Arakaʼépa ogoverna ñepyrũta ko yvy ape ári Ñandejára Rréino?

JESÚS remimboʼekuéra oikuaasetereivaʼekue arakaʼépa haʼe ogoverna ñepyrũta. Upévare oporandu chupe: “Remopuʼã jeýtapa pe rréino Israélpe ko tiémpo kóvape?” (Hechos 1:​6, BNP). Ha ohasa rire dos mil áño rupi, koʼág̃a peve heta ñande rapicha oñeporandu jepi: “Arakaʼépa ogovernáta Ñandejára Rréino ko Yvy ape ári?”.

Jesús oñeʼẽve rupi Ñandejára Rréinore opredika jave, ombohovái ko porandu. Ha upéicha ojapo oñeʼẽrõ guare peteĩ tiémpo rehe (Mateo 24:37). Upe tiémpope Jesucristo ogoverna ñepyrũ vaʼerã Ñandejára Rréinope. Ha mbaʼépa hína upéicharõ upe tiémpo? Jahechami cuatro mbaʼe heʼíva la Biblia upe tiémpore.

1. Are oñemoingove jey rire, Jesucristo oñepyrũvaʼerã ogoverna. Peteĩ árape, Jesús oñembojoja peteĩ ‘kariaʼy ohovaʼekuére mombyry oiko hag̃ua chugui mburuvicha guasu’, térã ogoverna hag̃ua (Lucas 19:​12, nóta). Mbaʼéichapa oñekumplirakaʼe ko mbaʼe? Oñekumpli Jesús omano ha oñemoingove jeýrõ guare ha oho “mombyry”, yvágape. Ha heʼimahaguéicha avei, “are rire” ou jey vaʼerã peteĩ mburuvicháramo (Mateo 25:19).

Jesús oho rire yvágapema, apóstol Pablo ohaivaʼekue: ‘Jesucristo katu oikuaveʼẽ hekove opavave rembiapo vaikuére tapia g̃uarã, ha upéi oguapy Ñandejára deréchape. Upépe oĩhína, Ñandejára omoĩ peve ipyendáramo umi chupe ohayhuʼỹva’ (Hebreos 10:​12, 13). Upéicharõ, Jesús oho rire yvágape are ohaʼarõ Ñandejára Jehová omoĩ peve chupe ogoverna hag̃ua Irréinope, ymaitéma oñeprometehaguéicha. Upérõ oñepyrũvaʼekue pe tiémpo Jesucristo ogovernaha mburuvicháramo. Péro, ohechánepa yvyporakuéra upe mbaʼe guasuete oikovaʼekue?

2. Upe tiémpo Jesucristo oñepyrũha ogoverna ndojehechamoʼãi. Ñanemanduʼavaʼerã Jesús oñeʼẽhague umi mbaʼe ohechaukátavare oñeimaha upe tiémpope (Mateo 24:3). Jajepyʼamongetamína ko mbaʼére: ojehechátaramo upe tiémpo, ajépa natekotevẽmoʼãi ojeʼe mbaʼérepa ñañatendevaʼerã jaikuaa hag̃ua Jesús oñepyrũmaha ogoverna? Ñamoĩ chupe jahaha peteĩ rríope. Tape rehe jatopa umi letréro ohechaukáva moõ gotyópa opyta. Péro ñag̃uahẽvo pe rrío rembeʼýpe jahecha tuichaitereiha. Upévare, tekotevẽtapa oñemoĩ ñandéve peteĩ letréro heʼíva: “Kóva ningo peteĩ rrío hína”? Nahániri! Maʼerã piko oñemoĩta chupe peteĩ letréro ko jahechávo jaikuaátamava mbaʼépa hína?

Jesús ningo omombeʼu mbaʼéichapa jaikuaáta oñepyrũmaha upe tiémpo haʼe ogovernataha. Haʼe omombeʼu upéva, péicha reínte ndajahechamoʼãi rupi upe tiémpo. Umi mbaʼe heʼivaʼekue ñanepytyvõta jaikuaa hag̃ua mbaʼépa oiko yvágape. Upévare heʼi: “[Ñandejára] sãmbyhy og̃uahẽvo ndahaʼéi opavave ohechavaʼerã” (Lucas 17:20). Upéicharõ, mbaʼéichapa ojekuaáta umi mbaʼe Jesús heʼivaʼekuére oñepyrũmaha upe tiémpo haʼe ogovernataha?

3. Jesús ogovernaha tiémpope hetaiterei provléma oĩta ko Yvy ape ári. Jesús heʼivaʼekue ogovernaha tiémpope yvágape, ko Yvy ape ári oĩtaha ñorairõ, ñembyahýi, yvyryrýi, mbaʼasy ha heta mbaʼe vai apoha (Mateo 24:​7-12; Lucas 21:​10, 11). Mbaʼére piko hetaite ojehasa asy vaʼerã? La Biblia omombeʼu Satanás ‘ogovernaha ko múndo’, ha ipochyetereiha. Haʼe ningo oikuaa oñehundipotaitemaha chupe, oñepyrũma rupi Jesucristo ogovernaha tiémpo (Juan 12:31; Revelación 12:​9, 12). Ha hetaiterei mbaʼére jahechakuaa koʼág̃a rupi Satanás ipochyetereiha ha ñaimemaha Jesucristo ogovernaha tiémpope. Umi mbaʼe vaieta ningo oiko oparupiete 1914 guive. Upe áño guive ojeʼe ko múndo tuicha okambiahague.

Nde ningo ikatu repensareína ñaneraʼarõha hetaiterei mbaʼe vai, péro ndaupeichaihína. Añetehápe, umi mbaʼe oikóva ohechauka Ñandejára Rréino ogovernamaha yvágape. Koʼẽrõitéma, upe goviérno oisãmbyhýta avei ko Yvy ape ári. Ha mbaʼéicha piko ikatu jaikuaa Ñandejára Rréino oĩha ha mbaʼépa jajapovaʼerã ñaime hag̃ua ipoguýpe?

4. Jesucristo ogovernaha tiémpope ojepredikavaʼerã opárupi ko Yvy ape ári. Jesús heʼi ogovernataha tiémpo ojoguavaʼerãha ‘umi ára Noé oikovéramo guarépe ko Yvy ári’ (Mateo 24:​37-39).a Noé ningo ojapovaʼekue pe árka, ha avei ‘omombeʼu opavavépe mbaʼépa oikóta’ (2 Pedro 2:5). Omomarandu hapichakuérape Ñandejára okastigapotaitemaha umi hembiapo vaívape. Ha Jesús heʼivaʼekue hemimboʼekuéra ojapotaha avei upéicha haʼe ogovernaha tiémpope yvágape. Heʼivaʼekue voi: ‘Pe marandu porã Ñandejára sãmbyhy rehegua oñemoherakuãta opárupi ko Yvy jerekuévo, opa tetãygua ohendu hag̃ua. Upe rire ae, og̃uahẽta pe ára paha’ (Mateo 24:14).

Jahechamahaguéicha pe artíkulo ohasavaʼekuépe, Ñandejára Rréino ohundíta opaichagua goviernokuéra oĩva ko múndope. Oñeñeʼẽ rupi tapichakuérape ko Ñandejára Rréinore, oñemomaranduhína opavavépe ko goviérno oisãmbyhypotaitemaha ko Yvy ape ári. Upéicha, haʼekuéra avei ikatu noñehundíri ha oiko upe Goviérno poguýpe. Upévare reñeporanduvaʼerã: mbaʼépa ajapovaʼerã?

Ndévepa nderupytýta umi mbaʼe porã Ñandejára Rréino ojapótava?

Pe marandu porã Jesús omombeʼuvaʼekue ñanemokyreʼỹ ñahaʼarõ hag̃ua heta mbaʼe porã ijojahaʼỹva. Yma Adán opuʼãrõ guare Jehováre, haʼe oprometevaʼekue omoĩtaha peteĩ goviérno ojapótava hembipota. Ha mbaʼépa hína Ñandejára rembipota? Oipota umi yvypóra ojeroviáva hese oikove opa ára g̃uarã peteĩ hardín neporãvape ko Yvy ape ári. Aje piko javyʼaite jaikuaávo upe goviérno ymaite oñeprometevaʼekue ogovernamahahína yvágape! Upeichaite ningo, Ñandejára Rréino añetehápe ogovernáma.

Ha pe Rréi Ñandejára omoĩvaʼekue ogovernamahína umi ndaijaʼéiva hese apytépe (Salmo 110:2). Péro, ko múndo añáme, Jesucristo ojapohína Itúva rembipota. Haʼe ningo ohekahína umi oikuaasévape mbaʼeichaguápa Ñandejára ha omombaʼeguasusévape chupe Haʼe oipotaháicha (Juan 4:24). Opaichagua tapichápe, tahaʼe mitã, tuja, imboriahu térã iplátavape ojeʼe ikatuha oikove opa ára g̃uarã Ñandejára Rréino guýpe (Hechos 10:​34, 35). Aníkena nde rejavy ko mbaʼe ijojahaʼỹva. Iporãta avei reikuaavéramo mbaʼépa ojapotahína Ñandejára Rréino. Upéicharõ, ikatúta reikove opa ára g̃uarã ko goviérno porãite guýpe (1 Juan 2:17).

[Nóta]