni mɛɛ nibii komɛi ni kɔɔ he baaba mli? (b) Mɛni esa akɛ eba mli koni akɛfo gbele sɛɛ kwraa?
9 Ani wɔsɛɛ be ko yɛ kɛha akpekpei abɔ ni bɛ hiɛnɔkamɔ akɛ amɛaaná ŋwɛi shihilɛ ni gbele bɛ mli lɛ? Yɛ anɔkwale mli lɛ, wɔsɛɛ be yɛ kɛha amɛ! Beni etsɔɔ mli akɛ shitee kɛmiiya ŋwɛi lɛ baa mli yɛ be ni Kristo eba lɛ mli lɛ sɛɛ lɛ, Paulo tsɔɔ nibii ni baanyiɛ sɛɛ kɛba, ni ekɛɛ: “No sɛɛ dani naagbee lɛ baaba, beni eeeŋɔ maŋtsɛyeli lɛ eha Nyɔŋmɔ kɛ tsɛ lɛ, ní eeefo nɔyeli fɛɛ kɛ hegbɛ fɛɛ kɛ hewalɛ fɛɛ sɛɛ lɛ.”—1 Korintobii 15:23, 24.
10 “Naagbee lɛ” ji Kristo Afii Akpe Nɔyeli lɛ naagbee, beni Yesu kɛ Maŋtsɛyeli lɛ baaha e-Nyɔŋmɔ kɛ Tsɛ lɛ yɛ heshibaa kɛ anɔkwayeli mli lɛ. (Kpojiemɔ 20:4) No mli lɛ Nyɔŋmɔ yiŋ ni eto akɛ “[eeeŋɔ] nibii fɛɛ eto yitso kome shishi yɛ Kristo mli” lɛ eba mli. (Efesobii 1:9, 10) Shi klɛŋklɛŋ lɛ, no mli lɛ Kristo ekpata “nɔyeli fɛɛ kɛ hegbɛ fɛɛ kɛ hewalɛ fɛɛ” ni teɔ shi woɔ Nyɔŋmɔ suɔmɔnaa nii ni Nɔ Kwɔ Fe Fɛɛ lɛ ahiɛ momo. Enɛ tsɔɔ babaoo fe hiɛkpatamɔ ni akɛbaaba yɛ Harmagedon lɛ. (Kpojiemɔ 16:16; 19:11-21) Paulo kɛɛ: “Shi ja [Kristo] eye maŋtsɛ kɛyashi beyinɔ ni eeeŋɔ henyɛlɔi lɛ fɛɛ eto enajiashi. Naagbee henyɛlɔ ni abaafo esɛɛ ji gbele.” (1 Korintobii 15:25, 26) Hɛɛ, no mli lɛ ajie Adam esha kɛ gbele lɛ he okadii fɛɛ. No mli lɛ, Nyɔŋmɔ ejie mɛi ni yɔɔ “gbohii abui” lɛ amli lɛ fɛɛ kɛjɛ mli ákɛ nifeemɔ ni he miihia, kɛtsɔ gbohii lɛ ni ekɛ amɛ baaku sɛɛ kɛba wala mli ekoŋŋ lɛ nɔ.—Yohane 5:28.
11. (a) Te wɔfeɔ tɛŋŋ wɔleɔ akɛ Nyɔŋmɔ baanyɛ abɔ susumai ni egboi lɛ ekoŋŋ? (b) Mɛɛ gbɔmɔtsei abaaha mɛi ni abaatee amɛ shi kɛba shikpɔŋ nɔ lɛ?
11 Enɛ tsɔɔ adesai asusumai ni abaasaa abɔ amɛ ehee. Ani enyɛŋ eba mli? Dabi, ejaakɛ Lala 104:29, 30 mãa nɔ mi ehaa wɔ akɛ Nyɔŋmɔ baanyɛ afee nakai: “Ojieɔ amɛmumɔ lɛ, ni amɛpleneeɔ, ni amɛkũɔ amɛsɛɛ kɛyaa amɛsũ lɛŋ. Otsuɔ omumɔ lɛ kɛbaa, ni abɔɔ amɛ.” Eyɛ mli akɛ mɛi ni atee amɛ shi lɛ baafee aŋkroaŋkroi ni amɛji dani amɛgboi lɛ nɔŋŋ moŋ, shi ehe ehiaŋ ni amɛhiɛ nakai gbɔmɔtsei lɛ nɔŋŋ. Taakɛ eji yɛ mɛi ni atee amɛ shi kɛtee ŋwɛi lɛ agbɛfaŋ lɛ, Nyɔŋmɔ baaha amɛ gbɔmɔtso, bɔ ni sa lɛ diɛŋtsɛ ehiɛ. Ŋwanejee ko bɛ he akɛ amɛgbɔmɔtsei heei lɛ baafee gbɔmɔtsei ni yɔɔ hewalɛ diɛŋtsɛ, ni ebaaje amɛ klɛŋklɛŋ gbɔmɔtso lɛ bɔ ni sa, bɔni afee ni amɛsuɔlɔi lɛ anyɛ ayoo amɛ.
12. Mɛɛ be shikpɔŋ nɔ gbohiiashitee lɛ baaba?
12 Mɛɛ be shikpɔŋ nɔ gbohiiashitee lɛ baaba? Marta wie enyɛmi nuu Lazaro ni egbo lɛ he akɛ: “Mile akɛ ebaate shi yɛ gbohiiashitee lɛ mli yɛ naagbee gbi lɛ nɔ.” (Yohane 11:24) Te fee tɛŋŋ ni ele enɛ? Gbohiiashitee lɛ ji sane ko ni ajeɔ he ŋwane yɛ egbii lɛ amli, ejaakɛ Farisifoi lɛ heɔ yeɔ, shi Sadukifoi lɛ heee yeee. (Bɔfoi lɛ Asaji 23:8) Shi kɛlɛ, eka shi faŋŋ akɛ ekolɛ Marta le odasefoi ni tsɔ Kristofoi abe lɛ hiɛ, ni ná gbohiiashitee lɛ mli hiɛnɔkamɔ. (Hebribii 11:35) Agbɛnɛ hu, ebaanyɛ eyɔse kɛjɛ Daniel 12:13 lɛ akɛ gbohiiashitee lɛ baaba yɛ naagbee gbi lɛ nɔ. Ekolɛ po, benɛ ená ele enɛ kɛjɛ Yesu diɛŋtsɛ ŋɔɔ. (Yohane 6:39) Nakai “naagbee gbi” lɛ kɛ Kristo Afii Akpe Nɔyeli lɛ baa yɛ be kome mli. (Kpojiemɔ 20:6) Bo diɛŋtsɛ feemɔ miishɛɛ ni abaaná nakai “gbi” lɛ, beni nifeemɔ ni yɔɔ nyam nɛɛ jeɔ shishi lɛ he mfoniri okwɛ!—Okɛto Luka 24:41 he.
Namɔ Baaku Sɛɛ Kɛba Lɛ?
13. Mɛɛ gbohiiashitee lɛ he ninaa aŋma afɔ̃ shi yɛ Kpojiemɔ 20:12-14?
13 Aŋma Yohane ninaa ni kɔɔ shikpɔŋ nɔ gbohiiashitee lɛ he lɛ yɛ Kpojiemɔ 20:12-14 lɛ akɛ: “Mina gbohii lɛ, mɛi bibii kɛ mɛi wuji, damɔ maŋtsɛsɛi lɛ hiɛ, ni agbele woji anaa; ni agbele wolo kroko ni ji wala wolo lɛ hu naa. Ni akojo gbohii lɛ yɛ nibii ni aŋma yɛ woji lɛ amli lɛ anaa, bɔ ni sa amɛnitsumɔi lɛ. Ni ŋshɔ jie gbohii ni yɔɔ emli lɛ eha, ni gbele kɛ gbohiiaje jie gbohii ni yɔɔ amɛmli lɛ amɛha; ni akojo amɛ, mɔ fɛɛ mɔ bɔ ni sa enitsumɔi lɛ. Ni gbele kɛ gbohiiaje lɛ, ashɛrɛ amɛ ashwie la kpaakpo lɛ mli. Enɛ ji gbele ni ji enyɔ lɛ, la kpaakpo lɛ nɛ.”
14. Namɛi baafata mɛi ni abaatee amɛ shi lɛ ahe?
14 Gbohiiashitee lɛ baasa “mɛi bibii kɛ mɛi wuji” fɛɛ, adesai ni ale amɛ jogbaŋŋ kɛ mɛi ni aleee amɛ kwraa ni ehi shi ni amɛgboi lɛ ahe. Hɛɛ, abifabii po baafata mɛi ni abaatee amɛ shi lɛ ahe! (Yeremia 31:15, 16) Ajie oti kroko hu ni he hiaa kpo yɛ Bɔfoi lɛ Asaji 24:15 lɛ akɛ: “Jalɔi kɛ mɛi ni ejaaa fɛɛ baate shi.” Mɛi ni ale waa yɛ “jalɔi” lɛ ateŋ lɛ baafee hii kɛ yei anɔkwafoi ni hi shi yɛ blema lɛ, tamɔ Habel, Henok, Noa, Abraham, Sara, kɛ Rahab nɛkɛ. (Hebribii 11:1-40) Bo diɛŋtsɛ feemɔ he mfoniri okwɛ, akɛ okɛ gbɔmɛi ni tamɔ nɛkɛ miigba sane ni oonu Biblia mli nibii ni ba blema tɔ̃ɔ lɛ ahe saji fitsofitso kɛmiijɛ mɛi ni kɛ amɛ diɛŋtsɛ amɛhiŋmɛi ye he odase lɛ aŋɔɔ! Mɛi ni baafata “jalɔi” lɛ ahe hu ji aŋkroaŋkroi akpei abɔ ni sheɔ Nyɔŋmɔ gbeyei, ní egboi yɛ wɔbei nɛɛ amli nɔŋŋ ní amɛbɛ ŋwɛi hiɛnɔkamɔ lɛ. Ani oyɛ wekunyo loo suɔlɔ ko ni ekolɛ ebaafata mɛnɛɛmɛi ahe? Kwɛ miishɛjemɔ ni eji akɛ ooole akɛ obaanyɛ ona amɛ ekoŋŋ! Shi, namɛi ji aŋkroaŋkroi ni “ejaaa” ni amɛ hu amɛbaaku sɛɛ kɛba lɛ? Mɛi ni fata he ji mɛi akpekpei abɔ, ekolɛ akpekpei akpei abɔ ni gboi ní amɛnaaa hegbɛ akɛ amɛaakase Biblia mli anɔkwale lɛ ni amɛkɛtsu nii lɛ.
15. Mɛni wiemɔ ni awie akɛ ‘abaakojo’ mɛi ni baaku sɛɛ kɛba lɛ “yɛ nibii ni aŋma yɛ woji lɛ amli lɛ anaa” lɛ tsɔɔ?
15 Mɛɛ gbɛ nɔ abaatsɔ “akojo” mɛi ni baaku sɛɛ kɛba lɛ “yɛ nibii ni aŋma yɛ woji lɛ amli lɛ anaa”? Nɛkɛ wolokpoi nɛɛ jeee amɛ tsutsu nifeemɔi lɛ ahe saji ni aŋmala ashwie shi; beni amɛgboi lɛ, aha amɛye amɛhe kɛjɛ eshai ni amɛfee yɛ amɛshihilɛ be mli lɛ ahe. (Romabii 6:7, 23) Shi kɛlɛ, adesai ni atee amɛ shi lɛ baahi Adam esha lɛ shishi lolo. Belɛ, ebaafee akɛ nɛkɛ wolokpoi nɛɛ baajie ŋwɛi gbɛtsɔɔmɔi ni esa akɛ mɛi fɛɛ anyiɛ sɛɛ koni amɛná Yesu Kristo afɔleshaa lɛ he sɛɛ kɛmɔ shi lɛ akpo. ‘Abaafo gbele sɛɛ kwraa’ yɛ shishinumɔ diɛŋtsɛ naa, yɛ be mli ni ajieɔ Adam esha lɛ he naagbee okadi kwraa kɛyaa lɛ. Beni afii akpe lɛ baaba naagbee lɛ, no mli lɛ Nyɔŋmɔ efee “nibii fɛɛ ayitso.” (1 Korintobii 15:28) Osɔfonukpa loo Kpɔlɔ ni baadamɔ mli eha adesa he ehiaŋ dɔŋŋ. Akɛ adesai fɛɛ baaku sɛɛ kɛya shihilɛ ni eye emuu ni Adam ná mli ŋɔɔmɔ kɛjɛ shishijee lɛ mli ekoŋŋ.
Gbohiiashitee ni Ato he Gbɛjianɔ Jogbaŋŋ
16. (a) Mɛni hewɔ nilee yɔɔ mli akɛ aaahe aye akɛ gbohiiashitee lɛ baafee nifeemɔ ni ato he gbɛjianɔ jogbaŋŋ lɛ? (b) Namɛi eeenyɛ eba akɛ amɛbaafata mɛi ni baaku sɛɛ kɛjɛ gbohiiaje klɛŋklɛŋ lɛ ahe?
16 Akɛni ato gbohiiashitee kɛmiiya ŋwɛi lɛ he gbɛjianɔ jogbaŋŋ, ní “mɔ fɛɛ mɔ yɛ lɛ diɛŋtsɛ egbɛjianɔ” hewɔ lɛ, eka shi faŋŋ akɛ shikpɔŋ nɔ gbohiiashitee lɛ kɛ basabasafeemɔ ko baŋ yɛ gbɔmɛi ayifalɛ gbɛfaŋ. (1 Korintobii 15:23) Shishinumɔ yɛ he akɛ ehe baahia ní akwɛ mɛi ni atee amɛ shi ehee lɛ anɔ. (Okɛto Luka 8:55 he.) Ehe baahia ni amɛná heloonaa hiamɔ nii, kɛ—nɔ ni he hiaa fe fɛɛ lɛ—mumɔŋ yelikɛbuamɔ yɛ be mli ni amɛnáa Yehowa Nyɔŋmɔ kɛ Yesu Kristo he nilee ni haa mɔ wala lɛ. (Yohane 17:3) Eji mɛi lɛ fɛɛ baaku sɛɛ kɛba wala mli yɛ be kome mli kulɛ, anyɛŋ akwɛ amɛ jogbaŋŋ bɔ ni sa. Nilee yɛ mli akɛ aaasusu akɛ abaato naa, ni gbohiiashitee lɛ baaba mli fiofio kɛtsara nɔ. Eka shi faŋŋ akɛ Kristofoi anɔkwafoi ni gboi be fioo dani Satan gbɛjianɔtoo lɛ ba naagbee lɛ baafata mɛi ni abaatee amɛ shi klɛŋklɛŋ lɛ ahe. Wɔbaanyɛ wɔkpa mra shitee gbɛ kɛha hii anɔkwafoi ni hi shi blema, ní baasɔmɔ akɛ “lumɛi” lɛ hu.—Lala 45:17.
17. Mɛni ji saji komɛi ni kɔɔ gbohiiashitee lɛ he ni Biblia lɛ ewieee nɔ ko yɛ he, ni mɛni hewɔ esaaa akɛ Kristofoi gbaa amɛhe naa bɔ ni esaaa yɛ saji ni tamɔ nɛkɛ he lɛ?
17 Shi kɛlɛ, esaaa akɛ wɔfeɔ keketee yɛ saji ni tamɔ nɛkɛ he. Biblia lɛ kɛ hetoo ko hãaa yɛ saji babaoo he. Etsɔɔɔ gbɛ ni aŋkroaŋkroi baatsɔ nɔ ate shi, kɛ be mli ni amɛbaate shi, loo hei ni amɛbaate shi yɛ lɛ ahe saji amli fitsofitso. Ekɛɛɛ wɔ bɔ ni abaafee aná wɔɔhei, niyenii, kɛ atadei aha mɛi ni baaku sɛɛ aba lɛ. Nakai nɔŋŋ hu wɔnyɛŋ wɔkɛ nɔmimaa awie bɔ ni Yehowa baato saji tamɔ gbekɛbii ni abaatee amɛ shi lɛ atsɔsemɔ kɛ amɛkwɛmɔ he gbɛjianɔ eha, aloo bɔ ni ebaatsu shihilɛi komɛi ni ekolɛ ebaasa wɔnanemɛi kɛ suɔlɔi ahe lɛ ahe nii eha. Lɛɛlɛŋ, eji adebɔɔ su akɛ aaasusu nibii ni tamɔ enɛɛmɛi ahe; shi efeŋ nɔ ni nilee yɔɔ mli akɛ aaafite be ni akɛmiibɔ mɔdɛŋ ni ahã saji ni amrɔ nɛɛ anyɛŋ ahã hetoo lɛ ahetoo. Esa akɛ Yehowa ní wɔɔsɔmɔ lɛ kɛ anɔkwayeli, kɛ naanɔ wala ni wɔnine baashɛ nɔ lɛ afee oti titri ni ma wɔhiɛ. Kristofoi ni afɔ amu lɛ ahiɛnɔkamɔ ji ŋwɛi gbohiiashitee ni yɔɔ nyam lɛ. (2 Petro 1:10, 11) “Tooi krokomɛi” lɛ ahiɛ kã naanɔ gboshinii nɔ yɛ Nyɔŋmɔ Maŋtsɛyeli lɛ shikpɔŋ nɔ nɔyelihe lɛ. (Yohane 10:16; Mateo 25:33, 34) Yɛ gbohiiashitee lɛ he saji babaoo ni wɔleee lɛ agbɛfaŋ lɛ, wɔkɛ wɔhiɛ fɔ̃ɔ Yehowa nɔ kɛkɛ. Wɔ wɔsɛɛ be miishɛɛnamɔ yɛ shweshweeshwe yɛ Mɔ ni baanyɛ ‘ahã nɔ fɛɛ nɔ ni hiɛ kã lɛ atɔ kɛ nii ni etaoɔ’ lɛ dɛŋ.—Lala 145:16; Yeremia 17:7.
18. (a) Mɛɛ kunimyeli ko Paulo mã nɔ mi? (b) Mɛni hewɔ wɔkɛ wɔhiɛ fɔ̃ɔ gbohiiashitee hiɛnɔkamɔ lɛ nɔ kɛ nɔmimaa lɛ?
18 Paulo mu esane naataamɔ lɛ naa kɛtsɔ sane jajemɔ nɛɛ nɔ akɛ: “Shidaa aha Nyɔŋmɔ, mɔ ni tsɔ̃ wɔ-Nuntsɔ Yesu Kristo nɔ ni eha wɔye kunim lɛ.” (1 Korintobii 15:57) Hɛɛ, ayeɔ gbele ni wɔná kɛtsɔ Adamɔ nɔ lɛ nɔ kunim kɛtsɔɔ Yesu Kristo kpɔmɔ afɔleshaa lɛ nɔ, ni mɛi ni afɔ amɛ mu lɛ kɛ “tooi krokomɛi” lɛ fɛɛ náa nakai kunimyeli lɛ mli gbɛfaŋnɔ. Shi kɛlɛ, “tooi krokomɛi” lɛ ni yɔɔ wala mli ŋmɛnɛ lɛ yɛ hiɛnɔkamɔ ni yɔɔ sɔrɔto kwraa, ní yinɔ nɛɛ pɛ yɔɔ. Ákɛ “asafo babaoo” ni yaa nɔ amɛyi faa be fɛɛ be lɛ fã lɛ, amɛbaanyɛ amɛfo “amanehulu kpeteŋkpele” ni baa lɛ ni amɛsaŋ amɛnaa gbele diɛŋtsɛ kɔkɔɔkɔ! (Kpojiemɔ 7:9, 14) Shi kɛlɛ, mɛi ni gboiɔ yɛ ‘be kɛ nibii ni aleee ni baa trukaa’ lɛ ahewɔ, loo amɛgboiɔ yɛ Satan najiaŋdamɔlɔi adɛŋ lɛ baanyɛ amɛkɛ amɛhiɛ afɔ̃ gbohiiashitee hiɛnɔkamɔ lɛ nɔ.—Jajelɔ 9:11.
19. Mɛɛ ŋaawoo esa akɛ Kristofoi fɛɛ abo toi ŋmɛnɛ?
19 No hewɔ lɛ, wɔkɛ hiɛdɔɔ miimɛ nakai gbi ni yɔɔ nyam beni abaafo gbele sɛɛ kwraa lɛ. Wɔ hekɛnɔfɔɔ ni yɔɔ shiŋŋ yɛ Yehowa shiwoo ni ji gbohiiashitee lɛ mli lɛ haa wɔsusuɔ saji ahe yɛ gbɛ kpakpa nɔ. Nɔ fɛɛ nɔ ni baaba wɔnɔ yɛ shihilɛ nɛɛ mli—kɛji wɔgboi po lɛ—nɔ ko nɔ ko nyɛŋ ahe nyɔmɔwoo ni Yehowa ewo shi yɛ he lɛ yɛ wɔdɛŋ kɔkɔɔkɔ. Enɛ hewɔ lɛ, Paulo naagbee ŋaawoo ni ekɛha Korintobii lɛ sa jogbaŋŋ ŋmɛnɛ taakɛ eji afii akpei enyɔ ni eho nɛ lɛ akɛ: “No hewɔ lɛ, minyɛmimɛi ni misumɔɔ, nyɛfia shi ni nyɛkagbugbãa, ni nyɛtekea nɔ yɛ Nuntsɔ lɛ nitsumɔ lɛ mli daa nɛɛ, ejaakɛ nyɛle akɛ nyɛmɔdɛŋbɔɔ lɛ efeee yaka yɛ Nuntsɔ lɛ mli.”—1 Korintobii 15:58.
Ani Obaanyɛ Otsɔɔ Mli?
◻ Te Paulo ha sanebimɔ ni kɔɔ gbɔmɔtsei ni mɛi ni afɔ amɛ mu lɛ baaná kɛ atee amɛ shi lɛ he lɛ hetoo tɛŋŋ?
◻ Yɛ naagbee lɛ, mɛɛ gbɛ nɔ, ni mɛɛ be abaafo gbele sɛɛ kwraa?
◻ Namɛi baafata mɛi ni baaná shikpɔŋ nɔ gbohiiashitee lɛ ahe?
◻ Mɛni esa akɛ efee wɔsubaŋ yɛ saji ni Biblia lɛ ewieko nɔ ko yɛ he lɛ ahe?
[Mfoniri ni yɔɔ baafa 20]
Dumɔwu ‘gboɔ’ kɛtsɔ tsakemɔ ni sa kadimɔ ni baa enɔ lɛ nɔ
[Mfoniri ni yɔɔ baafa 23]
Hii kɛ yei anɔkwafoi ni hi shi yɛ blema, tamɔ Noa, Abraham, Sara, kɛ Rahab baafata mɛi ni abaatee amɛ shi lɛ ahe
[Mfoniri ni yɔɔ baafa 24]
Gbohiiashitee lɛ baafee miishɛɛ kpele be diɛŋtsɛ!