Familiakuéra, peñembosakoʼimavaʼerã

‘Peẽ avei peñembosakoʼimavaʼerã, cháke peteĩ óra pehaʼarõʼỹve jave og̃uahẽta pe Yvypóra Raʼy.’ (LUC. 12:40, NM)

1, 2. Mbaʼérepa tekotevẽterei jajapo Jesús heʼivaʼekue?

MBAʼÉICHAPA oĩta ñande rogayguakuéra ‘pe Yvypóra Raʼy ou vove tuicha puʼakáre’ ha oñemoĩ ‘oiporavo umi héntepe’? (Mat. 25:31, 32, NM.) Jesús oúta oñehaʼarõʼỹve jave, upévare tekotevẽterei jajapo haʼe heʼivaʼekue: ‘Peñembosakoʼimavaʼerã’ (Luc. 12:40, NM).

² Pe artíkulo ohasavaʼekuépe jahechákuri familiakuéra ikatuha ‘oñatende porã’ enterovéva okumplíramo hekopete Jehová ohaʼarõva chuguikuéra. Koʼág̃a jahecháta mbaʼépa ojapovevaʼerã peteĩteĩ ikatu hag̃uáicha hogayguakuéra oĩ porã Ñandejára renondépe.

‘Ñande resa omañavaʼerã peteĩ mbaʼérente’

3, 4. a) Mbaʼépa ogueraha vai jepi heta famíliape? b) Mbaʼépa heʼise ‘ñamaña peteĩ mbaʼérente’?

³ Jaipotáramo ñande rogayguakuéra ojesareko porã Cristo og̃uahẽ meve, ndajahejaivaʼerã mbaʼeve ñanderesarea ani hag̃ua ñamboyke Jehová servísio. Pór ehémplo, umi mbaʼerepy ogueraha vaíma heta famíliape, upévare tekotevẽterei ‘ñande resa omaña peteĩ mbaʼérente’ (elee Mateo 6:22, 23). Peteĩ lámpara ningo ohesape ñande rape ani hag̃ua jaʼa, upéicha avei “ñande resa” ‘ohesapéramo ñande pyʼapy’ omyesakãta ñandéve heta mbaʼe ha ndajajapomoʼãi ivaíva (Efe. 1:18, BNP).

⁴ Ñande resa oĩ porãramo jajesarekokuaáta peteĩ mbaʼérente ha jahecha porãta. Upeichaite avei ñande pyʼapy ‘omañavaʼerã peteĩ mbaʼérente’. Mbaʼépa heʼise upéva? Heʼise jajesareko porã vaʼerãha jahupyty hag̃ua peteĩ mbaʼénte. Iñimportantevevaʼerã ñandéve g̃uarã ñañemoag̃ui Ñandejárare jaiko rangue jaheka umi mbaʼerepy térã jajepyʼapyeterei ñane família remikotevẽrente (Mat. 6:33). Kristianokuéra ovyʼavaʼerã umi mbaʼe Jehová ohupytykávare chupekuéra ha avei omotenonde Ñandejára rembipota hekovépe (Heb. 13:5).

 5. Mbaʼéichapa ohechauka peteĩ mitãkuña Etiopiaygua ojesareko porãha Ñandejára servísiore?

⁵ Mbaʼépa ojehupyty tuvakuéra omboʼéramo ifamíliape ‘omaña hag̃ua peteĩ mbaʼérente’? Ikatu ojehupyty heta mbaʼe porã. Pór ehémplo peteĩ mitãkuña Etiopiaygua omohuʼã ijestúdio ha inóta porãiterei, upémarõ oñemeʼẽ chupe peteĩ véka ostudiave hag̃ua. Péro haʼe orrechasa oservise rupi Jehovápe prekursóraramo. Upe riremi oñekuaveʼẽ avei chupe peteĩ traváho oganatahápe 18 millón de guaraní rupi káda més. Hetãme noñeganaguasúiva upeichaite peve. Mbaʼépa ojapo? Orrechasa jey, haʼe ojesareko peteĩ mbaʼérente: iprekursorádore. Hiʼarive natekotevẽikuri ni ituvakuéra heʼi chupe mbaʼeve odesidi hag̃ua upéicha. Mbaʼépa heʼi isy ha itúva oikuaa rire? Ovyʼa ha oguerohoryeterei chupe ojapovaʼekuére.

6, 7. Mbaʼérepa tekotevẽ ‘ñañatende porã’?

⁶ Mateo 6:22, 23 ohechauka ivaietereiha ñandetaryrýi. Upe téystope heʼi ñande resa ikatuha “omaña peteĩ mbaʼérente”, térã ikatuha “iñaña”, iñenvidióso térã itaryrýi (Mat. 6:23, NM; nóta). Mbaʼépa opensa Jehová peteĩ tapicha itaryrýi ha imbaʼerakateʼỹvare? Ñandejára Ñeʼẽ ombohovái upéva: ‘Ani peñeʼẽ mbaʼeveichagua tekotieʼỹre, térã oimehaichagua tekokyʼáre ha ani pendetaryrýi’ (Efe. 5:3; nóta).

⁷ Pyaʼeʼimi ningo jahecha pe mávare itaryrýiramo, péro hasy jepi jahechakuaa hag̃ua ñandejehe. Upévare iporã jasegi ko konsého Jesús omeʼẽvaʼekue: ‘Peñatende porãke ha ani pendetaryrýi mbaʼevére’ (Luc. 12:15, NM). Jajepyʼamongeta porã vaʼerã ha jahecha mbaʼépa oĩ ñande pyʼapýpe. Familiakuéra oservíva Jehovápe ohechavaʼerã mboýpa oiporuhína itiémpo ha ipláta umi vyʼarã rapykuéri ha umi mbaʼerepy rehehápe.

 8. Mbaʼépa jahechavaʼerã jajogua mboyve peteĩ mbaʼe?

⁸ Jajogua mboyve peteĩ mbaʼe, jahecha raẽ vaʼerã añetehápepa ñandepuʼakáta japaga hag̃ua hese. Avei jahechavaʼerã ambue mbaʼe iñimportánteva. Ikatu ñañeporandu: “Chetiémpotapa aiporu ha amantene hag̃ua ko artíkulo? Mboýpa aikóta hese aiporukuaa hag̃ua?”. Heta mitãrusu ha mitãkuña itarovaite oipotágui umi mbaʼe ohecha térã ohendúva propagándape ha ojopy ituvakuérape ojogua hag̃ua chupekuéra oipotáva, tahaʼe ao térã ambue mbaʼe de márka. Mitãrusu térã mitãkuña, aníkena nde repensa upéicha, umíva ningo peteĩ ñuhã hína. Ejepyʼamongetamína ko mbaʼére: Nde tuvakuéra oikóramo ojogua ndéve reipotáva guive, peime porãtapa pende rogapýpe pe Yvypóra Raʼy ou vove? Ejeroviána ko promésa Jehová ojapóvare: “Ndorohejaichéne ha noromotyreʼỹichéne arakaʼeve” (Heb. 13:5, BNP).

Ñañehaʼãkena jahupyty umi mbaʼe porã Jehová servísiope

 9. Mbaʼéichapa oipytyvõ familiakuérape oñehaʼãramo ohupyty umi mbaʼe porã Jehová servísiope?

⁹ Mbaʼépa ikatu avei ojapo familiakuéra oĩ porãve hag̃ua Ñandejára ndive ha imbareteve hag̃ua ijerovia? Pehechavaʼerã mbaʼépa ikatu pejapove Jehová servísiope ha peñehaʼãmbaite pehupyty. Upéva penepytyvõta pehechakuaa hag̃ua oimépa peñakãrapuʼãpeína ha peikuaáta mbaʼe mbaʼépa pemotenondevevaʼerã (elee Filipenses 1:10).

10, 11. Mbaʼe mbaʼépa oñehaʼã ohupyty ne família, ha mbaʼépa ikatu pejapo tenonde gotyove?

¹⁰ Peñehaʼãramo pehupyty umi mbaʼe ndahasýiva ha enterovéva ikatútava ojapo, katuete penepytyvõta peñakãrapuʼã hag̃ua. Pór ehémplo, ikatu pehecha oñondivepa káda día pe folléto Ñahesaʼỹijo Ñandejára Ñeʼẽ ára ha ára. Umi komentário rupive pe túva ohechakuaáta peteĩteĩre imbaretépa ohóvo ijerovia. Avei iporã pelee oñondivepa Ñandejára Ñeʼẽ, upéicha umi mitã ikatúta olee syryryve ha ontendevéta la Biblia heʼíva (Sal. 1:1, 2). Iporãta akóinte peñemboʼéramo Jehovápe pende pyʼaite guive ha peñehaʼã ikatu hag̃uáicha ojekuaave penderehe pejapoha umi mbaʼe porã oúva espíritu sántogui (Gál. 5:22, 23). Ñañehaʼãkuaa avei ñantende umi hénte japredikávape, upéicha ñamboʼéta ñane famíliape oñemoĩ hag̃ua hapichakuéra lugárpe ha ikatu ijeheguíntema opensa ojapo prekursorádo rregulár térã oservi misionéroramo.

¹¹ Mbaʼe mbaʼépa ikatu pejapove pende rogayguakuérandi? Ikatúpa peñemotiémpo pepredikave hag̃ua? Peñehaʼãkuaápa pepredika kállere, negosioháre térã teléfono rupive? Oĩ lugár oñekotevẽtereiha maranduhára rehe. Ikatúpa peteĩ pende rogaygua oaprende ótro idióma omog̃uahẽ hag̃ua pe marandu porã tetã ambueguápe?

12. Mbaʼéichapa túva ikatu omombarete ifamília jerovia?

¹² Iporãta túva ohecháramo mbaʼépepa ifamiliakuéra tekotevẽ ombaʼapove ha upéi teʼi mbaʼépa ikatu ojapo hikuái, péro ohechavaʼerã avei mbaʼéichapa opyta porãvéta enterovévape ha ikatútapa ojehupyty (Pro. 13:12). Jaikuaaháicha oñekotevẽ tiémpo ojehupyty hag̃ua umi mbaʼe porã. Upévare sapyʼánte tekotevẽta saʼive jahecha téle ikatu hag̃uáicha jajapo umi mbaʼe ñanemoag̃uivétava Jehováre (Efe. 5:15, 16). Enterovéva ñañehaʼã meméramo ikatúta jahupyty umi mbaʼe jaʼevaʼekue jajapotaha (Gál. 6:9). Ha upéicha “opavave ohechakuaáta” ñane família oñakãrapuʼãha ohóvo Jehová servísiope (1 Tim. 4:15, JMP).

Jajapóke pe Aty Jastudia Hag̃ua Ñande Rogayguándi

13. Mbaʼéichapa ojejapo koʼág̃a ñane rreunionkuéra, ha mbaʼépa iporã ñañeporandu?

¹³ Oñekambia ypy guive ñane rreunionkuéra, 1 de enero 2009-pe, hetáma oipytyvõ familiakuérape oñembosakoʼíma hag̃ua Yvypóra Raʼy ou mboyve. Koʼág̃a ojejapo oñondivepa Ñandejára Ñeʼẽ Ñehesaʼỹijo, Eskuéla Ñanemboʼéva Japredika Hag̃ua ha Aty Japredikakuaa Hag̃ua. Upéicha umi família ikatu oiporu peteĩ pyhare omombaʼeguasu hag̃ua Jehovápe ha omombarete ijerovia. Koʼág̃a, dos áño rasáma ojejapo rire upéva iporã ñañeporandu: “Aiporúpa upe tiémpo ajapo hag̃ua pe Aty Jastudia Hag̃ua Ñande Rogayguándi térã ahesaʼỹijo hag̃ua la Biblia cheaño? Chepytyvõpa ko kámbio ojejapovaʼekue ajerovia mbareteve hag̃ua Jehováre?”.

14.  a) Mbaʼépa jahupytýta jaiporúramo peteĩ pyhare jastudia hag̃ua ñande rogayguándi térã ñaneaño? b) Mbaʼérepa iñimportanteterei jajapo káda semána pe Aty Jastudia Hag̃ua Ñande Rogayguándi?

¹⁴ Mbaʼépa jahupytýta jaiporúramo peteĩ pyhare jastudia hag̃ua ñande rogayguándi térã ñaneaño? Peteĩ mbaʼe iporãitereíva: ikatúta ñañemoag̃uive Jehováre (Sant. 4:8). Káda semána ñahesaʼỹijóvo la Biblia ha jaikuaavévo ñande Apoharépe, ñaime porãve hendive. Ha ñañemoag̃uivévo hese jahayhuve chupe ñande pyʼaite guive, ñane ánga rugua guive ha opa ñane arandu ha ñane mbaretekue reheve (Mar. 12:30). Avei ñanemomýi ñaneñeʼẽrendu ha ñahaʼangase hag̃ua chupe (Efe. 5:1). Jahechaháicha, iñimportanteterei jajapo káda semána pe Aty Jastudia Hag̃ua Ñande Rogayguándi, upéicharõmante enterovéva ñande rogapýpe ñañembosakoʼítama og̃uahẽ mboyve pe ‘jehasa asy guasu’ (Mat. 24:21, NM). Añetehápe tekotevẽterei jajapo upéva jajesalva hag̃ua.

15. Mbaʼéichapa ombojoaju familiakuérape pe Aty Jastudia Hag̃ua Ñande Rogayguándi?

¹⁵ Maʼerãpa ojejapo avei pe Aty Jastudia Hag̃ua Ñande Rogayguándi? Ikatu hag̃uáicha jajoayhu ha jajogueraha porãve ñande rogapýpe. Káda semána jastudiávo oñondivepa Ñandejára Ñeʼẽ, tuicha ñanepytyvõ ñanembaʼerechakuaave hag̃ua. Omendáva katu ovyʼa ha oñemoag̃uive ojuehe otopa rupi umi mbaʼe neporãva oĩva la Bíbliape (elee Eclesiastés 4:12). Upéicha avei umi túva ha taʼyrakuéra omombaʼeguasúva Jehovápe oñondive henyhẽ “mborayhúgui, upe ombojoaju ha omoporãmbáva opaite mbaʼe” (Col. 3:14, BNP).

16. Mbaʼépa ohupyty mbohapy ermána oñembyatýva káda semána ostudia hag̃ua?

¹⁶ Jahechamína mbaʼéichapa ko aty ojejapóva ojestudia hag̃ua oipytyvõ mbohapy ermána ijedávape. Haʼekuéra ningo viúda ha ndahaʼéi oñohénte, péro heta áñorema oñoamíga hague hikuái. Enterovéva oiko peteĩ távapente ha ohecha hikuái mbaʼépa ikatu ojapo ohasave hag̃ua tiémpo oñondive, ndahaʼéi katuete oñemongeta hag̃uánte, síno avei ostudia hag̃ua Ñandejára Ñeʼẽ. Upévare oñembyaty hikuái peteĩ pyhare káda semána ohesaʼỹijo hag̃ua pe lívro “Testimonio cabal” del Reino de Dios. Haʼekuéra omombeʼu: “Igustoiterei ha pyʼỹinte rostudia una óra rasa, rohecha umi mbaʼe ohasavaʼekue ñane ermanokuéra síglo primeropegua ku roimerõguáicha upépe. Avei rohecha mbaʼépa rojapóne rohasáramo haʼekuéra ohasavaʼekue. Upéi roñehaʼã roiporu predikasiónpe umi mbaʼe roaprendéva. Upéicha rupi rovyʼave ropredika ha romboʼévo ore rapichakuérape ha roipytyvõ hetavépe.” Ko aty tuicha oipytyvõ koʼã ermánape omombareteve hag̃ua ijerovia ha avei oñemoag̃uive hag̃ua ojuehe. Haʼekuéra heʼi: “Romombaʼeterei ko aty rojapóva rostudia hag̃ua”.

17. Mbaʼépa jajapovaʼerã ideprovécho hag̃ua ñandéve pe Aty Jastudia Hag̃ua Ñande Rogayguándi?

¹⁷ Ha ñande, mbaʼépa jahupyty jaiporu haguére peteĩ pyhare ñamombaʼeguasu hag̃ua Jehovápe ñane família ndive térã ñaneaño? Jajapóramo opyta porã javénte ñandéve ndaideprovechomoʼãi. Aníke ñamboyke ambue mbaʼe naiñimportanteguasúiva rehehápe ha ñañehaʼãmbaite ikatu hag̃uáicha enterovéva ñaime pe óra ñamoĩvaʼekuépe. Jaiporavovaʼerã informasión ou porãtava ñande rogayguakuérape. Mbaʼépa ikatu jajapo igústo hag̃ua ñande estúdio? Ñapensavaʼerã mbaʼéichapa og̃uahẽvéta peteĩteĩme, jajorrespeta ha ñaime pyʼaguapýpe (Sant. 3:18).a

‘Ñañatende porãkena’ ha ‘ñañembosakoʼi’

18, 19. Mbaʼépa jajapovaʼerã ñane família ndive jaikuaágui Yvypóra Raʼy ou potaitemaha?

¹⁸ Umi mbaʼe vaieta oikóva 1914 guive ohechauka porã Satanás ha imúndo oñehundi potaitemaha. Armagedón hiʼag̃uimbaitéma, ku torménta ndevaipa jepéva oĩramoguáicha ñande ariete. Koʼẽrõitéma pe Yvypóra Raʼy oúta ohundi hag̃ua umi heko añávape Jehová heʼi haguéicha (Sal. 37:10; Pro. 2:21, 22). Koʼã mbaʼe opokovaʼerã ñanderehe ha ñane famíliare ha ñanemomyivaʼerã jajapo hag̃ua oñekotevẽva.

¹⁹ Jesús heʼivaʼekue ‘ñande resa omañavaʼerãha peteĩ mbaʼérente’. Ndépa rejaporeína upéicha? Ko múndope umi hénte ojapo ikatúva guive ifamóso, iñimportánte ha ipláta heta hag̃ua. Péro, ndépa reñehaʼãreína ne família ndive pehupyty hag̃ua umi mbaʼe porã Ñandejára servísiope? Penepytyvõpa pe Aty Jastudia Hag̃ua Ñande Rogayguándi térã pestudia jave la Biblia peneaño? Rehupytýmapa umi mbaʼe erevaʼekue rejapotaha? Pe artíkulo ohasavaʼekuépe ohechaukákuri káda uno jajapovaʼerãha oñehaʼarõva ñandehegui ñane família oñatende porã hag̃ua. Ndépa rejaporeína upéva? (1 Tes. 5:6.) Oiméramo rejapopa koʼã mbaʼe, nde rogayguakuéra oñembosakoʼimahína ohaʼarõ aja Yvypóra Raʼýpe.

[Nóta]

Nemanduʼápa?

• Mbaʼéichapa koʼã mbaʼe oipytyvõ familiakuérape oñembosakoʼíma hag̃ua?

‘Ñande resa omañavaʼerã peteĩ mbaʼérente’.

Ñañehaʼã jahupyty umi mbaʼe porã Jehová servísiope.

Jajapo pe Aty Jastudia Hag̃ua Ñande Rogayguándi.

[Nóta oĩva taʼanga ndive páhina 13]

‘Ñamaña peteĩ mbaʼérente’ ha ani jaheja mbaʼeve ñanderesarea