Bandi-a ki té répanti é ki yé té mété asou roun poto òbò Jézi, té divèt jwif. Jwif-ya té ka adoré rounsèl Bondjé, mé moun nasyon-yan té ka krè annan roun patché bondjé (Ex. 20:2, 3 ; 1 Cor. 8:5, 6). Si sa bandi-a té sa roun moun nasyon-yan, a pito sa késyon-an nou té ké jwenn annan tèks-a pou jòdla : « Ès to pa ka krenn bondjé-ya menm ? » Anplis di sa, Bondjé pa té voyé Jézi wè moun nasyon-yan mé i té voyé li ‘òbò brébi ki té pédi ki té annan nasyon Israyèl-a’ (Mat. 15:24). É Bondjé té di Israyélit-ya ki i té ké résisité moun mouri-ya. Donk bandi-a ki té répanti té divèt savé sa, é dapré sa i di, i té ka pansé ki Jéova té ké résisité Jézi é té ké fè l’ divini Rwa di so rwayonm. Donk sa bandi-a té ka èspéré Bondjé résisité l’ li menm osi. Kou bandi-a té jwif, i té divèt byen konnèt istwè Adan ké Èv. Donk, lò Jézi palé di paradi-a annan Luc 23:43, i dèt wè so kò annan roun bèl jarden isi-a asou latè-a (Gen. 2:15). w22.12 8-9 § 2-3.

A gras a lèspri sen Bondjé rounso nou pouvé préché. Poukisa ? Paské Satan ka briga ké nou pou fè nou arété préché (Rév. 12:17). Bokou moun ka pansé ki Satan tro fò pou nou ganyen asou li. Mé lò nou ka préché, a ganyen nou ka ganyen asou li (Rév. 12:9-11). Kouman ? Lò nou ka préché, nou ka montré ki Satan pa ka fè nou pè. Chak kou nou ka préché, i ka pédi. Donk, sa ka montré nou ki Jéova ka bay nou fòrs gras a so lèspri sen é ki nou ka fè l’ plézi (Mat. 5:10-12 ; 1 Pierre 4:14). Lèspri Bondjé pouvé bay nou fòrs nou bézwen pou nou tchenbé annan nenpòrt ki éprèv nou ka jwenn lò nou ka préché (2 Cor. 4:7-9). Atò, kisa nou divèt fè pou nou kontinyé rousouvwè sa lèspri sen-an ? Nou divèt priyè pou sa toulong é nou divèt sir ki Jéova ké tandé nou lapriyè. w22.11 5 § 10-11.

Nou ka montré nou frè ké sò-ya ki nou kontan yé lò nou ka fè tousa nou pouvé pou nou rété byen ké yé. Nou ka chaché imité Jéova lò nou paré pou pardonnen. A ké tout so tchò i bay so Pitit an sakrifis pou nou péché. Donk, ès nou pa divèt pardonnen nou frè ké sò-ya ké tout nou tchò lò yé ka péché kont nou ? Nou pa lé sanblé ké sèrvitèr-a ki té méchan annan roun èkzanp Jézi pran. I té dévé so mèt patché soumaké mé mèt-a té di li lésé sa tonbé. Mé sèrvitèr-a li menm pa asèpté lésé roun ti soumaké rounòt sèrvitèr té dévé li (Mat. 18:23-35). Si to gen roun problèm ké roun moun annan asanblé-a, ès to pa pouvé alé wè li pou fè lapè ké li anvan Mémoryal-a ? (Mat. 5:23, 24). Si to ka fè sa, to ké montré ki to kontan Jéova ké Jézi bokou. w23.01 29 § 8-9.