Pe adorasión Ñandejára oguerohorýva

1. Mbaʼeichagua vendisiónpa jahupytýta jaadoráramo Ñandejárape haʼe oipotaháicha?

ÑANDEJÁRA JEHOVÁ ñanderayhueterei. Upévare, oipotágui pe iporãvéva ñandéve g̃uarã ohechauka mbaʼéichapa jaikovaʼerã. Ha jaadoráramo chupe haʼe oipotaháicha, javyʼáta ha jajehekýita heta provlémagui. Avei haʼe ñanevendesíta ha ñanepytyvõta (Isaías 48:17). Upéicharamo jepe, oĩ hetaiterei rrelihión heʼíva omboʼeha pe añetegua Ñandejáragui. Péro tuicha ojoavy hikuái omboʼévo mávapa Ñandejára ha mbaʼépa ohaʼarõ ñandehegui.

2. Mbaʼéichapa ikatu jaikuaa mbaʼeichagua adorasiónpa Jehová oipota, ha mbaʼérepa ikatu ñambojoja ñantende hag̃ua ko mbaʼe?

² Mbaʼéichapa jaadoravaʼerã Ñandejárape? Mbaʼéichapa ikatu jaikuaa upéva? Natekotevẽi jastudia ha ñambojoja opa rrelihión omboʼéva. Ñaikotevẽ peteĩ mbaʼénte: ñaaprende mbaʼépa añetehápe omboʼe la Biblia pe adorasión añetévagui. Ñapensami ko mbaʼére: heta tetã rupi, peteĩ provléma oĩva haʼe pe pláta falsifikádo. Ha ojejeruréramo ndéve reipeʼa hag̃ua pe pláta falsifikádo umi ndahaʼéivagui, mbaʼéichapa rejapóta upéva? Reñehaʼãtapa reikuaapaite mbaʼeichaguápa umi pláta falsifikádo? Nahániri. Iporãvéta ndéve g̃uarã reikuaáramo mbaʼeichaguápa pe pláta añetetéva. Reikuaa porã rire upéva, ikatúta reikuaa pe pláta falsifikádova. Upéicha avei, jaikuaáramo mbaʼeichaguápa pe rrelihión añetegua, jaikuaáta avei umi rrelihión japu.

3. Jesús heʼihaguéicha, mbaʼépa jajapovaʼerã ñaime porã hag̃ua Ñandejára renondépe?

³ Tekotevẽ jaadora Jehovápe haʼe oipotaháicha. Heta oĩ oimoʼãva Ñandejára oguerohoryha opaichagua rrelihión, péro la Biblia nomboʼéi upéva. Avei, ndahaʼéi jaʼentevaʼerã ñandejehe kristianoha. Jesús heʼivaʼekue: ‘Naentéroi heʼíva chéve: “Señór, Señór”, oikéta pe rréino yvagapeguápe, síno pe ojapóva Che Ru oĩva yvágape oipotáva’. Upévare, ñaime porã hag̃ua Ñandejára renondépe, tekotevẽ jaikuaa mbaʼépa haʼe ojerure ñandehegui ha jajapo upéva. Umi ndojapóivape Ñandejára oipotáva, Jesús ohenoivaʼekue ‘mbaʼe vai apoha’ (Mateo 7:​21-23). Pe pláta falsifikádoicha, pe rrelihión japu ndovaléi mbaʼeverã. Ha ivaiveha katu, ojapo mbaʼe vai ñanderehe.

4. Mbaʼépa heʼise umi mokõi tape Jesús oñeʼẽhague, ha moõpa oporogueraha?

⁴ Jehová omeʼẽ enterovépe oportunida oguereko hag̃ua pe tekove opaʼỹva. Péro jaiko hag̃ua pe Paraísope opa ára g̃uarã, jaadoravaʼerã chupe ha jaiko haʼe oipotaháicha. Ñambyasýramo jepe, heta oĩ ndojaposéiva upéva. Upévare Jesús heʼivaʼekue: ‘Peike pe okẽ poʼi rupi; ipe ha tuichágui pe tape oporogueraháva ñehundípe, ha heta oike upe rupi; péro ipoʼi pe okẽ ha ipoʼi pe tape ogueraháva tekovépe, ha mbovy umi ojuhúva’ (Mateo 7:​13, 14). Upéicharõ, pe rrelihión añetegua oporogueraha pe tekove opaʼỹvape ha pe rrelihión japu oporogueraha ñehundípe. Péro Jehová ndoipotái yvyporakuéra oñehundi. Upévare omeʼẽ oportunida hentekuéra opárupi oĩvape oikuaa hag̃ua chugui (2 Pedro 3:9). Añetehápe, pe adorasión ñameʼẽva ikatu ñandegueraha tekove térã ñemanóme.

5. Mbaʼéichapa ikatu jaikuaa mávapa osegi pe rrelihión añetegua?

⁵ Mbaʼéichapa ikatu jatopa ‘pe tape oporogueraháva tekovépe’? Jesús heʼivaʼekue jaikuaataha mávapa osegi pe rrelihión añetegua ñamañáramo pe ojapóvare. ‘Hiʼáre peikuaáta chupekuéra’, heʼivaʼekue. ‘Opa yvyra máta iporãva hiʼa porã’ (Mateo 7:​16, 17). Upéicharõ, umi oĩva pe rrelihión añeteguápe ojekuaa umi mbaʼe ogueroviávare ha ojapóvare. Iñimperfékto ha ojavýramo jepe, oñehaʼã oñondivepa ojapo Ñandejára oipotáva. Jahecháta seis mbaʼe ñanepytyvõtava jaikuaa hag̃ua mávapa osegi pe rrelihión añetegua.

6, 7. Mbaʼépa heʼi Ñandejára siervokuéra la Bíbliare, ha mbaʼe ehémplopa omoĩvaʼekue Jesús?

⁶ Umi oservíva Ñandejárape omboʼevaʼerã la Biblia heʼíva. La Biblia voi heʼi: “Opavave Eskritúra oĩ inspiráda Ñandejárare ha iporã ñamboʼe hag̃ua, ñañemoñeʼẽ mbarete hag̃ua, ñamyatyrõ hag̃ua oñekotevẽhápe, ñadisiplina hag̃ua hustísiape, ikatu hag̃uáicha pe oservíva Ñandejárape ikatupyrypaite, ha oguerekopaite pe oikotevẽva ojapo hag̃ua opaichagua mbaʼe porã” (2 Timoteo 3:​16, 17). Iñirũnguéra kristiánope, pe apóstol Pablo ohaivaʼekue: ‘Oguahẽrõ guare peẽme Ñandejára ñeʼẽ, pehenduvaʼekue orehegui, peguerohory, ndahaʼéi yvypóra ñeʼẽicha, pehecha uvei haʼehaichaite, Ñandejára ñeʼẽicha’ (1 Tesalonicenses 2:13). Upéicharõ, umi mbaʼe ojegueroviáva ha ojejapóva pe rrelihión añeteguápe ndoúi yvypóra heʼívagui térã pe tradisióngui. Umi mbaʼe ou Ñandejára ñeʼẽgui, la Biblia.

⁷ Jesucristo omoĩvaʼekue pe ehémplo, omboʼe rupi Ñandejára Ñeʼẽme oĩva. Oñemboʼévo Itúva yvagapeguápe heʼivaʼekue: ‘Ne ñeʼẽ ningo pe añetegua’ (Juan 17:17). Jesús ogueroviavaʼekue Ñandejára Ñeʼẽ heʼíva, ha pe omboʼéva ndojoavyivaʼekue la Biblia ndive. Jesús pyʼỹi heʼívami: ‘Péicha ojehaivaʼekue’, ha upéi oiporu peteĩ téysto Ñandejára Ñeʼẽgui (Mateo 4:​4, 7, 10). Upéicha avei, umi oservíva Ñandejárape nomboʼéi ijehegui rei. Haʼekuéra oguerovia la Biblia haʼeha Ñandejára Ñeʼẽ, ha omboʼe upépe heʼívante.

8. Mbaʼépa ojapovaʼerã umi oadoráva Jehovápe?

⁸ Umi oĩva pe rrelihión añeteguápe oadora Jehovápe añoite ha oikuaauka Héra. Jesús heʼivaʼekue: ‘Jehová nde Járape readoravaʼerã, ha chupe añoite reservivaʼerã’ (Mateo 4:10). Upévare umi oservíva Ñandejárape oadora Jehovápe añoite. Ha upéicha oadorágui chupe, omombeʼu hapichakuérape Ñandejára réra ha mbaʼeichaguápa haʼe. Salmo 83:​18-pe heʼi: “Nde, nde rérava Jehová, nde añoite haʼe pe Ijyvatevéva ko Yvy ape ári”. Ha Jesús ojapovaʼekue upéva, oipytyvõ rupi umi héntepe oikuaa hag̃ua Ñandejárape. Upévare oñemboʼevaʼekue Itúvape: ‘Che aikuaauka nde réra umi kuimbaʼépe remeʼẽvaʼekue chéve ko múndogui’ (Juan 17:6). Upéicha avei koʼág̃a, umi añetehápe oadoráva Ñandejárape omboʼe hapichakuérape mbaʼéichapa Héra, umi mbaʼe ojapótava ha mbaʼeichaguápa haʼe.

9, 10. Mbaʼéichapa umi kristiáno añetegua ohechauka ojoayhuha?

⁹ Umi oservíva Ñandejárape ojoayhu añete. Jesús heʼivaʼekue: ‘Kóvape opavave oikuaáta peẽ haʼeha che remimboʼe, oĩrõ mborayhu pende apytépe’ (Juan 13:35). Umi kristiáno ymaguare ojoayhuvaʼekue péicha. Ko mborayhu omboyke pe joavy oĩva ojeguerekógui ótro rrása, tetã, térã oĩgui ipláta ha imboriahúva. Ha upévare oiko porã hikuái oñondive ermáno ha ermána teéicha (Colosenses 3:14). Umi oĩva rrelihión japúpe ndojoayhúi upéicha. Mbaʼérepa jaʼe upéva? Haʼekuéra ojojuka ndahaʼéigui ojorrása térã peteĩ tetãmegua. Kristiáno añetegua ndojagarrái árma ojuka hag̃ua iñermanokuéra térã oimeraẽvape. La Biblia heʼi: ‘Ñandejára raʼykuéra ha pe Diablo raʼykuéra ojekuaa ko mbaʼére: Opavave ndojapóiva hustísia ndoúi Ñandejáragui, avei pe ndohayhúiva iñermánope [...] ñande jajoayhuvaʼerã; ani Caín ojapohaguéicha, haʼe ouvaʼekue pe añágui ha ojuka iñermánope’ (1 Juan 3:​10-12; 4:​20, 21).

¹⁰ Upeichaite, peteĩ oporohayhúva ndojukái hapichápe, péro ndahaʼéi upéva añónte. Umi kristiáno añetegua oiporu kyreʼỹme itiémpo, imbarete, imbaʼerepy oñopytyvõ ha oñomokyreʼỹ hag̃ua (Hebreos 10:​24, 25). Haʼekuéra oñopytyvõ ojehasa asy jave, ha nombotavýi hapichápe. Upéicha ojapo la Biblia heʼíva ‘ojapo rupi iporãva opavavépe g̃uarã’ (Gálatas 6:10).

11. Mbaʼérepa jagueroviavaʼerã Ñandejára ikatuha oporosalva Jesucristo rupive?

¹¹ Kristiáno añetegua oguerovia Ñandejára ikatuha oporosalva Jesucristo rupive. La Biblia heʼi: ‘Ndaipóri salvasión ambue rupive, ndaipórigui ótro téra yvy ape ári oñemeʼẽvaʼekue kuimbaʼe apytépe jajesalva hag̃ua’ (Hechos 4:12). Jahechahaguéicha pe kapítulo 5-pe, Jesús omeʼẽvaʼekue hekove orreskata hag̃ua yvyporakuéra iñeʼẽrendúvape (Mateo 20:28). Avei, Ñandejára oiporavo Jesúspe oiko hag̃ua chugui Rréi pe Rréino yvagapeguápe ogovernátava ko Yvy. Ñandejára oipota ñaneñeʼẽrendu Jesúspe ha jajapo umi mbaʼe haʼe omboʼevaʼekue, jaikoséramo opa ára g̃uarã. Upévare la Biblia heʼi: “Pe ojeroviáva Taʼýra rehe oguereko pe tekove opaʼỹva; pe naiñeʼẽrendúiva Taʼýrape ndohechamoʼãi pe tekove” (Juan 3:36).

12. Mbaʼépa heʼise ndajajeheʼái ko múndore?

¹² Umi añetehápe oadoráva Ñandejárape ndojeheʼái ko múndore. Oĩrõ guare Pilato renondépe, Jesús heʼivaʼekue: ‘Che rréino ndahaʼéi ko mundopegua’ (Juan 18:36). Oimeraẽ tetã oikohápe, Jesús remimboʼekuéra oñemoĩ irréino yvagapegua poguýpe. Upévare ndojeheʼái mbaʼeveichagua polítika ko múndo oguerekóvare. Upéicharõ jepe, umi oservíva Ñandejárape ndojokói umi oikeséva peteĩ partído polítikope, oñemoĩséva kandidátoramo, térã umi ovotasévape. Ha ndojeheʼáiramo jepe polítikare, ojapo pe léi heʼíva. Mbaʼérepa upéva? Ñandejára Ñeʼẽ heʼígui chupekuéra oñemoĩ hag̃ua ‘mburuvichakuéra guasu poguýpe’, térã umi ogovernáva (Romanos 13:1). Peteĩ goviérno ojeruréramo peteĩ mbaʼe ojoavýva Ñandejára heʼíva ndive, umi oadoráva Ñandejárape ojapóta umi apóstol ojapohaguéicha. Umíva heʼivaʼekue: ‘Ore rojapovaʼerã Ñandejára heʼíva ore mburuvicháramo, rojaporangue kuimbaʼekuéra heʼíva’ (Hechos 5:29; Marcos 12:17).

13. Mbaʼéichapa ohecha Jesús remimboʼekuéra Ñandejára Rréino, ha upévare, mbaʼépa ojapo hikuái?

¹³ Jesús remimboʼekuéra opredika Ñandejára Rréino añoite haʼeha yvyporakuéra esperánsa. Jesús heʼivaʼekue: “Koʼã marandu porã rréino rehegua ojekuaaukavaʼerã opa ojeikoha rupi testimoniorã opa tetãnguérape; ha upe rire og̃uahẽta pe fín” (Mateo 24:14). Jesucristo remimboʼekuéra omombeʼu Ñandejára Rréino yvagapegua añoite haʼeha yvyporakuéra esperánsa. Haʼekuéra nomokyreʼỹi hapichakuérape oguerovia hag̃ua umi governánte omyatyrõtaha umi provléma oĩva (Salmo 146:3). Jesús ñanemboʼevaʼekue jajerure hag̃ua pe goviérno ijojahaʼỹvare heʼírõ guare: “Tou ne rréino. Tojejapo ne rembipota, yvagapeguáicha, ko Yvy ape ári avei” (Mateo 6:10). Ñandejára Ñeʼẽ heʼivaʼekue ko Rréino yvagapeguáre ‘omonguʼíta ha ohundipataha koʼã rréinope [umi oĩva koʼág̃a], ha opytataha opa ára peve’ (Daniel 2:44).

14. Mbaʼe rrelihiónpa ojapo pe adorasión añetegua ojeruréva?

¹⁴ Jahecha rire koʼã mbaʼe, eñeporandumi: ‘Mbaʼe rrelihiónpa omboʼe la Bíbliape oĩvante, ha oikuaauka Ñandejára heraha Jehová? Mbaʼe rrelihiónpa ohechauka ojoayhuha Ñandejára oipotaháicha, ojerovia Jesús rehe, ndojeheʼái ko múndore, ha opredika Ñandejára Rréino añoite haʼeha yvyporakuéra esperánsa? Opa rrelihión oĩvagui ko Yvy ape ári, máva añoitépa ojapo koʼã mbaʼe?’. Umi mbaʼe ojapóvare jahecha porã haʼeha umi testigos de Jehová (Isaías 43:​10-12).

15. Mbaʼépa ojerure avei Ñandejára ñandehegui jagueroviáramo jepe haʼe oĩha?

¹⁵ Ñambovyʼa hag̃ua Ñandejárape, ndahaʼeivaʼerã jagueroviánteva haʼe oĩha. La Biblia heʼi umi demónio jepe oguerovia oĩha Ñandejára (Santiago 2:19). Péro, haʼekuéra ndojapói Ñandejára oipotáva ha oĩ vai henondépe. Ñaime porã hag̃ua Ñandejára renondépe, ndahaʼéi jagueroviantevaʼerã haʼe oĩha, jajapovaʼerã avei pe oipotáva. Avei tekotevẽ ñasẽ pe rrelihión japúgui ha ñañakarama pe adorasión añeteguáre.

16. Mbaʼépa jajapovaʼerã ani hag̃ua jajeheʼa pe rrelihión japúre?

¹⁶ Pe apóstol Pablo ohechaukavaʼekue ndajajeheʼaivaʼerãha pe adorasión añeteʼỹvare. Haʼe ohaivaʼekue: ‘“Pesẽ ijapytégui, ha pejeíke ​—heʼi Jehová​—,  ha anive pepoko pe mbaʼe kyʼáre”; “ha che poromog̃uahẽta”’ (2 Corintios 6:17; Isaías 52:11). Upévare umi kristiáno añetegua oheja opa mbaʼe oúva pe rrelihión japúgui.

17, 18. Mbaʼépa pe ‘Babilonia Guasu’, ha mbaʼérepa tekotevẽ ‘oñesẽ chugui’ pyaʼe porã?

¹⁷ La Biblia omboʼe opaichagua rrelihión japu oĩha ‘Babilonia Guasúpe’a (Revelación 17:5). Ko téra ñanemomanduʼa peteĩ táva guasúre, oĩvaʼekue yma ha hérava Babilonia. Upépe oñepyrũvaʼekue pe rrelihión japu oiko rire pe Dilúvio Noé tiémpope. Heta mbaʼe oñemboʼéva ha ojejapóva koʼág̃a umi rrelihión japúpe ojejapomavaʼekue yma Babilóniape. Upéva ikatu jahecha umi oikóvare upépe, haʼekuéra oadorámi umi trinida térã mbohapy diós oĩva peteĩme. Ha koʼág̃a pe doktrína tuichavéva heta rrelihiónpe haʼe pe Trinidad. Péro la Biblia omboʼe porã peteĩnteha Ñandejára añetegua, Jehová, ha Jesucristo haʼeha Itaʼýra (Juan 17:3). Umi Babiloniaygua ogueroviavaʼekue avei jaguerekoha peteĩ álma omanoʼỹva ha ikatúva ohasa asy peteĩ lugár vaípe ñamano rire. Koʼág̃a rupi, oĩ hetave rrelihión omboʼéva jaguerekoha peteĩ álma térã espíritu omanoʼỹva, ikatúva ohasa asy pe infiérnope.

¹⁸ Pe rrelihión ojeguerekovaʼekue Babilonia ymaguarépe isarambivaʼekue opárupi ko Yvy ape ári. Upévare avei ikatu jaʼe pe Babilonia Guasu koʼag̃agua haʼeha pe império guasu rrelihión fálsa rehegua. Ha Ñandejára heʼihaguéicha ko império oñehundíta oñeimoʼãʼỹve jave (Revelación 18:8). Ndépa rehechakuaa mbaʼérepa tekotevẽ rejeiete Babilonia Guasúgui? Ñandejára Jehová oipota ‘resẽ chugui’ pyaʼe porã, oĩ reheve tiémpo (Revelación 18:4).

19. Mbaʼépa ñaganáta jaservíramo Jehovápe?

¹⁹ Jajedesidihaguére jaheja pe rrelihión japu, ikatu oĩ umi ndojeheʼasevéimava ñanderehe. Péro jaservíramo Jehovápe isiervokuéra ndive, mombyry ñaganáta. Umi Jesús remimboʼe ymaguare ohejavaʼekue heta mbaʼe osegi hag̃ua chupe, péro haʼekuéraicha avei jaguerekóta heta ermáno ha ermána espirituál. Ñaiméta umi kristiáno añetegua família guasúpe, oĩva opárupi, ha ñanderayhútava añetehápe. Ha jaguerekóta pe esperánsa porãite jaiko hag̃ua opa ára g̃uarã “pe sistéma oútavape” (Marcos 10:​28-30). Ikatu avei, umi ndojeheʼaseveimavaʼekue ñanderehe, oikuaase upe rire la Biblia omboʼéva ha oadora Jehovápe.

20. Mbaʼépa ohaʼarõ umi ojapóvape pe rrelihión añetegua omboʼéva?

²⁰ La Biblia omboʼe Ñandejára ohundipotaitemaha ko múndo aña, ha omoĩtaha hekovia peteĩ múndo pyahu ogovernátava Irréino hustísiape (2 Pedro 3:​9, 13). Mbaʼeichaite piko iporãta pe múndo pyahu! Ha pe múndo pyahúpe oĩta peteĩ rrelihión añónte, pe adorasión añetegua. Ajépa iporãta jajeheʼáramo koʼág̃ama voi umi Ñandejárape oadoráva ndive?