« Jij a tout latè » plen mizérikòd. An-nou fè-y konfyans !

 1. Jéova anségné Abraam on vérité ki ka rasiré-nou. Ki vérité ésa ?

ABRAAM pé’é jen oubliyé ti kozé-la i fè la èvè Jéova. Bondyé sèvi èvè on zanj pou fè Abraam sav kè i té kay détwi Sodòm é Gomò. Abraam té fidèl a Jéova, men lèwvwè i tann sa, sa chouboulé-y toubònman. Alò mi sa i mandé Bondyé : « Ès vréman ou kay fè jis-la mò ansanm èvè méchan-la ? […] Èskè Jij a tout latè pé’é fè sa ki jis ? » Èvè onlo pasyans, Jéova anségné zanmi a-y kè i té enmé onlo, on vérité ki ka rasiré-noutout : Bondyé pé’é jen détwi moun ki jis (Jén. 18:23-33).

 2. Poukwa nou pé sèten kè lè Jéova ka jijé on moun, i toujou ka fè-y on mannyè ki jis é ki plen mizérikòd ?

² Poukwa nou pé sèten kè lè Jéova ka jijé on moun, i toujou ka fè-y on mannyè ki jis é ki plen mizérikòd ? Ében sé pas nou sav kè « Jéova ka vwè sa ki ni an tchè [a moun] » (1 Sam. 16:7). An réyalité, i sav sa ki an tchè a chakmoun (1 Wa 8:39 ; 1 Kron. 28:9). Ou pa’a touvé sa èstraòwdinè ? Jéova ni lontan plis sajès ki nou. É sé sa ki ka fè si nou pa toujou ka konprann poukwa i ka pran sèwten désizyon. Sé pousa lapòt Pòl ni lokazyon di : « A pa ti rèd jijman a [Bondyé] rèd a konprann » (Wom. 11:33).

3-4. a) Délè, ki kèsyon nou té’é pé pozé-nou ? b) Dè kibiten nou ké palé adan awtik-lasa ? (Jan 5:28, 29).

³ Menmsi nou sav kè Jéova toujou ka fè sa ki jis, délè nou pé rivé a pozé-nou déotwa kèsyon ki ka sanm séla Abraam té pozé la. Nou pé jous mandé-nou : « Lèwvwè Jéova ka détwi on moun, ès sa posib kè i viré résisité moun-lasa apré ? Pa ègzanp, ès ni on èspwa pou sé moun-Sodòm é Gomò la ? Konm Labib ka palé dè on “rézirèksyon […] pou moun ki pa jis”, ès pa ni mwayen pou sèwten adan sé moun-la Bondyé détwi la bénéfisyé dè sa ? » (Akt 24:15).

⁴ An-nou wouvwè sa nou ja konnèt asi larézirèksyon. Pa ni lontan, nou wouvin asi mannyè nou té ka konprann ka ki on « rézirèksyon pou lavi » é ka ki on « rézirèksyon pou on jijman »a (li Jan 5:28, 29). Difètkè nou ka konprann sa pibyen, sa ka édé-nou konprann pibyen dòt pwen ankò. Sé sa nou ké vwè adan awtik-lasa é adan tala ki ka vin apré la. Nou ké palé dè jijman a Jéova ki toujou jis, é nou ké vwè ka nou pa sav asi sé jijman-lasa é ka nou sav asi yo.

SA NOU PA SAV

 5. Ka piblikasyon an nou té ka di anrapò èvè moun-Sodòm é Gomò ?

⁵ Avan, lè piblikasyon an nou té ka palé dè sa ki ké rivé moun ki pa jis, ka yo té ka di ? Yo té ka èspliké kè moun Jéova détwi, kon séla ki té ka rété Sodòm é Gomò la, pé’é résisité. Men apré sé frè a Komité santral la étidyé sijé-lasa pibyen é apré yo pran tan priyé Jéova anrapò èvè sa, yo konprann kè nou pé pa sèten dè sa a san pou san. Poukisa ?

 6. Jéova ni lokazyon jijé moun ki pa jis. Kimoun ésa, é ka nou pa sav ?

⁶ An-nou vwè dòt ègzanp ankò ki ka sanm tala. Adan Labib, ni plizyè istwa ki ka montré kijan Jéova ni lokazyon jijé moun ki pa té jis. Pa ègzanp, ni tout sé moun-la Jéova détwi la asi latè pannan Délij-la. Ni sé 7 nasyon-la ki té ka rété asi Tè-la Bondyé té pwomèt pèp a-y la é kè i té mandé sé Izraélit-la détwi la. É ni osi sé 185 000 sòlda asiriyen la kè zanj a Jéova tchouyé adan onsèl lannuit (Jén. 7:23 ; Dét. 7:1-3 ; Iz. 37:36, 37). Lèwvwè nou ka pran tan analizé sé ègzanp-lasa, ès Labib ka ban-nou asé enfòwmasyon pou nou pé di kè lè Jéova détwi tout sé moun-lasa, sé té pou touttan é kè yo pé’é jen résisité ? Awa, nou pé pa di sa. Poukisa ?

 7. Ka nou pa sav anrapò èvè sé moun-la ki mò pannan Délij-la oben ki mò lèwvwè sé Izraélit-la pran Kanaan ? (gadé imaj-la ki anlè po a jounal-la).

⁷ Adan sé ègzanp-la nou sòti vwè la, nou pa sav kijan Jéova jijé chakmoun é nou pa sav nonplis si sé moun-la i détwi-la té ni lokazyon aprann konnèt-li é rèpanti-yo. Lè Labib ka palé dè péryòd a Délij-la, i ka di kè Noé té « on nonm ki té ka préché lajistis » (2 Pyè 2:5). I ka di osi kè Noé konstwi on lawch é kè sé té on gwo gwo travay toubònman. Men Labib pa’a di kè toupannan i té ka fè sa, i té ka éséyé avèti chakmoun asi latè kè Délij-la té kay vin é kè yo té kay pèd vi a yo. Menmjan-la, nou pa sav si tout sé moun-la ki té ka rété adan péyi a Kanaan la ni lokazyon aprann konnèt Jéova é chanjé konpòwtasyon a yo.

 8. Kibiten nou pa konnèt anrapò èvè sé moun-la ki té ka viv Sodòm é Gomò la ?

⁸ É sé moun-Sodòm é Gomò la ? Lòt, on nonm ki té jis, té ka viv Sodòm. Ès i préché ba chakmoun ki té ka rété Sodòm é Gomò ? Nou pa konnèt. Sé vré sé té dé moun ki té méchan men ès yochak té sav ka ki bon é ka ki mové ? Sonjé jan on foulmoun té vé vyolé sé moun-la Lòt té envité akaz a-y la. Labib ka di kè, adan foulmoun-lasa, té ni ki « tigason [ki] grannonm » (Jén. 19:4 ; 2 Pyè 2:7). Alò ès nou pé di kè Jéova, ki sé on Bondyé ki plen mizérikòd, pé’é jen résisité sé moun-lasa ? Awa, nou pé pa di sa. Sé vré kè Jéova té di Abraam kè pa menm té ni 10 moun ki té jis adan vil-lasa (Jén. 18:32). Sa vé di kè tout sé moun-lasa sé té dé moun ki pa té jis, alò Jéova fè-yo péyé pou sa yo fè é i té ni dwa fè sa. Men ès nou pé sèten kè pa ni ponyonn adan yo ki ké fè pawti a ‘sé moun-la ki pa jis la é ki ké résisité’ ? Awa nou pé pa di sa, pas nou pa sèten dè sa menm.

 9. Ka nou pa sav anrapò èvè Salomon ?

⁹ Adan Labib, nou ka touvé osi istwa a moun ki té jis men ki vin dé moun ki pa jis. Pa ègzanp, ni wa Salomon. I té konnèt Jéova, i té sav kijan pou i té adoré-y é Jéova té béni-y onlo. Men plita, i mété-y ka adoré fo-dyé. Jéova fè kòlè akòz dè sé péché-la i fè la. É akòz dè sa Salomon fè, pèp-la soufè pannan plizyè syèk. Labib ka di kè Salomon « fèmé zyé a-y pou pozé kò a-y èvè zansèt a-y » é nou sav kè pawmi zansèt a-y té ni wa David, on nonm ki té fidèl (1 Wa 11:5-9, 43 ; 2 Wa 23:13). Men lèfètkè yo téré Salomon owa zansèt a-y, ès sa vé di kè Jéova ké résisité-y ? Labib pa ka di sa. Sèwten moun té’é pé di konsa kè « on moun ki mò péyé pou péché a-y » (Wom. 6:7). É sa vré, men sa pa vé di kè toutmoun ki mò ké résisité, konsi dépi on moun mò sa té ka ba-y dwa wouviv ankò. Larézirèksyon sé on kado Pap’an nou ki plen lanmou ka fè-nou. I ka ba moun i vlé laposibilité dè sèvi-y pou touttan (Jòb 14:13, 14 ; Jan 6:44). Ès Salomon ké bénéfisyé dè kado-lasa osi ? Sé Jéova tousèl ki konnèt. Pawkont, sa nou sav, sé kè Jéova ké aji èvè jistis.

SA NOU SAV

10. Ka Jéova ka rèsanti lèwvwè fò i détwi on moun ? (Ézékyèl 33:11 ; gadé imaj-la osi).

¹⁰ (Li Ézékyèl 33:11.) Èvè onlo bonté, Jéova ka di-nou sa i ka rèsanti lè i ka jijé moun. Dayè, lapòt Pyè di on biten ki ka sanm sa pwofèt Ézékyèl maké onlo. I di kè « Jéova […] vé pa ponmoun détwi » (2 Pyè 3:9). Lidé-lasa ka rasiré-nou onlo toubònman, pas nou sav kè Jéova pé’é jen détwi on moun pou touttan si i pa ni on bon rézon pou fè sa. Tèlman Jéova ni mizérikòd, dépi sa posib, i ka aji èvè moun èvè mizérikòd.

11. Kimoun ki pé’é résisité é kijan nou fè sav sa ?

¹¹ Ka nou sav anrapò èvè moun ki pé’é résisité ? Adan Labib, nou ka touvé enki déotwa ègzanpb. Jézi ni lokazyon di kè pa ni rézirèksyon pou Jida Iskaryòt (Mawk 14:21 ; gadé osi Jan 17:12 é nòt-la ki adan Bib-la ki fèt pou étidyé la an fransé). Jida té sav byen kè sa i té kay fè la té kont Jéova é kont Gason a-y Jézi men i désidé fè-y kanmenm (gadé Mawk 3:29 é sé nòt-la ki adan Bib-la ki fèt pou étidyé la an fransé). Anplisdisa, Jézi di kè sèwten adan sé chèf a rèlijyon juif la, ki té kont li, pa té’é résisité (Mat. 23:33 ; gadé Jan 19:11 é nòt-la ki asi « l’homme » ki adan Bib-la ki fèt pou étidyé la an fransé). É lapòt Pòl ni lokazyon di kè moun ki apòsta é ki pa’a rèpanti-yo pé’é résisité nonplis (Ébr. 6:4-8 ; 10:29).

12. Ka nou sav anrapò èvè mizérikòd a Jéova ? Bay déotwa ègzanp.

¹² Kon nou vwè talè la, nou sav kè Jéova ni mizérikòd é kè i « vé pa ponmoun détwi » ? Ka ki ka montré sa ? An-nou vwè jan i aji èvè mizérikòd èvè sèwten moun ki té fè dé péché ki grav. Pa ègzanp, wa David fè on adiltè é i tchouyé on moun ! Men konm David rèpanti-y, Jéova padonné-y (2 Sam. 12:1-13). Wa Manasé, li kanta-y, fè dé biten ki pa té bon menm pannan bon enpé tan. Poutan, menm adan on ka grav konsa, Jéova aji èvè mizérikòd èvè-y. I padonné Manasé pas i rèpanti-y (2 Kron. 33:9-16). Sé ègzanp-lasa ka fè-nou sonjé kè Jéova ka aji èvè mizérikòd èvè on moun chakfwa i ka vwè kè i ni on bon rézon pou fè sa. Alò, i ké résisité moun ki ka rèkonnèt kè sé péché-la yo fè la grav é ki ka rèpanti-yo kon David é Manasé fè.

13. a) Poukwa Jéova aji èvè mizérikòd èvè sé Ninivit-la ? b) Ka Jézi di anrapò èvè sé Ninivit-la ?

¹³ Nou sav osi kè Jéova aji èvè mizérikòd èvè sé Ninivit-la. I té di Jonas : « An tann mové biten yo ka fè ». Men lè yo rèpanti-yo parapòt a péché yo té fè, Jéova padonné-yo èvè onlo bonté. Lèwvwè Jonas vin sav sa, i fè kòlè. Jéova montré kè i té ni lontan plis mizérikòd ki Jonas é i fè-y sonjé jan sé Ninivit-la « pa menm [té] sav sa ki byen é sa ki mal » (Jonas 1:1, 2 ; 3:10 ; 4:9-11). Plita, Jézi sèvi èvè ègzanp-lasa pou montré disip a-y jan Jéova jis é jan i ni mizérikòd. Jézi di kè « lè jijman-la ké rivé », sé Ninivit-la ki rèpanti-yo la « ké résisité » (Mat. 12:41).

14. Lè Jéova ké résisité moun pou jijé-yo, ki chans i ké ba sé Ninivit-la ?

¹⁴ Men lè yo ka di kè sé Ninivit-la ké résisité pou on « jijman », ka sa vé di ? Jézi palé dè on « rézirèksyon pou on jijman » ki pou fèt (Jan 5:29). Lè i di sa, i té ka sonjé kè toupannan i ké ka gouvèné pannan 1000 an, ké ni « on rézirèksyon ki pou moun jis, ki pou moun ki pa jis » (Akt 24:15). Pou moun ki pa jis, rézirèksyon-lasa sé ké « on rézirèksyon pou on jijman ». Lè Jéova ké résisité-yo, li é Jézi ké gadé si yo ka aksèpté sa yo aprann-yo apré rézirèksyon a yo é si yo ka mèt sa an pratik. Si janmen on Ninivit yo résisité vé pa adoré Jéova, a moman-lasa Jéova ké jijé-y é i ké kondanné-y (Iz. 65:20). Men touséla ki ka désidé adoré Jéova é ki ka rété fidèl a-y ké pé viv asi latè pou touttan ! (Dan. 12:2).

15. a) Poukwa fò pa nou di kè ponyonn adan sé moun-la ki mò la lèwvwè Bondyé détwi Sodòm é Gomò pé ké résisité ? b) Kijan pou nou konprann sa Jid 7 ka di ? (gadé ti karé-la « Ka Jid té vé di ? »).

¹⁵ Alèla, an-nou palé dè sé moun-la ki té ka rété Sodòm é Gomò la. Jézi di kè pannan « jou a Jijman-la », sa té’é pasé pibyen pou yo ki pou sé moun-la ki ba-y do la é ki rèfizé kouté ansègnman a-y (Mat. 10:14, 15 ; 11:23, 24 ; Lik 10:12). Ka i té vlé di ègzaktèman ? Nou té’é pé pansé kè Jézi té ka ègzajéré pou ba sa i té ka di plis pwa. Men lè nou byen gadé, Jézi pa té ka ègzajéré ditou lè i palé dè moun-Sodòm é Gomò, é i pa té ka ègzajéré nonplis lè i di osi kè yo té’é résisité sé Ninivit-la pannan jou a Jijman-la. Okontrè, i ka sanm sa i té ka palé dè biten ki té ké fèt poudèbon. Lè i té ka palé dè « jou a Jijman-la », i dwèt té ka palé dè menm jou-la, ki pou sé moun-la ki té ka rété Sodòm é Gomò la, ki pou sé Ninivit-la. Kon sé Ninivit-la, sé moun-Sodòm é Gomò la fè onlo mové biten. Men Bondyé té ba sé Ninivit-la lokazyon rèpanti-yo. Anplisdisa, sonjé sa Jézi té di lèwvwè i té ka palé dè on « rézirèksyon pou on jijman ». I di kè moun « ki té ni labitid fè mové biten » ké résisité (Jan 5:29). Alò i ka sanm sa ni on èspwa pou sèwten moun ki té ka rété Sodòm é Gomò. Bondyé pé désidé résisité déotwa adan yo é pétèt nou ké ni lokazyon aprann-yo konnèt Jéova é Jézi.

16. Lè Jéova ka désidé si i ka résisité on moun, ka i ka gadé ? (Jérémi 17:10).

¹⁶ (Li Jérémi 17:10.) Adan vèwsé-lasa, nou ka touvé sa nou sav asi jan Jéova ka jijé on moun. Jéova toujou ka « ègzaminé tchè-la », é i toujou ka « ègzaminé sé pansé-la ki pli fon la andidan a on moun ». Lèwvwè jou a larézirèksyon ké rivé, Jéova ké ba chakmoun sa i mérité sèlon jan i konpòwté-y. Jéova ké karé lèwvwè sa ké nésésè é i ké aji èvè mizérikòd chakfwa sa ké posib. Alò nou pa dwètèt janmé di ké Jéova pé’é résisité on moun si nou pa sèten dè sa !

« JIJ A TOUT LATÈ » KÉ FÈ SA KI JIS

17. Ka ki ké rivé tout sé moun-la ki ja mò la ?

¹⁷ Dépi jou-la Adan é Èv ba Bondyé do é kè yo mèt-yo ka suiv Satan, plizyè milya moun ja mò. ‘Lanmò’, sé vréman on vyé lènmi (1 Kor. 15:26). Ka ki ké rivé tout sé moun-la ki ja mò la ? Pawmi disip a Jézikris ki fidèl, sé enki 144 000 ki ké résisité an syèl-la, é yo ké pé viv san janmé mò (Rév. 14:1). Onlo misyé é madanm ki fidèl é ki enmé Jéova ké bénéfisyé dè on « rézirèksyon […] pou moun jis » é yo ké viv pou touttan asi latè siwvwè yo ka rété fidèl pannan sé 1000 an é pannan dènyé éprèv-la (Dan. 12:13 ; Ébr. 12:1). É pannan menm péryòd-lasa, « moun ki pa jis », kivédi moun ki pa jen sèvi Jéova oben moun « ki té ni labitid fè mové biten », ké ni lokazyon chanjé konpòwtasyon a yo é vin dé moun ki fidèl a Bondyé (Lik 23:42, 43). Men, ni sèwten moun Jéova pé’é résisité pas yo té vréman méchan é yo té byen désidé a pa kouté Jéova é a anpéché-y réyalizé pwojé a-y (Lik 12:4, 5).

18-19. a) Poukwa nou pé sèten kè Jéova ké jijé moun ki mò èvè jistis ? (Izayi 55:8, 9). b) Ka nou ké vwè adan awtik-la ki ka vin la ?

¹⁸ Ès nou pé sèten a san pou san kè lèwvwè Jéova ka jijé on moun i toujou ka pran bon désizyon-la ? Wi ! É Abraam té konprann sa byen. Jéova sé on jij ki pawfè, i plen sajès é i plen mizérikòd. Sé-y ki « Jij a tout latè » ! I fòwmé Gason a-y Jézi é i ba-y jijé limanité (Jan 5:22). Ki Papa-la, ki Gason-la pé vwè sa chakmoun ni an tchè a yo (Mat. 9:4). Alò kèlkèswa moun-la yo ké jijé la, yo toujou ké fè « sa ki jis » !

¹⁹ Fò-nou byen désidé a fè Jéova konfyans. I sav pibyen ki nou ki désizyon pou pran adan chak sitiyasyon. Nou ka rèkonnèt kè Jéova pa ban-nou dwa jijé ponmoun, men li, i ni dwa fè sa (li Izayi 55:8, 9). Sé pousa, dépi sé pou jijé on moun, nou ka lésé tout biten-la an men a Jéova é Jézi. Anplisdisa, nou sav kè Jézi, Wa an nou, ka imité Pap’a-y on mannyè ki pawfè kivédi i ka aji èvè jistis é èvè mizérikòd kon-y (Iz. 11:3, 4). Men, é lè yo ké jijé moun pannan gwo tribilasyon-la ? Ès ni dé biten nou konnèt é dé biten nou pa konnèt asi sa ? Sé sa nou ké vwè adan awtik-la ki ka vin la.