“Ko Aty Opytáta Manduʼarã”

“OPÁVO ko ñande aty katuete jaʼéta: ‘Añetehápe ko aty opytáta manduʼarã’”. Péicha Stephen Lett, oĩva Cuerpo Gobernante de los Testigos de Jehovápe, omokyreʼỹ umi ermáno oñembyatyvaʼekuépe pe 2 de octubre de 2010 Salón de Asambleas-pe oĩva Jersey City-pe (Nueva Jersey, Estados Unidos). Upérõ pe corporación Watch Tower Bible and Tract Society of Pennsylvania ojapo pe rreunión anuál número 126. Mbaʼe mbaʼérepa oñeñeʼẽ?

Pe diskúrso omoñepyrũvape upe aty, ermáno Lett omyesakã Jehová kárro, Ezequiel ohechavaʼekue peteĩ visión rupive. Ko kárro tuichaiterei ha ojajaipáva orrepresenta Jehová organisasión, oĩva ipoguýpe. Pe párte yvagapeguápe oĩ umi ánhel ha okuʼe peteĩ rrájoicha, ermáno Lett heʼi ipyaʼetereiha pe omaneháva pensamiéntoicha. Ha Jehová organisasión ko yvy arigua oho meme avei hese tenonde gotyo, ojehechaháicha umi hetaite kámbio ojejapóvare.

Pór ehémplo, oñemombeʼu umi sukursál oñemboty hague. Upéicha rupi heta ermáno oservivaʼekue Betélpe ikatúta oiporu itiémpo ha imbaretekue opredika hag̃ua. Ermáno Lett omokyreʼỹ enterovépe tojerure Jehovápe oipytyvõ hag̃ua pe tembiguái jeroviaha ha Cuerpo Gobernante-pe akóinte iñeʼẽrendu ha iñarandu hag̃ua (Mat. 24:45-47).

Infórme ha ñemongeta oporomokyreʼỹva

Tab Honsberger, oĩva Komite de Sukursál Haitípe, oñeʼẽ pe yvyryrýi oikovaʼekuére 12 de enero 2010, omano haguépe 300.000 tapicha. Haʼe omombeʼu umi rrelihión omoakãva heʼiha umi héntepe Ñandejára okastiga hague umi iñañávape upe yvyryrýi rupive péro oñangareko hague umi ivuénovare. Oimérõ upéicha, mbaʼére piko umi oĩvaʼekue kárselpe osẽmba hoʼárõ guare umi pare oiko aja pe yvyryrýi? Hetaiterei tapicha upe tetãmegua ipyʼaporãva ipyʼaguapy oikuaávo mbaʼérepa añetehápe oiko koʼãichagua mbaʼe vai. Pe diskursánte omombeʼu mbaʼépa heʼi peteĩ ermáno omanovaʼekue chugui hembireko upe yvyryrýipe: “Koʼag̃aite peve cherasẽ, ha ndaikuaái arakaʼe pevépa chembaʼembyasýta, péro tuichaiterei chembopyʼaguapy añandúvo pe mborayhu oĩva Jehová organisasiónpe. Ajerovia pe esperánsa arekóvare ha aikuaaukáta avei che rapichakuérape”.

Mark Sanderson, oservíva koʼág̃a Betel oĩva Brooklyn-pe, oñeʼẽ Filipinas rehe, upépe haʼe oservivaʼekue Komite de Sukursálpe. Kyreʼỹme heʼi mbaʼeichaitépa upe tetãme káda áño hetave umi maranduhára ha oĩha hetave estudiánte puvlikadórgui. Omombeʼu Miguel rembiasakue, iniéto ningo ojejukavaʼekue. Ko ermáno ojapo opa ikatúva ojehusga ha oñemoinge hag̃ua kárselpe upe kuimbaʼépe. Peteĩ árape Miguel oho opredika kárselpe ha ojotopa hendive. Ndahaʼéiramo jepe oñeñandu porãmbáva ohechávo chupe, oñehaʼãmbaite imbaʼeporã hendive ha oikuaveʼẽ chupe peteĩ estúdio. Pe kuimbaʼe oñepyrũ ostudia la Biblia, upéicha rupi ohayhu Jehovápe ha ojevautisa. Koʼág̃a oñoamigoite Miguel ndive, ha haʼe oipytyvõ chupe osẽ voive hag̃ua kárselgui.a

Upe rire, Mark Noumair, oporomboʼéva Departamento de Escuelas Teocráticas-pe, oñemongeta Alex ha Sarah Reinmueller, David ha Krista Schafer ha Robert ha Ketra Ciranko ndive. Ermáno Reinmueller, oipytyvõva Comité de Publicación-pe, omombeʼu orekórõ guare 15 áño oñepyrũ hague ohechakuaa pe añetegua iñimportanteveha hekovépe. Upérõ oservivaʼekue de prekursór Canadápe ha pyʼỹinte osẽmi haʼeño predikasiónpe. Oñeporandúrõ guare mávapa umi ermáno oĩva Betélpe oipytyvõvevaʼekue chupe, haʼe omombeʼu oĩha mbohapy ermáno iñeʼẽrendúva ha omyesakã mbaʼéichapa oipytyvõ chupe hikuái oñakãrapuʼã hag̃ua Jehová servísiope. Hembireko Sarah katu omombeʼu oñoamigaite hague peteĩ ermána ndive oĩvaʼekue kárselpe heta áñore Chínape ojapo rupi Jehová rembipota. Sarah omombeʼu oaprende hague oñemoag̃uive Jehováre ñemboʼe rupive.

David Schafer, oipytyvõva Comité de Enseñanza-pe omombaʼe mbaʼeichaitépa isy ojerovia ha heʼi haʼe imitãrõ guare ojapo hague iprekursorádo auxiliar oipytyvõ rupi chupe umi ermáno ojapóva jepeʼa. Hembireko Krista katu, imanduʼa mbaʼeichaitépa oipytyvõvaʼekue chupe umi betelita ijedavéva, haʼekuéra ningo iñeʼẽrendu meme umi mbaʼe michĩvévape jepe Jesús omanda haguéicha (Luc. 16:10).

Robert Ciranko oipytyvõva Comité de Redacción-pe oñeʼẽ umi 4 ijavuélo unhído Hungriayguáre. Umi asambléa ojejapovaʼekue haʼe imitãrõ guare amo áño cincuenta rupi tuicha omokyreʼỹ chupe, upépe ohecha mbaʼéichapa Jehová organisasión tuichave ikongregasióngui. Hembireko Ketra omombeʼu oaprende hague tekotevẽha iñeʼẽrendu Jehovápe oservírõ guare de prekursóra peteĩ kongregasión oĩháme apóstata ha heta provléma. Oaguanta upe iservísiope ha upe rire oñenombra chupe prekursóra espesiál ha oñemondo peteĩ kongregasión oservívape peteĩ ñeʼẽme Jehovápe, upéva omokyreʼỹ ha omoñeñandu porã chupe.

Upe rire Manfred Tonak, oñeʼẽ Etiopía rehe. Ko tetãme oĩ nueve mil rasa maranduhára. Umíva apytégui hetaiterei oĩ oikóva kapitál Adís Abeba-pe ha ijerére. Ko mbaʼe ohechauka oñekotevẽha oipytyvõvaʼerã umi lugár mombyryvehápe. Upévare ojejerure umi testígo Etiopiayguápe oikóva ambue tetãre ou hag̃ua oipytyvõ chupekuéra, umíva apytégui heta oĩ ovavaʼekue upérupi opredika hag̃ua peteĩ tiémpore. Otopa hikuái heta hénte oikuaasevéva la Biblia omboʼéva, péicha avei omokyreʼỹ ermanokuérape.

Ojejapo avei heta diskúrso oñeʼẽva umi Testígo Rusiayguáre ha umi mbaʼe ombohováivare hikuái. Ermáno Aulis Bergdahl oservíva Komite de Sukursálpe upe tetãme, omombeʼu mbaʼeichaitépa ojepersegi umi ermánope, koʼýte Moscúpe. Philip Brumley, ombaʼapóva Departamento de Asuntos Legales oĩva sukursál Estados Unidos-pe, omombeʼu umi mbaʼe oikóva umi més ohasavaʼekuépe pe Tribunal Europeo de Derechos Humanos oñatende rire umi nueve káso ojejapovaʼekuére testigos de Jehová kóntrape. Ko trivunál odesidi peteĩ ñeʼẽme umi kárgo ndorekoiha pruéva ohechaukáva umi mbaʼe ojeʼéva ermanokuérare, ha omboyke voi heta káso. Ndojekuaaporãiramo jepe mbaʼépepa opáta, ermáno Brumley heʼi pe trivunál odesidíva ikatuha oipytyvõ umi káso ojejapóvape ambue tetãme.

Oñemombeʼu rire ko notísia, ermáno Lett heʼi ko trivunál oñatendetaha pe káso oĩvare Fránciape, upépe pe goviérno ymaite guivéma okovrase impuésto testigos de Jehovápe. Ko trivunál ningo iñimportanteterei ha noñatendéi oimehaichagua kásore. Koʼág̃a peve ko trivunál oñatendéma 39 káso oĩva testigos de Jehová kóntrape, umíva apytégui 37 odesidi ñande favórpe. Ermáno Lett omokyreʼỹ opavavépe akóinte oñemboʼe hag̃ua Jehovápe ko mbaʼére.

Pe infórme paha ojapo Richard Morlan, omboʼéva Escuela para Ancianos de Congregación-pe. Haʼe kyreʼỹme oñeʼẽ ko eskuéla rehe ha omombeʼu mbaʼeichaitépa umi ansiáno oagradese.

Diskúrso ojapóva ambue ermáno oĩva Cuerpo Gobernante-pe

Opakuévo, umi ermáno oĩva Cuerpo Gobernante-pe ojapo umi diskúrso. Ñepyrũrã ermáno Guy Pierce kyreʼỹme ojapo peteĩ diskúrso oñeʼẽva pe téysto áño 2011-peguáre: Jajeroviákena Jehová réra ñanemoʼãtaha (Sof. 3:12). Omombeʼu jaikoha peteĩ tiémpo iporãvape, péro upéicha avei ijetuʼúvape hiʼag̃uimbaitéma rupi Jehová ára guasu. Upéicharamo jepe, heta tapicha ojapo oimeraẽ mbaʼe hesarái hag̃ua iprovlemakuéragui, opensa umi rrelihión japu, polítika ha viru omoʼã térã oprotehetaha chupekuéra. Jehová ñanemoʼã hag̃ua ñamombaʼevaʼerã héra, upearã tekotevẽ jaikuaa porã, jarrespeta, jahayhu chupe ñande pyʼaite guive ha jajerovia hese.

Upe rire, David Splane ojapo peteĩ diskúrso hérava “Jaikémapa Ñandejára pytuʼúpe?”. Omyesakã Jehová ndopytuʼuiha oĩramo jepe pe día savátikope. Ko tiémpo aja, Haʼe ‘ombaʼapohína’, ha upéicha avei ojapo Itaʼýra, ikatu hag̃uáicha oñemohuʼã Ñandejára rembipota ko yvýpe g̃uarã (Juan 5:17, ÑÑB). Mbaʼéichapa jaike Jehová pytuʼúpe? Ñepyrũrã, ñamboykévo pe pekádo ha nañañemombaʼeguasúivo. Ñañehaʼãvaʼerã avei jahechauka jajeroviaha Jehováre, akóinte ñanemanduʼa hembipotáre ha ñaipytyvõ ikatuháicha oñekumpli hag̃ua upéva. Sapyʼánte ko mbaʼe ijetuʼu jajapo hag̃ua, péro Jehová organisasión ha umi konsého omeʼẽva rupive ikatu jajapo. Opávo pe diskúrso oñemokyreʼỹ opavavépe oñehaʼã meme hag̃ua oike Ñandejára pytuʼúpe.

Pe diskúrso paha “Mbaʼépa ñaneraʼarõ?”, ojapo Anthony Morris. Peteĩ túvaicha mborayhúpe omomanduʼa enterovépe tekotevẽtereiha jajapo Jehová rembipota ko tiémpope ha ñahaʼarõvaʼerãha oñekumpli umi profesía, pór ehémplo oĩtaha heʼíva jaikomaha “pyʼaguapy ha kyhyjeʼỹme”, ha oñehunditaha umi rrelihión japu (1 Tes. 5:2, 3, JMP; Rev. 17:15-17). Péro heʼi avei ipeligrosoha ñapensa ha jaʼe oñepyrũmaha Armagedón ñahendúguinte umi mbaʼe oikóva. Heʼi opavavépe ipasiénsia ha vyʼápe ohaʼarõ hag̃ua, heʼiháicha Miqueas 7:7. Upéicha avei omokyreʼỹ enterovépe ojepytaso hag̃ua Cuerpo Gobernante ykére, ku soldadokuéra oñopytyvõháicha ijetuʼuve jave pe gérra. Omohuʼãvo idiskúrso heʼi: “Tapenekyreʼỹ ha tapendepyʼaguasúke opavave Ñandejára rehe pejeroviáva” (Sal. 31:24).

Oñemohuʼãvo upe rreunión oñemeʼẽ marandu iñimportantetereíva. Ermáno Geoffrey Jackson omombeʼu peteĩ tiémpore osẽtaha Ñemañaha ingléspe ndahasýiva oñentende, péva oipytyvõta umi noñeʼẽporãiva upe idiómape. Upe rire Stephen Lett heʼi Cuerpo Gobernante odesidi hague umi superintendénte de distríto oĩva Estados Unidos-pe ha hembirekokuérape ojejapotaha visíta de pastoréo. Avei omombeʼu pe Escuela de Entrenamiento Ministerial oñehenoitaha Escuela Bíblica para Varones Solteros, ha koʼẽrõite ojejapotaha avei pe Escuela Bíblica para Matrimonios Cristianos. Ko eskuéla rupive oñembokatupyrýta umi omendávape ombaʼapo porãve hag̃ua Jehová organisasiónpe. Ipahaitépe ermáno Lett heʼi ojejapotaha Patterson-pe dos vése al áño pe Escuela para Superintendentes Viajantes y sus Esposas ha Escuela para Miembros de Comités de Sucursal y sus Esposas. Upe rire umi yma ohomavaʼekue koʼã eskuélape ikatúta oho jey.

Ko rreunión porãite oñemohuʼãvo, ermáno John E. Barr orekóva 97 áño ha ijedavéva oĩva Cuerpo Gobernante-pe, ojapo peteĩ ñemboʼe ipyʼaite guive.b Opavave oĩvaʼekue upe atýpe osẽvo pe Salón de Asambléagui heʼi oĩ hague peteĩ rreunión ijojahaʼỹvape ha opytátava manduʼarã.

[Nóta]

[Komentário oĩva páhina 19-pe]

Enterove oguerohory umi ñemongeta

[Komentário oĩva páhina 20-pe]

Jehová ohovasa umi tembiapo Etiopíape