Jajeroviákena Jehováre ko ára pahápe

‘Pejerovia Jehováre opa árape.’ (ISA. 26:4, ÑÑB)

 1. Mbaʼérepa Jehová rembiguaikuéra ndojoguaiete umi hénte ko mundopeguápe?

KOʼÁG̃A rupi hetaiterei hénte ndoikuaavéima mbaʼe rehe ni mávarepa ojeroviáta. Oiméne oñeñandu upéicha ohasa rupi heta mbaʼe ijetuʼúva térã oñembotavýgui chupekuéra. Péro ñande Jehová rembiguái jaikuaa porã ñandevyroitereitaha jajeroviáramo ko múndore ha umi “mburuvichakuérare”, upévare ñañemoĩ Ñandejára poguýpe (Sal. 146:3, ÑÑB). Ha jaikuaágui Haʼe ñanderayhu ha okumpliha Iñeʼẽ, jajerovia ñanesãmbyhy porãtaha koʼág̃ama voi ha amo gotyove avei (Rom. 3:4; 8:38, 39).

 2. Mbaʼépa heʼivaʼekue Josué Ñandejárare?

² Josué heʼimavaʼekue ikatuha jajerovia Ñandejárare. Omano mboyvemi heʼi umi isrraelítape: ‘Peẽ katu peikuaa porã pende pyʼaite guive Ñandejára omeʼẽ hague peẽme umi mbaʼe porã oprometevaʼekue omeʼẽtaha peẽme. Ndaipóri peteĩ mbaʼe ohejavaʼekue ojapoʼỹ rehe’ (Jos. 23:14).

 3. Mbaʼépa ojapo Ñandejára héra rehehápe?

³ Jehová okumpli ipromésa ohayhúgui hembiguaikuérape, ha iñimportanteveha, oipotágui oñemomarangatu héra (Éxo. 3:14; 1 Sam. 12:22). Peteĩ Biblia oñepyrũvo heʼi: ‘Ñandejára réra heʼise haʼe ikatuha ojapo opa mbaʼe oñekotevẽva okumpli hag̃ua hembipota. Upéva ñanemomanduʼa okumplitaha katuete heʼivaʼekue ha ojapotaha opa mbaʼe héra rehehápe. Haʼe arakaʼeve noguerotĩmoʼãi héra’ (The Emphasized Bible, de J. B. Rotherham).

 4. a) Mbaʼépa ñanemokyreʼỹ jajapo hag̃ua Isaías 26:4? b) Mbaʼépa ñahesaʼỹijóta ko artíkulope?

⁴ Ikatu ñañeporandu: “Aikuaa porãpa Jehovápe ikatu hag̃uáicha ajerovia hese che pyʼaite guive? Ajeroviápa Ñandejára orekoha opa mbaʼe ipoguýpe ha natekotevẽiha ajepyʼapy che renonderãre?”. Isaías heʼivaʼekue: ‘Pejerovia Jehováre opa árape, Ñandejára ndive añoite pejuhúta Ñemoʼãha ijapyraʼỹva’ (Isa. 26:4, ÑÑB). Jaikuaa ningo koʼág̃a rupi Jehová ndojapoveimaha milágro yvyporakuérape g̃uarã yma guaréicha. Péro haʼe gueteri pe “Ñemoʼãha ijapyraʼỹva” ha upévare ikatu jajerovia hese “opa árape”. Mbaʼéichapa ñande Ru yvagapegua ñanepytyvõta ñaneñeʼẽrendúramo chupe? Haʼe ñanemombarete ani hag̃ua jajapo mbaʼe vai, ñanepytyvõ oĩ jave nañanerenduséiva ha ñanemombarete ñambohováivo umi mbaʼe ijetuʼúva. Ñahesaʼỹijomína koʼã mbaʼe ha upekuévo jajepyʼamongeta mbaʼéichapa ikatu jahechauka jajeroviaveha Jehováre.

Jajeroviákena Ñandejárare ani hag̃ua jajapo mbaʼe vai

 5. Mbaʼéicha javépa ikatu ijetuʼuve ñandéve jajerovia hag̃ua Ñandejárare?

⁵ Ñande ningo jajerovia Jehová okumplitaha ipromésa omoĩvo peteĩ hardín neporãmba jepéva ha omoingove jeývo umi omanovaʼekuépe. Péro ikatu ijetuʼu ñandéve jajerovia hag̃ua Hese jadesidíta jave ñanderekopotĩ ha jaiko haʼe oipotahaichaite. Upéva jajapo hag̃ua ñandete jahechakuaavaʼerã ñaneñeʼẽrendúramo chupe ñasẽ porã ha javyʼavetaha. Rréi Salomón heʼi voi ñandéve: ‘Ejerovia Ñandejárare nde pyʼaite guive, ha ani ndejehe añónte. Nemanduʼáke hese opaite mbaʼépe, ha haʼe omyesakãta ndéve nde raperã’ (Pro. 3:5, 6). Koʼápe oñeñeʼẽ “tape” rehe, upéva heʼise jahechaukavaʼerãha jajeroviaha Ñandejárare jaiko lájare, ndahaʼéi jaipotáguinte okumpli umi mbaʼe ñahaʼarõva. Péro, mbaʼéichapa ikatu jajerovia Jehováre ani hag̃ua jajapo mbaʼe vai?

 6. Mbaʼépa jajapovaʼerã ani hag̃ua ñapensa mbaʼe vaíre?

⁶ Jajapo hag̃ua peteĩ mbaʼe vai ñapensa raẽ upévare, upéicha rupi ñañatende porã vaʼerã mbaʼe rehépa ñapensa (elee Romanos 8:5 ha Efesios 2:3). Mbaʼépa upéicharõ tekotevẽ jajapo ani hag̃ua ñapensa mbaʼe vaíre? Oĩ cinco mbaʼe ikatúva jajapo: 1. Jajerure Ñandejárape ñanepytyvõ hag̃ua (Mat. 6:9, 13). 2. Jajepyʼamongeta umi mbaʼe ohasavaʼekuére Jehová rembiguaikuéra iñeʼẽrendu ha naiñeʼẽrenduivaʼekue (1 Cor. 10:8-11).a 3. Ñapensa mbaʼeichaitépa jahasa asýta ñande ha avei umi jahayhúva, jajapóramo ivaíva Jehová renondépe. 4. Ñapensa mbaʼéichapa oñeñandúta Jehová ohecháramo hembiguái ojapoha peteĩ mbaʼe ivaietereíva henondépe (elee Salmo 78:40, 41). 5. Jajepyʼamongeta mbaʼeichaitépa Ñandejára ovyʼáta hembiguaikuéra iñeʼẽrendúva ojapóramo iporãva ha omboyke umi mbaʼe vai, tahaʼe ojehechatahápe chupekuéra térã haʼeñoháme (Sal. 15:1, 2; Pro. 27:11). Jajapóramo koʼã mbaʼe, jahechaukáta jajeroviaveha Jehováre.

Jajeroviákena Ñandejárare oĩramo jepe nañanerenduséiva

 7. Mbaʼe mbaʼépa Jeremías ohasavaʼekue, ha mbaʼéichapa oñeñanduvaʼekue sapyʼánte?

⁷ Oĩ heta ermáno opredikáva umi lugár ijetuʼuetereihápe. Péicha oikovaʼekue avei yma Jeremías rehe, haʼe oprofetisa táva Judá oñehundipotaitemaha. Ha koʼẽ koʼẽre ohechaukavaʼekue ojeroviaha Jehováre omomarandúvo upe távape ojehusgataha. Peteĩ jey hembiguái Baruc jepe ojeplagea oñembohasa asy haguére chupekuéra (Jer. 45:2, 3). Oúpa ikangy ha ndovyʼavéi Jeremías? Peteĩ árape oñeñandu vaieterei ha heʼi: ‘Toñemaldesi pe anase hague ára! Maʼerã piko asẽraʼe che sy ryégui, aiko hag̃ua ñembyasy ha vyʼaʼỹme, ha amano hag̃ua ñemotĩme?’ (Jer. 20:14, 15, 18).

8, 9. Mbaʼépa jajapovaʼerã heʼiháicha la Biblia Jeremías 17:7, 8 ha Salmo 1:1-3-pe?

⁸ Upéicharõ jepe Jeremías osegi ojerovia Jehováre. Ha upéicha ojapo rupi ohecha mbaʼéichapa oñekumpli Ñandejára heʼivaʼekue: ‘Ovyʼaiténepa upe ojeroviáva Jehováre! Haʼete voi yvyramáta oñeñotỹva ysyry rembeʼýpe, oñembohapóva ysyry gotyo ha ndojapomoʼãi hese mbaʼeve ára haku ni ndahoguemanomoʼãi. Ndojepyʼapýi ndokyvéi aréramo; hiʼaʼỹre ndoikói arakaʼeve’ (Jer. 17:7, 8).

⁹ Jeremías, ku ‘yvyramáta ysyry rembeʼýpe oñeñotỹvaicha, ndoikói hiʼaʼỹre arakaʼeve’. Omboguapyrangue ijehe umi hénte aña heʼíva, ojepytaso mbarete Jehová ykére omombaʼetereígui opa mbaʼe Haʼe heʼíva (elee Salmo 1:1-3; Jer. 20:9). Ajépa iporãite Jeremías ehémplo ñandéve g̃uarã, koʼýte umi opredikávape umi lugár ijetuʼuhápe. Ha oiméramo ñande ñaime upe situasiónpe, akóintekena ñañemboʼe Jehovápe. Haʼe katuete ñanepytyvõta jagueropuʼaka hag̃ua opa mbaʼe, ha péicha jasegíta ‘ñamombaʼeguasu héra’ (Heb. 13:15).

10. Mbaʼe mbaʼépa Jehová omeʼẽ ñandéve koʼág̃a rupi, ha mbaʼépa ñañeporanduvaʼerã?

¹⁰ Jagueropuʼaka hag̃ua opaichagua jehasa asy koʼã ára pahápe Jehová omeʼẽ ñandéve heta mbaʼe. Umíva apytépe la Biblia, ojetradusivahína heta hetave ñeʼẽme, ha pe tembiguái jeroviaha ha iñarandúva omeʼẽva ñandéve hiʼoraitépe opa mbaʼe ñaikotevẽva ñamombarete hag̃ua ñande jerovia. Ikatu avei ñañomokyreʼỹ ermanokuérandi rreunión ha Aty Guasuhápe. Péro ñañeporandumi: “Aaprovechápa koʼã mbaʼe porãita omeʼẽva Jehová?”. Opavave ojapóva upéicha ‘vyʼapópe opurahéita ha pyʼarorýgui henyhẽta’. Péro umi naiñeʼẽrendúiva Ñandejárape ‘osapukái ha ojaheʼóta ñembyasy ha vyʼaʼỹgui’ (Isa. 65:13, 14).

Jajeroviákena Ñandejárare ñambohováivo umi mbaʼe ijetuʼúva

11, 12. Mbaʼépa jajapovaʼerã ko múndo henyhẽ rupi provlémagui?

¹¹ Heʼíma haguéicha heta profesía, ñaimévo ára pahápe ko múndo henyhẽta provlémagui (Mat. 24:6-8; Rev. 12:12). Upévare hetaiterei oĩ ogueroviáva oñesolusionataha iprovlemakuéra orekóramo pláta, térã ojerovia pe siénsia, rrelihión ha polítikare. Péro koʼã mbaʼe ndoguerumoʼãi chupekuéra mbaʼeve iporãva (Jer. 17:5, 6). Ñande Jehová rembiguaikuéra katu ‘jajerovia Hese opa árape, ha jaikuaa hendive añoite jajuhutaha Ñemoʼã ijapyraʼỹva’ (Isa. 26:4, ÑÑB). Pe salmísta heʼivaʼekue voi: ‘Jehová ndive añoite che apytuʼu, haʼe cheguenohẽ jejopy vaígui’ (elee Salmo 62:6-9). Mbaʼépa upéicharõ jajapovaʼerã Jehová ñanemoʼã hag̃ua?

¹² Jahechaukáta jajeroviaha Jehováre jajapóramo Iñeʼẽ heʼíva, ndojejapóiramo jepe upéicha ko múndope (Sal. 73:23, 24). Umi hénte oĩva ko múndo aña poguýpe heʼi jepi voi: “Koʼerõite ningo ñamanombáta; jaaprovechavaʼerã koʼág̃a ikatu reheve”. “Nde estúdio porãramo añoite resẽ porãta.” “Nde pláta heta vaʼerã revyʼa hag̃ua.” “Rejoguavaʼerã kóva ha amóva revyʼaséramo.” “Reviahavaʼerã ko múndo tuichakuére reikuaa hag̃ua mbaʼépa heʼise vyʼa.” Péro umi omombaʼéva Ñandejára heʼíva ojapo kóicha: ‘Umi oiporúva ko múndo, toiko ndoiporuiramoguáicha; ko múndo ohasa rupi ohóvo’ (1 Cor. 7:31, BNP). Avei umi kristiáno añete ojapo Jesús heʼivaʼekue, omotenonde Ñandejára Rréino ha ‘ombyaty platarepy yvágape’, upégui avave ndaikatumoʼãi omonda chuguikuéra (Mat. 6:19, 20, NM).

13. Mbaʼe mbaʼépa iporã ñañeporandumi jaikuaa rire heʼíva 1 Juan 2:15-17?

¹³ Iporãta ñañeporandumi: “Ahechaukápa aiko lájare amboykeha umi mbaʼe oikuaveʼẽva ko múndo ha ajerovia mbareteha Jehováre?” (1 Juan 2:15-17). “Amotenondépa Ñandejára rembipota ha umi tembiapo oñemeʼẽva chéve kongregasiónpe, aikorangue pláta rapykuéri?” (Fili. 3:8.) “Añehaʼãpa ajesareko peteĩ mbaʼére añónte?” (Mat. 6:22.) Káda uno jajepyʼamongetavaʼerã koʼã mbaʼére, péro upéva ndeʼiseihína ñamboykevaʼerãha ñane rresponsavilida, koʼýte jarekóramo peteĩ família ñamantene hag̃ua (1 Tim. 5:8). Jehová ningo oipota akóinte jajepytaso ijykére, ha ñamboyke ko múndo oĩva Satanás poguýpe (Heb. 13:5).

14-16. Mbaʼépa ohupyty umi ermáno oñehaʼãva ojesareko peteĩ mbaʼére añónte ha omotenonde Ñandejára Rréino?

¹⁴ Pór ehémplo Richard, orekóva mbohapy família michĩva, omombeʼu: “Ahechakuaa ikatuha ajapove Jehovápe g̃uarã. Avyʼáramo jepe ahupyty haguére heta hetave mbaʼe, haʼetévaicha chéve ameʼẽva Jehovápe hembymívantema. Upémarõ añemboʼe Ñandejárape ha akalkula mboýpa añetehápe roikotevẽ. Upéi añeʼẽ che rembireko Ruth ndive ha ajerure che patrónpe ambaʼapo hag̃ua cuatro díantema káda semána, ijetuʼúramo jepe la situasión. Oñemeʼẽ chéve, ha un més haguépe ambaʼapóma upéicha”. Mbaʼéichapa oñeñandu Richard koʼág̃a?

¹⁵ Haʼe heʼi: “Agana saʼive 20%, upéicharamo jepe káda áño hembyve chéve cincuenta día aime hag̃ua che família ndive ha upéicha ahekomboʼeve chupekuéra. Avei asẽve predikasiónpe, areko hetaiteve estúdio vívliko ha añangareko porãve kongregasiónre. Ha ikatu rupi apyta umi mitã reheve, Ruth ojapo jepi prekursorádo auxiliar. Upévare apensa voi asegi péicha ikatu aja entéro”.

¹⁶ Ambue ermáno ombaʼapo saʼivéva avei ojapo hag̃ua iprekursorádo héra Roy. Haʼe ha hembireko Petina oreko gueteri hendivekuéra peteĩ ifamília. Roy omombeʼu: “Ambaʼapo tres día káda semána ha che rembireko katu dos día. Rova peteĩ óga michĩvévape ha ipyaʼevétava romopotĩ hag̃ua. Ore ningo rojapomavaʼekue prekursorádo onase mboyve umi mokõi ore família, ha hiʼãitereími oréve oiko jey orehegui prekursór. Upéi okakuaapámaramo ore familiakuéra, roñepyrũ jey rojapo ore prekursorádo. Ndaipóri voi mbaʼeve ko múndope ombojojavaʼerã umi mbaʼe porã rohupytýva.”

Jahejákena Ñandejárape tañanembopyʼaguapy

17. Mbaʼéichapa Ñandejára Ñeʼẽ nemombarete ndereikuaáiramo jepe ne renonderã?

¹⁷ Ñande ningo ndajaikuaái ñane renonderã, ‘oikógui heta mbaʼe ñahaʼarõʼỹva’ (Ecl. 9:11, NM). Péro ndahaʼéi upévarente ñande jaikótamava jajepyʼapyháre oikoháicha umi hénte ndoikuaáiva Jehovápe (Mat. 6:34). Upéva rangue, jajapo apóstol Pablo heʼivaʼekue: ‘Ani pejepyʼapy mbaʼevére. Pemoĩ uvei opa mbaʼe Ñandejára pópe peñemboʼévo. Pejerure ha peagradese avei chupe. Ha Ñandejára omeʼẽne peẽme ipyʼaguapy, oñangarekótava pendepyʼapy ha peneremiandúre’ (Fili. 4:6, 7).

18, 19. Mbaʼéichapa Ñandejára ñanepytyvõ ha ñanembopyʼaguapy? Emoĩ peteĩ ehémplo.

¹⁸ Heta ermáno ohasáramo jepe umi situasión ijetuʼuvéva, Jehová ombopyʼaguapy chupekuéra. Pór ehémplo peteĩ ermána omombeʼu: “Ahaʼarõ aja ajopera hag̃ua pe doktór heʼi jey jey chéve amoĩka hag̃ua tuguy. Og̃uahẽvo cherendápe heʼíma voi: ‘Mbaʼe piko oike neakãme ajeve ndereipotái oñemoĩ ndéve tuguy?’. Umícha jave añemboʼe mbykymi Jehovápe ha añandu mbaʼéichapa haʼe chembopyʼaguapy. Che pilaʼi ha che ruguy kangýramo jepe chembarete ha amyesakã pe doktórpe mbaʼérepa naimoĩkaséi tuguy”.

¹⁹ Sapyʼánte Ñandejára ojevale peteĩ ermánore térã pe tembiguái jeroviaha ha iñarandúvare ñanepytyvõ hag̃ua ñaikotevẽve jave. Oiméne ñahendúmava ojeʼérõ: “Ko artíkulo ou porãiterei chéve. Haʼete ku cherehete voi oñeʼẽva”. Ñande ningo Jehová rembiguái, ha jaikuaauka opárupi héra. Upévare, tahaʼe haʼéva umi mbaʼe ñaikotevẽva, Jehová ohechaukáta ñanderayhuha jajeroviáma guive hese (Sal. 100:3; Juan 10:16; Hech. 15:14, 17).

20. Mbaʼérepa ndokyhyjemoʼãi Jehová siervokuéra oñehundi vove ko múndo aña?

²⁰ Hiʼag̃uimbaitéma Jehová ára guasu ha upépe oñehundipaitéta umi mbaʼe oĩva Satanás múndo poguýpe. Ndaipóri óro ni pláta ni mbaʼeve osalvavaʼerã chupekuéra upe árape (Sof. 1:18; Pro. 11:4). ‘Ñandejára ndive añoite jajuhúta Ñemoʼãha ijapyraʼỹva.’ (Isa. 26:4, ÑÑB.) Upévare, jahechaukákena jajeroviaha Hese ñande pyʼaite guive jaguatávo hapére, ñamombeʼúvo pe marandu porã oĩramo jepe nañanerenduséiva ha jahejávo ipópe opa mbaʼe ñandepyʼapýva. Jajapóramo upéicha ‘jaikovéta pyʼaguapýpe, jakyhyjeʼỹre mbaʼevégui’ (Pro. 1:33).

[Nóta]

Ikatúpa rembohovái?

Emombeʼu mbaʼéichapa ikatu jahechauka jajeroviaha Ñandejárare:

• ñamboykévo umi mbaʼe vai

• oĩramo jepe nañanderenduséiva

• ñambohováivo umi mbaʼe ijetuʼúva

[Nóta oĩva taʼanga ndive páhina 13]

Ñaneñeʼẽrendúramo Ñandejárape katuete javyʼavéta

[Nóta oĩva taʼanga ndive páhina 15]

Jehová ndive añoite ‘jajuhúta Ñemoʼãha ijapyraʼỹva’