Oñeporandúva jepi

Mbaʼéichapa oñentendevaʼerã umi infórme de servísio anuál?

Káda áño Anuario-pe oñeguenohẽ peteĩ infórme ohechaukáva testigos de Jehová rembiapokue. Jaguerohoryeterei jepi jahechávo pype mbaʼépa ojehupyty predikasiónpe ha mbaʼéichapa Jehová rembiguaikuéra omboʼe pe marandu porã opárupi ko yvy tuichakuére. Péro ñantende porã hag̃ua pe infórme, ñantende raẽ vaʼerã mbaʼépa heʼise umi título ha número oĩva pype. Upearã jahechamíta koʼã ehémplo.

Año de servicio. Anuario-pe oñeguenohẽ pe infórme ohechaukáva mbaʼépa ojehupyty pe áño de servísio ohasavaʼekuépe. Peteĩ áño de servísio oñepyrũ septiémbrepe ha opa agóstope. Pór ehémplo Anuario 2011-pe oñeguenohẽ umi mbaʼe ojehupytyvaʼekue áño de servísio 2010-pe, upéva oñepyrũ 1 de septiembre 2009 ha opa 31 de agosto 2010.

Máximo y promedio de publicadores. “Puvlikadór” haʼe peteĩ tapicha ikatúmava opredika pe marandu porã, tahaʼe ojevautisámava térã neʼĩrava gueteri. Mbaʼépa pe “máximo de publicadores”? Upéva haʼe pe més oñeinformaveha. Ñanemanduʼavaʼerã avei ko pártepe ikatuha oñeanota dos vése peteĩ puvlikadór infórme, oime rire pe més ohasavaʼekuépe nontregavoíri iñinfórme. Ha oiméramo peteĩ puvlikadór hesarái ontrega hag̃ua iñinfórme katu noñeanotamoʼãi upe méspe. Ko mbaʼe ohechauka iñimportanteha ñantrega voi porã ñane infórme káda més. Mbaʼéichapa ojekuaa pe “promedio de publicadores”? Oñesumambaitévo umi infórme peteĩ añopegua ha ojedividi doce rehe.

Total de horas. Anuario 2011 ohechauka pe áño de servísio ohasavaʼekuépe japredika hague 1.600 millones de óra rasa. Upe órante piko jaiporu ñamombaʼeguasu hag̃ua Jehovápe? Nahániri, upépe ningo ndoikéi mboy órapa káda semána jaiporu jajapo hag̃ua visíta de pastoréo, rreunionkuéra, jastudia hag̃ua la Biblia ñaneañohápe ha jajepyʼamongeta hag̃ua.

Gastos. Áño de servísio 2010-pe umi testigos de Jehová ogasta 155 millones de dólares omoĩ hag̃ua oikotevẽva umi prekursór espesiál, misionéro ha superintendénte viahántepe. Péro upévape ndoikéi ojegastáva oñeimprimi hag̃ua umi puvlikasión ni oñeñangareko hag̃ua umi 20.000 rasa ermáno ha ermána oservívare Betélpe, oĩva ko yvy tuichakuére.

Participantes de la Conmemoración. Kóva ohechauka mboy Testígopa hoʼu pán ha víno Conmemoración-pe. Ikatúpa jaʼe hoʼúva guive haʼeha umi unhído oĩva gueteri ko yvy ape ári? Nahániri katuete. Jahechakuaavaʼerã oĩha heta tapicha oimoʼãva ohotaha yvágape oguerovia rupi upéva oikuaa mboyve Jehovápe, térã orekógui provléma iñakãme ha provléma emosionál. Upéicha rupi ndajaikuaái mboy unhídopa oĩ gueteri ko yvy ape ári ha natekotevẽi voi ningo jaikuaa upéva. Pe Cuerpo Gobernante ndorekói peteĩ lísta oikuaa hag̃ua mávapa hoʼu pán ha víno Conmemoracionhápe.a

Péro jaikuaa porã ág̃a oñepyrũ vove pe jehasa asy guasu oĩtaha gueteri ‘Ñandejára rembiguaikuéra’ unhídova ko yvy ape ári (Rev. 7:1-3). Og̃uahẽ mboyve upe ára, umi unhído omotenondéta gueteri umi tembiapo ojejapóva ojepredika ha oñemboʼe hag̃ua pe marandu porã. Ha pe infórme mundiál ohechauka Jehová puévlo ojapoha ko tembiapo iñimportantetéva ko yvy tuichakuére.

[Nóta]