Éxodo

29 “Ha ikatu hag̃uáicha haʼekuéra ipotĩ che renondépe ha ombaʼapo chéve saserdóteramo, rejapo vaʼerã koʼã mbaʼe: Eiporavo peteĩ tóro raʼyrusu ha mokõi ovecha mácho iporãva.+ 2 Koʼã pan ilevaduraʼỹva rejapo vaʼerã arína iporãvévagui: pan apuʼa, pan argólla ojejapo vaʼekue arína ha aséitegui,+ ha pan pererĩ opururũ asýva ha oñemonáva hese aséite. 3 Upéi emoĩ peteĩ kanástope ha egueraha che renondépe,+ ha regueraha vaʼerã avei che renondépe pe tóro raʼyrusu ha umi mokõi ovecha mácho.

4 Egueraha vaʼerã che renondépe Aarón ha itaʼyrakuérape pe tavernákulo* entrádape,+ ha tojahu hikuái upépe.+ 5 Upéi rejagarra vaʼerã umi ao+ ha emonde Aarónpe. Emonde hese pe ao puku akuádro, pe ao ijyvakuareíva ohóva pe delantál* guýpe, avei pe delantál ha pe pechéra,* upéi emoĩ ikuʼáre pe sinturón vordádo ha eñapytĩ ani hag̃ua okuʼe pe delantál.+ 6 Avei remoĩ vaʼerã iñakãre pe turvánte,* ha hiʼári pe pláka de óro sagrádova.*+ 7 Ha ejagarra pe aséite ojepurúva ojejapo hag̃ua nombramiénto,+ ha eñohẽʼimi iñakãre enombra* hag̃ua chupe.+

8 Upéi egueru avei Aarón raʼykuérape ha emonde hesekuéra umi ao puku akuádro.+ 9 Upéi emoĩ ikuʼarekuéra pe sinturón ha emoĩ iñakãrekuéra umi turvánte. Ha Aarón ha itaʼyrakuéragui oikóta saserdóte, péva hína peteĩ léi opa ára g̃uarã.+ Péicha remeʼẽta autorida Aarón ha itaʼyrakuérape ombaʼapo hag̃ua chéve de saserdóte.+

10 Upéi egueru pe tóro raʼyrusu pe tavernákulo renondépe, ha Aarón ha itaʼyrakuéra omoĩ vaʼerã ipo upe tóro akã ári.+ 11 Ha ejuka pe tóro pe tavernákulo entrádape Jehová renondépe.+ 12 Embyaty michĩmi pe tóro ruguy ha emoinge pype ne kuã ha emona umi vaka ratĩ joguaha oĩvare pe altárpe,+ ha hembyre eñohẽmbaite pe altár vásere.+ 13 Upéi eipeʼapaite pe ikyrakue+ oĩva pe tóro ryekuére ha pe ikyrakue oĩva pe ígadore, reipeʼa vaʼerã avei umi mokõi irriñón ha umi ikyrakue oĩva hese. Koʼãva rehapy vaʼerã pe altár ári ikatu hag̃uáicha otimbo.+ 14 Péro pe tóro roʼokue, ipirekue ha hekakakue peraha vaʼerã pehapy mombyry upe peikohágui. Ko tóro ningo peteĩ ofrénda ojejapóva ojepaga hag̃ua umi pekádore.

15 Upéi ejagarra peteĩva umi ovecha mácho, ha Aarón ha itaʼyrakuéra tomoĩ ipo pe ovecha akã ári.+ 16 Upe rire ejuka pe ovecha mácho, ha embyaty pe huguykue ha ehypýi pype pe altár kompletoite.+ 17 Ekarnea pe ovecha, emopotĩ ha ejoheipaite pe hyekue+ ha umi ikanillakue. Upéi emohenda pe altár ári ha emoĩmbaite ojovái káda párte ha iñakãngue avei. 18 Rehapy vaʼerã pe ovecha kompletoite pe altár ári, ikatu hag̃uáicha otimbo. Kóva peteĩ ofrénda ojehapýva Jehovápe g̃uarã, ha hyakuã asýva* chupe g̃uarã.+ Kóva hína peteĩ ofrénda ojejapóva tata ári Jehovápe g̃uarã.

19 Upéi ejagarra vaʼerã pe ótro ovecha mácho, ha Aarón ha itaʼyrakuéra tomoĩ ipo pe ovecha akã ári.+ 20 Upe rire ejuka pe ovecha mácho, ha embyaty michĩmi pe huguykue ha emonaʼimi Aarón ha itaʼyrakuéra nambi deréchare, emona avei ikuã guasu ha ipysã guasu a la derechapeguáre. Upéi upe tuguýpe ehypýi avei pe altár kompletoite. 21 Embyaty michĩmi pe tuguy oĩva pe altár ári ha ejagarra avei michĩmi pe aséite ojepurúva ojejapo hag̃ua nombramiénto.+ Upe rire ehypýi pype Aarón ha itaʼyrakuérape ha umi ijaokuéra avei, péicha reapartáta hína chupekuéra ha avei ijaokuéra che servísiope g̃uarã.+

22 Upéi eipeʼa pe ovecha kyrakue: pe huguaikue ikyraitéva, pe ikyrakue oĩva hyekuére, pe ikyrakue oĩva pe ígadore, umi mokõi irriñón ha umi ikyrakue oĩva umívare,+ ha eipeʼa avei pe ikuárto a la derechapegua. Kóva hína pe ovecha ojepurúva ojejapo hag̃ua nombramiénto.+ 23 Ejagarra peteĩ pan apuʼa pe kanásto oĩvagui Jehová renondépe, ejagarra avei peteĩ pan argólla ojejapo vaʼekue arína ha aséitegui, ha peteĩ pan pererĩ opururũ asýva. 24 Entéro koʼã mbaʼe remoĩ vaʼerã Aarón ha itaʼyrakuéra pópe, ha nde rembokacha vaʼerã Jehová renondépe ofrénda oñembokachávaramo. 25 Upéi ejagarra jey chuguikuéra upe ofrénda ha ehapy pe altár ári. Remoĩ vaʼerã pe ofrénda ojehapývandi otimbo ha hyakuã asy* hag̃ua Jehová renondépe. Kóva hína peteĩ ofrénda ojehapýva Jehovápe g̃uarã.

26 Upéi ejagarra pe ovecha pechokue, upe ovecha ningo oñemeʼẽ kuri Aarón rehehápe ojejapo hag̃ua pe nombramiénto.+ Pe ovecha pechokue haʼe hína peteĩ ofrénda oñembokacháva Jehová renondépe, ha upéva opytáta nembaʼerã. 27 Upe ovecha ojepuru vaʼekuégui oñenombra hag̃ua+ Aarón ha itaʼyrakuérape saserdóteramo, resantifika vaʼerã koʼã mbaʼe: pe ipechokue oñembokacháma vaʼekue che renondépe, ha pe hetymangue oñepresenta vaʼekue peteĩ párte sagrádaramo. 28 Koʼã párte haʼéta Aarón ha itaʼyrakuéra mbaʼe, ha péva peteĩ léi siémpre okumpli vaʼerã umi israelita, pórke koʼãva haʼe peteĩ párte sagráda.+ Kóva haʼéta pe párte sagráda omeʼẽtava umi israelita Jehovápe g̃uarã ojapo jave hikuái pe ofrénda de paz.+

29 Umi ao* oipurúva Aarón ombaʼapo hag̃ua de saserdóte,+ opytáta ifamiliarépe*+ g̃uarã oñenombra ha oñemoĩ vove chupekuéra oservi hag̃ua de súmo saserdóte hekovia. 30 Pe saserdóte haʼéva Aarón familiare opytátava hekovia ha oikétava pe tavernákulope ombaʼapo hag̃ua pe lugár sagrádope, oipuru vaʼerã umi ao 7 día aja.+

31 Ejagarra vaʼerã pe ovecha roʼokue ojepuru vaʼekue ojejapo hag̃ua pe nombramiénto ha eraha embopupu pe lugár sagrádope.+ 32 Ha pe tavernákulo entrádape Aarón ha itaʼyrakuéra hoʼu vaʼerã+ pe ovecha roʼokue ha pe pan oĩva pe kanástope. 33 Haʼekuéra hoʼu vaʼerã umi mbaʼe ojesakrifika vaʼekue oñeperdona hag̃ua chupekuéra ipekádo, ikatu hag̃uáicha oñenombra ha ojeaparta chupekuéra oservi hag̃ua de saserdóte. Peteĩ ndahaʼéiva saserdóte* ndoʼúi vaʼerã koʼã mbaʼe, pórke umíva sagrádo hína.+ 34 Ha upeichahágui hembýramo ha ikoʼẽ pe pan ha pe ovecha ojesakrifika vaʼekue ojejapo hag̃ua nombramiénto, upéicharõ rehapy vaʼerã.+ Avave ndoʼúi vaʼerã pórke upéva sagrádo hína.

35 Péicha rejapo vaʼerã Aarón ha itaʼyrakuérare, rejapo vaʼerã opa mbaʼe haʼe hagueichaite ndéve. Reipurúta 7 día remeʼẽ hag̃ua chupekuéra autorida ikatu hag̃uáicha ombaʼapo de saserdóte.+ 36 Káda día resakrifika vaʼerã peteĩ tóro, péva hína pe ofrénda ojejapóva ojepaga hag̃ua umi pekádore ha oñesantifika hag̃ua pe altár. Ha reñohẽ vaʼerã aséite pe altár ári ikatu hag̃uáicha ojeaparta Ñandejára servísiope g̃uarã.+ 37 Reipuru vaʼerã 7 día resantifika hag̃ua pe altár, ha péicha ko altár opytátama sagradoiterei ojepuru hag̃ua Ñandejára servísiope añoite.+ Enterove ombaʼapóva pe altárpe oñesantifika vaʼerã.

38 Káda día resakrifika vaʼerã pe altár ári mokõi ovecha mácho de un áño.+ 39 Peteĩ ovecha raʼyrusu mácho resakrifika vaʼerã pyhareve ha pe ótro katu kaʼaruete pytũ mboyve.*+ 40 Reofrese vaʼerã avei una décima de efá* arína iporãva, 1 lítro* aséite ha 1 lítro* víno ojejapo hag̃ua pe ofrénda líkida. Koʼã mbaʼe reofrese vaʼerã pe primer ovecha raʼyrusu máchondi. 41 Pe segundo ovecha raʼyrusu mácho resakrifika vaʼerã kaʼaruete pytũ mboyve,* ha reofrese vaʼerã avei hendive arína, aséite ha víno rejapo haguéicha pyhareve. Kóva peteĩ ofrénda ojehapýva ha hyakuã asýva* Jehovápe g̃uarã. 42 Koichagua ofrénda ojehapýva siémpre pesegi vaʼerã pejapo, peẽ ha pene familiare, pe tavernákulo entrádape Jehová renondépe. Upépe che ajechaukáta ha añeʼẽta ndéve.+

43 Ha upépe che ajechaukáta enterove israelítape, ha upe lugár oñesantifikáta ojehecháta rupi upépe che podér.+ 44 Asantifikáta pe tavernákulo, pe altár ha avei Aarón ha itaʼyrakuérape+ ombaʼapo hag̃ua chéve de saserdóte. 45 Che aiméta umi israelita apytépe, ha che haʼéta Ijarakuéra.+ 46 Haʼekuéra oikuaáta che haʼeha Ijára Jehová, ha che aguenohẽ hague chupekuéra Egíptogui aime hag̃ua ijapytepekuéra.+ Che hína Jehová, Israel Jára”.