Gbò Nvín Ãa —Éé Nĩ́ O ń Túi Bọọ Dùm Naamaié?

“N DA gbĩ́ì ge ié kà lé nu a tõo lọ̀l váà lee lọl mm̀ dùm.” Vóá bée enèkà nvín ãa pábia kọ́ẹ́. Bàà bùlà á gé ló kọ olo gbí nàgé naavó beà sẹlẹ. Sõò mm̀ mósĩ́ deè ní olo ń láá iéé “kà lé nu e a tọọ lọ̀l vá à lee” lọl mm̀ dùme? Bàẹ́ láá emí mm̀ kpá, váá kọnáge boo tẹ̀lèvísiòn, àbèè boo kpósọ́l ge ié kà lé nu lọl mm̀ dùm, àẹ́ dẹẹ̀aboo kọ òó íé kà lé tóm vá ié gbele tõò kpègè—òó íège gbóó dú pọ̀bnen. Pá ogbò kóò bãàmaló pá ogbò dòbá gé kọ́ nágé vó.

Kọ̀láá béa bél naa, Kpá Káí ne ã̀àne gbo nvín ãa kọ ge kpenè gyọ́ bé ò íèè nu dú póì ge “kpenè fọ́ọ́lọ́.” (Ecclesiastes 4:4) Enèkà nu ea dì dú gè kọ, gbálàḿ kem gã́ bug gbò nvìn ãa ní a kilsĩ́ gè iéé gyọ́ nè kaà bée é. Bààna ḿ kem gbò e bà íeá naa olo ie diinèló bùlà. Enèkà nvín ãa ea dú Britain ea géè nó pọ̀b kpãà kpá kọọ̀: “À dì belí kóló mm̀ kpó, tõo eo ẹb m tọọnu a gé m.” Kàkà, tóm gé láá naa kọ é ié gyọ́ nè nyìnaló. Sõò naaé láá mm mè o “bii mm̀ nyómá.” (Máátìù 5:3, NW) Níì áávó nì, 1 Jọ́ọ̀n 2:17 gã́bel ãanéi naaí kọọ̀ “bàlàboo é téní tà.” Kàbeè o ié kààà lé kilsí mm̀ é bàlàbooí, à é dì nàgé mm̀ gbálà ńkpulu tṍó.

Vó nía naa kpá Ecclesiastes 12:1 gã́bel à síè kpóóló gbò nvín ãa naaí kọọ̀: “Kẽ̀èaboo o Dõò boo tṍó eo didi ãa.” (Today’s English Version) Kàkà, kà lé sĩ́deè ge tú o dùm naamá nu dú gè tú o lóó nvee mm̀ sìtóm Jìhóvà Bàrì. Sõò túákà, ò íè ge zẹẹ sìmtùlà bé ò bã mm̀ sìtóm Bàrì. Mósídeè ní o ń naama vóé? Váá éé níe gè tú o dùm nvee mm̀ sìtóm Bàrì bĩ́ínáé?

Ge Sìmtùlà ge Dú Enè Nenditõ̀ò Jìhóvà

Túáketõò, ò íè ge zẹẹ ie tàn ge sí tóm nè Bàrì ḿ ni—vaá nakà tàní náa ólò dõgẽ dú mm̀ búàló, ka bèè o tẹ̀ nè o kà dú gbò Kráìst. Olo íè ge zẹẹ́ tú ń dóò lóó gbá ló Jìhóvà. “Tã̀àgãló é nveèbá nèni kọ ó tú ń dòó lóó gbáló Jìhóvà,” níà bé enèkà nvín ãa pábia kọ́ẹ́.—Psalm 62:8; Jém̀z 4:8.

Róm̀ 12:2 gã́bel kpáá kọ́ dõònakà lábtọ e o ń tú tẹlẹ bàlàkẽ. À kọ́ naaí kọọ̀: “Naa kọ bọọ bug togó á dú ãa. Na tṍó sõò, ò é gboó laá nyimai bùlà Bàrì, nu e a dú lé vaá leemá Bàrì nè nu e a bọ́ ló.” É kọ à íe tṍó e o ni íé bàà bàà bùlà kilma ló sìgà gbò nu e bà niè noòmà ni lẹì? Beèvó ò nyoone dùùlàbátó Kpá Káí vaá, ‘gbí nui tẹlẹ bàlà kẽ boo o lóó mè òó mon’ kọ gbò nuí dú kàkà! Bugi Kpá Káí nè gbò kpá ea bagitẽ́ Kpá Káí. Sõò, ge nó nu ea kil ló Bàrì náa dú pọ́ì ge nyoone nyìmà ea aa mm̀ bẹẹ bug. Ié tṍó bugi togó boo nu eo bugi naa ní ea ḿ gbea ní nyíe. Ge naavó é náa kọ o vùlè kilma ló Bàrì á dọ ló.—Psalm 1:2, 3.

Dõònakà, pììgà ge tú nu eo gé nó nvee mm̀ lòasọ́ kọ́ nè, beàsẹlẹ gbò eo ge gbái siaí tọ kpá. Ge kọ́ kpẹ̀a aa tọ dọ tọ nía dú dõònakà lábtọ ge tùe. Lọl tṍó tẹlẹ tṍó òé láá zọ̀ nen eo gbáì dií tọkpá nyoonai tṍó eo gé kọ́ kpẹ̀a, túátóm níí ge láá siimani kẹ́e váa beli eẹ́ ọọve ni ló. Sõò Kpá Káí kọ́ nèi kọ é gá “siiá kẹ́ẹ́ ló gè vee Lé Kpẹaí.” (Róm̀ 1:16) Olo fáàlà lẹ̀ẹ̀latóm dùm nè nu bóldẽésí! Éé ní eaẹ́ náa kọ kẹ́ẹ á síi ní ẽ́?

Beàgá náa, o tẹ̀ nè o kà à dú gbò nen Kraist, àẹ́ du gè kọ o divá ló mm̀ ge zọ̀va sí nakà tómí. Sõò, é kọ nóó kpáa naa èlmà ge gbá gã́ bììà nvéè nen àbèè ge nè magazin nè gbò pẹ̀l kpá lei? É kọ oló boo o lóó o láá lo gé bel tṍó eo ína nùtọ nen, vaá noomà Kpá Káí nen ea di tọá sẹ̀? Be ò gáà laa naavó, kọ o tẹ̀ nè o kà á nveè nèè bá nee ni à bèè enè nen ea ni sim tùlà mm̀ bõ̀ònatõ̀ò. Tú naamá o nu boldẽèsĩ́ ge gbĩ́ gè sìm tùlà ge dú nen ge kọ́ ẹẹ le kpẹ̀aá e bè ò gáà dììa mṹú!

Mm̀ tṍó deèsĩ́, olo é gboó kìn olóó nè—mm̀ge zilá zíl nè Bàrì kọ òó gboó siè tóm neèe lọl tṍóá kilma sĩ́. (Róm̀ 12:1) Kọ̀láá béadìnaa, kiǹ lóó nè níì kègũã nì. Bàrì bííná bá dénè nen kọ “a tú gã́ kọmá” bé à man dùùà nèva. (Róm̀ 10:10) Tṍo e ó dììamúú, òó zẹ́ẹ́ tú o gã́ kọọmá o zìgà bel zaali. Tṍóá sõò dììa múú é gboó nyoone. (Máátìù 28:19, 20) Mm̀ kàkà, dììa múú dú enèkà lábtọ ge tù ea bọọ zoogá. Sõò ó gá òòà aaló boobéè kọ à tõó ní ló belí bè nóo láá naà nèè. Be ò dọ bẹ̀là Bàrì kọ à nee ni kói, àẹ́ né ni “kpóó e a di m mon bel Bàrì í” kọ bé à nveèbá nè ni kọ ó elá àgàlà.—2 Kọ́rìnt 4:7; 1 Pítà 5:10.

Lèlà tṍó e o diìa múúá, o dú enè nen zẹ̀ẹ̀ Gbò Nenditõ̀ò Jìhóvà. (Isaiah 43:10) Nííé gboó láá lẹ̀ẹ̀là bel ló bé o ń tõó dùm naa. Ge kìn lóó nè bííná gè ‘sọ̀ bá dénè nu.’ (Máátìù 16:24) Ò é láá sọ̀bá sìgà o gbò nu boldẽésĩ́ nè tàn nù vaá ò ‘zẹ́ẹ́ bulai ge dií ke lèèlà Bàrì.’ (Máátìù 6:33) Kiǹ lóó nè nè dììa múú gé kuùlà gì deè ge naamá vó tẹlẹla. É ni ẹb sìgà beè vó.

Gbò deè ge Siimá Tóm nè Bàrì Dénè-Tṍó

● Tóm gyàsítóm dú enèkà zẹ̀ẹ̀ íb gbò deèí. Nen kọ̀ kpẹ̀a e ẹ̀ẹ̀ẹ̀ nen gyàsítóm dú enèkà nu dòàbá nen Kraist ea ni diìa mṹú vaá noo ge tú 70 tṍó kọọmá lé kpẹ̀a kọ̀láá ẽ́í. Ge tú gbele tõ̀ò tṍó siimá tóm boo víl gé nveèbá nèni kọ ó bọ̀ọ̀vẹ̀ o kalì ge kọọmá kpẹ̀a nè ge noòmà nu. Gã́bug gbò gyàsítóm a íé záázaàló mm̀ ge nvèèbá nè pá ba gbò nvín nò Kpá Káí kọ bàá dú gbò e bà ni diìa mṹú váá dú Gbò Nenditõ̀ò. Náa íe tọ́ọ̀kà tóm ge sì eań kpéló váa nèni dììnèló belí níí!

Kà tõ̀ò gbò gyàsítóm íé ń kem̀ tóm e bà sí, kọbé bà íé nu ge tònma dùm. Gã́bug ọ̀và noo nyòòmà nakà tómí tení domá ló gè nó enèkà tóm bá gbẹá tọkpá à bèè bá ba tẹ̀ nè kà. Beè olo nè bọọ gbò tẹ̀ nè kà mon kọ àẹ́ dọ bélè nèi gè kpaá noòmai nu tõ̀ó e o ni aa líí nía égè bààkà tọkpá, palà ge gbĩi monii kọ bọọ tóm̀bùlà níì ge kpenè gbele bákpóó kpègè nì, sõò gè kọ á nvèè sãátẽ́ bọọ sìtóm boovíl nè beàsẹlẹ bé ò láá sii tóm belii nen sìtóm dénè-tṍó.

Kọ̀láá bea dì naa, nu ea bọọ̀gẹ̀ bọọló nen gyàsítóm mm̀ a dùm, níì a pííla nì, sõò a sìtóm boovíl—ea dú gè nvèèbá nè dõòna gbò kọbé bà íé dùm! Éé náa nóo túù tóm gyàsítóm naamá o nu boldẽésĩ́ gè teá tùlàẹ? Tóm gyàsítóm ólo kùùlà dõònakà gbò deè nèi. Dì belí nu dòàbá, sìgà gbò gyàsítóm ólò másĩ́ báàsĩ́ kiẽ́e gbò ge kọ́ kpẹa Boǹméné dì bíi. Nágé dõòna gbò nógã́ gi dõòna íb dém bel vaá zọ̀ bõ̀ònatõ̀ò ea ló íb dém belá siá tóm àbèè ge kil dõònakà dó. Mm̀ kàkà, tóm gyàsítóm enèkà kà lé sídeè tõo dùm ea dọ bélè!

● Sìtóm ge aa dó dọ dó dú nágé dõònakà deè ea kuùà. Lọ̀l gé tã́gíní mm̀ gbáá 1943 Tọọ Kpá ge nó Kpá Kaí nii Watchtower ea di Gilead a búmá gbò gyàsítóm vaá naa, kọ bàá sìm tùlà sìtóm ge aa dó dọ dó. Gbò e bà ni sí aa m ólò sí tóm dì belí gbò kọ̀ kpẹa dénè-tṍó mm̀ dõònakà gbò dó. Mm̀ gã́bug gbò dó, sĩ́deè ge tòma dùm tavàlà, ea náa váa à dú bíi gè tú kà lé váláló nè àgẹló siimá tóm ge aa dó dọ dóí. Sõò kalìbèè vó, gbò sìtóm aa dó dọ dó ólò dé kpée ló kà dùm ẹ́ẹ́-ẹẹ̀nyíe.

● Tọkpá Búma Nyòòà Sìtóm beè tìà kọ bé à dú gè nèèmà búmà gbò kànen nè gbò gyóòlo nvèèbá tóm e bè bà gáà ili va e bà ni sim tùlà. Aatáà sè ea dú gè noo nyòòmà ba gè noomá nuí fáálá gbò togó bel ea dìgà belí gbò tóm ea kuu gbò kànen nè gbò gyóòlo nvèèbá tóm, nòònù bõ̀ònatõ̀ò, nè ge laá ló bel kèsĩ́ gbò nen. À ólò dú gè kọ sìgà ọ̀và á sí tóm mm̀ baálà gbò dó. Boo tṍó ea ólò dúgè kọ́ nè sìgà ọ̀và kọ bàá sí tóm dõòna gbò ketõ̀ò.

● Sìtóm tọ tóm Bethel bĩ́ína ge tú lóó nè nyòòmà ge sí tóm mm̀ enèkà tọnàà tóm Gbò Nenditõ̀ò Jìhóvà. Sìgà gbò e bà dúùnà pátọ tóm Bethel ólò sí tóm boo gè emí gi gbò kpá ge noomá Kpá Káí. Dõòna gbò à dú gè nèva tóm kọ bàá dú gbò nvèè bá, dì belí ge ẹ̀b gì nu ea kil ló gbò tọ e bà niè tìbgì nè a gbò lúá tóm àbèè ge sí tóm ló gbò nu pátọ Bethel. Dénè gbò tómí dú gbò tóm ea di káí ea du gè si nè Jìhóvà. Nagé, à zaavẹ ló gbó e bà di tọ tóm Bethel ge nyimá kọọ̀ kọ̀láákà nú e bà náànèè, ólò dú nu dọ̀ bélè nè gã́bug pá ba gbò vígà e bà dì beeá tení ló bàlàbooí.

Sìgà tṍó à ólò dú ge kolí gbò pá vígà e bà íé gi kèle kèle íb kalì kọ bàá dú tọ tóm Bethel gé sí tóm. Náa kaló béèvó, gbele tõ̀ò gbò ólò ié ba búma tṍó e bà ni íná kĩé. Gbò e bà di tọ tóm Bethel náa sí tóm kié boo béè bélè gyọ́ nomkpáló sõò gbò gyã́á ge dè ea dì, nè tọ gè tõó m, nè ńkem̀ nu gè zalmá nu e bà ólò ié, diinéva ló. Enèkà nvín ãa ea dúùnà pátọ tóm Bethel ló bel kilma ló a tóm naaí: “À dú nu dùùnè! Nu ge naa dú gá ànà-ànà, sõò n daa íé kà tõ̀ò tã́ánádeebá lọl mm̀ ge sí tóm kĩí.”

● Sìtóm mm̀ Dénè Dó náa kọ nen á dõ̀ònà tõ̀ò ló ge tìb gì gbò tọnàà tóm nè Kingdom Hall. Gbò ebà kólí va gyóòlo Dénè Dó, ólò sigá dõònakà gbò dó gé nvèèbá mm̀ íb gbò tóm ge tìbgì tọí. Níì, enè íb bèla sìtóm ea di káí, ea bélí íb bela tóm e gbò e baẹ̀ tìb tọkáí Solomon beè sìa. (1 Kings 8:13-18) Tèènè íb nòònù ea belí níí ge ẹ̀bmà gbò ebà dúùnà pátọ Bethel a nía dì nàgé nè gbò gyóòlo dénè dóí é. Àdú gbele lé deè níe na gbò pávígà págbálà nè pábiaí íéé, é gè dõ̀ònà tõ̀o ló nakà sìtóm ea ne lèè là Jìhóvàí!

Sí tóm nè Jìhóvà Lọa mm̀ Dénè O Dùm

Ge sí tóm nè Jìhóvà nía dú kà èlnù lé sĩ́deè ge tú o dùm naamá nué. Éé náa nóo bugì togó kilma ló ge tú gè sí tóm nè Bàrì dénè-tṍó naamá o nu boldẽésĩ́ gè teá tùlàẹ? Zọi boo gbò tẹ̀ nè kà, bọọ gbò kànen nè bọọ gbò gyóòlo sẹ́kiùt, loai sọ́l ea kil ló sìtóm dénè-tṍóí. Beò íè lèèma kilma ló tọ tóm Bethel, àbèè ge sí Gilead, àbèè ge sí Tọkpá Búma Nyòòmà Sìtóm, olòó sí kẽ gbò bìlaló ea ólò sẹ̀ẹ̀à gi ló gbò e bà íé lèèma ge sì, gbẹa gi gbò bõ̀ònaló sẹ́kiùt nè dístrìk ta.

À dú kàkà kọ níì dénè nen nía é láá sìmtùlà àbèè ge bã mm̀ sìtóm dénè-tṍóé nì. Sìgà tóm zọ̀ló àbèè dìtõ̀ò tãa, nè gbò tã̀àgã̀ pátọ gé láá kpèga deè bée gáẹ̀ beè laá naa naa. Sõò Kalìbèè vó, kọ̀láákà nen Kraist ea niè kìn lóó nè íè ge gbàntṍ ló log Kpá Káí ea kọ́ọ̀: “Tú dénè o nyíe nè dénè o [dùm] nè dénè o bùlà vulma Dõò e a dú o Bàrì.” (Máátìù 22:37) Jìhóvà bííná lọ̀l ní bá kọ ó naa kà lèlà bé o dìtõ̀ò né ni deè kọ ó naa naa. Boo béèvó kọ̀láá bé o dìtõ̀ò meà naa, tú gè sí tóm nè Jìhóvà naamá nu eo gyaàmasí mm̀ o dùm. Noo o gbò nu boldẽésĩ́ e o ń téá tùlà nvee kèbá bẹ̀l Bàrì. Ẽei, à bọ́ló kọ ó “Kẽ̀èaboo o Dõò boo tṍó eo didí ãa”—be ò náavó àẹ́ dú gè tãàne ni dee bá dọ̀ọ̀mà dèdè!