2 Tamuera
16 Ngke e a tabunnako teutana Tawita ma taubukin te maunga,+ ao e mena ikekei Tiba+ are ana toro Mebiboteta+ bwa e na kawaria, ma taongki aika uoman aika iai kaintoka i aoia, ao a mena i aoia kariki aika 200, taiani kureebe aika bati aika buabuaaki aika mwau aika 100, uaanikai* aika bati aika buabuaaki aika mwau aika 100 aika reke n tain te kabuebue, ao teaina te kaatibu ni wain ae bubura.+ 2 E taku ngkanne te uea nakon Tiba: “E aera ngkai ko uotii baikai?” E kaeka ni kangai Tiba: “Taian taongki bon ibukia kaaini batan te uea bwa a na toka i aoia, ao te kariki ma te uaanikai are reke n tain te kabuebue boni kanaia rorobuaka n ataei, ao te wain bon nimaia akana kua n te rereua.”+ 3 Ao e taku te uea: “Ao e nga natin* am toka?”+ Ao e taku Tiba nakon te uea: “Are e tiku i Ierutarem, bwa e taku, ‘N te bong aei ao a nang kaoka uean tamau nakoiu tibun Iteraera.’”+ 4 Ao e taku te uea nakon Tiba: “Noria! Bon am bwai bwaai nako ake ana bwai Mebiboteta.”+ E kaeka ni kangai Tiba: “I bobaraaki i matam. E bia reke akoau i matam, au toka ae te uea.”+
5 Ngke e a roko te Uea are Tawita i Baurim, ao e a otinako naba te mwaane temanna ae kaain ana utu Tauro, ae arana Timei+ ae natini Keera, ao e tatakarua ni karekekai ngke e a tabe ni kaan.+ 6 E karebanaa Tawita n taian atibu ma ana toro te Uea are Tawita ni kabane, n ikotaki naba ma aomata ni kabane ao mwaane aika korakora ake a mena i angaataina ao i angamaingina. 7 E taku Timei ngke e taetae ni karekekai: “Naako, naako, te mwaane ngkoe ae te tia katuturaraa! Te mwaane ngkoe ae akea uaam! 8 E a tia Iehova ni kaoka nakoim am katuturaraa ni kabane nakoia kaaini batan Tauro, are ko onea mwina n tautaeka bwa te uea, ma e anga te nakoa n uea Iehova nako nanoni bain Abetarom are natim. E a taonikonako te kabuanibwai, ibukina bwa te mwaane ngkoe ae ko katuturaraa!”+
9 E taku ngkanne Abitiai are natin Teruia+ nakon te uea: “E aera ngkai e riai te kamea ae mate aei+ n taetae ni karekea kain au toka ae te uea?+ Taiaoka kariaia bwa N na nako ni kabakua roroana.”+ 10 Ma e taku te uea: “Tera irekerekemi n aei ngkami aika natin Teruia?+ Ke e taetae ni karekea kaiu teuanne,+ bwa e kangai Iehova nakoina:+ ‘Taetae ni karekea kain Tawita!’ Mangaia ae antai ae riai ni kangai, ‘E aera ngkai ko karaoa aei?’” 11 E taku ngkanne Tawita nakon Abitiai ma ana toro ni kabane: “Ngkana ngaia bwa e kani kamateai natiu ae otinako mai rabwatau,+ ao ai batira riki ngkanne kantaningaan anne mairoun te aomata ae tibuni Beniamin!+ Katikua ma arona bwa e na taetae ni karekea kaiu, bwa bon Iehova ae tuangnga! 12 Tao ane e na nora karawawataau Iehova,+ ao e na manga kaoka te bwai ae raoiroi nakoiu Iehova bwa oneani mwin taeka ni karekekai aika takaruaeaki nakoiu n te bong aei.”+ 13 Ao a reitaanako mwanangaia n te kawai Tawita ma ana rorobuaka, ao e nakonako Timei n iteran te maunga i rarikin Tawita, n tatakarua n taetae ni karekekai+ ao ni karekare n taian atibu ao n te tano ae bati.
14 Imwin te tai ae maan ao e a roko te uea ma aomata ni kabane ake raona n aia tabo, ao a a rangi ni kua, ao a a motiki rawaia.
15 N te tai anne ao a a roko i Ierutarem Abetarom ma mwaane ni kabane aika tibun Iteraera, ao raona Aitobera.+ 16 Ngke e a rin Utiai+ are te Arekaite+ are raoraon* Tawita iroun Abetarom, ao e taku Utiai nakon Abetarom: “E na abwabwaki maiun te uea!+ E na abwabwaki maiun te uea!” 17 Ao e taku Abetarom nakon Utiai: “Anne am tangira ae koaua* nakon raoraom? E aera ngkai ko aki ira raoraom?” 18 Mangaia are e taku Utiai nakon Abetarom: “Tiaki ngaia anne, I mena n ana itera teuare rineaki iroun Iehova, ao iroun naba te natannaomata aei, ao mwaane ni kabane aika tibun Iteraera. N na tiku i rarikina. 19 Ao ae I a manga kangai riki, Antai ae I riai n toro irouna? Tiaki bon natina? N aron are I a tia ni beku iroun tamam, ao ai arona naba bwa N na beku iroum.”+
20 E taku ngkanne Abetarom nakon Aitobera: “Anganai am taeka n reirei.*+ Tera ae ti riai ni karaoia?” 21 Ao e taku Aitobera nakon Abetarom: “Ko na wene n taanga ma buun nako tamam ni kewe,*+ ake e katikuia bwa a na tararuaa te auti.*+ Ao ane a na bane n ongo tibun Iteraera ae ko a karika ribaakim iroun tamam, ao ane a na kakorakoraaki iai te koraki ake a boutokaiko.” 22 Mangaia are a katea ana umwanrianna Abetarom i aon te taubuki,+ ao e wene n taanga Abetarom ma buun nako tamana ni kewe,+ i mataia tibun Iteraera ni kabane.+
23 Ni boong akanne, ao e iangoaki ana taeka n reirei Aitobera+ bwa* te taeka ae nako mairoun te Atua ae koaua. Anne aroni karinean ana taeka n reirei ni kabane Aitobera iroun Tawita ao Abetarom.