Ñakambia tekotevẽhápe jaiko hag̃ua tekopotĩme

 1. ¿Mbaʼe iporãitévapa ohecha rakaʼe proféta Ezequiel?

OJAPÓMA 2.500 áño proféta Ezequiel ohecha hague peteĩ mbaʼe ijojahaʼỹva. Epensami ndeháma rehechaha upéva. Reg̃uahẽ rehóvo peteĩ témplo tuichaiterei ha omimbipávape. Peteĩ ánhel ipoderósova ohechauka ndéve pe lugár porãite. Oĩ peteĩ eskaléra ha rejupívo umi siete gráda, retopa mbohapy okẽ guasu. Upépe ndejurujái repytávo. Umi okẽ ijyvate 30 métro. Reikévo rehecha umi koty guárdiape g̃uarã. Umi kolúmna katu ijyvate ojogua umi mbokaja mátape (Ezeq. 40:1-4, 10, 14, 16, 22; 41:20).

 2. a) ¿Mbaʼépa orrepresenta pe témplo ohecha vaʼekue Ezequiel? (Ehecha avei pe nóta.) b) ¿Mbaʼépa orrepresenta umi mbaʼe ojehecháva pe témplope?

² Ko témplo orrepresenta opa mbaʼe ojejapóva ojeadora hag̃ua Jehovápe. Ezequiel omombeʼu uno por uno umi mbaʼe ohecha vaʼekue. Upéicha rupi kapítulo 40 guive 48 peve pe témplore memete oñeñeʼẽ. Opa mbaʼe oñemombeʼúva umi kapítulope ohechauka mbaʼéichapa Jehová oipota ñamombaʼeguasu chupe koʼã ára pahápe.a ¿Mbaʼépa jaʼekuaa umi okẽ ijyvatetévare? Umíva ñanemomanduʼa jaike hag̃ua Jehová organisasiónpe tekotevẽha ñakumpli Ñandejára omandáva ha jaiko haʼe oipotaháicha. Upévare oĩ avei umi kolúmna yvate ojoguáva mbokaja mátape, pórke la Bíbliape ko yvyramáta orrepresenta jepi umi hekoporãvape (Sal. 92:12). ¿Ha mbaʼépa orrepresenta umi koty guárdiape g̃uarã? Koʼã koty ohechauka ndojehejaiha oadora Jehovápe umi ndorrespetáivape haʼe omandáva (Ezeq. 44:9).

 3. ¿Mbaʼérepa osegi vaʼerã okambia kristianokuéra?

³ ¿Mbaʼéichapa oñekumpli pe visión Ezequiel ohecha vaʼekue? Jahecha haguéicha kapítulo 2-pe, Jehová ojevale Jesucrístore omopotĩ hag̃ua ipuévlo 1914 guive 1919 peve. ¿Upe áño pevéntepa oñemopotĩ chupekuéra? Nahániri. Cien áño jeýma upe hague ha Cristo osegi gueteri oipytyvõ isegidorkuérape oiko hag̃ua Jehová oipotahaichaite. ¿Mbaʼérepa haʼe osegi ojapo upéva? Jesucristo ningo oguenohẽma isegidorkuérape ko múndo kyʼágui, péro oikuaa Satanás koʼẽ koʼẽre oñehaʼãha oity jey chupekuéra tekokyʼa ha mbaʼe vaípe (elee 2 Pedro 2:20-22). Jahechami mbohapy mbaʼe tekotevẽ vaʼekue ojekorrehive. Primero jahecháta mbaʼépepa okambia kristianokuéra hekopotĩve hag̃ua. Upéi jahecháta mbaʼépa ojejapo ani hag̃ua oñemongyʼa kongregasión ha ipahápe mbaʼéichapa oñepytyvõ familiakuéra oĩvape Jehová puévlope.

4, 5. ¿Mbaʼe ñuhãpa oiporu ymaite guive Satanás, ha mbaʼéichapa osẽ chupe?

⁴ Ymaite guive Jehová puévlo oñehaʼã hekopotĩ. Upévare naiprovlémai hikuái okambia hag̃ua tekotevẽhápe. Jahechamína unos kuánto ehémplo.

⁵ Tekovai. Jehová ojapo vaʼekue kuimbaʼe ha kuñáme ikatu hag̃uáicha omenda ha oreko rrelasión sexuál. Upéva peteĩ rregálo haʼe omeʼẽva umi omendávape ovyʼa hag̃ua hikuái. Péro Satanás ombyaise katuete upe rregálo. Upearã omboliga la héntepe hekovai hag̃ua ha oiporu heta ñuhã oity hag̃ua chupekuéra. Satanás ojapo upéva oheja vaiségui umi kristiánope Jehová renondépe. Yma Balaam tiémpope hetápe oity vaʼekue ko ñuhãme ha koʼã ára pahápe hetavépentema oity tekovaípe (Núm. 25:1-3, 9; Apoc. 2:14).

 6. ¿Mbaʼe kompromísopa osẽ Ñemañaháme, ha mbaʼérepa ndojeporuvéi? (Ehecha avei pe nóta.)

⁶ Ani hag̃ua Satanás osẽ la ijidéape, Ñemañaha 15 de junio de 1908-pe osẽ peteĩ kompromíso heʼíva umi kuimbaʼe ha kuña ojotratataha tekopotĩme entéro lugárpe ha oimeha órape, ndohechamoʼãiramo jepe chupekuéra avave.b Ndojeovligáiramo jepe avavépe ojapo hag̃ua upe kompromíso, oĩ heta oñekomprometéva ha oguerahauka héra osẽ hag̃ua Ñemañaháme. Heta áño rire ojehechakuaa umi ermáno ojapoha upe kompromíso ojepokuaágui reíntema, ha upévare ndojejapovéi. Péro oñemokyreʼỹ meme umi ermánope siémpre hekopotĩ hag̃ua.

 7. ¿Mbaʼe provlémarepa oñeʼẽ Ñemañaha 1935-pe guare, ha mbaʼépa omyesakã porã upéva?

⁷ Satanás katu oñehaʼã mbareteve oity hag̃ua umi kristiánope. Ñemañaha 1 de marzo de 1935 heʼi porã oĩha peteĩ provléma tuichavéva ohóvo Jehová puévlope. Oĩ opensáva osẽramo opredika natekotevẽveimaha hekopotĩ Jehová heʼihaichaite. Ñemañaha heʼi porã: “Ndahaʼéi japredikánte vaʼerã ha ja oĩma. Ñanemanduʼa vaʼerã ñarrepresentaha Jehová ha Irréinope. Upévare nañamotĩri vaʼerã chupe”. Pe artíkulo omyesakã porã mbaʼépa Jehová opensa matrimónio ha tekopotĩre. Péicha oñepytyvõ ermanokuérape ‘odipara hag̃ua tekovaígui’ (1 Cor. 6:18).

 8. ¿Mbaʼéichapa Ñemañaha omyesakã porã mbaʼépa heʼise pe palávra pornéia?

⁸ Umi áño ohasa vaʼekuépe Ñemañaha heʼi jey jey mbaʼépa heʼise pe palávra pornéia. Upéva ojeporu Escrituras Griégaspe oñeñeʼẽ jave tekovaíre. Ñemañaha omyesakã porã pe ñeʼẽ ndeʼiseiha rrelasión sexuál añónte, síno heʼiseha avei heta mbaʼe kyʼa ojejapóva jepi umi kuña rekovaíndi. Péicha oñepytyvõ Jesucristo segidorkuérape ani hag̃ua hekovai umi hénte ko mundopeguáicha (elee Efesios 4:17-19).

9, 10. a) ¿Mbaʼe témarepa oñeʼẽ Ñemañaha osẽ vaʼekue 1935-pe? b) ¿Mbaʼépa heʼi la Biblia umi vevídare?

⁹ Hoʼu rasáva vevída. Ñemañaha osẽ vaʼekue 1 de marzo de 1935 oñeʼẽ ótro téma tekotevẽvare oñekambia: “Oĩ hoʼúva vevída ha ensegidami osẽva opredika ha ojapo ótro tembiapo kongregasiónpe. ¿Mbaʼéicha javépa la Biblia heʼi ndaivairiha ojeʼu víno? ¿Mbaʼépa opensáne Jehová jaʼúramo víno ha ojupígui ñanderehe ndajajapoporãi ñane rembiapo kongregasiónpe?”.

¹⁰ Upe rrevísta ombohovái hag̃ua koʼã porandu omombeʼu mbaʼépa heʼi la Biblia vevídare. Ñandejára Ñeʼẽ ndeʼíri oĩ vaiha jaʼuʼimi vevída péro heʼi porã ndovaleiha jakaʼu (Sal. 104:14, 15; 1 Cor. 6:9, 10). Kristianokuéra ohechakuaa hag̃ua oĩ porãpa hoʼu vevída ha upéi ojapo hembiapo kongregasiónpe, imanduʼa vaʼerã oiko vaʼekuére Aarón raʼykuérare. Peteĩ jey haʼekuéra ohapy insiénso Ñandejára renondépe, péro ndojapói hikuái oñemanda haguéicha chupekuéra, upévare Jehová ohundi mokõivévape. La Biblia heʼi upe riremínte Ñandejára omeʼẽ hague peteĩ léi heʼíva ndovaleiha umi saserdóte hoʼu vevída ha upéi ojapo hembiapo Jehová renondépe. Péicha jahecha mbaʼérepa oiméne ivaiete la ojapo vaʼekue hikuái (Lev. 10:1, 2, 8-11). Upe oiko vaʼekue ñanepytyvõ ñantende hag̃ua mbaʼépa ndogustái Ñandejárape. Upévare Jesús segidorkuéra ñañatende ha ndajaʼúi vevída jajapóta jave ñane rembiapo kongregasiónpe.

11. ¿Mbaʼérepa jaʼekuaa ou porã hague Ñandejára puévlope ontende mbaʼépa pe alcoholismo?

¹¹ Umi áño ohasa vaʼekuépe Jesús segidorkuérape oñepytyvõ ontende porã hag̃ua mbaʼépa pe alcoholismo. Upéva heʼise pe tapicha oñenvisiaha vevídare ha hoʼúmante vaʼerã káda día. Oñemeʼẽ rupi hiʼoraitépe koʼã informasión oúva Ñandejáragui, hetave héntepe oñepytyvõ ikatu hag̃uáicha oheja ivísio ha ndoikovéima vevída poguýpe. Ótrope katu oñepytyvõ ani hag̃ua hoʼa ko ñuhãme. Péicha rupi avave ndoperdéi ifamília, ndoikói oñemotĩ ikaʼu haguére ha iporãveha katu omombaʼeguasu hekopete Jehovápe.

12. Oñepyrũ mboyve koʼã ára paha, ¿mbaʼépa ohechakuaáma Jesús segidorkuéra?

¹² Opita ha onakeáva. Oñepyrũ mboyve koʼã ára paha, Jesús segidorkuéra ohechakuaáma vaʼekue ivaiha ojepita térã oñenakea. Ojapóma unos kuánto áño peteĩ ermáno ijedámava hérava Charles Capen imanduʼa ojotopa ypýrõ guare Charles Russell ndive, áño 1900 mboyve. Upérõ ermáno Capen oreko 13 áño, ha mbohapy iñermánondi oĩ hína peteĩ eskalérape Casa de la Bíbliape (Allegheny, Pensilvania). Ermáno Russell ohasa upérupi ha oporandu chupekuéra: “¿Peẽiko pepita hína? Ape ahetũ sigarríllo ryakuã”. Koʼã mitãrusu heʼi joʼa joʼa chupe ndopitaiha hikuái. Upérõ katuete haʼekuéra ohechakuaáne mbaʼépa ermáno Russell opensa jepitáre. Ñemañaha 1 de agosto de 1895-pe ermáno Russell oñeʼẽ 2 Corintios 7:1 rehe ha heʼi: “Che ndaikuaái mbaʼéichapa peteĩ kristiáno opita térã onakeáva omombaʼeguasu Ñandejárape, térã mbaʼépepa ideprovécho chupe umi vísio. Ni mbaʼevéicharõ ndajaʼemoʼãi Jesús rehe hyakuãne hague sigarríllo térã omoingéne hague ijurúpe oimeraẽ mbaʼe omongyʼátava chupe”.

13. ¿Mbaʼépa hesakã porãve raʼe 1973-pe?

¹³ Áño 1935-pe Ñemañaha heʼi petỹ térã taváko haʼeha peteĩ “ñana kyʼa”. Heʼi avei umi onakeáva térã opitáva ndaikatumoʼãveimaha ombaʼapo Betélpe, ojapo iprekursorádo térã oservi de superintendénte. Áño 1973-pe katu hesakã porãvéntema ko mbaʼe. Ñemañaha 1 de júniope guare heʼi ni peteĩ testígo de Jehová ndaikatuiha oservi porã kongregasiónpe orekóramo ko vísio kyʼa oporojukáva, ha heʼi avei umi opitáva ndohayhuiha avavépe. Heʼi avei umi ndohejaséiva ko vísio oñemosẽ vaʼerãha kongregasióngui.c Péicha Jesucristo osegi oipytyvõ isegidorkuérape oservi hag̃ua Jehovápe haʼe oipotahaichaite.

14. ¿Mbaʼépa heʼi Ñandejára tuguýre, ha mbaʼéichapa oñepyrũ ojeporu pe tuguy opárupi?

¹⁴ Ojeporu vai pe tuguy. Noé tiémpope Ñandejára heʼi vaʼekue ndovaleiha ojeʼu tuguy. Ha heʼi jey upéva pe Léi omeʼẽ vaʼekuépe umi isrraelítape. Pe kongregasión kristiánape avei ojeʼe ‘ani hag̃ua oiporu tuguy’ (Hech. 15:20, 29; Gén. 9:4; Lev. 7:26). Péro Satanás otopa jeýma mbaʼéichapa omomýita la héntepe pono iñeʼẽrendu Ñandejárape. Áño 1900 mboyve umi doktór oñepyrũma oiporu mimi tuguy, ha ojekuaa rire oĩha umi grupo sanguíneo hetave hendápema ojeporu tuguy. Áño 1937-pe oñepyrũ onohẽ hikuái la héntegui huguy ha oñongatu banco de sángrepe. Ha pe segunda gérra mundiál aja hetavépema oñemoĩ tuguy. Upe tiémpo guive opárupi ko yvy ape ári oĩ doktór oiporúva péicha tuguy.

15, 16. a) ¿Mbaʼépa odesidi Jesús segidorkuéra? b) ¿Mbaʼéichapa oñepytyvõ Cristo segidorkuérape ani hag̃ua omoĩka tuguy, ha mbaʼépa ojehupyty upévare?

¹⁵ Áño 1944-pe Ñemañaha heʼíma vaʼekue ñamoĩkáramo tuguy haʼetenteha avei jaʼúva. Áño 1945-pe oñentende porãvéntema la Biblia heʼíva upe témare. Ha 1951-pe osẽ peteĩ informasión oñeʼẽva tuguýre. Upévape oĩ pregúnta ha rrespuésta oipytyvõva Ñandejára siervokuérape oikuaa hag̃ua mbaʼépa heʼíta umi doktórpe. Opárupi ko yvy tuichakuére Jesús segidorkuéra pyʼaguasúpe odesidi nomoĩkamoʼãiha tuguy oĩramo jepe oapoʼi, ijarhél ha opersegíva chupekuéra. Péro iñorganisasión rupive Cristo omeʼẽ umi ermánope la oikotevẽva oñedefende hag̃ua. Ojeheka heta informasión ha upe rire oñeguenohẽ folléto ha rrevísta oñeʼẽva upe témare.

¹⁶ Áño 1979-pe umi ansiáno oñepyrũ oho ospitalhárupi omombeʼu porãve hag̃ua doktorkuérape mbaʼérepa nañamoĩkái tuguy, ha mbaʼe ótro tratamiéntopa oĩ upéva rangue. Áño 1980-pe oñembokatupyry ko travahorã heta ansiánope oĩva 39 siudápe Estados Unídospe. Tiémpo rire Kuérpo Governánte heʼi oñepyrũ hag̃ua oparupiete umi Grúpo de ansiáno oñekomunikáva doktorkuérandi (Comité de Enlace con los Hospitales). ¿Mbaʼépa ojehupyty ojejapo haguére koʼã mbaʼe? Koʼág̃a hetaiterei doktór, siruháno ha anestesiólogo oñatende testigokuérare oiporuʼỹre tuguy. Heta hetave ospitál oñatende oiporuʼỹre tuguy ha umi doktór voi heʼi iporãveha ojejapo upéicha. ¡Ajépa ñamombaʼete jahechávo mbaʼéichapa Jesús oñangareko isegidorkuérare ani hag̃ua Satanás omongyʼa chupekuéra! (Elee Efesios 5:25-27.)

17. ¿Mbaʼéichapa jahechauka ñamombaʼeha Jesús ojapóva ñandekorrehi hag̃ua?

¹⁷ Iporãta ñañeporandu: “¿Ñamombaʼépa Jesucristo ojapóva ñandekorrehi hag̃ua? ¿Javyʼápa ñanemboʼe haguére jaiko hag̃ua tekopotĩme Jehová oipotaháicha?”. Upéicharõ ñanemanduʼa vaʼerã Satanás ndoipotaiha jarrespeta Jehová heʼíva ha siémpre oñehaʼãha ñanemomombyry Jehová ha Jesúsgui. Ani hag̃ua oiko ñanderehe upéva, Jehová organisasión pyʼỹinte ñanemomanduʼa ñañatende vaʼerãha pono ñanemongyʼa umi mbaʼe vai ojejapóva ko múndope. Upévare tekotevẽ ñañatende meme ha ñahendu umi konsého porãite oñemeʼẽva ñandéve (Prov. 19:20).

18. ¿Mbaʼépa oikóta umi naiñeʼẽrendúivare, ohechaukaháicha pe visión?

¹⁸ Pe kongregasión ipotĩ hag̃ua oñeñangareko vaʼerã hese ani hag̃ua oñemongyʼa. Heta persóna oñemeʼẽ vaʼekue Jehovápe, upéi okambia opensa lája ha ndorrespetaveiete haʼe omandáva. Oĩ umi notirĩva ojapo hag̃ua ivaíva. ¿Mbaʼépa jaʼekuaa koʼãvare? Ñanemanduʼami jey pe témplo Ezequiel ohecha vaʼekuére. Pe témplope oĩ umi okẽ yvate ha koty guardiakuérape g̃uarã. Koʼã guárdia oñatende ani hag̃ua oike upépe “mbaʼeveichagua tetã ambuegua” nomopotĩri vaʼekue ikorasõ (Ezeq. 44:9, ÑÑB). Upéva ohechauka porãiterei ndahaʼeiha oimeraẽvante ikatúva oadora Jehovápe síno umi oñehaʼãva oiko haʼe oipotaháicha añoiténte. Upéicha avei, koʼág̃a ndahaʼéi oimeraẽvante oadoráva Jehovápe ipuévlondi.

19, 20. a) ¿Mbaʼéichapa Jesucristo oipytyvõ isegidorkuérape oikuaa hag̃ua mbaʼépa ojejapo vaʼerã umi opekávagui? b) ¿Mbaʼérepa tekotevẽ oñemosẽ peteĩ noñarrepentírivape?

¹⁹ Áño 1892-pe Ñemañaha heʼi “kristianokuéra omosẽ vaʼerãha umi onegávape Cristo oñemeʼẽ hague ñanderehehápe” (elee 2 Juan 10). Upéi 1904-pe lívro La Nueva Creación heʼi porã umi osegíva ojapo mbaʼe vai oapeligraha kongregasiónpe. Upérõ entéro umi ermáno oĩva kongregasiónpe odesidi mbaʼépa ojejapóta peteĩ opekávagui, péro sapyʼapyʼántente ojejapo upéva. Áño 1944-pe Ñemañaha ohechauka umi ermáno omoakãva kongregasiónte odesidi vaʼerãha upéva. Upéi 1952-pe Ñemañaháme oñeguenohẽ peteĩ artíkulo omyesakãva la Biblia rupive mbaʼéichapa ojedesidi vaʼerã oñemosẽtapa peteĩ hembiapo vaívape. Avei ojehechauka tekotevẽtereiha ojejapo upéva pe kongregasión osegi hag̃ua ipotĩ.

²⁰ Tiémpo rire Jesucristo oipytyvõ isegidorkuérape ontende porãve hag̃ua mbaʼépa ojapo vaʼerã oĩramo peteĩ hembiapo vaíva kongregasiónpe. Umi ansiánope oñehekomboʼe ikatu hag̃uáicha oporohusga Jehová oipotaháicha. Haʼekuéra oiporiahuvereko vaʼerã pe opekávape péro odefende vaʼerã avei Jehová Leikuéra. Koʼág̃a rupi jaikuaa porã mbaʼérepa tekotevẽ oñemosẽ kongregasióngui umi noñarrepentírivape: 1) ani hag̃ua oñeñeʼẽ vai Jehová rérare, 2) ani hag̃ua pe pekádo omongyʼa kongregasión, ha 3) oñemomýi hag̃ua pe opekávape ombyasy hag̃ua la ojapóva ha okambia.

21. ¿Mbaʼérepa jaʼekuaa ou porãha kongregasiónpe oñemosẽrõ peteĩ osegívape opeka?

²¹ ¿Jahechakuaápa mbaʼeichaitépa oñepytyvõ Cristo segidorkuérape oñemosẽ rupi kongregasióngui umi osegívape opeka? Yma Israélpe umi mbaʼe vai apoha ogueraha vai pe tetãme ha upéva káusare sapyʼánte saʼive umi ohayhúva Jehovápe ha ojaposéva iporãva. Upévare heta vése pe puévlo omongyʼa Jehová réra ha opyta vai henondépe (Jer. 7:23-28). Péro koʼág̃a Jehová oreko ipuévlope kuimbaʼe ha kuña ijerovia mbaretéva. Ha oñemosẽ rupi umi nokambiaséivape, Satanás ndaikatuvéima ojevale hesekuéra ogueraha vai hag̃ua ermanokuérape ha péicha pe kongregasión ipotĩ. Upévare Jehová puévlo siémpre oĩ porã henondépe. Haʼe ningo opromete vaʼekue voi: “Tahaʼe haʼéva opuʼãva nderehe nosẽporãmoʼãi” (Isa. 54:17). Jahechakuaa umi ansiáno orekoha tuicha rresponsavilida ¿ñamombaʼépa hembiapo ha jarrespeta odesidíva hikuái?

22, 23. ¿Mbaʼérepa jaagradese ñane ermanokuéra oiko vaʼekuépe 1900 riremi? ¿Mbaʼépa tekotevẽ oñatendemie raʼe hikuái?

²² Jesús segidorkuérape tekotevẽ vaʼekue avei oñepytyvõ ikatu hag̃uáicha omombaʼeve imatrimónio ha ifamília. Por ehémplo jalee jave mbaʼe mbaʼépa ojapo ñane ermanokuéra oiko vaʼekue áño 1900 riremi, ñamombaʼeterei ha jaguerohory chupekuéra. Umi ermáno heta ojesakrifika omotenonde hag̃ua Jehová servísio ha jaagradese la ojapo vaʼekuére. Péro jahechakuaa avei upe tiémpope tekotevẽ hague oñatendemie hikuái hogapýre. ¿Mbaʼérepa jaʼe upéva?

²³ Upe tiémpope oĩ ermáno oviaháva mombyry ha heta mésere opredika térã ovisita kongregasionkuéra. Péicha areterei oñemomombyry ifamíliagui. Heta vése katu ojeʼe vaʼekue voi ivaiha oñemenda péro la Biblia ningo ndeʼíri upéva. Hiʼarive saʼi oñepytyvõ umi omendávape ojoayhuve hag̃ua. ¿Osegípa péicha Jehová organisasión koʼág̃a peve? ¡Ni mbaʼevéicharõ!

24. ¿Mbaʼéichapa Cristo oipytyvõ isegidorkuérape oñatende porãve hag̃ua hogapýre?

²⁴ Ko tiémpope nañamboykéi ñane família ñakumpli hag̃ua ñane rresponsavilida kongregasiónpe (elee 1 Timoteo 5:8). Avei Cristo ojevale tembiguái jeroviaháre omeʼẽ hag̃ua isegidorkuérape konsého oipytyvõtava chupekuéra hogapýpe (Efes. 3:14, 15). Áño 1978-pe oñeguenohẽ pe lívro Como lograr felicidad en su vida familiar, ha 18 áño haguépe oñeguenohẽ pe lívro Mbaʼépa ñanepytyvõta javyʼa hag̃ua ñane família ndive. Avei Ñemañaháme osẽ heta artíkulo oipytyvõva ména ha tembirekópe ojapo hag̃ua la Biblia heʼíva ha péicha ojogueraha porãve.

25-27. ¿Mbaʼe puvlikasiónpa oñeguenohẽ oñepytyvõ hag̃ua umi imitãvape?

²⁵ ¿Ha mbaʼéichapa oñepytyvõ umi imitãvape? Yma guive Jehová organisasión omeʼẽ chupekuéra umi puvlikasión oikotevẽva, tahaʼe umi mitã michĩvape térã mitãrusu ha mitãkuñanguérape. Ymave saʼimimínte oñemeʼẽ informasión ku y otykyramoguáicha, péro koʼág̃a oĩma hetaiterei haʼete peteĩ rrío osyry hatãva. Por ehémplo 1919 guive 1921 peve La edad de oro onohẽ pe artíkulo Estudio bíblico para los jóvenes. Upéi, áño 1920-pe osẽ pe folléto La edad de oro ABC, ha 1941-pe oñeguenohẽ lívro Hijos. Áño 1970 rire osẽ koʼã lívro: Escuchando al Gran Maestro, Tu juventud... aprovechándola de la mejor manera ha Che lívro omombeʼúva istória oĩva Ñandejára Ñeʼẽme. Áño 1982-pe ¡Despertad! oguenohẽ umi artíkulo “Los jóvenes preguntan”, upe rire 1989-pe osẽ lívro Lo que los jóvenes preguntan. Respuestas prácticas.

²⁶ Koʼág̃a jareko lívro Mitãrusukuéra oñeporandúva jepi volúmen 1 ha 2 ha ñane páhina de Internétpe osegi gueteri osẽ umi téma mitãrusukuérape g̃uarã. Jareko avei pe lívro Ñaaprende Mboʼehára Guasúgui. Ñande sítio de Internétpe oĩ hetaiterei mbaʼe umi mitã michĩva ha tuichamiévape g̃uarã. Por ehémplo umi ficha de personajes bíblicos, actividades para estudiar la Biblia, vidéo, historias ilustradas, mis primeras lecciones de la Biblia umi orekóvape tres áño térã michĩvévape g̃uarã. Jesús oĩrõ guare ko yvy ape ári oañua vaʼekue umi mitã mimíme ha jahechakuaa koʼág̃a peve ohayhuetereiha chupekuéra ha ojepyʼapyha hesekuéra. Haʼe oipota umi imitãva ohechakuaa ojehayhuha chupekuéra ha oaprende heta mbaʼe Jehovágui (Mar. 10:13-16).

²⁷ Jesús ndoipotái ojejapo mbaʼeve ivaíva umi mitãre. Koʼẽ koʼẽre ko múndope ojejapo hetave mbaʼe tieʼỹ ivaietereíva ha upévare ojeviola ha ojehugapa umi mitã mimíre. Upéicha rupi oñeguenohẽ informasión heʼi porãva tuvakuérape mbaʼéichapa oñangareko vaʼerã ifamíliare ani hag̃ua oiko hesekuéra koʼã mbaʼe vaiete.d

28. a) ¿Mbaʼépa jajapo vaʼerã Jehová ñandeguerohory hag̃ua? b) ¿Mbaʼépa jajedesidi vaʼerã jajapo?

²⁸ Ajépa ñamombaʼete mbaʼéichapa Jesús okorrehi isegidorkuérape ha omboʼe chupekuéra oiko hag̃ua Jehová oipotahaichaite. Ñapensamíntena pe témplo Ezequiel ohecha vaʼekuére ha mbaʼeichaitépa ijyvate umi okẽ. Jaikuaa ningo pe témplo orrepresentanteha opa mbaʼe ojejapóva ojeadora hag̃ua Jehovápe ha ndahaʼeiha peteĩ óga jahecháva. Péro ndahaʼéi upe haguére jaʼétava ndoexistiriha. Ñande ikatu jaha rreunionhápe, jalee la Biblia ha ñasẽ japredika péro ndahaʼéi upévante Jehová oipotáva. Ikatu oĩ ojapóva koʼã mbaʼe péro upe aja hembiapo vai oikóvo. Umívape ni mbaʼevéicharõ Jehová ndoguerohorymoʼãi. Péro ñakumplírõ la Biblia heʼíva, jaiko Jehová oipotaháicha ha ñamombaʼeguasu chupe ñande pyʼaite guive, haʼe ñandeguerohorýta katuete. Jaʼekuaa jaikeha Jehová témplope ha jaserviha chupe pe lugár iporãvévape. Akóintekena ñañangareko ko rregálo ijojahaʼỹvare. Jajedesidíkena siémpre ñanderekopotĩ Jehová heʼiháicha ha ñamombaʼe umi léi haʼe omoĩva.