Pe Mboʼehára Guasu oipytyvõ hapichakuérape

¿MBAʼÉICHAPA reñeñandu oĩramo ojapóva peteĩ mbaʼe porã nderehehápe?... Katuete revyʼa, ha enterovépe voi ñandegusta ojejapórõ upéva ñanderehehápe. Pe Mboʼehára Guasu oikuaa vaʼekue upeichaha, upévare siémpre oipytyvõ hapichakuérape. Haʼe heʼi vaʼekue: ‘Ndajúi aporojokuái hag̃ua, síno ótro chejokuái hag̃ua’ (Mateo 20:28).

¿Mbaʼépa jajapo vaʼerã jajoguaséramo pe Mboʼehára Guasúpe?... Ñaipytyvõ vaʼerã ñande rapichakuérape ha jajapo umi mbaʼe iporãva hesehapekuéra. Koʼág̃arupi heta hénte ndojapói upéicha ha oipotánte ojeservi chupekuéra. Peteĩ jey, umi omoirũva Jesúspe jepe oipota vaʼekue upéva. Haʼekuéra opensa iñimportanteveha umi ótrogui.

Peteĩ árape, Jesús oho idisipulokuéra ndive Capernáumpe, peteĩ siuda opytáva mar de Galilea ypýpe. Og̃uahẽvo upépe oike hikuái peteĩ ógape. Ha Jesús oporandu chupekuéra: “¿Mbaʼére piko pejodiskuti raʼe tapére?”. Haʼekuéra ojodiskuti kuri jahecha mávapa iñimportanteve ijapytepekuéra, upévare okirirĩnte hikuái (Marcos 9:33, 34).

Jesús oikuaa naiporãiha avave opensa iñimportanteveha ótrogui. Upévare, jalee haguéicha kapítulo únope, omoĩ peteĩ mitãʼípe imbytepekuéra ohechauka hag̃ua tekotevẽha okambia ilája ha iñumílde pe mitãicha. Péro nontendéi hikuái. Upévare, omano mboyvemi, Jesús omboʼe chupekuéra peteĩ mbaʼe ndahesaraimoʼãiva arakaʼeve. ¿Mbaʼépa ojapo raʼe?...

Okaru aja oñondivepa, Jesús opuʼã sapyʼa pe meságui, ojagarra peteĩ toálla ha oñapytĩ ikuʼáre. Upéi omoĩ y peteĩ palangánape. Oiménengo idisipulokuéra oñeporandujoa: “¿Mbaʼe piko la ojapótava?”. Omaña aja hikuái, Jesús ojayvy ha oñepyrũ ombojepyhéi káda únope ha omokã ipykuéra. Nde reimérire upépe ¿mbaʼéichapa reñeñandu vaʼerãmoʼã?...

Umi disípulo opensa pe Mboʼehára Guasu ndojapói vaʼerãha upeichagua tembiapo ha otĩeterei hikuái. Pedro ndoipotaiete voi haʼe ombojepyhéi chupe. Péro Jesús heʼi Pédrope iñimportanteha jaservi ótrope.

Koʼág̃arupi ñande ndajaikói ñambojepyhéi avavépe, péro Jesús tiémpope umi hénte ojepokuaa ojapo upéva. ¿Ndépa reikuaa mbaʼérepa?... Jesús ha idisipulokuéra oiko haguépe umi hénte oiporúmi sandália. Ha oguata jave umi tape ijyvytimbóvare ipykyʼapa hikuái. Upévare, oĩramo ombojepyhéiva hapichápe og̃uahẽvo hógape ohechauka imbaʼeporãha.

Upe díape ni peteĩva umi disípulo ndojaposéi pe tembiapo. Upévare Jesús voi opuʼã ojapo. Upéicha omboʼe chupekuéra peteĩ mbaʼe iñimportánteva tekotevẽva oaprende hikuái. Ha ñande avei ñaaprende vaʼerã.

¿Reikuaápa mbaʼépa hína upéva?... Jesús oho jey oguapy mesápe ha heʼi: “¿Peikuaápa mbaʼépa heʼise pe ajapo vaʼekue penderehe? Peẽ peje chéve: ‘Mboʼehára’, ha ‘Che Ruvicha’, ha añete la pejéva. Che ningo pene Mboʼehára ha pende Ruvicha, ha upéicharamo jepe pombojepyhéi, upéicharõ peẽ avei pejohéi vaʼerã ojupe pende py” (Juan 13:2-14).

Pe Mboʼehára Guasu ohechauka chupekuéra oipotaha ojapo umi mbaʼe porã hapichakuéra rehehápe. Ndoipotái ojepyʼapy ijehénte ni opensa ojeservi vaʼerãha chupekuérante. Jesús oipota idisipulokuéra oservi hapichápe.

¿Ajépa iporã upe omboʼe vaʼekue?... Ha nde, ¿rejapótapa pe Mboʼehára Guasu ojapo haguéicha ha reservi nde rapichakuérape?... Entéronte ikatu jajapo heta mbaʼe porã ótro rehehápe, ha upéicha jajapóramo ñambovyʼáta chupekuéra. Péro iñimportanteveha, ñambovyʼáta Jesús ha Itúvape.

Ndahasyiete ningo ñaipytyvõ ñande rapichakuérape. Nembaʼerechakuaáramo, heta mbaʼe ikatu rejapo hesehapekuéra. Epensami ko mbaʼére: ¿mbaʼépepa ikatu reipytyvõ nde sýpe? Nde reikuaa haʼe ojapoha heta mbaʼe ogapýpe. ¿Ikatúpa reipytyvõ chupe?... ¿Mbaʼére piko nereporandúi nde sýpe mbaʼépa ikatu rejapo?

Ikatu reprepara mesa ojekaru hag̃ua, térã rembyaty tembiporu ojekarupa rire. Avei ikatu reitypei ha remombo yty. Rejapóramo koʼã mbaʼe, reipytyvõ hína ótrope Jesús ojapo haguéicha.

¿Ndépa reguereko ermáno michĩvéva ndehegui? Ikatu avei reipytyvõ chupekuéra. Nemanduʼákena pe Mboʼehára Guasu oservi hague idisipulokuérape. Nde avei reipytyvõramo umi ne ermáno michĩvévape, rejapo hína Jesús ojapo haguéicha. ¿Mbaʼépa ikatu rejapo hesehapekuéra?... Ikatu reipytyvõ chupekuéra ombyaty hag̃ua ikosakuéra ohugapa rire, oñemonde hag̃ua térã oarregla hag̃ua hupa. ¿Mbaʼépa ikatu rejapove?... Haʼekuéra ningo ovyʼáta rejapóramo koʼã mbaʼe..

Eskuélape avei ikatu rejapo heta mbaʼe reipytyvõ hag̃ua ne mboʼehárape ha ne kompañerokuérape. Por ehémplo, ikatu rehupi ilívro hoʼáramo chuguikuéra térã reiporuka peteĩ lápis oĩramo oikotevẽva. Avei iporãta revorráramo pisarrón ha reipytyvõramo hetave mbaʼépe nde profesórpe.

Heta vése umi hénte ndoagradesemoʼãi ndéve reipytyvõ haguére chupekuéra. ¿Péro heʼisépa upéva nderejapovéima vaʼerãha umi mbaʼe porã?... Nahániri. Heta hénte ndoagradeséi vaʼekue Jesúspe umi mbaʼe ojapóvare. Upéicharõ jepe haʼe oipytyvõ meme hapichakuérape.

Upévare, jasegíkena ñaipytyvõ enterovépe. Ñanemanduʼa memékena pe Mboʼehára Guasu ojapo hague upéva ha ñañehaʼã jajapo avei upéicha.