Ñañembyaty jaadora hag̃ua Jehovápe

 1. Umi disípulo oñembyatýrõ guare, ¿mbaʼéichapa oñepytyvõ chupekuéra, ha mbaʼérepa oikotevẽ raʼe hikuái upéva?

JESÚS oikove jey riremi, idisipulokuéra oñembyaty oñomokyreʼỹ hag̃ua. Péro oñembyaty hikuái koty ñembotypýpe okyhyjégui umi iñenemigokuéragui. Upeichaháguinte Jesús oike upépe ha heʼi chupekuéra: “Oñemeʼẽ peẽme espíritu sánto”. Oiméne tuicha ipyʼaguapyve hikuái upéi (elee Juan 20:19-22). Tiémpo riremi oñembyaty jey hikuái ha Jehová omeʼẽ chupekuéra espíritu sánto. Upéva omombarete umi disípulope opredika hag̃ua, pórke upéi haʼekuéra omotenonde vaʼerã pe predikasión (Hech. 2:1-7).

 2. a) ¿Mbaʼéichapa Jehová ñanemombarete, ha mbaʼérepa ñaikotevẽ upéva? b) ¿Mbaʼérepa iñimportantete pe estúdio de família? (Ehecha pe nóta ha pe rrekuádro “Estúdio de família”.)

² Koʼág̃a ñande avei jahasa heta mbaʼe ijetuʼúva ohasa haguéicha umi disípulo yma guare (1 Ped. 5:9). Sapyʼánte ikatu ñanemongyhyje umi hénte ndaʼijaʼéiva Jehová siervokuérare. Upévare ñaikotevẽ haʼe ñanemombarete jasegi hag̃ua japredika (Efes. 6:10). Jehová ningo ojapo upéva umi rreunión rupive. Koʼág̃a jareko mokõi rreunión káda semána: Diskúrso Púvliko ha Ñemañaha Ñehesaʼỹijo, ha ñane rreunión entresemanagua hérava Mbaʼéichapa Jaiko ha Japredika vaʼerã.a Avei jarekove cuatro rreunión iñimportantetereíva káda áño, umíva hína pe aty guasu tres diagua, aty guasu un diagua ojejapóva dos vése al áño ha pe Konmemorasión. ¿Mbaʼérepa iñimportanteterei jaha enterove koʼã rreunionhápe? ¿Mbaʼéichapa oñepyrũ rakaʼe koʼã rreunión? ¿Mbaʼérepa ñamombaʼe vaʼerã koʼã aty?

3, 4. ¿Mbaʼépa ymaite guive Jehová oipota ojapo ipuévlo? Emombeʼu ehémplo.

³ Yma guive Jehová oipota ipuévlo oñembyaty oadora hag̃ua chupe. Por ehémplo áño 1513-pe antes de Cristo omeʼẽ vaʼekue iléi umi isrraelítape. Jehová omanda enterove famíliape toheja káda sábado oadora hag̃ua chupe ha ostudia hag̃ua pe Léi (Deut. 5:12; 6:4-9). Umi isrraelíta ojapórõ upéva enterove umi família imbarete, oñemoag̃uive Jehováre ha oĩ porã henondépe. Péro naiñeʼẽrendúirõ ha noñembyatyvéirõ, opyta vai hikuái henondépe (Lev. 10:11; 26:31-35; 2 Crón. 36:20, 21).

⁴ Jesús ningo oheja vaʼekue ehémplo iporãva. Haʼe káda sábado ohómi vaʼekue pe sinagógape (Luc. 4:16) Jesús omano ha oikove jey rire, idisipulokuéra osegi oñembyaty. Ojapo hikuái upéva noĩvéimarõ jepe pe Léi poguýpe (Hech. 1:6, 12-14; 2:1-4; Rom. 14:5; Col. 2:13, 14). Umi rreunionhápe kristianokuéra oaprende ha oñomokyreʼỹjoa. Péro ndahaʼéi upévante, oñemboʼe, okomenta ha opurahéi omombaʼeguasu hag̃ua Ñandejárape (Col. 3:16; Heb. 13:15).

 5. ¿Mbaʼérepa jaha umi rreunión ha asambleahápe? (Ehecha avei pe rrekuádro “Aty ojejapóva káda áño”.)

⁵ Koʼág̃a avei jahávo umi rreunión ha aty guasuhápe jahechauka ñañemoĩha Ñandejára Rréino ládo. Umichahápe pe espíritu sánto ñanemombarete ha ñamokyreʼỹ ótrope ñañeʼẽvo ñande jeroviáre. Iñimportanteveha, umi rreunión ha asambleahápe ikatu ñamombaʼeguasu Jehovápe ñañemboʼévo, ñakomenta ha japurahéivo. Ñane rreunión koʼag̃agua idiferénte umi isrraelíta ojapo vaʼekuégui ha umi kristiáno yma guarégui. Péro iñimportanteterei avei. ¿Mbaʼéichapa okambia ohóvo umi rreunión ojejapo lája?

6, 7. a) ¿Maʼerãpa ojejapo umi rreunión? b) ¿Mbaʼéicha vaʼekuépa umi rreunión káda grúpope?

⁶ Ermáno Charles Russell oñepyrũrõ guare ostudia Ñandejára Ñeʼẽ, ohechakuaa okonveniha oñembyaty ótro ontendesévandi avei la Biblia. Áño 1879-pe oskrivi: “Añembyaty ótro héntendi oikóva Píttsburghpe, ikatu hag̃uáicha rostudia oñondivepa Ñandejára Ñeʼẽ káda domingo”. Umi oleévape rrevísta Ñemañaha ojeʼe avei oñembyaty hag̃ua en grúpo. Ha 1881-pe ojejapóma rreunión miércoles ha domingokue Píttsburghpe (Pensilvania, Estados Unidos). Ñemañaha de noviembre 1895-pe guare heʼi koʼã rreunión ojejapoha ikatu hag̃uáicha “enterovéva oñopytyvõ, ojoayhu ha ojogueraha porã”. Avei umi rreunionhápe ikatúta oñomokyreʼỹ hikuái (elee Hebreos 10:24, 25).

⁷ Heta áñore káda grúpo odesidi mbaʼe díapa orekóta irreunión ha mboy vésepa. Por ehémplo peteĩ grúpo oĩva Estados Unídospe omondo peteĩ kárta osẽva upéi peteĩ puvlikasiónpe áño 1911-pe. Haʼekuéra heʼi: “Roñembyaty cinco vése a la semána, ha sapyʼánte hetave”. Ko grúpo oñembyaty vaʼekue lunes, miércoles ha vierneskue, ha domingo katu oñembyaty dos vése. Ótro grúpo oĩva Áfricape omondo peteĩ kárta osẽva 1914-pe, haʼekuéra heʼi: “Dos vése al mes rojapo rreunión oñepyrũva viernes ha opáva domingo”. Péro ohasávo pe tiémpo oñekambia ojejapo lája umi rreunión. Jahechamína mbaʼéichapa okambia raʼe ohóvo káda rreunión.

 8. ¿Mbaʼérehepa oñeñeʼẽ umi primer diskúrso púvlikope?

⁸ Diskúrso Púvliko. Un áño oñepyrũ rire osẽ rrevísta Ñemañaha, áño 1880-pe ermáno Russell oviaha heta lugárpe opredika hag̃ua ha péicha osegi Jesús ehémplo (Luc. 4:43). Upérõ omoñepyrũ umi rreunión ojejapohápe diskúrso púvliko. Pe rrevísta Ñemañaha oanunsia ermáno Russell oviahataha ha “ojaposeha peteĩ diskúrso púvliko hérava ‘Jaikuaave Ñandejára Rréino’”. Áño 1911-pe oñepyrũ oĩ kongregasión heta tetãme, ha oñemokyreʼỹ chupekuéra omondo hag̃ua diskursánte ikatupyrýva umi kongregasión hiʼag̃uiháme. Haʼekuéra ikatu oñeʼẽ seis témare, umíva apytépe: Ñandejára ohusgataha yvyporakuérape ha mbaʼérepa Jesús omano ñanderehehápe. Opávo káda diskúrso oñemombeʼu mávatapa la diskursánte pe semána oúvape ha mbaʼérehepa oñeʼẽta.

 9. ¿Mbaʼe kámbiopa ojejapo umi diskúrso púvlikope, ha mbaʼéichapa jahechauka ñamombaʼeha umíva?

⁹ Áño 1945-pe, rrevísta Ñemañaha oanunsia oñepyrũtaha ojejapo oparupiete ocho diskúrso púvliko oñeʼẽva umi “provléma ñane tiempopeguáre”. Heta áñore ningo umi ermáno ojapo umi téma heʼíva chupekuéra pe tembiguái jeroviaha péro ojapo avei umi téma ijeheguínte opreparáva. Péro 1981-pe ojeʼe enterovéva oiporu vaʼerãha umi voského oñemeʼẽva kongregasiónpe.b Yma oĩ vaʼekue umi voského heʼíva pe diskursánte ikatuha ojapo entrevísta ha porandu oñekomenta hag̃ua. Péro 1990 guive ojeʼe natekotevẽveimaha ojejapo upéva. Ha enero de 2008-pe oiko jey ótro kámbio. Yma umi diskúrso ipuku 45 minúto péro upe guive ojejapo 30 minútope. Ojejapóramo jepe koʼã kámbio, koʼag̃aite peve umi diskúrso ojeprepara porãva ñanepytyvõ jajeroviave hag̃ua la Bíbliare ha ñanemboʼe heta mbaʼe pe Rréinogui (1 Tim. 4:13, 16). ¿Ñainvitápa kyreʼỹme umi ñande rrevisítape ha ótro ndahaʼéivape testígo ohendu hag̃ua koʼã téma iñimportantetéva?

10-12. a) ¿Mbaʼe mbaʼépa okambia pe Ñemañaha Ñehesaʼỹijópe? b) ¿Mbaʼépa iporã ñañeporandu?

¹⁰ Ñemañaha Ñehesaʼỹijo. Áño 1922-pe Sociedad Watch Tower omondo ermáno ikatupyrýva ojapo hag̃ua diskúrso umi kongregasiónpe ha omotenonde hag̃ua predikasión. Koʼã ermánope oñehenói peregríno (koʼág̃a superintendénte). Haʼekuéra heʼi iporãtaha ojeguerekóramo peteĩ rreunión ojestudia meme hag̃ua Ñemañaha. Upe rire ojejapo haʼekuéra heʼíva ha ñepyrũrã ojestudia pe rrevísta éntre semána térã domingo.

¹¹ Rrevísta Ñemañaha 15 de junio de 1932 heʼive mbaʼéichapa ojejapo vaʼerã ko rreunión. Pe artíkulo heʼi peteĩ ermáno omoakã vaʼerãha pe rreunión, ojestudiaháicha jepi pe rrevísta Betélpe. Mbohapy ermáno ikatu oguapy fréntepe ha ojopyru olee hag̃ua umi párrafo. Upérõ umi párrafo ndorekói vaʼekue porandu upévare pe omoakãva ojerure umi ermánope oporandu hag̃ua álgo upe ojestudiávare ha upéi umi ótro okontesta. Sapyʼánte noñentendeporãirõ peteĩ mbaʼe, pe ermáno omoakãva ikatu omyesakã “mbyky ha sensillomínte”.

¹² Ñepyrũrã ojeheja vaʼekue káda kongregasión ostudia pe Ñemañaha ogustavéva umi ermánope. Péro 15 de abril de 1933-pe, rrevísta Ñemañaha heʼi iporãtaha entéro umi kongregasión ostudiárõ pe rrevísta otokáva upe féchape g̃uarã. Ha 1937-pe ojeʼe upe aty ojejapo vaʼerãha domingokue. Upéi, pe 1 de octubre de 1942-pe upe rrevísta heʼi oĩtaha ótro kámbio, ha péicha mbeguekatúpe ojejapo umi rreunión koʼág̃a ñande jarekoháicha. Primero pe rrevísta omombeʼu upe guive umi artíkulo oguerekotaha porandu ha umíva ojeporu vaʼerãha rreunionhápe. Avei heʼi pe estúdio ipuku vaʼerãha una óra. Oñemokyreʼỹ enterovépe okomenta hag̃ua “ipyʼaite guive” olee rangue oĩhaichaite pe párrafope. Ñemañaha Ñehesaʼỹijo iñimportanteterei pórke upéva rupive pe tembiguái jeroviaha omeʼẽ ñandéve pe tembiʼu hiʼoraitépe (Mat. 24:45). Iporãitereíta káda uno ñañeporandúrõ: “¿Ajepreparápa Ñemañaha estudiorã káda semána? ¿Añehaʼãpa akomenta ikatúma guive?”.

13, 14. ¿Mbaʼéichapa oñepyrũ raʼe Ñandejára Ñeʼẽ Ñehesaʼỹijo? ¿Mbaʼérepa ndegusta ko rreunión?

¹³ Ñandejára Ñeʼẽ Ñehesaʼỹijo. Áño 1890 rire osẽma heta lívro oñehenóiva La Aurora del Milenio. Upérõ ermáno Rahn oikóva peteĩ siuda héravape Baltimore (Maryland, Estados Unidos) heʼi ndaikatúipa ojestudia la Biblia en grúpo. Upéi koʼã rreuniónpe oñehenói “Circulos de la Aurora”. Ñepyrũrã koʼã rreunión ojejapo peteĩ ermáno rógape oñetantea hag̃ua jahecha oikótapa. Ha septiembre de 1895-pe ojejapóma koʼã aty heta siudáre Estados Unídospe, ha oho porãiterei hese. Upéicha rupi rrevísta Ñemañaha upe méspe guare omokyreʼỹ umi ermánope ojapo hag̃ua umi rreunión. Heʼi pe omoakãva olee porã vaʼerãha. Olee vaʼerã peteĩ párte upe párrafogui ha upéi oheja umi ermáno okomenta. Oleepa rire pe párrafo olee vaʼerã umi téxto oĩva pe puvlikasiónpe. Ha opávo káda kapítulo enterove oĩva pe rreunionhápe oñeʼẽ mbykymi vaʼerã pe informasiónre.

¹⁴ Ko rreunión réra oñekambia heta vése. Oñehenói vaʼekue avei “Círculos Bereanos para Estudios Bíblicos”, pórke haʼekuéra oñehaʼã ostudia porã Ñandejára Ñeʼẽ ojapo haguéicha yma umi Bereagua (Hech. 17:11). Tiémpo rire oñehenói Estúdio de Lívro de Kongregasión. Koʼág̃a katu héra Ñandejára Ñeʼẽ Ñehesaʼỹijo ha ndojejapovéi en grúpo síno pe kongregasión kompletoite oñembyaty Salónpe. Ko rreunionhápe ojestudiáma heta lívro, folléto ha sapyʼánte umi artíkulo osẽva Ñemañaháme. Ymaite guive oñemokyreʼỹ enterove oñembyatývape koʼã rreunionhápe okomenta hag̃ua. Ko rreunión hetáma ñanepytyvõ ñantende porãve hag̃ua la Biblia. Ha nde, ¿rejeprepara porãpa ko rreunionrã ha reñehaʼã rekomenta?

15. ¿Maʼerãpa ojejapo vaʼekue Eskuéla Jaiporukuaa Hag̃ua la Biblia?

¹⁵ Eskuéla Jaiporukuaa Hag̃ua la Biblia. Ermáno Carey Barber oservi vaʼekue Broóklynpe (Nueva York), heʼi: “Pe 16 de febrero de 1942-pe, peteĩ lunes pyhare oñeinvita umi kuimbaʼekuéra oservíva Betel de Broóklynpe oñeanota hag̃ua peteĩ eskuélape, upéi hératava Eskuéla Jaiporukuaa Hag̃ua la Biblia”. Ermáno Barber upéi oservi Kuérpo Governántepe, haʼe heʼi vaʼekue ko eskuéla haʼeha peteĩ rregálo iporãitereíva Jehová omeʼẽva ipuévlope. Ojehecha pe eskuéla tuichaiterei oipytyvõ hague ermanokuérape omboʼe ha opredika porãve hag̃ua. Upévare 1943 guive oñemog̃uahẽ entéro kongregasiónpe ko yvy tuichakuére peteĩ folléto hérava Curso en el Ministerio Teocrático. Rrevísta Ñemañaha 1 de junio de 1943-pe guare heʼi pe eskuéla ojejapoha ombokatupyryve hag̃ua umi oservívape Ñandejárape ikatu hag̃uáicha opredika porãve hikuái (2 Tim. 2:15).

16, 17. Pe Eskuéla Jaiporukuaa Hag̃ua la Biblia, ¿ñanemboʼe vaʼekuépa ñañeʼẽkuaa hag̃uánte? Emyesakã mbaʼérepa ere upéva.

¹⁶ Ñepyrũrã oĩ heta ermáno okyhyjetereíva oñeʼẽ hag̃ua heta hénte renondépe. Jahechami ermáno Clayton Woodworth káso. Itúvape ojegueraha reiete kárselpe ermáno Rutherford ha hetave ermánondi áño 1918-pe. Ermáno Clayton oñeanota vaʼekue pe Eskuéla Jaiporukuaa Hag̃ua la Bíbliape áño 1943-pe, ha haʼe omombeʼu mbaʼéichapa oñeñandu: “Ijetuʼueterei vaʼekue chéve ajapo hag̃ua diskúrso. Añeʼẽ aja haʼete voi che kũ atãmbáva, che ahyʼo sekopa, sapyʼánte che ñeʼẽ pyrusu ha upeichaháguinte che ñeʼẽ poʼi vai”. Péro upéi haʼe ikatupyryve ha oñemeʼẽ chupe heta asignasión ojapo hag̃ua diskúrso. Pe eskuéla omboʼe chupe heta mbaʼe ha ndahaʼéi oñeʼẽkuaa hag̃uánte, haʼe oaprende avei iñimportanteha iñumílde ha ojerovia Jehováre. Ko ermáno heʼi: “Ahechakuaa tahaʼe haʼéva pe diskursánte, la iñimportánteva hína ojeprepara porã ha ojerovia mbarete Jehováre. Péicha igústota la idiskúrso ha enterove oaprendéta”.

¹⁷ Áño 1959-pe oñeinvita ermanakuérape oñeanota hag̃ua ko eskuélape. Ermána Edna Bauer imanduʼa mbaʼépa oiko oñeanunsiárõ guare upéva peteĩ asambléape. Haʼe heʼi: “Ndacheresaraichéne mbaʼeichaitépa rovyʼa enterove ermána. Heta mbaʼe ikatúta rohupyty upe rire”. Yma guivéma heta ermáno ha ermána oñeanota Eskuéla Jaiporukuaa Hag̃ua la Bibliape, ikatu hag̃uáicha Jehová omboʼe chupekuéra. Ko tiémpope jasegi ñanehekomboʼe péicha ñane rreunión entresemanagua rupive (elee Isaías 54:13).

18, 19. a) ¿Mbaʼéichapa jarresivi konsého ñanemboʼéva mbaʼéichapa jaiko ha japredika vaʼerã? b) ¿Mbaʼérepa japurahéi rreunionhápe? (Ehecha pe rrekuádro “Japurahéi Jehovápe”.)

¹⁸ Aty Ñanemboʼéva Japredika Hag̃ua. Áño 1919 rupi ojejapóma rreunión ojehecha hag̃ua mbaʼéichapa ojepredikáta. Upérõ naenterói oho upe rreunionhápe, síno umi orrepartíva puvlikasión añoite. Áño 1923-pe ojejapo káda mes peteĩ Aty Ñanemboʼéva Japredika Hag̃ua ha oho vaʼerã pe kongregasión kompletoite. Áño 1928-pe ojeʼe ojejapo hag̃ua ko aty káda semána. Ha 1935-pe rrevísta Ñemañaha omokyreʼỹ kongregasionkuérape oiporu hag̃ua pe puvlikasión hérava upérõ el Director (upéi oñehenóiva el Informador ha upe rireve katu Ñane Marandu Porã). Tiémpo rire ko rreunión ojejapo meméma káda kongregasiónpe.

¹⁹ Ko tiémpope oñemeʼẽ ñandéve konsého ñanemboʼéva mbaʼéichapa jaiko ha japredika vaʼérã. Upearã jareko ñane rreunión entresemanagua (Mat. 10:5-13). Oiméramo oñemeʼẽ jepi ndéve pe prográma ojepurúva ko rreuniónpe, ¿restudiápa ha rejapo heʼíva pype?

20-22. a) ¿Mbaʼérepa jagueromanduʼa Jesús omano hague ára? b) ¿Mbaʼérepa iporã reho Konmemorasiónpe káda áño?

²⁰ Jesús heʼi vaʼekue idisipulokuérape ogueromanduʼa hag̃ua haʼe omano hague ára, ou jey peve. Yma ningo pe Páskua ojejapo vaʼekue una ves al áño, péicha avei pe Konmemorasión jajapo una ves al áño (1 Cor. 11:23-26). Káda áño ningo oñembyaty jepi hetaiterei hénte ogueromanduʼa hag̃ua ko fécha. Upépe umi unhído ojepyʼamongeta pe traváho porãite oñemeʼẽvare chupekuéra yvágape (Rom. 8:17). Ko rreunión oipytyvõ umi ambue ovechakuérape omombaʼeve hag̃ua pe Rréi ogovernáva Ñandejára Rréinope, ikatu hag̃uáicha siémpre iñeʼẽrendu chupe (Juan 10:16).

²¹ Ermáno Russell ha iñirũnguéra ohechakuaa vaʼekue iñimportanteha ogueromanduʼa pe Séna del Señór. Oikuaa avei ojapo vaʼerãha una ves al áñonte. Pe rrevísta Ñemañaha de abril de 1880 heʼi vaʼekue: “Píttsburghpe heta áñore rojapo pe Konmemorasión ha roʼu pe pan ha víno orrepresentáva ñande Ruvicha rete ha ruguy”. Upe riremíntema ojejapo avei asambléa pe Konmemorasión díape. Áño 1889-pe primera ves oñeanota mboy héntepa oĩ: 225 persóna ha 22 ojevautisa.

²² Koʼág̃a ndojejapovéi pe Konmemorasión ha asambléa oñondive. Péro jaiko jaikohápe ñainvita enterovépe oñembyaty hag̃ua ñanendive Konmemorasión díape. Ko rreunión ikatu ojejapo Salón del Réinope térã ótro lugár ojealkilávape. Áño 2013-pe mas de 19 millón jagueromanduʼa kuri Jesús omano hague ára. Tuichaiterei mbaʼe ningo jaha Konmemorasionhápe ha ñainvita ótrope oho hag̃ua avei upe rreunión iñimportantetévape. ¿Jajapópa ikatúva guive ñainvita hag̃ua umi héntepe?

23. ¿Mbaʼépa repensa umi rreuniónre?

²³ Jehová ningo ojerure ñandéve ñañembyaty hag̃ua. Ha ñande jaservíva chupe ñande pyʼaite guive nañapensái upéva ijetuʼuetereiha ñakumpli hag̃ua (Heb. 10:24, 25; 1 Juan 5:3). Por ehémplo, rréi David ohoseterei vaʼekue Jehová rógape oadora hag̃ua chupe. Ovyʼaiterei voi ohóta jave upépe ótro ohayhúvandi Ñandejárape (Sal. 27:4; 35:18). Ha ñanemanduʼami Jesús ehémplore. Haʼe ningo imitã guive ohose vaʼekue Jehová rógape (Luc. 2:41-49).

24. ¿Mbaʼérepa jaʼe umi rreunión ideprovechoha ñandéve?

²⁴ Jaha jave rreunionhápe jahechauka jahayhuha Jehovápe ha ñamokyreʼỹseha ñane ermanokuérape. Avei ojekuaa ñanderehe ñaaprendeseha mbaʼéichapa jaiko vaʼerã Ñandejára Rréino poguýpe, pórke umi rreunión ha asambléa ñandeprepara upearã. Koʼã aty ñanembokatupyry ha ñanemombarete avei jasegi hag̃ua jajapo pe tembiapo iñimportantevéva: ñamboʼe umi héntepe oiko hag̃ua chuguikuéra Jesús disípulo (elee Mateo 28:19, 20). Upéicharõ ñamombaʼérõ ñane rreunionkuéra jahechauka avei ñamombaʼeha Ñandejára Rréino. ¡Aníkena núnka ñanderesarái umi rreunión iñimportantetereiha!