Novanm

Si ou ni timoun, ou pé édé-yo préparé dé ti komantè ki k’ay èvè laj a yo. Délè nou ka ègzaminé on awtik é adan-y yo ka palé dè sèwten ki vréman sèryé, kon lè dé moun-mayé ka jwenn difikilté oben dè tousa ki anrapò èvè péché sèksyèl. Men pétèt zò ké pé touvé yonndé paragraf ki ké pèwmèt sé timoun-la réponn. Anplisdisa, pran on ti tan pou èspliké sé timoun-la poukwa yo pé ké ba-yo réponn chaklè yo ké lévé men a yo. Konsa, sa pé’é désèvwa-yo lèwvwè dòt moun ké réponn alòskè yo osi yo té lévé men a yo (1 Tim. 6:18). Noutout nou pé préparé dé bèl ti komantè ki ka ba Jéova glwa é ki ka ankourajé frè é sè an nou (Pwov. 25:11). Menmsi délè nou pé palé dè on èkspéryans nou ja viv, nou ké fè atansyon pou nou pa palé dè nou twòp (Pwov. 27:2 ; 2 Kor. 10:18). An-nou fè éfò pou nou rété konsantré asi Jéova, asi Pawòl a-y é asi pèp a-y (Rév. 4:11). w23.04 24-25 § 17-18.

Sa enpòwtan kè nou ni lanmou pou nou rété véyatif é pou nou pa pèd bon jijman an nou (Mat. 22:37-39). Konm nou enmé Bondyé, sa ka édé-nou kontinyé préché kèlkèswa sitiyasyon nou ka jwenn (2 Tim. 1:7, 8). É konm nou enmé pwochen an nou menmsi yo pa ka adoré Jéova, nou ka kontinyé préché ba yo, ki sé lè nou ka kriyé-yo pa téléfòn, ki sé lè nou ka voyé lèt ba yo. Nou toujou ka mèt an tèt an nou kè on jou moun nou ka préché ba yo ké chanjé é yo ké mèt-yo ka fè lèbyen. Nou pa ka pèd èspwa (Ézék. 18:27, 28). On moun ki enmé pwochen a-y enmé frè é sè a-y. Yonn ka montré lòt kè i enmé-y lè yonn ka ankourajé lòt é lè yonn ka fòwtifyé lòt (1 Tés. 5:11). Lè sé sòlda-la ka goumé, yonn ka pwotéjé lòt. Menmjan-la osi, adan lasanblé-la yonn ka ankourajé lòt. Nou pé’é jen fè on biten pa èspré pou fè frè é sè an nou mal é si on moun fè-nou ditò, nou pé’é viré fè-y ditò nonplis (1 Tés. 5:13, 15). Anplisdisa, lè nou ka rèspèkté sé frè-la ki ka dirijé lasanblé-la, nou ka montré-yo kè nou enmé-yo (1 Tés. 5:12). w23.06 10 § 6 ; 11 § 10-11.

On prèmyé biten nou pé fè pou rann fwa an nou pi solid, sé pran tan réfléchi asi ranson-la. Grasa ranson-la nou sèten kè pwomès a Bondyé ké réyalizé. I pwomèt-nou kè i ké ban-nou lavi étèwnèl adan on mond méyè. Alò lè nou ka pran tan réfléchi pou vwè poukwa i ban-nou ranson-la é pou vwè grandè a sakrifis-la i fè la, sa ka édé-nou ni on fwa pi solid adan pwomès-lasa. Poukwa nou ka di sa ? An-nou pran tan gadé ki sakrifis Jéova fè pou nou té pé sa bénéfisyé dè ranson-la. Jéova fè ansòt pou prèmyé Gason a-y ki té an syèl-la fèt asi latè antankè nonm pawfè. I té enmé Gason-lasa toubònman, é sé té méyè zanmi a-y. Lè Jézi té asi latè, i jwenn tout kalté éprèv é i soufè bon soufè la avan i té mò. Jéova péyé ranson-la chè toubònman ! Ès ou ka di kè Jéova Pap’an nou ki plen lanmou, té’é lésé Gason a-y soufè konsa é pran mò a-y pou nou pé viv adoumanman yenki pou on ti moman ? Anponjan ! (Jan 3:16 ; 1 Pyè 1:18, 19). Si Jéova péyé ranson-la chè konsa, nou pé sèten kè i ké fè ansòt kè nou viv pou touttan adan nouvo mond-la. w23.04 27 § 8-9.

Ès Jéova anvi résisité moun ki mò ? Wi é nou pa ni pon dout asi sa ! I voyé lèspri sen a-y asi plizyè nonm ki maké Pawòl a-y pou yo té pé sa ékri pwomès-la i fè-nou la : ké ni on rézirèksyon (Iz. 26:19 ; Rév. 20:11-13). É lèwvwè Jéova ka fè on pwomès, i toujou ka tchenn a mo a-y (Joz. 23:14). An réyalité, a pa ti présé Jéova présé résisité moun ki mò. An-nou réfléchi asi sa Jòb di. I té sèten kè siwvwè i té mò, a pa ti anvi Jéova té’é anvi vwè-y wouvin a lavi ! (Jòb 14:14, 15). É sé sa Jéova vé osi pou tout sèwvitè a-y ki ja mò. Jéova présé résisité-yo pou yo ni tchè-kontan é pou yo ni on bon santé osi. Men é sé milya é milya moun-la ki ja mò la é ki pa té ni lokazyon aprann konnèt lavérité asi Jéova ? Ka Jéova ké fè pou yo ? Bondyé an nou ki plen lanmou vé résisité-yo osi (Akt 24:15). I vé ba-yo laposibilité dè vin zanmi a-y é dè viv pou touttan asi latè (Jan 3:16). w23.04 9 § 5-6.

Kijan ou pé fè èspérans a-w rantré pi fon an tèt a-w ? Pa ègzanp, si ou ni lèspwa dè viv asi latè, li é médité asi sa Labib ka di anrapò èvè paradi-la (Iz. 25:8 ; 32:16-18). Éséyé imajiné kijan lavi ké yé adan nouvo mond-la. Si nou ka pran labitid imajiné jan lavi ké yé adan nouvo mond-la, sé difikilté-la nou ka jwenn la ‘ké pou on ti moman é yo ké léjè’ (2 Kor. 4:17). Grasa èspérans-la Jéova ka ba-w la, Jéova ké fè-w vin fò. I ka ban-nou tousa nou bizwen pou nou pé sa ni fòs. Alò lèwvwè ou bizwen fòs pou ou pé sa fè on biten kè yo mandé-w fè, oben pou ou pé sa andiré on éprèv ou ka jwenn oben pou ou kontinyé ni tchè-kontan, ka pou-w fè ? Priyé Jéova èvè tout tchè a-w é chèché dirèksyon a-y toupannan ou ka étidyé tousèl a-w. Aksèpté sé ankourajman-la frè é sè a-w ka ba-w la. Ondòt biten pou ou fè osi, sé mèt èspérans a-w byen fon an tèt a-w. Si ou fè tousa, alò ‘fòs a Bondyé ki plen glwa ké rann-vou puisan é ké ba-w tout fòs-la ou bizwen la pou-w andiré anplen, èvè pasyans é jwa’ (Kol. 1:11). w23.10 17 § 19-20.

Pou kantité rézon nou ni dè di Jéova mèsi, pa ni mwayen nou konté sa. An réyalité, nou pé di Jéova mèsi pou tout sé bèl biten-la nou ni la pas ‘tout bèl don ka vin dè-y’ (Jak 1:17). Pa ègzanp, nou pé di Jéova mèsi pou jan latè bèl, pou tout sé bèl biten èstraòwdinè la i kréyé la, pou fanmi an nou, pou zanmi an nou é pou vi-la é bèl èspérans-la i ka ban-nou la. Anplisdisa, nou vlé di Jéova mèsi pas i ka pèwmèt-nou vin zanmi a-y é pas lanmityé-lasa ni onlo valè pou nou. Pétèt fò nou ké fè on éfò èspésyal pou nou réfléchi pou vwè pou ki biten, nou pèwsonèlman, nou ni rèkonésans pou Jéova. Poukwa nou ka di sa ? Pas adan mond-la nou ka viv adan-y la, onlo moun engra. Olyé sé moun-la chèché a vwè kijan yo pé montré rèkonésans a yo pou sa yo ja ni, yo plito ka chèché a vwè kijan yo pé ni sa yo anvi. Si nou ka lésé sé moun-lasa détenn asi nou, nou ké enn touvé-nou ka mandé Jéova onpakèt biten san janmen di-y mèsi pou sa i ka ban-nou. Pou sa pa rivé-nou, fò-nou kontinyé ni rèkonésans pou tousa Jéova ka fè pou nou é fò-nou kontinyé montré-y jan nou ni rèkonésans pou-y (Lik 6:45). w23.05 4 § 8-9.

Konm Jéova sé on Papa ki plen lanmou, i pa enmé vwè-nou ka soufè (Iz. 63:9). Menmsi i ka pwotéjé-nou sa vé pa di kè nou pé’é jen jwenn pon éprèv. Délè sé éprèv-la pé touvé-yo kon on flèv oben kon on flanm difé (Iz. 43:2). Men i ka pwomèt-nou kè i ké édé-nou « janmbé » sé éprèv-lasa. É kèlkèswa éprèv-la nou ka jwenn konnyéla, Jéova ké fè ansòt pou nou toujou rété bon bon zanmi èvè-y. Anplisdisa, i ka ban-nou puisans a lèspri sen a-y pou nou pé sa andiré (Lik 11:13 ; Filip. 4:13). Alò nou pé sèten kè i ké toujou ban-nou ègzaktèman sa nou bizwen pou nou pé sa andiré é pou nou rété fidèl a-y. Jéova vé kè nou fè-y konfyans (Ébr. 11:6). Ni dé moman, lèwvwè nou ka touvé-nou anba éprèv, nou pé ni lenprésyon kè nou pé’é jen rivé about a sé éprèv-lasa. É nou pé mèt-nou ka pansé kè pétèt Jéova pé’é fè ayen pou édé-nou. Men Labib ka ban-nou lagaranti kè nou ké pé « monté asi on miray » grasa puisans a Jéova (Sòm 18:29). Alò, olyé nou lésé dé lidé konsa mèt dout an tèt an nou, an-nou priyé èvè fwa é an-nou mèt fon an tèt an nou kè Jéova ké réponn a priyè an nou (Jak 1:6, 7). w23.11 22 § 8-9.

Mi on bèl ègzanp pou palé dè vré lanmou-la mi ! Lè nou ka li sé pawòl-lasa, ni on biten ki ka rasiré sé moun-la ki mayé la toubònman : ni mwayen pou lanmou-la yonn ni pou lòt pa jen disparèt. Fò 2 moun-mayé fè éfò pou yonn enmé lòt tout vi a yo. Pou nou konprann sa, an-nou pran ègzanp a on foyé-difé. Pou difé-la kontinyé brilé, fò on moun kontinyé mèt bwa adan-y. Si ponmoun pa ka okipé dè difé-la, i ké fin pa étenn. Menmjan-la, lanmou-la on mari é madanm a-y ni yonn pou lòt pé kontinyé rété fò tout vi a yo si yo ka fè ansòt pou lanmou-lasa kontinyé grandi. Délè, 2 moun-mayé pé ni lenprésyon kè yonn pa enmé lòt fò kon avan. Sa pé rivé lèwvwè yo ka jwenn pwoblèm a lajan oben pwoblèm a santé oben lèwvwè yo ka vin ni timoun é kè fò-yo lévé sé timoun-lasa. Kifè pou ‘flanm-la ki ka vin dè Ja’ pa jen étenn, ki mari-la, ki madanm-la dwètèt fè tousa yo pé pou yo bon bon zanmi èvè Jéova. w23.05 20-21 § 1-3.

Ka pou nou fè pou nou pé sa ni plis kouraj ? Pétèt kè paran an nou sé dé moun ki ni kouraj é kè yo ka ankourajé-nou pou nou ni kalité-lasa osi. Men a pa paskè yo yo ni kouraj pou nou konpranndèdi kè nou pa bizwen fè éfò pou nou ni kouraj. Pou on moun pé sa ni plis kouraj, fò i travay sa. Sé kon lè on moun bizwen aprann jouwé pyano. I pé’é rivé fè sa onsèl kou men fò i gadé kijan pwofésè a-y ka fè é fò i fè menm biten-la. Menmjan-la, pou nou pé sa ni plis kouraj, fò-nou gadé byen kijan moun ki ni kouraj ka aji é aprésa, fò-nou suiv ègzanp a yo. Kon Danyèl, fò-nou konnèt Pawòl a Bondyé byen. Fò-nou vin bon bon zanmi èvè Jéova. É pousa, fò-nou palé ba-y souvan é fò-nou wouvè tchè an nou ba-y. Anplisdisa, fò-nou fè-y konfyans é fò-nou sèten kè i ké soutyenn-nou. Alò, lèwvwè nou ké jwenn éprèv ki ké soukwé fwa an nou, nou ké aji èvè kouraj. Byensouvan lèwvwè on moun ni kouraj, lézòt ka rèspèkté-y. Anplisdisa, jan-la moun-lasa ka aji pé édé moun ki ni tchè sensè vin owa Jéova. Wi, nou ni onlo biten ki ka pousé-nou aji èvè kouraj. w23.08 2 § 2 ; 4 § 8-9.

Yo té ka sèvi èvè mo grèk la yo tradui la é ki bay « vérifyé », pou palé dè on tès moun té ka fè asi dé biten ki té annò oben annawjan pou vwè si sé biten-lasa té vréman annò oben annawjan. Menmjan-la, fò-nou vérifyé, kivédi tèsté sa nou ka tann oben sa nou ka li pou vwè si sa vré. Pli gwo tribilasyon-la ké toupré rivé é pli sa ké enpòwtan kè nou fè sa. Fò pa nou pran tousa moun ka di pou lajan-kontan. Okontrè, an-nou sèvi èvè tèt an nou pou réfléchi é an-nou konparé sa nou ka tann oben sa nou ka li èvè sa Labib é òwganizasyon a Jéova ka anségné-nou. Konsa, kèlkèswa manti-la sé démon-la té’é fè monté-é-désann la, nou pé’é lésé sa kouyonné-nou (Pwov. 14:15 ; 1 Tim. 4:1). Nou sav kè pèp a Bondyé ké pasé gwo tribilasyon-la vivan. Men é nou pèwsonèlman ? Nou pa sav ka ki ka atann-nou (Jak 4:14). Men on biten nou sèten, sé kè ki nou pasé gwo tribilasyon-la vivan, ki nou vin mò avan jou a Jéova rivé, si nou ka rété fidèl, Jéova ké ban-nou lavi étèwnèl pou rékonpansé-nou. Alò fò-nou byen désidé a mèt bèl èspérans an nou byen fon an tèt an nou é fò-nou fè ansòt pou nou toujou paré pou jou a Jéova ! w23.06 13 § 15-16.

Nou pa sav kijan sèwten pwofési ki an Bib-la ké réyalizé (Dan. 12:8, 9). Men menmsi nou pa sav ègzaktèman kijan on pwofési ké réyalizé, apapousa i pé ké réyalizé ! Nou pé sèten kè Jéova ké édé-nou konprann sa nou bizwen konnèt a bon moman-la menmjan i fè-y an tan lontan. Apré sé nasyon-la ké anonsé kè ni « lapé é lasékirité », sé puisans politik la ki adan mond-lasa ké ataké fo-rèlijyon-la é yo ké fè-y fè pach (1 Tés. 5:3 ; Rév. 17:16, 17). Aprésa yo ké ataké sèwvitè a Jéova (Ézék. 38:18, 19). É pou fin, dènyé lagè-la yo ka kriyé Awmagédon ké koumansé (Rév. 16:14, 16). Nou pé sèten kè tout sé biten-lasa ké fèt talè. Men pannan nou ka atann tousa, an-nou kontinyé montré Pap’an nou ki an syèl-la é ki enmé-nou kè nou ni rèkonésans pou-y. Pou sa, nou ké montré-nou véyatif parapòt a sa sé pwofési-la ka di é nou ké ankourajé lézòt fè menm biten. w23.08 13 § 19-20.

Apré lapòt Pòl palé dè lafwa, lèspérans, é lanmou, i di kè « sila ki pi enpòwtan la pawmi yo, sé lanmou » (1 Kor. 13:13). Poukwa i di sa ? Talè, lèwvwè tout pwomès a Bondyé ké réyalizé adan nouvo mond-la, nou pé’é bizwen ni fwa ankò adan sé pwomès-lasa pas sé biten-la nou té ka èspéré la ké ja réyalizé. Men fò-nou ké kontinyé enmé Jéova é kontinyé enmé lézòt. An réyalité, lanmou-la nou ni pou yo la pé’é jen fin grandi. Lè yonn ka aji èvè lanmou épi lòt, sa ka montré osi kè nou sé disip a Kris vréman. Mi sa Jézi di apòt a-y : « Sé konsa toutmoun ké sav zò sé disip an mwen : si zò ni lanmou yonn pou lòt » (Jan 13:35). Anplisdisa, lè yonn ka aji épi lanmou èvè lòt, sa ka édé-nou rété soudé. Pòl di kè lanmou-lasa « sé on lyannaj ki pawfè pou ini moun » (Kol. 3:14). Mi sa lapòt Jan maké ba frè é sè a-y : « On moun ki enmé Bondyé dwètèt enmé frè a-y osi » (1 Jan 4:21). An réyalité, lè yonn ka aji épi lanmou èvè lòt, nou ka montré kè nou enmé Jéova. w23.11 8 § 1, 3.

Labib ka di kè lè on moun ka vin krétyen, sé konsi i ka koumansé kouri on kous. Tout sé krétyen-la ki ka fin kous-la ka risivwè on rékonpans : lavi étèwnèl (2 Tim. 4:7, 8). Kifè, fò-nou fè onlo éfò pou nou kontinyé kouri. É nou ka tou konprann kè a pa lèmoman pou nou moli, paskè nou toupré rivé an bout a kous-la. Lapòt Pòl di-nou ka pou nou fè pou nou fin-li osi. I di-nou « débarasé-nou dè tout chaj » é « kouri èvè andirans kous-la ki douvan nou la ». Ès sa vlé di kè on krétyen pa ni pon chaj a pòté ? Non ! I té vlé di kè fò-nou débarasé-nou dè tout chaj ki initil. Sé kalté chaj-lasa pé rivé a ralanti-nou é a lasi-nou. Pou nou rivé andiré, fò-nou vwè vitman lè nou ka pòté on chaj ki initil asi do an nou, é fò pa nou tadé a débarasé-nou dè-y. Men an menm balan-la, nou ka tou konprann kè nou pé’é vlé débarasé-nou dè pon chaj kè nou dwètèt pòté. Paskè si nou fè sa, nou pé’é ni dwa kouri kous-la ankò (2 Tim. 2:5). w23.08 26 § 1-2.

On moun ki rézonab ka rèspèkté sa lézòt ka pansé. Pa ègzanp, ni sèwten sè ki byen enmé makiyé-yo, men ni sa ki pa’a fè sa. Ni sèwten krétyen ki ka bwè alkòl, toupannan yo ka fè atansyon pou yo pa bwè twòp, é ni dòt ki pa’a bwè pa menm onsèl gout alkòl. Tout sé krétyen-la vlé pran swen a santé a yo, men yotout pa’a swangné-yo menmjan-la. Si nou ka éséyé fè lézòt fè menm biten ki nou pas pou nou, sé sa nou ka fè ki bon, nou pé rivé a fè lézòt bigidi é nou pé rivé a mèt zizanni adan lasanblé-la. (1 Kor. 8:9 ; 10:23, 24). Pa ègzanp, Jéova pa ka di-nou ki lenj pou nou mèt asi nou men i ka ban-nou dé prensip pou édé-nou adan domenn-lasa. Jan-la nou ka abiyé la dwètèt onoré Bondyé ; nou dwètèt montré kè nou rézonab, kè nou ni modèsti, é kè nou ni « bon jijman » adan domenn-lasa (1 Tim. 2:9, 10). Nou vé pa abiyé-nou pou lè moun vwè-nou, sé enki lenj an nou yo ka vwè. Sé prensip-la ki an Bib-la ké édé sé ansyen-la osi pou yo pa di sé frè é sè la kè fò-yo abiyé-yo tèl jan é kè fò-yo ranjé chivé a yo tèl jan. w23.07 23-24 § 13-14.

Jéova montré-nou ka nou pé fè pou nou ni on bèl landèmen. Sé moun-la ki ka aksèpté envitasyon a madanm-la ki ka fè bon dézòd la é ki sòt la ka éséyé pran pyé a yo adan dé biten ki pa pwòp. Yo ké fin « fon fon fon an Tonm-la » (Pwov. 9:13, 17, 18). Sé pé’é menm biten pou moun ki ka aksèpté envitasyon a madanm-la ki ni sajès la. (Pwov. 9:1). Nou ka aprann enmé sa Jéova enmé é nou ka aprann hay sa i hay (Sòm 97:10). É nou kontan pas nou pé envité dòt moun pou « vré sajès-la » fè-yo dibyen osi. Nou kon sé sèwvant-la ki mèt-yo « sé koté-la ki pi ho la adan vil-la pou yo hélé fò é pou yo di : “Tousa ki pa ni èkspéryans, antré kotésit !” » Sé byenfé-la nou ka jwenn la é kè moun ki ka kouté-nou ka jwenn osi, a pa pou on ti moman men sa ké diré. Nou jous ni lèspwa kè nou ké « viv » é kè nou ké « maché asi chimen a moun ki entélijan » pou touttan (Pwov. 9:3, 4, 6). w23.06 24 § 17-18.

Lèwvwè on kolèg-travay oben on kanmarad-lékòl a-w ka pozé-w on kèsyon asi kwayans a-w, ka ou ka rèsanti ? Pétèt ou on ti jan istrésé. Sé sa onlo adan nou ka rèsanti. Men sa kolèg-la oben kanmarad-la ka mandé-w la pé édé-w konprann ka i ka pansé oben adan ki biten i ka kwè é sa pé ba-w lokazyon préché pou-y. Délè osi, nou pé tonbé asi dé moun ki ka pozé-nou on kèsyon pou yo pé sa tigonné-nou. Lè sa ka rivé, sa pa ka siwprann-nou pas sèwten moun ka tann onlo biten asi sa nou ka kwè é yo ka pran sa pou lajan-kontan alòskè sé dé biten ki pa vré (Akt 28:22). Anplisdisa, nou ka viv « sé dènyé jou-la » é pannan épòk-lasa Bib-la té ja di kè sé moun-la pa té ké « antann-yo èvè ponmoun » é kè yo té’é jous « fè moun sibi bon abominasyon » (2 Tim. 3:1, 3). Pétèt ou ka mandé-w : « Lèwvwè on moun ka kritiké kwayans an mwen, kijan an pé réponn èvè dousè é èvè jantiyès ? » Si ou ni dousè, sa pé édé-w. On moun ki dous ka rété kalm é ka aji èvè métriz lèwvwè yo ka tigonné-y oben lèwvwè i pa sav kijan pou i réponn. w23.09 14 § 1-2.

Délè, òwganizasyon a Jéova ka ban-nou déotwa konsèy pou pwotéjé-nou. Pa ègzanp, yo ka avèti-nou pou nou pa vin dé moun ki ka kouri dèyè lajan é pou nou pa fè pon biten ki pa annakò èvè lwa a Bondyé. Si nou ka lésé Jéova dirijé-nou adan sé domenn-lasa osi, sé enki bon biten sa ka pòté ban nou (Iz. 48:17, 18 ; 1 Tim. 6:9, 10). Asiré sèten, Jéova ké kontinyé sèvi èvè moun asi latè pou gidé-nou ki sé pannan gwo tribilasyon-la ki sé pannan sé 1000 an la. Ès nou ké kontinyé lésé Jéova gidonné-nou ? Nou ké rivé fè sa lontan pi fasilman siwvwè nou ja ka lésé Jéova dirijé-nou dépi konnyéla. Alò an-nou lésé Jéova gidonné-nou toutlè. Nou pé fè sa lèwvwè nou ka lésé sé moun-la i chwazi la gidonné-nou pa ègzanp (Iz. 32:1, 2 ; Ébr. 13:17). Nou pé suiv Jéova, Sila ki ka gidé-nou la, é nou pé fè-y konfyans a 100% pas toupannan i ka fè-nou pasé lwen a tousa ki pé fè-nou ditò, i ka dirijé-nou asi chimen a lavi pou nou pé sa viv pou touttan adan nouvo mond la. w24.02 25 § 17-18.

Lapòt Pòl té kontan sèvi Jéova, men délè i jwenn onlo difikilté. I fè plizyè vwayaj é souvantfwa sé vwayaj-lasa té long. A épòk-lasa, lè on moun té ka vwayajé, sa pa té fasil pou-y. Pa ègzanp, a plizyè rèpriz, Pòl « té an danjé akòz dè sé flèv-la » é « akòz dè sé vòlè-la ». Anplisdisa, dépawfwa moun ki té kont-li fè-y bon méchansté (2 Kor. 11:23-27). É a pa toutlè sé frè é sè la té ni rèkonésans pou tousa i té ka fè pou yo (2 Kor. 10:10 ; Filip. 4:15). Ka ki édé Pòl pou i kontinyé sèvi Jéova ? Grasa sa i aprann adan Lézékriti é grasa sa i viv osi, i vin konnèt onlo biten asi jan dè moun Jéova yé. Sé konsa i vin sèten kè Bondyé a-y té enmé-y (Wom. 8:38, 39 ; Éféz. 2:4, 5). É i vin enmé Jéova fò toubònman. Pòl montré Jéova sa lè i « té ka sèvi lésen » é lè i té « ka kontinyé sèvi-yo » (Ébr. 6:10). w23.07 9 § 5-6.

Onlo moun ka di kè sé gouvènman-la ni itilité a yo é yo ka di osi kè fò ou obéyi a sèwten lwa séla « ki ni otorité-la » mèt anplas la. Men lèwvwè sé moun-lasa ka touvé kè on lwa pa jis oben kè i pa agou a yo, yo pa’a suiv-li. Adan Labib yo ka di-nou kè sé gouvènman-la ka fè moun soufè, kè sé Satan ki an tèt a tout sé gouvènman-la é kè talè, Bondyé ké fè-yotout fè papiyòt (Sòm 110:5, 6 ; Ékl. 8:9 ; Lik 4:5, 6). Men Labib ka di osi kè « on moun ki ka viré kont otorité-la ka viré kont dispozisyon-la Bondyé pran la ». Pou lèmoman Jéova ka pèwmèt sé gouvènman-la gouvèné sé péyi-la pou ni tibwen lòd asi latè é li Jéova, sa i vé, sé kè nou kouté-yo. Fò-nou ‘ba toutmoun sa nou ni a ba-yo’, kivédi fò-nou ba-yo enpo a yo, fò-nou rèspèkté-yo é fò-nou kouté-yo (Wom. 13:1-7). Pétèt kè pou nou on lwa pa bon, kè i pa jis oben kè i ké oblijé-nou dépansé onpakèt lajan siwvwè nou ka suiv-li. Men sé Jéova ki ka mandé-nou obéyi é fò-nou fè sa dépi yo pa ka mandé-nou fè on biten ki pa annakò èvè sa Jéova ka mandé-nou fè (Akt 5:29). w23.10 8 § 9-10.

Lèwvwè Sanson fèt, sé sé Filisten-la ki té ka menné an Israèl é yo té ka fè pèp-la vwè bon mizè (Jij 13:1). Sé Israélit-la té ka soufè onlo pas sé Filisten-la té méchan toubònman. Alò Jéova chwazi Sanson pou i « sové Israèl anba men a sé Filisten-la » (Jij 13:5). Alò fò Sanson té fè Jéova konfyans pou i té rivé an bout a misyon-lasa. On jou, lawmé a sé Filisten-la vin adan vil a Léyi. I ka sanm sa vil-lasa té ka touvé-y an Jida. Yo té vin la pou yo té pé sa tchenbé Sanson. Sé boug-Jida la trapé pè. Pwòp konpatriyòt a Sanson désidé kè yo kay tchenbé-y é kè yo kay menné-y pou sé lènmi-la. Yo maré-y èvè dé kòd ki té tou nèf é yo menné-y ba sé Filisten-la (Jij 15:9-13). Men lèspri a Jéova ba Sanson bon fòs é i réyisi libéré-y. Aprésa, « i touvé machwa a on boukèt ki té mò pa té ni tèlman lontan » é i sèvi èvè sa pou tchouyé 1 000 Filisten ! (Jij 15:14-16). w23.09 2 § 3-4.

Piti-a-piti, Jéova fè-nou konnèt pwojé a-y ki étèwnèl adan Bib-la. I toujou ka touvé on mwayen pou réyalizé pwojé a-y pas i ka « fè ansòt pou tout biten ay an sans a pwojé a-y » (Pwov. 16:4). É lè i ka fè on biten réyisi a pa pou 2 jou, men sé pou touttan. Ki pwojé Jéova anvi réyalizé, é ki chanjman i fè pou i pé sa rivé jous an bout a pwojé-lasa ? Lè Jéova kréyé sé prèmyé moun-la, i èspliké-yo ki pwojé i té ni pou yo. Mi sa i di-yo : « Fè timoun, é miltipliyé-zòt ; ranpli latè, é dominé asi-y ; dominé asi […] tout zannimo » (Jén. 1:28). Malérèzman, Adan é Èv ba Bondyé do é sé konsa yo mèt tout désandan a yo anba jouk a péché-la. Men, sa pa anpéché Jéova réyalizé pwojé a-y. I pran ondòt chimen. Onfwamenm, i désidé mèt on wayòm anplas an syèl-la é sé grasa wayòm-lasa i ké réyalizé pwojé-la i ni la pou latè é pou lézimen (Mat. 25:34). w23.10 20 § 6-7.

Jéova pé édé-nou pou nou pa lagé. Men sa pa toujou fasil siwtou lèwvwè sa ka fè bon tibwen tan kè nou ka goumé èvè menm tandans-la. Lapòt Pyè goumé èvè sé tandans-la i té ni la, men délè nou pé ni lenprésyon kè fò-nou goumé èvè dé biten ki pi rèd ki sa. Adan on ka konsa, Jéova pé ban-nou fòs-la nou bizwen la pou nou fè douvan (Sòm 94:18, 19). An-nou pran on ègzanp. Avan i té vin konnèt lavérité, on frè té enmé misyé é i té ni mové tandans-lasa dépi bon enpé lanné. Grasa lavérité, i arété fè péché sèksyèl. Vi a-y chanjé bout-pou-bout. Pannan on tan, fò i té kontinyé goumé èvè sé mové lanvi-la i té ni la men i pa lagé. Ka ki édé-y fè sa ? Mi sa i ka èspliké : « Jéova ka ban-nou fòs. » É mi sa i ka di ankò : « Grasa lèspri sen a Jéova, an rivé konprann kè on moun pé kontinyé viv kon Jéova ka mandé […] Jéova itilizé-mwen é […] menmsi an enpawfè, i ka kontinyé ban-mwen bon fòs. » w23.09 23 § 12.

Kon ou sòti vwè, pou vin on frè ki byen doubout adan lavérité sa ka mandé onlo éfò. Alò chwazi ki bon ègzanp ou pé imité, fè éfò pou ou toujou kapab réfléchi, montré ou sé on moun yo pé fè konfyans, aprann fè dé biten ki itil é préparé-w pou lèwvwè ou ké ni rèsponsabilité plita. Tousa nou sòti vwè adan awtik-lasa dwèt ka ba-w maltèt ! Men pa enkyété-w, ou pé rivé ! Sonjé kè Jéova vlé édé-w (Iz. 41:10, 13). É frè é sè a lasanblé a-w osi. Lè ou ké vin on moun ki byen doubout adan lavérité, vi a-w ké bèl toubònman. Jennfrè an nou, nou enmé-w ! Nou ka mandé pou Jéova béni éfò a-w pou-w vin on frè ki byen doubout adan lavérité ! w23.12 29 § 19-20.

Imajiné kè ou adan on ti fèt èvè frè é sè a-w. Zò pasé on bèl moman toubònman é ou ka pran on ti foto. Konm ou pa sèten kè foto-lasa byen sòti, ou ka pran dézòt ankò. Kifè, ou ka touvé-w èvè 3 foto a gwoup-la. Men ou ka rann-vou kont kè asi on foto, ni on frè ki pa’a souri. Kifè, ou ka woté foto-la asi aparèy a-w pas asi sé dézòt la tout moun-la ka souri é jous frè-la ka souri osi. An jénéral, nou ka sonjé bèl moman nou ka pasé èvè frè é sè an nou. Men imajiné kè on jou, on frè oben on sè ka di-nou oben ka fè-nou on biten ki pa tèlman janti. Ès nou ké kontinyé sonjé sa ki pasé ? Nou pé éséyé woté sa an mémwa an nou menmjan nou ka woté on foto ki pa bon adan aparèy an nou (Éféz. 4:32). Anplisdisa, pou kantité bon moman nou ja pasé èvè frè an nou oben èvè sè an nou é kè nou ni adan mémwa an nou, a pa ti biten-lasa nou ké ni dimal a fè. Sa nou vé kontinyé sonjé, sé sé bèl ti moman-la nou pasé la èvè frè é sè an nou é nou vé ba-yo onlo valè. w23.11 12-13 § 16-17.

Sé mo grèk la i itilizé la ka fè-nou konprann kè fò sé sè-la abiyé-yo byen é fò yo tchenn kont dè sa lézòt ka rèsanti é dè sa yo ka pansé lèwvwè yo ka chwazi ki lenj yo ka mèt. Nou vréman fyèw dè sè an nou ki byen doubout adan lavérité davwa yo ka abiyé-yo èvè modèsti ! Pou suiv ègzanp a Jézi, fò-nou ni bon jijman. Ka yo ka kriyé bon jijman ? Sé lè ou kapab fè ladiférans antrè sa ki byen é sa ki mal é kè aprésa ou kapab fè sé bon chwa-la. An-nou pran ègzanp a Abigayil. Akòz dè on désizyon mari a-y pran, on malè té kay rivé tout fanmi a-y é tout sé moun-la ki té ka travay ba-y la. Men Abigayil pòté mannèv é konm i té ni bon jijman, i sové vi a onlo moun (1 Sam. 25:14-23, 32-35). Anplisdisa, lèwvwè nou ni bon jijman, sa ka édé-nou sav a ki moman pou nou palé é a ki moman pou nou pé. Sa ka édé-nou montré lézòt kè sa ki ka rivé-yo ka entérésé-nou men nou ké fè sa on mannyè pou nou pa jenné-yo (1 Tés. 4:11). w23.12 20 § 8-9.

Lapòt Pòl maké sé pawòl-lasa pou lasanblé a Wòm. Frè é sè a lasanblé-lasa té aprann konnèt Jéova é Jézi, yo té ka montré kè yo té ni fwa adan yo é yo vin krétyen. Alò Jéova té « déklaré kè [yo] sé dé moun ki jis pas [yo té] ni lafwa » é i té voyé lèspri sen a-y asi yo pou yo té vin wen (Wom. 5:1). Sé konsa yo vin ni on bèl èspérans é yo té pé sèten kè sa yo té ka èspéré la té’é réyalizé. Plita, Pòl maké on lèt ba sé krétyen wen la ki té ka rété Éfèz la. I palé-yo dè èspérans-la Bondyé ba-yo la é i di-yo kè « i séré la antankè éritaj pou sé sen-la » (Éféz. 1:18). I di sé Kolosyen-la osi ola èspérans a yo té’é réyalizé. I di-yo kè ‘yo mèt èspérans a yo dè koté ba yo an syèl-la’ (Kol. 1:4, 5). Alò sé krétyen wen la ni lèspwa kè yo ké résisité pou yo viv pou touttan an syèl-la, é sé koté-lasa yo ké gouvèné èvè Kris (1 Tés. 4:13-17 ; Rév. 20:6). w23.12 9 § 4-5.

Mo-la yo tradui-la é ki bay « ké pwotéjé » sé té on mo kè sé militè-la té ka itilizé. Yo té ka sèvi èvè-y pou palé dè sòlda ki té ka pwotéjé on vil sianka moun té ka vin ataké-y. Sé moun-la ki té ka rété adan vil-lasa té ka dòmi trankilman pas yo té sav kè té ni sòlda ki té la pou pwotéjé-yo. Menmjan-la, lèwvwè lapé ki ka vin dè Bondyé ka pwotéjé tchè an nou é lèspri an nou, nou ka santi-nou kalm pas nou sav nou ansékirité (Sòm 4:8). Menmsi sitiyasyon an nou pa’a chanjé tousuit, nou pé santi-nou anpé kon Àn (1 Sam. 1:16-18). É lè nou ka santi-nou anpé konsa, nou ka rézonné pibyen é nou ka rivé pran bon désizyon pi fasilman. Ka pou nou fè ? Lèwvwè dé biten ka chouboulé lèspri a-w, mandé Jéova pwotéjé-w. Kijan ou pé fè sa ? Priyé joustan ou santi kè i trankilizé-w (Lik 11:9 ; 1 Tés. 5:17). Si ou ka jwenn on éprèv, priyé Jéova toutlè é ou ké vwè jan lapé-la Jéova ka bay la ké pwotéjé tchè a-w é lèspri a-w (Wom. 12:12). w24.01 21 § 5-6.

Pou fè non a Pap’a-y vin sen a pa ti biten Jézi andiré. Yo fè-y sibi bon abominasyon, yo jiré-y, é yo manti asi-y. Men i té sèten kè i té fè tousa Pap’a-y té mandé-y-fè ; i pa té wont (Ébr. 12:2). I té sav osi kè pannan i té ka pasé sé moman difisil lasa, Satan té ka pwofité pou limé difé asi-y (Lik 22:2-4 ; 23:33, 34). Onsèl biten Satan té ka chèché a fè, sé anpéché-y rété fidèl a Jéova a san pou san. Men Satan pèd fil a-y ! Jézi fin pa montré kè Satan sé on moun ki ka manti é kè ni dé moun ki byen désidé a rété fidèl a Jéova a san pou san menm lèwvwè yo anba gwo éprèv ! Ès ou anvi fè Wa a-w plézi ? Si sé sa, kontinyé louwé non a Jéova. Pousa, fè dòt moun konnèt kimoun ki Bondyé an nou vréman. Konsa, ou ké imité Jézi (1 Pyè 2:21). Kon-y, ou ké fè Jéova plézi é ou ké montré kè lènmi a-y, Satan, ka manti kon pa ti ni ! w24.02 11-12 § 11-13.

Pannan sé 5 dènyé lanné-la ki pasé la, ni pliski on milyon moun ki pran lèbatèm é ki vin Témwen a Jéova. Lèwvwè ou ka désidé ba Jéova vi a-w, ou ka chwazi vin disip a Jézikris é ou ka chwazi dè mèt volonté a Jéova prèmyé douvan adan vi a-w. Ka sa ké chanjé ba-w ? Mi sa Jézi di : « Si on moun vlé suiv-mwen, fò i rènyé-y limenm a-y » (Mat. 16:24). Èksprésyon grèk-la yo tradui la é ki bay « fò i rènyé-y limenm a-y » pé vé di osi kè « moun-lasa pa’a viv pou-y menm ankò ». Alò si ou ka ba Jéova vi a-w, fò ou ké mèt tousa ki pa annakò èvè volonté a-y akoté (2 Kor. 5:14, 15). Pa ègzanp, fò ou ké rèfizé fè « sa lachè ka pwodui » kon péché sèksyèl (Gal. 5:19-21 ; 1 Kor. 6:18). Ès sa ké fè vi a-w vin pi rèd ? Awa. Si ou enmé Jéova é si ou sèten kè sa i ka mandé-w fè sé pou byen a-w, vi a-w pé’é vin pi rèd (Sòm 119:97 ; Iz. 48:17, 18). w24.03 2 § 1 ; 3 § 4.

Jéova ka ba moun ki ni favè a-y lèspri sen a-y (Mat. 12:18). Mandé-w : « Ès adan vi an mwen, an ka montré an ni sèwten kalité ki adan fwi a lèspri a Bondyé ? » Pa ègzanp, pétèt ou rèmawké kè ou ka pran plis pasyans èvè lézòt dépi ou konnèt Jéova. An réyalité, lè ou ni sèwten kalité ki adan fwi a lèspri a Bondyé, sa ka montré lèspri sen ka aji anlè-w é sé laprèv kè ou ni favè a Bondyé ! Jéova ka padonné péché a moun ki ni favè a-y grasa ranson-la (1 Tim. 2:5, 6). Men pétèt ou ni dimal a kwè kè ou ni favè a Jéova, alòskè ou ni fwa adan ranson-la é kè ou ja batizé. Adan ka-lasa ka ou pé fè ? Sonjé, a pa toutlè nou pé fè sa nou ka rèsanti konfyans. Pawkont nou pé fè Jéova konfyans toutlè. Pou-y, dépi nou ni fwa an laranson, nou sé dé moun ki jis é i ka pwomèt i ké béni-nou (Sòm 5:12 ; Wom. 3:26). w24.03 30 § 15 ; 31 § 17.