Sanebimɔi Ni Jɛ Kanelɔi Adɛŋ

Paulo ŋma akɛ: “Mi lɛ mitsɔ mla nɔ migbo yɛ mla gbɛfaŋ koni mihiɛ akã yɛ Nyɔŋmɔ gbɛfaŋ.”​—Gal. 2:19.

Be ni Paulo wie sane nɛɛ, no mli lɛ eegbala oti ko mli eetsɔɔ asafoi ni yɔɔ Roma kpokpaa ni ji Galatia lɛ nɔ. No mli lɛ, amale tsɔɔlɔi komɛi miilaka Kristofoi komɛi ni yɔɔ jɛmɛ lɛ. Amale tsɔɔlɔi nɛɛ miitsɔɔ Kristofoi akɛ ja amɛye Mose Mla lɛ nɔ, titri lɛ, ja amɛhã afolɔ amɛ ketia dani abaanyɛ ahere amɛyiwala. Shi Paulo le akɛ, Nyɔŋmɔ biii ni afo mɔ ko ketia dɔŋŋ dani ehere eyiwala. Ekɛ amɛ susu nii ahe yɛ gbɛ ni baahã amɛyiŋ atsɔ nɔ, ni ehã amɛna faŋŋ akɛ nakai tsɔɔmɔi lɛ ejaaa, ni ewo amɛ hewalɛ ni amɛná hemɔkɛyeli yɛ Yesu Kristo kpɔmɔ afɔleshaa lɛ mli.​—Gal. 2:4; 5:2.

Biblia lɛ tsɔɔ faŋŋ akɛ, kɛ́ mɔ ko gbo lɛ, eleee nɔ ko nɔ ko dɔŋŋ, ni mɔ ko hu nyɛɛɛ afee lɛ nɔ ko dɔŋŋ. (Jaj. 9:5) No hewɔ lɛ, be ni Paulo wie akɛ ‘egbo yɛ mla gbɛfaŋ lɛ,’ no mli lɛ eetsɔɔ akɛ, Mose Mla lɛ bɛ enɔ hewalɛ ko dɔŋŋ. Moŋ lɛ, hemɔkɛyeli ni eyɔɔ yɛ kpɔmɔ afɔleshaa lɛ mli lɛ hewɔ lɛ, ele akɛ ‘ehiɛ kã yɛ Nyɔŋmɔ gbɛfaŋ.’

Paulo kɛɛ ‘mla lɛ nɔ tsɔ’ ni eshihilɛ lɛ tsake. Yɛ mɛɛ gbɛ nɔ? No mli lɛ, Paulo etsɔ hiɛ ewie akɛ: “Atsɔɔɔ mla nitsumɔi anɔ abuuu gbɔmɔ ko jalɔ, moŋ lɛ, atsɔɔ hemɔkɛyeli yɛ Yesu Kristo mli pɛ nɔ afeɔ nakai.” (Gal. 2:16) Enɛ etsɔɔɔ akɛ Mla lɛ he bɛ sɛɛnamɔ. Etsu yiŋtoo ko ni he hiaa waa he nii. Paulo kɛɛ Galatiabii lɛ akɛ: “Akɛfata he koni ehã mlatɔmɔi afee faŋŋ, kɛyashi seshi lɛ ni awo lɛ shi lɛ baaba.” (Gal. 3:19) Mla lɛ hã efee faŋŋ akɛ, akɛni adesai yeee emuu hewɔ lɛ, amɛnyɛɛɛ amɛye Mla lɛ nɔ pɛpɛɛpɛ ni amɛtɔ̃ɔɔ, ni no hewɔ lɛ esa akɛ amɛná afɔle ni kpa ko kwraa bɛ he ni baakpãtã ehã amɛ daa. No hewɔ lɛ, Mla lɛ tsɔɔ amɛ gbɛ kɛtee “seshi lɛ,” ni ji Kristo lɛ ŋɔɔ koni mɔ fɛɛ mɔ ni baahe Yesu Kristo nɔ eye lɛ, anyɛ adamɔ Kristo kpɔmɔ afɔleshaa lɛ nɔ abu lɛ jalɔ yɛ Nyɔŋmɔ hiɛ. (Gal. 3:24) Be ni Mla lɛ tsɔɔ Paulo gbɛ kɛtee Yesu ŋɔɔ ni ehe Yesu nɔ eye lɛ, ‘egbo yɛ mla lɛ gbɛfaŋ ni ehiɛ kã ehã Nyɔŋmɔ.’ Kɛjɛ nakai be lɛ nɔ kɛyaa lɛ, Mla lɛ bɛ hewalɛ ko yɛ Paulo nɔ dɔŋŋ, shi moŋ Nyɔŋmɔ ni yɔɔ enɔ hewalɛ.

Paulo wie nɔ ko ni tamɔ nakai nɔŋŋ yɛ wolo ni eŋma emaje Romabii lɛ mli. Ewie akɛ: “Minyɛmimɛi, atsɔ Kristo lɛ gbɔmɔtso lɛ nɔ ahã nyɛye nyɛhe kɛje Mla lɛ shishi. . . . Ajie wɔ kɛje Mla lɛ shishi, ejaakɛ etsĩii wɔnaa dɔŋŋ.” (Rom. 7:4, 6) Ŋmalɛ nɛɛ kɛ agbɛnɛ hu Galatiabii 2:19 lɛ hãa wɔnaa akɛ, jeee gbo ni mɔ ko gboɔ akɛ eshafeelɔ ni abu lɛ fɔ yɛ Mla lɛ shishi lɛ he no mli lɛ Paulo wieɔ lɛ. Moŋ lɛ, nɔ ni he ni ewieɔ ji, bɔ ni lɛ kɛ Kristofoi krokomɛi eye amɛhe kɛje Mla lɛ shishi akɛni amɛhe Kristo kpɔmɔ afɔleshaa lɛ amɛye lɛ hewɔ.