¿Mbaʼéichapa jaikuaáta Armagedón hiʼag̃uimaha?

KAPÍTULO 46-pe jahecha Jehová omeʼẽ hague peteĩ señál. Upéicha haʼe ohechauka arakaʼeve nohundimoʼãveimaha umi héntepe ama guasu rupive. ¿Nemanduʼápa mbaʼépa raʼe pe señál?... Umi apóstol ojerure vaʼekue avei peteĩ señál opilla hag̃ua Jesús ogovernamaha ha avei ko múndo ára pahaite oñemoag̃uimaha (Mateo 24:3).

Haʼekuéra oikuaa Jesús ogoverna vaʼerãha kuri yvágape ha upéicha rupi ndojehechamoʼãi chupe. Upévare oikuaase vaʼekue hikuái mbaʼéichapa opilláta haʼe oñepyrũ vove ogoverna. Upémarõ Jesús omombeʼu chupekuéra mbaʼe mbaʼépa oikóta ko yvy ape ári og̃uahẽ vove upe tiémpo. Ohechávo umíva oikuaátama hikuái Jesús oñepyrũmaha ogoverna yvágape.

Ikatu hag̃uáicha idisipulokuéra oñatende porã oikóvo, Jesús heʼi chupekuéra: “Pemañamínte pe ígo ha umi ótro yvyramátare: Pehecha vove hokyha hína, peikuaáma og̃uahẽtamaha arahaku”. Ñande ningo japilla arahaku og̃uahẽta vove. Upéicha avei, jahechávo oikomaha umi señál Jesús omombeʼu vaʼekue, japilláta Armagedón hiʼag̃uimaha (Lucas 21:29, 30).

Umi divúho oĩva ko páhinape ha avei pe ótrope, ohechauka hína umi mbaʼe oikótava Ñandejára Rréino ou mboyve. Ha oikopa vove koʼã mbaʼe, Ñandejára Rréino ohundietéta entéro goviérno oĩva ko yvy ape ári, jahecha haguéicha kapítulo 46-pe.

Emaña porãmína umi divúhore ha eremi mbaʼépa repensa hese. Ikatu relee mbaʼépa heʼi la Biblia umívare Mateo 24:6-14 ha Lucas 21:9-11-pe. Káda divúho inumeropa ikatu hag̃uáicha retopa mbaʼe párrafopepa oñeñeʼẽ hese. Koʼág̃a jahechami oikópa hína umi mbaʼe Jesús heʼi vaʼekue.

1) Jesús heʼi vaʼekue: “Peẽ pehendúta oikoha gérra heta hendárupi; [...] peteĩ tetã opuʼãta ótro tetãre, ha umi goviérno opuʼãta ojuehe”. ¿Rehendúmapa notisiérope oñeñeʼẽha gérrare?... Pe primera gérra mundiál oiko 1914 guive 1918 peve. Ha upéi oiko pe segunda gérra mundiál 1939 guive 1945 peve. Upe mboyve ningo arakaʼeve ndoikóiva peteĩ gérra tuicháva peichaite. Ha ñane tiémpope opárupi rei oiko gérra ha pyʼỹi oñemombeʼu téle, rrádio térã diáriope.

2) Jesús heʼi avei: “Oĩta ñembyahýi [...] ápe ha pépe”. Oiméne reikuaa heta hénte saʼi orekoha hembiʼurã. Káda día hetaiterei tapicha omano ndorekói rupi mbaʼeve hoʼu vaʼerã.

3) Upéi Jesús heʼive: “Ápe ha pépe isarambíta mbaʼasy”. ¿Mbaʼeichagua mbaʼasýpa nde reikuaa?... Oĩ ningo umi ipeligrósova ha ojukáva hetaiterei héntepe. Por ehémplo, peteĩ mbaʼasy hérava grípe españóla ojuka vaʼekue veinte millón tapichárupi un áñopente. Ko ñane tiémpope oĩ avei hetaiterei omanóva sídagui. Ha ndahaʼéi upévaguinte, káda día oĩ omanóva kánsergui, iprovlémagui ikorasõme térã ojagarra rupi chupe ótro mbaʼasy.

4) Jesús heʼi ambue mbaʼe oikótava: “Oĩta [...] yvyryrýi ápe ha pépe”. ¿Mbaʼépa oiko jepi oĩ jave yvyryrýi?... Umi óga hoʼapa umi hénte ári ha omanomba hikuái. Áño 1914 guive káda áño oiko jepi yvyryrýi opárupi rei. ¿Rehendúmapa nde oikoha upéva?...

5) Jesús heʼi avei ‘hetavetaha umi iñañáva’. Upévare koʼág̃arupi oĩ hetaiterei omondáva, ombyepoti vaipáva hapichápe ha oporojukáva. Opárupi umi hénte oiko kyhyjeháre oikuaágui ikatuha oĩ oikéva hógape ha omondapa ikosakuéra. Arakaʼeve ndoikóiva peichaite peve koʼã mbaʼe.

6) Jesús omombeʼu vaʼekue oikotaha avei peteĩ mbaʼe iñimportantetereíva. Haʼe heʼi: “Koʼã marandu porã oñeʼẽva Ñandejára Rréinore oñemombeʼúta oparupiete ko yvy ape ári, ojekuaa hag̃ua opa tetãrupi, ha upéi og̃uahẽta pe ára pahaite” (Mateo 24:14). Oimérõ nde rejerovia ‘koʼã marandu porãre’, reñeʼẽ vaʼerã nde rapichakuéra ndive umívare. Upéicha reipytyvõta oñekumpli hag̃ua ko mbaʼe Jesús heʼi vaʼekue.

Oĩ opensáva koʼã mbaʼe ymaite guive oikoha. Péro koʼág̃ante oiko opa koʼã mbaʼe opárupi ha ojojapaite. Upéicharõ, ¿repillámapa mbaʼépa la oikótava?... Umi mbaʼe oikóva ohechauka koʼẽrõitéma oñehunditaha ko múndo aña ha jaikotamaha Ñandejára múndo pyahúpe.

Jesús oñeʼẽrõ guare pe señál rehe heʼi avei: “Peñemboʼe meméke ani hag̃ua pe ára pedipara hag̃ua og̃uahẽ roʼy tiémpope” (Mateo 24:20). ¿Mbaʼépa heʼise raʼe Jesús?...

Peteĩ puévlope oikóramo peteĩ mbaʼe ijetuʼúva ha umi hénte osẽ vaʼerã pyaʼe upégui, ijetuʼuvéta chupekuéra roʼy ha tiémpo vaíramo. ¿Mbaʼépa ikatu oiko?... Ikatu nog̃uahẽi la ohosehápe. Ikatu peteĩ tapicha operdeterei raʼe itiémpo ha kavalete osẽ oho tiémpo vaive jave ha upéi omano tapére, ¿ajépa ñambyasyeténe péicha oikóramo hese?...

¿Rentendépa mbaʼépa la heʼise vaʼekue Jesús?... Heʼise ñandéve koʼág̃ama ñaneñeʼẽrendu vaʼerãha Ñandejárape. Ndovaléi japerde rei ñane tiémpo hiʼag̃uimbaitéma rupi Armagedón. Jaikóramo ñamakanea jajapo rangue Ñandejára oipotáva, ikatu tárde jepe ñandehegui. Ani jajogua umi hénte oiko vaʼekue Noé tiémpope, haʼe oavisa chupekuéra la oikótava péro haʼekuéra nopenái hese ha ndoikéi pe árkape.

Koʼág̃a jahecháta mbaʼépa oikóta Armagedón rire. Ñaaprendéta mbaʼéichapa jaikóta enterove jahayhúva ha ñaneñeʼẽrendúva Ñandejárape.