Éxodo

23 “Ani remosarambi peteĩ mbaʼe ndasiértoiva.+ Aníkena oiko ndehegui peteĩ testígo iñintensión vaíva+ reipytyvõ hag̃ua peteĩ iñañávape. 2 Ani remoirũ umi héntepe rejapo hag̃ua ivaíva. Ha resẽ vove de testígo, ani ndejapu reñemoĩ porãséguinte umi héntendi, ha upéicha rupi ndojejapói hustísia nde káusare. 3 Ojehusgáramo peteĩ imboriahúvape, ani resẽ ifavórpe imboriahu haguérente.+

4 Okañýramo ne enemígogui hymba tóro térã hymba vúrro ha nde retopa, regueraha jey vaʼerã chupe.+ 5 Ha peteĩ ndaijaʼéiva nderehe rymba vúrro hoʼárõ ikárga reheve, ani reheja rei chupe, reipytyvõ vaʼerã ijárape oipeʼa hag̃ua ikárga hymba vúrro árigui.+

6 Ani rehusga hendapeʼỹ reñatende jave peteĩ imboriahúva kásore.+

7 Aníke reipytyvõ peteĩ oakusa reívape hapichápe, pórke nde rehejáramo ojejuka peteĩ ndojapói vaʼekuépe ivaíva ha ihústovape, che ndahejareimoʼãi ndéve rejapo haguére upe mbaʼe vaiete.+

8 Aníke rejagarra peteĩ kóima,* pórke pe kóima ningo umi iñarandúvape jepe omohesatũ ha upéicha rupi umi ihústova jepe ijapu.+

9 Nde reikuaa porã mbaʼéichapa oñeñandu peteĩ oikóva tetã ahénope, upévare neremaltratái vaʼerã peteĩ extranhérope, pórke peẽ peikórõ guare Egíptope extranhéro vaʼekue avei upépe.+

10 Seis áño pukukue reipuru vaʼerã nde yvy ha reñemitỹ pype.+ 11 Péro pe séptimo áñope remombytuʼu vaʼerã nde yvy ha nereñotỹi vaʼerã pype mbaʼeve, rehejánte vaʼerã péicha ha pe heñóiva upépe eheja toʼu umi imboriahúva ha umi animál salváhe. Péicha rejapo vaʼerã oĩháme nde parralty ha nde olivoty.

12 Seis día rembaʼapo vaʼerã, péro pe séptimo díape ani rembaʼapo, ikatu hag̃uáicha opytuʼu ne rymba guéi,* ne rymba vúrro, nde esklavokuéra ha pe extranhéro ombaʼapóva nendive.+

13 Peñatende porãkena opa mbaʼe haʼévare peẽme ha pejapo,+ ani peipuru umi ótro dios réra, umíva noñehendúi vaʼerã osẽha pende jurúgui.+

14 Káda áño pemboarete vaʼerã mbohapy fiésta chéve g̃uarã.+ 15 Pe primero hína pe Fiésta del Pan Ilevaduraʼỹva.+ Upéva pemboarete vaʼerã pe mes de Abíbpe,*+ ha 7 día aja peʼu vaʼerã pan ilevaduraʼỹva haʼéma haguéicha peẽme, pórke upe méspe peẽ pesẽ vaʼekue Egíptogui. Avave noñepresentái vaʼerã che renondépe po nandi.+ 16 Pe segundo hína pe Fiésta de la Kosécha.* Upe jave nde remeʼẽ vaʼerã chéve umi primeroite remonoʼõ vaʼekue nde kokuégui.+ Pe tercero katu pe Fiésta de la Última Kosécha.* Upéva rejapo vaʼerã opakuévo pe áño ha remeʼẽ vaʼerã avei chéve umi mbaʼe remonoʼõ vaʼekue.+ 17 Káda áño, 3 vése umi kuimbaʼe oñepresenta vaʼerã Ijára Jehová renondépe.+

18 Resakrifika vove peteĩ animál, ndereofreséi vaʼerã chéve huguykue mbaʼeve orekóvandi levadúra. Ha reofrese jave chéve umi fiéstape umi sakrifísio ikyrakue reheve, ani reheja ikoʼẽmba pe altárpe.

19 Regueru vaʼerã nde Jára Jehová rógape iporãnguete umi primeroite remonoʼõ vaʼekuégui.+

Nerembojýi vaʼerã peteĩ kavara raʼy roʼokue isy kambykuépe.+

20 Amondóta peteĩ ánhel ne renonderã+ oñangareko hag̃ua nderehe tapére ha nemog̃uahẽ hag̃ua pe lugár aprepara vaʼekuépe ndéve.+ 21 Neñeʼẽrendúkena chupe ha ejapo opa mbaʼe heʼíva ndéve. Aníke repuʼã hese, cháke haʼe naneperdonamoʼãi nerembiapo vaíramo,+ pórke haʼe che rérape ojapo hína opa mbaʼe. 22 Péro neñeʼẽrendúramo chupe opa mbaʼépe ha rejapopaite che haʼéva ndéve, che voi añemoĩta ne enemigokuérare ha apuʼãta umi oñemoĩvare nderehe. 23 Pórke pe ánhel che amboútava ohóta ne renonderã ha ndegueraháta oĩháme umi amorreo, hitita, perizita, cananeo, heveo ha jebuseo. Ha umíva che ahundíta hína.+ 24 Aníke reiko haʼekuéra oikoháicha, ha ani reñesũ idioskuéra renondépe ni readora chupekuéra.+ Upéva rangue rehundi vaʼerã idioskuéra ha remonguʼi vaʼerã umi kolúmna sagráda oadoráva hikuái.+ 25 Che hína Jehová pende Jára ha chéve pecheadora vaʼerã,+ ha che povendesíta ameʼẽvo peẽme y ha pene rembiʼurã.+ Ha avei aipeʼáta pende apytégui opaichagua mbaʼasy.+ 26 Ndaiporimoʼãi pende apytépe kuña operdéva imemby ni ndaikatúiva imemby,+ ha che apermitíta peẽme peikove puku.

27 Peg̃uahẽ mboyve jepe umi puévlope, umi oikóva upépe oikuaátama che haʼeha pende Jára ha oryryipáta okyhyjégui,+ ha peg̃uahẽhápe pehóvo umi pene enemigokuéra ndoikuaamoʼãi mbaʼépa ojapóta ha che ambodiparapáta chupekuéra.+ 28 Peẽ peg̃uahẽ mboyve jepe, umi heveo, cananeo ha umi hitita ikangypátama okyhyjégui pendehegui, ha upéva ombodiparáta chupekuéra.+ 29 Namosẽmbamoʼãi chupekuéra una vetépe* ani hag̃ua pe yvy opyta nandi ha ojerreprodusi hetaiterei animál ñarõ ikatúva pendeapeligra.+ 30 Mbeguekatúpente amosẽta chupekuéra, ikatu hag̃uáicha peẽ peñemboheta raẽ ha upéi pejagarra pe yvy.+

31 Ameʼẽta peẽme pe yvy Mar Rojo guive Mar de los Filisteos peve, ha pe desiérto guive pe Rrío Éufrates peve.+ Che ahejáta pende pópe umi hénte oikóvape koʼã lugárpe ha peẽ pemosẽmbaitéta chupekuéra.+ 32 Ndapejapói vaʼerã mbaʼeveichagua kompromíso hendivekuéra ni umi idioskuérandi.+ 33 Ha ani peheja umi hénte oiko pende apytépe, cháke ojapokáne peẽme mbaʼe vai che renondépe, pórke haʼekuéra katuete penemboligáne peadora* hag̃ua idioskuérape ha péicha penemoñuhãta hikuái”.+